مراهقة والاربعيني بلهجة جزائرية

49

#المراهقة و الأربعيني:

#الجزء49:

بقيت وحدي فالدار و بالي مشغول نعيط لصراع ما يرفدليش رقدت و أنا نستنى فيه كي لحقت الوحدة تع الليل جاب الحاج هو و أم سعد و نائل، فتحتلهم الباب و تخبيت مور الباب كي ما كنتش لابسة خمار قدام نائل..
الحاج دارولو السيروم و قاعد يعيط على صراع يقولو خليتني وحدي عييت حبيتو تقتلوني ارجع أنا هداك سعد ما قدرتلوش دايها غير للرقاد و مخلي نساه و ولادو في راسي، قالو صراع بابا باش نرجع لهاديك الدار ما نرجعش.. هادي داري ما خصنيش مشاكل، قالو ترجع و أنت تقول يا سبحان الله.. عييت راني باباك تخليني على جال مرتك فيق لعمرك شويا راك سامح في أهلك على جالها، قالو بابا ماشي على جال حتى واحد أنا راني شاري راحة بالي.. داري مفتوحة ليك وقت ما جي مرحبا بيك بصح باش نرجع ما نرجعش، قالو يمال اعطيني شومبرة ليا و لمرتي نقعد هنا و بعدني على سعد، قالو مرحبا بيك بابا بصح و دارك كيفاش؟ أنا خليتها ليك ماشي لسعد و زيد ياك قال رايح يخرج الكراي و يرجع لدارو، قالو ما نحتاج لا هديك الدار لا وجه سعد.. نجي نعيش هنا معاك كيما يماك و أم سعد تان راهي كي يماك و ما تخافش ما عندنا حتى علاقة بمرتك.. منبعد قالو وش على حساب الشوفة ما راكش حايبني نجي.. قالو لالا حاشا بابا مرحبا بيك الدار دارك.. و رفع راسو يشوف فيا.. أنا النار شعلت فيا خليتهم و طلعت لشومبرتي شويا هكدا و لحقني دخل صابني نرجف.. درت ليه قتلو شوف لهنا ساعة ما يقعدوهاش هنا يا أنا يا هوما في هاد الدار.. قالي ليليان ما تزيديش عليا راهي واصلتلي لهنا، قتلو واصلة ولا ماشي واصلة هاد الهدرة ما تفيديكش، باباك على عيني وراسي بصح مرت باباك ماعندهاش بلاصة في داري دوك تهبط تحاوزها.. قالي وش نحاورز ما شفتيش الموقف لي حطني فيه ما قدرت نهدر ما قدرت نسكت ماتزيديهاش عليا يرحم والديك،. قتلو عمري ما نتهنى من مرت باباك ما نحملهاش افهم نوض حاوزها يلا..  سكت عليا غطى راسو و رقد.. قتلو مارانيش نهدر معاك؟ ما علابالكش بيا و الله ما نقعدلك هنا.. قال استغفرك الهي و أتوب إليك .. يابنت الناس اكسري الشر و ريحي.. قتلو ما نريحش و دوك تشوف وش ندير.. نضت نلم في حوايجي في الفاليزا، دور راسو قالي وش راكي ديري؟! قتلو دوك تديني منا.. قالي راكي منيتك أنت؟! راهي فاتت الوحدة تع الليل.. قتلو راني نقولك ما نقعدش يا أنا يا مرت باباك في هاد الدار.. قالي وش فيدي أنا  ما راكيش تشوفي ياك خليتلهم دار قد مطار هواري بومدين و رجعو ليا دراع يحانكو فيا.. ريحي و استهدي بالرحمن ما تتمهبلبش عليا في نصاص الليالي.. قتلو ما يهمنيييييش.. قتلك تحاوزها يعني تحاوزها سينو و الله غير نحبط أنا نحاوزها، قالي إدا حاوزتيها معنتها حاوزتي بابا بصح لوكان تزيدي فالهدرة مع بابا لسانك نقطعو.. قتلو شفت كيفاش من دوك بديت نقطع لسانك يمال لوكان يعيشو معايا وش دير؟ ما نقعدش لهنا نوض اديني يلا.. قالي ادا حاوزتها معنتها راني نحاوز في بابا.. تشفاي نهار ديتك معايا لدارهم و بابا ما استقبلكش ماشي زعفت و جيت نايض و قتلو راك هنتني قبل ما تهين مرتي.. حكمني من يدي قالي اوقفي معايا و ارفدي عليا شويا و لا أنت و الزمان عليا ليليان؟ جبدت يدي و قتلو وخر عليا ما نحتاجك لا أنت لا ماليك كرهتكم كامل و مانيش عارفة كيفاش نتهنى منكم.. رميت الفاليزا و رفدت فراشي.. قالي وين رايحة؟ قتلو بعد عليا، قالي راني نهدر معااااااك.. قتلو ما راني مرتك ما نستعرف بيك و يا ويلك لوكان تقرب ليا و تهدر.. يا أنا يا هوما في هاد الدار.. قالي بركاي ما تتمهبلي رجعي فراشك ليليان.. خرجت و خليتو رحت فرشت فالشومبرة لوخرا و قعدت نبكي.. حتى للفجر سمعتو كي خرج توضى و رجع للشومبرة صلى منبعد جا للشومبرة لي كنت فيها غمضت عينيا و درت روحي راقدة تكسل مورايا و حط راسو على يدو قالي علبالي ماراكيش راقدة و مام أنا و الله ما غمضت عيني.. خلاص بركاينا من الزعاف وش في يدي ندير رجعو بالسيف عليا حبيتيني نحاوز بابا؟! ما يقبلها لا ربي لا عبدو.. لوكان نديرها أنا و لا أنت يجي النهار وين يحاوزونا ولادنا.. باسني في ودني و حط راسو على راسي .. بعدتو و تقعدت قتلو اخرج عليا.. قالي كملتي عمرك غير فالدواس معايا ما شبعتيش؟ نصالحك منا داوسيني منا.. غير لبارح تصالحنا ليوم نتزاعفو؟ خلاص بركاينا.. قتلو يااا.. يتسمى دوك ولات الغلطة فيا و انت خاطيك ياك؟! صراع نوض عليا الله يخليك.. قالي و آخرتها كيفاش؟ قتلو تخليني.. جبد النفس و قالي براحتك..
قعدت نبكي حتى رقدت، كي فطنت الصباح حبطت صبت الحاج يقول لصراع نجيبو حوايجنا تع اللبسة برك و اعطيني شومبرة، قالو إن شاء الله بابا أنت تأمر..
عاودت طلعت لشومبرتي قعدت ما كنتش حاملتهم حتى للظهر باش حبطت صبت الحاج متكسل فالهول يتفرج و أم سعد تهدر معاه من الكوزينة، دخلت صبتها فاتحة الفريجيدار و الطنيجرة فوق النار طيب فالغدا و تڨصر و تضحك معاه، رحت نجري غلقت الباب تع الفريجيدار و قلتلها هادي كوزينتي ما تزيديش تدخلي ليها فهمتي.. ماشي خليتي الدار لي عطيناهالكم لوليدك و جايا تحانكي فيا في داري.. قالتلي كيفاش تهدري معايا هكدا ما تحشميش راني قد جداتك، قلتلها تع وجهك إدا أنت كيما جداتي يلا وخري من كوزينتي.. قالتلي هادي حالة المخلوع لي عمرو ما شاف.. و خرجت عيطت عليها قلتلها خليتلك الخير ليك..
راحت للحاج حكاتلو و بدات تبكي و تقولو نوض نروحو علاش رانا قاعدين مذلولين، و الحاج عيط لصراع منبعد قالها نوضي نروحو دوك يجي أبو حرب يوصلنا.. خسارة جي البراوية تحكم فينا و تحاوزنا.. رحت ليه قتلو عمو أنا ما حوزتكش أنت الدار دار وليدك بصح مرتك ما تقدرش نبقى معاها رجعها لوليدها و انت اقعد معانا، قالي على آخر عمرنا انت تتحكم فينا و تخمي إدا تستقبلينا ولا لالا و الله غير عيب، قتلو فواش تحكمت أنا قتلك مرتك ما نحبهاش..
دخل صراع ملبرا قالو وش كاين بابا؟ قالو على آخر عمرنا مرتك تحاوزنا.. دقيقة ما نزيدها هنا.. قتلو يكدب و الله ما حاوزتهم.......... قاطعني صراع قالي شكون لي يكدب؟ راسك نكسرو حيوانة، قتلو راني نقولك أنا ما حاوزتوش و الله ما حاوزتو بصح مرتو ما نحتاجهاش.. قالو الحاج يا وليدي على حساب الشوفة الهدرة رجعت لليليان و انا ماشي مرحب بيا هنايا.. أيا ابقاو على خير.. قالو ريح بابا  بجاه ربي.. راني حايب نفهم أنا وقتاش نتهنى من المشاكل خلااااااص.. نهرب و ترجع المشاكل فوق راسي.. قالو الحاج يتسمى حنا مشاكل يا صراع؟! يعطيك الصحة يا وليدي..
قعد صراع يعيط و زڨا عليا طلعت نجري لفوق و أم سعد تبكي قالتلو و الله ما هدرت معاها كي شفت واحد ما دار الغدا دخلت نطيب قالتلي ما تدخليش لكوزينتي.. و الحاجة وقفت معاهم..
طلع لعندي مقلق و بدا يعيط عليا قالي رايحة تهبلينيييي أنت حابسة هكدا تحطيني في موقف محرج مع أهلي حبيتي تقتلينييي وقتاش تكبري عقلك و تترباي و الله غير كرهت رايح نطرطق.. نضت نعيط معاه قتلو مرت باباك ما نحتاجهاش حبيتني نحبها بالسيف؟ قالي لاه لا تحبي حتى واحد فيهم علاش أنا قلتلك حبي كاش واحد؟! احتارمي و خمي الموقف لي حطيتيني فيه.. كاش نحط رصاصة في راسي و نتهنى من المشاكل.. وين نهمل وين نروح منكم.. و الله يا ليليان لوكان نسمع صوتك ما تلومي غير روحك.. هو خرج و أنا قعدت نبكي على زهري المسود..
قعدنا يومين ما نهدروش مع بعضانا هو في شومبرة و أنا في شومبرة.. هكدا و يجي فالليل يتفاقدني يغطيني و يبوس راسي و يخرج بلاما يهدر بصح فالنهار قالب خليقتو ماشي غير عليا على الدار كامل و رجع يخرج الصباح بكري يرجع مع الظهر يتغدا يرقد غير يفطن يعاود يخرج ما يجيش حتى الليل يدخل قبالة يرقد..
جات أم يوسف تعاوني فالدار صابت الحاج و أم سعد قالتلي علاش راهم هنا؟ قلتلها شيخي و مرتو جاز يعيشو معانا، قالتلي و أبو حرب وش رايو؟ قلتلها داوسنا قالتلي علاش؟ حكيتلها.. قالتلي وشبيك هبلتي؟ اكسبي راجلك ما تخسريهش، قلتلها وش نكسب فيه هو لي رجعهم يعيشو معانا ماشي معول يهنيني منهم.. قالتلي و هو وش ذنبو؟ قلتلها ذنبو أهلو، قالتلي لالا المفروض أنت لي تسانديه دوك ماشي توقفي ضدو.. علبالك هوما مادابيهم يبعدوك عليه ما ديريلهمش غرضهم اكسبي راجلك و احرقي قلوبهم هوما أصلا غايرين منك كي شافوه كيفاش يدللك، قلتها و أهلو؟ قالتلي ليليان تحبي ولا تكرهي هادو أهلو و كي تهدري أنت لي تباني ماشي مليحة.. قعدت غايسة صبت عندها الحق فواش قالت..
كملنا الشغل هي راحت و أنا درت العشا و طلعت بلاما ناكل، دوشت لبست و قعدت فالصالة لفوق نتفرج فالتلفزيون حتى شفت صراع طلع و راح للشومبرة لي راني نرقد فيها جا يفتح الباب انتبه لصوت التيليفون فالصالة عاود دار دخل عندي صابني قاعدة جا قعد قدامي و حط صاشي تع حلويات و قالي مساء الخير.. شفت فيه قتلو أهلا و كملت نتفرج.. شافني مغلفة روحي و مدوبليا اللبسة قرب مني قالي بردتي؟ قتلو لالا، جبد يدي  حطها ما بين يديه زيرها منبعد باسها و قالي ما تزعفيش و الله ما نخلي واحد فيهم يدنى ليك و كلشي كيما تحبي أنت.. تخدمي ترقدي تقعدي واحد ما يدخل روحو فيك ولا يحاسبك راكي في دارك و ديري وش تحبي.. بصح ما طوليش لسانك لخطر أنا لي ننضر و أنا وياك لي نخسرو..
جبدت يدي من يدو و نضت، قالي وين؟ قتلو نعست رايحة نرقد، قالي قبل ما ترقدي وجديلي رنڨيلة و هاكي هاد الصاشي جبتها ليك، شديتها عليه و هو يشوف في عينيا، حبطت نوجدلو الرنڨيلة ديالو و قاعدة ناكل فواش جابلي جات حلا قلتلها ارواحي تاكلي معايا قالتلي و الله غير جات في وقتها حبطت كاش ما نصيب حاجة تنتكل.. دات شويا و طلعت لشومبرتها و أنا وجدت عصير برتقال ليا، سمعت الحاج فالصالو قاعد يتفرج سربيتلو كاس كبير و رحت ديتهولو قلت نصالحو..
هو صح مينداك يقيسني بالكلام بصح قلبو مليح برك يتبع هدرة النسا سورتو أم سعد بصح مرات كان يقولها خليها مازالو صغيرة..
دخلت للصالو شاف فيا قالي وش تحتاجي؟ قتلو درتلك عصير تع التشينة بلا سكر و حطيتو قدامو.. قالي يعطيك الصحة..قتلو عمي اسمحلي ما قصدتش نحاوزك هادي دارك بصح علبالك أنا و... قالي ما صرا والو أنت بنتي و أنا باباك.. هزيت راسي و جيت خارجة مع لي درت صبت صراع واقف حاكم الباص تع الباب و يشوف فيا و يتبسم.. حشمت جيت جايزا عليه قالي نموت على قلبك الحنين..
خرجت و جيت نطلعلو الرنڨيلة ديالو قالي بالاكي تحرقك خلي أنا نطلعها.. خليتهالو و رفدت كاسي تع العصير و الحلوى لي جابهالي و جبت طالعة قالي ريحي معايا قتلو لالا حايبا نرقد و دخلت للشومبرة كملت كليت طفيت الضو و جيت نرقد جا هو تكسل قدامي حضني و تكى على يدو قالي وش راهي الشابة ديالي ليوم؟ قتلو راني حايبا نرقد، قالي راني متوحشك، قتلو صراع ادنى شويا و جبدت الكوفيرطا غطيت راسي، قالي ليليان هادي ماشي عقلية عندك يمات و انت راميتني وشنو ذنبي أنا؟ عاود حضني جبدت روحي قتلو قتلو حايبا نرقد وخر... قالي خلاص قرعتيها أنا راجلك حرام عليك.. قتلو إيه أنا كلشي حرام عليا و نتوما كلشي حلال عليكم.. قالي ارواحي لهنا تشوفي.. وشنو لي حرام عليك ااا.. فواش قصرت معاك أنا؟ قلتيلي ضاق خاطرك و ما خرجتكش؟ قلتلي خصك المصروف و ما عطيتلكش؟ حتجتي كاش حاجة و ما جبتهالكش؟ قلتلي راك قاسي معايا قلتلك سڨمي روحك و امشي سواسوا و لي يدنى ليك نفرجك فيه.. قلتيلي ظلمتني انت و اهلك و خرجتك من عندهم و الشي لي صرا ماشي بيدي.. حتى في واجباتي عليك كي غسيل حوايجي كي ماكالتي و مخليك على غرضك و جبتلك ملفوق خدامة تعاونك باش ما تعيايش و تقوليلي الدار كبيرة ما لحقتش.. فهميني وش نلت منك؟ طلبت حقي الشرعي و انت كل مرة تمنعي روحك عليا و ديري فالسبايب حتى تسمطيهالي باش جي معايا..خافي ربي هاد الشي حرام.. قتلو و أنت ما هامك من الدنيا غير هاد الشي.. أصلا أنت تسايسني ماشي حبا فيا برك باش تدي وش تحب فالليل.. تخمامك غير في روحك ماشي بيك أنا.. قالي علاش ربي خلقت غير انت مرا في هاد الدنيا؟! علاش كي نتهلا فيك تقوليلي تحوس على صلاحك علاش ما تقوليش توحشني و حن لحضني؟ لوكان جا على النسا راهم برا على ريسانهم بصح أنا مخليهم كامل و جاي ليك حلالي و تحلالي معاك.. بزااف فيقي لعمرك شويا.. يمال أنا علاش تزوجت.. تروحي و جي قدامي و مع لخر هكدا؟ قتلو لي يسمع يقول راني هاجراتك.. قلتلك نعسااااانة نعسااااانة... قالي وقتاش نعستي و انت غير مقبيل وين نضتي، قتلو المفيد دوك وش تحتاج؟ قالي ليليان وقتاش تفهمي مرضتيني.. أنا عندي حق عليك راعيني.. عند يمات و أنت زعفانة قلت خليها تتهدن و براحتها بصح خلاص كثرتي على ما وصاوك.. قتلو ما راهيش نافحتلي.. قالي و أنا نستنى حتى تنفحلك؟ قتلو إيه و قتلك راني نعسانة حبيت نرقد روح دوك.. قالي علبالك لي ترقد و ما تمرضيش راجلها ربي و ملايكتو يلعنوها.. قتلو صااار .. قول و الله... قالي ما رانيش جايب هاد الكلام من جيبي هادا كلام الرسول صلى الله عليه و سلم.. قتلو و أنا ماشي من دينك يمال ما تقعدش طبق شريعة دينك عليا.. علاش أنا كاش نهار فرضت عليك المسيحية؟ خليك في دينك و خليتي في ديني .. [ تفكرت عثمان عريوات في فيلم عايلة كي الناس كيما بنتو ما حبتش تسكت قال لولادو واحد فيكم ينوض يسكت عليا هاد العڨرب ولا يعطيها طريحة تع الكلاب 😤]
قالي اااا دوك ولات دينك وديني.. يمال اسمعي آخر جملتين من ديني و نوض موراها ما نطولش معاك ديني يقول ( وانكحوا ما طاب لكم من النساء مثنى وثلاث ورباع ) لخطر يعرف بلي شي نسا ما يستهلوش تساعفهم و ما ينفع معاهم غير كي تخبطهم بختهم.. ناض رمى المخدة عليا و خرج و هو يقول ينعل هاد المعيشة و ينعل لي جابك لعندي..
قعدت غايسة قلت في هدا راهو منيتو؟ علاش بالسيف قتلو نعسانة ما راهيش نافحتلي..خصني غير هو.. جبدت الغطا على راسي و رقدت كي فطنت الصباح حبطت صبتو قاعد مع باباه و عاقد حواجبو.. شافني دور وجهو.. وجدتلهم الفطور كامل كلاو غير هو ما حبش، قالو الحاج ارواح تفطر يا وليدي، قالو مارانيش قادر قالو علاش غير لخير وش صرا؟ قالو كول بصحتك بابا ما كاين والو..
بقى نهار كامل و هو مقلق واحد ما يقدر يهدر معاه.. قالهم راني راجع لخدمتي في الجيش نهار الأحد، قالتلو الحاجة أووووه يا وليدي تان؟ ماكاش رجعو خلاص بطل هكدا راك مليح فواش فاداتك هديك الخدمة.. هوما يناقشو فيه و هو قالب خليقتو و مشنف.. كي تقلق ناض يعيط قالهم أنا راجع راجع واحد ما يدبر عليا.. إن شاء الله نموت و ما نقابلش وجوه الشر.. تعنكر فيا و ناض خبط الباب موراه و خرج.. قعدو يخزرو في بعضاهم قالو هدا وشبيه؟! شافت الحاجة فيا و تعنكرت.. كملت شغلي و رحت قعدت معاها قالتلي وشبيه صراع وش صرا ما بيناتكم؟ قلتلها مابيه والو هو يزعف وحدو وحدو.. قالتي يزعف وحدو و لا أنت؟ سكت عليها و بقيت نشوف فالتلفزيون.. قالتلي واجبيني يا الراس اليابس.. أنت جوعي السبع لفوق و حنا يجي يخرج زعافو فينا.. شفت فيها و تبسمت قلتلها يما ما رانيش مقصرة معاه بصح هو لي ما يقدرش.. قالتلي وليدي و نعرفو لوكان ما لحقتلوش للعظم ما يتقلقش هكداك..
حنا نهدرو حتى سمعت صوت نائل، لبست خمار من عند الحاجة و خرجت استقبلتو.. وجدتلهم لاتاي و حطيتلهم دخل صراع قعد معاه.. عطيتلو كاس لاتاي شدو و ما شافش منبا في وجهي..
بدا نائل يحكيلو على سعد..جات عيني في التلفيزيون كان الحاج دايرو في قناة القرآن و منقصلو.. جات الآية تع و انكحوا ما طاب لكم من النساء .. ضحكت وهزيت راسي .. شافو كامل فيا مستغربين قلتلهم على التلفيزيون برك.. نطق صراع قالي هدا كلام الله وشنو الحاجة لي تضحك في كلام ربي راكي تستهزاي بيه؟! قتلو لالا ماشي على القرآن برك تفكرت حاجة، دورو ريسانهم ما عجبهمش الحال و كملو يحكيو.. رفدت السنيوة و خرجت..
قلت في قلبي هاد التشناف كامل على جال الفراش؟! عندو هداك الشي كي الماكلة و الشراب.. هو يعتبرو أمر ضروري و أنا نعتبرو مزاجي يعني ماشي لازم إدا ماكنتش نافحتلي.. كي ناقشو يقولي أنا ما  نحبش نلعب بالنسا و ما نحبش نروح للحرام على هديك نتزوج و ندير فالحلال.. ما نقدرش نقول بلي حيوان و همو غير رغبتو لخطر مرات يقدر كي يكون عندي عذر باين و لا كاش سبة بصح كي ما يكونش و ما نحبش يقلبها عليا و يولي مقلق واحد ما يقدر يهدر معاه..
غسلت الكيسان و عاودت دخلت قعدت معاهم حتى نسمع في نائل يقول لصراع لوكان غير تفتحلي شومبرة عندك أبو حرب أنا سعد ما قدرتش نعيش معاه.. قالو صراع علاش انا الدار خليتها لسعد ولا ليكم يا نائل؟ قالو سعد قاعد غير للمشاكل لا خدمة لا قدمة و هوما في بزاف ما قدرتلهمش.. كي يطلب مني الدراهم و نقولو ما عنديش يبدا يعيط و نتضاربو.. المعيشة معاه ما تنحملش.. حتى و ادا ما قبلتش تعطيني شومبرة نروح نكري دار و نخرج و ما نقعدش في هداك الوضع، قالو و سعد علاش ما يرجعش لدارو؟ قالو الكراي مازال باش يخرج بصح أنا علبالي بلي ماشي معول يخرج من الدار الكبيرة، السيد عاجبو الحال رافدين عليه كلشي و هو راقدة و تمونجي  خلاص تكل علينا.. قولي إدا ماراكش موافق باش نجيب عائلتي نروح نكري..
قعدت حالا عينيا في عينين صراع قالي مرحبا بيك داري مفتوحة.. قتلو يمال علاش رحلنا من هديك الدار بدلنا البلاصة برك؟ قالي ما دخليش روحك ماشي دار باباك امشي من قدامي يلاااا.. قالو نائل لالا إدا ماراهيش قابلة مرتك ما نثقلش عليكم.. خليت صراع قاعد يبررلو و طلعت لفوق لشومبرتي طميت حوايجي في فاليزا بدلت لبست خماري و حبطت.. الحاج كان خرج هو و نائل و صراع كان رايح ينوض الطونوبيل و يخرج شافني حبط و جا قالي وش كاين؟ قتلو باش نقعدلك هنا غير احلم و خلي أهلك يفيدوك.. وخر من قدامي تشوف.. قالي عوذي من الشيطان و ادخلي للدار، قتلو ما ندخل ما نريح هنا فهمممممممت.. وخر من قدامي طبعتو و جزت و أنا نغلي.. خرجت الحاجة و أم سعد سمعوني نعيط و هو محبسني فالڨاراج قالي نقصي صوتك الجيران.. ادخلي ما تبهدليناش.. قتلو نبهدلك ما نبهدلكش غير باش نقعد هنا انساها و دوك طلقني.. قالي ليليان ما تتمهبليش ريحي نهدر معاك.. قالتلي الحاجة وش كاين يا بنتي ادخلي مرضتي الراجل.. قلتلها سلامتكم ما كاين والو.. أنا كرهت و خلاص.. طلقونييييي اعتقوووونييي.. قالي ليليااااااان ما تعليش حسك ادخلي نهدر معاك ادخلي.. هو يجبد فيا و أنا مخشنة راسي باش نخرج.. جبدني للطونوبيل و قالها يما ادخلي دوك أنا ندبر راسي معاها.. غير نوض الطونوبيل قتلو زكارة فيا رجعت خوك للدااااار.. كي ما عطيتلكش حقك عاقبتني هكدااااا..
قالي و الله ما هكدا هو حرجني و ياك سمعتي كلشي بوذنك نحاوزو؟ قتلو هداك المشكل ديالك ما يهمنيش.. أنا خرجت باش نستقر و نريح و مع لخر رجعو كامل يتسمى ما درنا والو. أنا ما نقعدش.. قالي راكي تشوفي فيا راضي؟ ياك أصلا أنا لي حبيت نرحل ملتم بصح ربي باليني بيهم وش ندير قوليلي.. قتلو كلشي من تحت راسك و أنا علبالي علاش درت هكدا، قالي علاش راكي تشوفي فيا حابس باش نجيب خويا من راسي و نزي المشاكل على روحي؟! قتلو شوف نقولك حاجة مادام اهلك في داري ما نرجعش ما كفانيش جبت باباك ومرتو دوك تزيدلي نور بمشاكلها.. أنا خدمت و ليليان ما خدمتش أنا عييت و ليليان ما عياتش علاش ليليان هكدا و أنا هكدا و..و...و.. و الله ما صرات ما نرجعش لوكان تقلب الدنيا، قالي و الله غير نشرط عليهم واحد ما يدنى ليك ولا يدخل روحو فيك و الدار دار دارك.. خلي نعيشك برا و كي تهدى نفوسنا نرجعو.. قتلو انت ما راكش مهتم واقيل عاجبك الحال، قالي و الله ما راني قابل هاد الشي بصح وش في يدي و الله غير رايح نكلاطي أنا نبعد و هوما لاصقين فيا وين نهرب قوليلي وش ندير نحاوزهم.. هادو أهلي و ربي سبحانو ممتحني بيهم و يختبر صبري.. ما علباليش وقتاش تخلاص مشاكلي شاب شعري مرضت خلاص و واحد ما راهو حاس بيا.. هو يعيط و يشكي و أنا عاقدة حواجبي و قلبي خارج منبعد سكتنا في زوج قعد يدور بيا بالطونوبيل حتى طاح الليل قالي رايح يأذن العشا خلاص امشي نرجعو للدار ماشي كي علبالك بلي نعشقك تحكميني من اليد لي توجعني، قتلو ما نحكمك ما تحكمني غير باش نرجع انساها و الله ما نرجع.. دور الطونوبيل و داني لدار هيام.. جا يحبط قتلو ما نحبطششش تديني لدار خالي قالي إن شاء الله قتلو راك تستهزا بيا..خبط باب الطونوبيل و دخل لدار ختو.. شويا و خرجت هيام و علي، قالتي هيام احبطي تشوفي احبطي.. قلتلها لالا أم علي عيطيلي لصراع، قالي علي أوووو زعما راهي مقلقة ما نهدروش معاها.. احبطي أم الديڨات ما ديريش علينا رومبو احبطيييي.. قتلو علي خليني الله يخليك حايبا نروح.. قالي نديك وين تحبي بصح دوك احبطي و جبدني من يدي و هيام تضحك و تقولي الناس كامل رايحة تخرج درتيلنا سمير كحل ادخلي للدار..
حبطوني دخلت صبتو يصلي بديت ننسف لوكان صبت ناكلو.. قتلو في قلبي فوقها تصلي و تلعبها تخاف ربي و انت انتقمت مني برك كي ما عطيتلكش حقك بصح اصبر عليا لو كان ما نخرجهاش من عينيك ما نتسماش ليليان..
قعدنا و هو كمل الصلاة و قعد يڨصر و يضحك مع علي و بنات ختو..
حطتلنا هيام نتعشاو.. صراع شاف فيا و قالي أيا الغضبانة مدي يدي تاكلي لالة مولاتي السلطانة.. قالو على هادي سلطانة؟! قالو هادي أم حرب الهوا لي يدخل لصدري، قالو اييي هييي خالو راك طايح لشواشيك.. درت ليه قتلو بلع فمك ضحكت و دورت وجهي عليه.. قالتلي هيام كولي كولي لي ياكل بضرسو ينفع نفسو، قلتلها و الله ماني قادرة..
كملو تعشاو منبعد حطو لاتاي و قاعدين يڨصرو، قالت هيام لصراع وشبيها؟ قالها أم علي أنا نحكيلك و أنت احكمي و راهي قدامك.. شكون لي شرا الدار شكون لي بنى شكون لي أثث.. ماشي أنا لي تمنيت و أنا لي حلمت و أنا لي شريت و بنيت، طلبت مني هي هاد الشي ولا كلشي من راسي؟ ليا؟ أنا وش راحلي ملبكري عايش عند أهلي.. رحت شتريت دار كبيرة و عمرتها بڨوسطوها و الله ما كاش حاجة ما خديتش رايها فيها برك باش نحسسها بلي الدار دارها و نعوضها على المشاكل لي شافتهم مني و من أهلي.. راني نقول فالصح ولا نكدب؟ تغلط و نسامح، ديباسي ليليميت و نجوزلها، تتقلق و نكبر عقلي، نرفدها نتفهمها نراضيها نعقلها نجيب و ندلل و ندير حساب لكل كلمة نقولها نخاف نجرحها.. بصح هي يا أم عالي ما تسنادنيش.. أقل حق ليا عندها ما ديروش.. وش ذنبي بأهلي علاش انا لي جبتهم و لا عرضو رواحتيهم؟ قلتلهم ياك الدار كامل خليتهالكم قالولي راك تحاوز فينا.. ديري روحك في بلاصتي وش ديري؟ قالتلو هيام صح ما عندك ما دير أصلا أم سعد و ولادها مشكل ما علباليش كيفاش تتهنى منهم.. قالها أنا علبالي بلي أم سعد خبيثة زعما دارت روحها تخدم و طيب و لوكان تهدر ليليان تبدا تتمسكن باش تبان هي لي ماشي مليحة بصح ارواحي انت و فهمي هادي قد ما هدرت والو راحت غلقت الفريجيدار عليها و قالتلها اخرجي من كوزينتي و ما تزيدي توشي والو و لوخرا صابتها فرصة باش تحط العيب فيها و تحوسلي غير على الغلطة إدا وقفت مع مرتي باش تروح تسمع بيا كامل العشيرة و تقولهم يمشي بشور مرتو و قتلنا بالشر.. يا ناس حسو بيا افهموني و الله غير عييت كرهت قوليلي بجاه ربي وشنو الحل مرتي تقولي ما نحتاجكش و يما تقولي حليتلها العين بزاف حتى طلعت فوق راسك و بابا يعيط و يقول ما راهوش قابلني نعيش معاهم على جال مرتو و أم سعد بلاما نحكيو.. كيفاش حبيتوني نتصرف؟ ما قدرت نهدر معاها.. علبالي حقها و دارها و انظلمت.. ما قدرت نهدر مع يما و هي تعيط و تقولي حليتلها العين.. ما قدرت نحاوز بابا ما قدرت نكسبتي مرتو فالدار .. وليت نهمل من الدار باش نرتاح بصح ما رتحتش و هي..... خليها تحكيلك و دار ليا قالي اهدري علاش سكتي؟ قتلو خلاص انت هدرت علاش أنا نقدر نهدر رجعتني زيرو.. قالي أنا رجعتك زيرو؟ و لا راني نعطيلك فالحق.. كيفاش ندير معاك ما تفهمي ما تسمعي و الحل معاك دوك كيفاش؟ قالتلو هيام خلاص خليها خويا هدا مكتوب الله و أنت قلت حقها خليها ليوم تتهدن و تريح هنا أنا نهدر معاها و نعقلها و إن شاء الله ما يكون غير لخير..
مدلها دراهم و قالها اديها غدوا الصباح للسوق تشري و تفاجي على روحها تبدل الجو.. قالتلو إن شاء الله كون هاني خويا ما يكون إلا خاطرك..
هو راح و هيام فرشتلي تكسلت و قعدت نخمم و نطلع و نحبط منبعد قلت خليها لربي.. ما فقتش لروحي عقداش رقدت حتى فقت على صوت قدامي كان وجهي للحيط درت قلت بالاك صراع ما قدرش يرقد بلا بيا و جا لعندي بصح ظهر ماشي هو.. كانت الظلمة شفت فالكوانة قطة كحلة و عينيها يشعلو.. بديت نحاوز فيها ما حبتش تتحرك من بلاصتها منبعد بدات تمعوي و تنسف في وجهي صغت.. علي كان قاعد فالهول دخل يجري شعل الضو قالي وش كاين؟ قتلو كانت قطة كحلة هنا و دير فوحد الصوت يخوف بالاك خرجت من التاقة.. راح للتاقة قالي ما كاين والو ليليان راهي مغلوقة.. دخلت هيام قالت وش كاين؟ قالها علي كانت تصوغ قالت شافت قطة كحلة و خوفتها و التاقة راهي مغلوقة ما كاين والو.. قالتلو روح فيريفيي الباب تع السطح بالاك راهو مفتوح.. طلع علي و عاود رجع قالها راهو مغلوق، قالتلي بالاك كنتي تنامي، قلتلهم لالا و الله غير كانت هنا و نسفت عليا.. حوسو الدار كامل ما صابوهاش منبعد قالها علي كنت هنا فالهول لوكان دخلت نشوفها انا حتى سمعتها صاغت رحت نجري ليها..
رفدت التلفون عيطت لصراع صونا صونا ما رفدليش قعدت ننسيستي حتى رفد باين كان راقد قالي وي ليليان قتلو صراع تعيش ارواح.. قفز قالي خير وش كاين؟ قتلو راني خايفة بزاااف.. قالي راني جاي دقائق و نكون عندك..
قعدت خايفة و يديا يرجفو و هيام تكالمي فيا قالتلي ماكاين والو ارجعي ترقدي.. جا صراع بحوايج الرقاد و البليغة رامي برك فيستا ملفوق على البرد، قالي وشبيك وش كاين علاش يديك راهم يرجفو، قالتلو راهي تقول شافت قطة و حوسنا الدنيا ما صبناهاش الدنيا كامل مغلوقة حتى الخزاين و القجور و حوسناهم..
قتلو لالا و الله يا صراع غير شفتها و كانت تنسف في وجهي مانيش نتخايل.. قالي خلعتيني و جبتيني فهاد الليالي على جال قطة؟! الله لا تربحك أنا عمبالي كاش ما صرالك.. دخلت للشومبرة لي كنت راقدة فيها و قعدت نشوف و يديا يرجفو و سناني يتخابطو ما عرفت من البرد ولا من الخوف.. انتبهلي صراع قالهم علاش راهي ترجف هكدا.. حكملي يديا و قالي وشبيك وش صرالك؟ قالتلو هيام بالاك بردت ريح هنا كمل رقادك و الصباح اديها.. دارلها براسو إيه طفى الضو و غلق الباب، قتلو لالا شعل الضو، قالي أنا هنا و انت تخافي؟ ساماني تكسل و جبدني لحضنو حط راسي على صدرو و قعد يمسحلي في شعري خلاص ما تخافيش راني هنا ارقدي و بدا يرتل فالقرآن على راسي حتى قال (سواء عليهم اانذرتهم أم لم تنذرهم لا يؤمنون) .. تهدنت و رقدت..
نضت الصباح صبت صراع راقد تبسمت و بستو في خدو هو حس بيا فتح عينيه و تبسم قالي صباح الخير قتلو صباح النور.. جبدني لعندو حضني قالي كملتي هبالك؟ تبسمت قتلو مازالني ماشي حايبتهم برك على وجهك كي جيت نحبك، حكم حناكي و باسني تفاعلت معاه و هو هبل بعدتو قتلو خلاص خلاص خلينا نوضو.. قالي وين راكي رايحة ريحي هنا..قتلو نروحو لدارنا و ناخدو راحتنا اسمع صوت هيام ديجا راهي فالكوزينة.. قالي ريحي برك ما تحوسيش تفهمي، قتلو صرراااع .. تنهد و قالي يمال نوضي بدلي خلينا نروحو لدارنا يلا.. قتلو شفت حالتنا كيفاش مخليين دارنا و بايتين هنا من تحت راس مرت باباك.. قالي لالا حياتي من تحت راسك أنت و هي علاش.. قتلو ااااا وييي.. قالي اوووه..رايحة دوريهالي دواس ما عييتيش.. أيا نوضي البسي بلخف رايح نطرطق.. تبسمت و نضت قلت لهيام صباح النور .. خرج صراع من الشومبرة قالها صباح الخير ختي.. قالتلو صباح الخيرات ارواح تفطر.. قالها لالا و الله راني  مزروب نديها للدار عندي خدمة.. قالتلو لالا تفطرو قبل منبعد روحو عندك الوقت للخدمة قاتل روحك عليها يا خويا ما نعرف وش نلت منها.. شاف فيا و تبسم قالها و الله ما نلت منها والو بصح وش نديرو هادي هي سنة الحياة..
راح للصالدوبا يغسل رحت موراه صبتو محبط راسو و يغسل في وجهو بالصابون نغزتو في جنبو قفز و قال شكون.. قتلو أنا خف الزين كمل.. كمل يغسل وجهو و هو يهدر قالي إدا دار هيام تنحيلك التشناف هكدا من اليوم كلما تقلبي خليقتك نجيبك لهنا..
فتح العين باش يشلل وجهو سربيتلو الشومبوا في يديه هو يشلل و الرغاوي يزيدو.. ناض يعيط قالي وش درتي؟ ريحة الشومبوا بديت نضحك.. جبد السربيتة مسح وجهو قالي يتسمى جيتي تتبلاي هكدا؟ جبدني لداخل و غلق الباب قالي جبتيها لروحك.. قتلو لالا ههههه وخر عيب صراع .. دارلي اشششششت وقف يبوس فيا و أنا نبعد عليه سمع صوت هيام تهدر مع بناتها بعد و قالي جبتيها لروحك اليوم استناي برك نوصلو للدار.. جا يكمل رحت للشومبوا قالي خلاص بركاي من التمهبيل خليني نغسل في عقلي و عيط لختو أم علييييي .. هادي ما تستحيش علاش راكي مخليتها في دارك.. قالتلو فسدت يا خويا فسدت كيفاش كانت و كيفاش رجعت خصها شويا تزيار.. قلتلها واحد ما فسدني من غير خوك.. حكمني من كتفي و عطاني كوتبي و حاوزني و غلق الباب كمل يغسل.. قتلو معليش دوك تشوف.. قالتلي هيام علاش راكي تتبلاي في خويا.. قلتلها خوك شباب و كامل يتحرشو بيه اسمهان.. إخلاص و ما نعرف شكون.. مام أنا يعجبني ضحكت قالتلي ههههههههه اسمهان عروسة أبو صفاء؟ قلتلها تعرفيها هديك الساقطة قالتلي وعلاش..خرج صراع ينشف في وجهو قالي خيري ألفاظك وشنو هادي ساقطة عيب.. قتلو ملافظي عاجبتني عمبالك كيما ملافظك.. قالي إيه هديك هي حنا خوناء و ملافظنا ماشي ملاح.. راهو سيبويه قريب يخرج من القبر وين قريتي انت قواعد اللغة العربية يرحم باباك، ناضت هيام تضحك قالتلو اعذرها أصولها ماش عربية.. قالها واحد ما هلكنا قد هاد النوع تع العيباد .. هادي تركمانية دخلت على عروبتنا شرشمتها و خوها أصلو مسيحي و دخل الاسلام موديفيا فالدين كيما يحب و طلع مع الإرهاب.. خليونااا.. خزرت فيه بنص عين قتلو و أنا علاش خلاص ما نزيدش نهدر و دخلت للصالدوبا.. دار لهيام قالها ختي انت وجدي الفطور و أنا نتفاهم معاها روحي.. ضحكت و قالت ههههه تفاهمو بصح ما طولوش... دخلت نغسل عاودلي الضربة تع الشومبوا و يضحك سكيمي..  حكمتو بزوج يديا حضنتو و مسحت وجهي في تريكوه.. عيط آاااا لالا ما عنديش حوايج.. قتلو باش مرة اخرى ما تزيدش تتحرش بيا.. نحا التريكو و قعد غير بتريكودبو قالي الله لا تربحك نخرج عريان دوك انا و لا وش ندير.. مشيت يدي على دراعو باثارة و جيت خارجة.. جبدني ليه قالي جايا تلعبي بالنار.. قتلو عاجبني الحال.. حكم وجهي ما بين يديه و يبوس كي العطشان.. عيطلنا هيام بعد عليا غسل وجهو و خرج.. انا غسلت وجهي تان و لحقتو شافتني هيام ضحكت و راحت..
خبطني صراع لظهري قالي روحي دبريلي تريكو و لا أي حاجة نلبسها..
قعدنا نفطرو و صراع غير بالتريكو دبو.. جبتلو الفيستا حطيتها على ظهرو و قربتلو الفورنو باش يدفى قتلو هادي باش ما تزيدش تتحرش بيا.. علي و هو متكسل قال وبيتحرش بياااااااا.. ضحكت أنا و هيام.. قالو صراع نوض روح جيبلي حوايج.. قالو اصبر خالو نحكيلك حكاية و بتحرش بيا.... هو يحكي و حنا نضحكو و صراع عاقد حواجبو.. قالو خالو أنت ما شفتهاش  كيفاش طاحت عليه بالضرب و تقولو أنا مرت أبو حرررب ما تعرفش أبو حررررب.. حتى غاضني السيد مسكين و هي تخبط فيه لراسو طق طق.. صراع حصلتلو من الضحك دار ليا قالي هكدا نحبك تكوني تربيتي غزيتيلو.. قالو علي إيه غلطتو و هو علاش ما يعرفش أبو حرب غزاتلو.. قلتلهم بصح و الله غير غاضني كي جبد الباج ديالو و ظهر يقرا مدسين.. حبيت نطلب منو السماح لوكان شفتو شباب يهبل.. أنا تان حابسة ضيعتو من يدي سينو لوكان هربت معاه شكون كيفي طبيب أردني.. صراع قطع الضحك فالهوا و عقد حواجبو قالي وشنو هاد الهدرة اترباي سينو نجبد عليك بكف نسڨملك لسانك.. قتلو وشبيك راني نڨصر.. 
علي راح للصالدوبا و صراع كمل ياكل محبط راسو و عاقد حواجبو، و هيام نغزتني قالتي كولي و سكتينا ما تزيديش تعميها و تغضبي عندي هنا.. ضحكت معاها هو ما زدتش سمعت صوتو ما علاباليش وش فهمها.. كي جينا رايحين قال لهيام أم علي امشي تروحي معانا.. قالتلو لالا خويا راني نقري فالدراري..  قالها جيبي دوزانهم و قريهم عندنا ليوم جاي نائل و عايلتو رايح ندير الشوا فالجنان، قتلو فرحان بيه و دايرلو استقبال.. قالي خويا و نستقبلو بوجه مليح يمال ندور عليه وجهي و نحسسو بلي بلي مانيش حايبة.. تنهدت و قتلو لالا كيفاش لوكان ذبحت زوج كباش و درت وليمة.. ما واجبنيش لبست الفيستا فوق تريكوبو و قالنا راني نستنى فيكم برا..
بدلنا و خرجنا و علي كمل رقادو..صبنا نور و نائل فالڨاراج و يدخلو في دوزانهم للشومبرة لي لتحت.. لخطر صراع كي رجعو أهلو يسكنو عندنا عطالهم  شنابر لتحت و خلا كلشي الفوق لينا..
سلمت عليهم و دخلنا قعدنا فالصالو كان الحاج و أم سعد و التوام أحمد و محمد يلعبو.. دخل صراع قعد فالهول و عيط نااااائل .. ارواح خويا دقيقة أنت و مرتك عندي هدرة معاكم.. جاو كامل لعندو.. قالو شوف خويا مرحبا بيكم و الدار داركم بصح يلزمنا نحطو النقاط على الحروف ملول قبل ما نبداو و بابا راهو يسمع.. علبالكم كامل بلي أنا شريت دار و بنيت و رحلت باش نتهنى من مشاكل مرتي مع النسا.. يكون في علمكم انا ما خرجتش على جالها خرجت على جال راحتي.. مرتي ما عندها لا أهل تروح تشكيلهم و لا حبيبة تروح تحكيلها.. قعدتلها غير أنا جي تفرغلي هدا دارلي و لوخر عملي و انا خلاص مانيش قادر نشوف الطريق عييت.. رحنا و تهنينا من المشاكل و دوك رجعتو مرحبا بيكم بصح من دوك نقولهالكم أم سعد و نور هديك الهدرة تع ليليان رقدت ليليان ناضت ليليان ما خدمتش الشغل.. واحد ما يدخل روحو فيها ما نيش قادر جي تشكيلي و ندور عليكم بعليها.. نسمع كلمة من عند أم سعد و لا نور عليها تولي الهدرة معاك نائل أنت و بابا.. قالو نائل راهي تسمع يما و مرتي وحدة ما دخل روحها فيها الدار داركم.. انا شهور برك تعاود تمشي خدمتي مليح نشري دار و ندي عائلتي و يما.. قالو الحاج حنا ما عندنا والو معاها برك تشد لسانها و تقادر.. قالو صراع راهي قدامكم تسمع.. لوكان تزيد معاكم فالهدرة بكلمة ورقة طلاقها توصلها بصح انت يا بابا تان اعرف كيفاش تحكم في مرتك المفروض الكبير يكبر عقلو و يرفد الصغير..
طلعت للشومبرة نبدل و نبكي دخل قالي ياك هدرنا ليليان بلخف رجعتيهالي مناحة.. قتلو ماشي بيدي نحس أحلامي معاك كامل وحدة ما تحققت.. لا قراية.. ما  لبست غوب بلونش كي البنات.. لا دار لا والو.. قالي خلاص و الله غير نحطك ملكة فوق راس كل واحد ذلك و آذاك بصح ساعفيني، قتلو ما عرفت أنت لي ظالمني و لا أنا لي ظالماتك و لا الوقت لي ظلمنا.. جبدني لصدرو باس راسي و قالي إدا أنت لي ظالمتيني راني راضي بظلمك و إدا الوقت لي ظلمك انا راني راعي و سند ليك برك رضيني و اسمعي لكلامي و لي تحبيها نديرها لك.. أنا باباك و خوك و راجلك و كلشي لي تحتاجيها راني هنا.. مسحلي دموعي و قالي هاد العينين الشابين ما نحبش نشوفهم يبكيو تفاهمنا؟ درتلو براسي إيه..
سمعنا الدقديق فالباب بعدني من حضنو و قال شكون؟ فتح أحمد وليد نور الباب قالو هدا انت يا وحد اللسلوس قالو قالك بابا ارواح.. ضحك قالو قولو راني جاي.. راح يجري و يعيط تاي تاي عمو تاي تاي (زعما عمو راهو جاي) .. دار ليا قالي كيما هاد الوجوه فالدار ماشي نعمة؟ تبسمت.. قالي نحبط نشوف نائل و نعاود نرجع بالاكي تحبطي.. تبسمت و عاودت سڨمت روحي و ماكييت شفتو بطا حبطت صبتو خرج..
دخلت للكوزينة وقفت مع البوطاجي نفرز صبتهم حاجة ما حاطينها في بلاصتها.. دخل صراع قالي حبطتي.. هادي هاد الكبدة قطعيها.. شديتها عليه.. حوطلي خصري بيديه و قالي توحشتك.. قتلو صراع بالاك كاش واحد يجوز.. قالي ما يهمكش.. نشوف هاد الحلاوة كامل و ما تخلينيش نذوق شويا ولا ما نستاهلش.. قتلو اديني شويا خليني نكمل نقطع.. قالي  كيفاش يعني راني عيان و أنت ما حبيتي تحني عليا و لا تساعفيني.. قتلو وشمن تعب علاش وش درت؟ قول كبرت و ما وليتش تقدر.. فتح عينيه مليح و رفع حواجبو قالي كبرت؟!! قتلو إيه شوف الشيب في لحيتك و شعر صدرك خلاص وقتك.. ضحك و حضني بالزور قالي كملي و تشوفي هاد الشايب وش يدير فيك..
هدرها بالضحك و خرج بصح حسيت بلي غاضاتو هاد الكلمة و خباها بالضحك..
كملت قطعت الكبدة و خرجنا فرشنا فالجنان و صراع و نائل يشويو.. أنا نمشي و صراع يتعنكر و يشرلي باش نطلع للشومبرة همستلو قتلو حتى نكملو.. قرصني و قالي اطلعي راكي ذوبتي قلبي ضحكت و قتلو لالا.. كلما يلحقني نهربلو من بلاصة لبلاصة..
ما كملناش حتى للعصر جوزنا اومبيلونس هايلة الضحك و الڨصرة.. جبدني بجيه و همسلي و هو يزير على سنانو اطلعي رايحة تخرجيني من رحمة ربي، قتلو و إدا ما طلعتش وش راح دير؟ قالي راني طالع قلبك خمس دقايق نلقاك قدامي و يا ويلك لوكان ما جيش..
هو طلع و أنا قعدت نغسل فالماعن حتى دخل علي يعيط لصراع جاو صحابو.. حبط و هو يلبس فالفيستا قالي واش ليون ارتحتي دوك ساعة و أنا نقولك اطلعي.. ضحك ضحكت معاه..
كملت شغلي و طلعت لفوق جبدت حوايجي و دخلت للدوش تشوكيت صبت الدورة الشهرية جاتني دوك وش يقنعو بلي عندي عذر..
دوشت و لبست دفيت روحي مليح و رقدت السطر قتلني ما خلانيش نرقد قاعدة غير نتلوى فالفراش..
فالليل دخل صراع حسيت بيك كي تكسل فالبونك قالي علاش راكي مقمطة روحك هكدا ماشي قلنا وجدي روحك ما كاش قد البساطة علاش غميتي روحك بالحوايج.. حضني قتلو وخر شويا صراع، قالي وشبيك ماراكيش متوحشتني؟ قتلو ظهري راهو يوجع، قالي آاااا صبتي سبة جديدة، قتلو عندي عذر، قالي وشمن عذر، قتلو قتلك عندي عذر وشنو؟ خبط المفاتح على الخزانة حتى قفزت من بلاصتي قتلو اييي وشبيك... قالي من الصباح و أنت جي من و تروحي من و تلعبي بيا بصح أنا لي حمار نجيب و ندي و نراضي و ندلل و هادي آخرتي تعب الراسة تاعك يا بنت الكلب، قتلو اييي وشبيك راك منيتك علاش راك تيدسب فيا علاش هاد الشي بيدي.. قالي قسما بالله غير جذابة انت ما تحبينيش قلتي بفمك انا لي حابسة لوكان هربت مع طبيب.. عندك الحق أنا كبرت و شبت تحوسي على واحد صغير و قدك.. خبط الفيوزة كسرها
قتلو راك تحسبلي في كلامي و وش نهدر كنت نڨصر معاك برك كيفاش ما نحبش.. قالي علاش راني نزيد عليك؟ قلتي هاد الكلام و لا لالا؟ عمبالك ما نعرفكش؟ كلما نجي نهدر معاك طمي حوايجك و تقولي نهمل منا و نهرب و مانيش حاملاتك و كرهت المعيشة معاك.. ما كالاه ديري السبايب بأهلي قوليها ملخر نحوس على واحد قدي و خلاص بنت الحرااااام.. قتلو نحط يدي فالنار ادا راك في عقلك.. قالي وشنووووو.. قتلو صراع وخر.. قالي انا مهبول و شايب و ما ننفعكش يااااااك.. قتلو بعدني وخررر.. حكمني من رقبتي و يتعنكر فيا بديت نصوغ و نضرب فيه.. طلقني و خرج.. قعدت ساعة و أنا نبكي غاضتني كيفاش يسب اهلي و يقولي بنت الحرام و يزيد يخنقني.. قلت في قلبي هادي هي الصباح نروح ما نقعدلوش هما انا لي حمارة بلعطني بزوج كلمات علواش راني متحملة هاد الهمجي.. رقدت و أنا نبكي بردت و حسيت بالبرد جبدت التلفون عيطتلو كوبا عليا.. جوايه الربعة تع الصباح الدم جرا عليا و رجليا ينملو رحت بدلت و السطر قتلني.. رحت ليه صبتو راقد جيت نوضو عزت عليا روحي وليت رجعت لفراشي نتلوى حتى ال7 باش رقدت من السطر حسيت بيه يهز في كتفي قالي نوضي وجديلي نفطر يلا.. قلتلو روح نوض بنتك ياك أنا بنت حرام كيفاش تاكل من يدي.. ما هدر والو و شرلي باش نخرج، ما حبيتش ندير مشكل مع الصباح حبطت درتلو يفطر.. حبط وجهو ما يبشرش بالخير كاين باين عليه الزعاف ما خزر فيا ما قعد ياكل خرج قبالة.. قتلو في قلبي دوك نشوفو شكون لي تقعدلك يا همجي يا حيوان يا حقير.. طلعت للشومبرة جبدت فاليزا طميت دوزاني و كوارطي و الباسبور ديالي و حبطت قتلو في قلبي دوك أنا نعرف كيفاش نذلك.. كانو كامل راقدين خرجت للڨاراج لبست حجابي و خماري و خرجت..