مراهقة والاربعيني بلهجة جزائرية

الجزء 15:

#المراهقة و الأربعيني:

#الجزء 15:

هو يكركر فيا فهدوك الدروج درجة نمشيها و ثلاثة نطيح فيهم، داني لشومبرة الحاجة و طبعني قالي تتحركي منا تشوفي، دخلت الحاجة و ام سعد و أنا مكمشة و نبكي و هو خرج حوايجي كامل يفرغ و يرمي بالحاجة و يحوس حتى سمع حاجة دارت الصوت قعد يقلب دخلت هيام قالت وش صرا وش كاين؟ ما واجبهاش و كمل يقلب حتى صاب الخاتم تع أم سعد و دراهمو خزر فيا رايح يقتلني و انا تشوكيت ما فهمت والو هدو وش جابهم فوسط حوايجي؟!! لالا و الصدمة الكبيرة صاب معاهم تلفون صغير رمادي قديم رفدو و عيط وشنو هدااااااا؟ قتلو عمو والله عمري ما شفتو و ماديت حاجة من هادو و نحلف جا حكمني من شعري و يهز فيا قتلك وشنو هدااااا؟ ما كفاتكش السريقة تزيدي تتجسي على داري للارهاب اهدريييي و أنا نحلف بصح والو.
خزرت في هيام كانت واقفة و حاطة يدها على خدها و الدموع في عينها و مشوكية قلتلها هيام صدقيني و الله ما أنا  جات ليا ام سعد قاتلي اهدري  هي تضرب برجلها وصراع يضرب على راسي و أنا نصوغ.
شعل هداك التلفون صاب فيه نيميرو واحد بلا اسم جا عاود شدني من شعري و قالي هذا النيميرو تعمن؟ اهدري قتلو و الله ما نعرفو و زيد التلفون ماشي تاعي، عيط لهاداك النيميرو و فتح مكبر الصوت رد الووو عرفتو صوت يحيى مام هو عرف صوتو ناض يعيط يا وليد كدا باعث اختك تتجسس علينا و تسرقلكم الدراهم قالو يحي يا وليد الكلب شكون انت؟ قالو أنا وليد الكلب؟ ليوم نمحيكم من الدنيا
قالو قول شكون أنت منبعد نوريلك شكون يمحي لوخر من الدنيا قالو علاش خايف منك أنا لي طبعتلي اختك جي دوك تديها ولا نقلبها على ريسانكم قالو راك تهدر على ليليان؟ ما عندي حتى علاقة بيها غير ما كالاه دير حكاية باش ترجعهالي حتى يماها و حاوزتها من الدار ما نتشرف لا بيكم لا بيهم، قالو حبيتني نطلقها و نرميها فالشارع؟ قالو خبر خوالها يجيو يديوها انا ما عنديش أخت و ما تزيدش تعيطلي خير ما تندم عليها و كوبا في وجهو و صراع زاد هبل و فرغ زعافو كامل فيا لا الحاجة و لا هيام قدرو يسلكوني من يديه، قعد يضرب حتى خلاص وليت ما نقدرش نتحرك حكمني من يدي و رماني فالمخزن و غلق عليا قعدت نبكي حتى البرد تع القاعة حسيتو داخل عظامي، ساعفت روحي و قعدت على شكارة تع فرينة، قتلني البرد و خفت من الظلمة و السكات حتى وليت نتخايل طبطبت فالباب نحلل فيهم قلتلهم تعيشو افتحولي الباب و لا شعلولي الضو نخاف من الظلام سمعت الحاجة عيطت عليه قالها و الله و يفتحلها واحد و لا يدنى عندها غير يخلصها غالية لتم قطعت لياس رجعت لبلاصتي و قعدت نبكي حتى عييت و رقدت.
فالليل كامل حسيت بالباب تفتحت شفت خيال الحاجة شعلت الضو و جابتلي معاها فراش و زوج كوفيرطات و الماء و الماكلة و لاتورش صغيرة قالتلي شعليها باش ما تخافيش و كي تحسي بواحد جاي طفيها، قالتلي حافظة شويا قرآن قلتلها إيه قاتلي كي تحسي بالخوف أقراي آيات من القرآن و كي تحسي بكاش واحد جاي طفي واقري آيات حظنتها و بكيت مام هي حسيت بيها كي بكات خزرت فيها و قلتلها الحاجة ياك راكي مصدقتني؟  قالتلي و الله ما علابالي يا بنتي أنت تقولي حاجة و الشي لي شفناه حاجة اخرى بصح ما قدرتش نرقد و نخليك هكدا، إدا غلطتي مازالكي صغيرة والدنيا راهي تقريك و إدا كنتي بريئة تأكدي بلي ربي سبحانو ما يخليكش و يبين الحق، بستها على راسها دعاتلي و خرجت غلقت الباب و راحت.
شعلت هديك لاتورش و قعدت نخمم في فراشي حتى للصباح ما رقدتش، حبيت نفهم كيفاش صرات الحكاية و ما وصلت لوالو.
الصباح فتحت ام سعد الباب عليا و قالتلي نوضي للشغل تشوفي ما ديريش في بالك بلي درتي عملتك و تقعدي هنا مستراحة.
نضت جيت خارجة ضربتني على راسي و طبعتني و قاتلي تخدمي كلشي و حسك ما نسمعوش. 
رحت نغسل الماعن كان كلشي يوجع فيا خزرت فالڨراج طونوبيلة صراع ماكاشها يعنى خرج، أنا نخدم فالشغل و أم سعد وين ما جوز عليا تضربني للراس و الحاجة تقولها حرام عليك ياك الاسير الكافر قاتل المسلمين كان الرسول يرحمو و ما يآذيهش و اخر وصايا الرسول صلى الله عليه و سلم يقول استوصي بالنساء خيرا ..ادا حنا النسا ما نرحموش بعضنا يمال كيفاش.
كملت شغلي بقدرة القادر ورجعت للمخزن قعدت، كي وصل وقت الغدا عيطتلي ام سعد نوجد معاها كي بداو ياكلو قعدت واقفة حتى كملو و رفدت الماعن غسلتهم، شفت صراع جا الخلعة حكمتني، ڨارا الطونوبيل و دخل، جاز للهول قال السلام عليكم و طلع طلعت موراه دقدقت على الباب قال ادخل دخلت قالي وش تحتاجي؟ قتلو عمو اسمعني قالي اخرجي عليا برا قتلو عمو و الله ما أنا لي ديتهم صدقني قالي راني جاي عيان من الخدمة و ماشي حامل روحي اخرجي عليا. خرجت و حبطت للكوزينة وجدتلو الماكلة و عصير رمان و طلعتلو دقدقت قال ادخل قتلو جبتلك تاكل ما خزرش فيا قاعد مع تلفونو حطيت السنيوة و جيت خارجة رمى تلفونو و تكسل و عطاني بضهرو.
حبطت للمخزن قعدت، جات الحاجة قالتلي ما تقعديش هنا باردة عليك و زيد صراع ما يقولكش ما دام جازو الزعاف ارواحي للشومبرة قلتلها معليش خليني هنا حتى شفت حلا حبطت السنيوة ما كلا منها والو عرفتو ما حبش ياكل من يدي.
ما لقيت بيها وين هوما ماشي حامليني و اهلي سمحو فيا و ماما ادا صح حاوزها يحي علاش ما جاتش تشوفني.
قعدت على هداك الحال، مع الوقت ولا وش نخدملو ما يعترضش بصح ما يهدرش معايا و كي يحتاج حاجة يهدر معايا بالتشناف.
جات هيام  قالتلي ادا تهليتي فيه و رخصتي بروحك رايح يحس بلي راكي ترمي في روحك عليه يزيد يذلك كثر،
و ادا ما اهتميتش بيه و ما خدمتيلوش اموراتو رايح يحس بالاهمال و يخمم بلي فوق ما غلطتي راكي تتحداي فيه و يزيد يآذيك كثر. قلتلها وش ندير ما يقبل لا نخدمو لا نخليه قالتلي ديري غير واجباتك معاه بلاما تهدري معاه و لا تفتحي السوجي و تتوسليلو قلتلها بصح هكدا صعيب الحال قالتلي هو داير هكدا عقليتو صعيبة وش رايحة ديري لازم تتحملي وين رايحة تروحي بالاك يتهدن و يحن عليك قلتلها بصح انا ما عندي حتى ذنب قاتلي دوك هد الهدرة ما تفيدش يلزم دليل باش يصدقك هو أصلا بلاش مشكاك قلتلها بصح و الله غير عييت من هد الوضع قاتلي لازم تتحملي حتى يتهدن و ينسى الموضوع ما عندكش حل آخر.
سمعت كلام هيام و طبقت وش قالتلي.
جازت يامات عليا مرار من كل واحد من غير الحاجة و هيام لي كانوا واقفين معايا.
هو كان كل خميس يرجع بكري ما يطولش ، فهداك النهار كنا روطار على 9 ونص تعطل الشغل حتى للظهر ما كملناش الفطور تع الصباح حتى ال 11.
كي كانو يصلو صلاة الظهر خرجت نغسل الڨراج و طبيعتي كي نغسل نتقلق كي تتشمخلي الجبة نشمرها شويا و نشدها في حوايجي تع لداخل كيما كامل البنات يديرو كي يكونو مع الشغل.
انا بديت نغسل حتى حسيت بالباب كي تفتحت مورايا ناض يعيط قالي وشنو هادي؟ و جا يجري لعندي حكمني من يدي و دخلني للكوزينة و بدا يسب و يعاير فيا و أنا واقفة على الحيط و نبكي حكمني من يدي و رماني فالقاعة و عيط ليماه قالها انت وين راكي حتى تخرج هادي للڨاراج و تشمرلي و وليد الجيران يتفرج فيها؟ قسما بالله و تزيد تعتب باب الڨراج غير تخلصوها كيما راكم بيكم بيها، واحد ما قدر يهدر معاه غير نائل بدا يكالمي فيه طبعو و طلع لشومبرتو يخبط و ينسف.
قالتلي الحاجة ياك تعرفيه كنتي تستري روحك، قلتلها كامل عندهم الحق في هد الدار غير أنا دايمن انا لي غالطة و الله غير حتى حياة الخدامة خير من حياتي يا ريتني نموت و نتهنى من هد المعيشة ناض الحاج يسب و يعاير و قالي بالاك نسمع حسك و جا يضربني وقف نائل ما بيناتنا قالو وش بيكم بابا وش راهو صاريلكم؟! حبط صراع قال صوت شكون لي سمعتو دوك؟ قالو نائل صوت الحاجة يا صراع خلاص خلينا دوك و الله غير بزاف ملينا من الزڨا كل يوم عندنا قريب شهر لا قعدة حلوة واحد ما حامل لوخر خلاص بركاونا ما كفاناش الهم لي فوق ريسانا زيدونا نتوما.
صراع كان يخزر فيا، نائل شايدو عليا و هو يقولو اطلقني عليها نربيها رحت نجري للمخزن و قعدت نبكي ياربي عييييت.
جات ليا أم سعد باش نوض نعاونهم نحطو الغدا رحت معاها شفت صراع واقف يصلي قتلو في قلبي الله لا يقبلك صلاة و ربي ياخدلي حقي منك.
قعد معاهم و وجهو ما يتفسرش و يخزر فيا و ينسف و يستغفر، كملت و رجعت للمخزن.
شويا هكدا عيط ليليااان طلعيلي لاتاي لفوق رحت سربيتلو و طلعت قالي طلعيلي حوايجي و سيرجيلي الصباط درت وش قالي و قتلو كاش ما نزيد نديرلك قالي راكي تتمسخري؟ قتلو لالا سقسيتك قالي تتادبي في هدرتك معايا و لا و الله ما نرحمك قتلو علاش انت دوك راك راحمني؟ ناض و قالي ترجعلي الهدرة في وجهي؟ قتلو عمو ما رجعتلكش بصح و الله غير عييت ارميني فالشارع و خليني ندبر راسي بروحي و لا حياة الذل هادي واحد ما راهو راحمني فيكم بلاما درت والو، حكمني من شعري و قالي بالاك نزيد نسمع حسك قتلو ياك عندك السلاح فرغ فراسي حبة و هنيني و ما تزيدش تحكمني من شعري خلاااااص ما قعدش عندي قوة، قالي ماشي بنت المرأ لي توقف في وجهي و ترجعلي الهدرة و تجادلني قتلو مانيش نجادل فيك قتلك عييت خليني نروح بجاه ربي خليني نروح قالي باش تصيبي راحتك و تلقاي غرضك فالشارع ياك قتلو حال الكلب فالشارع و لا حالي قالي اخرجي علياااااا برااااا.
خرجت نبكي و حبطت لتحت و هو شويا مورايا بدل و خرج ما رجعش حتى للمغرب جابو واحد من عمامو ساندو و عينو منفخة و طونوبيلتو مقيوسة، جاو عمومو داوه للسبيطار و ام سعد تقول هادي وجه الفقر فقراتو قالتلها الحاجة وليدي مؤمن والله يعجل بعقاب المؤمن و عاقبو عل معاملتو مع الطفلة قالتلها تستشفاي في وليدك و دافعي على هادي؟! قالتلها أنا مع الحق وليدي ما ينفعنيش يوم الحساب الظلم ماشي مليح ما يرضى بيه لا ربي لا عبدو.
دخلوا نسا ما نعرفهمش سلموا و قعدو رحت نوجدلهم لاتاي دخل صراع مور ما جاو بشويا سلم جزت نسربيلهم هدرت وحدة فيهم قالت هادي بنت صراع؟ ما شاء الله عليها الله يبارك كبرت و زيانت هو كان مازال واقف حسيتو من وجهو تقلق بصح دار روحو يضحك قالها لالا هادي مرتي بنتي راهي لفوق قالت هادي مرتك؟ و دارت ليا قاتلي علاش ماعندكش أهل حتى يرميوك لواحد قد باباك؟ تقلق طلع لفوق والحاجة قعدت تڨصر معاها.
انا رحت للكوزينة حتى جا ليا قالي يعجبك الحال كي يقولولك هدا قد باباك ياك قتلو لالا عمو و الله هي وحدها هدرت هكدا و أنا علاش قالي انا ماشي نبهتك من قبل قتلك كي يجي كاش ضيف البسي الجبة الرمادية؟ قتلو عمو وش ندير هادو هوما حوايجي قالي آاااا وي صار هكدا حوايجك ياك و دخلني لشومبرة الحاجة جبد كامل الجبب لي فيهم الوان و قطعهم فوق راسي و أنا بقيت واقفة و نخزر فالأرض. قالي و الله و نزيد نصيبك لابسة حاجة ملونة غير نسلخ جلدك و خرج.