مراهقة والاربعيني بلهجة جزائرية

57

#المراهقة و الأربعيني:

#الجزء57:

لحق أول رمضان و صراع عرض عمومو و عوايلهم دار فطور صدقة على روح وليدو حرب الله يرحمو.. كانوا كامل حاضرين و بيانسور إخلاص دايمن لاصقة في تلايبنا كي السوبر ڨلو ..
أنا لبست و سڨمت روحي و ما بينتش قدام الناس بلي راهو زعفان مني و في نفس الوقت ما قربتش لعندو باش ما نوصلش روحي يتجاهلني قدامهم و يحطني في موقف محرج.. بصح هو كان يبعثلي قدامهم مع كاش واحد يقولو روح قول لأم حرب تعطيلك كدا و كدا و لا روح جيب من عند أم حرب كدا و كدا.. يعني ما تجاهلنيش بصح ما هدرناش وجها لوجه دايمن مخليين وسيط ما بيناتنا نبعثوه لبعضانا..
مور الفطور كي راحو الضياف قعدت أنا نفرز فالكوزينة و نور راحت ترقد ولادها، و نائل قالي ديريلي لاتاي.. درتلو و تالمو زربني خفي خفي.. غلقت الغطا تع الكويزينيار بلاما طفيت النار و ديتلو لاتاي للڨاراج و غير رجعت باش نكمل شغلي، جيت نرفع يدي باش نرجع ليزيبيس لبلايصهم ما علاباليش كيفاش طرطقت حاجة فالكوزينة، من الخوف ما استوعبتش وش صرا بالضبط، غطيت روحي و حسيت بالسخانة فالكور ديالي.. جاو كامل يجريو كي سمعو الصوت.. الحاج و نائل و الحاجة و أم سعد قاعدين يعيطو وش كاين وش صرا؟ بصح صراع جا يجري قبالة لعندي حكمني و قالي وهو مخلوع وشبيك؟ اهدري وشنو هاد الدم وش صرا؟ خزرت في حوايجي مشوكيا صبتهم مطاشيين بالدم و بديت نحس بالسطر وليت نبكي.. هو بدا يمس فيا باش يعرف مصدر الدم.. غير حط يدو وين كنت مجروحة صغت.. قالو الحاج الزجاج تع الكوشة راهو مكسر غلقت عليه و الفورنو شاعل.. قالو صراع راهي معمرة بالزجاج و شاف فيا قالي نحي يدك خليني نحيهولك ما تخافيش ما نوجعكش .. قتلو لالا رجلي راهي توجعني ما توشينيش تقيسني وخرررر..  رفدني داني لشومبرة الحاجة قالهم واحد ما يدخل من غير يما.. شاف البلايص لي قاسني فيها الزجاج.. ظهري، دراعي و فخذي قالها يما جيبيلي شاش و قطن و ديتول و ملقط بلخففففف.. هي انخلعت قالها يما غااااوليييي.. كانو يديا كامل بالدم و أنا نبكي.. حط يدو على وجهي قالي ما تبكيش عمري دوك نحيهولك احملي شويا.. قتلو قتلني السطر راهو يحرق فيا.. قالي اصبري شويا برك.. و ناض يعيط يمااااا.. جات و جابتلو وش قالها.. قالها يما شعليلي لاتورش تع التلفون و اوقفي معايا.. هي ديرلو فالضو و هو ينحي فالزجاج و يعقم فالجروح و يقولي ما تتحركيش زيدي اصبري شويا راني قريب نكمل.. كي نحاه كامل مسحلي الدم لي في جسمي كامل و جابتلو الحاجة جبة نقية بدلي حوايجي.. قالي نوضي نديك للسبيطار الجرح تع رجلك تع خياطة
قتلو لالا ما نروحش قتلني السطر.. حاول باش ينوضني ما حبيتش ولا جابلي تشكا تع التهابات دارهالي و عطاني شربت دوا تع السطر و غطاني.. رقدت و ما فقتش كي ناضو يتسحرو..
غدوا منداك مع الظهر سمعت هيام تهدر عند راسي قالت الله يسترنا غير جاو هدوك وجوه الشر و تلايمو هنا شوف وش صرالها مسكينة.. شوي هكدا و جا صراع من الخدمة بلاتونو ميليتار، سلم و دخل حط يدو على جبهتي و قال ما عندهاش الحمى بصح الجرح تع رجلها لازم يتخيط.. كاش ما كلات ولا والو؟ قالتلو الحاجة لالا ما كلاتش.. تنوض تنازع و تعاود ترقد.. قال لهيام أم علي نوضيها و قنعيها باش نديها للسبيطار بيدما نبدل حوايجي و نريح شويا..
نوضتني قلتلها لالا ما نروحش نخاف من الخياطة خليه هكدا راني حاملة السطر حتى يبرا الجرح وحدو..
دخل الحاج يسقسي عليا منبعد قالي علاش ما تنتابهيش يا بنتي؟ كيفاش تغلقي على الفورنو وهو شاعل؟! عقلك هدا حطو ربي شباح برك ولا باش تخمي بيه؟ قالتلو الحاجة كانت مقدرة و كاتبة الحمد لله هكدا ولا كثر.. الطفلة هادي حاكمة فيها العين بزاااف.. قالتلها هيام ملي جات إخلاص و خياتها و هوما داخلين خارجين و يقولو هي معيشها في قصر و ختنا الله يرحمها شبعت ظلم.. حاسدين الطفلة على الدار و هي منهار دخلت ليها ما شافت الراحة من عينيهم.. قالتلها أم سعد هادي لي قالك كل واحد يشوف عدوه قدام عينو.. بنات ختي يحسدوها يا لي ما تستحيش؟! قالتلها هيام العين لكبيرة كامل جايا من عند بنات ختك هوما سباب البلا.. قالتلهم الحاجة اووووه.. بديتونا بالدواس و حنا صايمين.. الواحد ما راهوش قادر خليونا من المشاكل.. قالتلي هيام نوضي ليليان نوضي باش يديك صراع للطبيب يشوف جرحك.. قلتلها لالا أم علي ما نروحش توجعني.. قالتلي يا بنتي باش يداويوك هكدا ما تبرايش.. كيما حاولت تقنعني ما حبيتش.. هو دوش، بدل حوايجو و صلى العصر و حبط شافني راقدة تقرمد من راسو قال هادي مازالها راقدة راكم من نيتكم؟! قالتلو هيام وش حبيتني ندير خويا؟ نكركرها من الفراش؟ ما حبتش تنوض.. قالي نووووضي تشوفي نوضي.. حتى في هادي و تخشني راسك؟ نوضي نديك باش يداويوك ماشي تبقاي هنا متكسلة و تبداي تتفشي علينا ما نقدرش نوض و ارواحو عاونوني ياك؟ نوووضي يلا خفي.. قالتلو ما حبتش خافت.. قالي منواش تخافي علاش أنت طفلة صغيرة؟ غدوا من غدوا و ترفدي الحمل كيفاش رايحة تزيدي؟ نوضي يلا...
نوضني بالسيف، جابولي حوايج لبسوني و داني للسبيطار.. لتم طلب جي طبيبة ماشي طبيب.. جات نحاتلي الحجاب و قعدتني كي شافت الجروح قالت رجلها تحتاج خياطة الباقي راهم ملاح.. نقاتلي الجرح و كي جات باش تخيطلي حكمت في يد صراع بيديا في زوج حتى عصرتها من الخوف.. قالها ختي ربي يحفظك ديريلها لانيستيزي تخاف و ما تحملش..
راحت جابت و جات.. واقيل مهبولة هادي كانت معولة تخيطني بلاش..
حكم صراع يدي و هو واقف يشوف بصح ساكت، مام كي كنت فالطونوبيل ما هدر والو.. جات الطبيبة دارتلي لانيستيزي و كانت رايحة تبدا تخيط فالجرج و أنا قاعدة نشوف، جبدلي وجهي قالي ما تسوفيش فيها و هي تخيط و قعد حاكم وجهي حتى كملت.. رجعني للدار و هو ساكت، صح نحى العقدة تع حواجبو بصح كلامو قليل غير ملفوق لفوق.. دخلت ديراكت لشومبرة الحاجة تكسلت ما قدرتش.. و هوما يسقسيو عليا و هو يواجب في بلاصتي منبعد قالهم خليوها تريح ليوم عندها السطر مازال ما خدم فيها الدوا.. أنا رقدت و كي لحق الفطور نوضني بالسيف باش ناكل قالي نكمل فطوري و نولي نصيبك كملتي الشوربة ديالك.. كمل و رجع صابني كليت نص برك هداك وش قدرت و عاودت تكسلت..ما هدر والو غطاني و خرج..
بقات الحاجة عند راسي ترتل فالقرآن و كل شويا تسقسيني كيفاش راكي دوك ليليان؟
جازت يمات و كلام معايا شطحي، ما عرفت نحبو على كثرة اهتمامو بيا و لا نكرهو على البرود لي كان فيه..
هو كان مريزارفي للحاج و الحاجة عمرة تع شهر رمضان و أم سعد داوست مع الحاج باش ما يروحش بلا بيها بصح هو حب يروح مع الحاجة و يكسب أجر الأيام المباركة على هديك غضبت و حبت تروح لعند وليدها سعد و هو داها..
راحو للعمرة فالعشريام الثانية تع رمضان و صراع كان يحبط يرقد في شومبرة الحاجة.. هو في بونكها و انا مفرشة فالقاعة.. كنت نحيت الخياطة تع رجلي بصح ما حبيتش نطلع لفوق نرقد و كي فات جا يرقد في شومبرة يماه درتها سبة و ما حبيتش نبعد عليه بصح هكداك و ما قربش ليا مالڨري كنا نرقدو في نفس الشومبرة.. لتم عرفت شحال كنت خاديا عليه فكرة غالطة بلي ما يحملش و ضعيف قدام رغباتو.. كان يرقد تقول ما كاينة لتم ما يتوحش ما يجي لعندي تمنيت يالوكان يحطلي راسي برك على يدو بصح ما تنازلش قعد شايد في أسلوبو معايا و جوابو قيس السؤال.. الصباح خدام و كي يرجع يرقد حتى للعصر منبعد يخرج وحد السويعة قيس ما يلحق وقت المغرب يفطر و يخرج مع نائل يصليو التراويح و ما يدخلش حتى ال10 تع الليل يقلب شويا في تلفونو و يتفرج شويا أخبار حتى جوايه الطناش يرقد و ينوض على الزوج يتسحر و يرتل القرآن حتى يلحق الفجر يصلي و يرقد حتى يلحق وقت الخدمة يروح.. كان هدا روتينو اليومي.. و كي يصادف و تصرا ما بيناتنا هدرة  على ماكلة يبعثلي كاش واحد حتى حوايجو نجي نوجدهملو يقولي لالا..
موراها خرج ميسيو مدة سمانة، قعد معايا غير نائل و نور فالدار.. يامات منبعد جا الحاج و الحاجة من العمرة لاقاهم نائل و جابهم لخطر صراع كان مازال ما رجع..
كي جا هو أنا كنت متوحشاتو بزاف و هو كان عيان لاقيتو فالباب نضحك، ما ضحكش معايا بصح قالي ربي يعاونك قتلو وش راك قالي الحمد لله و دخل للدار قعد مع والديه سقساهم كيفاش جوزو العمرة ديالهم و هوما عطاولنا الهدايا لي جابوهملنا..
مع العصر جات حلا جابها راجلها باش تهنيلهم على العمرة.. كانو قاعدين لتحت و صراع كان لفوق كي حبط لاقاتو قالتلو بابا نبشرك بحاجة و يكون في علمك انت أول واحد رايح تعرف رايح يولي عندك حفيد راني حامل.. فتح عينيه مليح و حضنها و يبوس فيها فرح بزاااف قالها بنتي كبرت و رايحة تولي أم إن شاء الله.. قالتلو بابا ادا كان طفل رايحة نسميه حرب على خويا الله يرحمو و نولي أنا ام حرب.. باس راسها و قالها الله يحفظك و يحميك و يكملكم بالخير يااارب..
أنا فرحت لفرحتهم بصح قاسني الحاج بكلامو كي قال هاي النسا تع الصح لي تحمل بلخف ماشي كيما أنت عندو معاك سنين طفل واحد ما قدرتيش تثبتيه في كرشك.. دار ليه صراع مقلق قالو بابا وشنو هاد الكلام و هي علاش هادي مكاتيب الله
خليتهم و رحت للكوزينة نبكي غاضتني عمري.. سمعت صراع قال للحاج وش استفدت كي قلتلها هكدا؟ علاش بيدها؟ قالو ماشي بيدها بصح بيدك و أنا و يماك كي كنا فالعمرة قررنا باش نزوجوك و كنا نستناو فيك ترجع من الميسيو.. قالو علاش راك تشوف فيا دراري باش تزوجني و تقرر في بلاصتي؟ هادي حياتي و أنا حر  فيها.. قالتلو الحاجة يا وليدي ماشي باش ندخلو في حياتك بصح حنا رانا حايبين تخرج من هاد الدنيا بطفل يسندك في كبرك.. قالها يمااااا وشنو هاد الكلااااام؟؟!! انا لي علبالي وش نحتاج وش ما نحتاجش ما دخلوش رواحتيكم في حياتي.. قالو الحاج يا وليدي حنا مانحوسوش نبعدوك على مرتك بصح بنت عمك إخلاص كبرت راهو في  عمرها 37 سنة و الناس كلاتها بكلمة البايرة.. قالو إييييه و علاش راكم تشوفو فيا جمعية خيرية لي مات راجلها و ترملت تقولولي اكفلها و لي ما خطبوهاش و تعنست تقولولي تزوجها؟! قالو بصح هادي بنت عمك.. قالو غير انسى هاد الحكاية.. إخلاص؟! ههههه و الله غير ضحكتني و أنا مانيش قادر.. قالو ياودي البراوية ما ترفدكش نحوسو وليدك يكون منا و فينا و لي تجيبو المسيحية ما تعرف على وش من دين يتربى.. بنت عمك أولى بيك و هي رايح يفوتها الحال تزوج بيها جيبلك طفل يسندك و يسندها و مرتك راهي على ذمتك علاش كاش واحد قالك طلقها و لا حاوزها؟ قالو هادي هدرة جديدة بابا مادابيكم واحد ما يزيد يعاودها قدامي.. قالتلو الحاجة يا وليدي ما فيها والو إدا تزوجت ياك ربي سبحانو محلل ربعة و لي ما يديش زوج نسا ماشي راجل.. قالها يمااااا هاد الكلام ماينقالش ليا أنا.. و زيد أنا تزوجت بربعة ماشي غير بزوج و كرهت من النسا خرجت بوحدة و راني راضي بمكتوبي الحمد لله اخطيوني من المشاكل و واحد ما يزيد يدخل روحو فيا فهمتوووو.. قالتلو لالا يا وليدي و الله ما نرضى عليك حتى تتزوج.. بنت عمك كبرت و أنا و باباك خممنا فيها كي كنا فالعمرة حتى و ما تحبهاش المهم جيب معاها يا لوكان طفل.. مرتك صغيرة بزاااف و ما قدرت تثبت حتى حمل في كرشها ظهرها ضعيف.. خليها ليك علبالنا بلي تحبها و تزوج بالثانية على جال الدراري.. و يكون في علمك و الله و الله و الله ما نرتاح حتى نزوجك ملاحة ولا قباحة.. هنا ما قدرتش نحمل.. دخلت لعندهم و بديت نعيط و نقول الله لا تربحكممممم الله لا توصلكممم باش ديرو الشي لي راهو يدور في ريسانكم نتوما ما تعرفوووش الحق.. من الصباح و نتوما صراع ما عندوش سند صراع ما عندوش طفل.. صراع كدا صراع كدا تعرفو تخمو غير في صراع و تعرفو الحق غير كي يكون عند صرااااع.. وش ذنبي أناااااا.. أنا لي مكسورة و ما عنديش أهل و ما عندي حتى واحد من غيرووووو .. و حبيتو تديوه من عندي و تزوجووووه.. واحد فيكم ما قال عيب نهدرو هاد الكلام قدامها.. صراع عندو أهل وعندو دراهم و عندو طفلة و عندو كلشيييييي أنا لي ما عندي والو حراااااام عليكم تكسروووووني حرااااااااام..
أنا نصوغ و نبكي و صراع يجبد فيا و و يعيط عليا باش نسكت.. لحقني للدروج و عيط عليا قالي اطلعييييي.. قتلو وش نقول من غير الله لا تربحكممممم.. قالي ليليااااان.. قتلو لالا ما نسكتش ما تقوليش  ليليااااان خلاااااااص.. جبتهم لداري و سكتت و دوك حايبين يزووووووجووووك ما نسكتشششش.. قالي نقصي صووووووتك بلعي و اطلعي لفوووق.. قتلو ما نقص صوتي ما نسكت فهمت خلاص أنت تعرف غير اسكتي ليليان اسكتي ليليان دفنتوني فالحيااااااة خلااااااص ربي يعطيكم ضربة و يديكم كيما راكم نتهنى منكمممممم... ما فقتش كامل كيفاش جبد عليا بكف و قالي اطلعييييي..
هنا جبدت روحي و طلعت لشومبرتي خليتهم دايرين قفة حس لتحت.. قعدت نبكي و هو سمعتو دار حالة معاهم منبعد طلع لعندي صابني حاطة راسي ما بين رجليا و نشهق بالبكا.. جبدني لحضنو حط راسي على صدرو و زيرني قالي أنت حابسة و آخرتها معاك كيفاش؟ جبد النفس و قاعد يحاول يكالمي في روحو من الزعاف كان قلبو يخبط بالزرب.. رفعت راسي قتلو راك راضي بكلامهم؟ قالي كلامهم كيما الشتا تع الصيف جاز و راح ما نيش كامل سامع بيه.. علاش حابسة هكدا؟ طيحي معاهم القدر قدامي و تخليني نضربك علاش ديريلي هكدا؟ ياك قتلك اطلعي شفتيني قابل نمشي بكلامهم ياك سمعتيني وش هدرت.. قتلو بصح يماك قالتلك ما نرتاح حتى نزوجك.. قالي تقول وش حبت وش راحلي فيها، أنا ما نحوس لا على طفل لا على زوجة.. ادا حبيت طفل أنت أحلى طفلة عطاهالي ربي و راني فرحان بتربيتك مالڨري مهبولة، و إدا حبيت زوجة و الله و الله ما تحلى في عيني من غيرك.. قتلو يعني ماراكش مهتم بكلامهم؟ ضربني على راسي خفيف و قالي هاد العقل وقتاش يولي يخمم؟ وش من الصباح و أنا نحكي ولا سمعتي كلامهم و جوابي ليهم طرشتي؟ قتلو ما تخلينيش و الله غير نحبك.. قالي نخلي أهلي و ما نخليكش.. و الله ما عندي من غيرك أنت برك راكي تشوفي بلي عندي كلشي، بلا بيك ما نسوى والو.. و الله العلي العظيم نهار رحتي غير رجعت كي الميت جسد بلا روح.. يكفيني كي تكوني دوري فالدار حتى و لوكان ما هدرتش معاك، قتلو يمال علاش راك مخليني؟ قالي شكون قالك راني مخليك؟ عينيا ديما عليك و تراقبك وين ما تكوني برك راني حايبك تستعقلي شويا مرضتي قلبي.. حضنتو بالزور و نضت نبكي و هو يمسح على راسي و يهدن فيا.. رفع وجهي باس جبهتي و قالي ارحميني خلاص راني صايم حرام عليك راني شايد روحي غير بالسيف..تبسمت بعدت راسي و مسحت دموعي و أنا نشوف فيه.. مسح خدودي و قال نسمح في كلشي و نشوف هاد الضحكة الحلوة..
تكسل حطيت راسي على صدرو بقى يمسح على شعري و قالي راكي منيتك أنا نبدل الألماس بكرعين المعيز علاش هبلت؟ ارقدي عمري و ارتاحي و الله ما نعشق وحدة من غيرك..
قعد يهدر معايا و يهدن فيا حتى سكت رفعت راسي صبتو غفى فتح عينيه و هو نعسان بستو في خدو تبسم و دار على جنبو حضني و قالي نرقد شويا برك راني عيان و عطشان.. رقدنا في زوج حتى قريب الفطور جات حلا دقدقت فالباب قالتلو بابااا قعدت نص ساعة للفطور قالتلك جدة احبط.. قالها راني حابط بنتي و دار ليا قالي يلا عمري خلينا من الزعاف احبطي و ما تعمري راسك بحتى واحد و كي كاش ما يهدرو معاك ما ترديش خليني أنا نرد في بلاصتك إدا كانت حاجة تستلزم باش نواجبهم.. درتلو براسي إيه..
هو راح توضى و حبط حكم المصحف و قعد يرتل فالقرآن و أنا رحت للكوزينة سقيت الماكلة و وجدت الطابلة..
أذن المغرب صراع كسر صيامو و راح يصلي و أنا قعدت ناكل معاهم فالطابلة و الحالة شويا شويا بصح حاولت نتجاهلهم.. كمل هو الصلاة و أنا كنت ناكل فالشوربة جاز مورايا حكمني من كتافي و نوض وليد نور و قعد قدامي.. درت ليه تبسمت و الحاج تقلق قال فوق ما يزيرها على كي دعات علينا قدامو زايد يبربر فيها و يضحكلها.. صراع بدا ياكل و غلق راسو تقول لوخر ما هدر و هو ما سمع..
كملنا الفطور و رحت للكوزينة جا لعندي شرب الما و همسلي قالي حطي كلشي من يدك و اطلعي لعندي لفوق راني مصبر روحي غير بالسيف عليك.. تبسمت و درتلو براسي إيه.. خليت الشغل غسلت يديا خليتو فالهول يهدر مع نائل و طلعت وجدت روحي بالخف.. دخل صابني نمشط في شعري نحاهولي و قالي أنا نمشطلك حبيبي.. وين نصيب كيما هاد الشعر تقول خيوط تع ذهب.. ضحكت و هو يمشط و متبسم.. بعد شعري بجيه باس كتفي و قالي ليون بركاينا من المشاكل و الله غير نحبك خلينا نعيشو حياتنا.. درت ليه قتلو أنا تان نحبك و ما نحبش المشاكل بصح...... قالي خلينا متفاهمين، صارحيني احكيلي بلعقل مارايحش نضربك راني حايب نعيش فرحان معاك عاونيني.. قتلو كيفاش حايبتني نصارحك و أنت ما تصارحنيش؟ شحال و أنا نسقسي فيك إدا متزوج و كدبت عليا.. قالي ما سقسيتينيش ادا متزوج، كنت تقوليلي عندك حاجة معاها و أنا قتلك لالا ما كدبتش عليك و اثبتلك ياك غير عرفتي خليتها مانيش حايب نخسرك على جال حتى واحد.. يلزمك تفهمي بلي كي خبيت عليك علبالي بلي هاد الشي رايح يسببلنا مشاكل ما عندها حتى معنى و علبالي عقليتك كيفاش دايرة و كي نقولك وش نقولك ما رايحاش تفهميني و تتهميني بالخيانة و تبقاي تغيري.. كاين حوايج ما نعرفوهمش و كي ما نشوفهمش هاد الشي رايح يكون لمصلحتنا، ربي سبحانو علاش حط حجاب ما بينا حنا و الجن و منطق الحيوان بصح ما نفهموهش؟ باش نعيشو مرتاحين ما نترعبوش من شوفتهم ما نعمرو ريسانا بحكايات لا تسمن و لا تغني من جوع.. ارواحي تشوفي نقعدو نحكيلك وحد الحكاية...
واحد النهار جا واحد لسيدنا سليمان عليه السلام قالو علمني لغة الحيوان.. ما حبش نبي الله بصح هو قعد مصر باش يعلمو.. علمو و الراجل راح فرحان و فالليل كان راقد سمع زوج قطوطة يشكيو لبعضاهم.. وحدة قالت راني جيعانة و ماكاش وش ناكلو وش نديرو و لوخرا قالتلها ما تخافيش السردوك في هاد الدار راهو مريض و غدوا ان شاء الله رايح يموت و ناكلوه.. الراجل غير سمع هكدا ناض الصباح بكري و راح باع السردوك ديالو قبل ما يموت.. غدوا منداك عاود سمعهم يشكيو من الجوع و عرف من كلامهم بلي الخروف راهو مريض و غدوا ان شاء الله رايح يموت و ياكلو منو و الراجل راح يجري الصباح باعو قبل ما يموت باش ما يخسرش.. و فالليل عاود سمع نفس الشكوى من الجوع و عرف بلي رايح هو يموت و تكون جنازتو و ياكلو هنا قفز من فراشو و ناض مخلوع راح لسيدنا سليمان عليه السلام و حكالو و قالو سلكني رايح نموت.. قالو شفت ياك قتلك ما تقدرش  تتحمل.. كاين حوايج ما يلزمش تعرفهم لمصلحتك، ربي سبحانو حب يدفع عليك البلاء بالسردوك و الخروف و أنت بعتهم و دوك ما بقالك غير ترضي بالشي لي راح ينزل عليك..
أنا حكتلك القصة بلهجتنا و بطريقة بسيطة باش تفهمي العبرة منها.. يعني أنا ما خبيتش عليك باش نضرك علبالي بلي صح ما عندي والو معاها و لوكان عرفتي رايح يكبر في راسك التوسويس يالوكان نجيبلك يدي خضرة من الجنة و كي عرفتي الحكاية حبست كلشي.. أنا نحوس نرتاحو فحياتنا الدنيا راهي غير تمشي و حنا ديناها غير زعاف و دواس و تشقلالة.. خلي حبنا أكبر من أنو يدخل ما بيناتنا واحد بكلمة يفرقنا و يقلبنا على بعضانا هكدا؟ درتلو براسي إيه.. منبعد قعد يداعبني و يغازلني وطايرين مع بعضانا في عالم خاص متناسيين كامل لي راهم فالدار..
راح للصالدوبا سمعتو يزڨيلي ليليااااان الفوطة ديالي.. نضت من الفراش سترت روحي و ديتلو ديالي لخطر قشو كامل كان في شومبرة حلا كي كنا متزاعفين.. دقدقت فالباب باش نمدهالو جبدني لداخل قتلو لالا صرااع راهم كامل لتحت قالي اشششت ماني سامع بحتى واحد.. شويا و دقدقت حلا شرلي بصبعو باش نسكت قالي شكووون؟ قالتلو بابا وين راهي ليليان تحتاجها جدة.. قالها و أنا وين علابالي يا بنتي راني مخبيها عندي؟! روحي شوفيها وين راهي.. همستو قتلو ماشي هدا وين كنت تقول ماني سامع بحتى واحد؟ قالي ارواحي تشوفي ههههه ضحكت قالي اسسس نقصي صوتك..
كملنا سبقني هو خرج و أنا شويا موراه و خرجت بالسوغتي دوبا، كانت حلا طالعة فالدروج شافتني قلبت خليقتها.. دخلت صبتو يلبس قالي البسي حوايجك و روحي شوفي يما وش تحتاج عندك.. قتلو ما نروح ما نشوف ياك تحوس تزوجك وش نروح ندير عندها؟ قالي ليليان وش هدرنا؟ خلاص.. قتلو ماشي غرضي.. قالي يمال البسي نخرجو ندورو شويا و نرجعو قتلو أوكي
هو حبط قبلي و أنا مكييت و لبست بلخف و حبطت صبتو قاعد في شومبرة الحاجة و هي مقلقة.. قالتلي وين كنتي ساعة و أنا نعيطلك، خليني ماعن لفطور و الدار مقلبة على نور و طلعتي.. قالها صراع انا لي طلبت منها جي لعندي و كي تكون معايا ما عندها حتى شغل من غيري.. قالتلو اااا صار هكدااا ما تنوضش من فراشها حتى لتص نهار و كي جي انت تزيد تقابلك.. علاش نور خدامة عندها؟ قالها ماشي أم يوسف جي كل سمانة تخدم كلشي؟ قالتلو علاش أم يوسف جايبها لليليان، خدمتها هنا أجر ماشي باش ليليان تقعد و ما دير والو.. قالها ياك راني نخلصها من جيبي أنا ماشي من جيب وحدوخر باش ليليان تريح.. حنا هادي معيشتنا لي يتحملنا أهلا و سهلا  و لي قال لالا ماشي بالسيف عليه يريح معانا.. قالتلو راك تحاوز في خوك؟ غير لخير ليوم برك صالحتها ركبت المشاكل في راسك؟! قالها يما أنا نحوس نتهنى من المشاكل و أنت تقوليلي ركبتها.. يرحم والديك يا يما بعدي على هاد الحكايات.. أنا نطلب مرتي الوقت لي يوالمني ماشي بڨوسطو حتى واحد هنا مفهوووم.. و دوك نوضي تخرجي معانا ندورو شويا و خليك من المشاكل يرحم والديك.. سكتت عليه.. جا خارج تبعتو و حلا عيطتلو قالتلو بابا حبيت نجي معاكم راهو ضايق خاطري.. قالها ارواحي..
طلعت معاه ملقدام فالطونوبيل جات حلا حكمتني من يدي و قالتلي أنا نطلع مع بابا ملقدام قلتلها رجلي راهي توجع.. ركب صراع قالها خلاص بنتي خلينا من المشاكل.. بدات تنسف و طلعت للور.. دانا حوسنا شويا و هو فرحان و يضحك و يڨصر كي شفتو هكداك فرحت.. شرا باطة ايس كريم ليماه و كي حبطنا عطاهالي في يدي فهمت قصدو شديتها عليه و رحت لشومبرة الحاجة سلمت على راسها و قلتلها ما تزعفيش دوك نروح نكمل شغلي.. هو لي قالي نطلع ياك علبالك بلي عندو قريب شهر و هو زعفان مني.. قالتلي يا بنتي أنا وش طلبت منك من غير تعاوني نور و الله غير حرام هي تان عندها دراري وراجل وش تلحق وش تخلي بزاف عليها، تقابلو فالشغل يد بيد.. قلتلها ما يكون إلا خاطرك يما.. درت صبت صراع واقف مورايا تبسم و هو راضي بالشي لي درتو.. طلعنا بدلنا حوايجنا درت صبتو لابس وحد القميص ما علاباليش كيفاش جا عليه ما جاهش شباب بديت نخزر فيه و نضحك.. توسوس قالي وش بيك وش راهو يضحك فيك؟! قتلو و الله ما جاك شباب.. قالي علاش؟ هدا جديد ما عنديش بزاف ملي شريتو.. قتلو راك تشبه لخالد الصاوي في فيلم يعقوبيان ( هدا كان دورو فالفيلم مثلي جنسي وصراع يعرف الفيلم ) .. فتح عينيه قالي ما تستحين أنا تشبهيني لهداك الساقط؟! ارواحي لهنا.. ضحكت و هربت من الشومبرة قالي وين تروحي ياك نحكمك.. حبطت نجري فالدروج و هو يعيط اطلعي لهنا تشوفي.. خبطت في نائل قالي بعقلك وشبيك؟ قالو صراع ما كاين والو و قالي ارواحي هنا ليوم نشوي البصل على وذنيك.. و نائل عمبالو صرا ما بيناتنا مشكل سورتو كي شافتو يلعبها سيريو و هو شايد الضحك قالو بلعقل عليها خويا و قالي اطلعي يلا.. طلعت قدر لنائل و حاكمة الضحك على شكلو بهداك القميص.. كي وصلت لعندو حطني تحت جناجو و مشاني قالي أنا خالد الصاوي ياك؟ قتلو لالا نسحب كلامي.. قالي آااا وييي و ضربني بكوتبيي جابني لداخل فالشومبرة شبعت ضحك قالي ارواحي لهنا تشوفي أنا تشبهيني بهداك؟ عمبالك ما نعرفش الفيلم واقيل؟ قتلو لالا ماشي أنت قميصك هههههه.. رماني فوق البونك انا تضحك و هو مطابس عليا و مثبت يديه و غايس فيا كيفاش نضحك حتى حكمتني لابانيك من نظراتو.. حبست الضحك قتلو وشبيك؟ حكم يدي و حطها على قلبو قالي راكي تشوفي وش يصرا لقلبي كي تكوني قدامي و نشوفك فرحانة؟ حاجة لداخل نحسها تزغد فيه من الفرحة و ما علابالوش كيفاش يحبك يحضنك يحير وش يدير من كثرة حبو ليك..
تبسمت و حشمت من دقات قلبو و كلامو ما عرفتش نجاوب.. حبط باس خدي و تكسل قدامي و دخل راسو في حضني قالي ما تبعدينيش عليك و الله غير نموت في كل لحظة ما تكونيش فيها قدامي.. قتلو أصلا ما عندي حتى واحد من غيرك..  قالي اشششت ما نحبش تقولي هاد الكلام حبك ليا و معيشتك معايا لله ماشي على جال الحاجة، ما نحبش تضعفي و تقولي ما عندي حتى واحد.. ما تقوليليش ما عندي حتى واحد من غيرك قولي ما نحتاج لحتى واحد من غيرك.. و هاد الدار دارك سواءا داوسنا ولا تصالحنا مستحيل نحاوزك منها و بركاي ما تحاوزي في روحك منها و تتصرفي شغل غريبة.. و الله غير نموت عليك.. يهدر و حوالو مهولة يشم و دايخ فيا.. همستلو قتلو مام أنا والله غير نحبك.. قعدنا كيف كيف حتى للسحور دا هداك القميص لنائل قالو اديه ادا عجبك شريتو و ما عجبنيش.. راح نائل قاسو و يوريلنا فيه قتلو جاك شباب و صراع شايد الضحك غير بالسيف..
غدوا من داك مع الظهر كان صراع خدام و نائل نسمع فيه يداوس هو و نور فالشومبرة.. هي جات للكوزينة توجد معايا و هو لحقها بالزڨا و التشقلالة.. درت شفتو بالقميص هداك ضحكت قلت لبس قميص صراع عداه لوكان غير ينحيه.. هو سمعني قالي و هو زعفان وش قلتي ختي؟ راكي تعايري فيا بالقميص لي عطاهولي خويا؟ قتلو لالا حاشا ماشي هكداك بصح قلت عداك بالقلق ديالو كي لبستو.. قعد متعنكر فيا منبعد دار و راح..
سمعت طونوبيلة صراع طليت من التاقة و هو حبط قالي الله يعاونك قتلو على سلامتك عمري.. قالي سمعت العياط وش كاين قتلو نائل و مرتو
قالي صافي هكدا ولات نهار عندنا و نهار عندهم.. خليني منهم راني عيان و عطشان و راسي يوجع نطلع نرقد.. بصح وين راهو الحاج طونوبيلتو ماكاش.. قتلو و الله ما علابالي خرج الصباح سور راح يشوف أم سعد.. 
رفد التلفون و عيطلو قالو وين راك بابا؟ قالو في دار سعد لخطر على حساب الشوفة ما عنديش بلاصة في دارك.. نقعد هنا خيرلي.. قالو خود راحتك بابا كاين زوج ديور و رانا في زوج ولادك وين ما ترتاح تقعد راك تاج على ريسانا.. اسمحلي انا هدا وين جيت من الخدمة ابقى على خير.. كوبا التلفون و قعد يتمتم وحدو قال كل يوم واحد يغضبلي و ارواح يا صراع راضي و حلل.. حط تلفونو في جيبو و قالي راني طالع لفوق ما تنوضينيش..
جازت ثلثيام و الحاج ما جاش كي شاف بلي صراع ما حاولو ما راح جابو ولا جاب أم سعد و جا وحدو..
خلاص شهر رمضان و صراع دا يامات العيد و يامات كونجي قالي نطلع أنا و ياك لتركيا نبدلو الهوا.. الحاجة كي سمعت ما حبتش قالتلو راكم جيبو فالعين لرواحتيكم.. قالها و أنا وش راحلي فالناس و عينيهم.. ولا كي شهور و حنا مداوسين كامل غلقو عينيهم و دوك كي تصالحنا و حبينا نفرحو كامل فتحوا عينيهم.. ربي رازقني بخيرو الحمد لله و أنا نقعد راقد على دراهمي و نحسب فيهم؟! و أما بنعمة ربك فحدث.. أنا نخرج نشوف وش خلق ربي و مرتي ضايق خاطرها وش ذنبها باش تبقى محبوسة فالدار و زيد ما عندهاش ليمن تروح و تفاجي على خاطرها يمال أنا لي نديها تشوف الدنيا علاش درت جريمة؟! قالتلو يا وليدي العين حق قول ديتها للعاصمة ما تقولش ديتها لتركيا.. قالها علاش راكي تشوفي فيا نمشي و نربح و نقول راني رايح نديها لتركيااااا ؟!! جيت نعلمك هدا ما كان.. قالتلو لالا قصدي ما تقول لا لباباك لا لوحد وخر.. قالها ان شاء الله يما ما يكون إلا خاطرك..
ثاني يوم العيد وجدنا حوالنا و طلعنا لتركيا قعدنا سمانة لتم.. ماكاش حاجة ما شريتهاش.. حوست لعبت زهيت البلايص لي كنت نشوفها فالمسلسلات التركية كامل داني ليهم وراهملي.. كنا نخرجو مع لعشية ما نرجعلوش حتى لليل و نكملوها سهرة مع بعضانا.. خلاني نلبس سروال مع حاجة مستورة و ماشي مزيرة في عوض الحجاب.. داني للحفافة بدلت اللوك تع شعري..
ارتحنا تع الصح و بالنا صفا حتى تلفوناتنا و طفيناهم ما حبيناش نعاود حكاية الأردن..
غير رجعنا للبلاد صبناهم كامل سامعين بلي كنا في تركيا لخطر صراع كان قال لنائل على جال لي باسبور قبل ما يهدر مع الحاجة.. و نائل قال للحاج و الحاج قال لأم سعد و شيبة النار كي قناة الجزيرة سمعت بنا أمة لا إله إلا الله..
الحاج قال لصراع علاش تخبي علينا خفت نحسدوك؟ قالو بابا هادي خدايم يما تخاف علينا أما أنا العين ما تهمنيش قل لن يصيبنا إلا ما كتب الله لنا..
أنا كنت فرحانة بزااف ما برونشيتش للتشكك دياولهم و ما حبيتش نفسد مورالي و حتى هو نفس الشي..
عشنا فترة أكثر من شهر مرتاحين بشكل ماشي طبيعي عايشين حياتنا تقول علينا عرسان حتى وحد النهار كنا راقدين و متحاضنين.. مع الفجر سمعنا الدقديق فالباب تع الشومبرة.. صراع قفز و قال شكوووون؟ قالتلو نور نوض أبو حرب.. ضحى مرت سعد توفات الله يرحمها رمى الغطا و ناض يجري لبس حوايجو و فتحلها قالها شكون لي قالكم؟  قالتلو هدا وين عيط للحاج من السبيطار.. قالها لا إله إلا الله محمد رسول الله إنا لله و إنا إليه راجعون...