مراهقة والاربعيني بلهجة جزائرية

58

#المراهقة و الأربعيني:

#الجزء58:

جا الخبر تع ضحى الله يرحمها و تفرفشنا.. صراع راح للخزانة بلخف لبس حوايجو و جبد الدراهم و السلاح و حبط يجري و أنا لبست غوب دو شومبغ فوق حوايجي و خرجت من الشومبرة دوشت و وجدت روحي باش نروح للجنازة حتى نسمع فالحس لتحت فالدار، حبطت نصيب الناس جاو لينا و أهل ضحى دخلو يتصاوغو و يتباكاو .. و باب الڨراج و الصالون انفتحو و نور تعيطلي خفي ليليان باش نوجدو و هيام دخلت و أنا صراحة تقلقت على أي أساس تندار الجنازة في دارنا علاش ماشي في دار سعد؟!
رحت لشومبرة الحاجة رفدت تلفونها و عيطت لصراع رفد عليا و هو مزروب قالي انعم يما.. قتلو صراع الجنازة في دارهم ولا في دارنا؟ قالي في دارنا.. قتلو علاش في دارنا و ماشي في دارو وشنو هاد الحكاية صراع؟ قالي ليليان راني مزروب.. قتلو كيفاش مزروب صراع ما تهبلنيش علاش تتوسخ الدار و تتزرزق و حنا لي نعياو فالشغل علاش ماشي في دارو ياك كبيرة.. قالي روحي دوك راني مشغول كي نرجع فالليل نفهمك.. قتلو وش تفهمني علاش كاش ما قعدت مفاااااهمة.... كوبا في وجهي طلعلي الڨاز قتلو في قلبي ياك جي ليوم و نتفاهم معاك..
وقفت فالكوزينة أنا و نور و هيام وجدنا الفطور للناس.. جات حلا و إخلاص و أهلها و عمومهم و فاميلتهم و فاميلة ضحى.. نغزتني هيام قالتلي اطلعي اغلقي شومبرتك و نحي المفتاح يلا...
طلعت لفوق صبت كاين نسا طلعوا لفوق..
و قعدو في شومبرة حلا و فالهول.. دخلت لشومبرتي خملتها و جيت خارجة باش نغلقها  سمعت النسا يحكيو ما بيناتهم وحدة قالت شوفي شوفي يا الجايحة علاش حنا وش خصنا باش ما نعيشوش في قصر كيما هدا.. جاب وحدة ما يعرفش حتى أصلها منين و حطها هنا و عيشها فالنعيم و ما عرفناها لا مسلمة ولا مسيحية.. ما غلطوش لي قالو زهر العواهر جواهر.. قالتلها لوخرا استغفر الله وشبيك علاش تقولي على المخلوقة عاهرة عيب عليك.. قالتلها يمال كيفاش جابوها؟ ياك دارت ديڨا مع عابد و قتلو خوها و فورصاو صراع باش يتزوج بيها.. قالتلها ياك صراع دخل عليها و صابها عويتقة و الحاجة بجلالة قدرها خرجت حوايجها شافوهم كامل.. قالتلها و أنت آمنتي؟ هادي تعفسها لصراع؟! هداك أكبر اسكرو يوصلك للبحر و يرجعك عطشان.. شافها حمرة خضرة و تشهاها.. جرحها ملفوق و حط الدم و قال مرتي شريفة.. ما شفتيش السم لي في وجهها باينة واش تسوى.. قالتلها لوخرا ربي العالم يا ختي حنا هدا وش سمعنا.. قالتلها أنا غاضتني د غير إخلاص مسكينة.. الراجل وليد عمها و بدراهمو و أملاكو و هي راضية تبقى بلا زواج.. قالتلها لوخرا السيد متزوج و ماشي حايب يعاود و هي وش ديرلو؟ قالتلها و منبعد كي متزوج؟ لوكان دوك نتعرى قدامو و نصوغ و نلم الناس عليه نخليه يديني بالسيف عليه و على ماليه.. قالتلها بوووه عليك يومين و يطلقها وش عندبالك.. قالتلها يا الجايحة الراجل كي الطفل الصغير بلخف تكلخيلو.. نطيحلو زوج دمعات و نقولو تزوج بيا منبعد ربي يعملها تاويل.. نخلي خيرو في جيبي و هادي لي ما عندهاش الأصل ما نشوفها ما نهدر معاها هي في حدها و أنا في حدي..
تقلقت من الهدرة خرجت و قلت نتوما صح ما تستحيوش.. قاعدين في داري و دايسين بساطي و تهدرو في أصلي و شرفي.. شوفي نتيا أنا أصلي يشرفك و يشرف لي كثر منك فهمتي.. قالتلي لالا ختي والله ماني عليك كنا نهدرو على وحدة صاحبتنا.. قلتلها مانيش راقدة على وذنيا.. أبو حرب راجلي و هدرتي معاه نشوفو إدا يقبل بالكلام لي كنتي تقولي فيه عليا..
غلقت الشومبرة و هي تتعذر خليتها و حبطت نغلي رفدت التلفون عيطتلو المرة الاولى قعد يصوني المرة الثانية رفدلي قالي يا ودي راني فالجبانة.. ندفن روحي هنا و نتهنى.. قتلو إيه غير ادفن روحك و ماجيش عمري خرجت.. قالي روحي و ما تعيطيليش راني مع الرجال ما تقدرش نهدر.. قتلو إيه إيه منبعد ارواح و ادلل.... كوبا في وجهي قتلو في قلبي معليه ياك نحكمك..
قعدنا نهار كامل مع الشغل عيينا.. ظهري تقسم من الفجر حتى لليل و حنا واقفين على رجل..
دخل هو فالليل للكوزينة و النسا واقفين.. شاف فيا تعنكرت فيه جاه الضحك بصح شد روحو و خبا التبسيمة حتى قلقني ..
دخل قعد فالهول مع عماتو و سعد كانوا يهدرو على الدفينة منبعد عيطلي قالي أم حرب وجديلي الدوش.. وقفت مع لافابو نغسل جا هو وقف قدامي قالي وشبيك المهبولة؟ قتلو ما تهدر معايا ما تقرب ليا كرهتك.. قالي و الله غير راني عيان.. قتلو ماشي محتمة عليك أنت لي درتها لروحك.. قالي وشبيك مهبولة أنت الجنازة عندنا.. حنا واقفين و نهدرو حتى طاح علينا التراب ملفوق قفز و عيط قال شكون هداااااا لي راهو لفوق و طلع يجري  يشوف و أنا موراها ما صبنا حتى واحد.. قال شكون لي طرشنا بالتراب؟ واحد ما واجب.. خرجت إخلاص من الصالدوبا قالها انتي لي رميتي التراب؟ قالتلو وشمن تراب؟ دار ليا قالي حافظي على دارك و ما نسحق حتى واحد يطلع لهنا فهمتي ( هو ليطاج تع لفوق متولو من كلشي و مخليه غير لينا حنا الزوج و لحلا كي جي ضيفة و الباقي كامل لتحت)
جبدت النفس و دخلت للشومبرة تكسلت و هو دوش و رجع لبس حوايجو و جا ساماني قالي اااااخ و الله غير عييت و قرب ليا جا رايح يجبدني لحضنو قتلو وخر صراع ولا و الله غير نقلب الدنيا عليك.. قالي وشبيك وش خداك؟ قتلو علاش ما خليتش الجنازة فالدار لوخرا جاي تكسرلي في راسي هنا.. قالي مزيا جا الهوا في يد ربي سبحانو و ماشي في يدك.. وش خداك ياك خويا.. قتلو اسكت عليا اسكت لخطر لوكان نبدا نهدر نطرطق.. قالي صحا وش الحاجة لي ضراتك في هاد الشي؟ قتلو علاش أنت يهمك؟ لوكان جا علبالك بيا لوكان خممتلها ملول.. قالي دوك خلينا من هاد الكلام و فهميني وش الحاجة لي ضراتك و الله غير راني عيان.. قتلو ااااا عياااان إيه عندك الحق لخطر ماشي أنت لي من الصباح و هو واقف مع البوطاجي على لاتاي.. ظهري تكسر غير قولي ربحت من أهلك و لا من خوووووك؟  قالي ياودي نقصي صوتك الناس راهي قاعدة فالصالون استرينا الله يسترك.. ارواحي نديرلك مساج لظهرك.. قتلو اااا ديرلي مساج... دوك دوشت و ارتحت و تحوس من المساج توصل لحاجة اخرى.. ياك انت هدا وش يهمك غير رغباتك و نفسك.. قالي اوووووف و الله ما معيشة هادي.. ما حبيتيش خلاص أسكتي علينا كيما درت معاك حرت وشنو دينتك انت و الله غير خليتيني نترحم على وجدان.. كنت كل سمانة عرضة و ضياف تعيا و ما تقدرش تهدر لخطر علابالها نفتحلها الباب و نبعثها لدارهم و دوك أنت نقولك نديرلك مساج لظهرك و تزيدي تتكبري عليا.. أخطيني يا بنت الناااااااااس.. و خرج مقلق..
دخلت في فراشي و قعدت نبكي.. نص ساعة منبعد و رجع طفى الضو و جبد الغطا و رقد.. حس بيا نبكي دار ليا جبدني لعندو حطلي راسي فوق يدو قالي وشبيك عييتي من الجنازة؟ غدوا ان شاء الله الصباح نعيط لأم يوسف جي تخدم في بلاصتك و هيام توقف معاها و أنت اطلعي ترقدي في شومبرتك ادا حبيتي خلاص ما تتقلقيش.. قتلو أنا ما قتلك والو بصح فوق تعبي نولي أنا لي ماشي مليحة و وجدان خير مني؟ قالي دوك هاد الشي لي غاضك؟ اسمحيلي ما نزيدش نعاود و جيبي راسك نبوسو.. هدا ما كان؟ بصح خلاص بركاينا و الله غير راني عيان.. قتلو علاش راك تشوف فيا أنا مرتاحة؟ فوق التعب نزيد نسمع كلامهم و السم ديالهم لي ما يخلاصش.. قالي وشمن كلام؟ حكيتلو.. قعد غايس منبعد جبد النفس و قالي ارتاحي ما تعمريش راسك غدوا ان شاء الله نعرف وش ندير..
قعد يديرلي مساج لظهري حتى غفيت ما فطنتش حتى ال8 تع الصباح ما صبتوش قدامي.. رحت غسلت و سڨمت روحي.. غلقت الشومبرة و حطيت المفتاح فالسلسلة ديالي في رقبتي.. قعدنا مع الشغل حتى للظهر.. كي كملنا التحرحيرة تع الغدا دخل صراع قالي ليليان ارواحي.. و مشي.. رحت ليه قالي وين راهو مفتاح الشومبرة؟ قتلو علاش؟ قالي باش نجبد الدراهم.. قتلو ياك مفتاح الخزنة راهو عندك.. قالي يا ودي اعطيني مفتاح الشومبرة خدمي مخك و ركزي معايا شويا راني مزروب.. قتلو اااا هدا و جبدت السلسلة من صدري و عطيتهولو.. قعدت نخدم شويا منبعد قلت نطلع نشوفو...
[ البنات هنا يحكي صراع وش صرالو مع إخلاص...]
قال صراع:
كنت فاتح الخزنة و نحسب فالدراهم سمعت الباب تع الشومبرة تفتحت قلت ليليان ارواحي احسبيلي هاد الدراهم دخت.. ما ردتش درت ليها قلت وشبيك..... تشوكيت قلت إخلاص؟!! وش تحتاجي؟!! قالتلي حبيت نهدر معاك و تسمعني.. قتلها راكي في عقلك أنت؟! راني مزروب بنت عمي خليها مرة أخرى و المرة الجاية دقدقي الباب قبل ما تدخلي.. رفدت الدراهم حطيت وش نحتاج في جيبي و الباقي رجعتو للخزنة غلقتها.. كي درت باش نخرج صبتها مازالها واقفة استغربت رفعت حاجبي و تعنكرت فيها قلتلها وش كاين؟! قالتلي لوقتاش تبقى حاڨرني هكدا و أنا روحي معلقة فيك علاش ماراكش حاس بيا و الله غير نحبك و نموت عليك.. قلتلها احشمي على عرضك رانا فالجنازة ماشي وقت هاد الكلام.. و عيب عليك راني غير أنا وياك فالشومبرة خليني نخرج.. مشيت باش نخرج و هي وقفت مقابلتني نحات خمارها و بدات تندب في حناكها و تقول حبيتني نحرق روحي وش خصني علاش ما ترضاش بيا و الله غير نحبك... قاطعتها قتلها ياودي احشمي و اخرجي الناس راهم فالدار مانيش حايب نرفع صوتي و نتفضحو.. روحي أنت صح ما تحشميش... قالتلي لالا ما نروحش جيت باش نقولك روحي معلقة بيك حس بيا... قربت ليا و حضنتني طبعتها و قلتلها ينعل باباك يا وحد الساقطة قليلة الحيا.. جيت نفتح الباب صبت ليليان في وجهي و اخلاص تبكي و تشهق مورايا و فوقها منحية خمارها...
[ هنا ليليان لي راهي تحكي و تكمل وش صرا منبعد...]
ليليان قالت:
تصدمت كي شفت خارج زعفان و مقلق و هي منحية خمارها و تبكي هبلت ياربي وش صرا ما بيناتهم.. كان رايح يخرج حكمتو من يدو قتلو دوك تحكيلي وش صرا هنا ولا نلايم عليكم الدنيا
تعنكر فيا و دخلني للشومبرة.. إخلاص بلخف لبست خمارها و هو فتحلها الباب و قالي روحي بنت عمي.. قتلو وين تروح ما عندها...... قاطعني قالي ما تزيدي حتى حرف.... قالتلو إخلاص استرني وليد عمي تعيش ما تفضحنيش.. قالها روحي راكي مستورة بصح خفي اخرجي.. خرجت إخلاص و أنا خلاني مور الباب.. قتلو اسمع أنت ارواح ارواح لهنا تشوف.. كيفاش تخرجها وشنو هادي راكي مستورة؟! غلق الباب و قالي ما نحتاج نسمع حتى كلمة على الشي لي صرا فهمتي؟ قتلو وش صرا؟ قالي دخلت للشومبرة صبتها بلا خمار تعذرت و جبت خارج صبتك في وجهي.. ضحكت و قتلو راك تتقعد بيا هههه ياك الشومبرة كانت مغلوقة و أنا لي عطيتلك المفتاح.. قالي هدا وش صرا و عنديش كلام وحدوخر من غير هدا و يا ويلك نسمع جبدني معاها هاد السوجي.. قتلو شد في هداك الخيط و الله غير نقلب عليها الدنيا.. قالي يا بنادم استهدي بالرحمن.. الجنازة عندنا و الفضيحة تحصل في راسي و في داري.. استريها و كي تخلاص الجنازة و يروحو الناس نعاودو نهدرو.. اغلقي شومبرتك و ردي بالك كثر لفوق حتى الصالدوبا ما تخلي حتى وحدة تطلعلها ياك كلشي راهو لتحت...
كي شفتو مقلق خفت نردلو الكلام و يداوس معايا قدام الناس وليت سكتت و قلت مور الجنازة و نهدرو..
عطاني المفتاح و راح و أنا غلقت الشومبرة و حبطت صبت إخلاص قاعدة مع حلا و عجوزتها أم وسام.. شافت فيا دار قلبي منها حبيت نبزقلها في وجهها..
دخلت للكوزينة صبت هيام تنقي فالخضرة قعدت معاها.. ردت بالها بلي ما كنتش في حوالي قالتلي وش كاين؟ حكيتلها انخلعت و قالتلي هادي خلاص راح الحيا من وجهها ما صابتش راجل يقبل بيها تذل في روحها حبت تلصق روحها بالسيف.. خودي حدرك منها لا تبليك أنت و راجلك.. قلتلها صراع قالي أسكتي.. قالتلي حب يكوبي السوجي وش حبيتيه يقول..
قعدنا نخدمو.. كنت واقفة مع البوطاجي جات حلا قالتلي وين راهو مفتاح شومبرة بابا؟ قلتلها وش ديري بيه؟! شومبرتي و غلقتها.. قالتلي واقيل آمنتي بلي عندك شومبرة.. دار أهلك كامل ما جيش غير قيس شومبرة بابا هدا إدا قعدلك دار و لا أهل.. جيبي المفتاح لهنا حنونة.. قلتلها أيا احشمي على عرضك شويا..ما نمدلكش المفتاح صراع ما يحب حتى واحد يدخل لشومبرتنا و زيد الدار راهي كبيرة الله يبارك روحي اقعدي وين تحبي.. شافت المفتاح معلق فالسلسلة لي لابستها جبدتها من رقبتي بالزور و نحاتو قاتلي جيبي تشوفي لهنا هادي لي قالك جات العصر و بنات قصر.. داتو و طلعت و إخلاص كانت تستنى فيها فالدروج.. رحت لهيام بلخف خبرتها.. خلات وش في يدها و ناضت تجري طلعت لعندها و أنا معاها.. صبنا حلا متكسلة فوق البونك و إخلاص فاتحة خزانتنا و تقلب في حوايج صراع تع الخرجة.. غير شافتنا غلقت الخزانة بلخف و حلا تقعدت.. صاغت هيام و قالت صح لي استحاو ماتو.. نوضي انت تشوفي حبيتي تريحي عندك شومبرتك و دار لإخلاص قالتلي و أنت يا الكبيرة فعوض ما توقفي معانا فالكوزينة لاتية بخدايم الدراري هادو.. ما تحشميش تدخلي لشومبرة مرا و راجلها؟! قالتلي بلعقل عليك حنونة وش درنا؟ هدا كامل كي قلنا حبينا نقعدو سويعة بلا حس.. ياك من الصباح و حنا مربوطين معاك ولا عمبالك غير انت لي راكي تخدمي..
غلقت الخزانة و هوما خرجو و هيام حبطت لتحت.. كنت واقفة نغلق فالباب جات لعندي إخلاص قالتلي كلشي راح يتبدل و قولي إخلاص ما قالتش.. اصبري عليا برك إدا ما جنيتكش من هاد الدار مارانيش بنت بابا.. قلتلها ما عنديش الوقت باش نرد على وحدة بايرة كيما أنت.. ديت المفتاح و حبطت..
قعدت نخدم لداخل و الطياب كان لبرا فالجنان.. جا سليمان وليد عم صراع هدر مع هيام قالها ختي اللحم مازال ما طاب و قعدت قل من ساعة لصلاة المغرب وش نديرو؟ قالتلو اسكت برك مام أنا شفتو و راني حايرة.. دخل صراع للجنان عيطلو سليمان قالو أبو حرررررب ارواح تشوف خويا.. جا قالهم وش حكاية اللحم؟ قالو ما حبش يطيب.. قالهم و الحل كيفاش؟ قالو جوستومو راني نسقسي فيك.. قالو ما عندنا ما نديرو نحطوه هكداك و خلاص.. قالو تبهديلة نحطولهم الماكلة نص طياب؟! قالو يمال وش نديرو؟ و لا نقولك هاك 3 ملاين روح جيب عشا واجد من الريسطورو و لحم طايب يكفي الناس و غدوا ان شاء الله الثلثيام نعوضوها و نديرو حسابنا..
هو يهدر و المرا لي كانت تهدر عليا لبارح جازت.. بلخف رفع صراع يدو و قالها أم جمال وش راكي ختي.. قالتلو أهلا أبو حرب وش راك خويا لعزيز.. قالها الحمد لله السوال عليكم.. شوفي أم جمال مادام راكي في داري و دايسة بساطي و كليتي ملحي عيب عليك تطعني في عرضي مورا ظهري.. جات تهدر قاطعها قالها شوفي أنا دوك رايح نسكت على جال العزاء و لي قدامي راهم شاهدين بصح و الله و تزيدي تعاوديها غير الهدرة هاد المرة مع راجلك و عمومك و حسابي معاهم رايح يكون ثقيل.. قالتلو بووووه عليا خويا و الله أنا..... قاطعها سليمان قالها لالا عيب عليك أم جمال ماشي هكدا كلشي كلشي غير الطعن في أعراض الناس.. قالو صراع و الله العلي العظيم لوكان ما جاتش الجنازة ما نسكت.. قالو سليمان حنا كامل نهدرو في مرتك بلخير.. تربية و أخلاق و جامي سمعنا حسها و لا رجعت الكلام لكاش واحد حتى لي يهدر عليها تتحملو وتصبر..  عندي يومين و أنا معاكم فالجنان و هي تخدم معانا صوتها ما نسمعوش حتى كي تهدر تهدر بلعقل.. بصحتك خويا ربي جازاك بطفلة ما شاء الله عليها.. أبو جمال راهو برا و هو راجل ما يرضاش بالباطل لوكان يسمع يدير حالة.. قالو صراع علبالي نعرفو هو راجل فحل و ما يقبلهاش..
كانت أم جمال كلما جي تهدر يقطعوها بهدلوها بالقدر واحد يرفد و لوخر يحط و مع لخر خرجو باش يفريو حكاية العشا و خلاوها.. دارت هي ليا قالتلي بلخف رحتي وصلتيهالو ياك تعذرت منك و قتلك ما كنتش عليك.. تحبي المشاكل أنت؟ قلتلها أنا براوية و ما عندي حتى واحد من غير راجلي يرد عليا البلا.. أنا قتلو ليه لخطر هو لي يعرف كيفاش يتصرف علاش حتى ندير المشاكل.. نغزتني هيام قالتلي ارواحي معايا.. رحنا للجنان كان وليد عمهم لي يطيب للجنازة و هو يبعثنا نوجدولو.. شفت محمد وليد سعد ملبعيد.. هو منهار رجع صراع مور ما خطفوه الارهاب واحد ما هدر في حكايتو غمو كلشي مام أنا ما جبتش سيرة وش صرا لا قدام صراع لا قدام وحدوخر.. و هو ما يدور بينا ما يجي لعندنا.. حتى يماه نوال ما جاتش للجنازة تع ضرتها كي درناها عندنا لخطر ما تهدر لا معايا لا مع صراع منهار توفات بنتها...
سقينا الماكلة و دخلو ولاد عمومهم باش يديو للرجال.. وقفت مور هيام حشمت لخطر فيهم طبيعة لازم يسقسيو شكون هادي مايعرفونيش..
كملو حطو للرجال و بداو يسقيو للنسا و حنا نجيبو من عندهم و نديو لداخل.. كي شافني صراع داخلة خارجة قدامهم للجنان قعد متعنكر فيا عرفت بلي قصدوا ما نخرجش لبرا.. وليت دخلت هوما يجيبولي لداخل و أنا نحط فالطوابل للنسا.. كي كملنا قالتلي هيام ارواحي نقعدو ناكلو بلخف مادام الماكلة سخونة..
قعدت معاهم فالهول وحد النسا يبانو ناس ملاح شافو فيا تبسمت معاهم قالولي أنت مرت أبو حرب ياك؟ قلتلهم إيه.. قالولي وين درتي الوشم ديالك يبان تقول تع الصح جاك شباب.. قلتلهم درتو في تركيا كي رحت مع أبو حرب فالعيد.. قالولي بصحتكم ربي يخليكم لبعضاكم هو يستاهل وحدة كيما نتيا شابة و مربية.. صح جابدة روحك و ما تعرفناش عليك بصح تباني ناس ملاح مام هو الله يبارك عليه راجل يتثقل بالذهب.. ربي يحفظكم.. قلتلهم شكراا.. نطقت هيام قالتلهم هادي هي طبيعتها كالم في كلشي صوتها ما ينسمعش ماشي من طبعها تضحك و تجامل و اجتماعية مع الناس... قالولها إيه إيه تبان حشومية علابيها يموت عليها من حقو شابة و صوتها ما ينسمعش.. قالتلها أم وسام غير ماكالاه تهفكم لسانها كي تبدا تهدر فيه ميترا .. قالتلها هيام الزعاف يخرج العاقل من عقلو.. أنا سكتت ما عرفتش وش نواجب حشمت حتى ناكل.. نضت بلخف و رحت للكوزينة نوجد فلاتاي قعدنا معاه حتى للعشرة تع الليل و حنا سنيوة رايحة و سنيوة جاية..
نقص شويا الغاشي دخل صراع و سليمان للكوزينة كانو يهدرو منبعد قالي سليمان ربي يحفظك ختي إدا ما نشقيكش كاس لاتاي على يدك راسي راهو يوجع.. نطق صراع قالي ديري زوج.. أنا قعدت نوجدلهم و هوما راحو قعدو فالهول مع الحاجة و نسا عمومهم و بناتهم لخطر النسا البراوية كانوا قاعدين فالصالون.. وجدت لاتاي و ديتلهم.. عطيت لصراع شرلي باش نسبق في سليمان.. ديتلو قالي بارك الله فيك تعبناك في هاد الجنازة قتلو لالا عادي.. زدت مديت لصراع شاف في عينيا و تبسم.. قالي سليمان يقولو بلي بنات الموصل طيابهم بنين لازم نذوقو ماكلتك.. نطق صراع قالو اواه لالا هنا ما قستهاش.. قالو علاش وش قلت؟! قالو عام نذوقو حنا منبعد ارواح ذوق انت.. حنا خدمتها الديڨات وين تكون مسڨمة نعوجوها أما الماكلة و هاد العفايس خاطينا سليمان.. قالو لالا أبو حرب كلشي كلشي و تهدر عليها ما نقبل حتى واحد يهدر عليها.. كنت قاعدة قدامو قرصتو بالزووووور.. قال مام أنا ما نسمحلكش.. ياودي وين نروح منها استر عليا طاح الليل وين نبات الليلة.. هي مرة ما كاش كيفهااااااا... كلاطاو بالضحك هههههه قالو سليمان وش أبو حرب بلخف قلبت الهدرة خفت منها؟ قالو اسكت برك راني نرجف و لي ما يخافش من مرتو ماشي راجل.. ضحك سليمان و قالو هههههه قول والله...
دخل عمهم عزام و الحاج قالو نقصو صواتكم أهل المرحومة راهم هنا عيب نضحكو.. قالو سليمان كنا نحكيو على الراجل لي ما يخافش من مرتو، قالك أبو حرب ماشي راجل.. قالو إيه عندو الحق كاش واحد ما يخافش مرتو كي تقلب خليقتها يحير وين يبات.. ضحكنا.. قالت أم وسام لي حبت تشنف تشنف الراجل ما عندو ما يخسر راهم النسا على ريسانهم.. قالها صراع أم وسام كي تاكل في دارك مهما تكون الماكلة قيس قيس و قد الحال بصح علبالك بلي ما تضرك ما تتسمم منها بصح الماكلة تع برا الضامن ربي.. هكداك النسا راهم على ريسانهم كيما قلتي بصح وين تصيب كيما لي عندك.. مثلا كيما وليدك وسام لوكان يرمي عينيه لبرا و يحوس على وحدة من غير بنتي نرفد على ظهري و نرميه فلرض رقبتو نكسرهالو.. ضحكنا و مام هي ضحكت بصح كان باين عليها بلي تقلقت من كلامو و حلا حبطت راسها و ما قالت والو..
قعدو يقصرو و أنا قاعدة قدام صراع و إخلاص ما نحاتش عينيها عليه همستلو قتلو هادي شحال ما تستحيش.. قالي خليك منها اسكتي.. قتلو أنت هدا وش تعرف غير اسكتي اسكتي.. نضت و طلعت لفوق.. صبت التراب فالعتبة تع باب شومبرتنا الڨاز طلعلي قلت وشنو هاد الوسخ راني ميتة بالعيا مانيش قادرة نمسح.. نروح نرقد و الصباح نمسح..
دخلت تكسلت و غمضت عينيا باش نرقد دخل صراع تكسل قدامي قالي واش مرتي رقدت؟ ما واجبتوش.. قرب كثر ليا و تغطى.. قتلو صراع وخر راني حايبا نرقد.. قالي و أنا كيفاش؟ قتلو راني عيانة من الجنازة علاش أنت ماراكش عيان ما تحسش؟ وخر... جبدت الغطا و درت عليه تقلق عطاني بالظهر هو تان باش يرقد.. تقعدت قتلو حقا إخلاص وش تحتاج عندك؟ قالي ماشي شغلك.. قتلو كيفاش ماشي شغلي و فوقها تزيد تهددني و تقولي لوكان ما نجنيكش من هاد الدار مانيش بنت بابا.. سكت.. قتلو علاش ماراكش تهدر؟ قالي راني عيااان.. قتلو اااا وييي دوك وليت عيان و كي تقوم نفسك عليا تولي لاباس بيك.. قالي سقسي روحك كي نجي نقرب ليك تبداي ديري فالسبايب و كي جيك على التنڨريش يولي لسانك طويل ما يعيا ما يسكت.. ما دام راكي عيانة انقبري.. خزرت فيه جبد الغطا و دور وجهو عليا.. جبدت النفس و بديت نطلع و نحبط مع روحي حتى رقدت..
نضت مع الفجر على صوتو وهو يصلي، حبطت لتحت كانوا كامل راقدين فالهول ماكاش بلاصة هادي لاصقة في هادي جيت جايزا عفست في كرش وحد المرا صاغت.. بعدت عليها حطيت رجلي على راس وحدوخرا و طحت عليهم و هوما يقولو وشبيك وشبيك خلعتينا.. ما رديلهمش قلتلهم في قلبي روحو الله لا تردكم خرجت روحي منكم..
دخلت للكوزينة ناضت هيام و ناضو كامل يصليو.. صراع دخل حتى صباح الخير و ما قالهاش.. قتلو خصني همك و كملت نخدم..
كانت ليوم الثلثيام تع الجنازة الدار كامل تعمرت ما جينا نكملو نعشيو هداك الغاشي غير بالسيف..  و إخلاص قاعدة غير مع الحاجة تڨصر و تضحك ما نعرف منين طاحت عليهم المحبة..
كامل راحو و الباقي دخلو عيانين.. صراع كان قاعد مع الحاج و سعد و نائل و أم وسام و حلا كانوا يستناو في وسام يجي يديهم.. قعدت قدام صراع و همستلو قتلو شوف لوكان ما تهدرش معاها و تحاوزها و تاخدلي حقي من هاد اللفعى و قسما بالله ما نسكت.. دار ليا متفاجئ قالي اسكتي ليليان عيب الضياف راهم عندنا.. قتلو يتسمى ما تهدرش؟ قالي وش نهدر اغلقي هاد السوجي ما تبهدليناش يا الحابسة.. سڨمت روحي و عيطت عموووووو... داروا كامل ليا و صراع ضربني بكتفو باش نسكت.. قالي الحاج غير لخير بنتي.. قتلو حبيت باش نشكيلك على إخلاص.. لبارح طلعت لشومبرتي و هددتني و صراحة أنا سكتت احتراما للعزاء و ما حبيتش تصرا مشاكل بصح دوك ما نقدرش حبيت نعرف أنا فواش آذيتها؟ قالي وش كاين ما بيناتكم حتى توصل للتهديد؟ نشوف في إخلاص صفارت و صراع حبط راسو و يمسح في فمو.. قتلو جوستومو عمو أنا هدرت باش نفهم علاش حتى تهددني؟ نطقت إخلاص قالتلي بواش هددتك أنا؟ قلتلها قلتيلي إدا ما جنيتكش من هاد الدار مارانيش بنت..... قاطعني صراع وهو يعيط خلاااص اسكتي و اطلعي لفوق.. قالتلو هيام لالا علاش تسكتها خليها تحكي و نشوفو وش كاين لخطر بنت عمك ما تحملهاش تقول ما بيناتهم حسيفة... قالها صراع ما دخلوناش حنا الرجال في حكايات النسا.. قتلو يمال شكون لي يدخل اااااه.. هي تقولي اصبري عليا و نخرجك من الدار.. و يماك تمشي الحيط الحيط و تقول السترة يا ربي و جامي تحامي عليا.. هيام كي تهدر كلامها مسوس و واحد ما يحمل.. ليمن حبيتني نشكي واقيل لمرت باباك لي ظل تقول عليا ما نعرفو أصلا من فصلها.. و انت كي نهدر معاك تقولي أسكتي و أنا حايبا نعرف دوك هي وش تحتاج عندي و علاش راهي قاتلة روحها على...... قاطعني و هو يتعنكر فيا قالي ليلياااان اطلعي لفوق يلاااا...
قالتلها أم وسام وشبيك إخلاص معاها بواش هددتيها؟ ضحكت قالتلها ههههههه وشبيكم آمنتوها ما بيها والو هدا كامل كي طلعت أنا و حلا ريحنا لفوق و هي ما قبلتش و حلا راهي شاهدة، حرشت هيام علينا حاوزتنا و زادت معانا فالهدرة و أنا سكتت قلت مهما كان تبقى بنت عمي.. تشوكيت وليت نرجف من القلق قلتلها و الله غير تكدبي أنت هددتيني.. قالتلي وش ما بيني و بينك حتى نهددك بصح خلاص عيب عليك.. و راهو عمي قاعد مدام شكيتيلو أنا تان نشكيلو.. تقبلو كل ما تنوض تقولي يا البايرة و راكي تجري مور راجلي و قاتلة روحك عليه؟ هو وليد عمي و علاقتنا مليحة و هي في كل دورة تطعن فيا و تتهمني ترضاوها؟ قلتلها اااا.. أنا قلت هكدا يا الكدابة.. قالتلي ما قلتيليش يا البايرة؟ عيب عليك باش تعايري بمكتوب الله.. و بدات تبكي و رجعت أنا لي نبان ماشي مليحة.. صراع عيط عليا نوضي اطلعي لفووووق يلاااا.. قتلو علاش نطلع أنا ما هدرتش هكدا واقيل آمنتوها منكم بالصح؟!  طبعني قالي اطلعييييي.. و تعنكر في هيام و شرلها باش طلعني.. حبيت نطير كامل دارو عليا و هي زاد صحاح وجهها وليت نعيط عليهم حسبي الله و نعم الوكيل فيكم ربي ياخذلي حقي منكم يا الظالمين.. و هو ناض يعيط يا بنت الناس اطلعييييييييييي.. قتلو هدا لي قدرت عليه يا راجلي و يا سندي؟ تقدر غير باش تسكتني و أنا مظلومة يا ظالمييييين... خليتهم و طلعت لشومبرتي نغلي.. شويا و سكت الحس عاودت حبطت صبتهم راحو مام حلا.. دخل صراع يتعنكر فيا و دخل للصالون.. المهم خرجت من هنا و تهنيت منها.. خليتو و طلعت لفوق طفيت الضو و رقدت.. شويا هكدا و دخل هو شعل الضو و قالي رقدتي؟ طلعت راسي و شفت فيه.. قالي اتقعدي نهدر معاك.. أنا قعدت و هو كان واقف مقابلني و داير يديه في جنابو و قالي حبيت نسقسيك برك و واجبيني.. الشي لي صرا لتحت راكي تشوفي فيه صحيح؟ قتلو إدا ماكاش لي يجيبلي حقي وش ندير، أنا نجيب حقي بيدي مادام انت راك ساكت و ديجا أنت أول واحد ظالمني..  قالي أنا ظالمك و أنا كلب وليد 16 كلب نهار لي رضيت ناخذ وحدة ماشي مربية و حابسة كيما انت.. أنا قتلك أسكتي ولا لالااااا؟ وصيتك من قبل ولا لالاااااا... قتلو ما دخلنيش فيك مليت منكم تظلموني و تهدرو و تهددو و لازم نسكت.. مانزيدش نسكت.. قالي يا الحابسة أنت كي تهدري تهينيني ماشي تاخدي حقك.. كي تقولي يا راجلي و يا سندي و تقصدي العكس وش خليتيلي.. خلاص كرهت من تصرفاتك استعقلي، فوق وش دارت زاد صحاح وجهها و خليتيني أنا لي نطلب منها السماح يا بقرة.. أنا نطيح بروحي قدام إخلاص القح..... و نقولها امسحيها فيا و جوزيها.. كنت حالف نخرج فيها وش دارت طول و عرض و أنت بغبايك ذليتيني ليهاااااا كيفاش ندير معااااااك.. فهميني.. عييت منك الأسلوب لي تبعتو معاك ما فادتش.. ما عندك واحد نلوم عليه و نعاتبو بيك و نقولو شوفو بنتكم وش راهي دير عقلوها.. ما قدرت نعقلك أنا.. راكي واقفتلي كي الشوكة في حلقي ما قدرت نبلعك ما قدرت نخرجك فهميني و آخرتها معاك كيفاااااش.. قتلك أسكتي علاش ما سكتييييش.. قتلو خلاص ما نزيدش نسكت..
قالي صحا وش استفدتي من السينيما لي درتيهااااا... قتلو المهم بردت قلبي.. قالي هكدا برد قلبك؟! شوفي أنا تان عييت منك.. ما فادت معاك لا عصا لا هدرة تع العقل لا عقاب.. ليوم زدتي اكدتيلي بلي حاجة ما تفيد معاك بصح دوك نولي نخليك يصرا وش يصرا معاك ما ندخلش روحي.. راح للخزانة جبد فراش و فرش فالقاعة بالزعاف و تكسل رقد وحدو.. ندمت و قعدت ساعة و أنا نلوم في روحي.. حتى للفجر و أنا نتقلب في فراشي.. حسيت عليه كي ناض توضى و صلى منبعد رجع لفراشو قالب خليقتو و عاقد حواجبو.. رحت لعندو قالي ليليان نوضي لبلاصتك و خليني طرونكيل.. دخلت موراه في الفراش و حضنت ظهرو جيت نهدر نحالي يدي و قالي علاش توصليني باش نولي غير نتيري فالهدرة منبعد تقوليلي ما تحترمنيش.. قتلك نوضي عليا.. قتلو والله ما قصدي نبهدلك و لا نقص من قيمتك أنا..... قالي كل كلمة تهدريها تتحسب عليا طيحتي بقيمتي قدام أهلي و فاميلتي علاش حتى تحبطي النيفو ديالك لوحدة كيما هديك وين راهو عقلك؟!  قتلو أنت ديرونجيت لخطر الحكاية تخص إخلاص.. قالي ليليان نوضي عليا راني عيان و مانيش في ڨوسطويا.. دوك الحكاية فاتت و الناس راحت علاش حتى نعاودها و نداوس فالليل منبعد أنا لي نظهر همجي و حيوان.. اتقي شري و نوضي عليا.. قتلو اووووو و آخرتها كيفاش؟ قالي و تزيدي تتنشعي ملفوق.. أيا نوضي عليا نوضيييي لازم توصليني للعياط... خبطت عليه و نضت قتلو إن شاء الله يحكمك ألف مرض... جيت نطلع لفراشي باش نرقد حكمني من شعري قالي عاودي وش قلتي؟ خفت رفعت يديا و قتلو ما هدرت والو ما قصدتش و الله... قالي أنا يحكمني ألف مرض؟! قتلو مانيش عليك.. قالي إدا كنتي بنت باباك عاودي وش قلتي في وجهي دوك.. قتلو اطلق شعرييييي مانيش عليييييك و طبعتو.. جبد عليا بكف و طبعني للبونك و رجع لفراشو كان يغلي بالزعاف.. قتلو هنا دير عليا راجل و لتحت اغلق فمك و اسكت هادي هي الرجلة ياك .. أنا هدرت هكدا و ينوض ليا جبدني من شعري و حط ركبتو فوق البونك كان صبعي تحتها.. هو يضرب و يقول أنا ماشي رااااجل.. يمال وش جابك ليااااا.. و أنا نصوغ و نحاول نجبد صبعي من تحتو ما قدرتش وليت درت روحي تغاشيت ناض عليا بلخف و بدا يفطن فيا.. طبعتو و نضت بصح هاد المرة صح دارت بيا الدنيا و طحت ما فقتش حتى صبتو يرش في وجهي بالما و يسب في روحو و يسب فيا غير شافني فتحت عينيا خلاني و ناض.. رفد فراشو حطو بجيه و راح دوش و لبس لاتونو ميليتار ديالو و قعد رايح جاي فالشومبرة و أنا نبكي.. منبعد قعد فوق الطابوري لبس الرونجاس ديالو و هو ينسف خبط لاكوافوز برجلو خرج و جبد الباب موراه بالزور..
تقعدت من فراشي يدي كانت توجع حسيتها تكسرت.. نضت غلقت الباب و رجعت لفراشي قعدت نبكي حتى داتني عيني و رقدت ما فطنتش حتى ال15 تع لعشية قفزت على لخبيط فالباب تع الشومبرة رايح يتقلع.. سمعت الحاج يقول  لصراع راني خايف تكون مغاشية  و صراع يخبط فالباب و يعيط كيفاش واحد فيكم ما تفاقدها ما سقسيتو عليها من الصباح بالاك ميتة.. نضت فتحت الباب و تخبيت موراه خفت ادا يشوفني الحاج لخطر كنت لابسة القصير.. دخل صراع و الحاجة تعيط من لتحت وش كاين؟ قالها الحاج لالة مولاتي راقدة حتى لدوك و ما علابالهاش بالدنيا..
قعد صراع غايس فيا قتلو وشبيك راك مبحر يماك ولا باباك في وجهي؟ قالي قسما بالله ما قدرت نفهمك.. وش كنتي ديري؟ قتلو كنت راقدة.. خزر في ساعتو و شاف فيا بوحد النظرة ما فهمتهاش منبعد راح للخزانة و قالي روحي امشطي شعرك و اغسلي وجهك و ارواحي نهدر معاك.. رحت غسلت و مشطت و رجعت للشومبرة صبتو بدل حوايجو و قاعد على طرف البونك.. قالي ارواحي تشوفي نهدر معاك.. قتلو أهدر و أنت في بلاصتك ماراهيش نافحتلي نجي قدامك.. تعنكر فيا خفت منو رحت قعدت قدامو حكم يدي و تنهد قالي وعلاش حتى تخليني نخرج على طوعي و نولي ما نعرفش وش ندير.. شفتيني مقلق و زعفان تجنبيني.. نقولك أسكتي و ما ترجعيليش الكلام تصحي وجهك تجبديني هكداك و تهدري كلام كثر من فمك.. ما تقوليش راني ندمان و الله غير وليتي ما تنحملي و جزتي على الخط الاحمر كنتي تستاهلي طريحة لخطر وجهك صحيح و ما تحشميش.. قتلو دوك فهمني راك جاي تتفاهم معايا و لا تهين فيا.. قالي ما رانيش نهين فيك راني ننصح فيك خلاص راكي تاذي في روحك و تآذي فيا بتصرفاتك الطايشة.. قتلو إيه نصحتي لبارح كيما يلزم الحال... قالي شوفي ملخر أنت ماجي لا بالحنانة لا بالعين الحمرا و الله غير حرت كيفاش نتعامل معاك.. رجال و مشيتهم على الشعرة في دواوين الكبار كي لحقت ليك تلفتلي حرت كيفاش ندير معاك ما فهمتكش قوليلي دوك أنت وش تحوسي؟ قتلو وعلاش ما هدرتش معايا هكدا لبارح أنت ديتها غير اسكتي و اغلقي السوجي و  انساي الحكاية و تكوفري على إخلاص.. قالي ياك قتلك و عاودتلك حكاية إخلاص ما نحكي فيها لا أنا لا أنت.. الكلب إدا عضك تعاودي تعضيه؟ إخلاص و خياتها و أهلها هوما كلاب العشيرة.. عاشرت مرة من عندهم و نعرف طراطڨهم و وساختهم ما تحتكيش بيهم.. إدا هي ماشي مربية و تبلاتك انت علاش تحبطي لمستواها؟ دارك ولا دارها باش تخرجك منو؟! ما توقفيش معاها في صف واحد حتى تولي كيما هي.. بعدي عليها و خلي الناس تميزك عليها.. العشيرة كامل حاسدتني عليك واحد يقول راهو يجدد في شبابو معاها واحد يقول زين و تربيتها ما يسعاوش و الله غير نخاف حتى نخرج بيك لآخر الشارع من عينيهم.. قوليلي وش صرالك حتى تقلبتي هكدا؟ قتلو كيفاش تقلبت؟ قالي رجعتي كلبة مكلوبة و خصاتك فاكسا.. قتلو يعطيك الصحة و نضت.. جبدني من يدي و جبد صبعي معاها صغت اااااخ...
شاف صبعي منفخ قالي وشبيه صبعك هكدا وش صرالو؟ قتلو سقسي روحك لبارح كي كانت تحتك و أنت تضرب فيا.. تنهد بقنطة و قالي ريحي هنا دوك نجي.. حبط شويا هكدا و عاود رجع جاب معاه طرف صابون من عند الحاجة حط السربيتة على كتفو و قالي امشي تشوفي.. داني للصالدوبا شعل الما سخون فلافابو و بدا يحكلي في صبعي بالصابون و الما سخون و أنا نازع من السطر.. قالي علبالك لوكان دوك واحد يجوز و يشوفنا هكدا يفهمها حاجة وحدوخرا.. قتلو عمبالك كامل الناس تخمامها ناقص كيما أنت.. جبدت يدي منو قالي كيفاش راكي تحسيها دوك؟ قتلو و أنت وش راك تشوف؟ قالي امشي نتغداو و نخرجك قتلو مانيش قادرة ناكل.. قالي راني حابط قبلك نوصي على غدا ملبرا.. رحت للشومبرة سڨمت روحي و حبطت.. نائل ما كانش فالدار و الحاج قاعد و الحاجة كانت مقلقة بزاف و صراع بعث علي جاب الغدا ملبرا حطيتو و جيت رايحة ما حبيتش نقعد منبعد كي عيط عليا هو وليت قعدت معاه هو ياكل و يعطيني ناكل.. الحاج تقلق قالو فعوض ما تكسرلها راسها على وش دارت مع بنت عمك لبارح و على الناس لي نوضتهم مع فجر ربي بحسها قاعد ديرلها فاللحم فالخبر و توكل فيها خلاص طلعتها بزاف.. قالو لي قلقاتو  مشاكلنا فهاد الدار ياك خليتلكم الدار لوخرا ارتاحوا فيها.. قالو راك تحاوز في باباك على جالها؟ خلاص غسلتلك مخك و رجعتنا كامل كحولة ما بين عينيك.. هي تحاوز فالناس و أنت ترضي فيها.. قالو شحال من مرة قلتلكم ما دخلوش رواحتيكم فياااااا.. نسممها تسممني اخرجوا من حياتي لا دخلوش رواحتيكمممم.. قالو كيفاش ما ندخلش روحي.. مرتك تطعن في شرف بنت عمك و أنت راضي عليها بهدلتنا قدام الناس و حنا ساكتيلها.. قالو بنت خوك اكبر قح..... و القح.... أشرف منها ألف مرة على الأقل هديك هي خدمتها.. و هادي لي راك تزوخ بيها قدام الناس تلعبها رابعة العدوية و في ظهور الناس خاربتها.. هو هدر هكدا و الحاج هبل و بداو يداوسو و أنا طلعت نجري لفوق تخبيت...