مراهقة والاربعيني بلهجة جزائرية

38

#المراهقة و الأربعيني:

#الجزء38:

كنا راقدين حتى حسيت بواحد رايح يفتح الباب، رفع صراع راسو قال شكون؟ قالو نائل اسمحلي عمبالي ماكان حتى واحد فالشومبرة، قالي نوضي خليني نروح عيب قدام دارنا، قتلو إيه راني نايضة، لبست و خرجت صبت الحاجة جات هي و حرب و حلا قعدت عند خوالها، وجدت الدوش لصراع و دخلت للشومبرة لي كنا راقدين فيها طميت الحالة خفت نائل يدخل.
غدوا منداك جاو بنات أم سعد و لادهم كي شفتهم كرهت حياتي.
صراع خرج الصباح و دا معاه حرب راحو يغافرو و فالليل جا قالي وجدي حوالك غدوا الصباح نروحو للعاصمة منها تحوسي شويا و منها نكمل أموراتي باش نرحلو على سمانة إن شاء الله.
ثالث عيد حبطنا الصباح و هو رفد الفاليزا لاقاتني شيماء قالتلي وين رايحة هكدا فالعيد؟ قلتلها رايحة مع صراع للعاصمة، دخلت لشومبرة يماها و أنا دخلت لشومبرة الحاجة نبقيها على خير حتى نسمع فالحاج يقول لصراع هداك دا مرتو لدارهم و انت رايح تدي مرتك معاك شكون يبقى فالدار قالو بابا ياك خياتي راهم هنا و يما راهو معاها حرب و وصيت  هيام جي ليها ولا حلال على بناتك يجيو يريحو في دارهم و على نسانا حرام يخرجو فالعيد؟! قالو بصح يا وليدي خياتك راهم ضياف و زيد هديك عندها ماليها تروح ليهم و مرتك ما عندهاش أهل و حتى العيد مايخصهاش، خلي كي يخلاص العيد و اديها، قالو شوف بابا حكاية ما عندهاش أهل ما نحبش نزيد نسمعها أنا أهلها و عيدها معايا ماشي مع حتى واحد.
فتح باب الشومبرة و عيطلي يلا ليليان .. دخل باس راس يماه و وصاها ترد بالها و تاخذ حذرها هي وهيام.
خرجنا و حكمنا الطريق للعاصمة، طريق كاملة و هو يضحك و يڨصر معايا حتى وصلنا لابارتومو ديالو، قالي تخرجي و لا ترتاحي قتلو نريح شويا من القعاد تع الطونوبيل و العصر نخرجو، قالي يمال خودي راحتك نروح نقضي وحد الشغل و نرجعلك متفاهمين؟ درتلو براسي إيه.
هو راح و أنا فرزت الدار و مسحتها، دوشت و تكسلت غفيت شويا، جا هو جاب الغدا و قعد يكيل فيا ملفوق لتحت و يتبلا بعينيه ضحكت قالي واش حنان الفتلاوي؟ ههه قتلو تشبهني ليها؟! قالي لالا تع وجهها بصح عندكم وحد الصفة مشتركة قتلو لي هي؟ قالي تهدرو بزاف كلام ما عندو حتى معنى ههههه قتلو يمال كي يجي الليل خلي المعنى يفيدك قالي وشمن ليل؟ أنا نحوس نهدر دوك
نوضي نوضي و عطاني يدو قعدني على رجليه و هو متكسل، قتلو وشنو الفايدة من هكدا راني جيعانة حبيت ناكل، قالي و شكون راهو شايدك كولي بصح ابقاي قدامي نتقلق من المسافات لي تكون ما بيناتنا، قعدنا ناكلو و هو مورايا عاجبو الحال ناسي روحو و همو مرتاح و يضحك، كي كملنا جبدني ليه..
فطنا على ال5 نضت نوجد في روحي و هو متكسل فالبونك و يشوف فيا منبعد قالي وش رايك ما نخرجوش و نبقاو هنا مع بعضانا قتلو اووووه صراع لاحقين باش نقعدو كيف كيف بصح حايبا نحوس شويا، ضحك و ناض باس راسي و يشوف فيا فالمرايا قالي بصح الماكياج لالا قتلو ندير شويا برك خفييييف قالي إدا هكدا معليه بصح غوجلافغ لالا.
لبست سروال و شوميزيي و رحت لعندو صبتو يشوف فالأخبار قتلو صراع وش رايك في حوايجي؟ خزر قالي يهبلو قتلو يعني نخرج بيهم نورمال؟ قالي ما دام قتلك جاوك يهبلو معنتها تلبسيهم هنا ما تخرجيش بيهم، قتلو بصح علاش ياك مستورين و لحمي ما يبانش، قالي البسي الحجاب فوقهم حبيبتي قتلو بصح وشنو الفرق؟ قالي ما كاش فرق بصح السترة مليحة قتلو صراع ماشي هكدا.... قالي ليليان قلت أمر طبق ما تناقشينيش، تقلقت قتلو يمال روح وحدك ما نخرجش قالي براحتك كيما تحبي، بدلت و قعدت، دخل دوش و بدل دار ليا قالي واش أم الديڨات تخرجي ولا لالا؟ دورت وجهي عليه و ما واجبتوش، قالي آخر مرة نسقسيك إدا ماواجبتيش نروح، تخرجي؟ قتلو انت أناني كي تحب تحطني على رجلك نولي عمرك و حياتك و كي تكمل صلاحك دير وش كاين فراسك، جا تكسل قدامي جا يحكم وجهي بعدت قالي ما نديرلك والو برك نهدر معاك قتلو وخرررر تفسدلي الماكياج بعد، قالي انت راهي في قلبك باش تخرجي و خايفة حتى على الماكياج ديالك بصح ديريها مليح في بالك باش تمشيني كيما تحبي و لا تكسري كلمتي و تفرضي رايك عليا غير انسايها، صح نحبك و نحترمك و قلت صغيرة و من حقها و خليتك ديري الماكياج مالڨري علبالك بلي ما نحبش، انت تان احترميني و قولي راجلي ما يحبش نلبس هكدا برا نساعفو و نمشيو حياتنا هكدا؟ قتلو بصح وشنو الفرق؟ قالي ما نحبش ياربي انت مخلوقة لعينيا برك و ما نحبش تلبسي حاجة تجبد عينين غيري ليك، شفت فيه قالي أيا نوضي نخرجك تحوسي و تشوفي الدنيا ما حبستش على اللبسة، سكت عليه، حكمني من نيفي قالي نوضي يا الراس اليابس نووووضي، قتلو اييييييي راني نايضة بصح وخر فسدتلي الماكياج، قالي سردينة و مرمدة فالفرينة قتلو شكون؟ قالي على حنان الفتلاوي ماشي عليك روحي برك خفي البسي، نضت نجري لبست بلخف و هو دار الريحة قتلو اععععع علاش درتها قالي نسيت عطاني شوينغوم قالي هاكب هادي دوك تريحي.
خرجنا رحنا لوحد المول هايل حاط يدي فيدو و يمشي طلعني ليتاج تع النسا قعدنا نشوفو حتى صونا تلفونو قالي دقيقة نريبوندي و انت شوفي بعقلك وش يعجبك بيدما نرجع، كنت نشوف حتى سمعت زوج بنات يخدمو لتم يهدرو، لولانية قالتلها شوفي شوفي هداك لي راهو واقف لهيك درت صبتهم يهدرو على صراع قالتلها الثانية شفتي ديك الحطة باين كاينلو روحي بالاك الواحد كاش مايدير خيوط معاه، رحت ليهم قلتلهم اسمحولي راكم تهدرو على هداك الراجل؟ دارو ليا قالولي و انت وش دخلك؟ قلتلهم هداك راجلي يا قليلات الحيا لوكان جيتو تحشمو و بنات أصلا ما ديروش هكدا، جا مول المحل قالي وش كاين؟ قتلو ما كان والو بصح المرة الجاية كي جيب خدامات اعرف وش تخير جيب بنات محترمات ماشي زغادات، شافني صراع نهدر مع الراجل عقد حواجبو كوبا و جا قالي وش كاين؟ قتلو ما كاين والو و خرجت خليتو يهدر معاهم لداخل شويا و جا ليا قالي وشبيك انت من نيتك؟ قتلو و حبيتني نسمعهم يدراڨيو فيك و نسكت؟! ضحك قالي بصح انت علاش حتى تبهدلي روحك خليهم يقولو وش حبو هادي كامل غيرة؟ ههههه و جبدني من يدي حبطنا لتحت قعدنا ندورو و شريت وش عجبني ليا و ديت للحاجة و حلا و حرب و حتى أم سعد قالي صراع معليه بيضي القلوب.
كملنا داني للجاردا كانوا العايلات مع ولادهم قعدنا نحكيو انا و ياه و ندورو جوزنا نهار شباب، طلعت في الجعلولة و هو واقف و يحكي معايا قالي أنت رايحة تولي أم؟! هههههه، قالي علبالك في صغري ما شفتش كامل الراحة، قلت نتزوج نرتاح بصح هداك وين زدت تعبت كل يوم الزڨا و الدواس وليت نسافر باش نبعد شويا على المشاكل و نرتاح بصح كيف كيف، كي توفات الله يرحمها قلت ما نتزوجش جربت من قبل و زدت غير الهم لروحي حتى لدوك باش عرفت بلي الراحة قادر تصيبها في انسان تشوف الدنيا بعينيه و تولي ما تخمم في والو كي يكون معاك، يبقى قلبك غير يخبط يخبط ما تعرفش وش دير تولي تضمو تحضنو و لوكان تصيب تخليه مابين ضلوعك و تقول هدا ديالي وحدي، هكدا راني نحس معاك هدا وين رتحت...
طاح الليل و بداو يجيو لي فوايو قالي هداك هو نروحو قتلو مام أنا عييت، رحنا للريسطورو تعشينا و قعدنا ندورو بالطونوبيل فلي بولفار و يوريلي فالبلايص، لحقت ال12 تع الليل دور الطونوبيل باش نرجعو غفيت فالطريق ما فقتش حتى سمعتو ينوض فيا قالي كملي رقادك لفوق عمري رانا وصلنا نڨاري برك الطونوبيل.
فطنت في نص الليل صبتو راقد قدامي و في يدو التلكومند طفى كلشي غير التلفيزيون كان منقصلو الصوت، رفدت التلكومند من يدو بستو من خدو تنهدت و أنا نشوف فيه، شهرين ملي تزوجنا عمري في حياتي إدا عشت دلال و اهتمام كيما هدا حتى مع والديا، كنت كي نغلط ما يرحمنيش حسيتو تبدل بزاااف، رجع يتنازل يڨصر يضحك و يجوز على غلطاتي غير باش نبقاو كيف كيف و ما نتزاعفوش، زاد خلاني نعشقو كثر...
غدوا منداك مع العصر داني لعند الجينيكولوغ باش تشوفني شدلي رونديفو كي شاف غير النسا فلاصال خرج  وقف برا مع وحد الراجل يتكيفو و يڨصرو..
لحقت دالتي دخلت دارتلي ايكوغرافي قالتي هدا البيبي لولاني؟ قلتلها إيه قالتلي شحال عندك ملي تزوجتي قلتلها عام قالتلي علبالك بلي عندك توام في كرشك؟ قلتلها توام؟ قالتلي إيه عندهم شهرين و الحمد لله راهم ملاح ما تتحركيش بزاف و ما تطلعيش الدروج..
عطاتني ليكوغرافي و لوردونونس خرجت عطيتهولو فرحانة و الدمعة في عينيا نشوف فيه و نضحك قالي عينيك راهم يبرقو وش قالتلك الطبيبة قتلو صراع عندي توام قالي قولي والله قتلو والله ضحك حضني و يقول نحمدوك و نشكروك يااارب اللهم صلي على النبي، منبعد فاق لعمرو بلي رانا في وسط الناس بعد عليا و الدمعة في عينيه من الفرحة، داني طاير و ما عرفش وش يدير عيط لوالديه بشرهم و كل شويا يبوس يدي و هو يسوق قالي دوك تقوليلي وش راكي متشهية...
النهار الثالث رجعنا للدار صباح قعدت مع الحاجة نحكيلها و هي تقولي الله يسعدكم يابنتي بصح اطلعي دوك و ادي الدوزان و أنا قعدت غير نهدر نهدر ما حبيتش نسكت عيطت عليا قالتلي خلااااااص تشوكيت قعدت غايسة فيها قالتلي افهمي العين حق و كاين بزاف لي مايحبولكش الخير في هاد الدار من أم سعد لبناتها لإخلاص لنور، ملبارح و هو الحاج طالع حابط فرحان و يقول صراع رايح يزيدو عندو توام خلاص اطلعي و ما تحكيش كل حاجة بنتي ربي يسعدكم و السترة مليحة.
قلت في قلبي وش بيهم هادو حتى الفرحة و بالقانون، وزعتلهم لي كادو حتى لإخلاص و جبت عيب تبقى في وسطهم تخزر، طلعت منبعد فقت بلي وحدة فيهم ما باركتلي على التوام.
كانت نفسيتي مرتاحة و صراع و الحاج وصاوهم فالدار باش ما يثقلوش عليا فالشغل.
5 أيام مور السفر كنت راقدة نضت مع الفجر السطر في كرشي وحسيت حاجة سالت مني، صراع كان راقد على كرشو سندت روحي عليه باش نرفد التلفون نشعل لاتورش حس بيا قالي خير حياتي كاش ما تحتاجي قتلو ما علاباليش كرشي توجع و حسيت بحاجة...... مع لي شعلت الضو صبت الدم في بلاصتي غير شافو قفز يجري من بلاصتو قالي وشنو هدا وش صرالك قتلو ما علاباليش راني ننزف بصح علاش؟! قالي البسي بلخف نديك للسبيطار رايحة تطرحي، بديت نبكي و خايفة قالي ما تبكيش ما يكون غير لخير إن شاء الله، خفي خفي البسي و ناض جبد الدراهم و لبس و انا دخلت للصالدوبا غسلت بدلت و لبست نحس ظهري رايح يطرطق من السطر حاكمة خصري و نبكي، حكملي يدي قالي وش راكي تحسي قتلو السطر قتلني مشاني غير لحقنا للدروج رفدني و حبط يجري حطني فالكانبي قالي دقيقة برك نخبر يما راح قاللها و جا طلعني فالطونوبيل و هي تبعتنا و تدعي ناض على صوتها الحاج و أم سعد و حرب، قالها يما ابعثي نائل لهيام يجيبها للسبيطار ماراهيش ترفد عليا التلفون.
ديمارا و هو يقولي اصبري قريب نوصلو و انا نبكي من الخوف لخطر السطر خف شويا، لحقنا للسبيطار ڨارا الطونوبيل و دخلني ليزورجونس بعثونا للماتيرنيتي قالو تع لاريسبسيو ممنوع تدخل معاها كاين غير النسا لداخل شوف كاش وحدة تدخل معاها قالو منين نجيبها راني وحدي، خزرت فيه قتلو صراع ما تخلينيش وحدي قالي ما يخليونيش ندخل روحي ما تخافيش ما كاين والو ان شاء الله قتلو لالا نستنى حتى جي هيام نخاف ندخل وحدي حاكمة في حوايجو و نرجف، رفد التلفون عيط لهيام ريبونداتلو قالها ما عرفتش وش ندير ما حبتش تدخل خافت خفي ختي تعيشي ... كانت جايزا علينا وحد الطبيبة قالتلو خويا تعيش ما توقفش هنا هدي صالة تع ولادة ممنوع على الرجال، قالها ختي الله يسترك شوفيها راهي اونسانت بتوام و تنزف، قالتي امشي معايا قالها الله يسترك ساعفيها صغيرة دارت ليا قاتلي ما تخافيش ما رايحاش ناكلك، داتني لداخل جات الجينيكولوغ سقساتني و قلبتني و أنا نبكي حتى تقلقت مني منبعد قالتلي راكي مغلوقة ما بانش ادا طرحتي و لا لالا نوضي روحي ديري ايكوغرافي و نشوفو ادا تحتاجي كورتاج باش نديرلك، خرجت لاقاني صراع قالي وش قالتلك؟ حكيتلو، سقسى وين يديرو الراديو قالولو يفتح على ال8 و كانت الساعة ال7 وربع، قالي اقعدي هنا حتى يفتحو تقدري تصبري و لا نروح نجيبلك كالمو قتلو لالا اقعد معايا راحلي السطر، رفد التلفون عيط نسمع فيه يقولو مرتي راهي فالسبيطار ما نقدرش نجي حتى نشوف في هيام ونائل جاو قالتلي هيام وش قالولك حكيتلها، نائل قعد مع صراع يهدن فيه كان حاط راسو و يهز في رجلو قالتلو هيام ما تقلقش خويا ما يكون غير لخير شد في ربي قالها سبحانو.
غير فتحو دخلت أنا و هيام لخطر كنت أنا لولانية، دارتلي الطبيبة قالتلي الحمد لله ما طاحوش بصح نبضهم ضعيف فرحت قلتلها يعني يعيشو قالتلي إيه إن شاء الله بصح يلزم تحافظي على روحك روحي للجينيكولوغ دوك تفهمك مليح ديت ليكو لصراع نضحك صبتو مقلق و نائل واقف معاه قالي كيفاش؟ قالتلو هيام الحمد لله مابيهم والو بصح نبضهم ضعيف تحتاج راحة تامة دوك تزيد تشوفها الطبيبة، حط يديه على وجهو قال الحمدلله رب العالمين الشكر ليك يا ربي منبعد شاف فيا قالي ارتاحي و الله ما نحتاج حاجة ما تبقايش غير تجري فالدروج ماشي هكدا، قالتلو هيام تولي ترقد لتحت عند يما و دارت ليا قالتلي هكدا ليونة؟ درتلها براسي إيه.
عاودت رجعت للماتيرنيتي دخلت ما قلبتنيش هاد المرة عطاتني برك لوردونونس و قالتلي ما تتحركيش من بلاصتك غير للضرورة و كي ترقدي حطي مخدة ما بين رجليك و ممنوع الدروج و الجماع، خرجت و حكيتلهم صراع فرح و رجعني للدار دخلني ديراكت لشومبرة الحاجة صبناها هي و الحاج يستناو فينا كي عرفوا بلي ما كاين والو فرحو و حمدو ربي.
صراع قال لهيام: أم علي أنا خوك حبطيلها فراشها لهنا و عينك عليها تبوجي من ولا من اضربيها و رجعيها لبلاصتها وليت نضحك، حبطت حلا قالت وش كاين؟ قالها صراع يابنتي الدنيا كامل ناضت و انت تقول ماراكيش عايشة معانا، عينك عليها حتى يثبت الحمل لي في كرشها خاوتك، قالتلو بصح وش صرا؟ خرج و هيام قعدت تحكيلها و توصي فيها.
راح جاب صراع 3 جاجات ذبحهم جريان دم و قالهم طيبوهم وعدة و ليزابا اشويوهم لليليان تعوض و طلع لفوق رقد.
غفيت في شومبرة الحاجة بصح الحس ما كنتش مرتاحة كيما في في شومبرتي لفوق الكالم، مور لغدا حسيت بيه قاعد عند راسي فتحت عينيا كي صبتو غير وحدو رميت روحي في حضنو ضحك باس راسي و زيرني عندو قالي كاش ما راهو يوجع فيك؟ قتلو لالا قالي راني وصيت هيام على التشكك دياولك و انت ما تنسايش دواك اشربيه فالوقت، قتلو خايف عليا و لا عليهم؟ قالي أنت مخلوقة من ضلعي و هوما مخلوقين من روحي عليمن نخاف؟ قتلو امممم.. قالي اتكسلي ما تقعديش قتلو بصح راني جيعانة قالي علاش ما جابولكش تاكلي؟ قتلو جابتلي هيام مقبيل و ما عطانيش خاطري قالي هاد الحكاية تع ماعطانيش خاطري و ما رانيش قادرة ناكل غير انسايها حتمي على روحك يالوكان غير خبزة من الصغار عندك توام في كرشك قادرة تاذيهم و تآذي روحك من قلة الماكلة قتلو علاش الإنسان الطبيعي شحال ياكل؟ قالي زوج خبيزات صغار حتى لثلاثة قتلو اسمحلي حبيبي مي هذا الإنسان المفجوع ماشي الطبيعي، قالي الله لا تربحك يتسمى أنا مفجوع، ضحكت ههههه قتلو علاش راني نكذب هادي هي الحقيقة، قالي لا إله إلا الله محمد رسول الله خطرة ترجعيني بعير و خطرة حيوان و دوك مفجوع.. عليمن نجوز عليمن نغمضي عيني؟! ضحكت هههههههههه
ناض و قالي تكسلي دوك نبعث كاش وحدة جيبلك تاكلي، شويا هكدا و جابتلي حلا الكبدة كليت و خبيت شويا لحرب.
قعدت مع تلفوني كي طاح الليل فرش حرب ليه و للحاجة قلتلها وين راهو صراع علاش ما يجيش يرقد هنا؟ قالتلي راهو راقد لفوق في شومبرتو خلي الراجل طرونكيل وش حبيتيه يجي يدير عندك ارقدي، قعدت غايسة والفتو ما قدرتش بلا بيه حتى نشوف لحقني ميساج فالفايبر من عندو قالي الشومبرة بلا بيك راهي تبكي قتلو انا لي رايحة نبكييييي قالي يما و حرب رقدو؟ قتلو مازال قالي غير يرقدو خبريني قتلو اوكي و قعدنا نحكيو فالفايبر بلي ميساج منبعد قتلو راهم رقدوا قالي راني جاي، دخل و فتح الكوفيرطا ساماني و تكسل فتحلي يدو توسدتها قتلو هكدا نقدر نرقد و غفيت، قعدنا يومين على نفس الروتين منبعد راح 3 أيام ميسيو بصح يسقسي عليا فالتلفون.
نضت الصباح سمعتهم يتجاراو نضت نشوف وش كاين صبت نائل و سعد رافدين الحاج دايينو للسبيطار طلعلو السكر و لا طونسيو و يقول اجريو ليا رايح نموت، كي جا صراع مع الظهر غير دخل حكاتلو يماه راح يجري لحقهم.
مع المغرب جابو الحاج كان عيان بزاااف طلعو صراع لشومبرتو و أنا لحقتهم نقرعج، قالو صراع الحاج راك سور ما كليت والو؟ قالو ما كليت والو ياوليدي برك نسيت نشرب لبارح دوايا، رقدو غطاه و طفا الضو مع لي دار صابني موراه قالي وش جابك هنا راكي ممنوعة من الحركة علاش ما تسمعيش؟ قتلو جيت نقرعج قالي خلاص كملنا روحي احكمي فراشك دوك، انتبه كنت رافدة فيدي حبة كاشي كبيرة زرقة عقد حواجبو قالي هادي منين جبتيها؟!! قتلو صبتها هنا عند الباب، قالي و انت ترفدي برك جيبي لهنا فيها الميكروب، جا جايز نائل عيطلو قالو نااااائل ارواح تشوف دقيقة خويا، قرب ليه قالو هادي فياغرا ولا راني غالط؟! شد الضحك قالو علاش؟ تبسم و قالو ديالك؟ ضحك قالو ههههه و أنا وش ندير بيها؟ قالو اااااااا دوك عرفت الحاج وشبيه..
دخل صراع يصلي و أنا حاكمة تلفوني كمل و قعد يڨصر معايا حتى عيطولو باش يتعشى قتلو تعيش صراع خليني نقعد معاكم فالطابلة و الله غير ضاق خاطري معزولة هكدا تقول فيا الجرب قالي نوضي بصح امشي بلعقل و اقعدي قدامي ما تتحركيش تفاهمنا؟ قتلو إيه.
كملنا تعشينا قالتلي نور ليليان راهو واجد لاتاي سربيلهم برك، سربيتلهم كنا قاعدين أنا و نور و صراع و نائل و علي نشربو فلاتاي حتى دخل الحاج قالهم راني جيعان من الصباح ماكليت والو حطولي لقمة، عاونو نائل باش تكسل فوق الكنابي و نور جابتلو ياكل، كي شفتو تفكرت الحبة تع الكاشي درت لصراع قتلو صراع حقا حبيت نسقسيك وشنو هي الفياغرا؟ شاف فيا تبسم و قالي كولي حبيبتي كولي... و نشوف في نائل مخنوق من الضحك ما صابش كيفاش يخرجها، قتلو و الله منيتي وشنو هي؟ ضربني علي كان مورايا قالي سكتينا قتلو و انت وش دخلك راني نهدر مع راجلي، قالي صراع أسكتي يرحم والديك، و الحاجة قالتلي اسكتي قلتلهم وشبيكم أسكتي أسكتي حبة كاشي عطيتها لصراع حبيت نعرف تع واه هدا ماكان، هنا نائل خلاص ما قدرش دور وجهو و يسعل حصلتلو حتى لاتاي خرج من نيفو و صراع كلاطا بالضحك و يخزر فيا قالهم ما يروحش بالكم لبعيد هههههههههههههه حبة كاشي صابتها فالقاعة حطتها في يدي ماشي عطاتهالي هههههههه قتلو لالا حبيبي علبالي بلي ماشي ديالك ياك تع الحاج، ارواح انت وشدهم من الضحك و أنا كي الأطرش فالزفة درت للحاجة قلتلها وش بيهم؟! خبرتني قالتلي مقوي جنسي قلتلها وش معنتها؟ قالتلي يا الحابسة معنتها ***********
نندب حناكي ديك التبهدييييلة دارو ما صابونيش رحت ديراكت حكمت فراشي.
شويا و جاو النسا معايا و الرجال قعدو يتفرجو الماتش، نطقت نور قالت لأم سعد راني شاكة في روحي اونسانت عندي روطار تع شهر و 5 أيام قالتلها غير يطلع النهار نروح نجيبلك تاست قالتلها إن شاء الله بنتي نائل يستاهل كل خير، قلتلها يا خاااااه دوك تتعمر الدار غير دراري حتى يهربو من عندنا، عيطو عليا الحاجة و أم سعد بعيد الشر انت تهدري برك شدي لسانك قلتلهم علاش وش قلت؟ قالتلي الحاجة قولي ربي يبارك و يزيد.
رقدوا ولاد نور طلعتهم، و ام سعد نوضت الحاج و قعدت معاه و الحاجة غفات و حرب قعد يشوف ميكي، دخل علي قتلو انت علاش ما تروحش لعند يماك؟ قالي علاش جينيتك راني قاعد فوق راسك؟
شويا و فتح معايا سيرة حنين بنت سعد قالي شحال عندي ما شفتها ما هدرت معاها، قتلو ما عندهاش تلفون؟ قالي لالا كانت تبعثلي من عند جداتها منبعد مازادتش بانت تقلقت عليها، قتلو و هي علاش ما جيش هنا؟ قالي محمد ما يخليهاش بالاك شاك فينا و هي أصلا عايشه مع خوالها جي ليهم يومين فالسمانة، شحال عندي ما سمعت عليها حتى خبر قتلو و دوك وش راك حايب اكزاكت؟ قالي تعيطيلها من تلفون الحاجة و تقوليلها أنا حلا، قتلو و أنت علاش ما تقولش لحلا؟ قالي خليني منها قتلو علي راك حايب تباصيني؟ قالي ما تخافيش واحد ما يشك فيك ما عندك والو مع حنين.
جبد التلفون تع الحاجة بلعقل و عيط لجدات حنين و عطاهولي غير رفدت قلتلها انا حلا بنت صراع حبيت نهدر مع حنين بنت عمي، غير جوزتهالي خطف التلفون و خرج، بقيت قاعدة حتى دخل صراع قالي واش ليون كاش ماراكي متشتهية نجيبلك؟ قتلو لالا ما عنديش بزاف ملي تعشيت قالي بصحتك، فطنت الحاجة على صوتو فتح معاها سيرة الرحلة للعاصمة قالها مازال ما فرات بصح راني نخمم على ليليان ما نعرف إدا تقدر تحمل الطريق و لا لالا، قالتلو عيط للطبيبة ديالها و سقسيها.
هوما هكدا يحكيو حتى دخل علي و في يدو التلفون قالي ليليان راني عيطت ل...... كي شافهم سكت و عاود رجع للهول عيطلو صراع قالو وش تحتاج خالو؟ قالو والو برك رايح لدارنا، دار ليا قالي ليمن عيط علي و تلفون يما فيدو؟ قتلو مانعرف و وجهي صفار، فهم بلي كاين حاجة راح ديراكت ليه للهول جاب التلفون صاب نيميرو بلا اسم قال تع من هاد النيميرو لي عيطلو علي لابال فيها كثر من  20 دقيقه ؟ قتلو ما نعرف، قالي شوفي ليليان وجهك يقول بلي كاينة حاجة و لسانك تعقد دوك بصح لوكان نعرف بلي علبالك بكاش حاجة ما تلومي غير روحك، و عيط لهداك النيميرو رفدتلو حنين قالتلو ااااه علي مزيا التلفون مازال في يدي ياك قتلك رايحة نرجعو كاش ما تحتاج؟ قالها شكون نتيا؟! كوبات في وجهو تم تم، خزر فيا قالي ليليان شكون هادي؟ قتلو صراع و انا وين علبالي شكون وشبيك؟ قالي ليليان ما تدخليش في اللعب تع علي صغير و طايش، حطيت راسي قالي معليه تكبر و تبان مادام قالت كنت رايحة نرجع التلفون يتسمى ماشي ديالها، على ساعة نعيط و نشوف.
خلا التلفون عندو و بدا يقلب فيه أنا صفرت و رجعت نرجف قالي ارقدي و خرج، قالتلي الحاجة كاش ما كاين ليليان؟ قلتلها و أنا وين علابالي ما نعرف.
بعثت لعلي ميساج حكيتلو كلشي قالي ما تخافيش غدوا نهدر مع خالي برك مقبيل تفرفشت خرجت، قتلو أنت سلك روحك و أنا حصلني معاه ما تعرفش خالك حبيتو يقتلني؟ قالي لي يسمع يقول عيطتي للارهاب قتلك خليني أنا ندبر راسي، جيت نريبونديلو دخل صراع تفرفشت خرجت من الديسكوسيو، نحالي التلفون من يدي و دخل قرا لي ميساج و قالي يتسمى راكي فاتحتلي ....... في داري و تخدمي الخيوط مابين هدا و هدا و تعيطي ياك ليليان؟ و دوك لحقت دالة بنت خويا هكدا؟ قتلو لالا بصح... قالي اششششت ما نسمعش حسك تبعيلي في علي و تدخلي في هاد اللعب، حطيت راسي و دموعي تجري من الخوف و التبهديلة، قالي لوكان ماجاش زهرك فلي راهم في كرشك نتصرف معاك بطريقة وحدوخرا، حط التلفون في جيبو و خرج و الحاجة قعدت تبهدل فيا.
شويه و دخل علي للشومبرة عاود جا من دارهم قالها جدة وين راهو خالو؟ دخل صراع قبل ما يهدر قالو خالو الغلطة ديالي أنا لي قلتلها دير كدا و كدا ليليان ما عندو ما دخلها طلبت منها تعاوني بحكم الصداقة لي ما بيناتنا و هي دارتها بنيتها ما تلومهاش هي لومني أنا، قالو و دوك أنت ما توبش من حكاياتك هادو عليييييي، نكسرلك راسك أنت بهي، قالو خالو علبالك بلي دايرك أنت بابا و من حقك تزعف عليا بصح هي ما عندو ما دخلها، قالو هدا وش همك؟ ليليان؟ ما هاماتكش صحانية الوجه لي راك تهدر بيها معايا؟!  قالو خالو أنا مانيش غالط ما جيتش باش نبررلك علاش حبيت و لا شكون نحب، جيت كي تسببت في مشكل ما بينك و بينها و مارانيش حايب تتآذى بسبتي، قالو عليييييي بركانا من حكاياتك وليدي و بطل هاد الطيش ما جيبش المشاكل ليماك، سعد لوكان يعرف وش عرفت يكبرها و انت لي تخلص، مامازالكش صغير وليدي تعقل شويا، حط راسو و سكت، قالو هادي راهي بنت خالك، قالو خالو نعرف حدودي ما درتش معاها حاجة خارجة طريق أنا تربيتك ما نلعبش ببنات الناس ناويها للحلال راني نستنى برك نكمل قرايتي و نخطبها، عيطتلها نسقسي عليها برك لخطر عندي شهر ما سمعت عليها والو تقلقت عليها.. قالو تصبحو بخير و خرج.
الحاجة قعدت غايسة وصراع مدهوش دار و قال هدا وقتاش كبر و رجع يعشق و يوقف في وجهي يقولي نحب؟! قالتلو أنا علبالي بالحكاية خبرتني هيام صح كيما هدر يحبها بصح ما غلطش معاها.
تنهد و شاف فيا قالي إيه كيفاش يا أم الديڨات؟ ما سمعناش صوتك، بديت نبكي و نمسح في دموعي قتلو و الله ما قصدي ندير حاجة مور ظهرك، قعد قدامي باس راسي و قالي خلاص بركاي من البكا ماشي مليح ليك بصح ما تزيديش تعاوديها.
غدوا منداك جا من الخدمة بالي مقلق بصح ما عرفتش من واه طابس باس راسي و قعد مقابلني، نظراتو ما فهمتهمش بصح حسيتهم تع واحد غايضاتو، ما طلعش رقد قعد مقابلني و يتكيف قتلو صراع وش بيك كاش ما كاين، طفى الڨارو و جا لعندي جبدني لصدرو و حضني قالي و الله العظيم غير نعشقك و نعشق التراب لي تمشي عليه و ديري في بالك حاجة لوكان كامل الناس تتخلى عليك غير أنا لي نبقى في كتافك سينو مانيش راجل و الموسطاش نحفو، قتلو علاش راك تقول هكدا حبيبي كاش ما صرا؟ تنهد و قالي ما كاين والو باس راسي قالي هكدا برك حبيت نعبرلك على حبي، تبسمت بصح ما تهنيتش حسيت كاينة حاجة، قعد رايح جاي الڨارو مور خوه و الخزرة لي في عينيه تع شفقة، صراع كي ما يحبسش الدخان علبالي بلي كاينة حاجة شايدها في قلبو و مخبيها.
فالليل جيت خارجة من الصالدوبا كانو قاعدين فالهول نسمع فيه يقولهم وش حبيتيني نقولها يما غاضتني ما نحملش نشوفها تنهار و تبكي قدامي و زيد حالتها ما تحملش باش نخبرها، قالتلو و تبقى مخبي عليها هكدا؟ خرجت خزرت فيه نرجف قتلو وش راك مخبي عليا صراع؟ قعد غايس فيا منبعد ناض مشاني و قعدني نشوف في نور و الحاجة و حلا يبكيو و يخزرو فيا قلتلهم وش كاين؟ صراع قولي وش كاين؟ قالي شوفي ليليان.. أنا أهلك و يماك و باباك و هدو ماليك و هادي دارك وثقي بالله ...... قاطعتو قتلو صراع ماما كاش ما بيها؟! سكت و دارلي براسو إيه قالي الله يرحمها إنا لله و إنا إليه راجعون ..
صغت ....لالاااااااااا .. صراع لالاااا ماشي ماما ما عندي حتى واحد من غيرها هداك وش قعد من ريحة ماليا تعيش لالااااااااا
صراع وين راهيييي نشوفهااااا لالاااا ياااااااااااااا ربي .. ماااااما .. كيفاش ماتت.. ما قعد عقل في راسي وليت نقطع في حوايجي و نصوطي و هوما يحاولو باش يقعدوني حتى شدني صراع و زير عليا مابين يديه أنا نبكي و هو يقولي و الله ما نخليك تحتاجي لجنس مخلوق، الله يرحمها ادعيلها .. و أنا نصوغ حتى أم سعد شفتها تبكي معاهم، قتلو قولي برك كيفاش ماتت؟ قالي هي و مرت باباك جاو هاربين حكموهوم الإرهاب قطعولهم ريسانهم عندهم شهر هكدا و لبارح خوك يحي عيط لخالك قالو، قتلو علاش حتى  يقطعووو راسها علااااش حرااام عليهم والله ما دارت حااااجة .. مامااااااا .. علاش خليتوني انتي وبابا و يتمتوني علااااااش.. نبكي و نصوغ، رفدني صراع و داني للشومبرة كسلني و قالي ارتاحي على وجه لي راهم في كرشك و قعد حاضني فوق الساعتين وحلا مقابلتني وتبكي، قربت ليا و شدتني من يدي قالتلي أنا أكثر وحدة راني فاهماتك و حاسة بيك، جربت هاد الاحساس كي كنت نقرا الثالثة ابتدائي، توفات ماما و أنا لدوك مازالني حاقدة على بابا على جالها نقول وش كان رايح يخسر لوكان تنازل و داها للطبيب علاش كان ما يحبهاش و يضربها يحاوزها ويمنعني عليها و كي يرجعها نشوفها تحلل فيه و ما يخزرش فيها نتفكر كلشي و نقول علاش كان معاها هكداك؟ قالها صراع يا بنتي انا كنت مخليها على ذمتي غير على جالك، قالتلو بصح ما قدرتش تحبها على جالي كنت تكرهها و لدوك تكره خالتي إخلاص كي تشبهلها، تبكي بحرقة و تمسح في دموعها قالتلو دوك كي يديوني دار جدي لقبرها نقعد نلوم فيها نقولها عشتي و أنت تتمناي رضا بابا و ما خممتيش فيا و قلتي نعيش لبنتي تحتاجني..
بدات الحاجة تحلل فيها قالتلها نشوف وجه ماما في خالتي إخلاص و نحبها مندوم خالاتي كامل و علبالي بلي بابا حاس بيا على هديك ما منعنيش عليها مالڨري يكرهها حاول يعوضني ببزاف حوايج بصح ما قدرش يعوضني على ماما علبالي ضميرو يأنب فيه، هي تهدر و صراع حاط راسو و يسمعلها..
قالتلي ليليان أنا ما عندي والو معاك باش نكرهك بصح كنت ندير كامل وش نقدر باش خالتي اخلاص تتزوج مع بابا و توليلي أم و كنت نحلل جدة باش تقنعو بصح كي جيتي تخلطو كامل الحسابات على هديك كرهتك، تأملت وحد الوقت باش يطلقك ما درتش في بالي بلي بابا يقدر يحب طفلة قد بنتو بصح منهار طيب معاك الحوت كيما زيدت عمتي نازك قطعت لياس و درت كامل وش درت باش يحاوزك و كي زاد سمحلك حتى بلاما يعرف الحقيقة زدت كرهتك و كرهت الدار باش ما نشوفوش كيفاش كان يتبع فيك بعينيه وين ما تروحي.
خربتي زواج خالتي لي تمنيتها أم، ديتي اكثر حاجة كانت تتمناها ماما لي هي قلبو،  ضربني على جالك، ضارب مع كل واحد وصلك و حاوز أم سعد حتى وليت نسمع الناس تقول صراع جرجراتو طفلة قد بنتو، كرهتك و كرهت حتى وجودك فالدار برك كي ديتي بابا علينا.
حكم صراع يدها و قالها علبالي بنتي بلي دوك وليتي كبيرة و نقدر نحكيلك و تفهمي، صح خسرتي يماك و انت صغيرة بصح أنا ما كرهتهاش بلا سبة، أنا ما عشتش طفولتي كي الناس باش نحب، عشت في دار بابا لي كان كي القصر معيشة واحد فقير و طلاب يرقد بلا عشا، تخسري يماك اسهل من باش تشوفي مرت باباك تضربك و طفي النار في لحمك و باباك ما يقدرش حتى يهدر معاها، تعيشي و تشوفي يماك تنضرب بلا سبة و معيشها معيشة الفقر في وسط الخير، ليلة عرسي مع يماك قلتلها يما خط أحمر يا وجدان لوكان جوزيه نحرقك بصح هي وقفت مع أم سعد ضدها و أنا خدام بعيد و يما ما تشكيش دارو فيها الباطل، كرهتها نهار شفتها حاكمة علي وليد عمتك من وذنو و حاوزاتو كي برك لعب معاك و هو يتيم، كرهتها لخطر حسيت روحي متزوج نفس المرا لي دمرت طفولتي و ظلمت يما، كل مرة كنت نتنازل و ما نطلقهاش برك على جالك، شاب شعري و ما حبيتش نعاود الزواج كرهتني فالنسا، انا إنسان يا بنتي تمنيت نرتاح و نصيب مرا صافية و نية حتى حط ربي ليليان في طريقي، صح صغيرة و جاتني صعيبة مع لول بصح هدا مكتوب الله، أنا ما قتلتش يماك، و دللتها و ما قصرت معاها في حتى حاجة و راعيت حقوقها بصح هي لي خلاتني نكرهها بتصرفاتها، كنتي صغيرة وماشي عارفة المشاكل لي كانت تصرا بصح هاي جداتك تحكيلك و احكمي بنفسك، قعدت ساكتة و محبطة راسها قالها هاد الشي كامل كنتي مخبياتو في قلبك عليا؟ قالتلو أنا ما نكرهكش بابا برك تمنيت أم، قالها ما كاش لي داها من كلشي فهاد الدنيا مام أنا تمنيت يكون عندي اب تيتمت و بابا فالحياة سمحت في قرايتي و أنا صغير و تمرمدت باش نعيش يما و ختي و هو لاباس بيه ماديا طحت و نضت و كبرت و وعيت، يا بنتي المصائب يلزم تخليك أقوى ماشي أقسى، قرب منها باس راسها و حرب عنقهم و باسهم، دار ليا قالي شدي في ربي و الله ما نخليك تحسي بغياب يماك انا أهلك.
تكسلت و دموعي ما حبستش، و هو ما خلانيش كامل راح توضى و جا عند راسي و يقرا ( يس و القرأن الحكيم ) هو يرتل و أنا نبكي، كي كمل جبدني لحضنو قالي ماشي مليح ليك البكا ادعيلها ترتاح، حطني على رجلو و بقى يحكيلي على الاسلام و على واحد اسمو (أبو طالب) ويشرحلي كيفاش كان ساند الرسول صلى الله عليه و سلم والنبي حزن بزاف على موتو و سماو هداك العام لي مات فيه عام الحزن ومن بعد موتو الرسول ما استسلم ما ضعف و رجع أقوى و أشد ... قعد يحكيلنا على قصص من القرآن و أنا غايسة و الدمعة في عينيا و حلا و حرب يسمعولو..
قال لحلا طفي الضو و بقى يمسح على راسي حتى غفيت، فطنت فالليل صبتو راقد على ظهرو قدامي و حرب على يدو لوخرا، نضت فتحت الباب و خرجت حطيت راسي مابين رجليا و نبكي بحرقة تخايلت راس ماما مقطوع، تمنيت نحكم يحي نشرب من دمو هو لي انضم ليهم و خربلنا حياتنا، حتى سمعت صراع مورايا قالي خلاص ليليان بركاي من البكا درت ليه مخلوعة قتلو ما قدرتش صراع اديني لقبرها قالي ماكاش كيفاش يحي دفنهم هي و يماه قعدت نخزر فيه و الدموع تجري قالي ريحي و تهلاي في روحك و فالدراري هادو سندك فالدنيا و عائلتك مور أهلك ما تضيعيهمش و شدي روحك على جالهم، قرب ليا فتحلي يديه قالي ارتاحي، قتلو طلعني لشومبرتنا ما نقعدش هنا قالي نخاف تقعدي وحدك و ظلي تبكي، قتلو صراع هادي ماما لي ماتت قالي و لي في كرشك ولادك، امسحي دموعك و شدي في ربي اغسلي وجهك و ارجعي لفراشك، قعد معايا حتى رقدت و ما فطنتش حتى سمعتو يقول ليماه
عينك عليها يما ما تخرجيش من الشومبرة و تخليها تبكي اقعدي معاها حتى نرجع و فورصيها باش تاكل و تشرب دواها.
هو خرج و الحاجة بقات معايا قالتلي كي تقطعي الماكلة رايحة ترجعيها؟ حافظي على ولادك، شويا هكدا دخلت هيام هي وبناتها قعدت تواسي فيا، نور جابتلي الماكلة قالتلي انفعي نفسك راكي مريضة، حلا دارتلي صلاد دفروي و توكل فيا، حتى أم سعد و شفت الدموع في عينيها قالتلي كولي يا الجايحة ماتو مالينا و ما مامتناش موراهم، و صراع كل ساعة يعيط يسقسي كيفاش راني إدا كليت إدا شربت الدوا يوصي باش ما يخليونيش وحدي، و كي يجي من الخدمة ما يخطينيش، قعدوا على هاد الرثم 3 أيام...