مراهقة والاربعيني بلهجة جزائرية

54

#المراهقة و الأربعيني:

#الجزء54:

[هنا ليليان لي راهي تحكي وش صرالها مور ما خرجت من الدار و كيفاش حتى صابها صراع...]
ليليان قالت: خرجت من دار هيام و الخوف مالي قلبي نتلفت من ومن أول مرة نخرج وحدي تخلطت عليا المشاعر مابين خوف و رهبة و تفرفيش..
كي لحقت لآخر الشارع كانت الشمس مازال ما طلعت حبست طونوبيل قتلو تروح للڨاراج لي يديني للعاصمة؟ قالي اطلعي.. طلعت ملور و درت مورايا نتأكد بلي واحد ما فاقلي..ضميت يديا لصدري و قعدت ندعي و الشوفور يشوف فيا فالمرايا منبعد قالي أنت مسيحية؟ قفزت من الخوف لميت روحي و حكمت صاكي مليح قتلو لالا.. طريق كاملة و هو يركز فيا فالمرايا و يدير ليجاست بعينيه توسوست منو ما رتحتلوش.. الطريق كانت فارغة و زيد طويلة .. خفت نقولو حبطني كاش ما يديرلي.. خممت نفتح الباب و نرمي روحي بصح خفت نتأذى و يحبس الطونوبيل و يحكمني.. ندمت لي خرجت من الدار.. دموعي بداو يطيحو وحدهم قالي علاش تبكي و تعذبي هاد العينين لي تقول عليهم شمس في وسط وجهك.. ترعبت شفت بوست بوليس قلت فرجت عيطت قتلو نحبط هنااااا تشوكا.. قالي بصح مازال ما وصلنا.. قتلو راني نقولك نحبط و فتحت الباب بلخف حبس.. حبطت نجري و خبطت الباب تع الطونوبيل.. هو راح و زوج بوليس جاو ليا قالي واحد فيهم وين رايحة ختي؟ قتلو حبيت نروح للڨاراج لي يديني للعاصمة، قالي أنت ملتم؟ قتلو لالا.. قالي يمال منين؟ كي شافوني نبكي و نرجف من الخوف قالولي برك فهمينا ختي وش بيك؟ قلتلهم باش نروح لخويا راهو لتم وريولي برك كيفاش نوصل..
حبسولي طاكسي كان الشوفور راجل كبير فالعمر، هدرو معاه منبعد عيطولي باش نطلع معاه.. طلعت معاه ارتحت شويا كي كان انسان كبير و ما خزرش فيا.. خلصتو رجعلي الصرف حكمتو في يدي و خليت الصاك بجيه.. وصلنا للڨاراج حبطت و هو راح.. طلعت في طاكسي جماعي لي كانت رايحة للعاصمة قعدت في وسط وحد العائلة قدام وحد المرا مع راجلها ارتحت شويا هو ديمارا و أنا حطيت راسي على الكارو نشوف..بداو يخلصو فتحت يدي نحسب وش رجعلي صرف الطاكسيور لولاني منبعد انتهت بلي ضاكي ماكاش بديت نتلفت و نحوس عليه ما صبتوش تفرفشت.. ياربي دراهمي و ذهبي و كوارطي راهم فيه وين حطيتو.. بديت نحوس في بلاصتي و نبكي قالي الراجل الخلاص ختي.. قالو صاكي ما صبتوش وين راهو و بديت نبكي.. قالو الشوفور بصح أنا شفتها كي طلعت ماكانت رافدة والو في يدها.. قتلو لالا كنت رافدتها فيها كامل دوزاني.. خلصو من الدراهم لي في يدي و بقيت نبكي ياخاه وش درت في روحي بحرت التلفون و الذهب و الدراهم دوك أنا كيفاش نعيط ليحي؟ كيفاش نروح كيفاش نرجع؟ وش ندير ياربي.. بديت نبكي و نشهق قال الراجل لمرتو اعطيلها قرعة ما.. عطاتني شربت قالي راجلها وحدي ربي ختي شحال تحتاجي الدراهم باش تركبي الناس لبعضاها ما تبكيش.. قالتلي مرتو وين راهم أهلك؟ هوما يسقسيو فيا كيفاش يعاونوني و أنا نبكي وش رايحة نقولهم؟ ما عندي لا أهل لا عموم برك خويا و هارب من الارهاب و راني رايحة لعندو؟ حتى باش يعاونوني ماكاش كيفاش..ماراني حافظة لا نيميرو يحي لا نيميرو خالي و ما نعرفش منبا كيفاش نروح لدار خالي.. حافظة غير نميرو صراع لخطر دايمن نعيطلو من أي تلفون كي يعاقبني و ينحيلي تلفوني.. بصح مستحيل نعيطلو وش رايحة نقولو هربت منك و تبحرت ارواح رجعني؟! علبالي دوك كي فاق بلي ماكاشني راهو يغلي و لوكان يحكمني يرحيني..
بدات الناس تهبط فالطريق و قعدت غير أنا وحدي خفت قلت للشوفور نحبط هنا.. حبطت ما علابالي لا وين راني لا وين نروح لا وش ندير..
شفت في يدي قعدلي غير شويا صرف.. بقيت كثر من ساعة و أنا نمشي و نبكي و حايرة وين نروح.. ناس رايحة و ناس جاية و أنا تايهة.. جزت على الحوانت قعدت نشوف ياربي وش درت في عمري.. كنت قاعدة و مرتاحة وين رميت روحي.. طلعت على وحد الجسر و بقيت نمشي على النهر نشوف فيه و نبكي و نقول وين راك يا صراع ارواح تشوف وش صرا فيا.. وليت نتمنى وحدة من الطونوبيلات لي كانت جوز عليا تكون تع صراع، قعد نتلفت بالاك نشوفو و نرتاح و نحس بالأمان و في نفس الوقت علبالي لوكان يوقف قدامي نموت من الخوف..