مراهقة والاربعيني بلهجة جزائرية

26

#المراهقة و الأربعيني:

#الجزء26:

كملنا الفطور و هيام راحت لدارها جابت وش تحتاج و نور رضعت ولادها عاونتها فيهم، جا الحاج قالنا نتوما حكايتكم طويلة ما نبقاش نستنى فيكم أنا نسبقكم قالتلو الحاجة اصبر نروح معاك و نائل يجيب البنات خليهم يوجدو رواحتيهم بلعقل. 
رحت وجدت حوايجي و لبست دخلت هيام كانت وجدت لبناتها و طلعت تعيط لنائل صابتو حابط، طلعنا فالطونوبيل هي معاه مالقدام و انا و نور و البنات ملور.
كي وصلنا صبناهم مع الذبيحة حنا داخلين حتى نشوف في صراع ملبعيد انخلعت لصقت في هيام قلتلها يا يماااااااا  لوكان يحكمني داخلة قدام الرجال يقطعلي ودنيا خبيني تعيشي، ولات تضحك و سبقتني جيت موراها ما شافناش، دخلنا سلمنا عليهم و رحبوا بينا، صبنا لتم إخلاص و أم سعد و حلا، إخلاص كيلتني ملفوق لتحت، حبيت نبدل وراتلي نازك الصالدوبا، سڨمت خماري مليح و خرجت صبت صراع و وليد عمو واقفين يسلمو دار ليا خزر فيا و كمل يهدر مع عمتو، جيت رايحة حكم يدي و جبدني ليه خبرني قالي لي في عينيك تمسحيه بلخف قلتلو لالا خليه ياك كامل راهم دايرين شوف حتى بنتك قالي انا وش قلت؟ ضحكت عمتو قالتلو وش أبو حرب واقيل توحشتها، طلق يدي و قالها لالا برك نبهتها لوحد الحاجة.
رحت ساميت الحاجة قالتلي وش بيك ليليان قلتلها محبش كي درت لكحل قالي امسحيه خزرني بوحد الخزرة حتى ضحك وليد عمو و قالو اتونس بيها على آخر عمرك بصحتك أبو حرب، ما ردلوش و جا رايح دارلي جاست تع نوضي امسحيه.
رحت شفت الطفل لي ختنوه و جيت خارجة عيطلي رحت ليه صبتو واقف فالجنان قالي شوفي ليليان.. ام سعد واخلاص و الأمة كامل راهم لداخل علبالي رايحين يبداو يزيدو معاك فالهدرة بالاك كاش ما نسمعك هدرتي كلمة فهمتي؟ يديرو وش يديرو ثقليهم انا نتصرف و لا نخلي يما و لا هيام يتصرفو بصح انت ردي بالك كاش ما ديري هكدا؟ درتلو براسي إيه و إدا سقساوك على علاقتي معاك و وكيفاش نتعامل معاك و حبو يدخلو فالتفاصيل ما تزيديش على كلمة الحمد لله ما تجاوبيهمش و تعطيلهم الديطاي و لا تقوليلهم صراع دار و عمل لي ما بيناتنا يقعد مابيناتنا ما نعاودش فهمتي؟ درتلو براسي إيه قالي حاجة وحدوخرا تان إدا سقساوك على داركم كي شغل ما عشتيش عندهم بالاكي يجبدلوك لسانك و تقوليلهم خطبني فلان و ما نعرف وشنو و مام إدا قالولك خوك ارهابي كيما موالفين تقوليلهم هو ماشي ارهابي و عمري ماشفتو يدور مع الارهاب ماشي تروحي تقوليلهم كان يضربني و يعملي و يفعلي دافعي عليه، لوكان تهيني اهلك انت لي رايحة تتهاني و نهار وحدوخر يعايروك بيهم شدي لسانك بنتي هدو ذيابة و انت ما تقدريلهمش خلاص بابا كلامي مفهوم؟ قتلو خلاص و الله ما نهدر
حط يدو على كتفي و قالي خلاص دوك ادخلي و ما تبقايش رايحة و جاية قدام الرجال، انت براوية و هوما يقعدو يخزرو و يسقسيو عليك و أنا نتقلق و نخرج على طوعي، روحي سامي يما و ما تخرجيش كامل بنتي.
دخلت و قعدت مع الحاجة صبتها تنقي فالتشينة عطاتني حبة قالتلي هاكي حلي ريقك، شديتها عليها و بقيت غايسة نتفكر في كلامو و صح كيما قال جات مرت عمو قعدت قدامي قالتلي وش  راكي، صراع راهو مليح معاك؟ قلتلها الحمد لله، جبدت روحي لصقت فالحاجة باش تنتبه و تواجب في بلاصتي لخطر هيام كانت معاهم في الكوزينة يطيبو.
قالتلي مليح كي راهو راضي بيك أبو حرب لخطر هو ما يحبش البراوية و سمعنا بلي كي جيتي مع لول ما كانش قابل بيك، قالتلها أم سعد أسكتي برك نهار لي سيفو باباه باش  يتزوج بيها حب يقتلو شوفي وجهها هادو بشر و يقبلو بيهم الناس؟ بصح راهو مخليها فالدار غير باش تخدمو هدا ماكان قالتلها الحاجة يا ختي ماشي لي يجي يقولك بلي ماهوش حايبها تروحي تآمنيه، وليدي و نعرفو عمرو ما عشق مرا في حياتو مي هادي راهي في قلبو و تجري في دمو، كي يكون زعفان ما يتهدن حتى يشوفها، و حكاية بلي براوية و ماشي قابلها دوك تبدلت الأمور تاكل و تشرب و ترقد معاه كيفاش ما يحبهاش؟ قالتلها و دنا ليها و لا مازال قالتلها هداك الشي شغلهم انا ما ندخلش روحي ما بيناتهم، مرات يباتو كيف كيف لفوق و مرات هي تبات عندي و مرات يباتو في زوج عندي و يتحاضنو حتى نعيط عليهم على جال الدراري كي يشوفو، هوما راهم متفاهمين و انا علاش نحوس نفهم كثر، قالتلها بصح سمعنا بلي تمشي فيه كيما تحب حتى بنتو ضربها على جالها، قالتلها شوفي وليدي ما ظلمهاش و كي ضربها لخطر غلطت ماشي على جال حتى واحد تعرفي أبو حرب كيفاش داير ما يحبش الغلاط و بنتو راسها خشين و ما تسمعش و لي جا يعمرها و دارت بزاف مشاكل تهمتها في شرفها، سرقت باباها و حصلتها فيها و صراع يخاف ربي علاش يسكت على غلطة بنتو و يظلم بنت الناس حرام، لي تغلط فيهم يكسرلها راسها ماشي داير فرق ما بيناتهم ديك النهار غلطوا عاقبهم في زوج، قالتلها أم سعد بركاي ما دافعي عليها نورية هي لي تظل تشكيلو و تحرش فيه على بنتو و علينا تقول ساحراتو، قالتلها حاشاه أبو حرب إدا يقدر واحد يمشيه كيما يحب هو راجل يخاف ربي و ما يحبش الظلم قالتلها لوكان ما جاتش تحرشو ما يدورش عليا و على بنتي قالتلها ماشفيتيش كي كنتو تقولو أم صراع راهي خارجة في وجدان و يمشي بشورها؟ وليدي راجل و لي يغلط يتحاسب حتى و لوكان أعز الناس عندو، حتى هادي لي موالف يقلب الدنيا على لي يدنا ليها موالفة كي تغلط تخلص يخرج فيها مسكينة، هكداك و ما تشكيش ديرها غير للبكا حتى يجي وحدو يسلم على راسها و يطلب السماح منها و ينساو كلشي كي شغل ما صرا والو.
دخلت هيام قالتلها يما ليونة مأصلة ما شفتيهش شحال يحبها، مام يغلط معاها و يضربها ما تشكيش منو و طايعاتو و ما تكسرش كلمتو، ديك النهار جاو ماليها ما عطاهاش قلبها تروح و تخليه كي عرفت بلي حايبها تبقى معاه، قد ما يآذيها ما تتبدلش عليه كي يكون مليح تضحك معاه  و كي تشوفو ماشي في حوالو تخرج و تخليه، تشكي من الدار كامل بصح من صراع ما تشكيش لخطر تعرف راجلها وش يسوى مام صغيرة بصح مقدراتو و متحملاتو في كامل حالاتو كيفاش حبيته ما يحبهاش ليونة تستاهل و دارت ليا تضحك، ضحكت معاها و قلتلها شكون عندي من غيرو هو يما هو بابا و راهو ساكن في قلبي ناضو كامل يضحكو غير  ام سعد و إخلاص ما عجبهمش الحال.
لحق وقت الصلاة ناضو كامل يتوضاو و أنا قعدت مع سارة فالدروج جات ليا وحدة قالتلي أنت ما تصليش؟
قالتلها سارة بلي مسيحية قالتلها خت إخلاص هي مسيحية و خوها إرهابي، درت ليها قلتلها شفتيه طرطڨ دارك؟ قالتلي لالا بصح كامل يقولو بلي إرهابي، قلتلها لوكان يجي واحد ليا دوك يقولي بلي انت تع سحورات و أنا ما شفت منك والو، نآمن و لا حتى تشوف عيني؟ قالتلي بعيد الشر إدا أنا ندير السحور بصح وش نقول لا يظن السفيه إلا ما فيه قلتلها يتسمى أنت تان ارهابية كي راكي تشوفي في خويا إرهابي؟! قالتلي إخلاص وشبيك انت ما تقادري حتى واحد؟ قلتلها أنا ما تهمت حتى واحد برك حبيت نقولها ما يلزمش نقولو على الناس أمور بلا ما نشوفو عليهم حاجة، جبدت ختها و قالتلها امشي ختي امشي ما صبتي معامن تهدري تهديريلي مع هادي لي ما عندهاش الأصل.
كملوا الصلاة و دخلوا كامل للكوزينة قعدت غير أنا قلت عيب نروح كاش ما ندير معاهم، دخلت للكوزينة قالتلي إخلاص علاش راكي واقفة هنا كي الشمعة جايا توريلنا في طولك؟ حطي يدك معانا و لا روحي، خفت نردلها توصلها لصراع بصح هيام ردتلها قالتلها و أنت فواش جيناتك كي تقعد و لا تروح؟
عمتهم تعنكرت في اخلاص و نغزتها قلتلها خالتي كاش ما نعاونكم؟ قالتلي لالا بنتي ما نشقيوكش قلتلها بالعكس خالتي تعبكم راحة قالتلي الله يرضى عليك يا بنتي يمال ادي المغارف و الخضرة اعطيهملهم، قلتلها معليه و رحت ديتهم لعلي وليد هيام شدهم عليا و قالي بلعقل ليليان ادخلي لداخل و ما تخرجيش أنا نجي و ندي خالي صراع راهو مقلق قتلو علاش وش صرا؟ قالي خالو سعد راهو قاعد و يمعني عليه في وسط الرجال.
دخلت قعدت مع الحاجة، حطو الغدا خزرت في نور ما صابتش كيفاش تاكل من ولادها قلتلها جيبي نشدهم عليك و اتغداي انا بلاش الشهية ما كان ماكان قالتي بزاف عليك قلتلها ما فيها والو، رفدتهم و خرجت بيهم للكولوار، كان صراع واقف برا حب يغسل شافني جا لعندي و بدا يلاغي و يلعب مع الدراري منبعد قالي و يماهم وين راهي قتلو راهي تتغدى غاضتني ما خلاوهاش تحط اللقمة في فمها مسكينة و ما خلاو فيها والو بالرضاعة خليها اموا تاكل شويا ديرلهم الحليب، نشف يديه و شد عليا واحد من التوام قعد يلعب معاه، جات جايزا حلا قالها بابا شوفيلي كاس جديد و ديريلي لاتاي يكون ثقيل، راحت ديرلو و هو قعد فالدروج و حط الطفل في حضنو و بقا يخزر فيه قالي شوفي ليليان دوك يجبدو حكاية أم سعد كي ضرباتك و حاوزتها و رايحين يبداو يكدبوا كي العادة خليهم يقولو وش حبو كلمة منك ما نسمعها، لخطر عمومي مام لوكان تهدري الصح رايحين يقولو مرت صراع وجهها صحيح و تواجب و هو يحاوز مرت باباه على جالها، و أنا لي رايح ننضر كثر و يعايروني بيك، خليني أنا نرد أنا علبالي كيفاش نواجبهم مام يسقسيوك ما تواجبيش حتى انا نقولك تهدري هوما راهم يحوسو غير على الكلمة لي تغلطي بيها باش يردوا العيب فيك، قتلو لالا و الله ما نهدر بصح رايحين يرجعو أم سعد بعدما تهنينا من مشاكلها؟ قالي وش حبيتيني ندير كاش ما في يدي؟ لوكان ما نقبلش نبان انا لي ماشي مليح، خليها ترجع و لا لاه لا ترجع الله لا تربحها من نهار شفتها ما شفت الخير منها، اصبري معايا شويا و نخرجوا بدارنا غير أنا و ياك و يما حتى داري راني سامح فيا تبعدني برك و الله غير مرضتني، حطيت يدي على كتفو و قتلو ربي يحميك ما تقولش هكدا والله ما نزيد نشكيلك خليها ترجع المهم انت ما تتقلقش، تبسم و ناض سلم على راسي و جبدني لحضنو قالي و الله لي يدنا ليك غير نحرقو، خرجت إخلاص و ختها بعد عليا و عطاني الطفل قالي انا نروح للصالو و انت ادي الدراري ليماهم، جابتلو حلا لاتاي داه و راح، و أنا ديت الدراري لنور تڨمطهم شدتهم عليا و قالتلي ليونة معليه نشقيك تغسليلي هد لاتيتين باش نلحق نرضعهم في زوج قلتلها معليه، ديتها و رحت للكوزينة باش نغسلها كي دخلت صبت حلا و إخلاص و ختها و بنات عمهم ما نعرفهمش يهدرو كي شافوني سكتوا، إخلاص دارت روحها ما شافتنيش و قاعدة تخدم و تقول لحلا باباك حياتو كاملة و الفاميليا يمشيو بشورو راني حايرة كيفاش هديك مكتوبو لا طول لا كور فيها زوج عضمات و كاس دم يخي زهر معوج و ختها ناضت تضحك و تقولها راكي تشوفي ههههه، قالتلها والله يا ختي انظلم هداك الراجل مسكين هو طول و عرض بسلامتو و هدا وش صحلو!! هدي لي قالك صاك صام و فطر على جرادة و دارت ليا قالتلي عمرك طويلة هدا وين كنا نهدرو في سيرتك، سنيوة لاتاي راهي واجدة اديهالهم في عوض ما جايا تتصنتي، ما رجعتلهاش غسلت لاتيتين و ديتها لنور بصح حسيت روحي مقنوطة كيفاش تقولي هكداك قدامهم كامل و ما نقدرش نرجعلها.
دارت الحاجة ليا و كانت هيام متكسلة و معصبة راسها يوجعها قالتلي وشبيك حكيتلها قالتلي كي سكتي عليها خير هي عيناني راهي دير هكدا قالتلها هيام نوض نبهدلها هدي أم الرجالة نوريلها كيفاش تهدر حكمتها الحاجة قالتلها خلينا من المشاكل.
دخل عمهم الكبير و سلم خزر فيا و قالي وش راكي بنتي قتلو الحمد لله، دار للحاجة قالها أم صراع ارواحي انت و مرت أبو حرب نحتاجوكم علاش راكم جابدين رواحتيكم ما كان حتى واحد غريب.
داتني الحاجة و قعدنا معاهم فالصالو، كان صراع قاعد و رجال ما نعرفهمش حطيت راسي، بداو الحكايات و الضحك باش يلطفو الجو و صراع يخرج فالضحكة فوق قلبو حتى قالو عمو شوف صراع وليدي عندي معاك هدرة و ان شاء الله ما تردنيش قالو فصل عمي و حنا نلبسو قالو علبالي بيك راجل و وليد أصل قالو ربي يحفظك عمي، قالو اسمعني مليح أبو حرب، شوف حنا أهل و الاهل مهما تصرا ما بيناتهم مشاكل يلزمنا نحلوها و ما نخليوهاش تكبر حتى يتربى الحقد، و انت راجل مومن و تخاف الله و أم سعد راهي في عوض يماك لالا؟ قالو شوف عمي تعرفني ما نحبش نتنوفق و تعرف رايي مليح فيها، و كلمة يما من غير نورية ماكاش وحدة تستاهل نقولهالها، هديك المرا ما شفت منها غير المر و بلاما ما نحكيلك كيما قلت رانا أهل و راك تعرف البير و غطاه، شفت بعينك كامل وش دارت فيا كي انا كي يما كي ختي من صغرنا حتى لدوك، و دوك دارت لمرتي، طفلة يتيمة تتحاوز من دار راجلها و هو غايب في الڨوايل و الشتا خيط من سما؟ عرضي يتحاوز للشارع و هي صغيرة و ما عندها حتى واحد من غيري كاش واحد فيكم يقبلها على عرضو؟ منبعد يقولو صراع حاوز مرت باباه من الدار على جال طفلة، لوكان جات تقادرني ما تحاوزهاش، مرتي مانيش نزكي فيها صح طفلة صغيرة مولات 17 سنة بصح انت يا عمي تلوم على الصغير الطايش و لا على الكبير العاقل؟ نفرضو بلي مرتي طايشة، ما تقدرش ترفدلي التلفون و تقولي صراع هاي وش غلطت مرتك؟ نروح نغيب و نولي نصيب مرتي مضروبة و محاوزة من الدار؟! علاش ما عنديش قدر و احترام؟! بزااف لوقتاش مكتوب عليا أنا باش نحمل هد المرا، علاش ما كفانيش وش جوزت معاها؟ قالو بصح يا وليدي ماشي تحاوزها و تحاوز خوك و تكبرها قالو سعد مازال حسابو معايا و هد المرا عييت نجوزلها و نسكت و هي كل يوم تهيني و زايدة غير للقدام وصلت للحد خلاص قالو لالا حاشا ادا تهينك بصح ... قاطعوا قالو عمي اليد لي تترفد على مرتي و لا على بنتي راهي ترفدت عليا لي يهينهم راهو يهين فيا، كي يغلطوا انا لي نحاسبهم ماشي وحدوخر.
هو يهدر و هوما يقولولو حقك حقك بصح على وجوهنا و وجه باباك، و أم سعد تهدر و تبكي و هو كلما يسقسيوني يواجب في بلاصتي و مع لخر قالولو ما تزيدش تعاود تتدنى ليكم و نوضو سعد سلم على راس صراع و طلب منو السماح و تفاهموا باش تولي أم سعد للدار.
ناض صراع قال للحاجة أيا نروحو راني عيان حبيت نروح للدار نريح حاولوا معاه باش يقعد يتعشى و يبات بصح ما حبش.
رحت بدلت حوايجي و لبست خماري، سبقت هيام و أنا موراها مشينا حتى حصل صباطي فالغرقة، سلكت روحي و حبطت نمسحو حتى نسمع في صراع مورايا يقولي ما طابسييييش .. ارواحي هناياااا  درت ليه صبتو مهاوش مع روحو قالي هادي لبسة لي راكي لابستها؟ جيتي معانا هكدا؟ جيت نرجعلو بدا يعض في يديه و يقولي روحي ديراكت للطونوبيل..  قاعد يمشي مورايا و يخبي فيا حسيت روحي عريانة و خاف كاش واحد يشوفني، فتحلي باب الطونوبيل و قال لنائل يدي لوخرين معاه، انا غير طلعت خبط الباب حتى مالت بيا الطونوبيل، طلع و بدا يبهدل فيا و يعيط قالي ما تحشميش جاية بهد الحوايج راكي مفصلة تفصيل، هو يعاير و انا نبكي و ساكتة حتى شفت بنتو حلا طالعة في طونوبيلة عمها سعد قتلو شوف بنتك وش راهي لابسة و لا انت قادر عليا غير أنا و تعرف تحاسبني غير أنا جاي تفرغ فيا زعاف عمومك و يجبد عليا بكف حتى رعفت، حكمني من راسي و يعيط أنا ماشي قادر غير علييييك؟! وليتي ما تحشميش بصح و الله غير نعاودلك التربية و نوريلك كيفاش ترجعيلي الهدرة.
وصلنا للدار حنا لولين فتح الباب و دخل الطونوبيل، حبطت و قعدت نستنى فيه يفتحلي الباب تع الدار، جا فتحو و يديه يترعدو من الزعاف و انا نبكي و نمسح في دموعي، طبعو و قالي ارواحي لهنا، حكمني من شعري و أنا بالخمار و كركرني للهول و طبعني حتى طحت فالقاعة، و بدا يضرب فيا بالكفوف و يقولي خارجة هكدا قدام الرجال ما تحشميش راكي تشوفي فيا طحان، شوفي حتى حوايجك تع لداخل راهم يباااااانو ...
منبعد قعد فوق الكنابي و يقول حسابي مع كبيرة الدار حبيت نعرف كيفاش رضات تخرجي هكدا و قعد مكروشي يديه و يحرك في رجلو و يستنى على أعصابو، انا لميت روحي و سڨمت خماري قالي نوووووضي حبيت نغسل و هوما دخلو شافوني هكداك لوكان صبت تنشق الارض و تبلعني، بقاو يخزرو فيا حبوا يفهموا وش كاين و هو ناض يعيط بعدو من قداااااامي، كل واحد وين تسرسب، دخلت الحاجة قالت لنور جابتلها الماء منبعد قالتلنا وش بيكم هدا ضربوكم بعين؟ خزر فيها بالزعاف و قالها قوليلي برك كيفاش قبلتيها تخرج هكدا؟! قالتلو علاش وش بيها لبستها ما بيها والو، ناض و جا نوضني رفع يديا و دورني ليها قالها شوفي مليح هادي لبسة حتى حوايجها تع لداخل راهم مطراسيين، واقفتلي في الشمس و ذراعتيها يبانو، صدرها مفصل القماش لاصق على لحمها و خارجتلي في وسطهم هكدا تفرجو فيها حتى شبعوا علاش انا عندي مرا فالدار و لا هيفاء وهبي؟ و انت مخليك هنا باش نخليها تخرج هكدا؟ جبدتني من يدو و قالتلو وشبيك ما ترجعش الظليمة عليا لدوك ربي يسهل ما بيناتكم ما راكش تشوف فيا طفلة صغيرة قدامك باش راك تعيط عليا، و زيد انا رحت قبلهم مع باباك و هي جات هي و البنات مع نائل علاش ما شفتهاش كي دخلت، طبع الطابلة و خبطها قالها كل حاجة في رااااااسي وش نشوف وش نخلي ربي يهنيني منكم، ما كفانيش همكم زايدتلي هادي همها ملفوق واقفة عند الباب و تجوز عليهم و تتبختر و الله غير نسلخ جلدك ليوم و ناض رايح يتلاح ليا و نور رافدة وليدها جات ما بيناتنا و تحلل فيه و الحاجة طبعتني للشومبرة بصح حتى شبعت ضرب و سبان.
بدلت و قعدت نبكي دخلت نور عليا تحلل فيا شويا زادت جات الحاجة قالت لنور وين راهو قالتلها خرج، دارت ليا قالتلي ليليان بنتي علاش ما لبستيش العباية فوق حوايجك هكداك خارجة بروبة مزبوطة و ظهرك كامل يبان و صدرك مفصل انا برك ما حبيتش نهدرلك قدامو بصح عندو الحق و تستاهلي قلتلها عندك الحق نستاهل.. وليدك باينة رايحة توقفي معاه نوض نرقد خيرلي قالتلي يا بنتي مانيش راضية بضربك بصح من حقو يزعف شفتي الحطة لي خرجتي بيها و لا لالا؟ قلتلها الحاجة الله يسترك خليني في حالي لي فيا يكفيني، و تكسلت في فراشي بكيت مخ راسي حتى داتني عيني رقدت.
كي لحق وقت العشا جا ليا حرب نوضني قتلو مانيش قادرة و قعدت راقدة حتى  الزوج تع الليل رحت للكوزينة شربت الما صبت فوق الطابلة في السلة حلوى تع دراري صغار جاية على شكل كبسولات جيت نفتحها باش ناكل حتى واحد ضربني ليدي و نحالي الحلوى و رماها و يقول وش راكي ديري هبلتي؟ درت صبتو صراع منبعد انتبه بلي حلوى قالي الله لا تربحك جاية تعلفي في هدا و انا عمبالي جاية تشربي دوا و ديري حاجة في روحك  ضحكت ههههه عمبالو رايحة ننتحر، خرجت برا للجنان جا يتبع فيا قالي ادخلي تمرضي، سكت عليه جبد يدي و دورني لعندو قالي وشنو واقيل ما رانيش نبان قتلو فالنهار كنت تضرب و تسب و دوك كي تهدنت يلزمني نهدر معاك؟ قالي لالا ماشي هكداك أنا حبطت نشوف شكون راهو لداخل قتلو غير روح داوي على روحك عندك انفصام فالشخصية و جيت داخلة و مخلياتو جبدني من يدي و قالي هد الكلام عيب و ما...... قاطعتو قتلو و ما تحبش تسمعو ياك؟ انت ما تقبل حتى واحد يطيح معاك القدر و يجرحك بصح تحلل لروحك كلشي، لي نديرها تقولي عيب بصح جامي شفتكم خفتو من العيب و استحيتو على رواحتيكم قالي رايح نعتبر روحي ما سمعتش هد الكلام، قتلو سمعت و لا ما سمعتش ما يهمنيش، كي يطلع النهار تعيطلي لماما قالي شوفي فيا مليح حكاية يماك و ترجعي لداركم انسايها و ادا قلتي لالا رايحة تجبريني على موضوع مانيش حايب نفورصيك عليه، بصح لوكان تخرجي منا غير انساي باش تروحي قبل ما ندخل عليك و تنهان رجولتي بيك يمال خليني صابر عليك و انسايلي هد الحكاية.
قتلو ما فهمتش قالي ماشي المشكل ديالي لي عندي هدرتو و انت دبري راسك و ادخلي لداخل خليني نغلق الباب، دخلت و رحت لفراشي فتح الباب كان رايح يدخل نسى بلي نور راهي هنا، شاف الدراري يبكيو عاود رجع للور قالها اسمحيلي منبعد عيطلي ليليااان.. درتو فالثقيل قالتلي نور يا بنتي نوضي الراجل راهو واقف عند الباب سكت عليها ولات ناضت لبست خمارها و راحت ليه قالتلو أبو صراع ادخل خويا، دخل مقلق نحالي التلفون و طلع لشومبرتو.
صبحت راقدة ما نضتش، نور خملت الدار و أم سعد وجدت الفطور.
قعدت فالشومبرة حتى للظهر دخلت للكوزينة شفتو دخل للڨاراج بطونوبيلتو رجعت للشومبرة، دخل هو نور سقاتلو يتغدا سقساها عليا قالتلو ما خرجتش من البيت حتى أم سعد تقلقت بصح ما هدرت والو قالها إيه ما تخرجش و ما تخدمش و لي ما عجبوش الحال واحد ما فورصاه باش يعيش هنا و طلع رقد.
خرجت نتغدى نهار كامل ما شفت وجهو كنت نيفيتي فيه.
غدوا منداك جات هيام صابتنا وجه ما يتشبه لخوه قالتلنا وش كاين حكاتلها الحاجة قالتلها وش بيه هدا على جال اللبسة دار هد الشي كامل دوك لبست و كملت لوكان فهمها بلعقل و الضرب علاش قالتلها أنا مانيش راضية بالضرب بصح هو يغير و هي علابالها بلي ما يحبش هديك اللبسة قالتلها و بنتو علاش ما قالهاش لالا و لا جات غير على ليتيمة لي وجعو راسو يجي يضربها قالتلها ياك تعرفي خوك كيفاش داير روحي اهدري معاه.
راحت ليه هيام كان قاعد فالهول يشوف فالأخبار قالتلو أبو حرب من نيتك ضربت ليليان هكدا؟ قالها ام علي الله يرضى عليك اغلقي علينا هد السوجي قالتلو لالا فهمني دوك هد الطفلة لوقتاش تقعد لي يزعف يجي يضربها قالها و انت راكي راضية على وش كانت لابسة قدام هدوك مشركين الفم، ياك تعرفي رجالهم كيفاش يخزروا فالنسا قالتلو و هي وش دخلها فيهم لي يشوف يشوف حتى و تكون لابسة غطا الكعبة، ماشي هكدا يا خويا ياك جات بلا حجاب و ما ترباتش على لبستنا و هكداك و لبست وش قلتلها غير باش ترضيك، إدا شفت روحك بلي ما توالمكش علاش راك متعب روحك و متعبنا معاك قالها هيام اغلقي السوجي قاتلو لالا ما نسكتش ما كفاهاش وش سمعت من خيات مرتك زدتلها انت قالها و شكون لي هدر معاها قالتلو سقسيتها انت و لا تعرف غير تضرب؟ إخلاص بهدلتها قدام لي يسوى و لي ما يسواش و هي سكتت على جالك قالها علاش هي قالتلي و انا سكت؟ ياك دايمن نقولها لي يغلط معاك بحرف قوليلي و أنا نفرجك فيه قالتلو يا خويا اخطيها انت قبل لخطر هي ماتغيضها عمرها من حتى واحد قد ما تغيضها منك قالها هيام علاش أنا نكرهها؟ علاش حتى تخليني نخرج من حوايجي، ما تعرفيش هدوك ولاد الحرام كيفاش دايرين؟ أنا قاعد و عمي قاعد و هي حاطة راسها و هكداك و ما حبطوش عينيهم عليها كنت نستنى غير وقتاش يكمل عمي كلامو باش نقولها نوضي، حبيتيني نروح ندير مصيبة في دار عمي و نقولو ولادك راهم يشوفو في مرتي النار كانت شاعلة فيا فهمتي و لا لااااااااا... كيفاش يا عجابة نوضها من قدامهم تقابلهم و طابسلي في نص الشارع و تخليني نتحرق في حوايجي؟!! راهي مليحة كي ما حرقتهاش، ياك علابالها بلي ما نرضاش بهديك اللبسة سينو علاش تتخبى مني كي جيتو داخلين دارتها بلعاني و لا كيفاش؟ هد الشي لي زاد نشعني علاش ما بدلتش حوايجها ما تقوليليش ما تعرفش و صغيرة هي راهي حافظتني بالاك كثر منكم كامل و تعرف وش نحب وش ما نحبش قالتلو بصح أهدر معاها الضرب علاش أنت تحبها على بنتك؟
سكت و قعد يسمع لهيام و هي تهدر معاه بلعقل ولا جا ليا حب يطلب السماح بصح انا ما قبلتش، قعدنا زوج سمانات هكداك وين مايكون ما نكونش مثقلاتو حتى التلفون حبط حطو في فراشي خليتو كيما راهو كي حسيت بيه خرج طلعت لشومبرتو حطيتو فوق فراشو و حبطت، 3 مرات يجيبو و نرجعو بنفس الطريقة حتى فهم بلي مارايحاش نديه.
راح للسوق كساني من كلشي من الحوايج تع لداخل حتى لتع برا و شرالي الكوسميتيك و الشومبوا بعثهملي مع الحاجة وراتهملي و عاودت رجعتهم للصاشيات دياولهم.
رجع يتسبب كي يشوفني واقفة فالكوزينة نخدم و يدير روحو كاش ما احتاج بصح قتلتو بالبارد رجع يبروفوكيني باش ننطق حطي ارفدي جيبي ادي بصح والو كلمة ما سمعها مني نديرلو وش يطلب بالسكات.
خطرة جا من الخدمة حب يتغدا وجدتلو قالي طلعيهولي للشومبرة، حطيتلو فوق الطابلة و دخلت لشومبرة الحاجة علبالي حب ياخد راحتو لفوق بصح كي شافني ما طلعتش خلى الماكلة كيما راهي ما توشاهاش.
شويا هكدا دخلت للكوزينة قلت ندير شويا ڨاطو دخل الحاج نفحتلو يشوي الباذنجال رجع الدنيا كامل دخان تخنقت رحت للحاجة قلتلها ما حملتش تعيشي قوليلو يخرج من الكوزينة و انا نشويلو و الله غير زرزق كامل الدنيا، قالتلي الله يسهل ما بيناتكم، كان صراع مورايا سمعني راح ليه قالو بابا وش راك دير خنقتنا طفي علينا هد الدخاخن قالو و انت وش ضرك اطلع لشومبرتك و اغلق بابك ما يوصلكش الدخان قالو علبالي بصح ما خممتش بلي كاين ناس في هد الدار عندهم ربو و ما يحملوش، قالو ايييبييي قولي ملول مرتك تقلقت و جيت ترضيها قالو يمال كي ولينا في هد الهدرة و الله ما يطيبها و طفى الكويزينيار، الحاج زعف و خرج حتى نسمع في صراع يعيطلي ليليااان... سمعتو رحت وقفت قدامو قالي تخنقتي من الدخان لالا دورت وجهي و رحت نكمل الطياب قالي اعطيني حبات بدنجال كبار، خرجتهملو و حطيتهم، قرب ليا باش يفتح البيفي يجبد بروشات، ماكاش كيفاش انا قدام البيفي و هو مورايا كيفاش رايح يفتحها بقيت واقفة نشوفو وين راهو حايب يوصل، تنهد و حط يدو على خصري و لصق فيا و يقولي كاين بزاف طرقان بصح ما توصلش، نحيت يدو عليا و بعدت عليه، تنهد و خرج 2 بروشات و حط فيهم الباذنجال و خرج يشوي برا فالجنان على الفحم، كمل و عاود دخل وقف قدامي على البوطاجي سكرفج البصل و حط المقلة و قعد يطيب و كل شويا يقيسني باش ننطق، كمل طيب و قالي فالعشا حطيها قدام الحاج راني خارج، تبسمت مام كنت زعفانة عليه بصح عجبتني حنانتو علبالو بلي غلط مع باباه عرف كيفاش يصلح غلطتو و يطلب السماح.
فالعشا كي سقينا دخل الحاج مقلق كي حطيتلو الطبسي تع الباذنجال قدامو فرح قالي هدي انت لي درتيها؟ يعطيك الصحة،  صراع كان حاط راسو ياكل تبسم بصح ما قال والو.
كي كملنا العشا و الكوزينة جا ليا قالي اطلعي لفوق باش تعاونيني نخبي حوايج الشتا و نجبد تع الصيف، طلعت معاه بدل حوايجو قدامي دورت وجهي منبعد فتحت البالاكار باش نجبد الحوايج قرب ليا و تنهد و قالي حياتي ماشي هكدا .. استغربت اول مرة يقولي حياتي، بعدت عليه تنهد و بقى يخزر فيا بوحد النظرة تع واحد يقول خلاص و الله غير عييت.
قلت كيما هو يضربني انا نضربو لقلبو، بدا يطوي فالحوايج و انا نحط فالبلاكار و ساكتة كي كملت و جيت رايحة حكم يدي و غلق الباب و همسلي في ودني قالي خلاص هادي ماشي حالة و رمى يدو فتحلي شعري و قاعد يلعب بيه و يشم في رقبتي و يقولي شعلتي قلبي حرام عليك طبعتو و خرجت قتلو في قلبي إدا ما خرجتلكش قلبك ما نتسماش.
غدوا منداك حبط ليماه مور صلاة الفجر قالها راني خارج ميسيو سمانة، كان موجد كابتو و انا ما علاباليش، قالها نوضي ليليان باش ديرلي الفطور ناكل قبل ما نخرج راني جيعان.
الصباح نوضتني رحت وجدتلو الفطور حتى شفتو حابط بلاتونو ميليتار ديالو قال صباح الخير ما حبيتش نبقى منايفاتو و هو مسافر قتلو صباح النور بلاما ندور ليه، قالي راني نهدر معاك صبحت عليك ما فيها والو كي ترجعيلي قتلو رجعتلك انت برك ما سمعتش، حكمني من يدي و قالي ليليان لوقتاش نقعدو هكدا و الله غير بزاااف علبالي غلطت و قسيت عليك بصح دقيقة تع زعاف وش حبيتيني ندير و الله غير كي دخلتي انا و ما عرفتكش و حبطت عينيا، كي مشيتي و طابستي باش عرفتك النار شعلت فيا ما نحملش واحد يخزر فيك انت ديالي وحدي، قتلو اقعد تفطر، حكملي يدي و قالي ليليان خلاص تعيشي و الله غير عييت، راني مسافر سمانة و ما نعرف إدا نولي و لا لالا ما تخلينيش نخرج و انت زعفانة و الله ما نقدر، بعدتلو يدو و قتلو ترجع بالسلامة و دخلت للشومبرة سمعتو كي تنهد و قال ياااارب اعطيني الصبر و الله غير عييت.
قالتلي الحاجة يا بنتي اكسبي راجلك الزعاف بزاف ماشي مليح يبعد القلوب، سكت و دخلت في فراشي.
كي سافر طلعت لشومبرتو وليت نكمل شغلي و نقعد و نرقد فيها، شحال من مرة يعيط للحاجة يقولها جوزيهالي ندير أي سبة باش ما نهدرش معاه.
في هديك السمانة ديسيداو باش يخطبو نور مرت عابد لنائل باش يلموا الدراري لخطر هوما ما يحبوش يترباو ولادهم عند  النساب، مالين إخلاص حبوا يديو حلا تعيش عندهم بعد موت يماها ما قبلش صراع.
المهم تفاهمو باش يعقدو مابين نور و نائل و يجيبوها بلا عرس كانوا يستناو برك يجي صراع.
كانت بقات ليلة و يولي، قلت نخملو شومبرتو فالليل باش كي يجي الصباح يصيبها واجدة يرتاح.
في هداك النهار كملت شغلي و طلعت شعلت التلفيزيون و قعدت نتفرج حتى غفيت حسيت واحد قعد فوق البونك جيت نوض كي سمعتو دار احم كي كان ينحي في صباطو و أنا عرفتو صراع، كنت متوحشاتو بزاااف و تمنيت لوكان نوض نحضنو، هو نحى حوايجو و دخل تحت الفراش تكسل قدامي و دخل يدو تحت راسي لعبتها راقدة نشخر كنت محتاجة حضنو، حط راسي على صدرو و غمض عينيه وهو يبوس في جبهتي خفيف ويشم فيها، ضعفت و ما قدرتش نقاومو طلقت روحي.
ما قدرش يرقد بلا دوش ولا ناض لعبتها فطنت كي شافني فتحت عينيا قالي ما تحبطيش ابقاي راقدة هنا ندوش و نولي، نحيت الغطا و جيت خارجة، تنهد بالتعب و قال ليليااان..درت ليه قتلو انعم قالي وجديلي الدوش و حوايجي و الله غير راني عيان، درتلو براسي إيه و وجدتلو و حبطت.
هو دوش و رقد ناض صلى برك و عاود رجع لفراشو حتى لغدوا منداك الصباح، كي حطينا الفطور حكاولو على نور و نائل قالهم على بركة الله بصح لوكان خليتوهم يديرو العرس هذا أول عرس لنائل ما تنقصوش من فرحتو على حساب الحزن على خوه.
فرحوا و بداو يوجدوا في رواحتيهم، قالتلي هيام امشي تروحي معايا للحفافة رحت للحاجة قلتلها خصوني دراهم الحفافة باش نروح مع هيام قالتلي اطلعي لراجلك قوليلو يمدلك علاش راكي شايفتني فاتحة بونكا؟ تبسمت علبالي وش قصدها، رحت للحاج عطالي الحق ما قال والو، منبعد بعثت حرب قتلو روح لباباك قولو ليليان رايحا تروح مع عمتي هيام للحفافة، شويا و حبط قال لختو أم علي انا نوصلكم.
لبسنا انا و هيام و حلا و رحنا وخوات، و أم سعد دات بناتها
وصلنا للصالون و بدا يوصي و يعاود بناقص، جيت حابطة قالي هاكي الدراهم قتلو خلاص عطاني الحاج، قالي و انا وين رحت حتى تدومندي من عند بابا ما رجعتلوش، حبطت قتلو باي و غلقت الباب تع الطونوبيل.
كي كملنا و رجعنا للدار شافني دار لهيام قالها انا بلاش و قلبي رايح يطرطق دوك هادي كي درتيلها هكدا وين نحطها؟ ناضت تضحك.
دخل لشومبرة الحاجة كنت واقفة مع المراية و نسڨم في حوايجي و علي وليد هيام متكسل في بونك الحاجة عيط عليه قالو شحال من مرة نقولك ما تشبحش روحك أنت ربي أصلا عاطيك الزين علاش ما تسمعش الكلام، ما فهم والو الطفل قالو خالو ما درت والو برك شعري ما حففتوش راني نطول فيه، قالو زيد عاود زين روحك مرة اخرى و تشوف كيفاش نشوهلك هداك وجهك لي راك فرحان بيه، علي بقى مبريزي ما فهم والو و هو خرج و خبط الباب موراه قالي اسمعي خالي كان معايا و لا معاك و أنا نضحك علبالي كان يهدر معايا.
كملنا وجدنا حوالنا و رقدنا و غدوا منداك صباح على ال7 دخل علينا صراع يضحك و يقول يلا نوضو غدوا ان شاء الله عندكم عرس و تكسل على رجل الحاجة و قالها اووووف يا يما و الله غير عييت، قالتلو الله يتعب عديانك يا وليدي قالها وش حبيتيني ندير يا يما الناس شحال قلوبهم كحولة قالتلو عمبالك كامل حنان كيما انت قالها و الله يا يما كاين وحد العبد نحبو بزااااف و راني نساعف فيه بصح ماشي عاطيني كامل الوجه عياااني و عرفت كيفاش ندير معاه قالتلو يا وليدي الدنيا مصالح و كل واحد يحوس على صلاح قالها انا مقلق و ما نحبش العوج بصح مشكلتي دوك مع هدا و حط يدو على قلبو قالتلو ربي يسخر لي يغيثك و يفرح قلبك يا وليدي تكا على حضنها و قالها مازال واحد ما غاثني، ما عجبنيش كلامهم لبست خماري و خرجت، جيت داخلة للصالدوبا صبتهم في غاشي وليت طلعت لفوق لحقني و عيطلي ليلياااان.. سكت عليه و جيت داخلة حكمني من يدي قالي راني نعيطلك علاش ما تواجبيش قتلو وش تحتاج؟ قالي رايحة تبقاي هكدا؟ قتلو علاش وشبيني قالي سقسي روحك راكي فايت الشهر و انت زعفانة و ما صبتش كيفاش نراضيك، قتلو راك غالط مانيش زعفانة ياك راني نخدمك  و ما قصرتش فوالو وش حبيت كثر من هكدا، قالي شوفي النفس عزيزة و ما تهونش باش نذلها قدامك و صبري عليك بدا يخلاص و لدوك مازالني عاطيك الوجه بصح و الله لوكان نفوت نتعمر و يخرج باباك من القبر ما نزيد نخزر في وجهك، تحبي ترضاي و لا اخبطي راسك فالحيط ماشي أنا لي تذلني مرا فهمتييي...
خبط يدي و دخل لشومبرتو مقلق، دخلت للصالدوبا و حبطت قعدت نخمم واقيل صح قرعتها و كبرت على ما وصاوني، وش ربحت من الزعاف خلي نطريها معاه غدوا عندنا عرس خلينا نفرح .
جات إخلاص و يماها و باباها، حبط هو ملفوق قتلو راهو واجد الفطور ما ردليش خبط الباب و خرج، قالتلي نوال و هدا وش بيه قريب كسر الباب قلتلها صبح مقلق، طليت عليه شفتو نوض الطونوبيل و راح.
شويا هكدا كنا نفطرو حتى نسمعو صوت بومبة حتى تهزت الدار نضنا نصوغو كامل و أنا حطيت يديا فوق راسي و نعيط ماماااااا...
دخل الحاج يعيط و يقول هذا انفجار قريب، نائل حبط يجري و يقول وين راهو أبو حرب قتلو هدا وين خرج حبط يجري للڨاراج باش يعيطلو ما حكموش مغلق و هو يقول علاش غالقو شعلو بجاه ربي شعلو .. جات تجري الحاجة قالتلي وين راهو وليدي انطقي قلتلها و الله غير هدا وين خرج، دخل سعد يجري قالنا ياك واحد ما تقاس فيكم قالو باباه وين هد الانفجار قالو فالكزيرنة ناض يعيط روحو شوفو خوووووكم، و الحاجة تبكي و تعيط يا ربي وين راهو وليدي هدا وين كان متكسل في حجري و أنا مغطيا فمي بيدي و نبكي يا ربي كاش ما يصرالو نموت خرج زعفان مني وش داني...