مراهقة والاربعيني بلهجة جزائرية

24

#المراهقة و الأربعيني:

#الجزء24:

طلعني فالطونوبيل و غلق الكاروات قرب راسو و باسني من خدي جبدت روحي عليه خزر فيا منبعد حكم يدي و قالي اسمحيلي سكت ما قلت والو، نوض الطونوبيل ديمارا و قالي ليليان.. و الله ما قصدت نآذيك بصح كي نزعف احمليني علبالي هدا ديفو فيا ماشي بيدي ..
شوفي ليليان كاين بزاف أمور ما علباليش أنت وش تعرفي عليها وش ما تعرفيش حتى كلامك ما تميزيش وقتاش يلزم تقوليه وقتاش لالا، اديري وحد التصرفات مرات نبقى حاير إدا صح ما تفيقيش لروحك و لا هديك هي طبيعتك، اديري وحد العفايس بلاما تخمي حتى جيبي لروحك البلا و المشاكل، حلا قدك بصح واعية عليك و تفهم في أمور كثر منك ما قدرتش نتفاهم معاك لا كزوجة و لا حتى كإبنة ما عرفتش كيفاش نتصرف معاك ما فهمتش علاش عقليتك دايرا هكدا مرات حتى نقعد مع روحي نقول وش من زمان و وشمن دنيا كانت عايشة فيها هد الطفلة.
كان يهدر و يسوق و يخزر فالطريق و مرات يشوف فيا.
قتلو الحياة لي كنت عايشتها و حياتكم ماشي كيف كيف، بنتك حلا عايشة فالدار الكبيرة و فاميلتكم بزاف، إدا ما وراتلها العمة توريلها الخالة و شافت المشاكل تع العرايس و تع العايلة و تربات في ظروف زادت فهامتها فهد الدنيا، و تتواصل مع البنات فالتلفون و مطالعة على العالم، أنا هدو كامل ما عشتهم بابا الله يرحمو متزوج زوج بصح جامي شفتهم في حياتي داوسو و لا هو عيط عليهم أكثر دواس فالدار كان مابيني وبين يحي على أمور صغيرة كيما أي أخ و أخت لخطر هو ماكانش عنيف معايا من قبل و كان مليح معايا حتى لحقت لمسألة الزواج باش ولا معايا هكداك و تبدل.
عمري لا تحملت مسؤولية حتى حوايجي كانت ماما لي توجدهملي، ما نعرفش وش معنتها الشغل لاتية غير بقرايتي.
الزواج ما عندي حتى فكرة عليه، ما شفت بنات تزوجو ما عندي تلفون ماني مطالعة على وسائل التواصل الاجتماعي عندي صحبتي وحدة برك نفس عقليتي تقريبا، ماما عندها كلشي عيب لا دخلة لا خرجة لا تلفزيون لا تلفون كلشي بالحساب غالقة عليا في عالم وحدي منين حبيتني نتعلم و نفهم و نوعى على وش راهو صاري فالدنيا، منبعد رقدت نضت تقلبت حياتي 180 درجة صبت روحي في عائلة كل واحد يطلب مني حاجة، أم سعد تطلب مني ندير الشغل و ناس داخلة و ناس خارجة و مسؤوليات كثر من عمري و يماك تطلب مني نساعفك، أنت تطلب مني نطيعك و نفهمهك، كل يوم العياط الزڨا الدواس لي ما ضربني يعايرني و لي ما عايرني يسبني، حلا تبيكي، إخلاص تمعني، نوال تشكي حسيت روحي دخلت على حرب و بلا سلاح، وش تستنى من وحدة كانت منعزلة على وش راهو صاري فالدنيا منبعد تغلق عين تفتح لوخرا تصيب هد الشي كامل قدامها، دايمن نحس روحي غريبة ما بيناتكم و مطلوب مني باش ما نغلطش و نفهمهم كامل و نسمعلهم كلامهم كامل جاتني صعيبة بزاف حياتكم.
قالي راني حاس بيك و فاهمك ليليان و التخمام لي راهو يدور في راسي كامل من حقك، بصح أنا ما هدرتش باش نضغط عليك، ما طلبت منك تولي مرتي و لا طلبت منك تخدميني و تخدمي دارنا، ماشي دايمن نتقابض معاهم غير على جالك؟ ماشي ديمن نوصي يما عليك و نقولها علميها بلعقل؟ ما ضربتش بنتي الوحيدة على جالك؟ علاش أنا نكرهك ياك حتى غلطاتك و نتحملها و ربي العالم بالبلاصة لي حاكمتها في قلبي بصح كي نتقلق ما نجيبش الخبر لروحي وش راني ندير و مرات نفقد السيطرة ماشي لا بيدي و لا بيدك.
و ما تقوليش بلي أنا ظالم و ما حبيتش نرجعك لداركم ما دام يماك ما عندهاش دار ما نريسكيش بيك ما عنديش ثقة في يحي بصح إدا قلتي مانيش قادرة نحملكم و حايبا نرجع لدارنا من حقك و إدا قلتي نقعد معاكم مرحبا بيك علاش كاش نهار جبرتك على حاجة؟ حطيت راسي.
ڨارا الطونوبيل و قالي كاش ما راكي متشهية نجيبلك؟ قتلو لالا، حبط و أنا قعدت نخمم شويا عاود رجع قالي الدنيا كامل راهي تراب و الماكلة راهي تعيف موسخة.
ولينا رجعنا للدار صبنا نائل وهيام وصلوا قبلنا، غير دخلنا كامل يخزرو فينا و يتبسمو معايا حتى حشمت.
صبنا جدات صراع قاعدة فالهول حبطلي المورال جايبتها مورايا غير وين ما شافتنيش، راح سلم عليها و أنا واقفة قالتلو لي رحت داويت هد المصفارة لوكان علمتها تسلم على الكبير قبل، تعنكر فيا رحت سلمت عليها و جيت رايحة قالي روحي بدلي بنتي هد الجبة راهي لاصقة على لحمك عيب، قتلو أمرك قالتو جداتو غير لخير أبو حرب راني نشوف فيك غير تبربر فيها و مطلعلها الشان ما رجعلهاش.
كملت الشغل تع العشا و جيت نحطلهم لاتاي دخلو دار عمو صالح و بيانسور إخلاص في المقدمة كي العادة.
صراع كان يشرب فلاتاي و لاتي مع تلفونو حتى نطقت خشبة جهنم تع جداتو قالتلو أبو حرب وش رايك نشوفلك عروسة بالطبع انت قول إيه برك و أنا ملغدوا نخطبهالك، تبسمت إخلاص قالها وش كاين جدة كاش واحد شكالك حالتي و لا قالولك مقطع روحي على الزواج قالتلو يا الجايح فيق لعمرك قاعد تجريلي مور هد الزاوشة قالها جدة اغلقي هد الموضوع و ما دابيكم مرتي واحد ما يدخل روحو فيها قالتلو و تقعد هكدا بلا زواج على الأقل نجيبلك مرا تونسك في ظلمة الليالي خير ماراك قاعد أرمل وجهك كي المطلقة قالها واقيل نسيتي بلي راني متزوج قالتلو بشكون هديك البنيتة راك دايرها مرا؟ قالها وشبيها ليون وش خصها زينة البنات و ربي بعثهالي هدية الحمد و الشكر ليك يااارب وين رايح نصيب كيما تربيتها قالتلو أم سعد زينة البنات لي فضحاتك على جال بوسة لوكان يمال .... تعنكر فيها بصح كملت تهدر قالتلو اسمع لجداتك تشوفلك مرا توالمك يقعدوا يحكيو على زواجك لولد الولد قالها ما دابيك انت بالدات ما دخليش روحك.
دخل الحاج كان برا قالتلو أم سعد وش تقول لوكان نزوجو أبو حرب يستقر قالها علاش حتى نزوجوه و ليليان ماشي مرتو؟ وش خصها شابة و صغيرة و نقية و كيما يحب خاطرو... بريزاها ههههه ما سناتهاش منو، قالتلو راك من نيتك هديك راك دايرها مرا؟! قالها إيه مرا و نص و كي طفلة و منبعد؟  دوك تتعلم بلعقل على طبعو و توالفو يعرف برك كيفاش يربيها على يدو، قالها بيناتنا علاش صراع ينحمل؟ ياك كي كان خاذي بنت اختك الله يرحمها كل يوم الدواس و ليليان مسكينة حاملاتو و تخدمو بالسكات قالو بابات إخلاص ما سنيتهاش منك تقارن بنتي الله يرحمها بهادي؟ كي قال هكدا خلاص تقنطت ما قدرتش نزيد نحمل كثر جيت نايضة شدني صراع من يدي و قالهم راني نقولكم واحد ما يزيد يدخل روحو في مرتي راهي عاجبتني و راضي بيها قالتلو جداتو شوف وجهها أصفر تقول وجه جرادة أنا غاضتني عمري حطيت راسي و بكيت جبدني لعندو و حضني قالي ما عاش لي يبكيك حتى لو يكون بابا لي جابني، مازال ما صبت تربيتك و أخلاقك و براءتك عند حتى وحدة، غايرين منك سينورمال يهدرو هكدا و مسح دموعي و باس راسي قدامهم و الحاجة و هيام يضحكو منبعد قالتلو والله يا خويا غير ربي يحبك و عطاك وحده كيما هي ما تعرف خبث ما تعرف تنحايسيت قلبها صافي نهار كامل و هي مسكينة تجري و قايمة بيك و بيما حتى للخر و هكداك جامي شكات و لا سمعنا حسها، كيما قالها بابا طفلة صغيرة تربيها على يدك و طبعك خير ملي تدي وحدة مسمومة تركبلك الريكيكي و خزرت في إخلاص.
هي ناضت راحت للكوزينة و عجوزة النار كملت تكعرر فالهدرة ناض عليها و خرج.
من هداك النهار حسيت صراع تبدلت فيه حاجة، نصيبو يخزر فيا ما بينو و بين روحو، كي نكون نمشي نحس نظراتو متعلقة بيا بصح كي نخزر فيه يبعد عينيه و يتبسم.
غدوا منداك الصباح نضت بردانة كان دار الحال خرجت باش نوجدلو الفطور قعد فالطابلة طابست باش نسربيلو لاتاي حبطتلي الجبة شويا على صدري شفتو خطف عينو انتبهت لروحي طلعتها سترت روحي لعبها شغل ما كاين والو يكوف روحو عجب.
ماوليتش نحس بالراحة كي نطلع ليه لفوق حسيتو ولا جريء بزاااف كي يكون في شومبرتو يزيد ياخد راحتو كثر.
فالليل كنا قاعدين دخل لشومبرة الحاجة قالها يما وين راهم الكوارط لي قلتلك عليهم قالتلو راهم فوق الخزانة حاول يجبدهم ما قدرش جاتو عالية بزاف قالي ليليان انت خفيفة نطلعلك اجبديهملي قتلو إيه معليه، شديت يدو و طلعت جيت نجبد الكوارط طلع يدو يتحسس في صدري و زير عليه و أنا صغت رميت الورق فلرض و شديت فالخزانة و الحاجة و حلا ناضو يجريو عمبالهم كاش ما قرصني و رايحة نطيح و هو لعبها ما دار والو و يضحك يڨرڨر و يطم فالورق ولاو يضحكو، هوما كانوا يضحكو على حاجة و هو كان يضحك على حاجة أخرى.
كي جا طالع قالي ليليان كملي وش في يدك و اطلعي نحتاجك كي طلعت صبتو قاعد على البونك و مزربع الورق قدامو يقلب فيهم خزر فيا و عاود كمل يشوف فالكوارط قتلو عمو فواش حتجتني؟ قالي وجديلي كابتي غدوا ان شاء الله الصباح رايح للعاصمة نقعد 3 ايام عندي شغل تقلقت كي قال العاصمة، كملت وجدتلو منبعد قربت ليه قتلو عمو.. قالي انعم قتلو وش عندك فالعاصمة؟ قالي خدمة قتلو تع واش؟ حط الورق و خزر فيا قالي لوين راكي حايبا توصلي ما فهمتش قتلو خلاص والو اسمحلي و جيت خارجة عيطلي ليليااان .. درت ليه قالي ارواحي تشوفي رحت ليه خزر في عينيا و حكم يدي قالي معليه تبقاي معايا هد الليلة، جبدت يدي قتلو لالا نحبط نرقد في شومبرة الحاجة قالي ليليان تحطي الما و الماكلة قدام الصايم و تقوليلو ما تاكل ما تشرب؟ قتلو ما فهمتش قالي ابقاي معايا و أنا نفهمك قتلو لالا الحاجة راهي تعيطلي و حبطت و العرق يصب عليا كي شدني تقول ضربتني التريسيتي و ما رتحتش لكلامو، تكسلت في فراشي و قعدت نخمم حتى رقدت.
غدوا منداك نضت على ال8 ما فطنتلوش كي راح، نضت لشغلي كي العادة و أم سعد  واقفة على راسي و كانت جات بنتها شيماء قاعدة تحكي هي و ياها و أنا نغسل فالكوزينة و ولادها قباح ما ينحملوش كل خمس دقايق يدخلو لتم يضاربو نخرجهم و يعاودو يرجعو،
أم سعد كانت طفات على الطنيجرة و نحاتها من فوق الكويزينيار و حطتها فوق الريزيستونس باش يلحقوا بيها سخونة و غلقت الباب.
كي أذن الظهر راحو كامل يصليو قعدوا غير الدراري قلت نروح نريح شويا في شومبرة الحاجة بيدما يكملو و نسقيو الماكلة، شويا هكدا حتى نسمعو في العياط تع شيماء و وليدها خرجت أنا و الحاجة نجريو صبنا الدراري مضاربين و قلبو الطنيجرة على رواحتيهم و كامل حصلوها فيا رفدو الحاج داه للديسبونسار و الشتا برا خيط من سما.
هوما خرجوا و شيما و أم سعد تقابلو عليا السبان و المعايرات يا لي فيك يا لي فيك و يسبو في دارنا ما حملتش قلتلها لتم سعد علاش ياك أنا كملت شغلي كل وحدة تشد ولادها مانيش ملزومة بيهم، قالتلي شيماء عندك الوجه و تزيدي تحلي في فمك قتلتي خويا و تحوسي تكملي وليدي و حكمتني من شعري و أنا نصوغ، طيحتني فالقاعة و تحماو فيا هي و يماها يضربو فيا و الحاجة و نوال يحاولو يسلكو فيا، الحاجة تجبد في شيماء و نوال في أم سعد بصح ما قدروش يسلكوني منهم و هي تقول ليوم يا انا يا هادي بنت الشارع فهد الدار و خرجوني برا في هديك الشتا و البرد و غلقو عليا الباب و وقفوا موراه ما خلاوهمش يفتحولي نسمع فالحاجة تقولهم كي يجي صراع يتفاهم معاكم حسبي الله و نعم الوكيل.
جا محمد صابني نبكي و دموماتي يجريو وجهي ديفورماوه قتلو بجاه ربي اديني لعند هيام قالي يا الله امشي معايا منبعد قالي اصبري نجيبلك حجاب جا يدخل ما حبوش يفتحولو ناض يعيط قالهم اعطيولها حجاب و لا دوك نعيط لعمو صراع هو يدبر راسو معاكم، عطاتلو نوال عباية و أم سعد قاعدة تحلف فيه و حبت تلحقو بصح هو ما خافش منها و داني وصلني، كي لحقنا خرج علي قالي محمد وليد سعد ادخلي راني رايح لخطر ما يتهادرش هو و ياه و علي دخلني و غلق الباب غير شافتني هيام بدات تندب و تقولي وش بيك وش صرالك شكون دارلك هكدا؟ حظنتها و كلاطيت بالبكا دخلتني بدلتلي حوايجي و قعدتني قدام الفورنو ندفا حكيتلها كلشي، قالتلي صار هكدا؟ معليه ياك يجي صراع و عيطت للحاجة قالتلها و أنت علاش راكي قاعدة لتم ارواحي لعندي و كي يجي صراع إن شاء الله ساهل قالتلها لالا ما تخافيش عليا أنا خلي برك ليليان عندك و ردي بالك عليها.
كي لحق الليل جا الحاج و بدا يعيط على هيام و حب يديني بالسيف قالتلو ما تخرجش من عندي حتى يجي راجلها قالها راكي تحوسي على المشاكل؟ صراع مريض و تطلعلو لاطونسيو قالتلو ما تخافش عليه هداك سبع تربى فالبرية ( البنات تفكرت الغنية تع و السبع زهراتو واعرة 😁) ، زعف منها و خرج.
غدوا منداك صحات و  طلعت الشمس جيت ندير الشغل مع هيام ما حبتش تخليني منبعد عيطت لصراع و ما بينتلوش بصح هو حس بلي كاينة حاجة، قالتلو وقتاش جي قالها اليوم لعشية إن شاء الله علاش كاش ما كاين؟ قالتلو لالا ما كاين والو حبيت برك نطمن عليك.
شويا هكدا حتى سمعنا الباب طلت هيام قالت شكون هدا زعما صراع جا بصح هدا وين قالي لعشية باش نجي، لبست خمارها و راحت تفتح الباب و أنا واقفة نشوف شكون حتى نشوف ماما واقفة و تهدر صغت ماماااااااا و رحت نجري ليها فتحت يديها و عيطت بنتييي ليلياااان...
عنقتها و بكيت في حضنها و أخيييييرا شفتها و شميت ريحة دارنا.
رحبت هيام بماما و خالي دخلهم و عيطت لنائل يجي، قعدت مع ماما و قعدت تسقسيني على حوالي و علاش مضروبة قعدت نبكي عاود سقساني خالي قالي يا بنتي اهدري شكون لي ضربك قتلو لوكان نبدا نحكي ما نكملش نطقت هيام جاوبت في بلاصتي قالتلو ليليان مرت الغالي نحبوها و نعزوها بصح مرت بابا يمات عابد لي انقتل تكرهها و حاقدة عليها و مشاكلها ما يخلاصوش بصح راني عيطت لصراع لخطر كان ميسيو فالعاصمة، قالتلي ماما ما تزيديش دقيقة هنا ترجعي معايا وشنو هد الحياة لي راكي عايشتها وش راكي لابسة وش بيه وجهك صفر علاش ضعفتي هكدا وش دارولك هادو؟ قالتلها هيام شوفي خالتي حنا ماناش ظلام و مانعين عليها الماكلة نجيبولها من كل خير و نحلوها باش تاكل هي ما نحبش قلتلها ماما أنا لي ما قدرتش ماعطانيش خاطري قالتلي كنتي كي الوردة ذبلتي كامل حضنتها و بكيت قلتلها توحشتكم، حنا هكداك دخل نائل سلم و قالنا عيطلي الحاج قالي جاو أهل ليليان و ما كانش فالدار خرجلهم وليد سعد و يما وراتلهم الدار، قالو خالي إيه جا معانا طفل وسمو محمد قالنا ليليان راهي عند عمتي و ورالنا الدار قالو نائل مرحبا بيكم و دار لهيام قالها أم علي القضيان راهو برا وجديلهم الغدا قالو خالي ما تشقيوش رواحتيكم كثر خيركم يلزمنا نرجعوا قالو ما عندكم وين تروحو ليليان بنتنا و رانا  أهل و أبو حرب العصر ان شاءالله يكون هنا قالو حنا جينا نديو الطفلة ما حملتش هنا قالو هدا الكلام كي يجي راجلها اهدروه معاه براحتكم دوك راكم ضيوفنا.
راحت هيام للكوزينة و أنا و ماما بقينا نحكيو قلتلها علاش رجعتي لدار بابا؟ قالتلي وين حبيتيني نروح يا بنتي خالك بزاف عليه ما كفاهش متحمل مصروفي يزيد يتحمل معيشتي عندو قلتلها و شريتي دار؟ قالتلي لالا خوك يحيى ما حب لا يقسم الدار لا يبيعها قلتلها يمال وين نرجع؟ قالتلي ترجعي لدارنا كيما من قبل و لا هد المعيشة لي راكي عايشتها قلتلها و نرجع ليحي؟ نسيتي وش دار فيا؟ قالتلي خلاص فهداك الوقت كان زعفان و دوك تنسات الحكاية كل واحد راهو لاتي بهمو وش تقعدي ديري هنا، نرجعو يتحسن الوضع شويا و نبيعو الدار و نديو حقنا و نشريو دار قيسنا.
نغزت ماما قلتلها ارواحي نروحو عند هيام للكوزينة عيب راهي وحدها و خالي راهو مع نائل.
جا نائل لهيام قالها كاش ما تحتاجو؟ قالتلو لالا خويا يعطيك الصحة برك لوكان عيطت لصراع قولو راهم هنايا قالها عيطتلو و قالي على ساعة إن شاء الله يلحق راهو فالطريق.
بقينا نحكيو فالكوزينة و ماما عجبتها بزاف هيام لسانها حلو و تعرف تهدر، كملنا الطياب و جينا نسقيو حتى سمعنا الباب خرج علي يفتح سمعت صوت صراع دخل و سلم على خالي منبعد جا وقف عند باب الكوزينة سلم على ماما و دار ليا قالي كيفاش راكي بلخف انتبهلي عقد حواجبو قالي وشبيك ارواحي نشوف، مد يدو لوجهي خزر دارلي براسو شكون قتلو أم سعد و شيماء ضربوني دار لهيام مخلوع قالها وش صرا قالتلو حكاية طويلة منبعد نهدرو عاود شاف فيا قالي و الله غير نكسرلهم ريسانهم غير قال هكدا ضعفت قدامو و في نفس الوقت حسيت بلامان حبطو دموعي جبدني ليه و حضني قالي ما تبكيش خلاص راني هنا نفرجك فيهم غير ما تخافيش و مسح على شعري و خرج، درت لماما صبتها حاطة راسها حشمت منها.
كملنا الغدا و علي و نائل داو الماعن حطوهم فوق الطابلة، صراع جبد هيام بجيه باش تحكيلو.
قعدت أنا و ماما فالصالو حتى دخلت هيام تقول اسمحولنا طولنا عليكم بالغدا، ماما و خالي قالولها لالا يعطيكم الصحة كثر خيركم حنا لي اسمحولنا شقيناكم، حطينا الماكلة تغدينا منبعد درنا لاتاي و بناتها غسلو الماعن و حنا قعدنا معاهم.
خالي فتح الموضوع مع صراع و قالو جينا نديو بنتنا قالو كيفاش تديوها؟ إدا زيارة راكم جيتو و شفتوها و ادا في نيتكم تديوها راهي مرتي، قالو خالي شوف حالة الطفلة كيفاش راهي قالو علاش نهار جبتها من عندكم كانت مهنية؟ كي دخلت لداري جا ظهرها زرق من ضرب خوها و طاحت مريضة قالو بصح هداك خوها قالو و أنا مرتي رد بالك نفكرك إدا نسيت، انا ما نفرضش عليها و ما نجبرهاش و قلتلها من قبل نهار تشري يماك دار راكي حرة تحبي تكملي معايا تحبي نرجعك ليماك بصح مع يحي ما عنديش ثقة نرجع مرتي لعندو، قالو شوف أبو حرب تثيق ما تثيق هداك الشي شغلك حنا تفاهمنا النهار لولاني تستر على الطفلة شهور و طلقها بصح إدا كان دخلت عليها و لا راهي حامل منك تولي هدرة وحدوخرا قالو اسمعني مليح هد الامر يخصني أنا و ياها الطفلة مرتي و ما نقبلش تولي عند يحي نطقت ماما قالتلو بصح هديك دار باباها ماشي دار يحي و عندها حق فيه، قالها دار باباها و باباها ماكاش و هي قاصر و خوها علبالي وش راهو يدير و منا ما تخرجش غير و ادا انت شريتي دار فهداك الوقت ما عنديش مشكل قالتلو نشري و لا ما نشريش طلقها انت وش راهو ضارك قالها انا هدرت كلمتي و ما عنديش غيرها و بداو يعيطو و تخالفوا فالراي ماما مع خالي و نائل مع صراع، و مع لخر قالي خالي ليليان نوضي معانا و نشوفو شكون يقدر يمنعك وقف صراع و قالو هادي يسميوها قلة احترام و أنا راني مقادركم كي راكم في داري، خزر فيا و قالي ادخلي للشومبرة، حكمتني ماما ما خلاتنيش نشوف فيه عروق رقبتو تنفخو قلتلها ماما خليني ندخل و تفاهموا بلعقل قالتلي اوقفي في وجهو و قوليلو حايبا نروح قلتلها لالا ماما كي يزعف ما يرحمش قالي وش قلت أنا نضت نجري دخلت و بقيت نبكي، داتو هيام للكوزينة كالماتو منبعد دخلو عليا في زوج قالي ليليان انت وش رايك؟ قعدت نشوف فيهم قالي اهدري راكي حايبا تروحي معاهم؟ قتلو عمو أنا مانيش حايبا نعيش مع يحي بصح حايبا نكمل قرايتي قالي يعني تشري يماك دار و ترجعي قتلو علبالي بلي يحيى ما يخليهاش قالي يماك راهي تقول ندبر راسي و ندي حقي و نشري سكت قالي مليح خلاني و خرج ليهم قالهم حتى ليليان ماراهيش قابلة ترجع لعند يحيى قالو خالي نقسمو الدار و يقعدو وحدهم قالو كي تقسمو و نهدرو.
حضنتني ماما هي تبكي و انا نبكي ودعتهم و راحو بصح حسيت تقول روحي راحت معاهم.
كي راحو صلى صراع العصر و قعد معايا انا و هيام، حكاتلو هيام و أنا قتلو و الله غير عييت منهم كلما تروح يستغلو غيابك
و حطيت وجهي مابين يديا و نبكي ناض جا لعندي و جبدني لصدرو و قالي والله العلي العظيم لوكان ما نفرجكش فيهم ما نتسماش صراع زدت وليت نشهق بالبكا قالي نحرق عليهم الدار و ما يطيحوش هد الدموع، بجاه ربي ما تبكيش ليليان و الله ما نحمل نشوف دموعك راهم كي المواس في قلبي ارحميني، مسح دموعي و باس راسي و قالي نوضي بدلي و خلينا نروحو، نضت لبست بالخف و هيا توصي فيا قالتلي ما تهدري والو خليه هو يدبر راسو حتى لو كدبوا خليهم هو علبالو ما تخافيش عليه قاريهم مليح.
كي جينا خارجين عطاها دراهم و قالها مصروف الدراري، حط يدو على ظهري و خرجنا قعد ساكت و عاقد حواجبو و هو يسوق، وصلنا للدار دخل الطونوبيل و دخل من باب الهول الحااااااج، خرج باباه من الشومبرة قالو الدار فى 2008 بعتهالي و قلت حبيت نفتح مشروع و عطيت دراهمو لنائل و سعد يخدمو بيهم و الباقي انت خدمت بيهم صح و لا لالااااااا؟ قالو هدن روحك أبو حرب قالو واجبني صح و لا لالا؟  سكت قالو يمال أهدر مع مرتك عندها ساعة في يدها ما نصيبهاش هنا، الباب راهو مفتوح نبدل و نحبط لوكان نصيبها مازالها هنا تتبدل الهدرة.
جا طالع خرج سعد قالو أبو حرب عيب عليك هد الهدرة مرا قد يماك تحاوزها على جال طفلة دار ليه قالو و أنا راني مستنيك أنت تعلمني العيب؟ يماك دقيقة ما تزيدهاش هنا فهممممت قالو ماراناش محتاجين حتى واحد انا ندي يما و نخرج و ما تبقاش تمن علينا كي رانا قاعدين هنا قالو شد لسانك ما تخلينيش نهينك قدام مرتك و ولادك، دوك انت وليت توقف في وجهي.
دخل سعد يعيط ليماه قالها امشي معايا ما تقعديش هنا رجال آخر زمن يحكمو فيهم نساهم سمعو طبع عليه الباب قالو ارواحي نوريلك شكون لي يحكمو فيه النسا و تقابضو دخل الحاج ما بيناتهم يسلك و يقولهم استهدو بالرحمن و الحاجة تعيط على صراع و أم سعد تجبد في سعد منبعد ولات لبست حجابها و خرجت مع وليدها، كي طلع صراع لشومبرتو دار ليا الحاج و بزق عليا قالي الله لا تربحك دخلتي ما بين ولادي كي السوسة المدسوسة قالتلو الحاجة اخطي الطفلة خير ما يسمعلك و تكبر ما بيناتكم سكت و طلع لشومبرتو.
قعدت مع الحاجة سقساتني على دارنا منبعد قالتلي و الله انا عمبالي تروحي معاهم بصح ظهرتي بنت أصل، وليدي يحبك و قلبو متعلق بيك ما تكسريهش و تخليه ياك شفتي بعينك حاوزهم على جالك قوليلي شكون من أهلك يديرها على جالك؟ سكت و دخلت للكوزينة جات مورايا حلا قالتلي يا وحد اللفعى ارتحتي دوك كي بابا حاوزهم؟ خزرت فيها بنص عين و سكت عليها جات تكمل هدرتها الزايدة سمعت واحد حابط فالدروج خافت ادا يكون باباها كي تأكدت بلي هو دارت روحها واقفة مع البوطاجي.
دخل شافني نجبد فالقدرة تبسم منبعد جبد بنتو ليه سلم على راسها و قالها ما نسحقش المشاكل فهمتي بنتي؟ دارتلو براسها إيه، شاف فيا قالي ما كالاه ديري العشا دوك نجيبلكم واجد ملبرا كي نولي مور صلاة العشاء قتلو تروح وترجع بالسلامة عض على شفايفو و قالي حسابك منبعد و خرج و أنا نتبع فيه بعينيا كل يوم يزيد حبو يكبر في قلبي، يحي و 100 كيما هو ما يعوضوش بلاصتو.
رفدت تلفون الحاجة و عيطت لهيام حكيتلها قالتلي سينورمال هدا الحب وش يدير فالبنادم و ناضت تضحك، ضحكت و جوزتلها يماها قعدو يحكيو.
مور صلاة العشاء بربع ساعة جا صراع و جاب معاه العشا و عيط لباباه باش يجي يتعشى، تعشينا و انا ما شفيش حتى وش كليت وش ما كليتيش لاتية هايمة في صراع نتبع فيه بعينيا بالجاست، كي يهدر كي يضحك كي يعقد حواجبو كي يكون مركز،... كل تفصيل متعلق بيه ندقق فيه..
كملنا رفدنا الماعن غسلناهم، و بديت نوجد فلاتاي دخل عليا للكوزينة قرب مني و همسلي في ودني قالي خفي بلاتاي لراجلك راهو يستنى تبسمت و قتلو راهو واجد، رفدت السنيوة و هو مورايا و يقول هدا طول و لا غصن الريحان تفرفشت و تخالفوا رجليا ناض يضحك عليا قالي انا نروح خير ما تقلبيه على راس الحاج و ما نسلكوش الليلة ههههه
صراع طلع لشومبرتو و انا كملت شغلي و دخلت رقدت في شومبرة الحاجة ما فقتش حتى ال9.
وجدت الفطور و نوضت الحاجة و طلعت نوض صراع يفطر معانا، فتحت الباب صبتو راقد غير بالشورت و ماشي متغطي، قربت ليه و قعدت نخزر في وجهو شغل حايبا نشبع منو و نحفظ صورتو و هو راقد، فتح عينيه بعدت و هو  جبد الغطا قتلو صباح الخير قالي صباح النور قتلو الفطور راهو واجد قالي دوك نحبط، جيت خارجة عيطلي ليليااان..  درت ليه قتلو انعم قالي افتحي الكابة ديالي تصيبي صاشي جيبيها، رحت جبتهالو جبد منها كارطونة و قالي هدا تلفون شريتولك ما أمنتش من الفرحة حضنتو و هو هكداك  و هو يضحك ههههه قتلو عمو و الله ما عرفت وش نقولك ربي يخليك ليا قالي آمين، قعدت نقلب في التلفون و نشوف فيه تقعد و مسح على راسي قالي بصحتك، راح دوش و رجع و صابني مازالني نقلب فيه دخل يضحك قتلو كيفاش ندخل فيه النت؟ ورالي كي طلع السينيال تع الويفي نضت نصوطي و جيت خارجة و فرحانة قالي يا سيدي غير اعطينا بوسة وحدة و الله ما نقول لالا ضحكت ورجعت بستو في خدو و خرجت نجري قالي بلعقل لا طيحي...