مراهقة والاربعيني بلهجة جزائرية

31

#المراهقة و الأربعيني:

#الجزء 31:

هو خبط الباب و خرج و أنا بلعت ريقي و تنهدت ياربي وش رايحة ندير معاه هدا دوك.
كملت شغلي و دخلت للشومبرة و قعدت نخمم خزرت في تلفوني قلت نعيط لسارة نسقسيها هي الوحيدة لي تقدر تفهمني، عيطتلها يخرجلي غير خارج مجال التغطية.
جا هو فالليل كنت متكسلة في فراشي نشوف في مسلسل خليجي، حط الصاشي تع السقايط قدام الحاجة و دار ليا قالي تحركي جيبيلي الما، رحت جبتلو و جيت سمعتو يحكي معاها على خدمتو فالمول، هو عندو اسهم في المول تع البلاد يعني ربي فاتح عليه من خيرو الحمد لله.
عطيتلو الكاس شدو عليا بلا ما يخزر فيا جيت نقعد دار ليا قالي اطلعي شعلي الكليماتيزور و وجديلي الدوش و ادي تلفوني حطيه فلاشارج.
طلعت و كي العادة لوكان ما نخربش في تلفونو ما نهناش، حوست فالمسنجر و الواتساب ماكاين والو بصح صبتو باعث ميساج لأم مصطفى كاتبلها (غير غدوا نجي للعاصمة و ربي يعملها تاويل) الڨاز طلعلي للراس و تخنقت، دخل للشومبرة و هو يفتح فالقفالي تع قمجتو قالي وش جيتي ديري هنا؟ قتلو وشنو هدا؟ قالي وشنو؟ شد عليا التلفون خزر فالميساج رفع حاجبو غلق التلفون و حطو قتلو ما فهمتش قالي ماشي شغلك قتلو غير غدوا رايح للعاصمة؟ ما واجبنيش قتلو ماشي راني نهدر معاك؟ قالي وجديلي الدوش قتلو مارانيش الخدامة ديالك باش نخدمك و أنت تخون فيا قالي حتى أنا مانيش مجبور بيك نصرف و نساعف و نحب و ندافع و نكون فيدال ليك و فالمقابل ما نلت حتى حاجة الزواج أخذ وعطاء، قتلو وش تحوس قالي راكي فاهمة مليح ماكلاه نهدر قتلو و الله ما راني فاهمة وش راك حايب قالي تغندفي في روحك قتلو شكون هادي أم مصطفى؟ قالي قلت ماشي شغلك قتلو ما تروحش للعاصمة قالي تأمري أمر لالة ما يكون إلا خاطرك و روحي دوك وجديلي الدوش قتلو راك تتقعد بيا و الله ما تروحها قالي ليليااااااان شدي قدرك و اخرجي قتلو ما نخرجش قال ياااارب اعطيني الصبر و جا خارج شديتو من يدو قتلو علواش راك ناوي؟ قالي ماراني ناوي على والو بعدي عليا.. لا إله إلا الله.. صح أنت بلوة ما ترحمي ما تخلي رحمة ربي تنزل، نحى يدو و خرج مقلق.
حبطت لتحت و أنا ضايعة نخمم كيفاش نقدر نمنعو باش يسافر رحت لفراشي كي العادة تغطيت و بكيت حتى رقدت.
غدوا منداك نضت على ال9 ما كانش فالدار، قاعدة نخدم فالشغل و مخي يخدم كيفاش نمنعو باش يسافر خممت نطلع لعندو فالليل و نخليه يدير وش يحب حتى و لو ذبحتي و لا نبقى فهد الحالة.
كملت شغلي و طلعت لشومبرتو خملتها تحمست قلت خلي نخوض التجربة معاه و نخليه يدير وش حب، كي كملت حبطت رحت لنور نقاتلي وجهي و دخلت للدوش نقيت روحي مليح و تحممت، رفدت الليسوغ من الشومبرة تع حلا بلاما تفيق و دخلت لشومبرة صراع جبدت شعري و قعدت نتفرج و نستنى فيه يجي نراضيه و نهدر معاه، سنيت حتى ال5 تع لعشية و ماجاش موالف يدخل على ال3 ما عرفتش علاش بطا، جيت نعيطلو منبعد بطلت خفت يخمم بلي راني نجري موراه و لا يكوبي عليا و يفسدلي الڨوسطو.
لحق المغرب وجدنا العشا و ما بانش، كملت وش في يدي و رحت للحاجة قلتلها صراع بطا ليوم ما جاش قالتلي ما يجيش ليوم راح للعاصمة عندو شغل قلتلها وشنووو !!!!!!! و تخنقت بالدموع طلعت لشومبرتو غلقت على روحي و بكيت مخ راسي فشلت انا موجدة روحي و فرحانة و هو راح ماشي سامع بيا ڨااااع.
عيطتلو غير بدا يصوني تراجعت و كوبيت، خممت نعيط لخالي ما عنديش النيميرو ديالو، تفكرت حنا وليد خالي قلت نحوس عليه فالفايسبوك و نحكيلو على وضعي بالاك يجي يديني لدار خالي.
تليشارجيت الفيسبوك كي كتبت ( مشاعر بريئة) درت أوكي يكتبلي فيسبوك يتطلب أسماء حقيقية لكي يتسنى للأصدقاء معرفتك.. جيت نكتب اسمي الحقيقي تفكرت كي قالي علي وليد هيام غير دخلي نيميرو في الفيسبوك يخرجلك ادا عندو كونت، خفت لخطر النيميرو ديالي عند صراع ادا عرف يذبحني قبل ما يردلي حنا، منبعد قلت و انا علاش راني خايفة هو يخون فيا و أنا نخاف يروح يرنك ايااا، كتبت اسمي و دخلت النيميرو يقولي هذا الرقم مستخدم لحساب آخر ما كاش كيفاش نفتح بيه اووووف.. قعدت نبكي حتى صونا تلفوني في يدي صبتو صراع كاتباتو ( دقات قلبي) كوبيت عليه عاودلي زدت كوبيت عليه تفوه عليك يا خاين سور راهو قاعد قدامها، زاد عاود كوبيت علبالي لوكان نرفدلو و أنا فهد الحالة نغلط و ما نشدش لساني و هو يكرهلي معيشتي و ما عنديش مانبا وين نروح يمال ما نرفدش خير، شويا وبعث ميساج (ماشي انت لي عيطتيلي علاش راكي تكوبي) عاود عيط مسحت دموعي و كوبيت عليه، لالا و فرحان و مورالو طالع ما يحشمش، زاد بعث ( براحتك على حساب الشوفة ولاولك حوالك.. كاش ما تحتاجي) ضحكت ههههه لالا  يزيد يتقعد و مرتاح و انا مخليني نغلي كتبتلو ( يارب ما ترجعش ) بلخف جاوب (مشكورة) و ما عاودش عيط.
ما رقدتش حتى للفجر، لحقت ال10 سمعت الدقديق فالباب تع الشومبرة نضت فتحت صبتو صراع شاف في وجهي عقد حواجبو و دخل و انا خليتو حبطت غسلت وجهي و وقفت مع نور على الشغل  صبتها قالبة خليقتها و تخدم لخطر ما نضتش بكري و صبتها قريب تكمل كلشي ما هدرت معاها والو، انا نخمل فالصالو و صراع دخل عليا حط يديه في جنابو و خزر فيا عاقد حواجبو شفت فيه و حبطت راسي قالي صار هكدا كي نكون هنايا وجهك تخليك كي تع بليس و كي نخرج تولي تعرفي تسقميه و تجبدي شعرك لالا و تكحلي عينيك تان وش قصدك ليليان؟ قتلو وش دخلك علاش حرام، حكمني من يدي قالي شوفي تشدي قدرك و لا نكسرلك راسك قتلو نحي يدك، زير على سنانو ليليااااااااان.. سكتت و انا عاقدة حواجبي و روحي خارجة منو، طلق يد و خرج و هو يقول ماشي مربية قتلو كامل ماشي مربيين غير انت.
كملت دخلت لشومبرة سعد القديمة و قعدت مع التلفون عيطولي باش نتغدا قلتلهم مانيش قادرة عاود عيطلي صراع ليلياااااان.. رحت قتلو انعم قالي اقعدي تتغداي قتلو شبعانة قالتلي الحاجة حتى الفطور و ما فطرتيش وش بيك زعفانة قلتلها مانيش زعفانة برك ما عطانيش خاطري ناكل، قالي وش قلت قتلو ماشي بالسيف مانيش جيعانة قالي لوكان نوض ليك نوريلك كيفاش ترجعيلي الهدرة قتلك اقعدي ترهجي تقولي أمرك و تقعدي، قعدت معاهم فالطابلة و لداخل كنت نغلي.
هو رفع راسو و قال للحاجة شكون لي خدم على الرجال لبارح كي جاو فالسهرة يشوفو الماتش؟ قالتلو نور أنا علاش؟ قالها ياسر دخل لعندك للكوزينة عاونك؟ قالتلو لالا دخل عند الحاجة قاعد يڨصر معاها و انا وجدتلهم لاتاي و الرانڨيلات و طلعت لفوق لولادي.
لتم فهمت وش كان يدور في راسو عمبالو كنت لتحت في شومبرة الحاجة كي جا ياسر وليد عمو و قعد يڨصر معاها و أنا مسقمة روحي ليه.
قاعد ياكل و ينسف و يتنهد منبعد ما قدرتش يحمل ناض بلخف و قالي طلعيلي لاتاي، وجدتلو و عطيتو لنور قلتلها اديه لصراع في طريقك و روحي لولادك أنا نغسل الماعن و نكمل وش قعد شغل.
كملت و جيت داخلة لشومبرة سعد صبت نائل متكسل فيها، يا حي يا عمري هد الشومبرة ولات شومبرة الغضبانين هو تان راهو هاجر مرتو و ماشي متفاهمين.
كي شافني فتحت الباب و تراجعت عيطلي ليلياااان.. قتلو انعم قالي ريحي ادا حبيتي ما عندي والو، قعدت بجيه شعلت اليوتيوب في تلفوني و درت الكيتمان و هو متكسل مع تلفونو، دخلت نور شافتني قاعدة قالت لنائل كاش ما تحتاج؟ قالها لالا سلامتك روحي تريحي، هي خرجت شويا هكدا نحس واحد رمى عليا المخدة طلعت راسي صبتو صراع يشوف فيا و حاط يديه في جنابو، نحيت الكيتمان قالي نائل راجلك عندو ساعة و هو يعيطلك، شفت فيه قتلو وش تحتاج؟ تعنكر فيا و قالي نوضي، خرجت معاه قتلو وش تحتاج؟ قالي اطلعي قتلو ما نطلعش عندك و الشي لي حايب تهدرو قولو هنا دار ليا مشوكي قالي طلعولك الڨرون انت.. خليتو و دخلت للكوزينة لحقني قالي ليليان ما تختبريش صبري و الله العظيم غير نكسرك لوكان تبقاي تمشي بهاد العقلية قتلو وش كان عندك البارح فالعاصمة؟ قالي كان عندي شغل و انت وش راحلك فيا، قتلو لالا آمنتك قالي ياودي سڨمي هدرتك معايا ما تخلينيش نضربك، منبعد حط يديه في جنابو و قالي لبارح وش كنتي ديري كي كان ياسر مع الحاجة قتلو كي تقولي وش كنت دير فالعاصمة نقولك قالي راكي تلعبيها مارڨة و لا كيفاش قتلك كان عندي شغل قتلو ااااااه و هديك القح..... ديالك هي الشغل، أنا غير قلت هكدا و يجبد عليا بكف، سكت و حطيت راسي و لداخل النار شاعلة فيا، قالي ملوقتاش وليتي طيحي بالعيب قدامي و تهدري معايا هكدا؟! أنا نمشي مع ال.......؟! قتلو تأمر بكاش حاجة؟ حبيت نرقد راني عيانة قالي ترقدي ما تنوضي ان شاء الله بعدي من وجهي، جيت رايحة حكمني من حوايجي قالي لوكان نسمع بلي ڨصرتي مع ياسر و لا ضحكتي معاه موتك على يدي، رحت نجري لشومبرة الحاجة دخل مورايا صاب يماه متكسلة قالها شكون كان قاعد معاك كي جا ليك ياسر قالتلو وشبيك يا وليدي؟! قالها يما واجبيني ما تخلينيش نخرج من حبال عقلي قالتلو حلا و حرب قالها و هادي؟ قالتلو ما نعرف وين كانت أصلا ما رقدتش هنايا علاش وش كاين؟ دار ليا قالي وين كنتي؟ ما واجبتوش قالي انطقي ليليااااان ما تقلقينيش، تقعدت الحاجة و قالت باسم الله الرحمن الرحيم وش بيكم؟ قالها يما هادي راهي تحوس نقتلها قالي انطقييييي خير ما نفسدلك خليقتك، نضت و عيطت في شومبرتكككككك... كنت في شومبرتك و ما علاباليش أصلا شكون جا و شكون لي راح كملت شغلي و طلعت ارتحت دوووك.. حبطو دموعي و خرجت نقول الله ينعل الدقيقة لي شفتكم فيها فتحت المخزن و قعدت لداخل نبكي.
شفتو رايح جاي على الباب منبعد سمعتو كي طلع الدروج، شويا هكدا فتح الباب شاف فيا قاعدة فالضلمة شعل الضو فتح الباب و عاود طلع.
قعدت نبكي حسيت بنور كي حبطت للكوزينة حشمت تشوفني قاعدة فالمخزن و نبكي، مسحت دموعي و طلعت لشومبرة عابد، غير دخلت قلت في قلبي لو كان ماشي بسبتك راني عند ماليا ماشي قاعدة هنا نتحمل مصايبك ومصايب خوك الله لا يرضى عليكم في زوج.
قعدت نبكي و نخمم حتى المغرب تخنقت حسيت روحي ما نقدرش نزيد نعيش هنا و حايبا نرجع لدار خالي وهو يرجعني لدارنا حتى و سيطرو الإرهاب على المنطقة نموت معاهم و لا يحكمني كاش مرض و لا نبقى ننهان هنا كل مرة خلاص عييت ما قدرتش.
مسحت دموعي و نضت غسلت وجهي و رحت لشومبرة صراع فتحت الباب و دخلت صبتو يقرا فالقرآن وقفت مقابلاتو صدق و رفع راسو، قعدت فوق البونك قتلو ياك أنت تخاف ربي و ما ترضاش بالظلم، حط راسو يسمع ما قال والو، قتلو واجبني قالي وش حبيتي قتلو حبيت نرجع لدارنا جا يهدر قاطعتو قتلو ما تقوليش الارهاب أنا راضية نموت، قالي شكون قال بلي رايحين يقتلوك استهدي بالرحمن قتلو اديني لدار خالي لتم وين يسكنوا كاين الإرهاب؟ قالي خليني نكمل التلاوة قتلو أنت تخاف ربي علاش راك ظالمني؟ قالي فواش راني ظالمك؟ قلتيلي ما تضربش و راني نشد روحي قد ما نقدر، دنا ليك واحد و سكتلو؟ طلبتي مني حاجة و ما جبتهالكش؟ فواش راني مقصر معاك؟ و الله العظيم غير عييت معاك و نقول طفلة صغيرة نكبر عقلي و نتحمل قتلو مانيش طفلة قالي يمال افهمي و الله غير عييتيني في وجهي تقوليلي القح.... ديالك؟! باباك يقبل تقوليها قدامو؟ قتلو دارنا ما يهدروش هكدا نتوما لي تهدرو هكدا قالي ما تقوليليش نتوما قادري روحك و اعرفي معامن راكي تهدري هكدا، ما تقوليهاش قدام واحد كبير عليك عييييب، حاجة ما تعلمتيها من هد الدار و هاد الكلمة بلخف رفدتيها، هاي معاك مرت نائل جامي سمعت حسها ما تهدر ما ترجع الكلام، لوقتاش تبقاي بهاد العقلية ترباي شويا مليييت..خشانة الراس و الوجه الصحيح كلما راهي تزيد و تغيضيني نقول ما نآذيكش قتلو مانيش حايبا نعيش هنا بجاه ربي اديني لدار خالي و بكيت قال استغفر الله العظيم و أتوب إليه.. وش راهو خاصك هنا قوليلي ديتك ما عجبك الحال خليتك ما عجبك اعطيني الحل حيرتيني و الله غير عييت ما صبت عليمن نديرها بجاه ربي ارحميني..
نضت خرجت نبكي ياربي وين نروح ساعة نحس ما نقدرش بلا بيه وساعة ما نحملش نعيش معاه دقيقة.
حبطت عينيا منفخين وقفت مع نور على العشا هي ما هدرت معايا والو عرفتني مانيش مليحة، كي كملنا سقينا كان هو قاعد فالطابلة قلتلها للحاجة ما تعيطيليش مانيش قادرة ناكل و راني في شومبرة سعد، قعدت لتم مع التلفون مطفية الضو مورالي فالزيرو حتى دخل صراع عليا كان جاي ملبرا و في يديه صاشيات حطهم عند رجليا ما خزرتش فيه، قعد قدامي فتح هدوك الصاشيات جبد بلا بيتزا و باطة ايس كريم حط يدو على ركبتي و قالي ليليااان.. قوليلي وش راكي تحوسي وشنو الحاجة لي راهي قاهراتك و مذبلاتك هكدا؟ سكت قالي ماشي راني نهدر معاك؟ قتلو الله يخليك و الله عيانة و روحي رايحة تخرج خليني.. قالي احكيلي اشكيلي خليني نفهمك قتلو أخطيني تنهد و قالي و الله ما نحمل نشوفك هكدا قوليلي برك وشبيك فهميني، عزت عليا روحي ما قدرتش نقولو كنت موجدة روحي ليك و فرحانة و أنت بريزيتني و رحت للعاصمة عند لالة مولاتي، قعدت ساكتة و لا مسح على راسي و قالي براحتك و خلاني و خرج.
حبطت التلفون و قعدت نخزر فواش جاب و نخمم يخون منبعد يجي نورمال شغل ما دار والو لا أنا و لا مشاعري لعبة عندو.. أنا هكداك حتى جا داخل نائل سڨمت روحي عاود رجع عيطتلو قتلو ادخل نائل خزر قال ااااه يمال أفار بيتزا لالا و معاها ايس كريم تبسمت.. فتح الباب صراع قالو ماشي ليك يا المكراش قالو إدا هكدا اداوسوا قد ما تقدرو و كل ما جي تصالحها كثرلنا من هد العفايس الواحد يرضي ليسطوما و العقل و القلب و قعد رايح ياكل صراع دخل كركرو قالو انا راني نرقع فالحالة بالسيف و ما درت فيها والو ما تزيدش تكمل انت على جدنا و تعميها قالو ياودي دوك تاكل معايا بالسيف عليها سينو نقتلها و نحى البيتزا لصراع حطها فالقاعة و قالي ادا ما جيتيش راكي راطيتي دخلت نور قالتلو ايييي هيييي انت تاكل فالبيتزا و انا نضرب فالطوماطيش ياك؟ قالها ارواحي تاكلي في خاطر المتزاعفين بصح جيبيلنا معاك 4 كانيطات بيبسي من الفريجيدار، قعد صراع قابل نائل و قالها خفي هدا إدا لحقنا مع هد الجيعان و هي راحت جابت البيبسي و ضربتني لرجلي قالتلي ياودي الزعاف ما يشبعش الكرش ارواحي ارواحي تاكلي و كركرتني، دنيت كليت مورسو على وجوههم و صراع يشوف فيا بصح ما خزرتش فيه.
نطق نائل قالها نور تعيشي جيبلنا مغارف خلينا نذوقو هد الآيس كريم إدا بنينة و لا لالا، دخل حرب طلع على ظهر صراع قالو بابا اعطيني بيتزا كان قعد مورسو قالو هاك وليدي اقعد و كول، منبعد عطاه مغيرفة ليه و مغيرفة ليا قالي كولي و الله غير بنينة.
كملنا كلينا نضت غسلت يديا و دخلت لشومبرة الحاجة فرشت مع حرب و تكسلت بقيت نلعب بالتلفون هو دخل ڨصر مع يماه و أنا غلقت التلفون درت و رقدت.
غدوا منداك كانت ليلة الشك و احتمال يكون أول رمضان، صراع كان خدام و الحاج خرج صباح بكري راح يقضي بلاما يقول لحتى واحد لخطر أم سعد لوكان تصيبو ما يحط حتى دورو في مصروف الدار و هو كلما يقول رايح نقضي تسبقو و تبعث صراع مادابيها الثقل كامل ترميه عليه وحدو و الحاجة يغيضها الحال.
هوما في ربعة لاباس بيهم فاتح عليهم ربي من خيرو الله يبارك و يزيد، الحاج و صراع و نائل يصرفو بلا حساب عندهم عقلية تع راهي كامل دارنا و رانا نتعاونو على المصروف بصح سعد مشحاح للطرف قرنييييط بصح جامي حاسبوه و لا حوسو يفهموا.
نائل كي توصيه يجيب ما يبخلش بصح صراع و الحاج ما يستناوش حتى نقولولهم كل جمعة و سبت يدخلو للكوزينة يقولونا اكتبو في ورقة كامل وش تحتاجو.
فهداك النهار دخل الحاج جاب كامل قضيان رمضان و بالزيادة، أم سعد كي شافتو جاب هداك الشي كامل تكروشات معاه قالها علاش جبت للبراوية ياك راهي دارنا كامل و زيد هكدا يكون كلشي قدامكم خير ما يضل الواحد رايح جاي للمرشي و هو صايم.
قالنا دخلوا القضيان من الڨراج و نور بداو ولادها يبكيو طلعت تجري ليهم و أنا قعدت ندخل وحدي و أم سعد عند راسي تتأمر، قعد صندوق واحد تع التشينة جيت نرفدو جاني ثقيل و كنت عييت و السخانة تع ال12، قلتلها ما قدرتلوش عييت قالتلي ارفدي تشوفي يلا خفي و لا قاعدة غير راقدة و تمونجي قلتلها ماراكيش تصرفي عليا من جيبك فهمتي علاش انت كي راكي تاكلي من عند راجلي هدرت معاك؟ قالتلي نجي ليك نفرغ هداك الصندوق على راسك، قالتنا الحاجة وش بيكم حسكم راهو واصل لعند الجيران قلتلها يما و الله غير عييت دخلت كامل القضيان وحدي قعد غير هدا جاني ثقيل قالتلي خليه يابنتي مع المغرب نخرجوه صدقة قالتلها أم سعد و الله ما صرات حبيتي تصدقي صدقي من جيب وليدك و دارت ليا قالتلي و انت خفي ارفديه و دخليه قلتلها و الله ما نرفدو يا لوكان نعرف تنوض نخلة فوق راسك كي تحبط عروستك قوليلها ترفدو، حكمتني من حوايجي و قالتلي نخبطلك راسك فالحيط  يا وحد .... طبعتها قلتلها بعدي تشوفي علاش اسكلاف عندك واقيل قالتلي و الله ما تدخلي ليوم للدار من غير ادا رفدتيه و دخلتيه معاك و نشوف كيفاش تخشيني راسك معايا يا لي ما عندكش الأصل، قلتلها ما نرفدش و لي تقدري عليها ديريها منبعد تشوفي هادي لي ما عندهاش الأصل كيفاش دايرة قالتلي الحاجة ليليان بنتي اكسري الشر و ارفدي لي فينا يكفينا قلتلها أنا راني حلفت، جات نور قالت وش كاين خليه أنا نرفدو طبعتها أم سعد قالتلها هي لي ترفدو، قعدت و غلقت راسي و هي دخلت و غلقت الباب عليا خلاتني فالڨاراج و نسمع فيها هي و الحاجة لداخل يداوسو.
قعدت تحت الشمس حتى ال2 ونص العرق يقطر عليا السخانة صرعتني وقفت حطيت يديا في جنابي و الدمعة في عينيا نخزر فالدار تخنقت حتى تفتحت باب الڨراج درت صبتو صراع غير شفتو طاحو دموعي، غلق الباب و قالي وش بيك علاش راكي فهاد الحالة حكيتلو.
جا يفتح الباب ام سعد عنبالها أنا قاعدة تعيط و تعاير و تقول اقعدي لتم لوكان ما نعاودش نربيك و نحرڨك في هد الڨايلة يالي ما عندكش الأصل...... كي سمعها وش هدرت خبط الباب تفتحت و عيط شكون هادي لي بلاااااا أصل.. نشوفوها شكون لي يربي لوخر.. انت بلية ما حبيتيش تحشمي على شيبتك، طفلة قد احفاذك حاطة نڨارك من نڨارها، قالتلو مرتك وجهها صحيح و ماشي مربية تقبلها تهدر مع يماك كيما تهدر معايا؟ تظل خازنة روحها و ما تحطش يديها معانا، قالها اااااه يمال عييتي يااااك هدا وش درتي و خزر فالماكلة لي صابها تسقي فيها و دفقهالها في بعضاها قالي زيدي قوليلي فواش عييتي نعاونك حتى أنا راني فارغ شغل ليوم، بدات تبكي و تدعي عليه قالها شوفي قسما بالله لوكان ما تسكتيش غير الدنيا نقلبها على راسك، دخلت لشومبرتها و تعيط الله لا يهنيكم و لا تشوفو الراحة.. يا رب نار وشرار تصيبكم و تدي عليا هد الق..... لي ما عندهاش الأصل، هو سمعها قالت هد الكلمة رايح يكسر الشومبرة على راسها و انا و الحاجة نجبدو فيه و نحاولو فيه و هو يعيط و يقول و الله ما تزيد تقعدها في هاد الدار ترفد قشها و تخرج، خرج الحاج من الصالو يهدن فيه و يقولو ديرها فيا راهي في عوض يماك قالو يمال انت وشنو هنا ما شفتهاش كي خلات الطفلة تحت الشمس في هاد الڨايلة ما خفتش كاش ما يصرالها؟ قالو و الله غير جيت عيان صليت و رقدت و ما علباليش بلي داوسو، و هاي مرتك انا نسلم على راسها جا يقرب ليا تعنكر فيا صراع قالي ادخلي.
قعد يعيط و شايد في كلامو بلي تخرج و هي غلقت على روحها في شومبرتها حتى دخل سعد شاف الحالة ما تعجبش قال وش كاين وش صرا علاش هاد الزڨا قالو روح ادخل ليماك و اسمع دعاويها، دخل عليها صابها تبكي و تدعي قالتلو أنا ننهان عل جال هادي لي ما تسواش قتلت وليدي و جاية تقتلني و تحاوزني منا ال*******
صراع ناض رايح يتلاح ليها وقف سعد و الحاج في وجهو قالهم اطلقوني على هادي عجوزة النار نوريلها كيفاش تطيح عليها بالعيب، خرجو سعد بالسيف و غلق الباب على يماه سلم على راسو و قالو من حقك بصح هدن روحك نتفاهمو قالو ما عندي ما نتفاهم معاك اديها معاك و الله ما تبقى هنا قالو الحاج على وجهي امسحها فيا و هي تعيط مالداخل ما نخرجش منا و نشوف شكون لي يقدر يخرجني هنا خلاص دخل ليها الحاج و سعد و ناضو يعيطوا عليها و قاعدين يهدنوا في صراع، دار ليا الحاج قالي روحي جيبي الما لراجلك، رحت نجري جبتلو صبتو يقولهم غير نخرج شويا نصيبكم دايرين فيها حاجة وين نحط وجهي، حبيتوني نبيع الدار و نشردكم و ننعل الدقيقة لي شريتو فيها و لميت هاد الوجوه.
دخلت لشومبرة الحاجة و قعدت، شويا هكدا فتح الباب عليا قالي وجدي فاليزتك نحبط نصيبك واجدة قالو الحاج ياوليدي في كل دار تصرا مشاكل ما بين النسا ما تكبرهاش على وجهي، قالو نديها و نخرج بداري وحدي و هاد الدار نبيعها و نتهنى منكم و طلع لفوق.
وجدت وش قالي و لبست دخل عليا الحاج قالي عجبك الحال دوك لوكان كسرتي الشر ماشي خير قتلو 3 سوايع و أنا فالشمس ما هدرتش معاها و دوك جاي تلومني؟! قالي اشششت.. خزر جيهة الدروج و عاود دار ليا قالي المشاكل كامل من تحت راسك من نهار دخلتي لهاد الدار  و حالتنا ما تعجبش كل يوم مصيبة، قتلو كي أنا مصيبة يمال رجعوني لدارنا، قالي نقصي حسك خير ما نقطعلك لسانك، حبط صراع رافد فاليزا قالو يا وليدي استهدي بالرحمن و الحاجة تقولو على وجهي أبو حرب قاصدنا سيدنا رمضان، جبد يدي ما بيناتهم  بلا ما يهدر و خرجني، طلعنا فالطونوبيل ديمارا كان مقلق و يهدر، حبس قدام ريسطورو حبط شرا الغدا و رحنا لدار هيام قالي روحي طبطبي فالباب بيدما نجيب الدوزان،  فتحتلي جنات غير شافتنا بلا ما تسلم دخلت تجري جا خاااالو جا خاااالو خرجت هيام فرحت بينا تسلم و تعاود، عطالها صراع الماكلة قالتلو قالتلو منيتك ابو حرب والله خسارة عليك خيرك مغرقني
باس راسها و دخل عرفاتو عيان ماشي قادر يهدر، نحى صباطو قالي ليليان جيبيلي سربيتة وروحي مع ام علي عاونيها.. غير دخل للصالدوبا سقساتني حكيتلها كلشي قالتلي هادي خشبة جهنم ما حبتش تحشم على شيبتها.
رحنا للكوزينة صبنانا طيبت الغدا عاونتها وجدنا الطابلة و سقينا الماكلة، هو خرج من الدوش و قعد ياكل معانا، شبعت جيت نايضة قالي ديريلي لاتاي في طريقك راسي راهو ثقيل.
أنا درت لاتاي و هيام وبناتها ديباراصاو الطابلة و غسلوا الماعن.
سربيتلو كاس و ديتهولو صبتو حاط زوج مخايد يدو تحت راسو و غايس فالبلافو  قربت ليه خزر فيا و تقعد شد عليا لاتاي و هو يشوف في عينيا عرفني مازالني زعفانة عليه من حكاية كي راحت للعاصمة.
قعدت هيام معانا فتحت معاه السيرة قالها يا ختي و الله غير مليت كل يوم نصيبهم مضاربين معاها دوخوني، خلاص نخرج بداري وحدي معاها هي و حرب، حلا مور العيد ان شاء الله تتزوج و يما إدا حبت جي معانا اهلا و سهلا قالت لالا خليها براحتها، نربح راحة بالي علاش حتى نتحمل الظلم تاع أم سعد حتى الدار و راني سامح فيها المهم نسلك، قالتلو هيام ما تقدرش تبيعها؟ قالها أم علي شكون رايح يشري فالظروف لي رانا فيها الناس نصهم رحلوا خافوا يزدموا علينا الإرهاب ما كان لا بيع لا شرا تغلق كلشي، غدوا ان شاء الله نحوس بالاك كاش ما نصيب دار صغيرة وش رايح ندير هي ما حبتش تحشم بصح هدا ڨاع من باباك راكبة فوق راسو و مدلية رجليها و هو شخصيتو مكاش قالتلو وش حبيتو يديرلها راجل كبير قالها جني و جن المرا لي وجهها صحيح واقفة ترجع لراجلها ماهو هامها كي راهو لتم تعيط و تدعي و هو يحاول فيها لوكان حكمتها راسها نرحيه.
دار ليا قالي إيه ليون صح قلتيلها لوكان تنوض نخلة في راسك ما نرفدوش؟ و هيام شرقت حتى خرج لاتاي من نيفها و لا يضحك و يقولي أنت تان خصك لي يزيرك شويا لسانك طوال بزاااف هد ليام.
قتلو وش درتلها؟ فوق ما تسب و تعاير في ماليا و تضرب تزيد تعايرني تقولي راكي تاكلي من  خيرنا لي يسمع يقول جايباتو من دارهم. قالتلي هيام علاش ما عاونتيهاش قلتلها فواش نعاونها علاش هي كاش ما خدمت، كملت الدواس مع الحاج كي قضى و نور طلعت لفوق و أنا لي دخلت كامل القضيان وحدي قعد غير هداك ثقيل عييت ما قدرتش نرفدو و صراع ضحك شفت فيه وكملت قلتلها خشنت راسي معاها بزااااف ظهري تقسم، شرق هو بلاتاي ضرباتو هيام بيدها ما بين كتافو و قالتلي حصلتلو روحي جيبيلو الما أنا لحقت عند الباب نسمع فيه يقولها هد الطفلة حابسة بصح لسانها فيه ميترا و يضحك.
جبتلو الما شرب و تكسل باش يرقد و انا كملت نحكي لهيام بالتفصيل و هو كل شويا يضحك منبعد رفع راسو قالي و دوك معولة تقعدي ترحي هكدا عند راسي حبيت نرقد، قالتلي هيام نوضي نروحو لهيه، خرجت أنا و ياها قلتلها هدا وش بيه كان غير يضحك قالتلي خليه يضحك هدا من صغرو و هو رافد غير الهم من تحت راس هديك اللفعى.
قعدنا نحكيو منبعد ناضت دارت شويا ڨاطو باش نشربو قهوة لعشية، مع العصر ناض صراع غسل و بدل و كلا معانا شويا كان يڨصر و يضحك فرحت كي شفتو هكداك بصح ما خزرتش في وجهو و هو غير يتبع فيا بعينيه، جا خارج قالنا كاش ما تحتاجو؟ قالتلو هيام سلامتك خويا، دار ليا قالي و أنت حبيبي كاش ما تحتاجي؟ درتلو براسي لالا، خرج و كي لحق المغرب أعلنو عن رؤية هلال شهر رمضان.
كي كنت في دارنا كنت نصوم مع مرت بابا و يحي، هو كان يقولهم راهي تكدب تحوس برك باش تاكل و أنا كنت نصوم باش يخليوني نتسحر معاهم، مرات كنت نفطر كي ما نقدرش بصح ما نقولوش باش يخليني نقعد معاهم.
قلت لهيام انا نصوم معاكم تبسمت و قالتلي ان شاءالله، فالليل جا صراع صابني نتفرج فالتلفزيون قعد قدامي قالي كيفاش ليون صافا؟ درت ليه قتلو نروحو؟ عقد حواجبو قالي وين؟! قتلو للدار قالي ماراكيش الاز هنا؟ قتلو لالا بصح عمبالي نرجعو قالي واش توحشتي أم سعد؟ تبسمت شدني من نيفي قالي هي تموت على الدواس معاك.. نوضي فرشيلي راني عيان والله حبيت نرقد، دخلت هيام قالتلو نوض خويا راني  فرشتلك فالشومبرة قالها يعطيك الصحة و دار ليا قالي و انت ما ترقديش؟ قتلو لالا ما جانيش النعاس قالي براحتك، هو راح رقد و أنا قعدت مع هيام نڨصرو و نضحكو حتى ال12 ونص خرج صراع من الشومبرة عاقد حواجبو ناض توضى و عاود رجع غلق الباب موراه بالزور قالتلي هيام نوضي ادخلي ترقدي صراع تقلق قلتلها راني نايضة، دخلت صبتو يقرا فالقرآن، فرشت جيت نتكسل حبس و خزر فيا قالي لوكان غير فرشتي قدام الباب خير باش جيك ساهلة كيفاش تهربي هكدا ما تعيايش، غست في وجهو منبعد خليت فراشي و رحت تكسلت في فراشو تبسم و كمل يقرا، قعدت غايسة في الحيط شويا هكدا فتح الغطا ساماني رفد راسي حطو على يدو و قالي يا الغضبانة قوليلنا على كاش طريقة باش نرضيوك تبسمت و درت ليه قتلو تحكيلي كلشي قالي انت سقسي و انا نواجب قتلو وش رحت دير فالعاصمة، قالي رحت نخدم ما رحتش نحوس قتلو ااااه و تزيد تنكر ملفوق و الميساج تع أم مصطفى؟ قالي علاش ننكر خايف منك؟ عندي شهور ملي طلقتها بصح عيطتلي على جال عملية وليدها حتاجت دراهم تبكي و تقول حتى يا لوكان سلف سقسيتها وقتاش يوبيري قالتلي بعد 4 أيام، جيت نهدر تكوبات بعثتلها ميساج قلتلها غير غدوا نجي للعاصمة و ربي يعملها تاويل، و كي رحت جزت على السبيطار عطيتلها الدراهم و خرجت، من هاديك و الله ما زدت شفتها و لا هدرت معاها، و كيما عيطتيلي أقسم بالله العلي العظيم غير كنت قاعد مع جماعة ما رفدتلكش قلتلهم اسمحولي دقيقة و خرجت نعيطلك صبتك زعفانة لالا و تقوليلي إن شاء الله ما ترجعش!! كاش مرا تدعي على راجلها هكدا فواش غلطت معاك أنا حتى تتمنايلي الموت قتلو و الله غير نحبك بصح كي نتقلق نولي ما نعرفش نهدر قالي صحا و لوقتاش تقعدي تخلطي هكدا فالهدرة؟! قتلو علاش تزوجت بأم مصطفى؟ قالي احم بلخف بدلتي السوجي قتلو واحد ما علبالو؟ قالي زواج عرفي، هي أرملة و أنا رافض فكرة نجيب مرا و نحطها في داري تعبت من النسا بصح أنا كيما أي راجل نحتاج على هديك تزوجتها و يماها علابالها أنا نصرف عليها و على ولادها بالمقابل هي زوجة بدون حقوق.. قتلو بصح هي ساقطة قالي شششت رجع فمك فايح قتلو منك نتعلم قالي لسانك نقطعهولك، أنا خدام عند الدولة برتبة عريف و في خدمتي غير التطياح و السبان و العياط على الجنود و لساني والف هاد الطبيعة بصح انت علاش طيحي..... بستو قبل ما يهدر فتح عينيه مليح و رفع حواجبو ما آمانش كيفاش تجرأت قالي ليوم راكي تتبلاي غير لخير.... دخلت جنات تجري شافها سڨم روحو قالتلو خالو أنت تصوم؟ قالها يمال كفار قريش؟ روحي دوك خالو، خرجت و عاودت دخلت قالتلو خالو يعني نوضوك للسحور ولا تنوض وحدك؟ قالها نوضيني خالو نوضيني بصح خليني يرحم باباك، خرجت قال وشنو هد البلوة و جبد الغطا حس الباب تفتحت نحا الغطا قالتلو خالو جبتلكم زوج كوفيرطات قالها حبييييت نرققققد... نضت نضحك و هيام تضحك ملهيه قالتلها جنااااات وين داخلة عليهم ارواحي، غلقت الباب أنا حطيت راسي على صدرو و نضحك قالي اضحكي يا الحابسة.. بقيت حاضنتو و غفيت و هو قعد ينحي شعري من رقبتي و يشم فيه، كنا راقدين دقدقوا فالباب هو ناض بلخف غسل و جا قدامي قالي نوضي تاكلي قتلو لالا قالي يمال ما تصوميش بلا سحور نضت نجري و هو يضحك، نضت طافية غفيت شحال من مرة على الطابلة و هوما يضحكو و علي و صراع يتقعدوا بيا خليت السحور و نضت قالتلي هيام ارواحي تاكلي ما ديريش عليهم راهم يضحكوا معاك برك قلتلها مانيش حايبا و رجعت لفراشي و رقدت شويا هكدا و دخل هو قالي هااااي عاودت زعفت ارواح انت و جيب لي يراضيها، دخل مورايا فالفراش و قالي ياودي وش بيك بلخف تزعفي قتلو ما بيني والو بيا الموت لي جي تديني.. كان يضحك بلخف رجع سيريو قالي علاش ما تسڨميش هدرتك و لا نسڨملك لسانك المعوج، ازعفي براحتك.
جبد تلفوني و فتحو قالي ااااااه و مطلعة الفايسبوك وش قلت؟ قتلو ما كالاه تكبرها ما عرفتش نفتح كونت و نسيت باش نديزانساليه قالي و وعلاش طلعتيه درت ليه قتلو كامل فاتحين غير أنا علاش تشك فيا؟ قالي لالا ماشي هكدا و الله غير نخاف عليك فيه بزاف لي ساقطين قتلو و أنا وش دخلني فيهم، طلعتو لبارح على جالك قالي كيفاش محسوب؟ قتلو ما عنديش النيميرو تع خالي و نعرف الفايسبوك تع وليدو قلت يجي يديني و نتهنى، تقعد و سڨم روحو قالي ليليان هادي جديدة! شكون وليد خالك؟ قتلو ما جديدة ما والو، من قبل كان وليد خالي حايبني بصح انا ما نحبوش كنت رايحة نبعثلو باش يجي يديني نتهنى، جبدني و قالي اقعدي تشوفي احكيلي وش راكي تخرطي وسمو وليد خالك هدا قتلو وسمو حنا عمرو 21 سنة يقرا فالجامعة ما نحبوش لخطر أبيض و عينه زروقا نحسو صامط ما حبيتش نتزوج معاه و ماما حبت تفورصيني و كي صرات حكاية خوك ماليه ما خلاوهش يتزوج معايا و تهنيت منو قالي و دوك راكي تحوسي عليه ياك؟ قتلو لالا حبيت برك يوصلني لدار خالي، قالي دوك نحيلك التلفون و لا واش ندير معاك ليليان قتلو بصح علاش ياك ما عيطتلو ما جا و الله ما كاين والو ما بيناتنا، رمى التلفون على الفراش و قالي نزيد نصيبك مطلعة كاش أبليكاسيو نكسرو فوق راسك قتلو صرااااع زعفت؟ قالي بعدييي حكمتو من يدو قتلو و الله عمري ما حلا
راجل في عيني من غيرك و لا خزرت في راجل إلا انت كي نشوفك واقف بطولك قلبي يولي يخبط، تنهد و حسيتو رخى روحو حظنتو بصح بقى طالق يديه رفعتلو راسي قتلو انت جيت و ضربتني وشكيت فيا بلي وجدت روحي لغيرك و أنا وجدت روحي ليك ما نحبش نزعفك مني والله قلت نخليه يدير وش يحب بصح ما يزعفش شاف فيا و عقد حواجبو قالي وقتاش هادي؟ قتلو نهار لي عيطتلك و تبريزيت كي قالتلي الحاجة راهو فالعاصمة و انا عمبالي رحت لهاديك و عيطتلك كنت رايحة نطرطق عليك غاضتني عمري قالي لوكان قلتيلي ما نروحش و نبعثلها الدراهم فالبوسطا و نبقى معاك نخلي كلشي حتى شغلي، قتلو هدا وش صرا تراجعت خفت نغلط بالهدرة معاك و يكبر الزعاف ما بيناتنا بصح و الله غير نحبك و انت ما راكش فاهمني، قالي فواش مانيش فاهمك راني كل مرة نعفس على قلبي و نخليك على راحتك لوكان جا وحدوخر والله ما يتحمل بصح أنا نخاف نجرحك، نقول مراهقة و مازالت طايشة مرات نلين و مرات نزير بصح انت ما حبيتيش تفهمي وكلما راهو لسانك يطوال و مشاكلك تزيد معاه قتلو وش درت؟ قالي وش درتي أقل شي موقفك مع أم سعد في عوض ما كلمة بكلمة انت و ياها و تكبريها كنتي قادرة تعفسيهالها بضحكة و لعبة تقوليلها دقيقة نروح نشرب الما و تطلعي للشومبرة تغلقي على روحك حتى نجي و ما تمشيش بشورها و لي يهدر معاك قوليلو راني عيطت لصراع، تروحي تقولي لوحدة قد جداتك ما نرفدش يالوكان نعرف تنوض نخلة فوق راسك؟! انا ما حبيتش نهدر معاك لتم مانزيدش عليك و انا صبتك في هديك الحالة بصح لسانك نقصي فيه شويا، دقدقت هيام قالت خويا راهو قريب الإمساك قالي ما تصوميش غدوا تجوعي و تحبطلك لانيمي قتلو لالا حايبا نصوم معاكم تبسم
باس راسي قالي يمال خفي كولي شويا تمر و لبن و اشربي الما.
رحت للكوزينة كليت كي قالو خلاص امساك قالي انا نروح للجامع نصلي و ملتم نروح نخدم و انا رحت غسلت و رقدت...