مراهقة والاربعيني بلهجة جزائرية

47

#المراهقة و الأربعيني:

#الجزء47:

غدوا منداك مع الظهر صراع كان راقد و أنا و الحاجة كنا قاعدين فالكوزينة نڨصرو و نتفرجو فالتلفزيون حتى سمعنا الدقديق فالباب و مرا تعيط تقول شكون راهو هنا؟ خرجت عند الباب قالتلي أنت مولات الدار؟ اسمحيلي دخلت لخطر دقدقت و واحد ما واجب، عيطتلي الحاجة ملداخل قالتلي ليليان شكون؟ واجبتها المرا قالتلها أنا جارتكم أم يوسف، قالتلها الحاجة جوزي بنتي لداخل علاش راكم واقفين عند الباب مرحبا بيك، قالتلها يرحب بيك الخير و يبارك فيك.. جيت نباركلكم على الدار و نتعرف بيكم.. في شحال راكم هنا؟ قالتلها أنا و وليدي و هادي عروستي و بنت وليدي راهي لفوق، قالتلها برك؟ قالتلها إيه بصح علاش؟ قالتلها الله يستر عليكم ويحفظكم شفت الدار كبيرة الله يبارك عمبالي راكم في بزاف، قالتلها الدار الواسعة تفتح الخاطر خير من الضيق، قالتلها الله يفتحها عليكم ويرزقكم .. شوفي خالتي أنا راجلي شهيد الله يرحمو قتلوه الارهاب خلالي 5 يتامى 3 بنات و زوج دراري، قالتلها لي تحتاجيها يا بنتي راني هنا، قالتلها ربي يحفظك خالتي بصح ما نديش الصدقة، أنا قلت إدا تحتاجو مرا تخدم عليكم تنظف تغسل طيب.. باش نصرف على ولادي، قالتلها و الله يا بنتي مادابيا بصح لازم نشاور وليدي قبل و نشوف، قالتلها ما تنساينيش خالتي ربي يفتح عليك، راجلي الله يرحمو كان خدام عند روحو كلونديستا و كان قيسو قيس روحو بصح كي مات سوفرينا، جازت علينا يمات فالحصار تع الارهاب ما صبتش حتى وش نوكل ولادي، و خاوتي كل واحد لاهي بعايلتو.. قالتلها ربي ينتقم من هدوك المجرمين مام انا وليدي خطفوه كثر من 7 أشهر و تقطعت علينا خبارو حتى جاتني افيسي عندي شهر برك ملي وليت نوقف على رجليا.. قالتلها الحمد لله على سلامتكم، هداك هو خالتي أنا نروح ما نوطلش عليكم شوفي مع وليدك و رجعيلي بالخبر إدا قبل و الله غير تفتحيها في وجهي و تستري على وليداتي، قالتلها إن شاء الله بنتي خليلي النيميرو ديالك، حقا ولادك يقراو؟ قالتلها إيه الطفلة الكبيرة تقرا ثانية متوسط و الثلاثة لي تحتها فالبريمار و الصغيرة كامل في عمرها 4 سنين، قالتلها خلاص خليها على ربي نهدر مع أبو حرب و نحكيلو و ما يكون غير لخير إن شاء الله، قالتلها ربي يحفظك الحاجة و باست راسها خلاتنا النيميرو ديالها و راحت..
موراها بشويا حبط صراع و قالي ليليان يرحم والديك كاس لاتاي راسي راهو يوجع..
انا رحت نوجدلو لاتاي و الحاجة فتحت معاه موضوع جارتنا أم يوسف حكاتلو عليها و قالتلو من جيهة تربح فيها أجر هي و اليتامى و من جيهة تستفاد، الدار كبيرة و بنتك قريب تروح لدار راجلها و مرتك ما تلحقش وحدها، خلي جي المرا طيبلنا و نحطو فالكونجيلاتور و تعجن أصلا مرتك ما تعرفش تعجن، قالها إن شاء الله يما و شد الكاس تع لاتاي من يدي و قعد يشرب، قتلو إيه حبيبي و الله غير تعاونا، جي خطرة فالسمانة نديرو الميناج باش تقعد الدار نقية ليامات لوخرين غير خدمة خفيفة.. شاف فيا تبسم و قالي تستاهلي خدامة و رفعلي حواجبو يشرب فلاتاي و يتبسم، قتلو علاش ما نستهالش حق ما راني نعيا معاك فالليل و لا نسيت؟ تعنكر فيا و شرلي بعينيه على حلا كانت قاعدة تكونكتي.. نطقت حلا قالت للحاجة جدة حنا ملوقتاش نجيبو خدامة للدار؟ قالتلي ما دخليش روحك هدا عمل تع خير المرا محتاجة و تربي فاليتامى، و دارت لصراع قالتلو وش قلت يا وليدي؟ حلا تقلقت و طلعت لشومبرتها.. قالها صراع بصح يا يما وش نعرفو عليها حتى ندخلوها للدار؟ قالتلو نجربوها باش نعرفونا و تكسب أجر اليتامى، قالها إن شاء الله يما،قالتلو و الله ياوليدي لوكان جات بيدي نروجهالك هكدا تكون في رقبتك و تكفل أيتامها، نطقت أنا قلتلها بلعقل بلعقل الحاجة واحد فيكم يدير pause راهو بدا اللعب يخشان.. صراع كلاطا بالضحك هههههههههه.. و الحاجة قالتلي سكتينا أنت تاني هادو يتامى و هادا عمل خير ماراناش في وقت الغيرة ديالك دوك، قلتلها آاااا ويييي علاش كيما تحبي أنت، حبيتي ديري الخير و تدي الأجر ماشي على ظهر راجلي، علاش راني متزوجة بديوان الوقف السني باش كل أرملة ولا يتيم في أمة محمد تعلقوهم في رقبة راجلي خلااااااص بزاااف.. ما كفاتنيش اسمهان المعوجة متكفل بأيتامها و قبلها أم مصطفى متكفل و خلي و خلي.. قعدو النسا يتقاتلو غير على راجلي أنا.. قاطعنب صراع قالي اشششت فضحتينا.. قالتلي الحاجة شكون أم مصطفى؟ قلتلها علاش ما تعرفيهاش؟ قالي خلاااااااااص.. و دار للحاجة قالها خليك منها يما عيطي للمرا جي و جربيها إدا شفتيها مليحة خليها تعاون ليليان، صبتيها ماشي مليحة نعاونوها بالشي لي قدرنا ملبعيد لبعيد.. قلتلها بصح ما ديهاليش غير ضياف و عرضات قالتلي علاش كيما تحبي أنت؟ قلتلها بيانسور كيما نحب أنا و راجلي و مولا بيتي.. شوفي لهنا الحاجة ما تقوليش وليدي ما وليدي هديك بكري كيما كان اسمو مع اسمك في ليفري ديالك، دوك قلبو الصفحة و كتبو اسمي مع اسمو و تهناو منك ما قعدلك حتى كلمة عليه، قالتلي هديك هي.. يا من تعب و يا من شقى و يا من على الحاضر لقى ولات الهدرة ليك دوك..
صراع متبسم و غايس [ عمبالها راهو فرحان بيها واقيل احتمال كبير يكون يسجل في راسو.. بيناتنا البنات هادا كلام تهدرو ليليان ليماه حتى و لو كان بالڨصرة ما ينقالش] 
رحت جبتلها التلفون عيطت لأم يوسف تفاهمت معاها باش جي بالثلاثاء دير ميناج للدار ملفوق لتحت و باقي ليامات غير بوخفيف، و أنا رحت لصراع قتلو نزيد نسربيلك لاتاي عمري؟ قالي إيه مادابيك.. قرصتو من خدودو و قتلو يستاهل راجلي لي يخمم عليا، قالي ملي وليتي تقرصي خدودي وش خليتي فيا راجل راحو الموسطاش، ضحكت و بستو في خدو و رحت نعاودلو لاتاي..
أم يوسف كانت تعجن و طيب على جيه و نخبيوه، و الحاجة رجعت تديلها حوايجها تغسلهم باش برك تزيدلها المصروف و ما تخلينيش نغسلهم أنا.. انا استفدت من هاد الموضوع و كنت شابعة راحة.
نضت الصباح على ال10 صبت صراع وجد الفطور ليماه و قاعد هو و ياها، ما نوضنيش لخطر نسهر ما نقدرش نوض بكري [ فهموني هاد المعادلة البنات هي كي ما تنوضش الصباح لخطر تسهر معاه علاش هو ما يكونش تان سهران؟! و زيد هو يخدم فالنهار و ينوض بكري و هي ظل شابعة راحة ما عندها والو و تقدر ترقد فالنهار اين الخلل لخطر هاد الظاهرة شفتها تعاودت بزاااف في وحد القصص..]
حبطت الدروج وقفت قريبة لشومبرة الحاجة سمعتها تقولو يا وليدي علاش حتى أنت لي توجد الفطور كل يوم علاش ما تنوضش لي راهم راقدين لفوق؟ قالها يما خليني ندخل الجنة بخدمتك و زيد نحب نقعد معاك بلاما نسمع حسهم، قالتلو و الله ما بيك الجنة، تغيضك مرتك تنوضها  و تغطي ببر الوالدين، قالها يما أنت تان وليتي كونطر عليا، قالتلو لالا ياوليدي حاشا بالعكس أنا نفرح كي نشوفكم فرحانين و متهنيين و تضحكو و كي نشوفكم داوستو نتقنط بصح ما جيحهاش ولف يديها على الشغل خليها تتعلم ولات تتفشش بزاف و الدلال الزايد يفسد البنادم، قالها أنا ما عنديش مشكل نوضها بصح يما أنا نفسيتي مرتاحة و حبيت نخدمك و نوجدلك الفطور محبة خاطر ماشي باش نخدم في بلاصتها علبالي بلي خدمتها.. هي تان ما راهيش مقصرة معايا هدرتها حلوة و تساعفك و تساعفني، الليل تبات مقابلتني ما ترقدتش، نحكمها فالليل و نزيد نحكمها فالنهار تغيضني نولي نخليها ترقد..  خليها ترتاح بزاف آذيناها من قبل أنا و أم سعد و الحاج و سعد.. و زيد وش درت على كاس حليب و بيض مغلي علاش كنست و لا مسحت؟
دخلت قلتلهم آاااا راكم تهدرو عليا.. صباح الخير، قالي صراع عمرك طويلة، قعدت قدام بستو في دراعو و حطيت راسي عليه قتلو نحبك، رفع يدو و جبدني لحضنو قالي شعرك راهو مشمخ البرد عليك تمرضي،و قرب الشوفاج ليا باش ندفى، شافت فينا الحاجة تبسمت و قالتنا ربي يحفظكم..
قعدنا نڨصرو و نضحكو حتى لحقت ال12 ناض صراع قال أنا نروح نصلي فالجامع راني جبت حوت فريشكا وجديلي الفحم راهي نافحتلي نشوي برا قتلو معليه..
قالي اسمعي ماشي نصيب الحوتة مقطعة مربع كيما قصة قصة، ضحكت قتلو كبرت و مازالك تعايرني ههههه، باس خدي قالي فرحي و سعدي بمرتي كبرت و رجعت تعرف تنقي الحوت ههههه لعاقبة كي تولي تشويلنا بيدك، وش رايك نذبحلك طير جاج و لا نذبحلك أم سعد؟ ضحكت قتلو دير فيا مزيا لوكان تذبحلي أم سعد ههههه، و زيد شكون قالك ما نعرفش نشوي؟ ليوم انا لي نشوي و تشوف بعينك،  قالي لالا علبالي تعرفي راكي خير من الشاف مفيد بصح يرحم باباك ما تريسكيناش بالفطور راني متشهي الحوت نروح نصلي و نرجع انا ندبر راسي، ضحكت و غلقت باب الكوزينة موراه، جيت نقي الحوت خفت نعميها كيما عام عام ديتو للحاجة نقاتو و أنا غسلتو و دوزنتو كي جا صراع قالي نستعرف بيك يا الشاطرة راكي سلكتي راسك انا قلت نصيبو كيما خليتو، قتلو عمبالك رانا نلعبو هههههه، ضحك  و طلع للشومبرة نحى قميصو و بدل حوايجو تع الدار، خرج للڨاراج حط الفحم فالشواية شعلو و بدا يشوي و أنا واقفة معاه روحي و ارواحي و جيبي و ادي و مين داك يغمز و يتغزل منبعد حك يديه جبدني مور الڨاراج و قالي نورمال كي نشرب العسل قبل ما نتغدى؟ قتلو حلالك ادي لي يحلالك.. قالي عسل و يهدر غير بالحلاوة لوكان تعرفي برك شحال نحبك، حكم وجهي ما بين يديه و بدا يبوس فيا و أنا متفاعلة معاه حتى صونا تلفونو رمى يدو لجيبو جبدو شاف شكون قالي أسكتي بابا راهو يعيط، رفدلو قالو أهلا بابا... إيه راني فالدار .. علاش وش كاين؟ .. اااا .. جوز لعندي تتغدى راني نشوي فالحوت و تخص غير أنت .. آاااا ... إيه مرحبا بيك و بيها ... أيا صحا بالسلامة.. و كوبا، قتلو شكون لي راهو جاي يتغدى معانا؟ قالي الحاج و أم سعد، قتلو يحي هداك وش خص .. قالي قادري روحك هداك لي راكي تهدري عليه بابا، قتلو علاش راك تعيط ما رانيش على باباك راني على مرتو علبالك بلي نكرهها و ما نحبش نقابلها، قالي ياك وحد السويعة و تروح ما تبقايش تحاوزي فالغاشي، يبقاو أهلي و مرحب بيهم في أي وقت ماشي انت لي تحدي شكون يدخل و شكون ما يدخلش.. جبدت النفس و قتلو إيه مليح يمال مرحبا بيهم.. صحا وخر خليني نجوز، قالي ليليااااان.. قتلو وش قلت تان.. وخر.. قالي نحي العقلية تع الغضيب هادي ساعة و يروحو، الحاج عندو وحد السوجي يتعلق بالعشيرة و حبني نروح معاه مور العصر و تعرفي بابا شحال يحب الحوت قلت يجي ياكل معايا، قتلو و أنا ما هدرت والو.. علاش حاوزتهم؟ خليني برك نروح، جبد النفس قالي خلاص ليليان خلينا مرتاحين يرحم والديك، قتلو وعلاش راني سارقة راحتك؟ قالي لالا بصح ما نسحقش حاجة تفسد الجو لي رانا عايشينو راني مرتاح معاك هكدا بلا زعاف..
جات الحاجة قالتنا علاش راكم متخبيين هنا؟ قفزتنا جينا رايحين نخبطنا في بعضانا هو قالها كنت رايح نجيب الفحم و أنا قلتلها رايحة نجيب ليسونس.. قالتلنا يالي ما تحشموش هاااوليك الفحم و ليسونس تتمسخرو بيا.. قالها صراع نروح نشوف الحوت ادا طاب واقيل جعتي يما؟ قالتلو إيه جعت و ريحة الحوت قعدت في يديا غسلتهم زوج خطرات بالصابون و ما راحتش، قلتلها الحاجة لوكان تدخلي للدار خير البرد عليك هنا، قالها صراع يما وش جاب الريحة ليديك؟ قالتلو كي نقيتو، شاف فيا خزرت فالسما قلتلهم ليوم السما راهي صافية ماكاش الغيوم.. وعلاش يا يما فرشتيني هكدا قدامو، قال صراع هادي لي قالك حسبتك مقياس ذهب يتباع فالسوق برايم و أنت حفرة فالواد يعفسو عليك البهايم.. قتلو راك عليا؟ قالي لالا ماشي عليك حياتي راني على لي في بالي.. قتلو ااااا.. أنا نروح نجيب السنيوة خيرلي، قالي جيبي فراش نتغداو فالجنان الشمس راهي دافية خير من الدار دوك يلحق الحاج.. قالتلو الحاجة الحاج رايح يجي يتغدى هنا؟ قالها إيه هو و أم سعد، قالتلو اييي مليح يا وليدي و الله غير ضاق خاطري بزاف و توحشتهم..
حطيت كلشي برا و جا الحاج و أم سعد تغداو عندنا كملنا و قعدنا نقصرو و في وسط الكلام قال الحاج لصراع راني وحدي و خاوتك ما علابالهمش بيا و انت هنا مرتاح ما تقول بابا ما تحوس تفهم.. قالو وعلاش بابا انا راني مخليك؟ ياك يوميا نجوز عليك نتفاقدك و غير تعيطلي فالتلفون تصيبني واقف عند راسك ما بيناتنا زوج خطوات.. قالو لالا ياوليدي  بدلاتك مرتك بزاف ما قعدتش كيما كنت بصح إن شاء الله ما تشوفش الفرحة و لا تتهنى كيما داتك و بعداتك عليا، جيت نهدر تعنكر فيا صراع و شرلي تع جوزيها على وجهي.. زاد دار للحاجة قالها خليتيني انت و وليدك و يرضيتي يعزل عليا باش ترضيو هادي.. تزايدو فالكلام حتى طلعتلها لاطونسيو، هوما راحو و صراع حطها في بونكها و جابلها الطبيب للدار دارلها الدوا و راح..
حلا ظل في شومبرتها مع التلفون قليل وين تحبط..
و أنا و صراع قعدنا مع الحاجة و هي تان قعدت تلوم فيه قالتلو كلام باباك صحيح، عندو الحق أنت الكبير تخليه عند سعد و نائل؟ علبالك بلي واحد مشحاح و واحد ضارب الدنيا بكوتبيي واحد ما علبالو بيه يدير وش يدير يقعد باباك واحد ما يجي في بلاصتو ما يلزمش تكون عاق لباباك..
قالها يما راك محسستيني شغل حطيتو في دار العجزة، ياك سمحت كامل فالدار و خليتهالو ليه و لخاوتي علاش محرم عليا أنا باش نرتاح لازم دايمن المشاكل فوق راسي، ياك علبالك بلي مرتي و مرتو ما يتفاهموش و هو ما يقبلش يعيش معايا وحدو لازم يكركرلي أم سعد معاه.. قالتلو و مرتك علاش؟ تخلي باباك باش ترضي مرتك؟ ياك وجدان دارت فيا الباطل لحمر و دايمن تخلق المشاكل معايا و هكداك و خليتها معايا، ما سمحت لا فيا لا في باباك، وش راهو صاريلك يا وليدي؟ قالها يما ما تكفرينيش، وين راني سامح فيه؟ شاب شعري، وجدان كي خرجت بيها ما ارتحتش معاها تظل يماك ما يماك بعت الدار و رجعتها لعندك، بصح مع ليليان راني مرتاح، استكثرتوها عليا ما كاش لي خمم عليا و قال شرى راسو و راحة بالو.. وش حبيتوني ندير نذبحها و نهنيكم منها فهموني اعطيوني حل، و الله غير كرهت من هاد الحكاية ارحموني..
خرج قعد مقلق فالهول و هي قالتلو هداك باباك و انا ما زرضاش تخلي باباك صراااع..خزرت فيا مقلقة و دورت وجهها، خرجت و رحت لعندو قتلو وشنو واقيل معول ترجعنا لعند باباك؟ قالي ليليان سكتينا نوضي عليا، قتلو و انا وش دخلني باش تفرغ زعافك فيا، قالي ليليااااااان.. قتلو لا ليليان لا قدور.. اسمع هاد الزوج كلمات و احفظهم مليح باباك و مرتو لوكان يجيو يقعدو عندنا و الله ما نزيد نقعد عندك دقيقة و دير وش دير ما نرجعلكش.. قالي راكي جايا تهددي فياااااا.. ارواحي هنا تشوفييي و حكمني من دراعي قالي تزيدي طولي لسانك معايا هنا ندفنك فهمتيييي.... قتلو أنا لي عندي قتلو وخر تشوف يلااا.. قالي تقادريني ولا نكسرلك راسككككك..بديت نجبد في يدي طبعني على الكنابي و قالي مخك فارغ، هو يتعنكر فيا و أنا نشوف فيه بالزعاف.. خلاني و طلع للشومبرة بدل حوايجو و عاود حبط ما خزرش منبا فيا خرج قبالة.. قتلو متخلف و جبدت النفس، دخلت لشومبرة الحاجة صبتها تنازع قلتلها يما وشبيك؟ قالتلي راسي قتلني، قلتلها نجيبلك الدوا؟ قالتلي شربت.. شفتها تتلوى من السطر وليت رفدت التلفون عيطت لصراع قتلو الحاجة راهي في حالة ارواح، قالي راني جاي.. شويا و دخل يجري قالها يما نوضي نديك للسبيطار قبل ما يطيح الليل ما واجباتوش، دار ليا قالي تعشيتي؟ شفت فيه و دورت وجهي عليه صبت الحاجة تشوف فيه مستغربة كيفاش يسقسيني إدا تعشيت و هي في هديك الحالة.. شاف فينا في زوج و جا خارج و يقول ياااارب اعطيني القوة و الصبر.. راح للكوزينة و عيطلي ليلياااان.. رحت ليه قالي ديري تيزانة ليما، فتحت البيفي باش نجبد وش نحتاج قالي وش بيك علاش ما راكيش تواجبي؟ قتلو عندك الحق وشبيني علاش نزعف؟ لخطر أنا حيوان المفروض نتبهدل و نسكت.. تنهد و قالي لالا حاشا بصح ليليان ماشي انت و الدنيا عليا.. انا متحمل الحاج في خاطرك و شحال من واحد هدر فيا و قالو مرتو طالعة فوق راسو و مدليا رجليها و تهمو غير مرتو و سكت.. منبعد تزيد جي انت تزيدي عليا و تهديني؟ كنت نستنى منك تسنديني وجي تقوليلي نوقفو في كتاف بعضانا و ما نعمروش ريسانا بهدرتهم بصح انت لالا جيتي كملتي عليا تهديني تهربي و طيحي راسي قدامهم؟
خلاص انساي هاد السوجي و ما تخليهمش يعكروا معيشتنا علبالي هدا لواش راهي حايبا توصل أم سعد مادابيها نداوسو ما ديريلهاش غرضها .. هزيت راسي، قرب و باس خدي .. منبعد قالي خرجيلي وش كاين فالفريجيدار ليوم نذوقك طيابي و نشوفو شكون يطيب خير.. دوك نوجد التيزانة و نطيب أنا العشا، قالي معليه كملي وش في يدك و ارواحي عاونيني..
قعدت أنا و ياه نطيبو فالكوزينة و كل شويا يبوس كتفي ولا يدنيلي شعري و يداعبني..
ديت للحاجة التيزانة ما حبتش تشرب دخل مورايا قالها يما بركاي من الفشوش نوضي نوضي تشربي صحتك ماشي لعبة، قعدها باس راسها و قالها إدا تحبيني صح اغلقي السوجي و انسايه.. مستكثرة عليا الراحة يما؟ فواش راني مقصر معاكم و الله غير عييت.. قالتلو ربي يبعد عليك التعب يا وليدي بصح باباك راهو وحدو، قالها خلينا من بابا دوك و اشربي..
شربت و قعدنا نتعشاو عندها و هو كل شويا يشوف فيها ما كانش مرتاح ما يقدرش على زعاف يماه هي نقطة ضعفو..
كي شافها رقدت شرلي باش نخليوها ترتاح، رفدنا الماعن طفينا الضو و خرجنا قعدنا فالهول.. عيط لحلا فالتلفون باش تحبط
غير جات بهدلها قالها يا بنتي ما كرهتيش من التلفون؟ عينيك راحو وش راكي ديري  ظلي غالقة على روحك لفوق غير فهميني، قالتلو ضاق خاطري بابا وين نروح راني نفاجي على روحي فالمواقع و خلاص، قالها جيبي تلفونك و اقعدي تتعشاي بلخف يلا.. كان التلفون في يدها وجهها صفار عطاتهولو و قعدت ما كلاتش بقات تبع فيه بعينيها و هو فتح التلفون و بدا يقلب فيه، نخزتني باش نهدر معاه، قتلو صراع كول... ما وجبنيش و قالها هدا شكون؟ قالتلو اااا بابا هادا وليد خالتي امين، قالها علاش حتى يبعثلك وش عندو معاك؟ قالتلو هكداك برك.. ديزانسطالا الأنسڨرام و قالها ما تعاوديش تيليشارجيه تفاهمنا؟ دارتلو براسها إيه.. قالنا يلا كولو.. كي كملنا قالي وجديلي رنڨيلا نطلعو نريحو لفوق فالصالو طفي كلشي هنا نخليو يما ترتاح..
وجدتلو رنڨيلة و سنيوة فيها قهوة و قاطو و طلعت صبتو متكسل فوق الكنابي، مبرطاجي لاكونكسيو من تلفونو للبلازما و داير فيلم حطيتلو قدامو و و تكسلت عندو جبدني لحضنو و قعدنا نشوفو كيف كيف و كل شويا يبوس، جازت حلا علينا باش تروح لشومبرتها تقعد سڨم روحو منبعد قالي نروحو لشومبرتنا..
كان صراع مرة على مرة يخرجنا بالطونوبيل أنا و حلا يحوس بينا و يدي الحاجة لدار الحاج صباح مور الفطور و فالليل يرجعها لخطر ما ترتاح غير لتم قاطعنلها سرتها في هديك الدار.. كانت تقول لصراع خليت داري و راجلي و جيت معاك، يقولها وش من راجل يما؟! تقولو عند ربي مازالو راجلي و عندو الحق باش ما نخرجش غير برضايتو بصح أنت حكمتني و جبتني لهنا، مرات كي نشوفها كيفاش دافع عليه و ما تحبش واحد يهدر عليه بالدونية نحسها مازالها تحبو مالڨري كامل وش دار فيها..
أنا ما كنتش نروح معاهم ما نحملش نشوف حتى واحد فيهم، حتى وحد النهار جا ليا صراع قالي نوضي بدلي حوايجك باش تروحي معانا، قتلو وين؟ قالي لدار أهلي، قتلو روح انت و الحاجة انا ما نروحش، قالي نوضي ماشي كيما تحبي انت، قتلو وش نروح ندير عندهم ماشي أنا لي قتلت بنتهم و حرشت وليدهم يحاوزهم و انا أصل البلا و المصائب في هديك الدار و هوما مساكن و خاطيهم، قالي الشي لي فقلبك خليه في قلبك خلينا من هاد الحكايات ما تخليش العيب فيك، قتلو يمال علاش قالو المثل تع ابعد عن الشر وغنيلو، قالي قالي لازم ننساو لي فات و نفتحو صفحة جديدة ماشي ننساو بصح نتناساو باش نعيشو بلا مرض، قتلو أهلك هوما المرض بداتو، قالي و انت كثر منكم، علاش فمك فايح هكدا حتى تخليني نغلط معاك، خلاص نوضي دوك.. تنهدت و نضت بدلت و رحت معاهم، كي دخلنا سلمت على نور وضحى فالكوزينة و نوال شافتني و جازت ما حبتش تخزر فيا، رحت للهول أم سعد ما سلمتش عليها قلتلها غير ملبعيد برك وش راكي.. ما نحملهاش ماشي بيدي.. بصح الحاج خرجلي للعيب ديراكت جيت نحبط نسلم عليه ماحبش و قالي واش يا وجه الشر وش جابك لعندنا؟ تقنطت قالو صراع غير لخير بابا وش كاين؟ قالو مرتك مادابيك ما تزيدش جيبها و توريلنا وجهها المسموم، قالو بابل هاد الكلام أنا ما نقبلش بيه إدا ما تحبهاش على الأقل احترمني أنا هدي مرتي و إدا هنتها راك هنتني قبلها هكدا راك تحاوز فيها يمال نرفدها و نخرج ، قالو علاش راك دافع عليها؟ ما دارتش غلطة باش تقولي راك دافع و لا ما دافعش، جات تسلم عليها علاش حتى تهينها و قدامي ملفوق، مرتك 45سنة و انا متحملها غير على وجهك مالڨري ما نحملهاش و لوكان يحطهالي فالعسل ما نجوزهاش.. بزاف عليكم راكم كثرتو على ما وصاوكم.. رفد تلفونو و المفتاح تع الطونوبيل و قالي نوضي تشوفي على حساب الشوفة ما قعدلي حتى قدر في هاد الدار.. ناض الحاج قالو ما تروحش يا وليدي ما صرا والو و سلم على راسو قالو خلاص أبو حرب ما تزعفش و حكمو قعدو.. دخل نائل سلم على صراع و دار ليا قالي أهلا بأم الديڨات طلت الشمس علينا، وش راكي ختي؟ ضحكت قتلو أهلا بيك خويا الحمد لله و انت راك مليح؟ قالي و الله الحمد لله توحشنا ديڨاتك، قالو صراع هي فالغلطات واحد ما يديهالها، درت ليه فتحت عينيا مليح و رفعت حواجبي.. قالو بصح طفيلة عاقلة.. ناضو يضحكو..
هوما قعدو يڨصرو و أنا رحت للكوزينة قعدت شويا مع البنات منبعد طلعت نتفاقد الشومبرة ديالنا صبت سعد دار فيها مرتو ضحى و شومبرتو القديمة خلاها لولادو، و محمد دا شومبرة حلا
قعدت معاهم كانو يقصرو حتى صراع قال للحاج بابا حبيت نعرض عمومي يشوفو داري الجديدة، قالو إيه ياوليدي تعمل مليح و الله ديك النهار عيطلي عمك قال كيفاش أبو حرب ما حبش يوريلنا العتبة ديالو، قالو لالا و الله غير كانت في بالي برك ما صحليش الوقت، قلت نذبح غير غدوا ان شاء الله و نعرضهم كامل..
حكمت التلفون و بعثتلو فالميسنجر أبو خويط ريح طرونكيل خير ما نولي أبو مصعب الزرقاوي و نفجرك.. فتح الميساج عاود حط التلفون و كمل يهدر معاهم.. زدت بعثتلو إيييي أووووو.. البس البس تشوف .. ساهل نرجعو للدار و نشوفو إدا تقدر تزيد توشيني.. شاف الميساج ناض يلبس و يهدر.. زدت بعثتلو عندي فيديو عيان شويا فيه زوج ڨور يحبو بعضاهم نفس اعمارنا تان هي صغيرة عليه و تبوسو بطريقة اباحية..
و بعثلو الفيديو شافو و هو يهدر دار ليا تعنكر فيا و كتبلي نوصلو للدار و نوريلك و الله غير نسلخ جلدك.. من الخوف بلوكيتو و خبيت التلفون.. كمل يهدر مع اهلو و هو عاقد حواجبو تفاهم معاهم على الوليمة و قالهم أنا هداك هو نروح لداري راسي راهو يدور حبيت نرقد و فالليل نرجع ندي يما و حلا..
داني و خرجنا طريق كاملة و هو ساكت و عاقد حواجبو، قتلو صراع وشبيك؟ قالي كي نلحقو للدار نوريلك وشبيا.. غير دخلنا للدار جيت نحي خماري حكمني من ودني قالي وشنو الفيديو هداك لي بعثتيهولي ليليان؟ قتلو كنت نتمسخر معاك وشبيك؟ قالي موالفة تتفرجي مقاطع إباحية؟! قتلو لالا بصح.. قالي يمال وشنوووو.. طلعتي الفيدي و لا بعثهولك؟ قتلو لالا طلعتو وشبيك؟ قالي اجبدي تلفونك و وريلي منين طلعتيه، وليت نرجف جبدت التلفون قتلو وحدة صديقة بعثتهولي فالميسنجر و انا درتلك ترونسفار ليك.. علاش تقلقت ياك حنا متزوجين.. قالي متزوجين و هاد الأمور ما بيناتنا برك علاش حتى تحوسي على مقاطع إباحية.. راسك نطيرو فهمتي.. ترباي و احتارمي روحك راكي متزوجة.. الحرام انا ما نقبلوش.. إدا نفسك قامت على حاجة تقوليهالي و أنا نديرها معاك فالحلال بصح باش تروحي تعمري عينك و ترضي شهوتك بالحرام نفقسهالك قبل ما تشوف هداك الشي.. قتلو و الله ما نزيد نعاودها.. قالي وريلي منين درت ترونسفار لهداك الفيديو شكون لي بعثهولك؟ قتلو واحد ما بعثهولي انا طلعتو..قالي راكي تشوفي فيا بغل افتحي تشوفي الميسنجر.. بديت نرجف نحالي التلفون و قعد يقلب حتى صابها بلوكاها ديراكت طفى التلفون و خباه في جيبو منبعد قالي شوفي لوكان تزيد تاكسبتي وحدة كيما هادي راسك نطيرو، و عقوبة ليك ما كاش تلفون باش تولي ديري قدر لعمرك مرة اخرى.. طلع لفوق للشومبرة و خلاني مع روحي في موقف محرج وليت نبان شغل ميتة عل هداك الشي و انا كان قصدي برك نتمسخر معاه، طلعت للشومبرة صبتو يبدل قعدت نشوف فيه، قالي علاش راكي تتفرجي فيا كاش ما تبحرلك في وجهي؟ قتلو كنت نتمسخر معاك، قرب ليا وقف مقابلني و قالي تمسخري دوك نشوف.. قتلو ما فهمتش.. قالي ماشي عجبك الفيديو و طلعتيه عندك.. خرجي وش راهو يدور في راسك و ديريه معايا، قتلو صراع وشبيك ما تحرجنيش انا ما كانش قصدي هكدا، مد يديه على خصري حوطني بيديه و باس خدي قالي هاد الحوايج حرام تشوفيهم.. كي تشوفيهم يثيروك بالحرام و يديوك للغلاط بالحاجة..راكي فاهمتني.. كي تبعثلك كاش وحدة حوايج كيما هادو ابلوكيها ديراكت لخطر غايتها عيانة.. ما تقوليش ما نتأثرش لوكان تبداي تشوفي مشاهد كيما هادوك يبدا يجرجرك ابليس الله ينعلو و يخزية بلعقل بلعقل للحرام حتى يضيعك.. الفايسبوك عالم كبير ردي بالك كي تكوني دوري فيه، هزيت راسي حبط راسو باسني منبعد خرج فيا كامل الحوايج لي كنت نشوفهم حتى وليت نعيط و نقول التوبة ما نزيدش نعاود.