مراهقة والاربعيني بلهجة جزائرية

جزء السادس 💦

#المراهقة و الأربعيني:

#الجزء السادس:

ودعتهم و خرجت فتحلي صراع الباب تع الطونوبيل و حط يدو على ضهري و قالي اطلعي، الطونوبيل كانت عالية شويا طلعت و هو رفدلي العباية و دخلها و غلق الباب قعدت نخزر في دارنا و بكيت خفت إدا هادي آخر مرة رايحة نزيد نشوفها.
حكم هو الفولو و ديمارا و باباه كان قاعد قدامو و ملور كنت أنا و خوه نائل.
كي جزنا على دار سارة تفكرت كي كنت نروح و نجي معاها من المسيد لتم وين زادو دموعي حتى نطق خوه نائل قالي خلاص اختي وحدي الله و عطاني بابيي، زاد نطق الحاج باباهم قالي يا بنتي ياك ماراكيش رايحة بعيد من ليوم حنا أهلك.
و صراع قاعد غير ساكت و عاقد حواجبو و ينسف حتى لحقنا لوحد البراج الطريق مغلوقة تسمع غير لي كلاكسو و الناس مقلقة و هو بدا يخبط فالفولو و يسب و يعاير و يقول ما يخدموش خدمتهم و ماشي منظمين و واحد مافي بلاصتو و الحاج يقولو اصبر يا وليدي منك من الناس علاش القلق، نطق نائل قالو نجي نسوق في بلاصتك أبو حرب؟ ما واجبوش و أنا قلت في قلبي هداك وش خصني غير اسمو برك معركة هدا كيفاش رايحة تكون المعيشة معاه.
قعدنا حاصلين قريب ساعة و كي لحقنا لوين يسكنو تزير قلبي من الخوف و هو حبس و قال لنائل احبط افتح الباب.
دخل للڨاراج و قالي الحاج احبطي فتحت الباب و حبطت ورالي وين ندخل و أنا كلشي جديد عليا قابلوني زوج بيبان واحد كان مغلوق و نسمع فصوت رجال موراه و الباب الثاني يدخل للدار، قالي الحاج ادخلي منا تصيبي النسا، هوما دخلو للصالو و أنا قعدت واقفة فالكولوار و قدامي دروج و على يمينهم هول كبير فيه ممر صغير يدي للكوزينة و قدامها شومبرة مغلوقة و كاين زوج شنابر على اليسرى، انا هكداك واقفة حتى نسمع فوحدة قالت جابوها؟ انخلعت حتى خرجو النسا و العجوزة قالتلي ردي بالك تزلقي يا بنتي ارفدي عبايتك و ارواحي اقعدي هنا، ناضت وحدة فيهم عطاتني كرسي قعدت منبعد مرا كبيرة قالتلي ما كفاكمش وخدتوني في وليدي زايدة جاية بوجهك قلتلها ماشي أنا لي جيت هوما لي جابوني، بدات تسب و تعاير حتى وليت نبكي قالتلها الحاجة خلاص أم سعد مازال ما برد قلبك قالتلها والله ما يبرد قلبي حتى نذبح هد الارهابية اخت الارهابي.
دخل صراع مقلق و يخبط و موراه باباه و زوج خاوتو، النسا كي شافوه عاودو قعدو، راح غسل وجهو و الحاج يقولو ياوليدي هدن روحك وشبيك، خزر فيه قالو ايه عندك الحق تهدر دوك بعدما رميتو كلشي عليا و نتوما كل واحد نفسي نفسي سينو أنا وش دارهالي حتى ندخل لداري وحدة ما نعرف أصلها من فصلها، منبعد دار ليا صابني منحية الخمار عيط عليا قالي ديري خمارك على راسك و لا الإرهابي لاعبها شريف و مدين و ختو ماشي ساترة روحها.
لبست الخمار و أنا ميتة بالخوف ياربي وش راهو يستنى فيا ملي دخلت و انا نسمع غير فالزڨا و الكلام لي يجرح.
قاتلو الحاجة خلاص يا وليدي بركانا من هد الكلام هدا مكتوب الله، ربي قدرلكم باش خوك يموت و أنت تتزوجها قالها و أنا مكتوبي نطيح في وحدة ما علاباليش حتى وش تسوى وش فيها وش ما فيها لتم ما قدرتش نشد روحي دموعي شراشر و يابسة فبلاصتي من الخوف و نخزر فيه و هو يتعنكر فيا كي بدا يقرب مني وقفت و رجعت للور عمبالي رايح يضربني حتى عيط عليا و قالي احبسي كيما راكي و رمى يدو شد السلسلة لي فرقبتي قالي وشنو هادي قتلو قلادة الصليب جا يقطعها شديتها، قالي الصليب وش راهو يدير فرقبتك انطقييي، و هوما كامل يخزرو فيا مخلوعين، ناضت اختو قاتلو وش خداك صراع خليها قالها هيام بعدي من قدامي ما دخليش روحك منبعد قالي انطقي وش راهو يدير عندك قلتلو أنا مسيحية تشوكا قالي كيفاش؟! عاودي وش قلتي؟! قالي باباه كيفاش يابنتي ما فهمتش يتسمى أنت ماشي مسلمة؟ قتلو لالا ناض صراع يعيط قالو باباه اصبر يا وليدي خلينا نفهممو منبعد قالي كيفاش هدا ماشي مسلمة و هوما زوجوك بعقد شرعي و ماليك مسلمين؟ قتلو بابا مسلم و ماما مسيحية قالي و أنت على دين باباك و لا على دين يماك؟
قاطعو صراع قالو و كي قلتلكم لصقولنا وحدة بنت يماها و باباها ما علبالناش شكون ما امنتونيش.
حطيت يديا على ودنيا من الخوف وهو يصوغ هكداك جات ليا اختو حضنتني و ناضت تعيط الله أكبر عليكم الطفلة صغيرة من الصباح و انتم ارهابية ماشي معروف اصلها يا كدا يا كدا خافو ربي ماشي هكدا، قالها أم علي الله يسترك ما دخليش روحك قاتلو و الله ما صرات ما راكش جايب خبر لعمرك وش راك تقول راهي قد ولادك ايماجيني بنتك حلا طيح في نفس الموقف، الطفلة رايحة تموت من الخلعة وش بيكم؟ نطقت أم السعد قالتلها كيفاش محسوب خدعوه و زوجوه بوحدة كافرة و بالاك حتى راهي مفخخة خليونا نفتشوها، قالتلها و الله ما يمسها واحد و إدا راهي مجينيتكم أنا نديها لداري منها من ولادي تاكل تشرب و خليها تفخخني قلتلها و الله يا خالتي ما راني مفخخة قاتلي نوضي نوضي بنتي تروحي معايا انا نديك لعندي، قالها صراع قلتلك ما دخليش روحك و خليها، قالتلو ما نخليهاش و ادا حبيت تضربني اضربني، حرام عليك هدا أنت حاج بيت ربي دير هكدا يمال وش نستنى من لوخرين.
قال الحاج رايحين تهبلو الطفلة و دار لبنتو قالها هيام جيبي الطفلة بنتي و خلينا نفهمو حكايتها.
داوني لوحد الشومبرة و قالي الحاج فهمينا في حكايتك يا بنتي قتلو وش حايبين تعرفو بالضبط ناض يعيط صراع قالي واقيل نحلوك باش تهدري ياك قالو باباه شوف صراع سكتنا و إدا ما راكش حاملها نزوجها لواحد من ولاد عمومك و ماتزيدش تشوفها هنا فالدار، حك لحيتو و قالو كمل نشوفو أصلها و سكت.
دار ليا الحاج قالي احكيلنا كيفاش باباك مسلم و انت مسيحية؟!
حكيتلهم بالتفصيل الحكاية لي حكيتهالكم في الجزء الاول من القصة.
كي كملت قالي حب يقول هكدا ما عندكمش اعمام قتلو إيه تبراو من بابا كي اسلم اعتبروه كفر قالي صحا و أنت علاش ما اسلمتيش ادا باباك اسلم؟ قتلو ماما بقات على دينها و رباتني عليه، خزر في صراع قالو في هد الحالة العقد باطل؟ قالو ما علاباليش أصلا أنا مانيش مستعرف بالعقد لي دارو هداك الارهابي دوك نروح نجيب شيخ باش يعاود يجددلنا العقد قالو إيه روح قبل ما يطيح الليل، جا نايض منبعد دار لاختو هيام قالها فرشيلها في المخزن ممنوع تختلط مع ولادي قاتلو بناقص إدا هكدا خليني نديها لعندي خير ما رجعلهاش غير فتح الباب و راح دخلت مرت باباه أم سعد و قاعدة تكيل فيا ملفوق لتحت حبت تاكلني، نطقت الحاجة يمات صراع قاتلي قوليلي بنتي انت عربية؟ قلتلها لالا بابا تركماني و ماما كردية قاتلي باينين في وجوهكم ماشي عرب قالتلها بنتها هيام إيه شابة الله يبارك ربي يحفظها، منبعد أم سعد بدات ترمي فالهدرة تطعن في نسبي حبستها الحاجة قالتلها خافي مولاك بركاي ما تطعني فأعراض الناس قالتلها راني نشوف فيكم كيفاش نسيتو دم وليدي بلخف و من مقبيل و نتوما تدعيولها و تبربرو فيها و الله غير نقلب الدنيا عليكم و نذبحها، قالتلها الحاجة إدا كان خوها صح متورط بدم وليدك عابد الله يرحمو روحي  اذبحيه هو ماشي هي و لا شفتي روحك ما تقدريش لهداك الإرهابي جايا تستقواي على طفلة صغيرة قالتلها علاش هي ماشي إرهابية؟ قالتلها هيام حرام عليك راهي طفلة صغيرة فوسطنا كيفاش حبيتي ربي يرحمنا ادا ما رحمناهاش، قالتلها هادي بذرة تع حرام دمها ناجس بركاي ما دافعي عليها و قلبي مازالو محروق على وليدي الله يرحمو قالتلها أنا نسكت خير لخطر انت لي يهدر معاك غالط، قالتلها راني نشوف فيك رجعتي ما تقادرينيش بصح دوك نهدر مع باباك هو يدبر راسو معاك و بدات تعيط أبو صرراااع وين راك يا أبو صراااع، جا الحاج قالهم وش كاين تان قالتلو شوف ولادك كيفاش رجعو ما يقادرونيش و أنا قلبي محروق على وليدي، صراع من جيه و هيام من جيه يرضيك هد الشي؟ و هيام تقولهم والله ما قلت والو و الحاج بد يعيط عليها غاضتني هدا كامل بسبابي، هي تبكي و خوها صراع دخل كي شافها هكداك انخلع قالها أم علي وش بيك علاش راكي تبكي؟! قالتلو يماه ما كاين والو هي و باباها برك ما صرا والو.
قالها معليش بصح فهموني وش صرا، قالتلو و الله يا خويا غير قلتلها برك خلي الطفلة في حالها، تهدر مسكينة و تمسح في دموعها، دار لمرت باباه قالها شوفي أم سعد الطفلة راهي على ذمتي ما عندو ما دخلك فيها و هيام تزيدي تدناي ليها الدار نقلبها على ريسانكم و دار ليا عيط قالي نوضي أنت قفزت من صوتو، داتني الحاجة لشومبرة وحدوخرا دخل الشيخ و عاود عقد علينا بموافقتي و خرج و هو قال لأختو أم علي فرشيلها في المخزن قالتلو و الله غير حرام هد الشي خليها ترقد مع ولادنا قالها هيااااام سمعتيني وش قلت و لا لالا ممنوع ترقد مع ولادي و لا تختلط بيهم و ما تناقشينيش خير ملي نولي ما نعرفش وش ندير.
داتني للمخزن جاي قدام الكوزينة فيه مواد غذائية فرشتلي فيه و سلمت على راسي و قعدت معايا و أنا دموعي يطيحو قالتلي ما تبكيش تعيشي بنتي والله هو قلبو مليح برك شويا مقلق، بريود و جوز و يولي مليح معاك، هزيت راسي باستني و راحت و أنا قعدت نبكي على زهري المعوج وش درت حتى يصرالي هد الشي كامل. #يتبع