مراهقة والاربعيني بلهجة جزائرية

#منشور توضيح في مايخص الرواية

[البنات قبل ما نكمل يلزم نوضحلكم بعض الامور...]

فالفترة لي كانت ليليان عند دار خالها كانت صاحبتها دايمن تعلق لرواية لزينب ماجد بعنوان (الجحيم) و تقولها صاحبتي عندها قصة حبت تحكيهالك جاوبي عليها، قالتلها زينب ماجد طاڨيها فالتعليق باش نعرف الكونت ديالها و نراسلها.. و من كثرة التعليقات كانت زينب تنسى ترجع للتعليق ديالها و كل مرة كانت تعاودها نفس التعليق حتى وحد المرة زعفت كتبتلها فالتعليق قالتلها وش بيك متكبرة هكدا؟ قتلك برك ردي على صاحبتي ماراهيش فالڨروب و إدا ما راكيش حايبا قوليلي نروح نشوف كاتبة وحدوخرا.. قالتلها طاڨيها دوك ما عرفتش الكونت ديالها بلخف طاڨات ليليان كان الكونت ديالها القديم وسمو (تمنيت الاحبهم ما يبعدون) ، دخلت للكونت صابتها باعثتلها بزاف ليميساج..
بعثت زينب جام لليليان و قالتلي ابعثيلي قصتك نقراها.. كي بعثتلها البداية ما تقبلتهاش عمبالها حكايتها تع ثار و حسيفة و صراع راهي معاه أسيرة، قالتلها ليليان لالا راجلي و شرحتلها كيفاش صرات حتى راحت لعندو..  قالتلها كملي..
مع لول كانت ليليان تكتب و تبان بلي مجروحة و كل حادثة تقولها عمري ما ننسى هداك النهار.. و تقولها كي نتفكر كي دارلي كدا و كدا نحقد عليه بالزيادة..
خلاتها الكاتبة تفرغ قلبها بصح كانت تلاحظ بلي هو يضربها و يقسى عليها و بكلمة تقنع.. قالتلها كيفاش راكي متحملة يضربك و تحبيه؟ تقولها ليليان هو صح مقلق بصح حنين و يندم و يحاسب روحو و يعرف كيفاش يصلح غلطتو و يرضيني.. قالتلها بصح هدا ضربة من ضرباتو قادر يقيسلك بلاصة حساسة يعميك و لا يعوقك.. قالتلها لالا هادي قبل ما يتزوجني  فعليا منبعد خلاص تبدل..
الكاتبة لاحظت بلي ليليان كان مقنوطة من صراع بصح كي هي تهدر عليه ما تقبلش و ما تحبش عليه لدرجة تجبدو عذر و تبرير من تحت لرض.. و كي تقولها بصح هدا راجل همجي و متخلف الناس وصلت للقمر و هو يمشي بهاد العقلية تتقلق، و كي تقولها علاش راكي دافعي عليه أنا ما بيا والو غضتيني تقولها نحبو
المهم كي بعثتلها المحاثات لي ما بينها و بين صراع و التسجيلات الصوتية (رايحة نحطلكم البعض الرسائل في التعليقات)  عرفتهم بلي في زوج متيقرين و دافعين كوارطهم.. ما يتشابهو في حتى حاجة بصح يتوالمو عندهم تركيبة غريبة ههههه.. و اكتشفت بلي صراع يحبها حب خيالي و كي سمعت تسجيلاتو الصوتية و لهفتو عليها و هو يحلل فيها و يسعى غير باش يرضيها زادت تأكدت سورتو كي حكاتلها على الديڨات لي ديرهملو و هو حاملها..
ليليان كي كملت حكاتلها قصتها و كانت تتراسل مع صراع و يحاول يقنعها باش ترجع، طلبت من زينب ماجد باش دبر عليها وش دير و كيفاش تهدر معاه هي كانت حايبا ترجع و متوحشاتو و تموت على التراب لي تمشي عليه بصح حبت ترجع بضمانات و هو بلاعطي كبير و شارب عقلو متربي في وسط تع ميليتار و هي مسكينة نية الله في خلقه بزوج كلمات يحطها تحت جناحو.. يمال كانت ليليان تبعث لزينب وش يكتبلها و زينب تكتبلها وش تقولو و هي تكوبيي و تبعثلو، صراع فاق بلي ماشي كلامها قالها نحط يدي فالنار ادا ماشي واحد راهو قدامك و يوريلك وش تهدري هههههههه...
مع لخر تفاهمو و ليليان رجعت لصراع و جابت معاه طفل و حاليا راهي تكمل في قرايتها في الموصل (تعديل آسفة الموصل ماشي تركيا) راهي واصلة للجامعة.. و كاين ناس مقربين منها قالو بلي في رمضان لي فات طرحت بيبي..
المفيد مور ما رجعت ليليان الكاتبة زينب ماجد زادت جزء ثالث من مخيلتها و هو لي رايحة نبدا نترجمهولكم .. و صراع كي فاق بالرواية عيط للكاتبة فالتلفون هددها و قالها تسحب الرواية فورا و هي قالتلو ماكاش كيفاش فاتت انتشرت و كانت بصدد كتابة جزء رابع تان من مخيلتها بصح مور الاتصال تع صراع حبست كلشي..
كاين بزاف ناس استغلو الانتشار الواسع للحكاية و دارو نهايات حزينة و مختلفة للرواية على الفايسبوك و اليوتيوب و الواتباد و.... و.... و... و كاين حتى لي اقتبسوا من الرواية قصص و نسبوها ليهم على أساس قصصهم الشخصية..
ليليان عندها حساب شخصي باسم كاميليا أحمد و عندها ڨروب بريفي رايحة نحاول نحط جميع المعلومات لي عندي فالتعليقات بكل أمانة..