مراهقة والاربعيني بلهجة جزائرية

69 والاخير

#المراهقة و الأربعيني:

#الجزء69 و الاخير:

نائل كي شاف الشومبرة مازالها جديدة قالو إدا ما تحتاجهاش اعطيهالنا شومبرتنا ماخلاو الدراري فيها ما يصلح.. قالو صراع راهي قدامك اديها..
عمومهم جاو يدخلو فالصلح بصح كي عرفوا وش دارت إخلاص حشموا ما صابوا ما يهدرو و جبدو رواحتيهم من الحكاية..
سمانة مور الطلاق كان عمهم عزام داير وليمة عرضنا رحنا صبتها لتم هي و خياتها لوكان صابوا ياكلوني، أنا قعدت لاصقة في هيام فالكوزينة نخدم معاها.. دخلت خت أم سعد لي هي خالة إخلاص خزرت فيا و قالت نحتاج واحد يعيطلي لأبو حرب عندي هدرة معاه و بعثتلو شويا و دخل قالها انعم خالتي.. قالتلو يا وليدي حبيت نهدر معاك وحدك لداخل.. قالها الدنيا لداخل راهي غير نسا ارواحي معايا هنا.. شفنا إخلاص و ختها لحقوهم يتصنتو و هيام نغزتني باش نروحو نسمعو.. قالتلو جيت قاصداتك في حاجة و إن شاء الله ما تردنيش.. قالها إدا نقدر ماشي مشكل.. شاف إخلاص دور وجهو.. قالتلو شوف ياوليدي والله غير حالتها تشف.. رجعها و إدا زادت غلطت أنا لي نطلقها منك.. قالها شوفي خالتي لوكان تطلبي عينيا ماشي خسارة فيك بصح أنا و ياها خلاص ما بيناتنا المكتوب.. طاحت إخلاص عند رجليه تحلل و تبكي قالتلو غلطت اسمحلي ما تكسرنيش و يقولو عليا مطلقة.. جبد روحو عليها هي تبكي و تحلل و خالتها كيف كيف قالها اسمحيلي خالتي ماكاش مكتوب.. نحات خمارها و قالتلو دير قدر لهاد الشيب و ما تردنيش.. عاود لبسلها خمارها و قالها و الله لي تحتاجيها راني هنا بصح هاد الشي فوق طاقتي أنا من لول ما كنتش قابلها و حتموها عليا بالسيف و صارحتها ملول بلي ترجع لدارهم ليوم ولا غدوا ما نكملش  معاها هدا وش كتب ربي.  و جبد راس إخلاص سلم على راسها قالها من ليوم راهي ختي و عفى الله عما سلف و لي تحتاجها كيما هي كيما هيام حاجة ما تخصها إن شاء الله و خلاهم و خرج..
جات ليا خت إخلاص قالتلي كلشي من تحت راسك يا المسمومة الله لا تربحك.. جبدتها هيام عليا و قالتلها احشمي شويا هو ملول ماشي قابلها و لصقت روحها و طيحت بقيمتها و كرامتها.. تزايدو بالكلام و علات صواتهم حتى جاو الرجال.. عيط علينا صراع قالنا يلا وجدوا رواحتيكم باش نوصلكم للدار ما خصوناش مشاكل النسا باش يفسدو ما بين لعموم.. حنا دخلنا نلبسو و تتلاح فيا إخلاص حكمتني من شعري و تصوغ طلقتيني يا القح.... طلقتيني.. جبدوها عليا نضت نعيط عليها قلتلها ماشي أنا لي ديتهولك أنت لي جيتي ديتيه من عندي و حرقتي قلبي و درتي كلشي باش تفرقينا بصح نسيتي بلي لي ما عندو أب عندو رب ياخدولو حقو فالظالمين.. لبست خماري و أنا نبكي و خرجت و هي تهدد من مورايا قالتلي لوكان ما نخرجكش من هديك الدار مارانيش إخلاص و اشفاي على كلامي مليح..
طلعنا فالطونوبيل طريق كاملة و أنا نبكي وصلنا للدار انا طلعت لشومبرتي رقدت و هو رجع لدار عمو و كي جا فالليل ما قال والو، جيت نشكيلو قالي الموضوع انتهى ولي كنتي حايبتها صرات ياك خلاص طلقتها.. انسايها و ردي بالك تزيدي تشكي الدار قعدت ليك وحدك اشبعي بيها ماكان لا إخلاص لا أم سعد لا الحاج..
غدوا منداك مور الغدا كنا قاعدين فالكوزينة و الحاجة تشرب فلاتاي، كنت نمسح فالبلارات تع ليزيبيس و نور تنقي فالفريحيدار، دخل الحاج زعفان و يديه مور ظهرو قعد وجدتلو لاتاي.. هو صح راح يعيش عند سعد بصح كليوم يجوز علينا الصباح على ال8 يفطر مع الحاجة و يقعد رايح جاي شيعة برك عايش لهيه.. قال للحاجة شوفي وش صرا فينا كي دخل الشيطان ما بيناتنا و شاف فيا.. اهدري مع وليدك يرجع بنت عمو عيب عليه راهي دمو و لحمو.. قالتلو الحاجة وعلاش انت على فمك الحنة اهدر معاه أنت؟ قالها صار هكدا حتى أنت وليتي تستقواي بوليدك و تعرفي تهدري؟ قالتلو راني نهدر فالحق.. قالها الحق أنكم تذلوني أنت و وليدك و تعميره أنت و هاد المصفارة؟ قالتلو هادا الموجود لي عجبو مرحبا و لي ما عجبوش ربي يسهل عليه عيينا من المشاكل حتى الذرية ما ولاتش تهمني خليه يقعد مع هاد اليتيمة جابتلو الحمد لله ما جابتلوش لحكمة لا يعلمها إلا الله ما نحتاج لا إخلاص لا جماعتها..
جيت نمدلو كاس لاتاي ناض بالزعاف خبطني ليدي و قالي و الله غير أنا لي نخليه يطلقك ما غلطتش أم سعد كي قالت عليك بلا أصل.. قالتلو الحاجة حرام عليك هدا أنت حاج بيت ربي تطعن في شرف أهلها؟! تزايدو فالكلام و أنا خليتهم و خرجت للجنان نسقي و نرجف من كلامو حتى دخلت صراع على غفلة حوطني بيديه ملور و همسلي في ودني قالي فواش راهي غايسة الشابة ديالي؟ قتلو مانيش غايسة بصح باباك جا يهدر مع الحاجة باش تقنعك ترجع إخلاص و راهم يداوسو.. قالي طفي العين و ارواحي سقيلي نتغدا و نشوفو حكاية إخلاص هادي لي ما حبتش تخلاص.. دخل قبلي سلم على باباه و أنا رحت نسقيلو باش ياكل و نور كي شافت الحالة ما تعجبش راحت للهول، قالتلي الحاجة جبتلها دواها تع لاطونسيو و نسمع في صراع يقول و الله ما ترجع عندي لوكان نعرفها تولي ملك.. دخلت نجيب الما للحاجة قالو الحاج عيب عليك راجل طول و عرض تمشي فيك وحدة كيما هادي كيما تحب.. بنت عمك تسوا كثر من هادي لي ما تستحيش في عوض راك بطزينة دراري مخسر عمرك مع وحدة بلا أصل.. قتلو أصلي يشرفكم و يشرف آخر واحد في عشيرتكم، يا خسارة الوقت لي ضيعتو و انا عايشة معاكم نتوما ماشي من ثوبي.. قالي صراع خلاااص أسكتي.. كملت نهدر قتلو وش جاب لجاب غير الدنيا بنت الكلب دارت عليا و رماتني لعندكم باش نعيش مذلولة كي ما عندي حتى واحد.. قالي بلعي فمكككك.. قتلو ما نبلعش يانامار مانيش جارية عند باباك ولا عندكم باش لي يجي يضرب و يغلط و يطعني في شرفي، يعاير فيك كي تحبني و هو لوكان جا فيه الخير ما يخليش أم سعد تمشيه كيما تحب سنين و دوك جاي يعرض علينا عيب خلاص خليه يحترم شيبتو كرهنا.. ما لحقتش نرفع عيني حتى  خبط عليا السنيوة و حكمني من شعري و يجبد عليا بالكفوف.. جات نور و الحاجة يجريو يسلكوني منو و الحاج يقولو هاي ليك عاودلها التربية ما تحشمش.. طبعتني الحاجة للهول و قالتلي اطلعي بجاه ربي الدار هادي مكتوب عليها المشاكل.. طلعت لشومبرتي رميت روحي على البونك و نبكي منبعد انتبهت بلي رجلي انجرحت نكون عفست على الطبسي كي تكسر فالقاعة و تالمو كان دمي سخون ما حسيتش.. ربطتها و قعدت نخزر في روحي فالمرايا ما عرفتش روحي حبطت ب25 كيلو وليت نخلع غاضتني عمري حتى وليت نبكي كيفاش كنت و كيفاش وليت.. عيطت لخالي نبكي بالشهقة شكيتلو، نص ساعة و كان عندي ضارب هو و صراع كي شافني انخلع قالي و الله و تزيدي تقعدي هنا غير نتبرا منك.. طلعت  رفدت ذهبي و دراهمي و العقد تع الدار لي  كتبها باسمي و حبطت و صراع هبل كي شافني خرجت و قالي و الله يا ليليان و تروحي ما تزيدي تدخلي هاد الدار.. قتلو ان شاء الله تتحرق هي بلي فيها و ادا عندك ذرة كرامة طلقني.. رحت مع خالي طريق كاملة و شريط حياتي معاه يجوز قدام عينيا.. وصلنا للدار موراها بسمانة رفعت دعوى خلع عليه و هو عيط لخالي يسب و يعيط و قالو غدوا نجي ندي مرتي و نشوف شكون يقدر فيكم يوقف في وجهي ولا خالي عيط لعمومي لي عمري لا شفتهم في حياتي و حكالهم كلشي عليا و قالهم أنا راجلها ما نقدرلوش تحملو مسؤولية بنت خوكم.. فالليل جا عمي وسمو ميخائيل يتشبه بزاف لبابا، داني لدارو رحبوا بيا و أول مرة نحس بانتمائي لأهلي هادو لي يشبهولي ماشي صراع و أهلو ، عمي هدا عندو 3 بنات و زوج ولاد واحد عايش في أمريكا و لوخر في ألمانيا هربوا من الارهاب..  سقساني على ديني قتلو ما بدلتوش قالي كيفاش خوك مسلم و انت مسيحية قتلو لخطر كل واحد فينا رباتو يماه على دينها..
غدوا منداك عيطلنا خالي قال بلي راح ليا صراع دار حالة بالتهديد قالو عمي قولو راهي في تركيا عند خوها.. قالو و الله و نعرف بلي مازالها فالعراق غير تخلصوها، لتم عمي خاف و قالي أنا عندي بنات صغار ما خصونيش مشاكل ندبرلك النيميرو تع يحي يحي يديك.. و كيما كان الحال عيطلو و حكالو قالو غدوا الصباح وصلهالي للبلاصة الفلانية لخطر ما نقدرش ندخل للبلاد و ملتم نديها.. مع الفجر داني عمي و تلاقيت مع يحي بعد 5 سنين فراق نسيت كامل وش دار فيا و حضنتو و نبكي حتى هو بكا.. داني فالطونوبيل لتركيا للبارطما ديالو.. كان ينوض الصباح يخدم فالمخبز و يدخل يرقد ساعة و مع العصر يروح يخدم فالمكتبة ما يدخلش حتى نص ليل.. جوزنا يمات شابين استرجعنا ذكرياتنا و حكالي على الارهاب قالي ماكاش علبالي بلي هكداك كنت طامع نديرو دولة اسلامية مستقلة منبعد ظهرت بلي كانت لعبة سياسية عندها اهداف اخرى..
كان كي يخرج يحي نحبط للشارع ندور شفت حياة وحدوخرا و ناس وحدوخرين بصح فالليل يحكمني الحنين و الوحش لصراع لشومبرتي لبلاصتي.. نشعل غنية يوسف هيثم (اضعف قدامك) و نبكي مخ راسي..
مرة كنت نڨصر مع علي فالميسنجر فليميساج لخطر غير هو لي خليت التواصل معاه لوخرين كامل كوبيت معاهم الكونتاكت.. حتى عيطلي آبال استغربت لخطر موالف يكتب برك رفدت عليه جاني صوت صراع قالي ألو ليليان.. بلعت لساني قعدت ساكتة.. قالي اهدري ولا راكي خايفة؟ قتلو وش تحتاج؟ قالي وين راكي؟ قتلو أخطيني صراع.. قالي كيفاش نخطيك هبلتي انت لا ليلي ليل و لا نهاري نهار من فراقك علاش رحتي؟ قتلو منك.. قالي لالا من غباءك نسيتي وش هدرتي مع بابا؟ قتلو و دوك وش تحتاج؟ قالي قوليلي وين راكي نجي نديك.. قتلو راني في تركيا.. قالي راكي تكدبي.. بعثتلو فيديو و أنا نمشي فالثلج و نصور فالشوارع.. كي شافها تنهد و قالي و الله و تكوني فالصين غير نجيبك.. قتلو إنساني و طلقني.. قالي ما نطلقكش من نيتك نسمح فيك أنت مرتي و بنتي..
قعدت يهدر معايا مام أنا حنيت ليه بصح مستحيل نرجعلو سورتو بعدما شفت الحياة في تركيا كيفاش.. هكداك و قعدنا نهدرو فالتلفون و نتراسلو يوميا و نفتحو الكاميرا نشوفو بعضانا و نرقدو بلاما نغلقوها تقول عشاق ماشي متزوجين بصح كي يقولي قوليلي وين راكي بالضبط ما نقبلش..
انتبهت بلي عندي روطار تع 15 يوم عيطت ليحي جابلي تاست و ظهرت بالحمل طرت من الفرحة و عيطت سور بلاص لصراع نوضتو من الرقاد و فرحتو قفز من فراشو ما آمنش و سمعتو يجري فالدروج فتح الباب على يماه و قالها يما يما ليليان راهي حامل فرحت بزاف و جوزهالي هدرت معايا تحمد في ربي و نصحتني نحافظ على روحي و قعدنا نضحكو و نقصرو و قالي نبعثلك الدراهم ما قبلتش لخطر علبالي يحوس يعرف وين راني.. قعدنا هكدا نحكيو يوميا حتى وحد النهار بعثولي فالميسنجر كتبولي (عندي موضوع مهم معاك) كتبتلها شكون انت؟ قالتلي نقدر نعيطلك؟ قلتلها قوليلي شكون أنت منبعد ساهل.. قالتلي ما يهمش تعرفي شكون أنا كاينة حاجة تتعلق براجلك يلزم نقولهالك و نروح.. كي عرفت بلي صراع داخل فالوسط خفت عيطتلها رفدتلي قلتلي شكون انت؟ قالتلي أنت نية و راقدة على ودنيك.. قلتلها وعلاش؟ و زيد شكون انت؟ قالتلي ما يهمش انا عيطتلك باش نقولك بلي راجلك متزوج وحدة من العاصمة و عندو معاها طفلة.. قلتلها وش راكي تقولي انت؟! قالتلي و الله لي عندي قلتهولك و زيد شاريلها دار و في كل شهر يقعد عندها 4 أيام و يحبها و هي أستاذة تقري و مطلقة عندها 3 دراري.. بعثتلي تصاور هي و ياه فالطونوبيل شابة بزاف و حاط وليدها في حضنو لتم هبلت بالبكا.. عاودت بعثتلو التصاور غير شافهم قالي منين جبتيهم؟ قتلو شكون هادي؟ قالي هادي مرتي ميادة بصح اسمعيني ليليان.. بديت نصوغ و نسب فيه و هو يعيط عليا.. قتلو وقتاش تزوجتها هادي؟ قالي كي كنتو فالأردن مرا محتاجة تزوجتها.. قتلو ياك مطلقة و ولادها عندهم باباهم الله ينعل الساعة لي عرفتك فيها يا حيوان كل همك نزواتك.. قالي اترباي و اعرفي وش راكي تخرجي من فمك و زيد هاد الامر ماشي غير من ليوم ولا لبارح و ما يربطني بيها غير الفاتحة و مرتي كيما هي كيما انت ماخنتكش هدا عمل خير و ربي سبحانو محلل ربعة.. ما قبلتش أم مصطفى و اسمهان و إخلاص طلقتهم وين بيها ياك ماراني مقصر معاك بوالو حاجة وحدوخرا ما تهمكش.. قتلو الله ينعلك و ينعل منين خرجت و ينعل النهار لي شفتك فيه يا حيوان.. أنا شبيت و هو ناض يعيط و يهدد طفيت التلفون و رميتو بكيت مخ راسي.. موراها عيطت لعلي و هيام حكاتلي بلي تزوج بيها قبل إخلاص و غير هي لي علابالها.. لتم طويت صفحة صراع ربي فتحلي باب ثانية في تركيا علاش حتى نرجعلو..
بدلت النيميرو ديالي و الكونت فايسبوك و قطعت اتصالاتي معاهم كامل و هو كل يوم يهدد خالي باش يقولو وين راني قالو داها خوها و ما نعرفش وين يسكن بالضبط في تركيا.. سمعت بلي مرض جاتو افيسي دخل السبيطار قريب مات بصح ما حنش قلبي عليه.. درت كوراج و تبعت كلام الطبيبة بالحرف الواحد باش نحافظ على وليدي.. ما كنتش نفهملها بصح جارة يحي سورية وسمها ريمة و في نفس الوقت حبيبتو كانت تروح معايا و ترجملي..
ثبت الحمل و بديت نثقال و صراع و أهلو كل يوم يبوانتيو عند خالي و يهددو باش يدي الطفل كي يزيد..
لحق وقت الزيادة و داوني يحي و ريمة للسبيطار و أنا نعيط غير باسم صراع و كي جيت نزيد نعيط و نقول الحقني صرااااع رايحة نمووووت.. يومين و أنا نسوفري حتى دارولي لانيستيزي لوكال و كي شفت وليدي قدامي تبسمت و بكيت.. تمنيت لوكان كان معايا صراع و باس راسي و حضن وليدو و شفت الفرحة في عينيه لي ستناها سنين بصح ربي سبحانو كتبلي الطفل هدا ليا وحدي واحد ما يشاركني فيه، عوضني بيه على الشي لي قاسيتو.. قالتلي ريمة انساي كلشي و شوفي في وليدك و خمي في روحك عيشي حياتك و رانا معاك ما نخليوكش.. و قالتلي وش تسمي وليدك؟ قلتلها ما نعرف بصح صراع كان حب يسمي وليدو (حرب) .. قالتلي منيتك؟! طفل صغير جاي للدنيا تبدايهالو لهاد الأسماوات تع العنف؟! قلتلها نسميه آدم؟ قالتلي هدا اسم شباب ان شاء الله يتربى في عزك..
قعدت نخزر في وليدي و نتبسم حتى نسيت كلشي حوست على ملامح صراع فيه بصح كان يشبهلي ليا حتى حسيتو مخلوق ليا برك فرحت بيه بزاف و رجع هو كلشي في حياتي..
كملت نفاسي و رجعت للبلاد قدام دار خالي عند فاميلة ماما.. ما رجعتش لدار خالي خفت يحكمني صراع.. مشيت في ورق الطلاق ما حبش يطلق حتى نمدلو الطفل و أنا رفضت.. حب يشوفو برك رفضت خفت يديهولي و نموت.. ما خلا حتى بلاصة حوس فيها علينا ما صابناش.. طلبني لبيت الطاعة و رفضت و عاودت رفع دعوى خلع و تنازلت على كلشي و طلقت..
خلاص الكابوس لي وسمو صراع و خلاصت آلامي و مخاوفي و قررت نرجع لتركيا و نبدا حياة جديدة مع وليدي و نعفس على قلبي لي يتوحشو و يحن ليه كل ليلة.. هادي هي الدنيا إما أن تكون أنت او تكون كما يكونون.. !

#النهاية