مراهقة والاربعيني بلهجة جزائرية

50

#المراهقة و الأربعيني:

#الجزء50:

بقيت نمشي نمشي و نتمتم كي وصلت للشارع فقت لعمري.. وين نروح؟ قعدت نشوف من و من منبعد قلت نروح لدار هيام و هي تعيط لخالي يجي يديني.. رحت كي وصلت دقدقت فالباب ساعة باش سمعتني خرجت طافية من الرقاد كي شافتني تشوكات قالتلي غير لخير؟! قلتلها ما نزيدش نرجع لعند خوك عيطيلي لخالي يجي يديني.. قالتلي وشنو؟! ادخلي ادخلي.. دخلت و بقيت واقفة فالڨاراج قلتلها عيطيلو مانيش حايبا نقعد هنايا كرهت رايحة نطرطق.. قالتلي صراع علبالو بلي خرجتي؟ قلتلها لالا و أصلا رايحة نطلب منو يطلقني و ما يدخلش روحو فيا ياك أنا بنت كلي و بنت حرام.. قالتلي خرجت بلا واحد ما علبالو؟ قلتلها إيه و...... قالتلي اششششت نجيب عبايتي و نرجعك حبيتي خالك يجي ليك لتم يلا يلا .. راحت لبست عبايتها بلخف و تمشي فيا.. قلتلها أم علي و الله غير كرهت مانيش حايبا نرجع يطلقني.. قالتي نوصلو لتم منبعد نتفاهمو امشي برك امشي [ الحاجة لي حيرتني خالها راحت معاه من قبل زعما ما عندهاش النيميرو ديالو حتى تروح لهيام باش تعيطلو باش يجي يديها؟! علاش السينيما هادي كامل ولا تحب تتحلل؟! و ماشي كيما كان صراع مفقود ما حبش يديها معاه و قالها حتى يعطيوك حقك تع الورث؟! ]
داتني للدار ما صبناش طونوبيلة صراع يعني مازال ما جا.. نحاتلي الحجاب و الفاليزا في الڨاراج و خباتهم.. دخلنا صبناهم مازالهم كامل راقدين طلعنا للشومبرة قعدت نبكي قلتلها مانيش مجبورة باش نعيش هنا.. على والو ننسب و ننهان ما نقدرش نزيد نحمل كرههههت.. قالتلي فهميتي وش صرا ياك البارح خليتكم لاباس عليكم.. قلتلها خبزتي مع خوك خلاصت هنا تحبس.. كل يوم يسبني  و انا تحملت فراقو فالغربة و تحملت أهلو في غيابو و تحملت مرضو مور ما رجع من عند الارهاب.. خلاص عييت ما نقدرش نزيد نحمل كثر يا ناس كرهت يا نروح من هاد الدار يا ندير حاجة في عمري.. قالتللي استهدي بالرحمن و اذكري الله واتعوذي من ابليس.. لوكان كامل الناس تاخذ  قراراتها في وقت الزعاف لوكان راهم كامل خربو ديورهم.. وين تروحي ريحي و استري على روحك و الله غير يحبك و يعشق التراب لي تمشي عليه وين رايحة تصيبي حب كيما حبو ليك؟ قلتلها وش من حب أم علي و هو يسب في أهلي و يقولي بنت الكلب و بنت الحرام، لي يحب ما يآذيش و هو آذاني بزاااف.. قالتلي معليه دوك تهدني و ما يكون غير لخير إن شاء الله.. زدتو داوستو على جال كي جا بابا؟ قلتلها لالا حكاية ما بيني و بينو.. قالتلي هدني روحك و ارتاحي امشي نروحو نفطرو و ربي يعملها تاويل.. قلتلها لالا انا نحوس تعاونيني باش نروح من هنا، قالتلي ما تكونيش أنانية دوك ما يقولوش حكاية ما بيناتهم يقولو زعفت كي جاب أهلو و تولي تباني أنت لي تفرقي ما بين اللحم و العظم.. راجلك غلط معاك عاقبيه داخل دارك  ماشي خارجة و مخليتها لأم سعد.. الرجال هكدا كامل جيهم ساعتهم كي يتقلقو ما يعرفوش يهدرو.. ارفدوا بعضاكم كي يتقلق واحد فيكم لوخر يجوزلو و عمبالك دايما الحالة حلوى هادي هي الدنيا مينداك و لواحد يذوق المر.. و زيد كي قالك بنت الكلب معنتها صح باباك الله يرحمو كلب؟ و كي يقولك عينيا نعطيهملك زعما بالصح رايح يعطيهملك؟ هادي هدرة لسان خطرا تكون حلوى و خطرا تكون مرة.. ساعة ناقصة و جازت دوك يتهدن و يجي ليك يطلب السماح و اتفاهمي معاهم و وريلو حدودو.. المرأ الصالحة تعلم راجلها ماشي تهرب منو.. ناس زمان يقولو وليدك و ما تربي و راجلك و ما تعلمي..
ما تقوليش ما يتعلمش و الله يا أبو حرب ما كان هكدا.. ما يستعرف بهدرة مرا ما يعبرها.. ماشي علمتيه يحتارمك؟ ما علمتيهش يحبس الضرب؟ اصبري معاه و ربي يعملها تاويل امشي معايا تفطري و الله غير دايراتك كي بنتي ماشي كي اختي و جامي عاملتك على أساس مرت خويا..
حبطت فطرت أنا و ياها و هي تنصح و تفهمني كيفاش نتعامل معاه.. ناضت الحاجة إستغربت كي شافتها قالتلها صباح الخير بنتي ليوم بكرتي، راحت باست راسها و قالتلها صباح الخير يما ما كاين والو وقفتيلي فالمنام قعد بالي عندك جيت نتفاقدك صبتك راقدة، كيفاش راكي؟ قالتلها الحمد لله ما تقلقيش عليا راني مليحة..
الحاجة صدقت الفيلم.. حطينا الفطور جا الحاج و أم سعد و نور و الدراري يفطرو و قعدو يڨصرو.. جاز صراع سلم عليهم من فوق نيفو و قعد، قالو الحاج خير وليدي ما راكش في حوالك، قالو ما بيني والو بابا  الدوخة في راسي.. شر الحاج لنور باش دخل ولادها للشومبرة ينقصو الحس.. سقساتو الحاجة ادا فطر ما ردش قعد محبط راسو و يحك في جبهتو بيديه.. طلعت لشومبرتي شويا و دخل مورايا لا سلام لا كلام راح قبالة للخزانة جبد حوايجو باش يبدل منبعد شاف فيا صابني قاعدة قالي ما تنوضيش تحطيلي نفطر و لا حتى ندوموندي؟ رحت ليا قلتلو حبيت نهدر معاك، قالي ما رانيش حايب نسمع احبطي يلا..  قلتلو طلقني.. قالي باستهزاء انعم؟ قلتلو طلقني هنا تحبس ارحم نفسك و ارحمني و خلينا نتهناو.. قالي هادي حكاية جديدة! قتلو ما نقدرش نكمل معاك حبيت نشوف حياتي لوقتاش نبقى نعاني و ما تقوليش مانيش مقصر معاك و لا غالط في حقك.. الدنيا ماشي غير دراهم و خرجات... قالي يمال وشنو يا لالة؟ قتلو الاحترام.. أنت ما تحترمنيش و ما تقدرش معاشتي معاك كلما راهي تزيد تصعاب و ما قدرتش نزيد نحمل كثر طلقني الله يخليك.. قالي كلمة طلقني هادي لوكان نزيد نسمعها مرة أخرى ما تلومي غير نفسك.. بكيت و قعدت فالبونك و قتلو يمال كيفاش أنا كرهت مليت خلاص.. قالي و الله غير أنت صح دراري.. قتلو حتى الطفل الصغير لوكان تسبلو باباه ما يقبلش و أنا تسبلي بابا في قبرو علاش وش دارلك.. قعد قدامي و قالي خلاص ما تبكيش يا سيدي أنا الكلب و أنا لي ماشي بنادم بصح ما تبكيش.. و الله غير نعشقك و هاد الشي كامل علاش؟ ماشي كي نحبك و راغب فيك؟ علاش خلاصو النسا بصح و الله ما تحلى وحدة فيهم في عيني من غيرك.. بصح أنت باردة و انت محروق عليك.. ما دابيا تذوبي فيا كيما راني ذايب فيك و تحبيني كيما راني نحبك.. ماشي كي علابالك بلي ما نقدرش نفرط فيك غير تشوفيني تقلقت تقوليلي طلقني.. قتلو انت ما تحبنيش لي يحب صح ما يآذيش.. قالي هادي قوليها لروحك راني شابع آذى منك.. طحت مور في وحدة قد الفولة و ميت عليها و هي ما علابالهاش كامل.. ملهوف عليها و ما عرفتش وش ندير ما عينيا ما يغلاش عليها برك لوكان تفهمني و تتهلا فيا بصح منين نجيب احساس للي عندوش ذرة احساس..
قتلو يمال أنا وش نقول ربي بلاني بواحد نموت عليه و صبت فيه كامل الحنان و حبيتو بصح ما يقادرش و ما يطلبش السماح و كي يزعف يرجع ما ينحملش وش ندير قولي.. تبسم و قالي لخطر بهيم و ما يفهمش، قتلو علاش؟ قالي لوكان جا يفهم ما يهدر ما يتقلق ما يحرق أعصابو و يندم عليها، لوكان جا يفهم كان يدير كيما غيرو يخبي كلشي في قلبو و يمشي لمرتو فالخط و موراها يدير رايو.. بصح أنا ماشي هكداك مانيش حايب نآذيك أنت روحي و هادا طبعي و راكي مليحة ملي تزوجت معاك راني تبدلت بزاااف ما كنتش هكدا كنت صح ما نتحملش..
فتح يديه باش نروح لحضنو ما اهتميتش قعدت نمسح في دموعي.. قالي يا سيدي ماشي لازم نتحضنو بعضانا و هاو خدك نبوسو بصح حبسي عليا البكى.. خلاص صافية لبن؟ قتلو لالا.. قالي علاش وش مازال تاني؟ قتلو تواعدني ما تزيدش تسب بابا و لا تغلط بالكلام على أهلي ما عندهم حتى ذنب.. قالي خلاص نولي نسب أهلي بصح خلاص يا الحقودية.. حطيت راسي على صدرو و قتلو و الله غير نحبك أنت بابا و أنت يما بصح كي تتقلق بلعقل عليا.. قالي اسمحيلي بصح لوكان نزيد نسمع كلمة طلقني و الله غير السبتة تاكل لحمك.. خزرت فيه قتلو شوف حتى حبك فيه تهدبد و يخوف.. ضحك قالي هههه يمال وش نقول؟ قتلو قولي حبيبتي ليليان هاد الكلمة ما تزيديش تعاوديها ما نحبش نسمعها.. قالي أوووو.. انا نهدر هكدا؟! ارواحي تشوفي لهنا.. تكسل و حطني على صدرو مرة يهدر مرة يتغزل منبعد ناض قالي راني جيعان نوضي حطيلي لقمة ناكلها..
حبطنا كيف كيف شافتنا هيام ضحكت و غمزتلي شافها صراع قالها غير لخير ختي راكي فرحانة؟ قالتلو كان الذبان فالدار و كي أنت طار الحمد لله.. رفع حواجبو وقالها اااا خير ان شاء الله ومسح على لحيتو و راح..
وجدتلو باش ياكل و حطيتلو فالهول و قعدت قدام هيام قالتلي خلاص طار ذبانك؟ وش درتي فيها؟ قلتلها عطيتلو درس و علمتو.. قالتلي غزيتيلو يستاهل.. قلتلها ما تقوليش هكدا على راجلي.. قالتلي يااااا صاااار دوك رجع راجلك و لي كانت تبكي مقبيل و تقول ما نحتاجوش و يطلقني شكون يمال؟
كان ياكل و هو حاط راسو كي سمعها تبسم و قالها إدا هي ما تحتاجنيش أنا نحتاجها برك أنت ما دخليش روحك راجل و مرتو و داوسو و انت علاش؟ قالتلو ياااا صار هكدااا نستهل لخطر أنا لي جيت على صبيحة ربي نش فالذبان من الدار وجهي ما غسلتوش..
جات جايزا أم سعد رايحة للكوزينة قال لهيام و هو يشر على أم سعد و قالها الذبان كامل منك لوكان تبعدينا برك نوليو لاباس بينا ما كاش واحد قدك راهو حاسدنا.. خزت أنا و ياها في بعضانا و كلاطينا بالضحك.. و هو كمل كلا و توضى صلا و رقد..
رديت بالي بلي الدم حبس ماشي كيما موالفة الدورة عندي.. جاتني فالليل غدوا منداك مع الظهر حبست بصح السطر تع ظهري كان مازالو و كل يوم يزيد.. جازت 4 أيام و الدم مرة يسيل مرة يحبس..
مع الظهر تكسل صراع حاكم تلفونو و قالي ليون حديلي حوايجي..
بديت نحدد شفت صراع مركز في تلفونو و تهولو حوالو.. كان لحقو فيديو اباحي في القروب تع صحابو فتحو و قعد يشوف فيه حتى قتلو صراع وشبيك ما راكش نورمال.. غلقو بلخف حطو بجيه و قعد يستغفر..
هو فالعادة مايشوفش هاد ليفيديو يقول حرام و مام كي نكونو نتفرجو كاش فيلم و جوز لقطة يبدل القناة و كي نقولو علاش يقولي إدا قعدت في قلبك نديروها فالحلال و ما تعمريش عينك بالحرام..
بصح كاين صحابو قراب ليه فاتحين ما بيناتهم ڨروب واتساب و هو كل مرة يحذرني يقولي ردي بالك تدخلي تشوفي و تقراي رجال ما بيناتهم فيه تطياح و عفايس عيانين بصح أنا ما نقدرش كل مرة ندخل نقرعج و مرات يقولو كلام ما نفهموش و يضحكو نروح نسقسيه على المعنى ينوض يعيط عليا..
مرة دخلت كي العادة صبتهم باعثين فيديو اباحي صبتو كاتبلهم يا..... بطلو هاد العفايس حرام و هوما يقولولو براكاتك شيخنا و هو يضحك..
في هداك النهار كي شاف الفيديو و حط التلفون قاعد يخزر فيا و أنا نحدد فتحلي يديه.. رحت ليه جبدني لحضنو و قعد يلعب بشعري قالي دوشتي؟ قتلو إيه بصح ظهري قتلني بالسيف باش راني نقدر نوقف.. أنا نهدر و هو يبوس في كتفي و يشم في شعري.. ضربت ريحتو في نيفي قتلو صراع بعد شويا دار قلبي من ريحتك .. نحى الفيستا بعدها و قالي هاني نحيتو، قتلو الريحة فيك صراع ماشي فالفيستا و زيد ظهري راهو يوجع و طبعتو جيت نوض تقلق و ما خلانيش.. بقيت نطبع فيه و نعيط وخرررر ظهري يوجع و قلبي دار منك و طبعتو قد ما عندي هنا رجع ما يضويش قالي كيفاش طبعيني؟ نمشي كيما تحبي أنت و كمل معايا بالسيف.. ناض عليا رفد حوايجو و هو مقلق دخل دوش و خرج من الدار..
أنا قعدت كيما خلاني و السطر قتلني حتى وليت نتلوى و نبكي.. رحت دوشت و السطر غير يزيد.. قعد في شومبرتي نبكي و حسيت طلعتلي الحمى و الدم رجعلي بصح هاد المرة نزيف..
رفدت التلفون عيطتلو ما رفدليش قعدت ننسيستي عليه كيف كيف.. كي شفت روحي ما نقدرش نصبر حتى يجي للدار عيطت لنائل غير رفد عليا قتلو تعيش عيط لأبو حرب قولو يجي بلخف رايحة نموووووت السطر قتلني.. قالي راني جاي فالطريق البسي حوايجك دوك نعيطلو.. نضت لبست حجابي دخلت نور تجري صابتني نبكي عاونتني و قالتلي وش صرالك نوضي نوضي.. شويا و وقف نائل عند الباب قالي اذكري ربي ختي.. حبطوني شافتني الحاجة و الحاجة بداو يسقسيو فيا دخل صراع قالي وشبيك؟ قتلو انت نكرهك وخرررر.. رايحة نمووووت.. مشاني و طلعني فالطونوبيل راحت معايا نور وصلوني للسبيطار دخلوني للماتيرنيتي قلبوني قالولي طرحتي استغربت علاش أنا كنت حامل؟! رجعت نغلي هدا كامل بسبتو.. بعثوني ندير ايكوغرافي خرجت نبكي صبتو قاعد هو و نور غير شافوني جاو سقساوني قلتلهم كنت حامل و طرحت و بعثوني ندير ايكوغرافي.. هو حسيتو تشوكا بدا يحك في وجهو و يستغفر.. نمشي و نهدر قتلو هدا كامل على جالك هاو طاح البيبي بسبابك قتلتني دمرتني ما نزيدش نقعد عندك.. ما رجعلي والو بصح طلعتلو لاطونسيو..
درت ايكوغرافي و ديتو للطبيبة شافتو انخلعت قالتلو هادي شحال عندها و هي تنزف و نتوما ساكتين؟ الرحم ديالها راهو مريض يلزم توقعلهم على العملية و إدا صعابت نرفعولها الرحم.. بديت نبكي قالها وش رايك نديها للسبيطار احسن؟ قالتلو حالتها ما تستحملش يلزم ندخلوها دوك للبلوك ولا يطرطق الرحم و تموت 
أنا دموعي تجري و هو يعصر في عينيه ولا ما يقدرش يشوف تالمو طلعتلو لاطونسيو بزااف.. قرب ليا جا يكالميني بعدتو عليا و قتلو لوكان كاش ما يصرالي على رقبتك وما نسمحلكش طول عمري..
دخلوني للبلوك و دارولي العملية كي فطنت صبت هيام و الحاجة عند راسي و هو حاكم يدي غير فتحت عينيا باس راسي و قالي الحمد لله على سلامتك..
كي دارولي لانيستيزي كنت نبكي و نعيط صراع ما تخلينيش صرااع نخااااف قلبت الدنيا باسمو على هديك قعد شايد يدي و ما خلانيش..
تقعدت نازع و نبكي من السطر حضني و حط راسو على راسي و ما قال والو بعدتو عليا.. دارولي مسكن و منوم رقدت و كي فطنت رجعوني للدار.. صراع ما جا قعد قدامي ما هدر معايا بصح كان باين الندم في عينيه..
مع الظهر رجعلي النزيف عاودو داوني للطبيبة عطاتني الدوا سقسيتها على فيروس القطط قالتلي ما عندكش راهو طبيعي عندك بصح بالاك رفدتي حاجة ثقيلة طاحلك.. الحاجة ما قنعهاش هاد الكلام قالت علاش كلما ترفد يطيحولها نديوها الشيخ يشوفها..
قعدت يومين في شومبرة الحاجة يساعفو فيا و صراع يشوي فالكبدة و يبعثلي مع حلا ما يدخلش لخطر قلتلهم ما نسحقش نشوف فيڨورتو.. انا قلتلهم داوسنا و طاح البيبي و هو ما هدر والو..
كي رجعت نقدر نوقف داتني الحاجة لوحد المرا تعرفها قالتلي باش ترقيلك.. جينا رايحين لبست و سبقت للڨاراج نستنى فيها تخرج صبتو قاعد لتم و فاتح اللابتوب ديالو.. رحت ليه قتلو دير حسابك بلي رايحة نعيط لخالي و نرفع عليك دعوى طلاق.. رفع راسو شاف فيا مليح تنهد و قالي تبراي و ما يكون إلا خاطرك..
جات الحاجة طلعت أنا و ياها مع الحج وصلنا لدار هديك المرا بقات تسقسي فيا على وحد الأمور حكيتلها على قصة القطة الكحلة لي خرجتلي في دار هيام.. دارت للحاجة قالتلها عروستك عندها تابعة على حملها باش ما يثبتش و ساحرينها على دارها و راجلها.. منبعد سقساتني قالتلي كاش مرة جاز عليك المغرب و أنت على جنابة؟ قلتلها إيه مرات نبقى راقدة و هو يخرج يدوش و يصلي و أنا حتى نوض من الرقاد
قالتلي أكبر غلطة كي ترقدي مع المغرب و لا يجوز عليك و أنت ماشي طاهرة لخطر فيه لي ينزل الجن حتى الطفل الصغير و ماشي مليح نخليوهم يبكي فهداك الوقت..
منبعد قالتلي تصرا مابينك و بين راجلك مشاكل مينداك و تحسو ماشي حاملين بعضاكم و مرات توصل للطلاق و كلما تتهناو من مشكل يجيكم مشكل اخر؟ قلتلها إيه قالتلي عندكم عين قاوية بصح أنت إيمانك ضعيف بلخف تتأثري مي راجلك إيمانو قاوي ما يتأثرش  كيما أنت..
طهري شومبرتك امسحيها بالملح و الخل و دايمن خلي القرآن شاعل فيها.. و دارتلي  حجاب و طلاسم و وحد الامور معقدة..
كي دخلنا للدار حكات الحاجة لصراع قالها يما الحافظ ربي سبحانو إدا كان كيد ساحر و لا عمل شيطان كل شر يولي على صاحبو..
خليتهم يهدرو و رحت لفوق ديت كامل دوزاني من شومبرتي و ديتهم لشومبرة وحدوخرا استقريت فيها.. شافني بصح ما هدر والو خلاني على راحتي.. ديت حوايجي و رحت ندوش رديت بالي بلي السوغتي دوبا ديالي ماكاش بصح تع صراع في بلاصتو..
كنت نظل فهديك الشومبرة مع تلفوني ما نخرجش منها.. تعرفت على طفلة هايلة فالفايسبوك و رجعنا صحابات هي تشكيلي و أنا نحكيلها منبعد طلعتني ادمن معاها فالڨروب و تلهيت بهاد الحكايات يمااااات.. صراع ما نشوفو ما نخزر في وجهو، يبعثلي الحلويات مع أحمد و محمد ولاد نور و يبعثلي ماكلة اونبورتي ملبرا مع حلا بصح ما يدخلش هو خاف نفاتحو في موضوع الطلاق بصح كنت نحس بيه كي كان يدخل فالليل يبوس شعري و يغطيني  و يروح و أنا ندير روحي راقدة..
جازت 8 أيام ما تلاقيتش بيه غير مرة وحدة جيت داخلة للدوش صبتو مغلوق قلت شكون لي راهو هنا؟ فتح الباب و هو لابس السوغتي دوبا ديالو شاف فيا جبد النفس و راح للشومبرة بلاما ينطق حتى كلمة..
دخلت جيت ندوش ما صبتش الشومبوا و الريحة ديالي أوووو وشنو الحكاية هادي كل يوم تتبحرلي حاجة؟!
حوست فالدوش تع لتحت ما صبتش رحت سقسيت الحاجة و حلا قالو ما علابالهمش.. قلت لحلا روحي سقسي باباك ادا شافهم قالتلي وعلاش ما تسقسيهش أنت قلتلها ما تحوسيش تفهمي روحي سقسيه برك.. هي راحت و أنا وقفت نتصنت عند الباب قالها لالا بنتي ما شفتهمش..
رحت للشومبرة حكمت تلفوني و قعدت نكونيكتي حتى نسيت الدوش كامل.. كي لحقت ال11 تع الليل شفت عندي رسالة فالطلبات  (invitation par message)
مكتوب فيها ( تشفاي ليليان كي طحت من الستور على ظهري و تكسرت أنا في بلاصتك و ضربني بابا كي طحتى مالڨري أنا لي نضريت؟ ) غير قريت الكلام سالو دموعي و جاوبت ديراكت قتلو و لوكان مازالو حي دوك راني بخير و يضربك و يضرب كل واحد يقيسني.. كتبلي نستاهل.. وش راكي وش خبارك؟ قتلو بوجهك و تزيد تسقسيني كيفاش راني و انت لي رميتني في وسط النار؟ عيطلي فالميسنجر نضت نجري غلقت الباب جاوبتو تعيطلي بعد كامل هاد لعوام و تسقسي ياك انت لي ضيعتني و بعتني علاش يا يحيى ياك أنا اختك؟ قالي و الله غير ندمت ليليان مانيش كامل مليح.. قتلو علاش وشبيك؟ قالي درت أكبر غلطة في حياتي كي انضميت الارهاب.. قتلو درتها بيدك علاش قليل ما نصحاتك يماك و انت غالق راسك و مع لخر انقتلت هي و ماما بسبتك خسرتني في كلشي، قالي و أنا تان خسرت كلشي ما قعدلي حتى واحد من غيرك و انت كيف كيف سامحيني.. قتلو علواش نسامحك؟ كي بعتني و لا كي قالت ماما و لا كي انضميت للارهاب؟ قالي أنا ما قتلتش يماك و لا يما، تقتلو فالحدود و أنا ما نقدر نهدر ما نقدر نتراجع لخطر يقتلوني.. قتلو و بقيت تقتل باش ما تنقتلش؟ قالي لالا ما قتلتش ياك تعرفيني جاجة ما نقدرش نذبحها.. قتلو يما خو صراع شكون لي قتلو؟ قالي و الله ما أنا.. قتلو بصح التهديد فهداك الوقت جا باسمك.. قالي إيه بصح ماشي أنا لي قتلو.. قتلو وين راك دوك؟ قالي عندي 8 اشهر و انا كلما نتهزم في بلاصة نبدل بلاصة اخرى.. قتلو و ما حكموكش؟ قالي رايح نهرب أنا و واحد صاحبي لأوربا و نتهناو، قتلو وقتاش؟ قالي ما نعرف بالاك فهاد الشهرين.. اسمعي بالاكي تقولي لراجلك بلي رانا على اتصال لا هو لا غيرو، قتلو منين جبت الكونت ديالي؟ قالي شفتك درتي كومنتار لميلان بنت خالك.. قتلو و دوك وش تحتاج عندي علاش رجعت؟ قالي ما نحتاج والو توحشتك برك.. قتلو لالا ما كاش منها كاش ملعوب راهو يدور في راسك.. قالي صدقيني غير ندمت.. حقا راجلك كيفاش راهو معاك؟ قتلو كيفاش حبيتو يكون معايا بعتني ليه و تسقسيني راني حايبا نطلق.. قالي يتسمى ما تفاهمتيش معاه بصح آخر مرة كي سقسيت يماك قالتلي يحبها و ما فرطش فيها بصح أهلو يكرهوها.. قتلو ما نحتاجهمش عييت و رايحة نعيط لخالي نطلق و نتهنى.. قالي ادا حبيتي تطلعي معايا لأوربا ما عنديش مشكل خلينا نسندو بعضانا و نعوضو لي فات.. قتلو بصح كيفاش نروحو لأوربا ماشي ساهلة.. قالي صح ماشي ساهلة بصح نستقرو سورتو ادا رجعنا لعمومنا و رجعنا نسبنا المسيحي رايحين نستفادو و نعيشو.. قتلو خفت.. قالي هي صعيبة شويا بصح لي راحو ارتاحو و عاشو عندهم راتب و برطما و معيشة وحدوخرا.. قتلو و صحابك الارهاب كيفاش؟ قالي وش راحلك فيهم هوما تان هربوا اكتشفنا بلي طبعونا على ريسانا ما بيهم لا دين لا والو خدمتهم غير باش يقتلو الناس و يخربو و يفسدو و يسرقو و يغتاصبو النسا.. قوليلي ياك جي معايا.. أنا نحكي معاه حتى صونا في وذني إشعار شفت صبت صراع دارلي جام فالميسنجر ترعبت قتلو يحي روح روح جا صراع.. قالي فاصي كلشي بلخف و ردي بالك جيبيلو سيرة.. كوبيت و فتحت الميساج تع صراع صبتو بعثلي رابط فيديو على اليوتيوب .. دخلت صبت غنية تع هيثم يوسف وسمها أضعف قدامك بس أنت .. قلت هادا عندو ثقة زايدة في روحو عمبالو يصالحني بغنية.. فتحتها و سمعتها صح الغنية شابة و تعبر عليه.. خليتو يكمل الميساج لي كان يكتب فيه.. قالي:
( هاد الغنية من أحب الأغاني على قلبي كنت نسمعها كي كنت في ريعان شبابي كنت نعيشها و نعاودها حتى 10 مرات فاليوم بصح كنت نتمنى لوكان عندي وحدة نحبها تع الصح نهديهالها و نقولها أضعف قدامك بس أنت..
مالڨري كنت متزوج بصح ما حسيتش هاد الغنية مع وجدان .. كبرت و تبت ما وليتش نسمع الغنا.. نسيت و حسيت ما عنديش نصيب فالحب.. بصح ربي سبحانو مور عمر ال40 بلاني بعشق وحدة ما تفهمني ما تحس بيا .. عشت معاها كامل مشاعر الحب وهي ما علابالهاش.. نتحترق و نذوب بيها وهي ما تحسش.. كل كلمة فهاد الغنية خارجة من قلبي ليك..
عندي 10 أيام ما جيت ما قربت ليك ماشي تكبر و لا ما نحبكش بصح مانيش حايب نخسرك و الله العلي العظيم غير نعشقك و عمري ما خممت نجرحك و كل غلطة ما قصدتهاش كي نآذيك نتأذى كثر منك بأضعاف..
شاب شعري من القهر لي جوزتو في حياتي و ما حايب من الدنيا هادي غير أنت.. عمري ما عشت قبلك ولا حييت.. كي نكون ما بين يديك ننسى طفولتي لي تعذبت فيها و كامل الناس لي آذاتني ننسى خدمتي ننسى تعبي ننسى وش دارو فيا الإرهاب وش درتي فيا كي تمنعي روحك عليا نمرض و الله غير نمرض.. ما فورصيتك غير على جال كي نحبك و نعشقك حايبك بكل طريقة و مانيش عارف كيفاش نتحكم فيك..
ما نقولكش اسمحيلي علبالي ما نستهلكش  بصح بجاه كل دمعة طاحت من عينيا عليك ما تحرمينيش منك..)
كملت الميساج و ما فقتش حتى صبت دموعي يطيحو وحدهم.. درتلو جام.. هدر كامل وش كاين في قلبو و خلاني نخمم في كلامو و نقرر.. حرت وش ندير يحي من جيه يعرض عليا نسافر معاه لأوربا و نشوف حياتي و صراع من جهة يعتذر ويقولي أنت كامل حياتي.. ما عرفتش شكون نخير و وش نقرر..
لحقت ال3 و نص دخلت ندوش بحوايجي تالمو عقلي ماكانش معايا كي فقت لروحي نحيت حوايجي و لبست السوغتي دوبا تع صراع طميت شعري و خرجت وقفت قدام شومبرتو فتحت الباب صبتو مطفى الضو و شاعل الفايوزا منقصلها.. قربت ليه خزرت في وجهو و هو راقد و حاط يدو على جبهتو.. قعدت نشوف فالملامح ديالو و نخمم مستحيل نقدر نخليه.. بستو فطن مخلوع رفع لغطا و جبدني لحضنو زيرني و يمسح على شعري و يتنفس بالزور.. همستلو قتلو ما تهدر والو مانيش حايبا نسمع.. همسلي بلهفة نعشقك نحبك بزاااف.. جوزنا لحظات خيال فيها غير أنفاسنا و هي تشرح لبعضانا مشاعرنا..
حطيت راسي على صدرو و انفاسو مضطربة كانت يتنفس بالزربة خزرت فيه تبسم و باس جبهتي قالي وش درتي فيا على كبري نرجف عليك.. رجعت راسي على صدرو و جبدت النفس جا يغفى سمع الأذان قالي نصلي برك و نرجعلك..
راح دوش و أنا حبطت دوشت لتحت و دخلت للكوزينة درت حليب ليا و قهوة ليه.. طلعت للشومبرة صبتو يقرا فالقرآن و كمل و قعد قالي وش درتي؟ قتلو حليب ليا و قهوة ليك.. قالي حليب ابيض  كيما قلبك و قهوة كحلة كيما معيشتي هكدا قصدك؟ ضحكت قتلو لالا منين جبت هاد التفسير.. حطني في حجرو و قالي وش رايك أنا نتحمل قلبك الابيض بغلطاتو و انت تتحملي معيشتي بمرارتها؟ ضحكت قتلو أوكي ههههه.. قعدنا نشربو و نضحكو منبعد قتلو صراع.. وقتاش بديت تحبني؟ قالي ما نعرف بصح أول احساس جاني من جيهتك نهار قعدنا وحدنا فالدار و أنت فالكوزينة حاصلة فهداك الحوت.. قتلو ما تفكرينيش.. نهار لي قطعتو مربعات.. ضحك قالي ههههه إيه كنت مفرشاتو فالسنيوة و تخزري فيه ما عرفتي منين تبدايه.. كانت الحبة ديالك مفتوحة على صدرك مع الاول غضيت البصر لخطر كنت نعتبرك كيما حلا طفلة صغيرة و ما تعرفيش.. أنت تشكي و أنا نشوف في هديك الدقيقة تهول حالي عوذت من الشيطان و قلت وشبيني أنا تقوم نفسي على طفلة صغيرة.. جيت نخرج و نهرب ما قدرتش نخليك وحدك فالدار حرت وش ندير.. منبعد قلتيلي عمو عاوني.. قلت ليوم نعاني معاها ما فيهاش هدرة.. أنا بدلت و وقفت معاك فالكوزينة بديتي تسقسي فيا على البارفا ديالي و تضحكي قلت لازم نهرب نروح نقرا القرآن خير ما نبليها و أنا رايح نرجعها لدارهم بعد شهور..  قتلو يمال علاش ما رجعتنيش؟ قالي تبلى قلبي بيك وش ندير؟ صح قد بنتي بصح منبعد قلت ربي حطها في طريقي و راني معاها فالحلال علاش حارم روحي منها و هي ما قعدلها حتى واحد من غيري.. و من جيهة خفت نرجعك الوضع كان ماشي مليح مع الارهاب خفت عليك حبيتك و خليتك ليا.. تبسمت باسني.. قالي صحا و أنت وقتاش حبيتيني؟ قتلو نهار صالحتني و رجعنا للدار و كانوا قاطعين التريسيتي و رقدت قدامي.. ما علاباليش في هداك النهار ماشي حبيتك بصح جاني وحد الشعور من جيهتك أول مرة نحسو في حياتي.. راجل حاطني على يدو و يهمس في ودني و هاد المشاعر بلعقل بلعقل حتى حبيتك.. قالي كنت حاس بهاد الشي كنتي دايمن تحبي نحطك في حضني بصح غير نبدا نتمادى تهربي كرهتيلي حياتي بهاديك الحكاية.. ضحكت قالي نفرح كي نشوفك تضحكي.. حضنتو و قتلو أنت حياتي.. قالي ليليان علاش ما نقعدوش دايمن هكدا و الله غير عيينا من المشاكل.. قتلو و أنا وش درت؟ قالي حبسي الطيش ديالك و اعرفي كيفاش تتصرفي اسمعي لكلامي علاش انا كي نقولك ديري هكدا و ما ديريش هكدا رايح نضرك؟ ياك لمصلحتك.. و كي نطلب قربك لخطر نحبك.. قتلو أنا تان نحبك بصح أنت ما تقدرش تصبر على الفراش.. قالي أنا ما نقدرش؟ 10 أشهر و أنا صابر و مقدر و نقول صغيرة ما نفورصيهاش.. ديري أي سبة باش تغضبي عندك أسابيع و انا نقولك ماشي ذنبي وش في يدي و أنت ما تفهميش.. حارمتيني منك و عازلة روحك عليا في شومبرة وحدوخرا.. انا تان راجل و عندي حقوق.. إدا ما صبت الراحة لا عندك لا عند أهلي لا في خدمتي وين نروح واحد ما راهو حاس بيا قوليلي وش ندير؟ سكتت.. قالي صافية لبن؟ قتلو إيه ههههه.. قالي الحمد لله و باس خدي.. يلا نوضي وجديلي الفطور الحليب و القهوة فتحولي الشهية جعت.. قتلو هكدا معول تعاود تسمان.. قالي و حبيتيني ندير الريجيم؟ قتلو إيه.. قالي هدا كامل باش ما تنوضيش توجديلي الفطور يا الفنيانة.. ضحكت قالي نروح نجيب زبدة تع عرب ضحكت قتلو باش تزيد تسمان مليح ههههه.. رفد المفتاح تع الطونوبيل و خرج وهو يضحك و أنا وجدت الفطور و حطيت فالجنان كي جا و شافني حطيت لتم عجبو الحال قالي نروح نوض بابا هو يحب الزبدة تع العرب.. سربيتلو لاتاي هو يشرب و انا هايمة فيه تبسمت جيت موراه و حضنتو و هو قاعد بستو في رقبتو قتلو نحبك.. قالي يتسمى هكدا راكي تقوليلي اطلع لفوق افطر بالزبدة تع الصح.. قتلو خلاص بطلت نكدب منحبكش ناض يضحك.. شويا و خرج الحاج قالو بابا ارواح تفطر جبتلك الزبدة تع العرب..جا قعد معانا سربيتلو لاتاي زادت جات الحاجة قعدنا نفطرو و نقصرو حتى سخنت الشمس دخلنا للدار..
جيت نوجد حوايج صراع باش يخرج تفكرت السوغتي دوبا و الشومبوا سقسيتو عليهم قالي ما علباليش.. شفت حوايجو تع الجيش قتلو حقا صراع ماشي كنت راجع للخدمة بطلت؟ قالي لالا راني نستنى فالأمر يوصل باش نبدا..
هو خرج و أنا حكمت تلفوني بعثت ليحيى حكيت معاه شويا و حكالي على وضعو قالي راهو يخدم عند بولونجي بالجورنيا منبعد سقساني إدا نروح معاه قتلو لالا و فاصيت ليميساج..
بصح بقيت على تواصل معاه كلما يخرج صراع نحكي معاه و كي نكملو تفاصي لي ميساج..