مراهقة والاربعيني بلهجة جزائرية

45

#المراهقة و الأربعيني:

#الجزء45:

كان صراع متكسل و حاط اللابتوب على رجليه يخدم و أنا واقفة نحدد فالحوايج حتى دقدقت حلا فالباب و قالتلو بابا جدو يحتاجك راهو لتحت، قالها وش كاين؟ قالتلو ما نعرف بصح عمو سعد راهو معاه فالصالون، قالها روحي قوليلو راهو راقد، قالتلو معليه و راحت و هو قعد غايس فالميكرو حتى عاود جا نائل و دقدق فالباب قال أبو حرررب راك قاعد، قالي صراع خفي البسي خمارك، كي كملت قالو ادخل نائل، دخل قالو كيفاش راك؟ قالو الحمد لله بخير، قالو نقدر نهدر معاك زوج كلمات إدا ما راكش عيان؟ قالو إيه ريح و دار ليا قالي ليليان خلينا وحدنا شويا، قالو نائل لالا خليها عادي ما كان والو، كملت نحدد..
قالو نائل شوف أبو حرب لحد اليوم بالاك انا الوحيد لي ما هدرتش في حكايتك ولا دخلت روحي لا كي تكروشيت مع سعد و لا مع يما صح؟ دارلو براسي إيه، قالو شوف خويا هديك يما و سعد خويا و أنت خويا الكبير و ما قدرت نوقف مع حتى واحد فيكم على هديك قعدت ساكت و نهدن فيكم برك قد ما نقدر..
أنا عشت معاك في شومبرة الحاجة كثرت ملي عشت في شومبرة يما مع سعد و تربيت معاك تحت يديها و لليوم مازالني و ما تخليش عليك في حالتك و رحت مالڨري لي ضربتها و هنتها و حاوزتها راهي يما بغض النظر إدا كانت هي السبب ولا لالا، هكداك و قلت ما نتخلاش على خويا في أصعب حالاتو ما دخلت روحي ما جيت عاتبتك..
خويا انت كبيرنا و ملبكري عندك كلمة إدا تبعنا هدرة النسا نهملو، قالو صراع بصح سعد طعن في عرضي يا نائل، قالو و الله ما طعن اديها من عندي، تحب الصح صراع مرتك غلطت و راهي قدامي، انت غايب و هي كانت مرت مفقود و ناسنا هنا ما ترحبش بعلاقتها مع علي، انا و ياك نفهمو بلي عايشين كي الخاوة و ما بيناتهم والو بصح الناس ما ترحمش، و عمي أبو وجدان عيطلها في الجنازة و خلا لي ما يشتري يتفرج، غير قولي يجوزلها تروح مع الفجر بلاخمار و بروبة خفيفة تع الرقاد حتى للباب باش تشد عليه الدوا؟! و تعرف محمد و علي و الشحنة لي مابيناتهم هداك مصورو و لوخر تاهمو و ضاربو هكداك قلنالها بعدي على و سكتي و فرينا المشكل و حاوزنا علي، بصح هي ما بعدتش و فالليل زادت خرجت معاه و أنا ماكنتش فالدار، قتلو بصح سعد حاوزني، قالي نائل الحاج ماشي حبسك و قالك اقعدي فالدار، و نور ما لحقاتكش و قالتلك ادخلي ما تروحيش حتى يجي نائل؟ و دار لصراع قالو خويا احكم وحدك ، هيام ما كانتش في دارها و ليليان جاية من طرف الدنيا لعندنا على جال حكاية خويا عابد الله يرحمو يعني لوكان تشلل روحها بالذهب ما يحبوهاش، و تبات مع jeune في دارهم و يماه غايبة و شوف الناس وش رايحة تهدر، طفلة صغيرة شقراء و راجلها مفقود و بايتة في دار علي.. و الله يا خويا غير حصلنا، راحت و أنا ما كاش علبالي دخلت فهديك الليلة على الوحدة رقدت ديراكت و الصباح كي فطنت حكاتلي نور هبلت رحت قبالة جبتها و جيت..
راهي قدامك كي كنا فالأردن كان يخرجهم علي للمول السينيما سقسيها إدا كاش نهار قولناها ما تخرجيش أنا و لا الحاج، و دار ليا قالي نعرفوك انت و علي وش تكونو بصح هنا صعيبة و تعرفي العقلية كيفاش دايرة، علاقة الطفلة مع الراجل غلط مهما تكون نيتهم، هادي تع صداقة و خاوة ما تمشيش عندنا صح و لا لالا، صراع كان يسمع و ساكت و دارلو براسو إيه.. قالو نائل ياك سعد خونا و ظروفو المادية دهورت فالحرب و دارو كاريها قعدلو شهرين باش تخلاصلو الكونطرا، و عوايلو عند نسابنا يكون وش يكون يبقى خونا و الظفر ما يطلعش من اللحم و نتلامو بيه، ياك البنادم كي يطيح يعيط و يقول اخ، إدا نخليه أنا و انت يمال علاش رانا خاوة، علبالي الغلاط راكبو من ساسو لراسو بصح خونا وش رايحين نديرو، ياك كنا في ستة و قعدنا غير في ثلاثة، كاين حاجة تستاهل باش نتفارقو على جالها؟! قالو لالا، قالو لي صرا كامل سبابو النسا إخلاص سوسة مدسوسة جي تعمر يما و يما تعمر سعد و الحاج و نشعل النار، عييت نهدر بركاونا من المشاكل بصح والو، صح سعد غلط مع مرتك و تجاوز عليها من حقك تزعف و دوك جا يطلب منك السماح، احبط خويا الله يرضى عليك خلينا نرجعو أخوتنا و انسى لي فات  المصارن فالكرش و يتضربو.. قالو دوك نحبط و نلحقك، راح نائل جيت نهدر قالي اجبديلي حوايجي قتلو يتسمى راك رايح... قالي اششششت بلا كلام اجبديلي حوايجي..
بدل حوايجو وجد روحو و حبط للصالو لحقتو و قعدت نتصنت ناض سعد باس راسو و قالو وش راك أبو حرب خويا، دير فيا وش تحب لي تهدرها عندك الحق فيها و قابلها  أنا غلطت و جل من لا يسهو و المسامح كريم، قالو صراع هديك هي خويا عفا الله عما سلف و انت خويا بصح جرحتني كي تهمت مرتي.. قالو و الله غير جابها الشيطان الله ينعلو و يخزية راهي في عوض بنتي و قصدنا كان باش نوقفو على خدمتك و بابا راهو شاهد شحال كانو يعيطولو فالتلفون على الخدمة كانت الحالة حابسة و واحد فينا ما قدر يمشيها  وهي تان طيحت معايا القدر، قالو إن شاء ما تزيدش تكون مشاكل.. و عيطلي ليلياااان.. دخلت قتلو انعم أبو حرب، قالي سلمي على أبو محمد، جبدت النفس و سكت جاتني صعيبة كي نكرهو، تعنكر فيا صراع، قتلو أهلا أبو محمد وش راك؟ قال أهلا ختي، قالي الحاج انت بنتنا و حنا ما نكرهوكش و ربي شاهد بلي نعزك كي بناتي بصح أنت تان لسانك شويا طويل سينو ما نلحقش باش نضربك ديري شغل باباك غلط معاك  و ان شاء الله ما يقعد حتى مشكل في عايلتنا، قتلو إن شاء الله الحاج، قالو صراع لسانها كي طولو أنا لي تقطعو ما نحتاج يد تنمد على مرتي و لا بنتي و إن شاء الله ما يزيد يصرا حتى مشكل، و أنت سعد تروح دوك تدي طونوبيلة نائل و تجيب عوايلك، انا وحد الشهر هكداك نكمل داري و نخلي هاد الدار ليك و لبابا، قالو سعد ربي يخليك لينا خويا و يحفظك ..
طلبت منهم السماح و زاد عيط لحلا طلبت السماح من عمها و عيط لهيام تجي و صالح ما بينها و ما بين سعد بصح علي ما حبش يجي دار السبة بالخدمة..
سعد راح جاب عوايلو ورجعهم للدار، قعدت أم سعد قال الحاج لصراع راهي في عوض يماك غلطت و خلصت، قالو روح جيبها بصح نبهها و وصيها تشد لسانها لخطر المرة الجاية ما نزيدش
نڨراصيلها، قالو كون هاني اديها من عندي بلي ما تزيدش دور بمرتك و راح جابها..
صراع عاود قضى من دارا و جديد عشا ليهم كي ما حضروش في الصدقة تع حرب الله يرحمو، و الحاجة فرحااااااانة قالتلو الله يرضى عليك يا وليدي كي ما ضيعتش أهلك ولميتهم هكدا نحبك تكون الرسول صلى الله عليه و سلم يقول ( لا يدخل الجنة قاطع)
لوكان تسقسيوني على احساسي ما علاباليش إدا نحبهم بصح علبالي بلي مستحيل نكرههم ماشي من طبعي باش نحقد..
ما تقلقتش كي رجعو لخطر علبالي صراع ما يرتاح غير مع أهلو و انا ما نقدرش نكون أنانية و زيد خاوتو حزام ظهرو ما نقدرش نوقفو قد ما خاوتو واقفين معاه..
طلعت للشومبرة كنت واقفة مع المراية نماكيي، دخل صراع عنقني ملور حوط خصري بيديه باس كتفي و همسلي في ودني قالي راك تشوفي كامل لي راهم هنايا و الله غير نخليهم يتمناو يعيشو في بلاصتك، دارك راهي تتبنى فيها 500 ميترا اوكاري ليك وحدك و تحت أمرك وحدك ما نخليك تحتاجي واحد ما نخلي واحد يدنى ليك ، درت ليه حكمت فالكول تع قمجتو شفت في عينيه قتلو نحبك قالي و أنا نموت عليك و باسني...
جازت شهرين ملي رجعو للدار واحد فيهم ما دنا ليا بصح كانت نظرة الحقد باينة في عينيهم..
صراع كان يخرج كل صباح يروح يوقف على البنيان تع دارنا و يرجع مع الظهر يتغدى و يرقد، و مع العصر يقعد شويا مع أهلو و مرات يخرج و لا يقعد معايا فالشومبرة مع اللابتوب ديالو..
النوبات تع السطر كانت مرات تخف و مرات تزيد على حساب التزامو بدواه، و مورالو بدا شويا يتحسن على وش كان.. صبت اوردونونس فالبورطفاي ديالو و اكتشفت بلي يتبع عند طبيب نفسي و ما قال لحتى واحد بصح ما قتلوش لعبتها ما علاباليش ما حبيتش نحرجو مادام حايب يبرا..
وحد النهار عيطلي قالي نص ساعة نلحق نصيبك واجدة، قتلو وين نروحو؟ قالي خليها سوربيز، رحت نجري ماكييت على الخفيف بدلت حوايجي سمعتو لتحت رفدت صاكي و جيت حابطة لاقاتني نور قالتلي وين خارجة؟ قلتلها عيطلي صراع قالي مفاجأة، قالتلي و ماعن الغدا كيفاش ياك دالتك، قلتلها ياك نوال و ضحى كاينين شوفي مع وحدة فيهم تغسلهم هيا بااااي و رحت و خليتها بصح حسيتها ما عجبهاش الحال..
جزت على الحاجة قلتلها يما راني خارجة مع صراع، قالتلي ربي معاكم، قلتلها كاش ما راكي متشهية نجيبولك معانا؟ قالتلي لالا بنتي بصحتكم قلتلها الله يسلمك..
الحاجة بدات تتحسن حالتلها الحمد لله رجعت تقدر توقف و تمشي شي خطوات، صراع جرا بيها عند بزاف أطباء، و كي يكون ماشي قادر يبعثها مع علي و هيام للعاصمة..
خرجت صبتو عند الباب يشوف فالساعة و عاقد حواجبو، طلعت فالطونوبيل قالي ساعة؟ هادا وين؟ قتلو بعقلك لا طيرنا، ما عندكش بزاف ملي عيطتلي..
مشى بيا وحد ال10 دقايق و حبس قدام وحد البنيان جديد و قالي احبطي، قتلو وشنو هادا؟ قالي احبطي تعرفي..
وقفنا قدام باب كبير كحل فتحو و قالي ادخلي، دخلت و قتلو ما تقوليش هادي دارنا؟!! دارلي براسو إيه و تبسم، صوطيت عليه عنقتو، قالي ادخلي لداخل و حضني عندك الوقت ههههه الباب راهو مفتوح..
غلق الباب و بدا يوريلي فالدار، فالدخلة كاين ڨراج قيس 3 طونوبيلات و في الجيهتين جناين ... قالي شوفي راني سقفتلك الڨراج هكدا تكوني الاز تخرجي تسيقي بلا خمار واحد ما يشوفك..
قاعد يوريلي وش رايح يدير فالدخلة تع الدار تصميم و ديزاين ما شاء الله كلشي بالرخام و السيراميك و أنا ماشي مأمنة ما عرفت روحي في حلم و لا علم..
دخلنا للدار قابلنا هول كبير في وسطو دروج تصميم مودارن، الكوزينة واسعة بلافايونس ابيض و بنفسجي، زدنا دخلنا للصالو قتلو شحال كبييييير الله يبارك، قالي إيه مام كي يكونو عندنا الضياف يكفيهم، قتلو من دوك متحزملي للعرضات؟ قالي و انت من دوك بديتيني؟ امشي قدامي خير ما نرميك، دخلنا لداخل كاين 3 شنابر واسعين و صالدوبا و توالات اونقلاز دارها للحاجة و العربية خلاها على برا للرجال ادا جاونا، داير حساب لكلشي..
طلعنا لفوق فيها 4 شنابر و صالون و صالدوبا فيها لابينوار تصميم و لا في الأحلام، قالي هنا ندوشو، خزرت فيه بنص  عين قتلو ندوشو؟! قالي ديري حسابك كي نوليو نسكنو وحدنا تتبدل العقلية انساي كل واحد فينا يدخل يدوش وحدو رجلي على رجلك، قتلو صار هكدا راك موجد لكلشي..قالي امشي قدامي نكملك و فتح وحد الشومبرة قالي و هادي هي شوووومبرتناااا... قتلو تهبللل بصح علاش ما درتش الصالدوبا فيها، قالي نعيف كي يكون منعزل احسن، و زيد فالدار راني غير أنا و ياك يعني عادي ما عندكش من شكون تحشمي غير يما لتحت، قتلو و حلا؟ قالي حلا تفاهمنا مع دار شيخها خلاص الشهر الجاي يرفدو، قتلو يتسمى خلاص نرتاح واحد فيهم ما يجي يسكن معانا نوض و نرقد وقتاش نحب واحد ما يدخل روحو فيا و لا يضبح عند راسي، قالي ياك وعدتك نخليك أسعد إنسانة و نخليهم يتمناو معيشتك، و قتلك على قد ما ذلوك بلساناتهم نرفعك عليهم، قتلو يا يما على راجلي و راعي داري و قربت بستو من شفايفو بعدت و مسحتو الغوجالاف، قالي ما كالاه تمسحيه انا أصلا معول نجرب الدوش إدا يصلح و لا لالا، ارواحي لهنا، قتلو لالا وخر، قالي و الله ما صرات غير نجرب ماشي كيما تحبي انت، قتلو داري و كلشي فيه كيما نحب انا و بعدت على صدرو، قالي دارك ما قلناش بصح انت و دارك كيما نحب أنا، قتلو منحررررررف ....
موراها داني وين يبيعو الأثاث خيرنا شومبر اكوشي تركية لينا، فوتايات للصالو، كانابيات للهول، قالي نزيدو نخيرو لشومبرة حلا، قتلو ياك رايحة تتزوج، قالي و كي جي ضيفة تصيب شومبرتها واجدة في دار باباه و تبقى ليها، قتلو و الحاجة؟ قالي يما حتى نشوف معاها خفت تحب تدي شومبرتها القديمة، حقا صورتيلها الدار؟ قتلو إيه صورتو..
كملنا خيرنا الاثاث دار كومند و قالي وش راكي متشهية تاكلي؟ قتلو بيتزا باللحم ..
راح جابها اونبورتي و رجعنا للدار و أنا ميتة بالفرحة و نعيط لحلا وريتلها التصاور قالتلي الحاجة خلاص يا بنتي اطلعي ليليان إن شاء الله عتبة خير عليكم بالربح، قالتلها حلا وشبيك جدة خلينا نشوفو و قالتلي وااااو تصميم هبااال.. صح هادي دار بابا؟ يااااي و الله غير نغزل خيات وسام خليهم يشوفو بلي دارهم كامل ما جيش غير قد شومبرتي ابعثيلي التصاور نبعثهم لوسام يشوف..
قالتلنا الحاجة نتوما ما تحشموش دوك، حبيتو طيحو الدار علينا الله يسترنا، قعدنا غايسين فيها منبعد انتبهت على نوال تخرز فينا فوق قلبها ما شاركتناش منبا فرحاتنا أنا و حلا، و نور واقفة ما دارت حتى ردة فعل تشوف برك، و الحاجة تتعنكر فينا و تقولنا خلاص اطلعوا دوك حتى نطقت أم سعد قالتلها خفتي نحسدوكم في داركم ماناش ولاد فقر الحمد لله شايفين وعايفين..
دخل صراع قالها واش يما شفتي الدار عجباتك؟ قالتلو إيه يا وليدي شفتها عتبة خير عليك إن شاء الله و تعنكرت و شرتلو فهمها بلخف، قالي ليليان اطلعي وجديلي الدوش، قتلو نتعشاو قبل، قالي يمال حطي التلفون و ريحو تاكلو..
قعدنا ناكلو البيتزا عرض نور و نوال و ضحى قالولو لالا بصحتكم هدا وين تعشينا..
قعدت غايسة في صراع ناكل و نتبع فيه بعينيا كيفاش ياكل كيفاش يهدر كيفاش يضحك كل حركة فيه، انتبهلي تبسم حتى بانوا ليفوسات في وجهو، غمزلي و شرلي بحواجبو تع اطلعي لفوق، باس راس الحاجة و سبقني للشومبرة، طلعت موراه صبتو يبدل قربت ليه و التبسيمة في فمي رفعت يديا و حوطت رقبتو قتلو علبالك شحال نحبك؟ حوط خصري بيديه تبسم و قالي ماشي قد ما نحبك و الله غير نعشقك حكم حناكي و باسني.. في هديك الليلة رقدت و أحلام و أفكار في راسي على داري الجديدة..
غدوا منداك ما نضتش من الفراش حتى ال14 تع لعشية، هو كان خرج، دوشت سڨمت روحي و حبطت جوايه الربعة صبتهم قاعدين فالهول شافني الحاج دور وجهو كان مقلق..
قالتلي الحاجة مازال الحال لوكان كملتي رقادك حتى الليل و غدوة ان شاء الله و حبطتي على جيه، قلتلها ما فطنتش و الله ما رقدت حتى طلع النهار..
حبطت حلا تتكسل تان كانت هداك وين ناضت قالتلها أم سعد نشوفو هاد الدار لي رايحين تسكنوها خايفة غير ياكلكم الدود و الوسخ، قالتلها حلا وشنو جاية ديري معايا مشكل؟ دار بابا نوض وقتاش نحب و لي ما عجبوش الحال ربي يسهل عليه، قالها الحاج قادري جداتك خير ما نوض نكسرلك راسك..
سمعنا صوت باب الڨاراج تفتحت طليت من التاقة تع الكوزينة صبتو صراع رحت ليه قتلو وين كنت قالي أهلا عمري
-هلا عمري .. جنت بالبيت كنت فالدرا، قتلو وقتاش نرحلو؟ غدوا إن شاء الله الصباح نديك أنت وحلا وهيام تسيقوها و تغسلوها و نروحو بصح دوك وجديلي لقمة ناكلها راني جيعان، وش درتو الغدا؟ قتلو ما علاباليش، قالي علاش ما تغديتيش؟ قتلو مازال لخطر هدا وين نضت، خزر فالساعة و تبسم قالي يمال ديريلنا حاجة ناكلوها كيف كيف..
تغديت أنا و ياه و حلا منبعد درنا لاتاي و قعدنا نڨصرو، الحاج و صراع و نائل و سعد كانو قاعدين، و انا مسامية صراع حاطة يدي على رجلو و نشرب فلاتاي و هو يحكي مع الحاج..
رؤى بنت نوال كانت قاعدة في حجر يماه و تضحك و انا لاغي فيها، دار صراع يضحك معاها و قالها ارواحي لعندي، راحت لعندو و لاسوسات في فمها عطالها صباعو حكماتو بيدها قالها علاش ماما ما تغسلكش و لا لاتية غير بالحكايات هههههه، قتلو شحال راني متمنية تكون عندي بنيتة شويبة هكدا، قالي راني ملاح هكدا لوكان تزيد عندنا طفلة تقلب الشومبرة بالبكا و العياط و ناكلها هي بيماها... شوفي شحال تشبه لحرب الله يرحمو... منبعد قالها نواااال... و هي لاتية تڨصر مع نور و هيام، دارت ليه قالتلو انعم أبو حرب، قالها شوفي فم الطفلة كيفاش راهو اغسليلها، قالتلو إيه دوك نوض و دارت تكمل ڨصرتها مع هيام، قالها نوضي معولة طلعيلي لاطونسيو، خدود الطفلة راهم يتلاصقو من الحلوة، ضحكت و رفدت الطفلة قالتلي نوال لالا ليليان انا نغسلها قلتلها عادي دوك أنا نغسلها ريحي..
ديتها للكوزينة غسلتلها بدات تبكي حبطتها مسحت بوطاجي و رجعت للهول قعدت فالدروج نڨصر مع ضحى، جات ليا نوال قالتلي نوال وين راهي رؤى؟ قلتلها و أنا وين علابالي، قالتلي ماشي ديتيها غسلتيلها؟ قلتلها عندي نص ساعة ملي خرجتها من الكوزينة و قلتلها روحي لعند عمو، قالتلي الطفلة ما كاش كيفاش هدا خرجتيها؟!
نضنا نحوسو عليها قلبنا في كامل الدار فالخزاين تحت البناك في الشخن ريحتها ما تسعاش، نوال ناضت تندب في حناكها و تقولي راحت بنتي ياك قتلك خليها انا نغسللها، وليت نلوم في روحي قلت لوكان غير رجعتهت ليماها وشبيني أنا بصح ياك خرجتها، وليت نحوس و نبكي و الحاج و صراع ناضو يعيطو قالو لاتيين بالڨصرة طفلة صغيرة ما علبالكمش بيها وين راحت..  خرجو للزنقة يحوسو عليها و ما صابوهاش..
فهداك النهار كان سعد فاتح لي روڨار تع الدار باش يجيبلهم خدام غدوا منداك، و وليد سعد تفكر قال شفتها مقبيل تلعب لتم، ،نضنا نجريو رمى سعد يحوس عليها حتى جبد يدها كحلة من الزيڨو كامل صغنا، نوال تبكي و تصوغ و سعد يبكي و صراع يجبد فيها ما بين يديهم
أنا يبست في بلاصتي و حكمتني الرجفة حسيت انا سبب موتها..
نحاهالهم صراع حطها فالدوش و يتحسس في صدرها إدا عايشة و حنا دايرين بيه و نبكيو، نائل نوض الطونوبيل و رفدها هو و صراع للسبيطار و لحقهم سعد و الحاج..
الدار تقلبت بالبكا و العياط حتى تلايمو الجيران عندنا حتى عيطو فالتلفون قالو الطفلة ماتت..
نوال هاجت عليا تضرب تعيط و تصوغ أنت لي قتلتي بنتيييي يا المسمومة ديتيها و رميتيها فالمجيرية، هو يشدو فيها عليا و أنا نرجف و نبكي و ساكتة يديا تجمدو..
الحاجة تقولهم داها أجلها و الناس آمنوا بلي صح أنا لي قتلتها و انا لساني تعقد ما قدرتش نقول والو، جبدتني هيام بجيه و قعدتني انتبهت بلي يدي كانت ترجف قالتلي وشبيك؟ ما ديريش على نوال ياحليل ماشي بالساهل عليها و دوك ما راهيش جايبا خبر لعمرها بنتها ماتت بصح الطفلة داها أجلها و أنت علاش ماشي ذنبك، راحت هيام جات جايزا عليا نور قالتلي هدا كامل رايك لوكان خليتيها عند يماها ياك قالتلك خليها أنا نغسلها، قعدت حاطة راسي و دموعي طيح..
دخل صراع و سعد عينيهم حمورا و حالتهم حالة كانو دفنو الطفلة و جاو و أنا مازالني في بلاصتي و على نفس الوضع، لاقاتو نوال تصوغ و تعيط و تقولو مرتك قتلت بنتييييي... عينيكم لي وخدتني في بنتييييي.. تقعدو و تنوضو تقولو تشبه لحرب حتى داااااهااااا... صراع كان عيان و ماشي في حوالو و هي تعيط في وجهو و يجبد عليها بكف حتى دخلت فالحيط، قالها و تزيدي تهدرييي، طفلة صغيرة ما قدرتيش تعسيهاااا لاتية بالڨصرة و الحكايات.. و سعد هبل و طاح عليها بالضرب و تخلطت كامل يتعايطو، دخلو ولاد عمومهم يسلكو..
كي زدت شفت صراع في هديك الحالة قلت ليوم يذبحني، جات ليا سارة بنت هيام قالتلي وشبيك ليليان بلعتي لسانك؟ علاش راكي ترجفي هكدا؟ حسيت التصفار في ودنيا و تغاشيت ما حسيتش حتى صبت روحي ما بين يدين صراع، هوما يرشو عليا فالما و هو يديرلي فالريحة، فتحت عينيا و جسمي كامل يرجف و ما نقدر نحرك والو تقول دارولي لانيستيزي جمد كلشي فيا، قالي نوضي اهدري معايا و مقلق عمبالو كنت نتفشش عليه، رماني من يدو باش نوض طحت، قالي ليليان راني نهدر معاك بصح جسمي انشل ما قدرتش نتحكم فيه غير دموعي طيح..
هيام كانت فوق راسي و النسا واقفين و يقولو هادي راهي مشوكيا
رفدني صراع طلعني للشومبرة و هيام و بناتها و حلا و حنين فوق راسو، حطني فالبونك و يقول هادي علاش راهي ترجف هكدا؟! قالي اهدري معايا ما تقعديش تشوفي فيا اهدري تعيشي.. قالتلو هيام بالاك الحمى، قالها راهي باردة ڨلاص و يقولي ليليااان ردي عليا اهدري، و هيام تقولي انطقي علاش راكي ساكتة؟! بصح ما قدرتش نجي نهدر نحس لساني مربوط وليت نرجف كثر خفت من الحالة لي كنت فيها علاش جسمي انشل علاش ما قدرتش نهدر؟
تعاونو بدلولي حوايجي كانو يقطرو و انا مخشبة، منبعد حلا جابت الفراش و صراع غطاني بربعة كوفيرطات و قال لهيام راهي فاتت الوحدة تع الليل وين رايح نديها دوك؟ شكون لي هدر معاها حتى صرالها هكدا و الله غير نعاود نرجعو لكرش يماه قوليلي برك شكون، منبعد حط يدو على راسي و يقرا فالقرآن عليا حتى غفيت..
غدوا منداك الصباح كي فطنت كان صراع خرج، حاولت نحرك روحي قدرت وقفت نورمال حمدت ربي عمبالي تشليت، كان برك راسي يوجع بزاف و رجليا ينملو و كلشي يسطر عليا.
كانت الجنازة فالدارة، دخلت عليا سارة قالتي صباح الخير كيفاش راكي دوك؟ خوفتينا عليك لبارح، جيت نجاوبها ما قدرتش لساني مربوط وليت نبكي قد ما سييت والو، قعدت فالقاعة نبكي و حاكمة في رقبتي نحس النار شاعلة فيها و حرف ما قدرت ننطقو، قالتلي سارة وشبيك؟ شريتلها بيدي بلي ما قدرتش نهدر، حبطت تجري جابت يماها، شربتلي الما حاولت معايا بصح والو، عيطت لصراع و حكاتلو قالتلو ليليان تعڨنت، طلع يجري عينيه كانو حمورا من البكا تأثر بزاف بموت رؤى فكراتو في وليدو حرب، غير شفتو مديتلو يديا و نبكي جا حضني و يمسح على راسي، شربلي الما و يقولي كالمي روحك و حبسي الدموع، قالي حايبا تهدري درتلو براسي إيه، قالي ما تخافيش قولي صراااع، حاولت ننطقها حرف ما خرج، بدا يحك في وجهو تقلق خزر في هيام قالها قوليلي برك شكون وصلها لهاد الحالة منواش خافت؟ قالتلو و الله واحد ما هدر معاها هي خوافة ياك تعرفها
حطني في فراشي و قعد محضني و يحاول معايا بلعقل باش ننطق و يهدن فيا منبعد جا نايض حكمت يدو و شريتلو براسي تع ما تروحش، قالي و الله ما نخليك بصح عيب الرجال راهم لتحت نكمل معاهم و نطلع ليك، دوك تكالماي و ارقدي غير نكمل نجي لعندك..
هو راح و هيام جابتلي ناكل قالتي بركاي ما تقنطي في روحك هدا مكتوب الله الطفلة الله يرحمها لحق نهارها، ما حبيتش ناكل غاضتني عمري قلت خلاص رجعت عڨونة..
لحق المغرب دخل صراع قالي علاش هكدا يا ليليان بركاينا مايكل نوضي تشوفي معايا، جبدلي حوايجي و دخلني للدوش وجدهولي قالي أنا ندوشلك خفت ما تقدريش، شريتلو تع ندوش وحدي، قالي معليه كملي دوك نرجعلك، مسح على راسي و خرج..
دوشت دخلت للشومبرة و قعدت نمشط و نخمم فواش صرا حتى دخل كان باين عليه التعب، قالي واش ليون كيفاش راكي؟ خزرت فيه جيت نبكي قالي اشششت ماتبكيش، أيا تحبطي معايا تتعشايا و دوك ترقيلك يما ترتاحي..
حبطت معاه كانت قاعدة أسماء و شيماء و إخلاص و نور، نطق صراع قال للحاجة يما لسانها تربط و ما قدرتش تهدر لوكان غير رقيتيلها، قالتلي الحاجة ارواحي بنتي قدامي، حطت يدها على راسي و بدات تقرا عليا و صراع حاكم يدي، دخل الحاج و نائل، قال الحاج وشبيها؟ قالو ما بيها والو برك مريضة شويا، حسيتو كان يهدر فوق قلبو معاهم كاش ما صرا ما بيناتهم..
راح صراع للكوزينة باش يقولهم على العشا ليا، قالت إخلاص للحاج راك تشوف الفيلم لي راهي دايراتو؟ في عوض ما يحاسبها قاعد يبربر فيها، قالك حقا حقا تعڨنت.. دار ليا الحاج يهدر معايا شريتلو بلي ما قدرتش، قالهم هادي راهي تورني و  تتفشش على صراع مسكين..
جابلي صراع العشا قعدني قدامو و قالي خلاص ارتاحي ما تقعديش تحاولي كولي دوك عمري و ما يكون غير الخير ..
نشوف فيهم كامل واحد ما آمني بلي صح ما قدرتش نهدر حتى الحاجة قالت زعما صح؟! بالاك هي ما حبتش تهدر.. تقلق هو قالهم دوك صح ماشي صح خليو الطفلة في حالها و إدا راهي تتفشش ياك عليا ماشي على حتى واحد فيكم، واقيل سمع كلام إخلاص و الحاج لخطر كان باين عليه الزعاف، رفد موصو لحم حطهولي فالخبر و قالي كولي دوك انت، من الخوف كليت حتى تخمت، نضت غسلت و طلعت لشومبرتي، انتبهت بلي أم سعد و سعد و نوال و ضحى ما كاشهم.
دخل هو صابني نبكي و ندعي حطني فوق البونك و حضني و راسي على صدرو  و قالي ما تعمري راسك بوالو، كي راهي نفسيتك عيانة برك، دوك تريحي و ترجع الشابة ديالي تغرد كيما زمان ما تقلقيش روحك، شفت فيه حبيت نفرغلو قلبي و ما قدرتش و هو فهمني و حس بيا، جبد تلفونو عطاهولي قالي اكتبي و فرغيلي قلبك، كتبتلو أنا السبب في موت رؤى؟ قراها و قالي وشنو هاد الكلام؟ هدا مكتوبها تعددت الاسباب والموت واحد، صح يماها قصرت و ما انتبهتش عليها بصح مقدرة من عند ربي سبحانو طير جنة، كتبتلو يمال علاش ضربت نوال؟ قالي كانت النار شاعلة في قلبي ساعة و أنا نعيط نوضي لبنتك و هي لاتية بالحكايات منبعد جي تتهم مرتي و فوقها تعيط في وجهي، كتبتلو انا خفت منك تحاسبني قعدت نرجف، قالي و انت علاش وش ذنبك باش نحاسبك؟ يماها ما عستهاش و باباها خلا الروڨار مفتوح و علبالو بلي عندنا دراري صغار فالدار، كتبتلو رايحة نبقى هكدا ما نهدرش؟ قالي لالا عمري غدوا الصباح راني دايك للعاصمة ما نخلي حتى طبيب حتى تبراي.. باس راسي و قالي ارتاحي احكمي التلفون شوفي وش يعجبك و العبي ما تقعديش تخمي.. كسلني على صدرو و حط يدو تحت راسو و انا التهيت بالتلفون حتى انتبهت بلي رقد نضت غطيتو حس بيا فتحلي يدو حطيت راسي عليها عطيتو بظهري و قعدت نلعب بالتلفون حتى رقدت...