مراهقة والاربعيني بلهجة جزائرية

48

#المراهقة و الأربعيني:

#الجزء48:

غدوا منداك مع العصر جات هيام و راحت مع صراع قضاو للوليمة و عيطنا لأم يوسف جي تعاونا وجدنا كلشي قعدت اللحم قال صراع الصباح نذبح الكبش..
الصباح نضت على السبعة الدار كانت نقية وجدت الفطور جا الحاج فطر معانا هو و أم سعد، منبعد طلعت لشومبرتي وجدت روحي دخل صراع باش يبدل كي شافني صفر قالي هدا كامل ليا؟ قتلو لالا على جال الضياف، عقد حواجبو قالي يمال ما كاش خرجة منا، قتلو لالا تعيش و الله غير ساعة و أنا نسڨم في روحي، ضحك قالي ما تحبطيش اصبري نبدل و نحبطو كيف كيف، قتلو علاش؟ قالي حبيتي واحد يشوف فالزين ديالك من غيري و نفقسلو عينيه من، قتلو ياك مع النسا علاش رايحة نقابل الرجال؟! قالي أنا هكدا نغير، ضحكت قتلو مهبول قالي مهبول بيك.. قتلو جاو؟ قالي إيه جاو دار عمي صالح و عزام و مازال يزيدو يلحقو ان شاء الله، قتلو يمال خف البس..
كمل حكمني من يدي و حبطنا كيف كيف.. كانت قاعدة إخلاص و حلا و هيام و أم سعد و ختها مرت صالح  وبناتها و نسا عزام و عرايسز و بناتهم، جبد يدي و قالي يلا أم حرب سلمي على عمومي، سلمت عليهم هدرو معايا جونتيمو، قالي عمو عزام أم حرب؟ يمال كاين طفل إن شاء الله.. قالو صراع حرب راهو جاي فالطريق إن شاء الله، قالتلو أم إخلاص علاش أنت ناوي تسمي وليدك حرب؟ قالها إيه عمتي على اسم وليدي الله يرحمو..
كملت سلمت عليهم و رحبت بيهم و رحت للكوزينة مع أم يوسف و هيام، شافت فيا هيام و ضحكت قالتلي الله يبارك عليك ما شاء الله، دورت راسها أم يوسف قالتلي و الله ما عرفتك عمبالي وحدة من الضياف ضحكت، قالتلي الله يسترك بنتي و يحفظ مولا بيتك..
قعدت نخدم معاهم قالتلي هيام ما توسخيش روحك روحي اقعدي مع يما يا الجايحة خرجيلهم قلوبهم ضحك قلتلها ههههه غالي و الطلب رخيص.. و رحت قعدت فالهول مع الحاجة حسيت إخلاص و يماها و خياتها حبو ياكلوني، سقساتني مرت عمهم قالتلي صح راكي اونسانت؟ درتلها براسي إيه.. ما جاياش نكدب صراع قدام أهلو،نطقت أم إخلاص قالتلها و الله صراع ما قصرش حتى لقب أم حرب عطاهولها و كان أمنية وجدان الله يرحمها و مع لخر ما نالت لا وليدها لا اسمو كلشي راح للبراوي يادرا وين يروح صراع من ربي، تبسمت و قلتلها لالا خالتي هو حب يسمي من حبو لوليدو و حرقتو عليه ما قدرش ينساه سينو أنا مادابيا نسمي إلياس ولا زكريا بدات تنسف و الحاجة تردلها.. نطقت مرت وليد عمهم قالتلي كبرتي و سمني على وش كنتي آخر مرة كي شفناك كنتي كي مطرق الشوا، قلتلها لتم كان صراع مخطوف كنت في حالة بلا بيه هو صحتي كي رجع رجعتلي صحتي معاه، قالتلي حلا لالا رجعتلك كي جابلك بابا خدامة قالتلها إخلاص خدامة؟! قالتلها إيه قالك فقيرة منها نعونوها و منها باش ما تعياش ليليان.. قالتلها إخلاص إيه بنت الميزيرية طلعلها الشان على آخر الزمان.. تعنكرت فيها الحاجة و أنا واجبتها قلتلها وشبيك حنونة؟ ماشي يقولو وعلى نياتكم ترزقون.. ربي عطاني على حساب قلبي أبو حرب يدللني و نعيش في خيرو.. لوكان ماجيتش مليحة و كان قلبي معمر حقد و غل راني قعدت بايرة و واحد ما يقبل بيا.. اخلاص كي ما قدرتش تواجب و خافت دير مشكل في داري ولات ناضت بلخف..
جازت نور عليا قالتلي ليليان نخليلك عابد شديهولي نروح نعاونهم فالكوزينة تعرفيني ما نقدرش نقعد بلا خدمة.. شديت عليها الطفل قتلو يا عمري على فهد.. قالتلي أم سعد وسمو عابد، قلتلها لالا أنا قريت اسمو فهد فالكوارط و قاعدة نغزل فيها و نقولو فهد يا فهودي و هيام غمزتني و ضحكت.. أم سعد رجعت تغلي قالتلهم راكم تشوفو ما كفهاش سرقت اسم حرب الله يرحمو حتى اسم وليد وليدي حبت تبدلو عمبالها تمشينا كيما تحب، قلتلها علاش خالتي بالعكس اسم فهد شباب كثر و رفد الطفل ورحت للكوزينة، قالتلي هيام قلتلك خرجيلهم قلوبهم بصح ماشي هكدا.. دخل صراع قالي واش أم حرب وجد الغدا؟ قتلو إيه عمري رانا نستناو تصليو و نسقيو الماكلة، قالتلي هيام اييي هييي ليليان ما راكيش ساهلة يااااو.. قلتلها ردي بالك وسمني أم حرب ههههه.. قالتلي واقيل بالصح كدبتو الكدبة و صدقتوها ههههه.. منبعد قالتلي اسمعي و بالاك صح راكي اونسانت شكون شاف.. وقتاش كانت آخر دورة شهرية، قلتلها قبل ما نرحلو لهنا، قالتلي إن شاء الله ربي يكتبلكم طفل يرفد اسم باباه و يسند يماه بجاه الحبيب محمد، قلتلها آمين..
سقينا الغدا جازت الوليمة روعة.. كامل عجبتهم الدار و قالو واسعة و متحوفة تقول قصر الله يبارك، و إخلاص لوكان صابت تقتلني و حلا واقفة معاها و مع خالاتها و يماهم حتى كي عطيتلها طرشونة جبدها من يدي بالحقد قريب قلعتلي دراعي..
كملو غداهم و خرجو للجنان قعدو داروا قعدة شعبية و شعلو الغنية تع (بين العصر و المغرب) و قعدو يشطحو و أنا نطل عليهم و نضحك.. صراع كان حاكم وليد عمو سليمان يشطح معاه و كي يوصل المقطع تع (والله لنصب مرجوحة من سطوحي لسطوحا وخلو يقولو حرامي روحي متعلقة بروحها) يغمزلي و يعاود معاه (روحي متعلقة بروحا )
منبعد قعدو يڨصرو شافني عمهم عزام قالي ارواحي تريحي معانا أم حرب ماراكيش براوية.. رحت قعدت معاهم بدا يسقسي فيا على أصلي و ديانتي و كيفاش بابا الله يرحم حتى أسلم و وعلاش أنا ما أسلمتش حكيتلو كلشي منبعد دار لصراع قالي ما قدرتش دخلها فالإسلام؟ قالو هادي هي الشقراء من قوم عيسى لي قتلت المسلم بحبها، ماشي هكدا يقول ناظم الغزالي (شقراء من قوم عيسى من اباح لها قتل امرىء مسلماً مات بها ولهاً) .. ضحك عمو قالو هديك سمرا ههههه.. قالو و أنا عطالي ربي شقراء ولاو يضحكو و يدعولنا بالسلامة، شويا و ناضو قالونا إن شاء الله عتبة مربوحة و تبقى داركم ديما عامرة ربي يحفظكم و راحو كامل..
طلعت للشومبرة بدلت حوايجي و حبطت عاونت أم يوسف فرزنا كلشي، جبت الدراهم من عند صراع و خلصتها قعدت غير تدعيلنا و راحت..
طلقتنا الوليمة كي التشلاوق من التعب كي انا كي هو، دخلت عليه للشومبرة قالي عمري قبل ما ترقدي وجديلي كابة صغير غدوا إن شاء الله الصباح نروح للعاصمة عندي خدمة؟ قتلو وشمن شغل هدا؟ تبات؟ قالي علاش من ليوم برك لي موالف نطلع للعاصمة على جال الخدمة؟ قتلو و تبات؟ قالي يمال علاش قتلك وجديلي كابة؟ قتلو وين تبات في لوتال ولا وين؟ قالي وش دخلك؟ قتلو كيفاش وش دخلني؟! إدا معول تبات عند دار أبو صفاء غير انساها ماتروحش فهمت ما نقبلش، قالي و تأمريني ملفوق؟! قتلو راك تستهزا بيا؟ قالي أيا قادري روحك دوك الواحد راهو عيان خير ما تندمي عليها وجديلي الكابة و بلا هدرة زايدة، قتلو ما نوجدلك ما تروح، قالي قادري روحك ما تخلينيش نوض ليك قتلك وجديهاااا.. قتلو حتى تقول وين رايح تبات، قالي في دار أبو صفاء ارتحتي؟ قتلو نروح معاك، قالي عندي خدمة لتم علاش حتى نديك معايا؟ قتلو أنا نقعد فالدار و أنت اقضي شغلك و كي تكمل نرجعو كيف كيف.. قالي باش تكرهيلي حياتي بالتلفون كيما المرة لي فاتت.. سفر تع يومين و لا ثلثيام و نرجع ما تكبريهاش و وجديلي الكابة.. قتلو قلبي ماشي مرتاحلك ما نوجدش غير و إدا رحت معاك رجلي على رجلك.. قالي علاش ماشي مرتاحلي يا لالة؟! قتلو اسمهان عينها عليك ما نرتاحش كي تروح لتم نهبل، قالي بصح أنا ما علاباليش بيها معتبرها كيما ختي، ضحكت باستهزاء قتلو ههههه آمنتك.. لالا حبيبي و الله ما صرات.. ما تروحش لدار أبو صفاء غير و إدا كنت معاك، تنهد و قالي خلاص ما نروحش لعندهم وجديلي برك قشي، قتلو و راك مستني مني نصدقك واقيل ياك؟ تحوس برك تسكتني.. قالي وشنو عمبالك تمشيني كيما تحبي؟! يمال نقول حاجة نروح و نبات و إدا ما عجبكش الحال اخبطي راسك مع الحيط صافا هكدا.. قتلو دوك وين بدات تخرج الحقارة ديالك.. أنا قلت هكدا و يجبد عليا بكف قالي شكون الحقير؟! أنا حقييييير اهدري.. حبطت راسي و سكت، قالي أنت وجهك ماشي تع دلال غير نفتحلك العين شويا تتقلبي عليا.. ردي بالك تزيدي ديباصي لي ليميت معايا و الله غير ندفنك.. خليتو و حبطت لتحت للصالدوبا نغسل وجهي و دموعي تجري، دخلت لشومبرة الحاجة فرشت و تكسلت، دارت ليا الحاجة قالتي وش كاين ليليان؟ قلتلها ما بيني والو حايبا نرقد، قالتلي وعلاش ما ترقديش مع راجلك؟ دخل هو قالها يما غدوا الصباح طالع للعاصمة و راني عيان خفت ما نفطنش كي يأذن الفجر عيطيلي فالتلفون نوضيني، قالتلو إن شاء الله يا وليدي بصح وشبيها مرتك؟ قالها هادي راهي تتدلل بالزيادة تحلولها العينين خليها تتربى و خبط الباب و راح.. قالتلي الحاجة ليليان وشبيك معاه؟ قلتلها الحاجة راني مدوخة حبيت نرقد، قالتلي وش صرالكم ضربوكم بعين؟ نوضي بنتي اطلعي ترقدي مع راجلك، قلتلها الحاجة الله يخليك خليني، قالتلي قتلك نوضي اطلعي لشومبرتك.. خبطت و خرجت رحت رقدت فالشومبرة لوخرا حتى للفجر شميت ريحتو قريبة ليا و حسيت بيه قاعد عند راسي و يشوف فيا، طابس باس جبهتي و خدي، جا يبوسني من فمي بعدت و قعدت قتلو وشنو؟ قالي على والو زعفتي و رحتي رفدتي فراشك و الله ما عندي والو.. قتلو يمال ما تروحش لدار أبو صفاء، قالي شوفي أنا صح نحبك بصح ما نحبش تتأمري عليا.. جيت نقولك بلي ما عندي والو و وحدة ما كاينة في قلبي من غيرك.. قتلو ما نستعرفش بهاد الهدرة.. شوف صباعتيك مازالهم في خدي و بوجهك و جاي تصالح، قالي انت لي وصلتي روحك.. كاين وحدة تقول لراجلها خرجت الحقارة ديالك؟!  نوضي ما تبقايش زعفانة و أنا رايح على الطريق.. قتلو روح الله لا تروحك.. سكت... منبعد قالي هادي عليا؟! دورت وجهي عليه و سكتت.. قالي مشكورة.. خلاني و راح..
قعدت نغلي و التوسويس قتلني.. يومين و صراع ما عيطش فالتلفون قلت في قلبي خرج زعفان و خفت زكارة فيا يعطي لاسمهان فرصة تتقرب منو.. قلت نعيطلو و نشوف وين راهو منبعد تفكرت بلي تلفوني راهو عندو ياك داه عقاب ليا زعما على جال هداك الفيديو.. عيطتلو من تلفون الحاجة صونا صونا صونا منبعد رفد غير قلت ألو نسمع في صوت اسمهان تقولي الو اهلا الحاجة...
تصدمت قلتلها هدا تلفون صراع وش راهو يدير عندك؟ قالتلي شكون انت؟ قلتلها انت لي شكون؟ عرفت صوتي قالتلي ااااه ليليان و الله غير راهو راقد و تلفونو كان فلاشارج صونا بزاف و بنت جيرانّا رفدت بلخف تعرفي الدراري على هديك واجبت.. وش راكي؟ قلتلها صراع راهو عندكم؟ قالتلي إيه.. قلتلها اعطيلو التلفون.. قالتلي راهو راقد و ما نقدرش ندخل نوضو منبعد عاودي عيطيلو.. قلتلها ينعل باباك و بابات لي ولداتك و بابات لي خلاك تحكمي تلفون راجلي يا الساقطة يا سراقة الرجال بعدي على راجلي خير ما نفضحك قدام أمة لا إله إلا الله.. كوبات في وجهي.. بديت ندور و النار شاعلة فيا كان فاز فالهول رفدتو و كسرتو و رميت تلفون الحاجة و صغت ااااااا.. حتى جات حلا تجري قالتلي وشبيك؟ قلتلها ما دخليش روحك أنت.. و عاودت رفدت التلفون عيطتلو يصوني يصوني ما يرفدش و مع لخر كوبا عليا زدت شعلت كثر.. قالتلي حلا وش كاين اهدري؟ و الحاجة ملتحت عيطت لحلا قالتلها وش راهو صاري لفوق حلاااا؟ قالتلها و الله يا جدة ما علبالي وشبيها هادي راهي كي المهبولة و ترجف.. دخلت لشومبرتي بديت نجبد في شعري و نصوغ صرااااع ياك نحكمك ولا لالا... ااااااخ و الله غير نبرد قلبي فيك يا حقير يا ساقط بو النسيوات عمبالو يكدب عليا، نحط يدي فالنار غير كاين ما بيناتكم حاجة.. منبعد بعثتلو ميساج قتلو ترفد التلفون و لا نحرق الدنيا فوق راسك.. قعدت نزغد في رجلي و ناكل في ظفارتيا من القلق و نشوف فالتلفون بالاك يواجبني بصح والو.. زدت كتبتلو راهو عاجبك الحال كي راك تحرقلي في قلبي واااااااجب.. كيف كيف ما واجنيش.. عاودت عيطتلو شحال من مرة و ما رفدليش.. حبطت للحاجة قلتلها راكي حافظة النيميرو تع أبو صفاء؟ قالتلي علاش وش صرا وش تحتاجي عندو؟ قلتلها اهدري حافظاتو و لا لالا الله يخليك رايحة نمووووت.. قالتلي فهميني يا بنتي وش صرالك علاش راكي هكدا تاكلي في روحي و شعرك طاير فالسما؟ قلتلها ينعل شعري راني نقولك حافظاتو ولا لا لااااااا.. قالتلي جيبي تلفوني لهنا.. قلتلها ما نجيبش اهدرييي .. قالتلي و دوك تقادري روحك و لا لالا؟ خليتها و خرجت بديت نقلب فليكونتاكت حتى صبت اسم أبو صفاء عيطتلو رفدلي قالي أهلا الحاجة.. قتلو أهلا عمو أنا مرت أبو حرب، قالي أهلا بنتي غير لخير كاش ما تحتاجي؟ قتلو نحتاج أبو حرب راني نعيطلو و ما يرفدش، قالي و الله يا بنتي هدا وين خرج اصبري نخرج للزنقا نشوفو بالاك مازال ما راح.. نسمع فيه يمشي منبعد قالي ماكاش طونوبيلتو واقيل راح.. قتلو إيه راح.. صحا.. و كوبيت [ غير قولولي وشمن حديقة حيوانات طلقو هاد المخلوقة😐]
جيت رايحة للهول صونا التلفون في يدي صبتو صراع رفدت و بديت نعيط انت وشنووووووو... قاطعني يعيط يا بنت ******* ينعل لي جابك ليا بنت ال******* .. نرجع لوكان نصيبك قدامي راسك نطرطقو ..... كوبيت في وجهو .. 
خفت من عياطو هدا وشبيه؟! عاود عيط خفت نرفد و لوكان ما نواجبوش تان يجي يقتلني [ و كي شافت روحها ماشي قادرة على شقاها و تخافو علاش دير هاد السينيما كامل 😒]
غير رفدتلو بدا يعيط قالي و تكوبي التلفون في وجهييييي.. و الله غير نعاود نربيك كي نرجع اصبري عليا برك.. و كوبا في وجهي..
قلت وشبيه هدا يطير وحدو؟! عاودت عيطتلو فالتلفون باش نعرف على وشمن أساس راهو يزڨي عليا بصح ما رفدليش [ هادي لي قالك ألعبها بهلول تشبع كسور 😮‍💨 راميتها النية فالهبال.. زعما بالصح ما علبالهاش وش دارت؟! ]
دخلت الحاجة قالتلي أنت واقيل ما تستحيش جيبي تلفوني تشوفي جيبي.. عطيتهولها و طلعت لشومبرتي ناكل في روحي قعدت نهار كامل هكداك النار شاعلة  فيا..
غدوا منداك ما جاش زدت تقلقت كثر، جاز نهار ثالث و رابع و حسو ما كاش عيشني في حرب نفسية مع روحي، لوكان جا و داوسنا أرحم من كي راهو مخليني هكدا..
النهار الخامس جات أم يوسف بديت نخدم معاها فالشغل و مورالي مكرفس حتى قالتلي أم علي ما راهيش جي لعندكم؟ قلتلها لالا هاد البريود ولادها يجوزو امتحانات، قالتلي وشبيك ما راكيش في حوالك؟ قلتلها راسي يوجع فيا، قالتلي هداك وجيع الراس كامل راهو قاتلنا من الزعاف، كل واحد زعافو على قدو انا معرفتش عليمن نديرها، قلتلها علاش وشبيك؟  قالتلي لوسي هو راجلي الله يرحمو راهو مكرهلي معيشتي يمشي و يطعن في شرفي يقول للناس تخدم فالديور  و هكدا تخرج و هكدا ترجع و هوما جامي عاونوني في مصروف الدراري.. قلتلها الله لا تربحو راني حاسة بيك جربتها كي يتهموك و أنت خاطيك.. قالتلي و انت وشبيك وجهك أصفر هكدا؟ قلتلها شويا مشاكل مع أبو حرب، قالتي خير ان شاء الله الراجل باين يعشقك.. قلتلها كيفاش عرفتي؟ قالتلي ما شفتيش كيفاش كان يراقب فيك كي يدخل للكوزينة و عينيه يبرقو كلما يشوفك، بصح كاينة وحدة باينة تكرهك كان الشر باين في عينيها، قلتلها شكون فيهم؟ قالتلي ما عرفتهاش وحد الطفلة جايبا روحها و كتافها عراض كانت مع بنت راجلك، قلتلها آاااا.. هديك بنت عمو و في نفس الوقت خت ضرتي لي توفات، قالتلي تكرهك كي ديتي بلاصة ختها؟ قلتلها لالا حبت تديه هي، قالتلي ياخاه تطمع في راجل ختها؟ قلتلها بايرة على روحها المهم يصحلها راجل ينحي عليها وحش الليل، قالتلي و هي سباب المشكل؟ قلتلها لالا..
قعدنا نخدمو و نحكيو حتى سمعت باب الڨراج تفتح طليت قلتلها أم يوسف كملي أنت الشغل هنا جا أبو حرب.. وقفت فالكوزينة ڨارا الطونوبيل و دخل للكوزينة قالي ربي يعاونك، قتلو وش يعاون فيا.. وين كنت؟ سكت و جا رايح قتلو لالا حبيبي احبس احبس عمبالك نخليك هكدا بالساهل و غلقت الباب تع الكوزينة، قالي ليليان راني عيان بعدي عليا خير ما تخلصيها غالية.. قتلو نخلصها ما نخلصهاش دوك تقولي وش قعدت دير فالعاصمة سمانة كامل، قالي نمشي على حساب ڨوسطويا و كيما تنفحلي ماشي أنت لي تحاسبيني.. و دار باش يخرج من الباب الثانية، رحت نجري قتلو و الله ما تخرجها تقعد معايا و تفهمنييييي و جبدتو، حكمني من ذراعي بالزور و أنا غلقت الباب باليد الثانية و نحيت المفتاح..
قالي شوفي راني عياااااان.. اتقي شري ما تخلينيش ندخل فيك دوك.. قتلو ما يهمنيييييش دوك تقولي وش كنت دير فالعاااااصمة.. قالي افتحي الباب.. قتلو ما نفتتتتتتتتحش.. حطيت المفاتح في زوج في صدري و قتلو دوك تقولي وش كنت دير و يكون في علمك لوكان تقتلني ما نخليكش حتى تقولي وش عندك لتم..
دور وجهو تمهد و قال استغفرك اللهم و أتوب اليك .. اللهم طولك ياروح .. ياودي راني عيان افتحي الباب خليني نطلع وخري عليا.. قتلو ارحمنييييي.. علاش راك ديرلي هكدااااا.. وشنوهو ذنبييييي... قالي ذنبك طيحي بزااف القدر و تصرفاتك رجعت ما تنحملش.. قتلو من حرقة قلبي انت علاش ما تحسش بيا لوكان ما جيتش نحبك ما نهتمش.. افهم افهمممممم رايحة نمووووت و بديت نشد فيه و تبكي.. رمى الكابة و بعدني عليه قالي كبري عقلك شويا هبلتينيييي... قتلو علاش انت خليت فيا العقل حرام عليك لا ليلي ليل و لا نهاري نهار حس بياااااا... قالي وش درتلككككك.. ألف مرة قتلك ما عندي والو و الله ما عندي والو.. تروحي تبهدليني مع الناس هكداك؟! انا مرتي تسبهم و تعايرهم؟! لوقتاش تبقاي هكدا طايشة.. خلاص ارحميني.. يكون في علمك لوكان في هديك الدقيقة كنتي قدامي  نقطعك بصح كبرت عقلي و جوزتهالك و دوك افتحي الباب خليني نطلع للشومبرة نريح رايح نكلاطي.. قتلو ما تقنعنيش و الله ما تقنعني.. قلبي حاس بلي كاينة حاجة علاش حتى تقعد سمانة لتم انطققققق.. قالي اعطيني المفتاح خليني نروح.. قتلو ما نخليكش تروح حتى تقولي علاش قعدت سمانة و أنت قلت مع اللول تقعد غير ثلثيام اهدرررررر..  قالي ماشي أنت قلتيلي روح لاه تروحك؟ رحت ما رجعتش وش حبيتي عندي تان..
جبدت الكرسي و قعدت نمسح في دموعي و هو مدور وجهو يتنهد و يستغفر..جبدت المفاتح حطيتهم قدامو و حطيت راسي و نبكي، قالي خلاص و الله غير قتلتيني خلاص، قتلو خليني و اخرج، قعد يخزر فيا منبعد فتح الباب و طلع للشومبرة و الحاجة تعيطلي ليليااان.. ما واجبتها ما رحت، قعدت في بلاصتي نبكي حتى دخلت أم يوسف قالتلي علاش راكي ديري في روحك هكدا نوضي نوضي ختي الرجال كامل هكدا ما يجي منهم غير الهم، بصح أبو حرب يحبك ما تعطيش فرصة لغيرك اطلعي وجديلو دوش علاش راكي غابنة روحك هكدا و غابناتو معاك روحي افتحي صفحة جديدة مع راجلك.. غسلتلي وجهي و لبست حجابها قالتلي أنا نروح و أنت اطلعي لراجلك ما تخليهش وحدو ألف وحدة تتمنى تستشفى فيك ما ديرلهمش غرضهم احملي ما دامو يحبك.. باستني و راحت..
رحت للحاجة قالتلي هكدا تستقبليه بالمشاكل؟ الناس تسب فيه على جالك و أنت حارقتلو قلبو؟ هو جا عيان و أنت ما قابلتيه بكلمة حنينة ما حطيتيلو لقمة سخونة ما وجدتيلو حوايجو و فوق هاد الشي كامل تتعايطي معاه في وسط الدار.. ما تقادري ما تقولي كبير عليا هكداك تهدري معاه....
طلعت للشومبرة دخلت صبتو متكسل و حاط يدو على عينيه، حس بيا نحى يدو شاف و عاود غطا عينيه، قعدت فالبونك و نغزتو لكتفو، رفع يدو قالي وش تحتاجي، قتلو تنوض تحكيلي كلشي وش ما بينك وبين اسمهان.. تقعد ربع رجليه و قالي بس
تسمى دوك كل وحدة تشوف فيا معنتها مابيني و بينها حاجة؟ ما عندكش ثقة فيا؟ شاكة في حبي ليك؟ قتلو يمال علاش حتى تروح عندهم، قالي هديك داري و أنت علبالك، قتلو علاش ما تروحش للبرطما ديالك؟ قالي قتلك من قبل بلي كريتها قاعدة فارغة هكداك برك على الأقل نستفاد منها، قتلو إيه عندك الحق كملت حكاياتك مع أم مصطفى و ما ولاتش تفيدك، قالي هي بالدات يرحم داك الفم، قتلو وشنو راك تبروفوكي فيا و لا واش؟ قالي يمال اوزني كلامك و اعرفي وش راكي تخرجي من فمك.. قتلو وعلاش كدبت عليك؟ محيط بونسيوات.. علبالك عفتك.. قالي و دوك ما راكيش معولة تقادري روحك، نضت من البونك وقفت قابلتو و قتلو مليييت مليت تفهم، لي جي تخزر فيك،قالي وانا وشنو ذنبي؟ قتلو ما تلعبهاش خاطيك و تبدا تتمسكن و الله غير راهو عاجبك الحال و أنا رايحة نطرطق منك، قالي و المطلوب؟ قتلو تقولي علاش حتى تروح لدار هداك لي ما يتسمى، قالي أيا قادري روحك تشوفي، قتلو واجبني.. قالي الدار داري و أنا مخلي فيها شومبرة ليا معتبرهم اهلي فعوض ما نروح لوتال نريح عندهم الوقت لي تكون عندي خدمة لتم و منها نتفاقدهم و نشوف كاش ما يحتاجو وليدهم صاحبي و مات وهو يوصيني عليهم.. قتلو و اسمهان علاش تمشي قدامك نورمال؟ علاش حنا كي يجي كاش راجل لعندنا صوتنا ما تقبلش يتسمع و هي داخلة خارجة و تشلل في عينيها ملفوق لا حشمة لا حيا.. قالي يا بنت الناس و انت وش راحلي فيها ياك إخلاص قدامك ترمي في روحها عليا كاش نهار شفتيني عبرتها؟  و الله وحدة فيهم ما تحلى في عيني من غيرك، دوك كل وحدة تخزر فيا تقلبي حياتي على جالها لجهنم و الله غير عييت.. أنا راجل عندي قيمتي ما بين أهلي و ناسي و عندي معارفي شايف و عايف بزاف نسا يعرضو رواحتيهم عليا راكي تشوفي فيا نجري موراهم؟ انت فيك زوج سنتيمتر ما قدرتش نحكم فيك مهبول أنا باش نبلي روحي بحكايات النسا، كبري عقلك شويا و الله غير مرضتيني بركاينا من الدواس و الزڨا عيينا.. ارواحي لحضني تشوفي.. قتلو أنت هداك ما يهمك تخمامك غير رغباتك وحاجتك ما بيكش ميت عليا.. قالي نعل الراسة تاعك منين جيتي ليا يا بنت الكلب اخرجي عليااااا... و ناض كركرني من يدي و هو يسب و يعاير خرجني من الشومبرة و خبط الباب مورايا و يعيط كرهتيلي حياااااتي.. تبليت بوحدة كيما نتياااا..
رحت قعدت فالصالة نجبد النفس و نتنهد ما عرفتش كامل وش ندير.. ما كنتش شاكة فيه و علبالي بلي يحبني و ماشي من الجور لي يتبع النسا و يجري موراهم بصح قلبي ماكانش مرتاح و إحساسي يقولي بلي كاينة حاجة و هو سقسيتو شحال من مرة و يقولي ما عندي والو..
خليتو وحد النص ساعة و عاودت دخلت للشومبرة صبتو مطفي الضو قربت قعدت على البونك كان متكسل على جنبو مغمض عينيه و مربع يديه، تكيت على يدي و قعدت نخزر فيه فتح عينيه قفزت و غطيت راسي بالكوفيرطة خفت يعيط عليا.. بدا ينسف و يستغفر دار الجهة الأخرى و رقد ..
غفيت شويا كي فطنت ما لقيتوش قدامي، حبطت لتحت صبت الحاج قاعد معاه و يحكيو كي شافني صراع خزر فيا منبعد كمل يهدر مع باباه، قتلو وش راك عمي؟ قالي أهلا و كمل يهدر معاه قالو شوف يا وليدي انا عييت و خاوتك خليتهم في راسي منين نجيبلهم، سعد راقد و عوايلو في راسي، زوج نسا و 11 طفل، نجري غير أنا و نائل و ما لحقناهمش، قالو و هو علاش ما يخدمش؟ قالو وش يخدم يا وليدي يظل راقد و ملي راحت المولدة الكهربائية ديالو قعد عطال بطال يصرف على روحو من دراهم الكرا تع دارو و في الدار الكبيرة دورو ما يحطوش، قالو بابا راني عيان و مشاكلي تكفيني ما نيش قادر نخمم قولي وشنو المطلوب مني؟ قالو تعاوني منين نجيب انا؟ و خوك شوفلو خدمة، قالو و هو علاش ما يحشمش على عرضو و ينوض يحوس على خدمة، وليدو قدو فالطول نصرف عليه أنا؟! و الله غير عيب، قالو و انت دوك وش ندير راح نطرطق من القنطة، هو راقد و ضاربها بكوتبي و انت تقولي عيب و نائل ما لحقش وحدو كلشي في راسو و أنا ما عنديش منين نجيب؟ قالو خلاص بابا ما تقلقش روحك خليه أنا نهدر معاه، دار ليا قالي اطلعي جيبيلي الدراهم ملفوق، جبتلو عطالو المصروف و راح..
قالي روحي جيبيلي لقمة ناكل.. رحت للكوزينة وجبتلو السنيوة كان قاعد مع يماه فالهول كليت غير أنا و ياه لخطر الحاجة و حلا تغداو..
واحد فينا ما هدر مع لوخر غدوا منداك الصباح كنت راقدة حسيت بيه كي تكسل مورايا فطنت حط راسو على يدي و همسلي في ودني و باسني قالي نوضي الشابة طيبتلك الفطور بيدي، حبطت كليت معاه بصح ما نهدرش معاه كي شافني مدورة وجهي عليه سكت ما كثرش معايا الهدرة..
غدوا منداك عرضنا وليد عمو لعرس بنتو رحت أنا و الحاجة و حلا، كي دينا العروسة لدار راجلها و كملنا كلشي رجعنا لدار وليد عمو جوايه ال8 تع الليل، صراع بطا ما جاش ولات حلا راحت مع خوالها و الحاجة راحت مع نائل و نور لدار الحاج و أنا قعدت نستنى فيه باش يجي يديني للدار..
لحقت ال10 تع الليل و ما يرفدش التلفون تقلقت، منبعد كوبا عليا عرفت بلي راهو قريب قريب يوصل و ما حبش يرفد قعدت ننسيستي و هو يكوبي عليا منبعد رفدلي يعيط وشبييييك راني وصلت.. قلتلو علاش تكوبي عليا؟ قالي لخطر وصلت، قتلو حتى و تكون عند الباب ما تكوبيش عليا، قالي راكي تهدري هكدا و تتداوسي قدامهم.. اصبري عليا دوك نتفاهم معاك و كوبا.. سمعت طونوبيلتو وقفت عند الباب لخطر كنت نعيطلو فالجنان جاز عليا ما عبرنيش منبا دخل سلم على وليد عمو و عماتو جاو يقعدو قالهم راني عيان و المرا دخلت عليا بليزابال كي بطيت لخطر نعست
حبو يشدونا نباتو ما حبش، كي طلعنا فالطونوبيل قالي و يما وين راهي؟ قتلو عيات راحت مع نائل لدار الحاج و حلا راحت لعند خوالها، قالي حلا علبالي خبرتني.. منبعد مسح على لحيتو و قالي يتسمى الليلة رانا وحدنا، قتلو راني نعسانة و راسي يوجع من الحس ندخل ديراكت نرقد، قالي كي نوصلو و نشوفو شكون لي يخليك ترقدي..
جا يديماري دقدقولو فالكارو حبطو صاب وليد عمو سليمان واقف قالو عيطولنا فالتلفون أهل العريس قالولنا دخل على الطفلة و ماكاش الدم راهي مقلبة لتم.. انت تعرف خوهم لكبير ياك؟ قالو إيه صاحبي، قالو يمال اطلع معايا نروحو نشوفو وش كاين قبل ما توصل للقتيلة باباها راهو مقلق.. دار ليا قالي ليليان احبطي شويا و نرجعلك قتلو وشنو صراع..... قالو سليمان لالا خليها انا ندي يما معايا و انت مرتك و نروحو ليهم كيف كيف..
ديمارينا قتلو وين راك رايح دوك؟ قالي لدار العريس، قتلو وش كاين؟ قالي راهم يقولو الطفلة ماشي عويتقة ما كاش دم عذريتها، قتلو إيه منعد؟ قالي عندك سنين و انت متزوجة و ما فهمتبش!! وشنو طينتك أنت؟ قتلو نعرف العذرية بصح كيفاش ماشي عويتقة.. دار ليا شاف فيا و ضحك، قتلو راني منيتي وش راهو صاري دوك؟ قالي عذرية الطفلة دليل شرف في عشايرنا مالڨري ما ولاش مقياس تحير النسا هادو وش ولاو يديرو غشاء و ادي و جيب بصح حنا ما عندناش هاد الأمور، قتلو وشنو هاد الحكايات نتوما صح ما تحشموش.. تبسم، قتلو هي تان حابسة لوكان دارت غشاء صيني و هي فارية، قالي اااا... ويييي يتسمى دوك جايا تشوكيني بأفكارك، غير لي ماعندهاش شرف لي دير هاد الامر و زيد حنا نفرق. مابين الدم الصحيح و المغشوش، قتلو وين علابالي أنا هكدا نقرا فالفايسبوك، قالي و الله ما كان حاجة فسداتك قد الفايسبوك، قتلو حقا كيفاش تعرف الدم الحقيقي من المغشوش؟ قالي الحقيقي يجي اسود غامق و الصيني كلار كيما الجرح العادي..
وصلنا لدار العريس صبنا الدنيا مقلبة و الطفلة مضروبة، غطيناها و وقفنا معاها، و صراع و سليمان يهدرو مع أهل العريس و يتعايطو، صراع حكم خو العريس الكبير لي هو صاحبو قالو أنت راضي على وش راهم يقولو علاش ما تعرفوناش وش نسواو و جبد سلاحو حطو في يد العريس قالو هاك هادا إدا خرجت ماشي عاتقة انا نقولك اقتلها بصح لوكان تخرج مظلومة حقها نديه من عندكم مربع على التبهديلة لي درتها ليها و لينا.. عيط علينا قالنا جيبو الطفلة تشوفو و قال لخو العريس الكبير يماك جي معانا..
دينا العروسة هديك مسكينة ترجف و رحنا للقابلة، دخل صراع و سليمان للقابلة حلفوها باش تقولهم الحقيقة تصيب وش تصيب و هددوها بلي لوكان يعرفو بلي كاش ما كاين و خبات عليهم تخلصها غالية..
دخلت العروسة و أنا و يمات سليمان و يمات العريس، كي قلبتها القابلة قالتنا الطفلة مسكينة الغشاء ديالها خشين ما يقدرش يكسرها راجلها من المرة الأولى يلزملها عملية جراحية صغيرة  باش يتفتح و لا يصبر عليها حتى يقدرلها و خرجت زادت فهمتهم.. لتم صراع و سليمان راحو لأهل العريس خرجوها من عينيهم و خلصوها طول و عرض على التبهديلة لي داروها.. حبو يديو الطفلة صراع و سليمان ما حبوش قالهم صراع لوكان ما ندورش بيكم الدنيا سبع دورات ما نتسماش، منبعد خو العريس الكبير ولا  يتعذر و يطلب فالسماح و سليمان يعيط و مع لخر قالهم خو العريس اديوها دوك و غدوا نديرو جماعة و نجيو نطلبو منكم السماح قدام كامل الناس و لي تشرطوها رانا هنا..
دينا الطفلة لدارهم و قعدوا ساعة و هو يتناقشو وش يديرو، لحقت الزوج و نص تع الليل و هوما مازالهم يهدرو نعست غفيت فوق الكنابي ناضو يضحكو قالولو أم حرب نعست روح لدارك و غدوا ان شاء الله ربي يعملها تاويل..
طلعنا فالطونوبيل مد راسو باسني و ديمارا.. انا رقدت فالطريق و ما فقتش حتى حسيت بيه كي رفدني و طلعني للشومبرة، بدل حوايجو و زاد بدلي و غطاني..
ناض صلي الفجر و رجع فطنتلو فتحتلو يديا ضحك و جا حضني قتلو نحبك بصح نكرهك، قالي و أنا نموووووت عليك، قتلو علاش تجرحني؟ قالي و الله غير نعشقك و ما نحبش كي تبكي بصح ما عرفتش كيفاش نتحكم فيك قتلك ما عندي حتى وحدة في قلبي من غيرك، حطيت راسي على صدرو و هو جبدني ليه عشنا هداك النهار تقول عرسان.. كي لحق الليل عيطلو نائل قالو نوض الطونوبيل و الحقني الحاج ضارب مع سعد و تصرع راني دايو للسبيطار..  ناض يجري لبس حوايجو و قالي اغلقي البيبان مورايا بلخف و ما تفتحيش كي يجي وش يجي و راح يجري..