مراهقة والاربعيني بلهجة جزائرية

39

#المراهقة و الأربعيني:

#الجزء39:

3 أيام حالتي حالة مورالمو و فيزيكمو، فالليل كان صراع راقد قدامي نضت حسيت الدم يجري و السطر في ظهري قتلني غير نضت من دراعو حس بيا قفز قتلو صراع السطر قتلني اخخخخ و بديت نبكي ناض يجري شعل الضو شاف حوايجي بالدم عيط قالي رايحة تطرحييييي و طلع يجري للشومبرة يلبس، فطنت الحاجة و حرب و حلا، داتني حلا للصالدوبا و الحاجة جابتلي الحوايج قوا عليا السطر صغت يا يمااااا رايحة نموووووت خرج الحاج من شومبرتو، حبط صراع يجري ناض يعيط قال مازال ما بدلتولهااااا ؟!! وين راهم حوايجها قالتلو حلا هاوليك بصح هي ما قدرتش تمشي من السطر، جا يدخلني للصالدوبا باش يبدلي ما قدرتش نتحرك، حبطت نور و نائل، دخلتني بالسيف و أنا نعيط لربي لي خلقني غسلتلي و لبستلي بالخف و تقولي قولي يااااارب غطاتني و خرجتني تسحب فيا قلتلهم ما قدرتش نمشي رايحة نموووووت، قالي صراع ديري كوراج و امشي قالو الحاج وين خارج في هاد الليل الدنيا غير إرهاب، قالو و نخليها تمووووت، قالو اصبر يا وليدي يطلع الفجر، قالو نائل أبو حرب بابا عندو الحق ما تخرجش دوك الحالة ما تعجبش ما تريسكيش بروحك اصبر حتى يطلع الفجر، قالو راكم منيتكم نخلي المرا تموت نقعد مقابلها و نشوف فيها تتعذب حتى للفجر؟! بعدو تشوفو من طريقي..
قاعد يعاون فيا باش نمشي خرج معاه نائل و قال لنور تروح معانا و حلا تطلع تقعد مع الدراري.
وصلوني لباب السبيطار راح نائل يجري جابلي كرسي متحرك و صراع عاوني قعدت فيه، طلعوني ديراكت قلبتني الطبيبة قالت التوام في زوج ماتو و بعثوني دارولي كورتاج، كي فطنت قعدت نبكي و صراع شايد يدي و نائل و نور معانا بديت نصوغ جيبولي ماااماااااااا قعد يهدن فيا حتى دارولي تشكة رقدت كي فطنت صبت صراع قاعد حاط يدو على جبهتو و يشوف فلرض قتلو طاحو خلاص ماتو صرااااع.. قالي ربي يعوضنا إن شاء الله الحمد لله على سلامتك وباس راسي .. قعدت نبكي و هوما يسكتو فيا..
ساعة منبعد خرجوني من السبيطار، طريق كاملة و أنا نتفكر فرحة صراع نهار عرف بلي راني اونسانت، نهار عرف بلي عندي توام، كيفاش كان يساعف فيا و يوصيني نحافظ على روحي و على لي في كرشي حسيت روحي قتلت فرحتو..
دخلت للدار صبت الحاج و الحاجة مقلقين، مازال ما ريحت بداو يبهدلو فيا قالولي علبالك بلي كنتي مريضة و قطعتي الماكلة حتى قتلتيهم علاش غير أنت لي ماتو ماليك، قاعدة كلمة ما قلتها و دموعي تجري، دخل صراع الطونوبيل و دخل سمعهم عيط عليهم قال للحاج راك منيتك تحاسب فيها على الطريح؟! هدا مكتوب الله ربي لي عطاهم و ربي لي داهم الحمد لله على كلشي، ما كتبوش لحكمة لا يعلمها إلا الله، ما نسحق حتى كلمة زيادة لي ماتو أهلها و ولادها ما جيتوش تحبوهم كثر منها باش تحاسبوها، و دار ليا جبدني من يدي قالي نوضي و طلعني لشومبرتي، دخلت هيام بدلتلي جا هو قالي نوضي اشربي دواك قتلو بعد واش خلاص ياك طاحو و بكيت، قالي و تموتي موراهم؟ هدا التراتمو ديالك باش ما يصراش عندك مضاعفات نوضي اشربي.
قعدت في شومبرتي ما خرجتش كامل حسيتهم كامل كرهوني كي طرحت و حسيت روحي صح أنا لي قتلتهم كي قطعت الماكلة بصح الله غالب ماشي بيدي صدمة موت ماما و بهديك الطريقة ماكانتش ساهلة عليا، كامل تخلاو عليا من غير صراع كان يعامل فيا كي الطفلة الصغيرة، قد ما نحكي عليه ما نجازيهش على الشي لي دارو معايا و كيفاش رفدني و ما خلا حتى واحد يقلقني.
غير يشوفني نبكي يحطني على صدرو ويمسحلي شعري و يبقى يرتل فالقرآن حتى نتهدن يقولي ألا بذكر الله تطمئن القلوب حتى حبيت القرآن على قد ما كان يرتل و يتلو عند راسي بصوتو .
كان يواسيني يقولي أنا أهلك و ما نخليك تحتاجي حتى واحد و يا ويلو لي يدنى ليك، ما تقنطيش روحك العمر قدامنا إن شاء الله و نجيبو عشره ماشي زوج.
و مرات يقلبها ضحك يقولي نديرلك زوج وحدوخرين بصح ارفدي روحك و قولي هاد الراجل مسكين بزاف عليه الصيام ههههه.
قعدت يومين فالشومبرة و كي رجع للخدمة رجعت لحالتي غير البكا و الفشلة و في عالم وحدي.
كي راح صراع واحد ما زاد أهتم بيا من غير الحاجة برك ما تقدرش تطلع تعيطلي فالتلفون تسقسي عليا و تبعثلي الماكلة مع حرب، اما ام سعد ولات تعمر نور تقولها ماشي هي تطرح و حنا نخدمو عليها، رجعت كلما جوز على باب شومبرتي ترمي الكلام تقول كرهت من هاد الدار قعدت خدامة لكل واحد وحدو و نائل يداوسها كي يسمعها كاش ما تقول عليا.
أنا أصلا ما كنتش تاكلة عليهم صراع كان ما يخرج حتى يحتملي الحليب و البسكوت غير يروح خلاص ما نقدرش ناكل ما يعطينيش خاطري و زدت روشوتيت كثر. كان كل ساعة يعيط يسقسي إدا شربت دوايا إدا كليت و كي نقولو لالا يعيط ليماه يقولها ابعثيلها تاكل و ازڨي عليها على دواها.
جازو يومين كنت قاعدة نبكي من السطر شفت صراع يعيط رفدت عليه نبكي قالي وشبيك؟! قتلو الكور ديالي كامل راهو يوجع فيا رايحة نمووووت و كوبيت كنت حايبة نوض لتوالات ما قدرتش سيفت على روحي غير مشيت زوج خطوات طحت تغاشيت ما جبتش خبر شحال قعدت مرمية فالقاعة كي فطنت بديت نبكي حسيت بالضعف ما قدرتش حتى نوض حتى شفت صراع فتح الباب و جا يجري لعندي مخلوع رفدني حطني فالفراش مع لي قربني ليه صابني نغلي بالسخانة قالي ليليااان راكي ناااار علاش ما شربتيش دواك علااااش، رفدني للصالدوبا غسلي وجهي و يديا بالما بارد كي شاف السخانة ما حبتش تحبط راح يجري للخزانة جبدلي عباية و خيمار لبسهملي قالي يلزم نديك للسبيطار السخانة لي راهي عليك ماشي نورمال...
حبط يعيط قالهم هدا لي وصيتكم زعما نخرج نروح نخدم نصيبها طايحة فالقاعة و واحد ما علبالو بيها لوكان ماتت؟!! يا سيدي اعتبروها صدقة فاليتيمة و اطلعو شوفوها.. جات نور عاونتني باش نمشي كي جيت حابطة فالدروج دارت بيا الدنيا لاقاني تغاشيت في يدو ما فطنتش حتى صبت روحي فالسبيطار، دارولي السيروم و ليزاناليز، قالولو عندها الحمى المالطية، دارولي تشكة و عطاوني الدوا رجعني للدار قعدني فوق البونك قالي هدا التراتمو ديالك تشربيه ملاحة قباحة اتحملي حتى تبراي مفهوووووم؟ دخلت نور جابت لاسوب تع العدس قالتلو أنا نوكلها أبو حرب قالها يعطيك الصحة ختي معليه روحي لولادك راني معاها، قعد يوكل فيا بالسيف، شربلي دوايا غطاني و قعد معايا حتى ريحت راحلي السطر و رقدت.
غدوا منداك نوضني الصباح نشرب دوايا و قعد معايا حتى للعصر قالي وش رايك تحبطي لتحت شويا خير ما راكي غالقة على روحك هنا؟ قتلو ما علاباليش راني نحس روحي مكسرة قالي من الرقاد ثقلتي نوضي تمشي شويا سرحي رجليك و اقعدي معاهم تنساي و تبراي..
سندت روحي عليه نوضني قالي تقدري تمشي؟ قتلو إيه نقدر، بقى يديرلي فالكوراج حبطنا لتحت صبنا سعد جا قال كيفاش راهي ليليان؟ تبسمت معاه، سلم عليه صراع و قالو أهلا خويا عاش من شافك قالو الله غالب راك عارف مع الخدمة اعذروني هدا وين سمعت بولادك سلامة ريسانكم قالو الحمد لله على كل حال الله يسلمك، قالو كيفاش مع خدمتك راهم يقولو الحالة ماراهيش تعجب قالو إيه راهم الإرهاب غير يزيدو ينتشرو و يتمردو و لبارح جا قرار نقلي لأطراف العاصمة، غير سمعو الحاج قال بلي ليميتاوه لتم عيط قالو يا وليدي وين رايح بطل علينا هاد الخدمة، قالو وش حبيتيني  ندير جا القرار كيفاش نبطل؟! قالو انت راك تشوف فالأخبار بلي راهم دايرين هديك البلاصة ما بين عينيهم و أنت رايح تحارب لتم؟! رايح للموت برجليييييك؟! قالو هادي هي خدمتي ما بطلت بكري حتى نبطل دوك؟ قالتلو الحاجة حرام عليك يا وليدي حبيت تحبسلي قلبي بالخلايع، بايع روحك؟ إدا ما غاضتكش حياتك خمم على اليتامى لي راهم في رقبتك و مازالهم محتاجينك، ولادك و مرتك شكون بيهم، بلا بيك يضيعو، قالها يما كاين ربي الشدة فالله و لي كاتبة فالجبين لازم تشوفها العين، عيطت عليه قالتلو حبيت تهبلنييي.. شوف صراع ما تروحش سينو و الله لوكان تخرج من هاد الباب.... قاطعها قالها يمااااااا قلتلكم ألف مرة ما نبطلش ماكاش كيفاش حتى عند ربي حرام باش نبطل في هاد الظروف هادي أرضنا و عرضنا و شرفنا بجاه ربي ما تزيدوهاش عليا لي فيا يكفيني.. خلاهم و خرج.
دار ليا الحاج قالي يا بنتي قنعي راجلك ما راكيش خايفة عليه؟!! هديك البلاصة راهي مهددة هاد ليامات راهو رايح للموت برجليه، قتلو فالليل ان شاء الله نهدر معاه بالاك نقدر نقنعو،
زدت شويا و طلعت لشومبرتي عاودت رجعتلي الحمى وليت نرجف دخلت فالفراش حتى دخل صراع جا يفتح الخزانة سمعني نازع مسني صابني نغلي شربلي دوايا قالي دوك ترتاحي و دخل يدوش كي خرج صابني نبكي قالي وشبيك؟ قتلو حبيت ندوش عندي يمات و أنا بلاش كرهت روحي و ما قدرتش قالي هدا ما كان؟! و الدموع علاش أنا وين رحت؟ نوضي ندوشلك عمري قتلو لالا ما كالاه.. نوضني بالسيف من البونك و داني للصالدوبا ريڨلا الما دافي و قالي هيا قتلو لالا ندوش وحدي، قالي و الله ما نشوف ما تخافيش و بدا ينحيلي في حوايجي هو يغسلي و أنا مكمشة روحي حشمت منو بصح كيسلي غسلي شعري ما حرجني ما ضحك ما تبلاني قالي شحال من مرة قتلك أنا مرايتك ما تحشميش مني ديريني كي شغل ماكاشني، شللي نشفلي و لبسني قالي دوك اسبقيني ما نخرجوش كيف كيف عيب رانا في وسط العايلة.
دخلت للشومبرة شويا و لحقني لبس حوايجو تع الدار دار ليا صابني نشف في شعري بالسيشوار قتلو صراع تعيش اعطيني المشطة ديالي على يدك شافني ما قدرتش نرفد يدي باش نمشط قالي جيبي تشوفي و بدا يمشطلي بلعقل منبعد قالي علاش راهو هكدا بالسيف باش يسلك ياك شعرك رطب قتلو كي عندي بزاف ما غسلتوش و انت غسلتلي غير بالشومبوا ما درتليش ابخي شومبوا قالي علاش ما قلتيليش أنا ما نعرفش في صوالح النسا، كمل طمهولي حطيت راسي فحضنو قتلو علبالي عييتك قالي إدا كان هدا هو التعب راني فالجنة و ضحك قتلو صرااااع قالي شوفي عمري.. الزواج ماشي  فندق كي تسوء الخدمة فيه نخليه و نشوف وحدوخر، الزواج دار و مسكن كي تخسر حاجة فالدار تسڨمها باش ترتاح، كي تخسري أنت نعلمك كي تمرضي نسندك، الزواج أخذ و عطاء و تضحية و تنازل و حب، ما تخميش بلي رايح نعيا بيك بالعكس راني متمني ترفدي روحك و تنوضي ترجعيلي بهبالك و ديڨاتك و الله العظيم غير كل همي تريحي و حاجة ما خسارة فيك، زيرتو لعندي و بستو قتلو ما تزيديش تروح تخدم تعيش قالي ما تعمريش راسك بهاد الشي طمني و ارتاحي ما كان والو بابا برك راهو مكبرها.
سكتت تكسل و حطني على صدرو شعل التلفيزيون كانو دايرين فيلم تع عادل إمام قعد يشوف معايا و يسقسي باش نبقى منتبهة و مبرونشية معاه و ما نخممش في حاجة أخرى، قعدنا هكداك حتى غفيت، كنت راقدة على يدو حسيتو يتحرك في بلاصتو قفزت صبت التلفيزيون شاعل و هو عرقان و يحرك في راسو عرفتو يحلم قتلو صراع.. صراع قفز من بلاصتو فطن قتلو وشبيك قالي اعطيني الما شرب و قاعد يشهد و يستغفر و يقول يارب اجعل الخير، قتلو كنت تحلم؟ قالي رقدت متوضي هادي رؤيا، مسح وجهو و قالي أنا ما نامش بزاف بصح كي نام يخرج قتلو وش شفت قالي شفت يماك جات لداري مقلقة و تخزر فيا متعنكرة منبعد نحات وردة من الجنان و خرجت قتلو وش معنتها؟ قالي ما علاباليش ربي العالم إن شاء الله خير ارقدي ما تعمريش راسك.
غدوا منداك كي نضت صبتو فاتح التواقي و الباب و مشعل القرآن فالشومبرة شويا هكدا و دخل قتلو صباح الخير قالي نضتي؟ صحا النوم صباح النور وش كاين؟ قالي برك قلت نهوي الشومبرة كنتي مريضة و راقدة فيها قلت تدخل شويا الشمس، كيفاش راكي دوك؟ قتلو أحسن خير ملي كنت قالي كملي دواك تولي هايلة بصح بالاك هاد اليومين نديك معايا للعاصمة تقدري؟ قتلو يومين؟ قالي إيه هنا الحالة ماراهيش مليحة يلزمني نخرجكم و نأمنكم قتلو كيما تحب قالي يمال إدا راكي قادرة ابداي توجدي الحوايج لي تحتاجيها نروحو غدوا الصباح إن شاء الله، قتلو إن شاء الله قالي يلا نوضي باش تحبطي تفطري و تشربي دواك حلا راهي توجد درتلو براسي إيه، حبطنا قعدنا فالهول سمعتو يهدر مع حلا فالكوزينة قالها أيا بنتي خفي شويا قالتلو دقيقة برك راني نستنى في حرب بعثتو يشري الفرماج، دخلت الحاجة قالتلو صراع وليدي راهي عيطتلي أم وسام لبارح على زواج حلا، راهم مزروبين قالو نرفدو الطفلة قبل ما يلحقو الارهاب لعندنا، قالها يما ماشي كامل وقتها رايح نطلعكم للعاصمة ما عندناش الوقت للعرس، قالتلو ياك مخطوبين و مفتحين خلي نجوزوها كيما جات جي و اعطي الطفلة لراجلها، قالها خلينا دوك نفطرو منبعد ربي يعملها تاويل .. وين راهو الحاج؟ قالتلو خرج مع نائل صباح بكري.
دار لحلا قالها يلا بنتي طولتي، قالتلو بابا كملت كلشي بصح حرب بطا بزااف، قال وين راهو و خرج يشوف عشر دقائق عاود رجع قالها يا بنتي وين بعثتي خوك؟ قالتلو هنا برك، دار لنور قالها ختي الله يسترك اطلعي لشومبرتي جيبيلي مفاتح الطونوبيل راهم فوق الطابل دونوي ليليان ما تقدرش، نروح نشوف وين راهو الطفل، طلعت تجري جابتهولو و جات، خرج نوض الطونوبيل و ديمارا وحد ربع ساعة عيط للحاجة قالها يما حرب ما رجعش؟ قالتلو لالا مازال علاش ما صبتوش؟ قالها يما ما تهبلينيش وليدي ماكاش تقول انشقت الارض و بلعاتو، عيطت الحاجة على حلا قالتلها وين بعثتي خووووك، قالتلي جدة و الله غير بعثتو يشري الفرماج ياك مالف يروح ماشي غير ليوم، علاش بطا هكدا لوكان كاش ما يصرالو ما نسامحش روحي قالتلها بعيد الشر ما تفاوليش عليه، عاود عيط صراع قالها يما وليدي ما كاااااااش وين راااااح، قالتلو يا يما على حرب وين راهو وليدي كوبات لبست عبايتها و خرجت تحوس عليه وأانا وليت نبكي من الخوف و حلا طرطق في صباعتيها تبكي و تقول خويا وين راح أنا لي بعثتو لوكان كاش ما يصرالو ما نسامحش روحي..
حكمت يديها قلتلها ما تقوليش هكدا دوك يرجع، غمضت عينيا نبكي و ندعي ياااربي احميه، أم سعد و نور وقفوا عند الباب و يسناو كاش خبر حتى دخلت الحاجة تخبط في راسها و تقول توخذت فالطفل و تعيط لحلا خفي جيبيلي دوايا تع لاطونسيو قلبي راح يحبس، زاد دخل نائل و الحاج قال وااااش؟ ما رجعش؟ قالتلو أم سعد مازال مابان، عاودو رجعوا للطونوبيل يجريو و ديماراو.
ساعة منبعد دخلو دار عمهم صالح و علا صوت البكا حتى الجيران و جاو تلايمو فالڨاراج.
لحقت ال9 تع الليل و حرب مابان عليه حتى خبر الناس داخلة خارجة و الحاجة تغاشات رفدوها للسبيطار، و صراع سمعنا بلي طلعتلو لاطونسيو و طاح برا رفدوه حتى هو للسبيطار.
ال11 تع الليل جابو الحاجة و حنا قلوبنا ناااااار، ال2 جابو صراع حاط يدو على راسو عينيه حمورا دم ساكت كلمة ما هدرها و كل شويا يجي خارج ما يخليوهش يروح يبدا يعيط لربي لي خلقو يقولهم بعدووووني حبيتوني نقعد و وليدي مفقووووود...
لحقت ال5 و نص تع الصباح جوست مور الصلاة سمعنا طونوبيل حبست قدام الدار حطو حاجة قدام الباب و قلعو، نضنا كامل نجريو، خرجو الرجال الحومة كانت فارغة صابو شكارة محطوطة على الباب، صراع حط راسو على الباب رايح يتغاشى و عمو فتح الشكارة صغنااااا كامل...
حرب مذبوح والمنظر صعيب باش توصفو نضت نصوغ و نبكي و صراع طاح على ركايبو و حط راسو على الشكارة بلا صوت ولا حس محضن وليدو بالسيف باش رفدو وليد عمو و نائل حكمو بزوج يديه يبكي بالعياط و هو والو راسو على كتف خوه و غايس حتى طاح تغاشى صاغت الحاجة و الحاج و دارو كامل بيه رفدوه للسبيطار و داو جثة حرب.
الجيران كامل خرجو على صوت العياط حتى النسا جاو لينا بحوايجهم تع الرقاد راميين برك العبايات ملفوق.
عيطو عمومهم قالونا النسا كامل يدخلو للدار باش ننصبو العزاء فالڨاراج و ندخلو الرجال.
نور و بنات عم صراع فرزو الدار بلخف و فرغو الهول و شومبرة سعد القديمة و شومبرة ام سعد باش يدخلو النسا.
أنا كنت قاعدة مع الحاجة هي تصوغ و أنا حاطة راسي مابين رجليا و نبكي منبعد حسيت الحمى عاودت طلعتلي لخطر ماشربت الدوا ما درت التشكا، قربت ليا هيام قالتلي ليليان نوضي اغلقي شومبرتك ما تخليهاش مفتوحة ما كاش لامان درتلها براسي إيه جيت نايضة تغاشيت ما حسيتش حتى صبت روحي فوق بونك الحاجة وهيام ترش الما على وجهي، فطنت قالتي كيفاش راكي تحسي روحك دوك؟ وين راهم التشكك دياولك؟ قلتلها لفوق فالشومبرة، طلعت جابتهم و غلقت الشومبرة دارتلي وحدة غطاتني و قالتلي ارقدي ما ديري والو راكي مريضة دوك يخدم فيك الدوا تريحي.
دخلت مرا للشومبرة قالت شكون هادي لي راهي راقدة؟ قالتلها لوخرا هادي مرت أبو حرب، قالتلها الجنازة يا الجنازة و هي راقدة؟ يخي نسا تع آخر الزمان، قالتلها لالا مسكينة يماها ذبحوها الارهاب و طرحت توام عندها سمانة هكداك و دوك راهي حاكمتها الحمى المالطية، قالتلها يا عمري مسكينة ربي يصبرها و يكون معاها، قالتلها لوخرا و الله غير حكاتلنا عليها هيام تبكي عليها الدم، الله لا تربحهم ما عتقو لا مرا لا طفل ربي ينتقم منهم إن شاء الله..
جيت نقعد ناضت وحدة فيهم قالتلي حبيتي تقعدي نعاونك؟ قلتلها لالا برك نحوس على التلفون نعيط لصراع تقلقت عليه..
نضت بعقلي رحت للهول صبتو معمر بالنسا دخلت للكوزينة قلت لهيام اعطيني تلفونك نعيط لصراع، قالتلي وش تعيطيلو مسكين راهو فالسبيطار مع جثة حرب الله يرحمو، كي قالت هكدا ما بلعتهاش حرب رجع جثة؟! جراو دموعي و هي و نور بكاو و بنات عمهم يصبرو فينا.
قالتلي هيام روحي اقعدي قدام يما ماشي مليح ليك
رحت قعدت صبت الحاجة مرقدينها بالتشكا و حلا تبكي و تعيط تقول أنا لي بعثت خويا .. أنا لي قتلتو .. لوكان ما بعثتوش يشري ما يذبحوهش .. جاتني سبة و سبيبة فرغت كامل وش في قلبي بكيت مخ راسي.
جوايه ال3 مور الظهر قالو راحو الرجال كامل للدفينة، فطنت الحاجة عيطت لهيام قالتلها سقسيتي على خوك؟ قالتلها راهو معاهم راح يدفن وليدو و هي ناضت تبكي و تقول يا درا يا وليدي كيفاش راهو قلبك دوك منهار جبتك لهاد الدنيا و قلبك مجروح ياااارب صبر وليدي وش يتحمل وش يخلي..
لحق الليل و لي راحو للدفينة ما جاوش، كملو عشاو الغاشي و الحاجة لاطونسيو ما حبتش تحبطلها رجعوها للديسبونسار.
رحت وقفت معاهم فالكوزينة كان نقص شويا الغاشي قعدو غير القراب حتى صونا تلفون هيام عيطلها نائل قالها أم علي أنا خوك راني قريب نوصلو للدار و أبو حرب مريض بزااف لاطونسيو ديالو راهي 20
بجاه ربي ما نحتاج حتى وحدة توقف قدامو و تبكي، و وجدولو الدوش باش يبرد و تحبطلو قالتلو دوك نوصيهم و نوجدلو..
راحت خبرت فالدار و وصاتهم و الحاجة ناضت تندب و تقول دفنو قلبي يا حرب علاش خليت جداتك انت يدي انت رجلي ما تغفى عيني حتى نغطيك فالليل شكون لي يغطيك ليوم في قبرك .. هي تقول و النسا كامل يتبكاو..
نص ساعة منبعد سمعنا الطونوبيلات ڨراو قدام الدار، قعدو فالڨاراج دخل غير صراع حالتو حالة جثة و تمشي و معاه نائل و سعد يعيطو فرغو شومبرة الحاجة، كي شفتو هكداك حبطو دموعي، دخلوه قعد على بونك يماه ما نطق ما رفع راسو، دخلت الحاجة باست راسو و قالتلو الله يصبرك يا وليدي نعرفك سبع و مؤمن هدا قدر الله و هدا نهارو ملي زاد من كرش يماه، رفع راسو بالسيف حط عينيه في عينيا  قالي و صوتو مبحوح شفتي ليليان يماك دات وليدي من وسط داري و راحت، بقات دموعي تجري تفكرت منامو، قربت ليه حكمت يدو ما زادش هدر شرلي نائل باش ما نبكيش قدامو مسحت دموعي .. قالو سعد صراع نوض دوش نوض اذكر الله هدا مكتوبو الله يرحمو، عاود طلع راسو خزر في نائل قالو غير قيس لي نحكمو و نبرد نار وليدي لي راهي شاعلة في قلبي، قالو راحو عمومي لدارهم و صابو كامل عشيرتو متبريين منو عندو سمانة ملي انضم للارهاب و جدهم قالهم وين ما تحكموه اقتلوه..
قربت هيام باست راس صراع قالتلو البراكة في راسك خويا شد فالله و نوض معايا للدوش ما تبقاش هكدا وليدك طير جنة وش شاف باباه من هاد الدنيا حتى هو يشوفو خليوه يرتاح.
دخلوه للصالدوبا باش اغتسل غسل الميت و نائل قعد يحكيلنا عليه قالنا دمعتو ما حبطتش و قلبو شاعلة فيه النار و لاطونسيو ما حبتش تحبط لوكان غير يبكي يرتاح شويا هكدا ينضر، كيما سيينا معاه والو، دار لهيام قالها لوكان شفتبه كي حبط وليدو للقبر ماتقوليش هداك الجبل لي ماتهزو ريح.. خسر وليدو على الكبر..
هو يحكي و يمسح في دموعو و أنا و هيام نبكيو.
كمل صراع دوش و طلع لفوق لشومبرتو بالتعب ما حبش يقعد لتحت، شويا و طلعت موراه صبتو يصلي كي كمل قعد يسبح و عينيه فاتحهم بالسيف غايس و دموعو طيح و يقول إنا لله و إنا إليه راجعون..
سجد و علا صوتو بالبكا و يشكي لربي حزنو، جيت نوض ليه كي شفتو ما نتبهليش بلي راني لتم خليتو فرغ، قعد وحد الخمس دقايق و هو ساجد و يشكي همو لربي و يبكي منبعد خفت عليه قربت ليه و حطيت يدي على ظهرو حس بيا ناض و جا رايح حكمتو من يدو قتلو على وجهي ما تضعفش ما ديرش في روحك هكدا، بعد يدو و راح للرجال.
حاولت باش نرقد ما قدرتش، حبطت لتحت صبت النسا مفرشين فشومبرة سعد و الهول و الصالو، و إخلاص تبكي تقول يماه، شويا هكدا و دخل نائل و وليد عمهم سليمان جابو صراع رعف الدم يشرشر من نيفو و رايح يتغاشى، غسلولو و كسلوه فوق بونك يماه، حط يدو على راسو و غمض عينيه قعدو يهدرو معاه كلمة ما رجعها، خرجو دار ليا نائل قالي دلكيلو راسو و حاولي معاه يشرب الدوا، قربت ليه و قعدت فوق البونك حطيت يدي على راسو باش نديرلو ماساج قالي راكي بالحمى؟ قتلو ما علباليش عظامي راهم يوجعو، قعدت ندلكلو في راسو و هو مغمض عينيه قتلو صراع تشرب دواك؟ نوض معايا مام انا نشرب دوايا معاك ما ردليش عمبالي رقد نحيت يدي فتح عينيه خزر فالسقف و عاود غمضهم، حطيت مخدة قدام البونك سمعت حلا حضناتو تبكي و تقولو راحت بسبتي و إخلاص واقفة و تبكي و هو ما رد ما فتح عينيه، دخلت الحاجة باست راسو و قالتلهم خليوه يرتاح ماشي كل دقيقة جي وحدة تندب عند راسو فتح عينيه قالها يما... قالتلو ربي يصبر قلبك وليدي باس راسها و حكم يدها حطها على راسو قعدت حطت راسو في حظنها تقرا فالقرأن و تمسد في راسو..
انا كنت متكسلة في بلاصتي ساماتني حلا زاد جا علي و محمد وهيام و بناتها و كملها نائل كامل رقدنا في شومبرة الحاجة  حتى جا سعد قالو نائل أنا نحوس عليك و أنت راقد نوض اقعد معاهم في الخيمة راني داي عائلتي للدار و مع الفجر نرجع، قالو نائل سعد يرحم والديك خليني نرقد وحد السويعة برك و الله ملبارح ما رقدت و عياط الجنازة مازالو في راسي رايح يطرطق ياك ولاد عمنا راهم لتم، ناض صراع من رجل يماه قالها يما نوضي ترقدي في بلاصتك راني رايح للخيمة نقعد معاهم، قالو سعد لالا يا خويا خلي أنا نوقف معاهم برك عمبالي هو يوقف في بلاصتنا، ما رجعلوش ناض و خرج يطايح.
رجعت رقدت كي فطنت خرجت من الشومبرة صبت الدار ظلمة مطفيين الضو، دخلت للكوزينة صبت صراع متكي على الطابلة و حاط يدو على راسو و يتكيف، قربت ليه عنقتو و حطيت راسي على كتفو بعد راسو خزر فيا بصح ما هدر والو جا يحط الڨارو في فمو نحيتهولو و رميتو قتلو ماشي مليح على صحتك، نديرلك لاتاي؟ قالي لالا روحي ترقدي، قتلو ماجاياش نرقد و ترتاح و انت هكدا، حطيت لاتاي على النار و جبدت كرسي قعدت مقابلاتو حكمت يدو وهو حاط راسو و مغمض عينيه، شويا هكدا فتح تنهد و قالي شفتي ذنوبك وش دارو فيا، قتلو ما تقولش هكدا هدا مكتوبو، قالي نهار لي جبتك اول مرة من داركم يماك شدتني من كتافي و قالتلي بجاه ربي بنتي أمانة عندك ما تظلمهاش و الله ما دارت والو راهي مظلومة، جبدتك ظلمت ضربت قسيت درت ما درت في طفلة لا حول و لا قوة، هو يهدر و أنا نبكي قتلو بصح انا سامحتك ما تقولش هكدا، قالي بصح يماك ما سمحتش دوك وين راني نحس بنارها كي جبتك و آذيتك و ما رجعتكش ليها، دارت الدنيا و داو وليدي آذاوه و ما رجعوهش، كي قال هكدا حبطت دموعو جبد يديه من عندي و عصر عينيه و مسح خدو، قتلو صراع الله يخليك ما تخممش هكدا، قالي نقولك على حاجة خبيتها عليك، نهار ضاربت أم سعد معاك و حاوزاتك من الدار و جات يماك لدار هيام و حبت تديك انا رفضت و قلتلها ما تعيشش مع يحي ونهار تكون عندك دار وحدك نرجعهالها، موراها بعشرين يوم هكداك عيطتلي قالتي قسمت على يحي رجعلي بنتي قلتلها بنتك راهي مرتي دوك ما تخرجش من داري بقات تحلل فيا باش نطلقك و انا ما حبيتش نقولك في هداك الوقت كنا مداوسين و خفت تروحي و ما ترجعيش و خفت نعطيلك تهدري معاها تقنعك باش نطلقك لخطر هداك الوقت ما كنتش دخلت عليك ماكاش كيفاش نشدك، و كلما تعيط نكوبي عليها حتى دخلو الارهاب و تقطعوا خباراتها، حرمتكم من بعضاكم و خرجو ذنوبكم، قعدت غايسة يا خاه شحال كنت نتمناها تسقسي عليا حتى مرات حقدت عليها قلت راحت و ما زادتش حوست عليا، ما قدرت نقول والو تصدمت و هو يشوف في عينيا يحوس على كلمة مني تبردلو قلبو، بلعتها مام جاتني مرة تبسمتلو و قتلو ما تلومش روحك لي درتو هو الصح شاف فيها ربي الخير لوكان رحت راني انذبحت معاها و تخنقت بالدموع حطيت وجهي ما بين يديا و نبكي قالي أنا ظلمت و نستاهل درتلو براسي لالا و حطيت راسي فصدرو و نبكي، و هو يتنهد و يمسح على راسي، حسيت بواحد جاز بعدت عليه بلخف درت صبتها إخلاص، نضت سربيتلو لاتاي و عطيتلو يشرب، سقساتو وين دفنوه قالها قدام يماه قعدت تبكي، رفد كاسو تع لاتاي و جا خارج تبعتو قالي ادخلي الرجال راهم راقدين فالڨاراج قتلو و انت علاش ما ترقدش؟ قالي منين يجي النوم لواحد شاعلة النار في قلبو.. ادخلي ارقدي ياربي زوج سوايع وينوضو روحي تريحي
قتلو اطلع معايا لفوق للشومبرة قالي لالا نقعد هنا خير فالدار نتخنق، و راح قعد عند الباب في نفس البلاصة لي قعد فيها كي كان يشوف فالجثة تع وليدو.
طلعت لشومبرتي حاولت نرقد ما قدرتش قعدت نخمم في ماما و نبكي و نتفكر وقتاش جات ليا هي و خالي، تفكرت صح كنت زعفانة منو مدة شهر مور ما حاوزتني أم سعد كيما ضربني على الروبة لي لبستها و خرجت بيها لبرا فالختانة و لوكان قالي فهداك الوقت على ماما كنت نروح و ما نوليش، قلت في قلبي فيها خير كي ما قاليش بصح وش يصبر قلبي حسيتو حرمني باش نشوف ماما كنت زعفانة منها مالڨري خوفي عليها، ما فقتش وقتاش رقدت و أنا نخمم و نبكي.
نضت على ال9 وقفت مع البنات فالكوزينة على لاتاي و الماعن حتى نسمع صراع مورايا يفولي نضتي؟ قتلو إيه رقدت لفوق و انت ما رقدتش؟ قالي ما جانيش النعاس عييت مانيش قادر نوقف، قتلو ارقد فالنهار قالي ماكاش كيفاش الناس مازالها جي تعزي سربيلي برك كاس لاتاي..
كانت حنين معايا تعاون فيا هو شاف عينيها لبرا و غايسة دار شاف علي واقف يخدم مع الرجال قالها ادخلي بنتي ما توقفيش هنا عطيتلو لاتاي و تبسمت قالي ليليان ما تضحكيش لوكان يشوفوك يحسبوها عليك كبيرة، قتلو لالا و الله والو ضحكت عليك برك و أنت هكدا و عينك على كلشي قالي ياحي يا أنت و جا رايح قتلو و الله ما قصدي صراااع .. ارواااح هز راسو و هو يمشي و راح، قالتلي إخلاص وشبيه؟ قلتلها والو مابيني و بينو برك، قالتلي الراجل ماشي قادر و انت تحضني ليل و نهار تعييلو في قلبو ماراهوش ناقصك، قلتلها ما راكيش في حالك ما نردش عليك خير، خليتها و رحت.
رجع صراع حط الكاس دخلت حلا عينيها منفخين فتحلها يديه رمات روحها فحضنو تبكي و تلوم في روحها على خوها مسح دموعها و قالها كوراج بنتي لحق نهاو طاحت ورقتو الله يرحمو ما تحمليش روحك الذنب.. بقى يهدر معاها و يواسيها وهو عيان و أنا و إخلاص واقفين نشوفو..
جازت يمات و صراع عينو ما شافتش النوم ما قدرش قد ما عطاولو دي كالمو والو منعو عليه كامل المنبهات لاتاي القهوة و هو غير يروشوتي.
راح يزور قبر وليدو و رجع حالتو حالو و لاطونسيو طالعة غير ساكت و عيان.
جازت سمانة على الجنازة وجد حوايجو و قال رايح ميسيو مكافحة الإرهاب على أطراف العاصمة بكيت ندبت حللت والو ما سمع لحتى واحد.
جازت 20 يوم ما جاش و كل 5 أيام كان يعيط فالتلفون يسقسي علينا و يكوبي هدرتو رجعت قليلة و قالنا ما تعيطوليش حتى أنا نعيط.