مراهقة والاربعيني بلهجة جزائرية

55

#المراهقة و الأربعيني:

#الجزء55:

الصباح فتحتلي هيام الباب كنت قاعدة ما رقدتش.. قالتلي ارواحي احكيلي وش صرا؟ قلتلها ما راهو لا حاملني لا حامل يشوفني ولا راضي يقتلني و لا يخلني نقتل روحي.. قالتلي تموتي؟ وشنو هاد الحكاية تان يا بنتي بطلي طراطڨك راكي هبلتي الراجل استعقلي شويا.. قلتلها أنا لي رايحة نهبل ماشي هو أنا عييت.. قالتلي حبيت نفهم برك وشنوهي الحكمة من زواجكم حاجة فيكم ما راهي راكبة على لوخرا لا فالدين لا فالعمر لا فالعقل و لا فالتفاهم.. كي تزعفي هو يحلل و انت ما ترضايش، و كي يزعف أنت تحللي و هو ما يرضاش.. ربي سبحانو  العالم بحكمتو كي جمعكم.. طلقتو ما عجبكم الحال قعدتو مع بعضاكم ما عجبكم الحال.. خلاص يا بنتي مالڨري مازال غايضني الحال منك.. روحي شوفي كيفاش راهو راقد فالصالة طلي على وجهو كيفاش راهو من القنطة علاش هكدا؟! خرجت و هي تتنهد و تستغفر خرجت موراها صبتو راقد فالصالة فوق الكنابي خليتو و دخلت للصالدوبا.. شويا و سمعتو يهدر مع هيام قالها قوليلها تقعد فالشومبرة و تحبط لتحت مرة وحدة فالنهار مانيش حايبها تقعد دور قدامي مارانيش حامل نشوف وجهها..
خرجت دار ما خزرش فيا.. منبعد حبط و هو يقول لهيام أم علي جيبيلي حوايجي من الشومبرة باش نلبس و نخرج.. صونا تلفونو أنا دخلت للشومبرة غطيت راسي و رقدت ما فطنتش حتى للعصر، حبطت هو ما كانش فالدار، رحت للكوزينة صبت أم سعد واقفة هي و نور فاتحين الفريجيدار يشوفو وش يديرو للعشا.. شفتهم جايبين قضيان يبان تع ضياف و أم سعد تضحك و تقول لنور خلاص وقتها و لحق الوقت باش تتبدل و يتكسر نيفها.. ديت الماكلة و طلعت و أنا نخمم في كلامها.. مرة جديدة؟! يتزوج؟!! نهبل و نحطلو رصاصة في نص جبهتو..
قعدت فالشومبرة ما نخرج منها ما نحبط لتحت حتى غدوا منداك كنت راقدة نضت من فراشي جوايه ال11 و ربع سمعت الحس لتحت قلت يكونو ضياف ما نحبط ما نشوفهم ما راحلي فيهم.. جيت نرجع للشومبرة سمعت صوت اسمهان تضحك لتحت أوووو هادي وش جابها لهنا !!! تم تم ضرب في راسي كلام عجوزة النار أم سعد تع لبارح..
حبطت فالدروج شفتها لابسة و مبيشة و بيا ماكيي.. شفت في روحي كنت نبهدل عاودت رجعت للشومبرة ستيكيت روحي حتى لتم و حبطت نتقمقم.. دخلت لشومبرة الحاجة.. هيام قعدت غايسة في وجهي و الحاجة غير تشوف ما فهموا والو.. طابست سلمت على أم صفاء جات تنوض قلتلها و الله غير تريحي خالتي، و اسمهان وقفت سلمت عليها فوق نيفي و هي تسلم و تعاود..
رحت قعدت قدام هيام و هي تخزر فيا قلتلها وشبيك؟ قالتلي أنت صح حابسة ضيعتي كلشي من يديك.. قلتلها علاش جاو هادو؟ قالتلي عرضتهم يما.. قلتلها هادي بالدات ما نحبها ما نرتاحلها.. هزت راسها و دارت عليا..
قعدت نميز في اسمهان كيفاش تهدر بالدلال و تحنن في صوتها انتبهت لروحي كيفاش نهدر انا ما نعرفش نتقلش في كلامي و صوتي كيما البنات.. نحس روحي محبوسة فالحياة و هو السجان ديالي حارمني الباب نشوفو و يقولي مقعدك في قصر.. جيب عصفور و حطو في قفص ذهبي و قولو يعيش.. ههههه لي يسمع يقول كنت نخرج في دارنا.. منهاري مظلومة ماشي كيما البنات..
نضت و رحت نحوس فالدار نشوف صراع وين راهو.. ماكاشها طونوبيلتو فالڨاراج يعني ماكاشو.. بصح حبيت نتأكد خفت إدا خرجها برا و قعد فالصالو.. سقسيت نور قلتلها وين راهو صراع؟ قالتلي راهو خدام.. قلتلها اييي صح حقا ليوم يخدم، و هادو علاش جاو؟ قالتلي هكدا جاو ڨصارين.. قلتلها هادي اسمهان بالدات ما نحبها ما نرتاحلها.. قالتي يما خلي عينيك عليها.. قلتلها علاش؟ قالتلي ردي بالك خير ملي تاخد راحتها، راجلك ألف وحدة تتمناه،كوني فحلة و بطلي حكاياتك لخطر أنت لي تخسري، راكي شافية نهار قلتلك ما كان لا أهل لا حتى واحد يوقف في كتافنا من غير رجالنا نتحملو ما عندناش حل ثاني..
بقيت واقفة فالكوزينة شويا و دخلت اسمهان قالت أهلا البنات قولولي بواش نعاونكم.. قلتلها و الله يا حنونة غير تعملي  فينا مزيا لوكان تخرجي من الكوزينة.. قالتلي ليليان علاش أنت هكدا معايا أنا ما بيني و بينك والو.. قلتلها روحي برك حبيبتي روحي..
دخلت أم سعد زكارة فيا باستها و قالتلها مرحبا بيك يا الحبيبة، قالتلها لوخرا أهلا بيك خالتي ربي يطول في عمرك هههههه..  قالتلي أم سعد وش ليليان ليوم بنتي.. قلتلها نبان الوقت لي يعجبني و نتخبا الوقت لي يوالمني داري و أنا حرة فيها.. قالتلي دارك لي لول لبارح حاوزك منها و انت تبوسي في يدو باش يخليك عايشة عندو لخطر ما عندك حتى واحد تروحي ليه.. قلتلها ما حاوزنيش منو أنا لي قررت نخليه و أنا لي قررت نرجعلو و أنا لي قررت نبقى فهمتي؟ و الدار داري و انت لي راكي قاعدة عندي ديرها مليح في بالك.. قالتلي قاعدة عندك؟ هادي لي قالك جات العصر و حبت تدي القصر.. و دورت وجهها لاسمهات قالتلها لوكان تشوفي كيفاش كان يعيط و يقول ما نحتاجهاش ما نعرف معظم حكمها تهدر فالتلفون و كرهها.. قالتلها اسمهان اااا خسارة..
خليتهم و خرجت لخطر علبالي لوكان زدت قعدت شويا نغطسلهم ريسانهم في زوج فالقدور..
قعدت في شومبرة الحاجة منبعد تفكرت بلي اسمهان راهي فالكوزينة.. يا ماما و الله ما صرات.. تنساها باش نخليها تاخد راحتها..رجعت صبتها توجد فالشلاظة جبدتها من قدامها قلتلها ما تشقيش روحك حنونة روحي تريحي..
هي راحت و أنا وقفت نسڨم في روحي شويا و شفت باب الڨاراج يتفتح جبدت روحي شفت صراع و هو يفتح فيه فتحت التاقة و قعدت نشوف فيه و هو يدخل فالطونوبيل.. شافني بصح غلق راسو و ما عبرنيش مانبا.. ڨاراها جاز من الصالون و دخل للهول لاقاتو الحاجة و أم صفاء سلم عليهم و رحبت بيهم و هو واقف منبعد طلع للشومبرة بدل حوايجو و عاود حبط قعد فالصالون..
حطينا الغدا للرجال فالصالون و لينا حنا النسا فالهول و الحاجة تشكر و تعاود في اسمهان طاحت عليها المحبة..
كملنا و رحنا للكوزينة قعدت نغسل حتى نسمع فالحاجة تقول لأن صفاء راني حايبا اسمهان جي تقعد عندي فالدار تونسني و تعاوني.. اسمهان بدات تضحك قالتلها ربي يطول في عمرك خالتي انت تأمري بصح..... دخلت قلتلها بعد إذنك الحاجة اسمهان ما نقبلهاش تقعد هنا.. قالتلي الحاجة ادخلي ليليان.. قلتلها ما ندخلش الدار دار أبو حرب و أنا مرتو يعني داري و هاد المرة ما نحتاجش نشوفها في الدار.. ياك ما راناش مقصرين معاك و هيام عندك.. قالتلي ما نمشيش كيما تحبي أنت، هي تان مرتو كيما انت كيما هي و حايبتها تعيش هنا منا و جاي.. قلتلها وشنو وشنو؟!! شكون مرتو؟!! مرت شكون؟!! قالتلي هيام ليليان أيا نطلعو لفوق.. قلتلها لالا ما نطلعش دوك تفهموني مرت شكون هي، انطقووووو.. قالتلي اسمهان وشبيك ليليان أنا مرتو قبلك بعام و نص ما تعديتش كلمة أبو حرب و احترمت قرارو.. قلتلها أنا لي مرتو معا باباك لبابات لي جابك يا الساقطة أم الرجالة.. كليتي راس راجلك و جايا دوري براجلي و طحت عليها بالضرب و هوما يجبدو فيا عليها.. خرج صراع و الحاج من الصالون جبدني عليها و طلعني لفوق و أنا نجبد في يدو عليا قتلو وخرررر عليا الله لا تربحك تكدب و متزوج و ما تقوليييييش.. بعدنيييي.. ما نزيدش دقيقة هنا.. رماني فوق البونك و تعنكر فيا قالي نسمع صوتك نوريلك.. قتلو وش راح دير تقتلني؟ أنا أصلا حايبا نمووووووت.. تكدب عليا و تقولي ما عندي والو معاها منبعد تظهر بلي مرتك الله لا تربحك حسبي الله عليك يا ظالم ما نحبكششش.. خلاني و خرج و غلق عليا الباب بالمفتاح، بديت نخبط فيه بيديا و نعيط صراااااع.. رخيييييس ... افتحلي البااااااب.. بديت نضرب في وجهي هبلت نضت طميت دوزاني فالفاليزا دخلت هيام قالتلي ريحي نهدرو.. قلتلها وخري عليا.. قالتلي ليليااان.. خليتها و حبطت الدار ما كان فيها حتى واحد كانوا راحو.. دخلت للحاجة قلتلها وين راهو وليدك؟ قالتلي اخرجي عليا وجهك صحيح أنت.. رحت نحوس على صراع حتى صبتو في شومبرة حلا يبدل في حوايجو و كان رايح يقعد.. قتلك راك في عقلك باش تخليني، اليوم ما نقعدلك هنا، نوض تديني نوض.. قالي اخرجي برا.. قتلو لوكان ما تخرجش ما نخرجش حرقتلي دمي حرام عليك، علاش تكدب عليا؟ ماشي قلتلي و الله ما عندي حاجة معاها؟ تحلف بربي بالكدب؟!
دخلت هيام قالتلي ارواحي لهنا أنا نحكيلك و الله ما عندو حاجة معاها و ماهوش حايبها أصلا يا البهلولة و راهو خرجها من الدار و ما قبلهاش أسكتي.. قلتلها لالا ما نسكتش و ما نقعدش هنا.. و درت ليه قتلو يلا نوض اديني نوووووض.. قالها لهيام راني دايخ أم علي ما نسمعش الحس ياريت تخرجو.. قتلو راك حايب تريح؟ و الله ما نخليك.. قالتلي هيام يا ودي امشي معايا و نفهمك.. قلتلها ما نفهمش دوك يطلقني ما نبقاش معاه.. قالتلي وين تروحي يا الحابسة ارواحي نفهمك برك.. قتلو ما ترقدش نوض.. ماشي  أنا نغلي و أنت ترقد.. راني نخرج و نهرب و ما نبقاش.. قالي روحي طريق السد لي تدي ما ترد، ما تنسايش تغلقي الباب موراك كي تهربي، يلا اخرجي خليني نرقد.. خليتو و رحت نطم في دوزاني و هيام تجبد فيا منبعد عاودت دخلت اليه قتلو لوكان ما تنوضش تديني دوك نروح وحدي.. كان متكسل مغمض عينيه و حاط يدو على جبهتو.. روشلي بيدو بالسلامة باي باي.. و دارلي جاست بيها تع اخرجي برا..
حبطت نغلي وهيام تعيطلي منبعد قالتلي  و الله غير صح أنت ما تحشميش.. خرج الحاج قالي جيتي و جبتي مصايبك معاك،  متزوجها قبلك و تزيدي تهدري، نورمالمو هي لي تزعف بصح هي بنت أصل.. خليتهم و خرجت للڨاراج جيت نخرج جاتني صعيبة وقفت و قاعدة نبكي.. الرخيس علبالو بلي ما نقدرش نخرج علابيها ما تحركش من بلاصتو..
قعدتني هيام قالتلي و الله ما يحبها.. أنت ما شفتيهش وش دار فيهم دوك كي رفدت عينها فيك و قالتلك أنا مرتو قبلك بصح ما يهدرش لخطر مازالو زعفان منك.. و الله غير حشمهم ما خلاهمش يزيدو دقيقة و خرجو مهبطين ريسانهم.. قلتلها بصح هي مرتو فواش ينفعني هاد الكلام؟ قالتلي يا ودي عقد بالشيخ برك، دوك أنت خميلها مليح.. تزوج معاك موراها بعام و نص ماشي بنهار ولا يومين، في بالك علاش راح ثبت زواجكم فالمحكمة و هي لدوك ما دارش معاها هاد الخطوة؟ ما يحوس لا يجيب معاها الدراري و لا تورثو، و الله ما خبى عليك خدع.. خبى عليك برك لخطر علبالو تزعفي و ديري حالة و تولي حياتكم غير مشاكل على زواج غير بالاسم.. بصح هي عينها فيه و ترطب ليما منهار راح للعاصمة باش يحوس عليك.. استغلتها فرصة كل يوم تعيط ليما و تتستتلها بالاك يحن عليها صراع في وجهها لخطر علابالها بلي ما يكسرش كلمتها و هي نقطة ضعفو حبت تخدم بيها كي عرفت بلي كان رايح يطلقك..  قلتلها أم علي بصح مازالها على ذمتو وش راكي تهدري أنت.. صحا نسقسيك ما دناش ليها؟ قالتلي يا ودي و الله ما كان حايبها، كي مات راجلها باباها ضارب مع أبو صفاء و منع اسمهان و ولادها عليهم.. و المرحوم صفاء صاحب صراع كان وصاه على ولادو و باباها رخيس زكر فيهم حتى شبع على هديك اضطر يروح يخطبها و يرجعها لدار صفاء ويقعدها فيه بعقد بصح عمرو ما خمم فيها و لا حبها بصح هي تحبو.. هاد الكلام كامل ما يهمش المهم هو شكون لي حب و شكون لي خير، علاش تحبي تخسري و تخليه يخير..
قلتلها أنا ما نحوس لا نخسر لا نرتاح، خوك يحب يبروفوكي، يشوف فيا نتحرق و ما علابالوش بيا و يزيد يقولي طريق السد لي ما ترد.. قالتلي لخطر مازالو زعفان منك.. لوكان شفتيه كيفاش بهدلها كي هدرت معاك..  قالتلي نور يا الجايحة وقتاش تحطي عقلك في راسك؟ خارجة و مخليتلها الدار باش جي و تصيبها واجدة.. قلتلها خليها جي أنا مانقدرش نشاركو في وحدة نموت تعرفو وش معنتها نمووووت.. ما تفهموش هو خاني.. خليتهم و دخلت نبكي، طلعت لفوق دخلت للشومبرة لي كان هو فيها صبتو متكسل على كرشو مغمض عينيه بصح علبالي ماكانش راقد نعرفو.. قربت منو قتلو يلا نوض تديني يلا ما تبقاش تلعب بأعصابي هكدا نووووووض.. و نوض فيه بيدي بالزور منبعد نغزتو في جنبو و زيرت  عليه قتلو يلاااااا... ناض تقعد و خزر فيا قالي رايح نرجع نرقد وقسما بالله العلي العظيم و تزيدي توشيني و تنوضيني ما تلومي غير روحك.. كي ناض فاص افاص في وجهي خفت جبدت روحي.. شفتو رجع رقد عاودت رجعت قتلو يلا نوض علاش راك تحرقلي في دمي هكدا حرام عليك، وش تحتاج عندي ما درتلك والو و ما تقولش خليتك و خرجت، أنا ما خرجتش غير كي تآذيت، عمري لا بعتك ولا خممت في واحد من غيرك، وش ذنبي باش تظهر متزوج، أنا غلطت بصح ما خنتش، حرام عليك دير فيا هكدا نوض بلا نوض، كي كاش واحد يخزر فيا نوض نبكي نحس روحي من حقك غير أنت و أنت متزوج غيري و بايعني.. نوض طلقني  يلا.. لوكان ما جيتش زعفان راك تحلل فيا بصح كي جيت زعفان راك مخليني هكدا و راقد بالنوم ماعلابالكش بيا يلا نوووض...
قعدت نهدر نهدر نهدر لوكان رجعلي هاداك الحيط يرجعلي صراع.. قعدت نزن عند راسو و هو ساكت و يحك في جبهتو داخ.. مام أنا دخت و رقدت فالقاعة و راسي على الفاليزا ديالي.. كي فطنت صبت الظلمة فالشومبرة و الغطا فوقي.. نحيتو و نضت خرجت نحوس عليه صبتو فالصالة يتكيف.. كنت نعسانة تكسلت فوق الكنابي و رقدت كي فطنت صبتو هو تان راقد.. حبطت للكوزينة طلعت معايا باش ناكل و قعدت نتفرج فالتلفزيون.. أذن هو راح توضى و دخل للشومبرة يصلي.. دخلت عليه للشومبرة صبتو يسبح قتلو شوف أنا مانيش حايبا نقعد هنا خير يا أنا يا هي بصح في زوج ما نقبلش.. ولا عمبالك الحاجة تحبها طلقها ولا طلقني يلا.. اسمع كي نكون نهدر معاك واجبني ماديرنيش فالثقيل..
رفد الزربية تع الصلاة و ناض خرج جيت نروح موراه جبد الباب و غلقو بالمفتاح.. بقيت نروح و نجي فالشومبرة و نطلع و نحبط حتى ال10 و أنا قاعدة سمعت الحس لتحت رحت للباب غير دورت الباص تفتح.. واقيل فتحو بلعقل و أنا ما فقتلوش..
حبطت صبت أم صفاء واقفة و اسمهان  تبكي و تحلل فالحاج و الحاجة قالتلو تعيش الحاج الله يستر على ولادك والله ما نزيد نجي و لا ندور بعايلتو بصح أهدر معاه ما يطلقنيش، الدراري شكون بيهم حتى بابا ضرباتو لاطونسيو و حكماتو آفيسي.. و الحاج يستفسر و يعيط لصراع فالتلفون كان خدام.. قالتلو أم صفاء عيطنالو لبارح فالليل قال هنا يخلاص هاد الزواج ما نقدرش نكمل على حساب داري و عايلتي، قالتلها الحاج وشمن دار و وشمن عائلة.. عيطولو شحال من مرة فالتلفون بصح ما رفدش عليهم..
تصدمت.. طلقها؟!!!  طلقها لبارح و أنا ليل كامل و أنا نبكي و نهدر و نزن عند راسو و مابردليش قلبي ولا قالي بلي طلقها
صراحة فرحت ماشي حبيت ناذيها بصح حسيتو صح يحبني كي طلقها بمجرد ما عرفت الحكاية و اكدلي بلي صح ما تهموش.. كامل كانو يخزرو فيا بحقد لخطر طلقها بسبتي..
قالت للحاجة و الله ما نحوس على والو برك يبقى سترة ليا، قلتلها أنت مرت صاحبو غير ما تخافيش ما يقطعش عليكم المصروف بصح وش فايدة هاد الزواج إدا هو ما يحبكش.. عيطو عليا باش نطلع لفوق.. دخلت هيام تجري قالتلها ليليان اطلعي لفوق ما عندها حتى معنى وقفتك هنا، لي كنتي حايباتو دارهولك و ادا عندك كلام تقوليه اهدريه مع راجلك ماشي هنا يلا اطلعي..
طلعت لفوق و قعدت نتفرج.. دخلوها للصالون، طلعت هيام لعندي قالتلي أنت ما فيكش الخير هدا تهربي منو؟! طيحتو قدامو زوج دمعات ما حملش راح قبالة طلقها بصح أنت صح رخيسة.. قلتلها هربت من ظلمو.. قالتلي كلشي منك انت حابسة لوكان صارحتيه ملول ما يظلمكش.. علبالك بيه بلي يعشقك.. قلتلها ديجا هادي أم صفاء بنادم؟ ماشي اسمهان مرت وليدها؟ قالتلي ياودي مساكن ناس فقراء للطرف خافوا ادا مور الطلاق يقطع عليهم المصروف.. قلتلها و هادو بشر باش يبيعو كرامتهم على جال الدراهم؟ قالتلي الزول واعر ليليان ما جربتيش ما تهدريش.. قلتلها و صراع علاش ما رفدش عليهم التلفون؟ قالتلي عيطتلو أنا رفدلي قالي وش صرا علاش يما و بابا راهم طايحين عليا بليزابال و أنا خدام، قتلو دوك نستفسر و نرجعلك بالخبر منبعد عيطت لنور حكاتلي، عاودت عيطتلو قالي خليهم يريحو و كي نجي نفري هاد الموضوع، قلتلها راني خايفة يتراجع.. قالتلي لوكان ما حسمش أمرو و خمملها مليح من كامل الجوانب ماكان خدا قرار باش يتراجع فيه.. ادخلي للشومبرة و ما دخليش روحك و ردي بالك كاش ما تهدري لخطر رايحة تأثري عليه و يقولو تمشيه كيما تحب هي، خليه هو يدبر راسو.. قلتلها معليش..
قعدت فالشومبرة حتى للظهر حكمني الديڨوطاج و زيد جعت.. حبطت كي كنت فالدروج سمعت صوت باب الڨراج تفتح عرفتو جا.. رحت للكوزينة شفتو يڨاري فالطونوبيل.. رحت بلخف خرجتلو كاسو و سربيتلو ما بارد.. هو دخل لابس لاتونو ميليتار ديالو و أنا درت باش نرجع القرعة تع الما للفريجيدار.. بلاما يهدر حتى كلمة شرب الما و حط الكاس.. دخلت هيام قالتلو على سلامتك خويا، قالها الله يسلمك وين راهم؟ قالتلو راهم لداخل.. جا الحاج قالو علاش يا وليدي طلق عيب و الله غير حشمت منهم.. قالو بابا نطلع ندوش و نبدل و نجي نتفاهمو.. هو خرج و الحاج دار ليا قالي هدا كامل من تحت راسك يا المصفارة ان شاء الله تكوني رتحتي دوك.. دورت وجهي عليه.. خلاني و خرج.. شويا و حبط صراع دخل للصالون و أنا قعدت نطل عليهم.. كانت قاعدة أم صفاء و اسمهان و أهلو، قعد هو و قالهم غير لخير؟ يهدر ببرود شغل ما صرا والو حتى هوما قعدو يشوفو في بعضاهم.. قالتلو اسمهان شوف أبو حرب أنا عمري ما خممت نوصل لعايلتك ولا نقلق مرتك و......
قاطعها قالها أم سيف بعد إذنك.. أنا ما طلقتش برك على جال مرتي طلبت مني ماشي هامني هاد الموضوع، بصح انا ماوليتش نشوف معنى لهاد الزواج.. كي قررت نعقد معاك كانت الأمور متوترة مابين باباك و الحاج أبو صفاء، دوك الأمور راهي مليحة و أنت مرا بالاك تحبي تشوفي حياتك علاش حتى نظلمك و نبقى رابطك بعقد و أنا ما نقدرش نكمل معاك.. الحياة مازالها قدامك و الأمور تحسنت الحمد لله ما قعد حتى معنى لهاد الزواج و انا تان عندي داري و عائلتي ما خصونيش مشاكل..
قالتلو كيما جبتها فالفترة كيما هربتهم من الارهاب ياك وصيت باش ما تعرف ما تحس و احترمت قرارك و ما حسستهاش، كنت نخدم بيدي و ما نهدرش، الحاجة هي لي قالتلها.. بصح أنا نحتاجك ما تردنيش خايبة.. قالها و الله ما نخليكم و مصروفكم يوصلكم في وقتو و ربي شاهد عليا بصح هاد الزواج ما نقدرش نكمل فيه نتمنى ما تحرجينيش..
ناضت تبكي و راحت ليه سلمت على راسو قالتلو تعيش و الله ما نطلب منك كثر من هاد الشي.. أنا حاضرة لوش حبيت بصح تراجع على قرارك.. ناض من بلاصتو جا يهدر معاها هدرت انا قلتلها راهو يقولك لالا وشنو بالسيف واقيل.. دار بلخف ليا عيط عليا قالي أنت ما نسمعش حسك اطلعي لفووووق يلاااا..
خرجت قعدت فالدروج و نسمع.. هي بدات تبكي و أم صفاء غير ساكتة ما هدرت والو و الحاجة تهدر معاه و هو غير يتعذر و مع لخر دار السبة بالتلفون كان يصوني.. داه و خرج و هوما خرجو حكملهم الحاج طاكسي و راحو و الحاجة قعدت ترفد و تحط قالت كيفاش يطلق باش برك لالة ليليان ترضى، يخليها هي و اليتامى و يجرحها.. شويا مور ما راحو و عاود دخل صراع حكماتو الحاجة قالتلو مانيش راضية عليك هكدا طيح بيا قدامهم و تخليني أنا السبب في طلاقها، هكدا دير في يماك صرااااع...
قالها لوكان خممتيلها مع لول.. يما مانيش راقد على ودنيا.. عرضتيهم بلاما علابالي بلعتها و سكتت.. و قررتي باش جيبيها تعيش هنا باش تفرضيها عليا فرض و فوقها رحتي قلتي لليليان بلي مرتي و شعلتي النار فوق راسي.. ألف مرة قلت و عاودت و من زمان اسمهاااااان ما تعنيلي والو و حاجة ما تربطني بيهااااا..
قالتلو ااااا انت قاتلاتك ليليان دوك فهمت.. ماشي قلت نطلقها و ما نحتاجهاش؟ قالها نطلق لي نحب و نخلي لي نحب هادي حياتي واحد ما يدخل روحو فيا.. قالتلو و الله يا وليدي ما غلطو كي قالو لعبت بعقلك.. خلاص نسيت وش دارت فيك؟ و مازالك تجري موراها.. هي قالتلو هكدا و الراجل خرج من عقلو بدا يعيط خرج و خبط الباب موراه.. قالتلها هيام يما هدا كلام و تقوليهولو؟
قالتلها بهدلني سودلي وجهي قدام المرا انا لي قلتلها جي، قالتلها يما ياك قتلك بلي صراع ما رايحش يقبل خلاص ما خصوهش مشاكل باش تزيديها عليه أنت تان.. اسمهان خايفة عليها من الطلاق و ليليان تقوليلو طلقها؟ هادي تان يتيمة وشبيك يما وش خداك هدا انت لي تخافي ربي، قالتلها أنا ماني حايباتو يطلق ليليان ما قبلت باش يرجعها، ياك النهار الاول كامل لي جات لعندنا قتلو ياوليدي الطفلة يتيمة خليها هنا و ما طلقهاش مسكينة بصح ماشي معنتها يظلم لوخرا.. نسيتي وش دارت فينا ليليان حنا نقولو يتيمة و مازالها صغيرة و ما تغبنهاش و ما تجرحهاش و هي طلعت فوق ريسانا.. لالا ماشي هكدا يا بنتي لازم يتحطلك حط كثرت على ما وصاوها، قالتلها يما تعيشي ما دخليش روحك هو يحبها و يحوس يفرح معاها مستكثرة عليه هاد الشي؟  قالتلها ياودي أنا لوكان شفتو مرتاح  و الله ما نهدر كلمة بصح خلاص رايحة تجلطو بمشاكلها الراجل عيا.. قالتلها و هو راضي يا يما خليك منو ما دخليش روحك ما بيناتهم كي يصرا وش يصرا.. الراجل و المرا مرة يداوسو و مرة يتصالحو و لي يدخل روحو ما بيناتهم يربح غير سواد الوجه خليك منهم..
طلعت لشومبرتي و قلت ليوم نستيكي روحي و نصالحو و نخفف عليه، دوشت و بدلت و جبدت شعري و ماكييت و خملت الشومبرة و قعدت نستنى فيه، لحق الليل و هو ماجاش.. حبطت طونوبيلتو ماكاشها  قعدت نستنى حتى سمعت صوتها سڨمت روحي هو طلع راح قبالة لشومبرة حلا نضت رحت دخلت لعندو صبتو يبدل قتلو صراع.. قالي اخرجي برا.. قتلو حبيت نهدر معاك.. قالي و انا مارانيش حايب نهدر.. قتلو شوف علبالي غلطت... قاطعني قالي اشششت ما نحتاج لا تبرير لا هدرة غير روحي.. قتلو ما نروحش ولازم نتفاهمو.. قالي علواش نتفاهمو ااااه؟! دوك تفكرتي تتفاهمي بعدما خليتي الغاشي كامل يعايرني بيك.. هدا لواش كنتي حايبة توصلي؟ قتلو لالا و الله ما هكدا ما كانش قصدي برك كي تآذيت.. قالي و كي تآذيتيييي علاش رجعتي لعندي؟ ياك أنا راجل همجي و ظالم و ما نفهمش و حيوااااان.. أخطيني يرحم والديك أخطيني.. قتلو صراع تهدن وشبيك؟ استغفر و قعد فالبونك قالي منهار لي فتحت عينيا على هاد الدنيا و أنا كل ليلة بابا يضرب يما.. رسخت في راسي فكرة بلي لازم نولي قوي و نخوفهم كامل باش واحد ما يتجاوز حدودو معايا و لا مع لي يخصوني و كبرت على هاد الشي.. ألف مرة قتلك سانديني و خلينا نصلحو بعضانا، مانيش حايب نطلقك و مانيش حايب نستعمل معاك أسلوب الضرب كيما كنت.. صلحي روحك يا بنت الناس.. استعقلي يا بنت الناس.. ترباي يا بنت الناس.. وش درتي؟ كل مرة تزيدي للقدام و يصحاح وجهك كثر و كثر .. نقعد بالسوايع و أنا نعقل فيك و نشرحلك بصح أنت ما تفهميش لي نوصيك باش ما ديريهاش هديك لي تحلالك عليها و ديريها زكارة و ترفيدي غير الطبايع العيانين الحاجة المليحة كامل ما تبرونشيلهاش.. و ختمتيها بهاد الضربة تحبطيلي راسي فلرض و تهربي و كي ما تصيبيش شكون لي يستقبلك ترجعي لعندي؟! بعد واش؟ رجعتي ما عنديش اشكال بصح هاد الشي ما يعنيش بلي راني حايبك الشي لي تكسر مابيناتنا صعيب باش يتصلح.. ماشي شرط لي يتأذى غير كي تضربو بكف.. أذية النفس كثر من أذية الجسد و أنت كل مرة تآذيني في روحي و هاد المرة جرحتيني جرح صعيب باش يبرا.. كل مرة تخليني في حرب نفسية مع روحي.. تتجاوزي معايا و نضربك منبعد نندم و نقعد نضارب مع روحي نقول يتيمة حرام عليا نتوشيها..
لوكان نضربك بكف بالزور و يكون باللعب و الله ما يهمك و رايحة تبقاي تضحكي  بصح لوكان نضربك بكف خفيف و أنا زعفان رايحة تغيضك و تبكي..
3 أيام و أنا نحوس عليك كي المهبول و ما علاباليش وين راكي.. كنت مرات مانفيقش حتى دموعي يبداي يطيحو منبعد نمسحهم  نحشم من روحي.. حطيتيني في موقف صعيب بزاااف... كلشي رخستو على جالك و أنت رخستيني أنا.. خرجتي كي كان عندك أمل صغيييير باش تتهناي مني و كي ضاع هداك الأمل رجعتي ماشي حبا فيا انت ينطبق عليك المثل لي يقول الغريق يتمسك بقشة و أنا هي هديك القشة.. أنا ماشي واحد ما عندوش كرامة باش نقبل بيك بهاد السهولة كلشي كلشي غير كرامتي.. قلبي نرحيه و ما نذلش روحي لوحدة ماشي حايبتني.. لي ما بيناتنا خلاص ليليان ما تزيديش دوري لجيهتي.. مصروفك يوصلك و حقوقي عندك متنازل عليها راكي مسامحة.. ياك حبيتي تعيشي حياتك؟ عيشي.. جبد الغطا و رقد..