مراهقة والاربعيني بلهجة جزائرية

جزء التاسع ☀️

#المراهقة و الأربعيني:

#الجزء التاسع:

كي كملت دار ما عرفتش كيفاش فاق بلي كملت شكيت شاف خيالي فالتلفزيون.
قالي خوك علاش فورصاك؟ قتلو كي وسخ خوك سمعتي في الحومة و مشات الهدرة العيانة عليا قالي ماشي كانت عندك علاقة معاه علاش فضحتي روحك قتلو و الله ما كان عندي حتى علاقة لا معاه لا مع غير هو لي كان يتبلاني و لحقني بالطونوبيل حتى لحومتي و تحرش بيا و حب يديني دراع معاه فالطونوبيل و بهدلني قدام الجيران، قالي بصح هو حلف على المصحف محسوب كان يكدب؟ قالتلو هيام مادام ام سعد يماه توقع منو كلشي، شفت مسكينة ظهرت ظالمها، قالها فواش ظلمتها ما ضربتها ما آذيتها، كي نجيب وحدة لداري ما نعرف عليها والو و تدخل في حياتي بهد الطريقة وش حبيتني ندير؟ حتى و نتقبلها و نرضى بمكتوب الله ما تسنايش مني ندير فيها الثقة، جازو عليا جور يبانولك ملايكة حتى يخرجولك بخرجة من القصب و زيد الجيل تع هد الوقت ينخاف منو، ما عنديش فيها ثقة لوكان دوك يخرج خويا من قبرو و يسعترف، ما دامها غريبة نستنى منها كلشي و خرج.
هو يهدر و أنا ساكتة كلامو سم، قالتلي ختو ما تلوميهش مازال ما يعرفك.
عاود دخل و قالها أم علي ارواحي دقيقة نحتاجك راحت ليه شويا هكدا عاودت ولات قلتلها ياك غير لخير تبتسمت و قالتلي عطاني دراهم قالي باش نشريلك حوايج، هزيت راسي تع معلميه علبالي عقليتنا و عقليتهم ماشي كيف كيف.
دارتلي تشكة و قالتلي دوك يمشي فيك الدوا و تريحي بصح ما ترقديش الحمى و لاڨريب كلما ترقديلهم يزيدو عليك ماشي مليح، منبعد قالتلي كاش ما كليتي؟ قلتلها لالا ما قدرتش قالتلي و كيفاش حبيتي تبراي، دوك نروح نجيبلك حاجة تاكليها.
راحت جابتلي كليت منبعد قلتلها شكون اخلاص وش تكون؟ لبارح لبارح حسيتها تقول حاقدة عليا و كانت متعمدة وش دارت، قالتلي هاديك بنت عمي صالح اخت وجدان مرت صراع الله يرحمها و في نفس الوقت لوستي خت راجلي الله يرحمو كلاتلهم كامل ريسانهم و قعدت دور كي اللفعة تع مشاكل.
قلتلها عايلتكم كبيرة الله يبارك بصح ما فهمتش كل واحد وليد من دخت هههه قالتلي دوك نفهمك الوضعيه بابا تزوج مع يما منبعد تزوج أم سعد و هجر يما حتى الضحكة باخلها بيها آخر مرة توشاها باش جابوني أنا ااحسبي من ال78 و هو هاجرها حتى لدوك، قلتلها و يماك قبلت بهد الشي؟ قالتلها يما مسكينة بنت باب الله اعطيلها صلاتها و سجادتها و مسبحتها تبعد على المشاكل قد ما تقدر و تسكت و هي أكثر وحدة تآذات في هد الدار بصح دايمن تقول الدنيا ماشي دار راحة و لي يحوس على الراحة يقرب لربي.
شوفي أم سعد تزوجت مع بابا و اختها تزوجت مع عمي صالح و سيطروا على الخاوة لوكان يديرو وش يديرو واحد ما يهدر معاهم.
صراع هو طبيعتو ما يحبش البراوية ما يامنش و مشكاك بزاف أصلا حنا كامل ماخدين من عند بعضانا و كي حب هو يتزوج قنعاتو ام سعد ياخذ بنت ختها وجدان يمات حلا و حرب لي هي بنت عمنا و أنا خذاوني لخوها يعني زواج ڨصة بڨصة و ياريتني ما تزوجت قلتلها علاش تنهدت و قالتلي وش نحكي وش نخلي يا ليليان شفت قهر غير ربي لي يعلم بيه، قلتلها انت مطلقة؟ قالتلي لالا أرملة راجلي توفى 2006 قلتلها الله يرحمو قالتلي صح مات و تكسرت موراه بصح ارتحت قلتلها علاش قاتلي سقسيتيني على اخلاص وش تكون ياك؟ إخلاص خت رجلي و خت وجدان مرت صراع كانت مشربتلو المرار وين تبان ام سعد قدامها جمرة حمرة قبيحة بزاف و تع مشاكل.
حنا عايلتنا لاباس بيهم كامل عاطيهم ربي من خيرو الحمد لله و أنا كنت حايبة نخرج بداري وحدي و نهرب من المشاكل بصح راجلي ما قبلش بسبة يماه و خياتو مالڨري صراع كان خارج بدارو وحدو كي كان متزوج مع وجدان و بعد سنين كرهتلو حياتو عاود رجع معانا و هي قلبت الدنيا و غضبت في دارهم كي باع الدار لي كانو ساكنين فيها و كي عرفوا بلي كان رايح يطلقها رجعها باباها غدوا منداك، قلتلها علاش حتى يطلقها؟ قالتلي ما كانش يحبها أصلا.
و دوك راهم حايبين يلصقولو ختها إخلاص.
هو صح تشوفيه ساكت و كالم بصح علبالو بكلشي حاجة ما تخفى عليه، و مرتو كانت تتصاف مع خالتها أم سعد على يما و هو يضربها على جال كي تآذي يما، ايماجيني حتى حوايج يما ما كانتش تغسلهم، و كي يتزاعف هو و إياها تولي تعرف يما و جي تتطلب منها تتوسطلها لخطر علابالها بلي صراع نقطة ضعفو يماه و ما يردلهاش طلب، و أنا والله غير كنت خدامة و نجري ما بيناتهم على آخر واحد هنا و في دار عمي، هدي إخلاص كانت حتى حوايجها الدخالا أنا لي كنت نغسلهملها قلتلها و هي علا ما تغسلهم وحدها قاتلي والديها مدلينها طاس الما ما ترفدوش حتى يماها ما حبتش تزوجها لاي واحد قالتلك واحد ما يستاهلها ما نعرف علواش و دوك راهي باينتلها على صراع حبت تلصق روحها دراع و راهي تخدم بحلا باش تريڨليلها كوارطها.
حنا نحكيو حتى دخلت الحاجة قالت و هاي ليك يما شاهدة كان يجي عيد و يروح عيد جبيبة كي النسا ما يشريهاليش من تحراشهم، معيشتي كامل كانت على خويا صراع كنت نجي لدارنا كل شهر 3 ايام، و كل عيد يجي ليا محمل أشكال و ألوان و يقولي وش تحتاجي راني هنا، قعدت الحاجة و قالت وش جاب هد السيرة دوك، قالتلها هكدا برك كنت نحكيلها، قالتلها لوكان تعرفي شحال يحبك قالتلها و الله لوكان نشعلو كامل صباعتيا شموع ما نردلو شويا من خيرو ملبكري دايراتو هو بابا ماشي الحاج، الحاج عمرو و ادا حامى عليا لاتي غير وش قالت وش دارت أم سعد، كنت كي نجي انا و ولادي وجدان ما يعجبهاش الحال كي يقعد معانا هنا في شومبرة الحاجة و نقعدو نحكيو و نضحكو، ما يخلي ما يبقي ما يجيب غير لي ما تشهيناهاش، و كي يطلع النهار وجدان صباح الخير ما تقولهاناش تزبط وجهها فينا و تقعد مع خالتها.
و هو والله ما مقصر معاها في حاجة و يجيبلها غير قلب الحبة و لي تطلبها تحضر الحاجة الوحيدة لي كان مقصر فيها و الواحد يهدر الحق ما كانش يخرجها و ما يقعدش معاها بزاف و يتحجج بالتعب و الخدمة و هو ما بيه والو يكره يخرج مع النسا بصح كي تروح لدارهم يعطيها مصروفها و وين تحب تروح ما يقلهاش لالا.
قالتلها يماها خلاص يا بنتي علاش راكي تجبدي فالموتى، قالتلها ماتت الله يرحمها و طلبت السماح بصح الحكايات تبقى و الجرح صعيب باش يتنسى.
و دارت ليا قاتلي تعرفي ليليان دوك عندها ثمن سنين ملي ماتت و ما حبش يتزوج و كي قالتلو يما نخطبلك إخلاص وصراع علبالي كي تهدر يما ما يقولهاش لالا مام ماراهوش حايبها خفت و دعيت قتلو ياربي ماناش ناقصين حية ثانية يارب ديرلهم تعطيلة، وصرا لي صرا و جيتي انت قلتلها بصح انا مانيش حاباتو راهو قد بابا ان شاء الله برك ما يجبرنيش على روحو، ضحكت قاتلي إدا كانت داعيتلك يماك بالخير يحن قلبو ليك، انت ما تعرفيش صراع شحال نفسو عزيزة ما يرميش روحو على وحدة ماشي حايباتو قلتلها احسن هو ما راهو حابني و أنا كيف كيف لوكان غير يطلقني و نرجع لدارنا و نكمل قرايتي، قالتلي إن شاء الله.
الحاجة كانت تقرا فالقرآن كي كملت قالت في عوض هد الحكايات روحي عاونيهم في الكوزينة، قالتلها خليني منهم راهم في طاشمة، منبعد حطت يدها على جبهتي قاتلي تبالي راكي خير من مقبيل قلتلها إيه الحمد لله، قالتلي يمال نوضي نخرجو للجنان نشمو هوا نقي، خرجنا حنا نمشيو حتى جا وليدها يكون في عمرو وحد 15 سنة قالها على المصروف قالتلو سلم على مرت خالك قالها شكون خالي؟ قالتلو خالك صراع قالها ماما منك بالصح هادي مرتو؟ حشمت و ضحكت قالها فعوض ما رحتي تجري و زوجتيه لوكان زوجتيني أنا ماشي خير، قالتلو لوكان يسمعك تشوف وش يدير فيك ناض يضحك و راح قلتلها الله يحفظو قالتلي و يحفظك، قلتلها آمين، شحال عندك دراري؟ قالتلي ثلاثة علي 15 سنة لي شفتيه دوك و سارة 13 و جنات 9 سنوات، قلتلها الله يبارك ربي يحفظهملك و عندك خياتك؟ قالتلي إيه عندي من 3 من بابا بصح علاقتنا ماشي قوية وحدة ما تحوس على لوخرى و 4خاوة نائل و سعد و علي مور سعد متوفي الله يرحمو و عابد الله يرحمو، و من يما عندي غير صراع. قلتلها خياتك ما شفتهمش قاتلي غير خلاص العزاء لديورهم قالو ما نشوفوش الارهابية خت الارهابي قلتلها أوووو هوما تان؟! ضحكت و قالتلي مسيرتك طويلة وطريقك شوك وجدي روحك.
دخلنا للكوزينة كانت أم سعد و نوال يطيبو نطقت أم سعد قالتلي واقيل يديك فيهم الحنة باش ما ندخليش معانا للكوزينة، واجبتها هيام قالتلها الطفلة راهي مريضة لا ماكلة لا شراب كنت رايحة نجي نعاونكم بصح قلت نخرجها تشم هوا نقي نهار كامل ما خرجتش من الشومبرة، قالتلها و أنت علاش راكي مهتمة بيها لهد الدرجة
-وانتي شدعواج هيج مهتمه بيها إن شاء الله ما يخرجها مرض و تموت و نتهناو منها، قالتلي هيام امشي معايا ليليان و عاودنا خرجنا للجنان قعدنا لتم حتى لعشية كي شافتني بردت قالتلي أيا ندخلو خير ما تعاودي تمرضي.
حنا جينا داخلين حتى نشوفو دار عمها صالح جاو و معاهم إخلاص كي العادة ناضت هيام تضحك قاتلي راهي جات خلوص ههههه تبسمت
دنكوم دخلو بيت عمها كالت استلمي اجت خلوص تبسمت.
دخلنا تسالمو النسا و قعدو جامي شفت تجمعات كبيرة تع العايلة من قبل، حبط صراع و قعد ما خزرت منبا فيا، قاعد يخنتش في تلفونو و مين داك يهدر مع خوه سعد.
سقاو الماكلة نضت نعاونهم نجيب معاهم قالتلي الحاجة ادخلي للكوزينة ما تحطيش الماكلة انت و روحي بدلي حوايجك هدو خفاف بزاف قلتلها بصح ما عنديش من غيرهم قاتلي ادخلي و ما دوريش هنا بيها حتى تشريلك أم علي حوايج.
رحت وقفت فالكوزينة و اخلاص تقول هي مولات الدار محزمة و مشمرة و تسقي و ترفد و تحط و تعرض و حاسبة روحها ملفوق.
قالتلي انت علاش راكي واقفة هنا قلتلها أبو حرب ما يحبش نخرج يقولي حوايجك خفاف بدات تنسف كي اللفعة قالتلي صحا ادي هد السنيوان يجيبو فيهم الماعن لي كملو بيهم قلتلها قتلك أبو حرب ما يحبش حبتني نخرج بالسيف باش ديرلي مشكل، قالتلها نوال لالا خليهم حنا ندبرو ريسانا. بدات تمسح فالبوطاجي و تقول يا يما شحال كاين قليلات الحيا لي يطيحو الرجال و تمعني عليا ما رجعتلهاش و خرجت و رحت وقفت قدام شومبرة الحاجة و قعدت نخزر فيهم شافني حرب عيطلي رحت قعدت قدامو و الحاجة قعدت قدامي وصراع قدام حرب.
بدينا ناكلو انا وحرب كنا ناكلو في طسي واحد، صراع رفد هبرة لحم و حطها في طبسينا انا و حرب و زاد رفد زوج كانيطات بيبسي و حطهم قدامنا، فهاديك اللحظة حسيت روحي خت حرب و صراع بابا، حبيت هداك الشعور لخطر شعور فقدان بابا خلالي وحد النقص و تمنيت نشوف واحد يعاملني كيما كان يعاملني بابا الله يرحمو.
كملت أكل أنا اول وحدة نضت قلت خلي نعاونهم فالكوزينة ماشي حتى هوما يقولولي و يذلوني.
رحت درت رغوة و بديت نغسل فالماعن و جات نوال تشلل معايا ما جينا نكملو بالسيف قوجا غاشي.
كي كملنا قالتلي نوال صبي لاتاي و وراتلي الماعن تع السهرة.
هيام قالتلي ليليان علبالك أبو حرب ما يشربش معاهم قتلها علاش قالتلي يحب يقعد وحدو ما يحبش الجمايع.
يتبع.....