مراهقة والاربعيني بلهجة جزائرية

67

#المراهقة و الأربعيني:

#الجزء67:

حكمني من شعري قالي أول سؤال معامن خرجتي؟ قتلو وشبيك صراع اطلق شعري.. عيط عليا و عينيه حمورا و عروق رقبتو خارجين من الزعاف قالي تهدري ولا نذبحك.. قتلو مع مرت خالي و بناتها.. قالي وين رحتو؟ قتلو للماناج.. قالي ماكييتي؟ قتلو إيه.. زير على شعري و قالي خرجتي بالحجاب لي رحتي بيه لدار خالك؟ قتلو لالا.. زاد زير على شعري قالي يمال وش لبستي؟ قتلو صراع تعيش اطلق شعري رايح تقطعو.. قالي تهدري خير ما ندفنك هنا.. قتلو سروال و تريكو.. أنا قلت هكداك و يطيح عليا بالكفوف و السبان قالي ماشي صراع لي الناس دايرتلو ألف حساب جي دوك وحدة ساقطة كيما أنت تكسر كلمتي.. و طبعني على البونك دا مني حقو الشرعي بالسيف عليا و بالضرب و أنا نبكي و نصوغ تحتو باش يبعد عليا، كي كمل طبعني برجلو طحت فالقاعة على كتفي صغت من السطر هو لبس و خرج راح يدوش و أنا قعدت نبكي و نصوغ كي سندت روحي و نضت شفت كتف حابط على كتف و العظم خارج.. درت كوراج لبست حوايجي بالسيف و فتحت الباب باش نحبط و أنا نعيط و نبكي لربي لي خلقني وحد السطر ما ينحملش.. صبت الحاجة واقفة فالدروج و تعيط قالت صراااااع الطفلة وشبيها وش درتلها؟ وقفت فالدروج و عيطتلها جي لعندي ما قدرتش نزيد نمشي كثر.. طلعت مسكينة تجري ليا من الخلعة مالڨري عجوزة كبيرة و مريضة شدتني و بدا تعيط قالتلهم اجريو ليها رايحة تمووووت... أول مرة نسمعها تدعي على وليدها الوحيد قاعدة تقول الله يكسر يدو و الحاج جا يجري كي شافت كتفي مخلوع قاعد يتحسب على وليدو و أم سعد جات معاه و إخلاص فاتحة باب شومبرتها و طل عليا..
حبطني الحاج بلعقل فالدروج و عيط قال نااااائل نوض الطونوبيل.. خرج صراع من الدوش صاب الدنيا مقلبة قالو خلي هاد الكلبة نعاودلها التربية.. عيط عليه الحاج قالو صراااع خاف ربي فالطفلة كتفها راهو مخلوع.. و دار ليا قالي امشي معايا بنتي امشي.. الحاجة ليستني حجاب و خمار و لبست حجابها و جات معايا..
صراع كي شاف حالتي حالة شر لنائل باش يحبط من الطونوبيل و طلع هو يسوق.. داني لواحد الانسان كبير قريب من الدار يعرفوه يجبر الكسور كي شاف كتفي قالي هادي أول مرة؟ قتلو لالا هادي المرة الثانية.. قالي بزاااف.. غير حكمني بديت نصوغ قالي اصبري بنتي شويا قيس برك ما نرجعو لبلاصتو.. قتلو لالا عمو تعيش رايحة نموت.. ما حملتش الحاجة قالت نديوها للسبيطار الطفلة خلاص ما قدرتش.. قالها هداك الراجل غير ماكالاه ماشي حاجة غير نرجعهولها لبلاصتو يروحلها السطر و زيد طريق السبيطار دوك راهي غير براجات على جال الليل.. قرب ليا الحاج باس راسي و قالي يلا بنتي ديري شويا كوراج خليه يرجعو لبلاصتو و قسما بالله بعد الشي لي دارهولك غير أنا لي نربيهولك هيا بنتي..
صراع قاعد ساكت بصح الخوف و الندامة كانوا واضحين في عينيه بصح أنا في هديك اللحظة كنت نشوفو أحقر انسان على وجه الكرة الأرضية و نعل صحبتي لي نصحتني باش نولي ليه.. قالي الراجل خلاص راكي واجدة؟ درتلو براسي إيه.. قال لصراع ارواح احكمها مليح.. جا حضني حطلي طرف الشال في فمي و جبدلي راسي لصدرو و كي بدا الراجل يرجع فيه لبلاصتو قلبت الدنيا بالعياط و البكا و صراع مزيرني لعندو كي خلاص كمل طلقت روحي فشلت رفدني كسلتي و الحاجة غسلتلي وجهي..
خرجنا فتحلي صراع الباب تع الطونوبيل و حكمني من يدي باش يطلعني قتلو وخر عليا مانيش حايبا نزيد نشوفك.. و قلت للحاج ما نرجعش معاكم وصلني لعند هيام.. جا يهدر صراع قالي الحاج ما يكون إلا خاطرك ولا سكت و طلع ديمارا و عينيه عليا..
قعدت يومين عند هيام ما حبيت نرجع ما قبلت نشوفو حتى خالي قلتلهم ما نروحش لعندو اعطيوني ورقة طلاقي و خليوني نخرج من حياتكم و نعيش كيما نحب بلاما نخمم في حتى واحد..
غدوا منداك جا صراع جابلي الفطور عيطتلي هيام باش نفطر معاهم ما حبيتش نخرج رفضت نشوف وجهو ولا ناكل من حاجة جايبها هو..
فالليل زاد جاب الشوا و الفاكية عيطتي هيام ما حبيتش نخرج جات لعندي قالتلي ماشي هكدا ليليان صح خويا غلط غلطة قد راسو بصح أنت تان طري راسك شويا بركاي من الخشانة واحد ما يخسر من غيرك.. دخل هو للشومبرة دورت وجهي عليه قالها أم علي خليني نهدر معاها..
هي خرجت و هو جا قعد قدامي مع لول بقى ساكت ما عرفش وش يقول منبعد نطق قالي و دوك كيفاش نقعدو هكدا كل واحد فينا في دار؟ قتلو ماشي أنت لي غلطت أنا لي غلطت كي رجعتلك لوكان غير خليتك تسمح فيا و بديت حياتي من جديد بصح مازال ماراح الحال نقدر ننساك و ما نزيدش نشوف فيك و نبدا حياة جديدة.. قالي جايحة شكون هدا لي يسمح فيك؟ و الله ما نقدر.. قتلو اسكت ماراني حايبا نسمع منك والو و ما تخلينيش نوصل لمرحلة وين نطيح معاك القدر يمال خلي الاحترام قايم ما بيناتنا و طلقني.. قالي الطلاق غير انسايه و حاجة وحدوخرا راني واجد ..  سكتت قالي اطلبي وش حبيتي نفذلك.. قتلو وش تحتاج عندي ما كفاكش الشي لي شفتو من عندك؟ ماراكش ناوي تعتقني و تخليني نعيش حياتي؟ شوف آثار ضربك مازالت في خدي.. تقبل أنت راجل بنتك يدير لحلا هكدا؟ ولا كي ما عنديش لي يوقف في وجهك حڨرتني؟ غاس شويا في وجهي منبعد قالي راكي مليحة كي ما قتلتكش.. تجاوزتي مع يما و شديت روحي ما ضربتك ما درتلك والو و قلت تخرجي عليا برك.. بصح باش تكسري كلمتي و تخرجي و ديري رايك و تمشي على هواك مع الق.... تع بنت خالك هادي و الله ما نجوزهالك و لوكان تعاوديها نعاود نعاقبك بنفس الطريقة بلاما نندم و لوكان بنتي دير وش درتي أنا نكسر ظهرها قبل ما تلحق لعند راجلها.. أنا غلطت كي طبعتك و راني مستعرف ما درتش في بالي رايح يصرالك هكدا.. سكت شويا منبعد قالي نوضي تتعشاي.. قتلو ما نتعشى ما نحتاج حتى حاجة من عندك برك أخطيني و طلقني.. قالي شوفي فيا مليح خشانة راسك هادي هي لي رايحة تقتلك.. ما كفانيش مازال ما رقدت ملبارح؟ خلاص عوذي من الشيطان و نوضي تعشاي باش نروحو.. قتلو في منامك و ما نروحش معاك راني نقولك طلقني.. بدا ينسف و شعل ڨارو و خرج و هيام دخلت لعندي تلوم فيا كي ما رحتش معاه، ظهرت بلي ما علابالها بوالو عندبالها على جال كي تجاوزت مع الحاجة و ضاربت مع إخلاص، كي حكيتلها كامل وش صرا قالتلي الحاجة لولى ما نبرأش خويا علبالي بلي غلط بصح انت تان غلطتي كيفاش تخرجي بلا علمو و فوقها بلا حجاب و بالسروال و التريكو.. هو قدام ولاد عمومو ما يخليكش تلبسي هكدا تروحي توري روحك لكامل عيباد الله؟! في زوج غلطتو عوذي من الشيطان و بركاي من خشانة الراس و الله غير لبارح شرب زوج حبات كاشي تع لاطونسيو و مازالت حالتو حالة.. و دوك ماراكيش كيما بكري تغضبي بالسمانة و الشهر و يجي يحلل فيك و يصبر عليك.. دوك كاينة ضرتك تغطي بلاصتك و هي بلاش تموت على ريحتو و تستنى غير الاشارة منو.. ما طرطقيش دارك بيدك، هو صح مقلق و غلط كي ضربك بصح علبالك بلي يموت عليك.. خمي في كلامي و اعتبريني براوية و نصحتك.. خلاتني و راحت تكسلت.. و أنا قعدت نبكي حسيت روحي في دوامة و ما عرفت وين راهو الصح..
جازت 3 سمانات و أنا قاعدة عند هيام و هو رايح جاي يحاول يقنعني، أنا ما رضيت و قعدت شايدة فالطلاق و هو ما حب يسمح فيا.. حتى وحد النهار جات الحاجة خرجت سلمت عليها بوجه ناشف قعدت معاها شويا و قلتلها اسمحيلي أنا ندخل نرقد.. قالتلي ريحي وين راكي رايحة أنا جيت على جالك.. قعدت قالتلي وين رايحة بهاد الغضيب بهدلتي الراجل، رايح يولي جد و باباه يبهدل فيه على جالك، عندو يمات ما رقد ما غفات عينو معولة تقتليه؟ يا بنتي و الله غير يموت عليك وش درتيلو رايح يهبل.. قلتلها خايفة عليه من حقك بصح ما قلتيش بلي أنا ما عندي لا أب لا أم شكون لي يوقف معايا؟ قالتلي لوكان تمشي سواسوا ما تصيبيش واحد أحن عليك كثر منو هو باباك هو يماك، أنا ما علباليش علاش دارلك هكداك بصح علبالي بلي درتيلو حاجة كبيرة ليليان.. هيام تشوف و ساكتة..
قالتلي الحاجة بلا نوضي وجدي روحك و امشي معايا قلتلها ما نرجعش.. ناضت تعيط عليا قالتلي وشبيك معولة طرطقي دارك بيدك ترجعي معايا و أنت تقولي يا سبحان الله، لبارح كي جا و ما رضيتيش تصالحيه دخل كسر كلشي فالصالون و طلعتلو لاطونسيو على جالك يا لالة مولاتي.. قلتلها دوك خليني مانيش حايبا نشوفو.. قالتلي لالا راهو مريض و أنا واعدتو نجيبك معايا الصباح خلاص بركاينا ولا راكي معولة تقتلي الراجل و تتهناي.. ارحمي روحك و ارحميه علاش عليك هاد الشي كامل.. عابد عبادة و ما نال من عندك والو حتى مرتو الثانية هاجرها باش برك ما تزعفيش، مطلعك فوق ريسانا لدرجة واحد ما يقدر يقولك نوضي يا ليليان ديري هاديك الحاجة.. وين رايحة تصيب كيما دلالو ليك؟ لوكان جا وحدوخر في بلاصتو راهو زمان ملي خلاك، وش خصو راجل كامل مكمل و غيرك تتمناه بصح هو قاتل روحو عليك أنت.. امشي بنتي معايا و ديري قدر لشيبتي و الله غير يحبك هو صح غلط معاك بصح ماشي هكدا تهجريه بالسمانات..
نضت سلمت على راسها و بكيت قلتلها أنا صح غلطت بصح ترضايها يديرلي هكداك و الله العظيم السطر لي تحملتو راجل ما يقدرلوش.. قالتلي يا الجايحة والله غير يحبك بصح وقت زعافو يهبل و المرا الصالحة تصبر على راجلها، ارجعي و عاقبيه في دارك لخطر لي بعيد على العين بعيد على القلب.. و الله غير قتلاتو الندامة قالي ما درتش في بالي كي ضربتها يصرالها هكداك..
نضت للشومبرة لحقتني هيام قالتلي وش ليون نرجعي؟ قلتلها إيه نرجع بصح ما عندي علاقة بيه ما عندو علاقة بيا.. باستني و قالتلي عملتي مليح، أنا نقولك ارجعي و قنطيه احرقيلو دمو و عاقبيه و هو قدامك ماشي هكدا بعيد عليك..
لبست و طميت دوزاني و رجعت مع الحاجة، كي وصلنا للدار صبتو قاعد فالجنان هو و نائل و وليد عمو، دخلت قبالة للكوزينة صبت إخلاص و حلا جزت عليهم لا سلام لا كلام، كي وصلت لنص الدروج سمعت الحاجة تقولو ماشي قتلك ليوم ترقد في حضنك.. قلت في قلبي نشوفوها.. طلعت لشومبرتي بدلت حوايجي و مشطت شعري و درت بارفا.. صبت الشومبرة معمرة بالغبار و الدخان، نضت خملتها و خرجت حوايجو لي يحتاجو غسيل، كي جيت نبدل الكوفرولي دخل هو و قال هدا وين نورت الشومبرة..
ما درت ما خزرت فيه و هو حشمان مني جبد ڨارو و بدا يتكيف و يشوف فيا منبعد قالي ما تعبيش روحك روحي ترقدي ارتاحي.. قتلو وش راحلك فيا نرقد نوض نموت ننتحر ما راحلك.. قالي ما تزعفيش ساعفي روحك.. قتلو ما رجعتش  لخطر متوحشاتك دير في بالك بلي على الشي لي درتو فيا لوكان ما نقلبكش الدار جهنم و غير مشاكل مانتسماش اصبر عليا برك و تشوف كيفاش نخليك أنت لي طلقني و تتهنى مني.. قالي ادا حبيتي  جيبي سبحة و ابداي تحسبي و تسبي في أهلي واحد واحد و تشوفي إدا تقلقت ولا طلقتك، أنا راضي بيك و بهبالك كي ديري وش ديري المهم حبيبي ما يتقلقش.. قتلو ما تهدرش هكدا مانيش حبيبتك.. قعد يشوف فيا و يتبسم و هو يتكيف و أنا كملت خملت الشومبرة و رحت للصالدوبا صبت إخلاص واقفة لتم تغسل فالحوايج عيطت عليها قلتلها اسمعي أنت اخرجي من الصالدوبا ديالي يلاااا..  قالتلي قادري روحك خيرلك ولا راكي حايبا نزيد نخرجك من الدار.. حكمت حوايجها رميتهم فالقاعة و رميت السلة في وجهها، تلاحت فيا نضت نصوغ و الحاج يعيط من لتحت قال باسم الله جات و جابت المشاكل معاها.. خرج صراع عيط علينا، وقف عند باب الصالدوبا و شر لإخلاص باش تروح جات تهدر عيط عليها قالها قتلك طبڨي منا تشوفي.. هي راحت تبكي لشومبرتها و هو حطلي يدو في جنابو و قعد يشوف فيا.. درت ليه قتلو مازال ما شفت والو و الله غير نرجعلك الدار جحيم.. تبسم و هز راسو قالي أنا و ياك و الزمن طويل يا ليليان.. سكتت و جيت نغلق الباب خلاني و راح للشومبرة.. كملت غسلت الحوايج و جيت طالعة لفوق للسطح باش ننشرهم قالي وين؟ ما واجبتوش و طلعت جا مورايا تخبط مور الستور و قاعد يتكيف و يصفر و يتحرش بيا و يغني ( قولي يا حلو منين الله جابك) كملت ننشر و شايدة الضحك بالسيف كي شافني تبسمت و ضحكت جا يجري قرصني من خصري و يضحك و يغني.. ضربتو بالسلة و حبطت و هو يضحك بالصوت.. رحت للشومبرة قعدت جا تكسل مقابلني و يشوف فيا منبعد قالي تع الصح انت بلية.. جبدت الغطا على روحي و رقدت و هو دخل معايا فالفراش و ساماني بلاما يتقرب ليا..
فالليل حبطت لاقاتني حلا قالتلي وشنو هدا غضبانة و ما ديري والو و مخليا كلشي على خالتي إخلاص أيا حركي يدي و نوضي تخدمي.. قلتلها قعدتيلي غير أنت ما تأمرتيش عليا.. قالتلي راني في دار بابا و نتأمر بالسيف عليك..قلتلها روحي تأمري على باباك مادام راكي في دارو و أنا علاش جاية ليا و إدا غاضتك خالتك ادينا لدارك و هنينا منها.. تزايدنا فالكلام عيطت علينا الحاجة خليتهم و رحت للهول قعدت، حطيت رجل فوق رجل حكمت التليكومند و قعدت نقلب فالتلفزيون.. جازت عليا إخلاص قلت واش راني نشوف في هادي خرجت و العشا ما جاش يلا غاولو.. قالتلي الحاجة ليليان احشمي على عرضك..
قالتلها إخلاص عمتي و الله غير كثرت على ما وصاوها و واحد ما حطلها حد مانيش قادرة نحملها كثر من هكدا، تضربني فالصالدوبا و يزيد يجي صراع أنا لي يبهدلني.. قلتلها بركاي ما تتمسكني و نوضي طبڨي عليا منا تشوفي.. قالي الحاج و أنت دوك ما تحشمي من حتى واحد ولا كيفاش؟! قتلو عمي راني معاها طولو للعشا و أنا جعت.. دخل صراع قالو الحاج مرتك هادي ماولات تحشم من حتى واحد.. قتلو ما عجبتكمش طلقوني.. تعنكر فيا و عيط عليا ليليااااان.. سكتت و دورت وجهي كي تلفتت صبتو ما نعرف وش خبر والديه..
سقاو العشا و قعدو جيت نحي واحد من ولاد نور باش نقعد في بلاصتو قالتلي نور وشبيك ليليان ماراكيش تشوفي بلي رايحة نوكلهم؟! ادا ما صبتيش بلاصة سقي لروحك و كولي.. رحت للكوزينة ما صبت والو كانوا حطوا كلشي رجعت ليهم قلتلهم خلاصت الماكلة.. قالتلي حلا وعلاش انت يدك مكسرة روحي وجدي لروحك حاجة تاكليها.. نطق صراع قال لنور ختي تعيشي دني شويا ولادك ديرولها بلاصة تقعد.. قالتلو الحاجة والله ما تقعدها ماراهمش خدامات عندها و هي جي تصيب الواجد.. قالها يما و الله ماني قادر نعيط و نطلع لروحي لاطونسيو على جال حكايات تع النسا و خزر فيا قالي و انت اقعدي علاش راكي واقفة.. ناضت الحاجة قالت يمال كولو أنا شبعت.. هو تقلق خبط الطبسي ديالو و ناض طلع للشومبرة.. خليتهم و رحت للكوزينة و هوما بداو يهدرو عليا.. دخل نائل رافد صاشي في يدو قالي أهلا ليون وشراكي هدا وين نورت الدار.. قتلو الله ينورك أبو فهد.. دخل صراع جا يهدر معايا كي شاف نائل بدل السوجي قالو ريحة الماكلة فالصاشي جيت في وقتك خف حطها.. ضحك و قالو ماشي خسارة في أبو حرب و عطاهالو و دخل للدار.. صراع فتح الصاشي صابو جاب نص جاجة مشوية و بقلاوة للسهرة.. قالي امشي تاكلي نوريلك كيفاش ديري المشاكل و تحوسي تتطلقي.. قتلو ما ناكلش معاك.. حكمني من دراعي قالي يا الحابسة حطي الماكلة فالسنيوة و اطلعي معايا قدامهم غزليهم دوك أنا نقعد نعلم فيك؟ عجبتني الفكرة حتى أنا كنت جيعانة شهاتني الماكلة.. حطيت كلشي فالسنيوة و جيت طالعة بصح كي شفت الحاجة قاعدة بجيه زعفانة و تسبح رحت حطيت السنيوة قدامها و سلمت على راسها قلتلها و الله ما قصدت بصح تعرفيني كي نتقلق نولي نخلط فالهدرة.. جاب زائل الماكلة و ما ناكلوش بلا بيك.. صراع كان واقف مورايا حاط يديه في جنابو و يتبسم قالها شفتي يما الصوت عالي بصح القلب خاوي.. قالتلو اعدل يا وليدي ربي سبحانو عادل.. درت لنور قلتلها عيطي لنائل مسكين جا يتعشا نحينالو الماكلة من يدو، نسفت و راحت.. قعدت حلا قدام الحاجة و قالتلها جدة أنا قطعت لياس باش بابا يجيبلي أخ يسند ظهري راني قريب نزيد ان شاء الله و نجيب لي يسندني.. أنا حطيت راسي و الحاجة قالتلها لي كاتبها ربي سبحانو جوز .. حب صراع يبدل السوجي قالها راجلك ما عيطلكش؟ مازالو يمشي بكلام يماه؟ قالتلو بابا ربي يحفظك خلينا من هاد السوجي..
سكتنا و كملنا تعشينا رفدت السنيوة و رحت للكوزينة صبتها تغسل فالبوطاجي حطيتلها الماعن و هي هبلت بدات تعيط و تغلط درتها فالثقيل و طلعت لشومبرتي لحقني هو حب يصالحني ما قبلتش..
غدوا منداك الصباح داوست معاهم على الشغل كي العادة منبعد قالتلي الحاجة كي يجي راجلك و نديرو حل لخطر شبعناك هدرة بزاف.. ما برونشيتلهاش قعدت فالكوزينة معولة على إخلاص قعدتلي غير هي لخطر أم سعد لكثرة تروح لعند وليدها سعد قليل وين جي عندنا.. شويا و سمعت الباب طليت من التاقة شفت صراع داخل بلاما نفيق تبسمت و قلت داك الطول.. قالتلي الحاجة صلي على النبي ما يحسد المال غير صحابو.. قلتلها و دوك وش قلت تان؟ دخل هو قال الله يعاونكم قلنالو الله يسلمك.. شاف فالحاجة قالها خير يما وذبيها ليون معامن راهي تتداوس؟ قالتلو و هادي شكون لي ولا يقدرلها؟ لسانها رجع قدها فالطول بصح دوك كي قلتلها ما تحسديهش.. قالها علواش تحسدتي؟ قالتلو واقفة ما بيناتنا و تقول داك الطول.. تعنكرت فيها قلتلها الحاجة أنا ما قلتش هكدا.. هو ضحك و جبدني لحضنو قدامهم و قالها تحسدني تاكلني ياك حلالها .. طلع لفوق يضحك و انا درت لإخلاص قلتلها يلا بااااي أنا راني طالعة.. كي دخلت موراه للشومبرة جا يبوسني ما خليتوش قتلو وخر عليا.. راح للدوش و عيطلي قالي جيبيلي سربيتة.. غير جيت نهالو حكمني من يدي جبدني لداخل عندو و غلق الباب.. قتلو افتح الباب خليني نخرج.. قالي و الله و يخرج جدك السابع من القبر ما تخرجي وشبيك راني متوحشك خلاص بركاينا.. تبسمتلو و هي طاح عليا تقول أول مرة يشوفني.. موراها حبطنا نتغداو و حنا متصالحين و هو مورالو طالع يضحك و يڨصر.. نغزتني الحاجة قالتلي أنت ما فيكش الخير غير كي تشنشفي وليدي و تحطيه تحت يدك.. قعدت غايسة فيها أنا ما فياش الخير.. منبعد عرفت بلي حلا غضبانة لخطر راجلها ما يخدمش و ضربها و إخلاص قالتلها المرا المليحة تصبر مع راجلها و تساندو و باباك علاش ما يشريلكش دار و يكريها و يعطيلك حق الكرة تعيشي بيه ولا ختو و مرتو شرالهم و أنت نساك.. قالها صراع دراهمي كامل ليك بصح ما تخليهمش يعيشو في راسك ياكلوك لحم و يرميوك عظم و لي يقبل مرتو تصرف عليه ماهوش راجل.. إخلاص ما عجبهاش الحال كيفاش يهدر على ختها هكداك و داوسو..
هوما يهدرو و أنا نتلوى من ظهري و نتحرك حتى انتبهتلي الحاجة قالتلي وشبيك؟ قلتلها ظهري قتلني.. قالتلي يااارب و تكوني حامل و نفرحو بيكم.. نطق صراع و هو يمسدلي على ظهري قالها ماشي حامل يما ماشي حامل هادي كي لعبت ليبونب مقبيل.. كامل حشموا و الحاج قعد يضحك.. قالتلو الحاجة يمال عندك مرا ثانية و جيبلنا طفل يرفد اسمك.. قالها يما جبتو و ما ربحت والو خليني هكدا راني مليح و لي كتبها ربي الحمد لله.. قالتلو ليليان ظهرها خفيف و ما شد حتى بيبي ياك عندك مرة ثانية لي قدهم راهم ولادهم قدهم فالطول.. قالها ان شاء الله يما ان شاء الله.. و ناض
موراها جازت يامات نورمال حتى أنا نقصت من المشاكل.. حلا ما حبتش ترجع لراجلها و صراع قالها اطلقي و الحاجة ما قبلتش و حكاية محمد طلبوا منهم مهلة حتى جاز الحزن تع جداتهم زلوف منبعد حددوا يوم الفصل، في هداك النهار الدار تعمرت بالناس كي العادة تفاهمو على 25 مليون دية على محمد و محمد لحد الأن متخبي عند عمومهم فالريف..
طلعت لفوق لخطر نكره حكايات العشائر غير فتحت الباب تع لفوق صبت علي و حنين في وضع مخزي رافدها و مثبتها على صدرو و يبوس فيها و فالكور ديالها و داخلين في عالم آخر لدرجة وين ما حسوش بيا حتى قلت وشنو هدا؟!! قفزو من الخوف و بعدوا على بعضاهم نطق علي قالي ها عمة.. استغربت قتلو عمة؟! خرجو يجريو و أنا قعدت في بلاصتي ما راحتش صورتهم من بالي.. شويا و رجع علي قالي ليليان الشي لي شفتيه تنسايه ردي بالك تحكي لخالي صراع.. قتلو ما علاباليش بصح ما توقعتهاش منك لوكان عليا أنا عادي بصح عيب.. قالي علبالي عندك الحق و ما تزيدش تتعاود بصح ما تحكيلوش تفاهمنا؟ درتلو براسي إيه و دخلت لشومبرتي تكسلت و قعدت غايسة و نخمم فيهم.. دخل صراع بدل حوايجو و ما نتبهتلوش حتى قالي وشبيك مارانيش نهدر معاك وين راهو عقلك؟ قتلو راني نخمم في حاجة ما راحلك فيا قولي وش تحتاج؟ قالي اسمعي سڨمي هدرتك معايا و زيد فواش راكي تخمي هادي حاجة كبيرة.. قتلو أوووو صراع ماكاين والو.. تقلق قالي دوك ما تهدريش بصح و الله و نعرف راكي مخبية عليا حاجة تشوفي.. قتلو و كي نحكيلك زعما رايحة تحلها ولا تخلط برك.. قالي شوفي نضربك نديفورميلك وجهك راني نقولك سڨمي هدرتو معايا ما تعرفيش تقادري واقيل مانيش معمرلك العين! قتلو هكدا و أنت زعفان ما نقدرش نحكيلك ما تتفهمش و هوما أمنوني باش ما نحكيلكش.. قالي اهدري قتلو حتى تحلفلي بروح حرب بلي ما ديرلهم والو.. قالي روحي برك و روح حرب بصح اهدري.. قتلو علاش ما تزوجش حنين و علي؟ قالي وش جاب هاد الفكرة لراسك؟ قتلو شفت حاجة ما عجبتنيش قالي لي هي؟ قتلو ما نقدرش نقولك بصح لوكان ما تزوجهمش يقدرو يديرو مصيبة و يحبطو ريسانكم هوما كل واحد فيهم مسلم روحو لوخر و ما تقدروش تلوموهم لخطر يحبو بعضاهم.. خليوهم يديرو كلشي فالحلال قبل ما تتطفر و تبداي تبكيو و تندبو.. قالي شفتيهم في وضع ماشي مليح؟ قتلو صراع اي زوج يحبو بعضاهم يديرو هكداك و يتقاربو.. قالي بصح هاد الشي عندنا حرام و نكسرو الرقابي على جالو.. قتلو علاش حتى تكسر الرقابي؟ ماشي انت تان كنت هكدا قبل ما نتزوجو وين ما تشوفني تقاطعلي و دير رايك.. قالي يا أم نص عقل أنت كي جيتي لهنا كنتي مرتي و حلالي.. الحلال ملي نعقد عليك ماشي ملي ندخل عليك.. قتلو المهم زوجهم صراع علاش مساكن.. قالي علي هدا ماراهوش عاجبني لازم نربيه.. قتلو ياك الطفل يخرج لخالو.. قالي واقيل راكي حايبا نخبطك على فمك وشنو هادي الطفل يخرج لخالو كاش نهار شفتيني حاكم وحدة.. قتلو لالا ماشي هكداك بصح يحب النسا كيما انت قولي شحال من مرة تزوجت ماكاش وحدة ما جربتهاش و جاي تلوم دوك في هاد المسكين على وحدة؟! قالي أنا نروح خيرلي لخطر لوكان نقعد معاك ندير مصيبة.. قتلو حبس حبس وين رايح وش راح ديرلهم؟ قالي و حبيتيني نسكتلو؟ قتلو بصح واعدتني و حلفت بروح وليدك.. قالي و انا مارايحش نجيب سيرتك.. قتلو ديك التبهديلة باينة بلي أنا واحد ما شافهم من غيري.. قالي مادخليش روحك أنا ندبر راسي.. و خرج.. هو في هداك النهار راح قبالة لدار سعد تفاهمو على دراهم الفصل لخطر العشيرة تدفع نص المبلغ و الباقي هوما يخلصوه و سعد قعد يشكيلو قالو ما عنديش و الدراري في راقبتي و زدت تبليت بمحمد و بمشاكلو.. قالو صراع ما تخممش حنا خاوتك رانا في كتافك و ما نخليوكش وحدك و راني جايك تان على موضوع حنين و علي باش نزوجوهم.. قالو لالا ما نمدش لعلي علبالك بلي ما نحبو ما نتفاهم معاه.. قالو علي وليدي ماشي وليد هيام و ادا رديتو راك رديتني أنا و هكدا ما يبقى قدر ما تبقى أخوة ما درت قدر لا لجيتي ليك لا تطلبي منك.. ولا تحبني نعاونك و نرفد عليك و كي نخطبك في بنتك لوليدي ترفض؟ يمال كي هكدا أنا نروح و أنت حل مشاكلك وحدك مادام ماشي دايرلي قدر.. ناض سعد باس راسو و قالو ما تزعفش خويا الطفلة بنتك و أنت لي تحكم اديها في حوايجها ادا حبيت..
خرج صراع من دار سعد بعدما تفاهمو و راح قبالة لدار هيام دخل على علي بالضرب قالو كيفاش تعفس على حرمة داري و بعدما شبعوا خباطي قالو راني خطبتلك حنين و بعد شهور نعقدلك عليها و منا لهداك النهار وجهك ما نحتاجش نشوفو قدامي..
بعثلي علي ميساج كتبلي (ليليان ما عرفتش وش نقولك نبزق عليك على المخبط لي خديتو من عندي خالي ولا نسلم على راسك كي بيعتيني ليه و خطبهالي) وليت نضحك ما قدرتش نشد روحي.. كي دخل صراع فالليل حطيتلو يديا في جنابي و نضحك قتلو رحت خلطتها و جيت؟ ههههه قالي عمبالك كيما أنت يا أم الديڨات خلطتها بصح حليتها و جيت و دوك نقدر نرقد مرتاح خديت حقي من لي داس حرمة داري.. حضنتو و أنا نضحك قتلو شحال نحبك يا بوراس شحال نحبك.. جبدني لحضنو و قالي و أنا نعشقك يا أم نص عقل نعشقك.. و رقدنا
جازت يمات عادية بصح في هديك الفترة صراع كانوا يبعثوه بزاف ميسيو على جال وضع البلاد كان شوية عيان، كان يروح عشريام و يجي يقعد يومين..
جازت شهور و علي خطب حنين دارو حفلة صغيرة ما بيناتنا و مور الخطبة حلا رجعت لراجلها كانت قربت ولادتها تهنيت منها و قعدتلي إخلاص كل مرة يواعدني بلي يطلقها بصح ما شفت والو و هي زاد حقدها عليا..
كي كان غايب وليت كسرت الشر و رجعت نحبط نخدم الشغل معاها لخطر علبالي كاش ما نزيد معاها ننضرب و واحد ما يحامي عليا من غيرو..