مراهقة والاربعيني بلهجة جزائرية

52

#المراهقة و الأربعيني:

#الجزء52:

رجعنا للبلاد و الفرحة ما كاش في وجهي، كان تخمامي يدور عند يحي خفت يبعث و يشوفو صراع و زاد حتى هو حس بلي راني خايفة سقساني قالي علاش راكي خايفة وش ديري بالتلفون؟ قتلو نتونس بيه يضيق خاطري بلا بيه و زيد عندي مسلسل راني نتبع فيه حبيت نكملو.. قالي كي نلحقو للدار و ادي اللابتوب تفرجي بيه.. و كي نجي نعطيلك تلفوني حطيه فالتلفزيون و تفرجي بنظارات 3d ادا حبيتي.. قتلو مليح بصح ديزاكتيفي الكونت ديالي، قالي علاش كاش ما كاين؟ قتلو لالا ماكاين والو بصح ادا ما نخدمش بيه علاش نخليه..
وصلنا للدار ما جبت كادو لحتى واحد نسيت و هوما زعفو، قالتلي الحاجة جبتي كلشي ليك لوكان تفكرتينا اموا بحويجة كي كنتي تشري لروحك، قلتلها كنت رايحة نرجع باش نشريلكم بصح صراع ما حبش قالي يلزمنا نرجعو.. ما اقتنعوش و زعفوا من غير حلا لي عطيتلها من ماكياجي و شي عفايس..
كان تخمامي كامل فالتلفون ما كنتش مرتاحة و صراع بدا يشك كثر و زادت أسئلتو..
كان متكسل فالبونك و حاكم التلفون قتلو صراع حبيبي.. قالي امممم وش تحتاجي.. قتلو حبيبي اعطيني تلفوني و الله ما نزيد نبعث للبنات.. خزر فيا بنص عين جبد النفس و تنهد قالي هاكي و ما تزيديش تعاوديها لخطر هاد المرة تزيدي تغلطي انساي التلفون فهمتي؟ حضنتو و أنا فرحانة عمبالي كي رجعلي التلفون خلاص سمحلي بصح هو كان عندو تخمام وحدوخر..
رفدت التلفون فتحتو و درتو سيلونسيو غير شعلت الويفي جاني جام من عند يحي، كتبتلو ما تبعثليش لخطر التلفون راهو عند صراع.. و فاصيت المحادثة أووووف هدا وين ارتاح قلبي..
كنت لاتية نكونكتي حتى نطق صراع قالي ليون الأحد ان شاء الله نبدا الخدمة وجديلي لاتونو ميليتار ديالي.. قتلو راك سيريو معول تخدم؟ قالي يمال نقعد مقابلك؟ قتلو صراع بعدما ما خرجت من الجيش ترجع؟ قالي أنا عسكري ملبكري و ما نرتاح غير فالجيش ما نقدرش نخلي خدمتي.. 
قعدت نوجدلو في حوايجو منبعد جات في راسي نسقسيه قتلو صراع حبيت نسقسيك حاجة، قالي خير؟ قتلو إدا يحي تاب و رجع وش راح يصرا؟ عقد حواجبو و قالي كيفاش يعني تاب؟ قتلو يعني إدا بعد على الإرهاب و حب يشوفني.. قالي يشوفك !!! على وشمن أساس؟ بعدما باعك؟ لوكان يلاقيني بيه ربي نحكمو نعلقو و نعذبو و ندي منو حق كل قطرة دم سالت من عابد الله يرحمو، قتلو بصح خوك هو لي ظلم و شكون قال بلي يحي هو لي قتلو؟ قالي هو لي قتلو.. اسمعي راني نشوف فيك دافعي عليه! قتلو لالا بصح استغربت كيفاش أنت ثأر حرب ما ديتوش و مازالو في راسك ثار عابد؟! قالي قيس مات و أهلو رحلو قبل ما تتحرر المنطقة تاعنا منين ناخد ثار حرب ادا لي قتلو مات، بصح عابد لي قتلو مازالو عايش، قتلو بصح عابد هو لي تجرئ، قالي اغلقي هاد السوجي وش جابو لراسك دوك، قتلو هكدا برك حبيت نسقسي، قالي لي وسمو يحي تنسايه.. دورت وجهي عليه و قعدت نخمم وش ندير مستحيل صراع يتقبل يحي و من حقو حتى انا و ما علاباليش كيفاش رايحة نتقبلو بعد كامل الشي لي دارو فيا..
غدوا منداك ناض صراع مريض راسو يوجع و يسعل سعلة قاوية تخرج من نص صدرو.. قتلو وشبيك؟ قالي شفت الحال صحا شويا رحت كليت آيس كريم قتلو نديرلك حليب سخون؟ قالي نوضي ديريلي و حطي فيه عود قرنفل بالاك تحبسلي و الله غير قتلتني.. رحت جبتلو قالي ليليان قوليلهم يقعدو كامل لتحت واحد ما يطلع لفوق مانسمعش الحس و قولي للحاج راهو دايخ بزاف.. قتلو معليش و حبطت بلغتهم.. الحاجة تقلقت عليه قالتلي ديريلو تيزانة تع البابونج راني ميبساتو فالشمس جبتو من عند هيام قلتلها هادا وين شرب الحليب سخون اصبري ينوض و نشوف..
خليتو رقد 3 سوايع و حبط سقسيتو قتلو كيفاش راك دوك ريحت شويا؟ قالي زادو تغلقو ڨراجمي.. قالتلي الحاجة علاش ما تسمعيش الكلام قتلك روحي ديريلو تيزانة سخونة تع البابونج نص ساعة يفطن.. رحت درتلو شربها و رفد المفاتح و خرج ما طولش و عاود رجع يتلوى صابنا قاعدين فالهول، رمى المفاتح فوق الطابلة و تكسل فوق الكنابي قال رايح تموت راني نحس كرشي تتقطع من السطر..
دارت ليا الحاجة قالتلي دوك أنت تتحسبي مرا ما بين النسا؟ فتحت عينيا قلتلها و أنا علاش؟ قالتلي راجلك خارج و علبالك بيه مريض ما تعرفيش تلبسيلو تريكو تحت القمجة مخلياتو هكداك بلاش و الريح داخل خارج لصدرو علاش ما تتهلايش فيه ما تعرفيش تمسدليو صدرو، قلتلها ما راهوش طفل صغير باش لبسلو كي يخرج، وليدك ما ضربوش الريح هدا كامل بسبابك و سباب البابونج ديالك ما علاباليش منين جبتيه بالاك بال عليه الكلب و أنت رحتي تجري جبتيهولي باش نمدهولو.. صراع غير سمعني قلت هكدا راح يجري للصالدوبا سمعتو يتقيا لحقتو ديتلو السربيتة، قالي الله لا تربحك أنا البابونج ديالي بال عليه الكلب؟ لوكان عض لسانك و هنانا منو.. قلبو خرج مع هو معياف، غسل و نشف و رجع قال للحاجة علاش يا يما جايبتلي بابونج من الزنقة و أنا نقول كرشي وشبيها، قالتلو و أنت آمنت هاد الكدابة أنا غاسلتو بيدي.. هز راسو و طلع لفوق لحقتو، جبد المخدة و تكسل على جنب و حط يدو فوق راسو، ساميتو و قعدت محضناتو وهو يتوجع قالي راني نحس روحي مكسر عظامي كامل يوجعو سميت بالله و بديت نمسدلو ظهرو و يديه و رجليه و هو متكسل على كرشو و حاضن المخدة حتى رقد غطيتو طفيت الضو و خرجت حبطت لتحت..
دار الحال بلخف غيمت الدنيا ولات كحلة بصح ما كاش البرد بزاف.. كنا واقفين فالكوزينة نوجدو فالعشا ضربت الرعدة حتى تزعزعت الدار، فتحت التاقة نحب نشم ريحة الشتا كي طيح على الشجر و التراب.. شويا و راحت التريسيتي.. شعلت لاتورش تع التلفون بيدما يرجعو التريسيتي بصح ماكاش..
صراع داير فالجنان مولدة كهربائية تع دار احتياط و معمرلها بنزين تشعل بالمفتاح..
رفدت سنيوة تغطيت بيها على الشتا و خرجت للجنان نشعلها باش نكمل العشا كي لحقت ما صبتش فيها المفتاح، رجعت للدار سقسيتهم عليه كل واحد يقول ما شفتوش.. وش يسلكنا من صراع و هو دايما يقولنا واحد ما يدنى للمولدة..
حوسنا الدنيا و ما صبناهش.. خرجت حلا من شومبرتها قالت علاش ما كاش التريسيتي؟
قالها نائل أنت لوكان ما راحتش ما تخرجي ما علبالك بالدنيا، قالتلو عمو وش نحبط ندير و دارت ليا قالتلي ليليان علاش ما تشعلوش المولد؟ قلتلها ما صبناش المفتاح، قالتلي شفتو لبارح في يد أحمد يلعب بيه فالجنان نحيتهولو و رجعتو بالاك عاود رفدو، قالتلها نور ولادي ما يروحوش حتى لتم راني عاستهم، قالتلها و الله غير شفتو، قالتلها بركاي ما تحصلي فالدراري.. خرج صراع من الشومبرة قال علاش ماكاش التريسيتي؟ قالو الحاج كوباوها على جال الشتا مازال ما طلقوها و المولد ما صبناش المفتاح ديالو.. هو سمع ماكاش المفتاح و زاد مريض يحوس غير على السبة باش يعيط.. فهديك الليلة قلب الدار علينا نضنا كامل نحوسو من صغيرنا لكبيرنا حتى الحاجة و ناضت تحوس معانا و ما صبناهش.. حبست الشتا و جات التريسيتي و هو مازالو يضبح فوق ريسانا جاتو سبة و سبيبة.. شويا و عاودو قطعو التريسيتي وش يسلكنا الليلة.. انا كي يكون مقلق هكداك نهرب ما ندورش قدامو.. رحت للشومبرة غطيت راسي بالكوفيرطة و سكت.. جا فتح الباب و بدا يعيط قالي رااااقدة!!! دارك ما علابالكش بيها لوكان تتحرق ما يهمك فيا.. انت اعطيلك التلفون و المسلسلات و الڨروبات باش يطلعوك ادمن.. ما فيك حتى فايدة تجيني منك غير المصايب.. شوفي لوكان ما تصيبيش المفتاح الليلة ما ترقديش تباتي تحت الشتا.. ما نطقت حتى كلمة خرجت و حرت وين نحوس.. رحت تخبيت فالصالدوبا حتى حسيت بلي نقص عياطو باش خرجت صبتهم كامل دخلو لشنابرهم..
دخلت لشومبرتي صبتو متكسل و حاط يدو على جبهتو و ساكت مشعل لاتورش..  تكسلت فالبونك باش نرقد ما هدر والو انا غير غفيت شويا سمعتو يعيط اااااخ يا بابا.. حطيت يدو على خدو صبتو يغلي طلعتلو الحمى و التريسيتي مازال ما طلقوها.. شعلت التلفون و رحت جبتلو الما نوضتو باش يشرب الدوا قالي شربت.. قعدت ليل كامل و أنا نديرلو فالكمادات حتى قالي راني نرجف غطيني.. غطيتو و حضنتو جيت نرقد قالي لالا بعدي راني بلاڨريب نعديك.. قتلو ما يهمش، دار و عطاني ظهرو قعدت حاضناتو ما فقتش وقتاش رقدت.. كي فطنت ما صبتوش قدامي..
حبطت الرجال كانو كامل خرجو و أم سعد راحت لسعد و نور راحت لدارهم قعدت غير أنا و الحاجة و حلا..
جا خطيب حلا قعدت الحاجة معاهم منبعد جات للكوزينة.. انا راسي يوجع من السهرة و العياط تع لبارح و هي جايا عند راسي تهدر على الدولمة و تقولي وجدي و جيبي و ادي.. دخل صراع عاقد حواجبو و أنا نشرب فلاتاي باش يزل عليا راسي قتلني.. قالي ماشي راني نهدر معاك؟ قتلو وش تحتاج؟ قالي شكون لي راهو فالصالون، قتلو خطيب حلا.. هو سمع شكون راح قبالة للصالون و الحاجة قالتلي فيك ما يكفيك كنت رايحة نقولو بنات خالاتها و نخليه يطلع لفوق، قلتلها و أنا وين علابالي، رحنا موراه خرجت حلا تبكي و هو يعيط على خطيبها قالو شوف حكايتك طولت مع بنتي قول لباباك هاد السمانة العرس ولا نبدا كلشي مانيش فاتح هنايا ××××× و تدخل تحضن بنتي في داري يا حيوااااان.. و هو تبهدل و رجع يطلب فالسماح منو..
خرج صراع للهول عيط لأبو وسام قالو اسمع سلام عندهم قريب عامين و هوما مخطوبين و أنا ساكت احتراما لموت وليدك بصح و الله ما يتمش العرس هاد السمانة غير نبطل كلشي و كوبا..
دار للحاجة قالها كيفاش مخليتهم وحدهم.. جا ريحي معاهم يما ماشي مخلياتو يحضن في بنتي في داري علاش راكي تشوفي فيا طحان بصح هدا كامل من بنتي لي جايبا الكبش تاعها لوسط دار باباها.. من غير نحكمك ليوم واحد ما يسلكك من يدي حيوااااانة.. هو خرج و الحاجة ما خلاتليش بهدلتني على جال كي قتلو خطيب حلا.. قلتلها وين علابالي أنا ما قعدلي حتى مخ في راسي ليل كاملة و أنا ساهرة معاه و نعس فيه طلعتلو الحمى.. وش ذنبي باش ترميها على راسي ياك علبالك ما يقبلش في عوض ما كنتي معولة تهربي الراجل لوكان قعدتي معاهم ما يهدرش.. ماشي جاية دوك تحصليها فيا و نبان أنا لي بيعت..
الحاجة هبلت كيفاش نرجعلها.. قالتهملي ڨاع.. عاودت حبطت حلا حكمتني من شعري و تصوغ و تسب فيا و في أهلي و أنا نحاول نسلك شعري من يديها.. دخل صراع عيط عليها طلقتني بلخف و طلعت فالدروج تتحسب عليا و تبكي و أنا نبكي، صراع حكم القرعة تع الزجاج هربت لشومبرتها و سكتت..
قتلو و الله ما قصدي نبيعلك راسي من لبارح راهو قد الطنبور ياك بركقتلك خطيب حلا علاش كفرت؟ تسب فيا و في أهلي تع وجهها بابا تاج راسها يشرفها و يشرف لي كثر منها.. دار عيط عليا قالي بركاي ما طرشي من فمكككك بلعيييي..
فتح الباب على الحاجة قالها انت الكبيرة ما قدرتيش تسلكي ما بيناتهم مخليا عياطهم في وسط الدار، قالتلو مرتك ولات وقحة و تستاهل.. ليليان لوكان نصيبها تلقف ما نزيدش ندخل روحي فيها و ما يزيدش يجي لساني على لسانها كي رجعت تعيط عليا.. نضت من بلاصتي قلتلها انا عيطت عليك و لا انت لي بهدلتيني و قتلك لوكان قعدتي معاهم علاش ترميها في راسي.. قالتلي مرت وليدي رجعتي واحد ما يقدرلك منهار شرالك دار.. كبر راسك..
صراع مع الاول كان يعيط علينا باش نسكتو بصح غير قالت هكدا ناض يسب و يعيط و يكسر منبعد خبط الباب و خرج .. الحاجة سكتت في شومبرتها و أنا هربت لفوق لشومبرتي و قعدت نبكي.. ساعة منبعد عاودت حبطت قالي نائل وش صرا علاش الدار راهي هكدا؟ قتلو جا خطيب حلا و صراع قلب الدار علينا و حكيتلو كلشي.. رفد التلفون عيط لصراع.. جا أبو وسام و أم وسام استقبلهم نائل و الحاجة و زاد جا الحاج و لحق صراع قعد شايد في كلمتو تع العرس على سمانة و لا يبطل الزواج و كل واحد يروح في طريقو..
قالولو الجمعة الجاية الخطبة.. درنالهم العشا و قعدو يڨصرو و يتفاهمو.
دخلت خالة حلا الكبيره أم وسام للكوزينة قالتلي حبيت نهدر معاك معليه؟ قتلها معليش خالتي..قالتلي علاش ديري هكداك لحلا وش دارتلك دوك كي حرشتي باباها و حطنا في الضيق ماشي حرام هاد الشي انا تان ما دابيا ندير العرس لوليدي في غرضي ماشي هكدا بلخف.. قلتلها حبسي حبسي و ش درت و انا وش دخلني، قالتلي ماشي انت لي بيعتيها، قلتلها وش بيعت؟ سقسى شكون فالصالون جاوبتو.. لوكان كدبت منبعد فاق ماشي أنا لي تتطفر فيا؟
و زيد علاش راكم تحصلو فيا علاش ما تلوميش وليدك ياك علبالو بلي صراع ما يقبلش كان من المفروض يحترم دارو.. خرجت عليا و هي تقول هادي حالة لي يجيب عريانات و يطلعلهم الشان على أهلو و ناسو..
كملت نخدم زاد جاو دار صالح مرتو و إخلاص.. حطينالهم العشا فالهول.. و جيت رايحة شافني صراع عيطلي درت ليه دارلي براسو تع ارواحي.. رحت ليه قالي اقعدي قتلو ماعطانيش خاطري باش ناكل، قالي قتلك اقعدي.. قعدت شفت إخلاص و ختها يخزرو فينا و هو نغزني قالي كولي.. جبدت الخبز و همستلو و انا حاطة راسي قتلو رايحة نطرطق ما قدرتش نزيد نحمل، همسلي قالي اصبري شويا نطلعو للشومبرة و نهدرو..
كملت الماكلة بالسيف و رحت للكوزينة و هوما كملو تعشاو و راحو بصح إخلاص قعدت..
كملت شغلي و طلعت لشومبرتي صبتو قاعد قتلو شوف انت تعيط فالليل و يماك تبهدل و تحبط بنتك تضرب و تسب و جي خالتها تقولي عريانة و طلعها علينا قولي شكون فيكم لي نتحملو أنا؟ أنا بشر كيما نتوما من دم و لحم نحس و نتقلق و نتأثر، انا كي نزلق بكلمة واحد فيكم ما يحملني و نتوما تغلطو و تسبو و تضربو و لازم ما نهدرش..
كنت نهدر و نبكي و هو يقولي ارواحي لعندي جبدني من يدي لحضنو و باس راسي قالي خلاص تهدني.. قتلو بصح علاش كي نطقت كلمة ولاو كامل يقولولي مرت أب و حقيرة..  في داري و تغلط معايا و تقولي جايبها من الشارع و مطلعها فوق ريسانا.. قالي شوفي سمانة و تفرا تحمليهم معايا.. و زيد مادام دارك كيفاش يقعدو على طابلتلك و أنت تنوضي و ما تقابليهمش.. افهمي هادي داااارك  ماشي دار عيالك حطيها مليح في بالك و احفظيها.. أما الضياف مهما كانو جوزي و ابلعي لخطر راهم في دارك عيب تتجاوزي معاهم.. قتلو و إخلاص وش عندها باش قعدت؟ إدا داري انا إخلاص ما نحتاجهاش عندي، قالي احمليها هاد السمانة تروح حلا برك.. نوضي البسي نخرجك دوري شويا..
نضت لبست و خرجنا درنا شويا و كلينا ديسار و جبنا معانا للحاج و الحاجة.. هو دخل لعند الحاجة و أنا جيت طالعة فالدروج سمعتها ما حبتش تشد عليه و قالتلو قتلك رجعت تعيط عليا ما درتلها والو و كسرت الدنيا فالهول و فوقها تراضيها ماكاش واحد كبر راسك من غيرك، قالها وش حبيتيني نديرلها يما نضربها؟ انت بهدلتيها و حلا ضربتها و نزيد انا عليها؟ نكسرلها راسها لوكان ترفع صوتها عليك بصح يما ارحموها شويا ولا كي قالت كلمة الحق درتو عليها حبيتوني نقعد راقد على ودنيا؟ لوكان غلطت راني معاك بصح ليليان ما غلطتش دارت الصح كي خبرتني اما لوكان عليك أنت نية، قالتلو أنا نية؟ يعطيك الصحة يا وليد كرشي روح وليدي روح.. قالها إيه نية.. يمال كيفاش تخليهم وحدهم و تخرجي؟ و فوقها مستسهلة الأمر ما نعرف شحال كان عندو و هو قاعد في غيابي و انت تتستري..
قعد يهدر معاها كي شفتو يدافع عليا ارتحت و طلعت بدلت و رقدت و أنا نخمم في كلامها كي قالت (واحد ما كبر راسها من غيرك ) مستكثرين عليا حبو ليا... علاش كي يعيط و يتقلق و نتحمل ما يقولوش هكدا؟
شويا و طلع ما علاباليش وش قالتلو دخل مقلق ما هدر والو جبدني لحضنو و رقدنا..
قعدت إخلاص عندنا تحرش فالحاجة عليا و الحاجة ما تهدرش معايا غير كي تبعثني و بالتشناف..
نور ما كاشها كانت في دارهم و الباقي كامل ما يهدروش معايا من غير الحاج و نائل..
اخلاص تكفلت بحلا من الألف إلى الياء، كل يوم يخرجو الصباح ما يرجعوش حتى للعصر يروحو يشريو و ما يفتحو حتى حاجة غير في شومبرة أم سعد لخطر علبالهم بلي أنا ما ندخلش ليها..
حبيت نشوف دوزان العرس و العروسة بصح ما يقبلو يفتحو حتى حاجة قدامي..
صراع رجع لخدمتو و كان كي يرجع نشكيلو نقولو علاش ما يخليونيش نشوف معاهم؟ يقولي أنت و الله غير عندك وش ما عندهمش، نقول بصح وش درتلهم راني حايبا نشوف يقولي و أنا وش نديرلهم نروح نقولهم علاش ما تخليوهاش تشوف معاكم؟ خلينا يرحم والديك..
قعدت في قلبي عيطت لهيام حكيتلها قالتلي نفس هدرة صراع..
قبل الحنة بنهار كانت حلا و إخلاص و أم وسام فالسوق جاو قبل المغرب خباو الدوزان في شومبرة أم سعد و تكسلو من العيا في شومبرة الحاجة و أم وسام راحت ما قعدتش.. عيطتلي الحاجة قالتلي ليليان سقيلهم يتعشاو.. حطيتلهم سنيوة فيها الروز و لاصوص، بدات تاكل إخلاص قالت للحاجة و الله يا عمتي غير الماكلة باردة ما تنتكلش، قالتلي الحاجة ليليااان يمال ما سخنتيش الماكلة، قلتلها لالا دافية، قالتلي كنتي من الاول تقوليلي مانيش قادرة نوض وحدي، قلتلها و هوما وشبيهم علاش ما يسقسوش لرواحتيهم ولا يعرفو غير يهربو و كي تلحق للخدمة ارواحي ليليان علاش راني نخدم عندهم؟ بدات الحاجة تعيط قالتلها إخلاص خليها عمتي الغيرة راهي تهدر فيها يا حليل واحد ما جهزها و ما لبستش لاغوب بلونش، قلتلها انت بالدات ما تهدريش قادري روحك راكي دايسة بساطي، قالتلي الحاجة بساط شكون و أنا موجودة ما تستحيش أنت ، قلتلها خليت الحشمة و الحيا ليهم انا ما نستحيش و مانيش حايبا نستحي، قالتلها أم سعد الحاجة تقوات دوك شكون يقدر يحكمها و وليدك يعيط و يعاود الدار دارها
قالتلهم إخلاص ما تكبروهاش ما تستهلش باش ندوخو ريسانا بيها راهي مقلقة لخطر  ما جاتش لهنا بعرس جات بسواد الوجه و العين مكسورة.. قلتلها انا أشرف منك يا وحد البايرة.. رفد المرقة تع الروز دفقتها فوق راسها و خبطتها بالروز [ مليحة ليها إخلاص 🤣 غزاتلها..]
ناضت حلا تعيط و تزيد فالهدرة حبت تضربني تحاكمت معاها و طبعتها و طلعت لشومبرتي نبكي.. رفدت التلفون عيطت لصراع غير قال ألو قتلو دوك جي للدار ولا و الله ما نبقى هنا اروااااح ارواح شوف وش دارو فيا يغلطو و يتجاوزو ما نقعدش ليوم هنا.. بدا يستغفر و ينسف قالي ما فهمت والو نكمل خدمتي و نجي ليك..
قعدت نغلي نروح و نجي فالشومبرة ما حملتش رفدت التلفون و عيطت لهيام حكيتلها كلشي بقات تنصح فيا قالتلي تهدني سمانة و يروحو ما تخرجيش للعيب و تباني أنت العيانة.. كملت معاها و قعدت نستنى وقتاش يجي صراع حتى سمعتهم لتحت يحكيولو و يشكيولو.. طلع عاقد حواجبو و يغلي من الزعاف قالي ارواحي لهنا احكيلي وش صرا.. حكيتلو كلشي بالحرف الواحد، قالي و بوجهك و تشكي تان.. دوك انت جحشة و لا ما عندكش دماغ قاعدة تحكي و تعتارفي نورمال.. حكاولي و ما صدقتهمش.. قتلو يمال حبيتهم يغلطو معايا و نسكت؟ قالي أنا شحال من مرة قتلك هادي صباط ما تهدريش معاها؟ تروحي تقوليلها يا البايرة في وسط دارنا و حبيتي تدي الحق؟ قتلو وش ندير نهدر معاك تقولي راني عيان و انتي عندك وش ما عندهمش و ما نعرف واشن.. طبطب على راسي قالي راني حايب نفهم برك هنا وش عندك مخ و لا صباط؟ كي جيتي شكيتيلي منهم و كانوا متعديين عليك جبتلك حقك ولا لالا؟ انت مقنوطة و معمرة راسك بيهم تقوليلي ما وراوليش الدوزان و خلاونيش نشوف و ما قعدوش معايا .. شفتيهم يستنحسو معاك و يزكرو فيك اطلعي و ارميهم فالثقيل علاش راكي تهيني و تذلي في روحك تبعي و تعسي فيهم من بلاصة لبلاصة باش تشوفي وش جابو تحسي فيهم شغل ما نعرف وش جابو و راكي غايرة منهم.. علاااااش؟!! عييت منك و من مشاكلك خلاااااص..  دير العقل شويا عذبتيني.. قتلو فوق ما يقولو جيت مكسورة العين تجي تهدر معايا انا؟ يعطيك الصحة..
دار بدل حوايجو و جا حابط قالي ثواني و تلحقيني و لي نقولها تتنفذ.. خبط الباب و حبط..
رفدت التلفون و عيطت لهيام حكيتلها وش قالي.. قالتلي ردي بالك تتقلقي و تزلقي بكاش كلمة قدامو و يبهدلك قدامهم.. لي يقولهالك قوليلو انعم و معليه اقتلهيم بالقنطة.. قلتلها بصح أنا مظلومة و هوما عمروه عليا و راهو زعفان.. قالتلي و انت اثبتيلو العكس و ما تعطيلهمش الفرصة هوما مادابيهم تغلطي قدامو تهيني روحك و تهنيه معاك.. قنطيهم قعدو يومين و يطبڨوا اكسبي راجلك و اربحي دارك.. حتى بوسي راسو قدامهم و قوليلو إدا أنا غلطت حقك و حقهم على راسي و نطلب السماح و إدا كان الحق ليا الله يسامحهم.. قلتلها راكي منيتك انا ندير هكدا؟ قالتلي إيه يا الجايحة هوما ئحوسو يخربولك دارك علاش حتى تعطيلهم الفرصة.. دوك تشوفي موراها يهدر عليك بالخير و يعلي علامك و يصدقك بلاما يحوس يفهم..
كملت معاها و حبطت صبتو يتعايط معاهم و الحاج يهدن فالحالة.. دار ليا قالي ارواحي تشوفي لهنا.. وقفت قدامو قتلو أمرك.. قلتلها بهدوء بصح لداخل كنت نغلي كنت نحاول ندير وش وصاتني هيام..
قال هاي يما و كامل راكم تسمعو طول ما أنا عايش ندخل لي نحب و نحاوز لي نحب ماشي صراع لي تمشيه مرا ولا تتحكم فيه.. قتلو حشاك حبيبي .. اخلاص نسفت و دورت وجهها..
قال صراع سلمي على راس يما و اطلبي السماح تشوفي.. قتلو تأمر و رحت بست راسها وهو النار خارجة من عينيه.. شاورلي على إخلاص قتلو و الله ما بلعت كلامها آذاتني و هاي الحاجة تشهد.. قالي اطلبي السماح منها.. درت ليه قلتلها آسفة خالتي ديريني كي بنتك ما تزعفيش.. قلبت خليقتها كثر.. رحت ليه بست راسو قتلو ماتزعفش حبيبي أبو حرب ماشي بقصدي والله ادا أنا لي  غلطت حقهم فوق راسي وادا هوما لي غلطو ربي يسامحهم أهم شي عندي رضاك حبيبي لا تقلقش روحك و أنت مريض.. جبد النفس هز راسو و شاورلي باش نقعد قدامو حسيتهم حبوا ياكلوني..
قالهم أنا كي ديت ليليان ما ديتهاش مكسورة ديتها و راسها مرفوع و ماكاش وحدة في كامل العشيرة عندها ذرة من أخلاقها حتى بنتي ماشي متربية كيما تربيتها و أدبها [ الحاج صراع هنا ما قستهاش كامل شبعتنا مقروط 😒 ]
قالهم لي يوصل ليها و يهدر في شرفها نكرازيلو راسو بصباطي و لي عندو كلام وحدوخر يوقف قدامي و يهدرو في وجهي ماشي في ظهري.. قالتلو إخلاص لالا وليد عمي حاشاك و هي خاطيها واحد ما هدر عليها بالدونية انا هدرت كي كانت غايضتني بصح هي فهمتني بالغلاط.. ما خزرش منبا فيها كان مدور وجهو عليها و شرلها بيدو باش تسكت [ تبهديلة 🤣 كيما قالها عادل امام بتحطي نفسك في مواقف باااااايخة 🤭]
كمل كلامو و قال الكلمة الدونية عليها تقيسني قبل ما تقيسها.. كي تغلط انا نعلمها و نكسر راسها بصح ما نسمح لحتى واحد باش يتعدى عليها و ادا راكم حاسبينها يتيمة و ما عندها حتى واحد راكم غالطين في حساباتكم.. أنا باباها و خوها ماشي غير راجلها و لي قادر يجيب سيرتها و يشوف.. قتلو ربي يخليك ليا حبيبي..
نشوف في إخلاص و أم سعد تقول واحد ضربهم بكف [ هديك دبارة هيام تليقلها غنية سعد المجرد تع أنت معلم 🙂] 
قالت الحاجة ماصرا والو جابها الشيطان الله ينعلو و يخزيه، قالها صراع يما بصح مقبيل ماكانش هادا كلامك كنتي تقولي ادبها واكسر راسها، قالتلو الطفلة طلبت السماح و سبحان لما يغلط.. قالها يمال ياريت كي تغلط تحل المشكل وحدك لخطر راسي ما راهوش قادر يزيد يرفد مشاكلهم..
ناض نضت معاه قتلو كاش ما تحتاج؟ قالي لالا سلامتك.. هو خرج و أنا طلعت لشومبرتي شويا هكدا و سمعت هيام جات داتني للكوزينة قالتلي وش صرا؟ ان شاء الله ما عميتيهاش كي العادة.. حكيتلها كلشي قالتلي نستعرف بيك ماشي قتلك هاه هوما تقنطو و هو جابلك حقك و انت طلعلك المورال وشنو الفايدة كي تتهوري.. انذليتي كي طلبتي السماح؟ بالعكس هوما لي نذلو.. حلي اموراتك بالعقل يا الجايحة ماتديهاش غير دواس..
فرحتني بكلامها قلتلها جوزي لداخل دوك نوجد سنيوة تع سهرة بلاتاي و الڨاطو و المكسرات و ناكل أنا وياك.. هي راحت و صراع دخل قالي وش أم الديڨات كاش ديڨة جديدة من ولا من؟ قتلو هاد الساعة ماكاش.. قالي طنيجرة تع مرقة هدا وش قدرتي؟ قتلو لوكان شفتها كيفاش ولات و الروز في نيفها تقول مجيرية ماشي نيف.. ضحك و راح للصالون..
كنت نستف فالڨاطو حتى سمعت الصوت علا.. ظهرت هيام تهدر مع الحاجة قالتلها علاش حتى تبعثي ليليان علاش حلا وشبيها تنوض تسقي لروحها و لخالتها ولا إخلاص وقت الدواس تولي من مالين الدار و وقت الخدمة تولي ضيفة، قالتلها أم سعد عيب عليك احشمي على جال طبسي روز لي يسمع يقول حطتلهم المحمر و المجمر، بنات ختي يسواو راسك.. ربي يعرفك حتى ترملتي على صغرك وشمن راجل يحملك.. هيام رجعت ما تضويش بدات تعيط قالتلها نتوما عايلة تع وجوه الذل كامل كاليتي واحد.. قالتلها و كي حنا ماشي ملاح وش جابك لينا، قالتلها ما جيتش لدارك جيت لدار خويا و أنت لي راكي قاعدة في دارو فهمتي، قالتلها دوك يخرج باباك هو يتفاهم معاك.. و الحاجة تسكت من و من..خرج نائل قالها وش كاين هيام وشبيك؟ قالتلو سقسي يماك ماشي جاي تجري ليا.. قالها قادري روحك هيااام.. قالتلو ماشي انت لي تعلمني نقادر روحي فهمت راني كبيرة عليك و تقادرني بالسيف عليك، خرج صراع قالها وش صرا وشبيك أم علي؟ هي غير شافت صراع ولات تهدر و تبكي قالتلو أنا نتحاوز من دارك، حضنها و قاعد يهدن فيها و باس راسها قالها و الله ما عاش لي بذلك ولا يزيد معاك فالكلام مادامني عايش النار نشعلها فيهم ما تقلقيش ختي هدني روحك.. نائل تقلق خرج برا و هي بعدت عليه و مسحت دموعها قالتلو ربي يكون في عون ليليان راهي عايشة مع عصابة.. ما تلومهاش كي تغلط اقعد هنا دقيقة بلاما يشوفوك تشوف العجب برك قدامك يلعبوها ملايكة.. قالتلها أم سعد قالتلها يا يما يا يما شكون لي هدر عليك ولا أنت جاية محرشة.. جات تخرج ما خلاهاش صراع قالها ما علابالكش بيهم ما تروحيش و انت مقلقة.. دخلها لشومبرة الحاجة و عيطلي قالي ليليااان جيبي سنيوتك و ارواحي اقعدي مع أم علي هنا..
أنا دخلت ريحت معاها و هو حكمهم بهدلهم بردلنا قلوبنا فيهم..
هو خرج و الحاجة دخلت جات تهدر هيام عيطت عليها قالتلها وش صرالك انت و خوك رجعتو النار تشعل واحد ما يقدر يهدر معاكم.. قالتلها من ظلمكم و أنت ملوقتاش توقفي مع هاد الزرزومية و الله يا يما و نزيد نسمع بيك وقفتي معاهم و لو بكلمة وحدة ما راني بنتك ما نعرفك.. قالتلها يااااا و الله غير هبلتو.. و انا وش راحلي بيكم.. فتحت المصحف و قعدت تقرا القرآن..
كملت كلشي و طلعت لشومبرتي شويا و دخل صراع بدا يبدل في حوايجو و يشوف فيا و يتبسم.. قتلو راك تضحك غير لخير.. قالي فرحتيني ليوم بتصرفك.. موالفة كي تكسري كلمتي نهبل بصح ليوم بالشي لي درتيه بينتيلي بلي كبرتي و رجعتي عاقلة..قتلو يمال وش عندبالك بصح أنت ما تقدرش عقليتي و تقول عليا عندك في راسك صباط و لا عقل..قالي راكي تشوفي ما نفهمش.. قتلو في قلبي سلامة هيام سينو كنت معولة نحبط نخلطلها جدها بكراع كلب..
قالي ليون تحبيني؟ قتلو نموت عليك، قالي ادا تحبيني مادابيا عرس حلا ما تحظري ما تحبطي واحد ما يلمح طولك، قتلو علاش حايبا نشوف ما تمنعنيش الله يخليك قالي قتلك لالا يعني لالا..
هوما وجدوا كلشي و دارو الحنة و ما خلانيش نحبط كان مقلق و مريض بلاڨريب و ما خلاهمش يشعلو الغنا قالهم حرام و حلا تقلقت و كامل قالو مرتو لي حرشاتو..
نهار العرس جازت عليه ازمة نفسية ما كانش كامل في حوالو مقنوط و مقلق و مفرفش و داخلها دخان الڨارو مور خوه.. جازت عليا حلا بلاغوب بلونش سلمت على راسو و قالتلو راني خارجة بابا اسمحلي إدا غلطت و الله غير نحبك.. هز راسو و قالها الله يوفقك ويسعدك يا بنتي.. حضناتو تبكي.. دمعو عينيه باس راسها و قاللها كوني فحلة و نوريلي وجهي قدام ناس دارك خليهم يعرفو انا وش ربيت ما تحبطيليش راسي الله يسعدك ويهنيك.. قعدت نشوف فيهم و نبكي غاضوني.. جازت إخلاص قالتلي ما تبكيش دوك يفسدلك الماكياج و قعدت تسڨم فيها و خرجو..
غير خرجت حلا ما قدرش يحكم بلاصة رايح جاي فالشومبرة و عينيه حمورا الدمعة حاصلة في عينيه بصح ما طيحهاش..
لحق المغرب و هو قاعد و متوتر زعما جيت نخفف عليه و نواسيه قتلو ما تتقلقش حبيبي الله يسعدها .. تعرف دوك وش راهي دير وغمزتلو.. ما عرفت الكف منين جاني تشوكيت علاش ضربني.. قالي ما تحشمييييش قدامي تهدري هكدا على بنتي نوضي اخرجي عليا.  قتلو أنا لي غالطة جايا نواسيك رووووح.. جا ينوض ليا هربت و رحت قعدت مع الحاجة درت لاتاي و قعدت نشرب.. شويا عيطت الحاجة لهيام فالتلفون راحت مع حلا قالتلها خلاص راهي فرات و رانا راجعين..
حبط صراع دخل لشومبرة الحاجة وقف قدام المرايا يسڨم في روحو قالتلو خلاص راهي فرات و راهم راجعين .. سكت و تنهد و خرج لبرا..
فرشت عند الحاجة و رقدت و لي رجعو تان رقدوا و إخلاص رجعت لدارهم..
مع الفجر مور الصلاة جا صراع فتح الغطا و دخل لعندي ساماني  تكى على يدو و قاعد يمشي يدو على كتفي و همسلي قالي ما تزعفيش مني اطلعي لشومبرتك و الله ما قصدي نآذيك بصح انت كلامك ماكانش كامل في بلاصتو.. قعد يبوس في كتفي و يهمسلي باش ما تسمعوش الحاجة بصح معامن طاح.. قالتلي ليليااان نوضي مع راجلك خليوني نرقد..
قالها الله يرحم والديك يما.. و قالي نوض نوضي يما تقلقت..
جبدني و انا ما حبيتش ولا طبعني خرجني من الشومبرة غلق الباب و رفدني لفوق و أنا ندلل عليه منبعد شفت الحكاية ما تستهلش الزعاف وليت اندمجت معاه...