مراهقة والاربعيني بلهجة جزائرية

جزء 11

# المراهقة و الأربعيني:

#الجزء 11:

رقدت و في الليل حسيت بحركة فالدار طلعت راسي كامل كانو قاعدين خرجت نشوف راحو توضاو و صلاو منبعد رجعوا رقدوا و كل واحد رجع لشومبرتو قعدت غير أنا كي درت لقيت صراع مورايا قالي علاش راكي واقفة هنا قتلو شفتكم كامل نضتو صليتو و عاودتو رحتو رقدتو تبتسم و قالي صلينا الفجر علاش خوك ما كانش يصلي الفجر؟ قتلو ما نتبهتلوش وهو عندو عامين برك ملي بدا يصلي، قرب ليا و قالي كنتي تشوفي صحابو؟ قتلو ما كانش عندو صحابو قراب منبعد ولاو يجيو بصح ما علباليش كيفاش جايين، قعد فالدروج و قالي كيفاش محسوب؟ قتلو لحيهم طوال و اقمصتهم قصار و يهدرو غير بالفصحى قالي و انت متعرفيهمش؟ قتلو لالا ما نعرفهمش بصح واحد منهم جا يخطبني و كنت نبكي ما حبيتوش و كان يحيى رايح يفورصيني بصح كي صرات حكاية خوك و سمع هدرة الجيران جبد روحو قالي جا يخطبك؟ قتلو إيه وسمو خالد و ماما قالت هدا داخل في تنظيم القاعدة و الدولة الاسلامية كان يهدر غير بالفصحى و هي ما حبتش نروح لواحد كيما هو، قالي تعرفي الدولة الاسلامية وش تكون؟ قتلو ما شفيتش وش قالتلي ماما عليهم نسيت، قالي هدوك ارهاب منتمين للقاعدة بصح راني نشوف فيك بلخف تحكي كلشي ردي بالك أسرارك و لا أي معلومة على حياتك ما تحكيهاش فهمتي قتلو كيفاش محسوب قالي هادي تع خطبك واحد ارهابي و وش حكيتيلي دوك ما تقوليه لحتى واحد و تنسايه كلي ما صراش قتلو بصح علاش قالي أواه أنت صح مازالكي عقل دراري أنا نهدر هكدا و أنت تقوليلي علاش علاش ... قلتلك ما تحكيش و خلاص فهمتي قتلو إيه كي جا طالع قتلو معليش نحكي لطاطا هيام الباقين كامل ماشي ملاح دار ليا قالي إيه هديك هي تحكي غير لهيام و الباقي كامل ماشي ملاح.
هو طلع و أنا قعدت نخمم في كلامو، كي علبالو بيهم ماشي ملاح علاش راهو قاعد معاهم يمال إلا إدا كان صح مريض نفسي،  المهم ماشي حايب يتزوجني كي راهو يعيطلي بابا أحسن دوك ما يطولش و يخليني نرجع لدارنا و نكمل قرايتي العام الجاي.
رجعت لفراشي رقدت بالاك وحد الساعة هكداك حتى سمعتهم ناضو جوايه ال7 و نص، نضت غسلت وجهي ورحت قلتلهم صباح الخير ردهالي غير الحاج و الحاجة منبعد دخلت للكوزينة صبت نوال توجد فالفطور وقفت مقابلتها ما عرفتش وش ندير قالتلي حركي يدك ارواحي عاونيني، هي تقولي وش ندير و أنا نخدم.
حبط صراع دخل دقيقة و عاود خرج شفتو من التاقة نوض طونوبيلتو و راح.
من هداك النهار بديت ندير الشغل فهديك الدار المهم داروني خدامة يخلقولي الشغل من تحت لرض ديري اعملي و أم سعد مورايا وين ما نروح عاودي هادي ماشي هكدا زيدي روحي لهديك خرجت فيا.
ظهري تكسر كي كملت تكسلت باش نريح داتني هيام نتغدى معاهم كي كملت رحت قعدت أنا و ياها في شومبرة يماها.
حكيتلها وش دارو فيا فالشغل ناضت تضحك قالتلي باينة ماشي موالفة يدك عليه قلتلها هدا ماشي شغل لي يقدرلو بنادم هدا يلزملو روبو و ما نعرف إدا يقدر يشد، حنا نڨصرو حتى دخل صراع لقى السلام و قعد قالها بابا حلا روحي وجديلي حوايجي و سقيلي ناكل راني ميت بالعيا.
نغزتني هيام خبرتني بلعقل نوضي انت قلتلها بصح هو حب بنتو قالتلي اسمعي ليا نوضي، نضت جات مورايا للكوزينة قالتلي ياك فهمتك لبارح ما تخلي حتى وحدة تخدم راجلك من غيرك قلتلها علاش قالتلي خليه يوالفك، قلتلها بصح انا ما رانيش نحوس عليه قالتلي مي انت صح حابسة قلتلك اطلعي وجديلو حوايجو هيا خفي و احبطي تصيبيني وجدتلك الماكلة اديهالو، قلتلها بصح طلعت حلا توجدلو قالتلي يا يما على هد الطفلة رايحة تهبلني ما طلعتش قتلك روحي، طلعت تلاقيت مع بنتها سارة قلتلها وين راهي شومبرة عمو صراع وراتهالي، دخلت فتحت باب الخزانة الأول نحوس على حوايجو جيت نفتح الباب الثاني سمعت الباب تع الشومبرة تفتحت يبست في بلاصتي، دخل صراع وهو ينحي في قمجتو ما شافنيش كي بدا ينحي فالسروال درت الحس دار يجري صابني لتم قالي وش راكي ديري لتم؟ قتلو جيت نوجدلك حوايجك قالي و شكون لي بعثك ياك بعثت حلا بركاي من هد التفياس قتلو عمو علاش راك تعيط عليا و الله غير هيام لي قالتلي انت لي وجديلو حوايجو، قالي هادي تع علاش راك تعيط ردي بالك تزيدي تعاوديها فهمتي قلتلو اسمحلي و غرغرو عينيا بالدموع، تنهد و قرب ليا قالي مادامك جيتي خرجيلي حوايجي من الخزانة راهم في الوسط، جبدتلو تريكو تع البجامة و قعدت نحوس على سروالها قالي خفي شويا شحال ثقيلة قتلو مازال ما صبتش السروال، حكم هداك التريكو و فتحو في وجهي كان سروال البيجامة مطوي مع تريكوها قالي و هدا وشنو؟ حشمت كل مرة ندير ديڨا و زيد منحي قمجتو و مقابلني هكداك، حبطت نجري صبت هيام تسقيلو باش ياكل قاتلي ارواحي نزيد نقولك حاجة صراع يحب فالجاج غير الكويس الصدر ما يحبوش يجيه ناشف، و ديما حطيلو مع الماكلة ما و لا عصير يجوز الماكلة بيهم و المغرفة ديالو هادي لي فيها خيط ازرق.
قلتلها بصح أنا علاش حتى نخدمو؟ قالتلي لخطر راجلك قلتلها بصح أنا مانيش حاباتو يولي راجلي قالتلي هاكي اديلو الماكلة و خدمي مخك شويا،  رفدت السنيوة تع الماكلة و طبطب الباب برجلي سمعتو قال الله اكبر، عاودت طبطبت سمعتو قال سمع الله لمن حمده، حطيت السنيوة في لرض و فتحت الباب و عاودت رفدتها و دخلت و غلقت الباب برجلي لقيتو يصلي حطيتها كي كمل قالي كيفاش تغلقي الباب برجلك عيب قتلو كنت رافدة السنيوة ما صبتش كيفاش نخدم بيدي قالي و انت شكون لي قالك وجديلي الغدا قتلو هيام، عقد حوجبو و قالي و هيام علاش حتى تبعثك انت؟ قتلو قالتلي أنت لي يلزمك توجديلو الماكلة ماشي وحدوخرا قالي علاش؟  قتلو ما علاباليش قالتلي خليه يوالفك، جاه الضحك بصح شدو و قالي صحيتي روحي كي نكمل ارواحي اديها و لا نقولك ما كالاه تولي أنا نجيبها و قولي لهيام بركاي من طراطڨك مازالها ماشي طايبة مليح كي تفقس من البيضة نديها قتلو أوكي و رحت ليها قلتلها وش قالي قالتلي وش قلتيلو يا المخبوطة؟! قلتلها ما قلتلو والو قالتلي يمال علاش حتى يبعثك تقوليلي هكدا قلتلها ما علاباليش حتى البيض و ما حطيتلوش ياودي خوك هدا باين رايح فيها يهدر برك قالتلي والله ماكان واحد رايح فيها هنا قدك يا بنتي ما عندك حتى واحد فهد الدنيا اكسبي راجلك بركاي من التمهبيل ديالك خير ما تخسريه و يتزوج عليك قلتلها خليه يتزوج أنا أصلا مانيش حايباتو، حايبا نرجع لدارنا و نكمل قرايتي قالتلي و شكون رايح يرجعك خوك لي دار فيك المنكر؟ قلتلها كاينة ماما و خوالي يحبوها قالتلي يماك مرا وحدانية و لوكان جاو صح خوالك يحبوها و هي علابالها بلي تقدر تعيش عندهم لوكان رجعت ليهم من زمان علاش حتى تتحمل ظلم خوك، و زيد خوالك لوكان كانو ثايقين فيك بلي بريئة علاش حتى يديرو جماعة و يجيو يطلبوا منا باش نستروك؟! هي تهدر و أنا ساكتة صبت عندها الحق في كامل وش قالت منبعد قالتلي ربي العالم بلي ماشي قصدي باش نجرحك، راني دايراتك كيما بنتي و نيتي باش ننصحك و نفطنك.
شوفي ليليان صراع صح مقلق و عقليتو صعيبة شويا بصح و الله غير بألف راجل و قلبو مليح ولوكان تتهلاي فيه و تسمعي لكلامو و تاخديلو الراي غير يفرشلك الارض ورد، انت صغيرة و يتيمة ديريه هو باباك هو يماك هو عايلتك و تشوفي و الله ما يخيبك، قلتلها بصح كبير و ماشي هو لي في بالي قالتلي قصدك تحبي وحدوخر؟ قلتلها لالا ما عندي حتى واحد في حياتي بصح ماشي هو لي تمنيتو قالتلي سبقي النية و الله ما تعرفي وين الخير، علبالي مازالكي صغيرة و ما تميزيش الامور بصح ديري بنصيحتي ما عندك ما تخسري أصلا ما عندكش خيار آخر.
هي تهدر و أنا نسمع و ما عجبنيش كلامها بصح وش رايحة ندير ما قدرت نتقبل الواقع لي راني عايشاتو ما قدرت نقولهم رجعوني.
طلعت لصراع صبتو مازالو قاعد قدام السنيوة و مكسل رجليه و يخنتش في تلفونو، قلتلو جيت ندي السنيوة قالي قبل ما تديها اعطيني الغطا و طفي الضو.  درت وش قالي و حبطت للكوزينة نغسل الماعن حتى نسمع العياط طليت من التاقة شفت علي وليد هيام و وليد سعد يتضاربو و يتعايرو، خرج الحاج و هيام يسلكو ما بيناتهم
حبط صراح يجري وشنو هد الصوت وش كاين و فتح الباب و خرج ليهم عيط عليهم و شدهم في زوج من رقابيهم قالهم قسما بالله العلي العظيم و نزيد نسمع حسكم غير ريسانكم يطيرو ما تحشموش سمعتو بينا أمة لا إله إلا الله.
علي قالو خالو خليني نروح لدارنا ما نقعدش هنا قالو لو كان تبوجي منا تشوف و قالهم يا الله قدامي ادخلو في زوج للدار، قالتلو هيام خليه يروح للدار شحال من مرة قلتلو ما جيش مورايا كي نكون هنا، قالها هيام ما دخليش روحك و ادخلي ، دخلت و الدموع في عينيه، دخلت لشومبرة يماها رحت موراها باش نخفف عليها صبتها قاعدة و بدات تحكي و قلبها محروق انا أصلا سمعت كيفاش كان محمد وليد سعد يعاير في وليدها و يقولو جدي لي راهو معيشكم و ما نعرف وشنو باين بلي الكلام لي كان يهدر فيه سمعو من عند الكبار.
دخل صراع و زادت موراه الحاجة، قالها علاش راكي زعفانة كي ضربت وليدك؟ قالتلو لالا ماشي هكدا بصح انا علبالي بلي وليدي و وليد سعد ما يتفاهموش و نقولو ما جيش بصح ما يسمعش الكلام، قالها راكي من نيتك ما تخليهش يجي على جالو؟ الدار دارو يجي بلا مزية حتى واحد قالتلو انت ماشفتش كيفاش يتضاربو خلي على الكلام الزايد قالها كبري عقلك يا أختي وش تسناي من مراهقين يتضاربو و يوليو لبعضاهم راكي برك تقلقي في روحك خليك منهم، قالتلو لالا يا صراع ما جاتش غير لتم بصح باش وليد سعد يعايرو و يقولو رانا معيشينكم يا العرايا بزاااف، قالتلها الحاجة لالا الطفل ما قالش هكدا تضاربو برك مصاغر ما تكبريهاش، قالتلها ماشي هادي أول مرة دايمن يعايرو بهد الشي، قالها صراع انا ما سمعتوش بصح لوكان نسمعو راسو نطيرو ، نطقت أنا قتلو انا سمعتو صح قالو هكدا دار ليا خزر فيا وحد الخزرة تقول رايح ياكلني و خرج و خبط الباب منبعد زڨالي ليليااااااااااان...
يتبع......