مراهقة والاربعيني بلهجة جزائرية

21❤️

#المراهقة و الأربعيني:

#الجزء21:

دخلت للدار و رحت للشومبرة قالتلي الحاجة ليليان بنتي وش بيك؟ ما واجبتهاش دخلت في فراشي و غطيت راسي قعدت نبكي حتى غفيت.
كي جات أم سعد صباح باش تنوضني ما حبتش تخليها الحاجة قالتلها راهي مريضة حتى لحقت العشرة تع الصباح نضت وحدي غسلت  لبست خماري و دخلت للكوزينة صبت نوال قالبة خليقتها كي ما نضتش بكري و صبتها كملت الشغل وحدها، عاودت رجعت للشومبرة حتى عيطتلي أم سعد باش نقي الخضرة أنا جيت داخلة للكوزينة حتى نشوف في صراع حابط ملفوق و شايد راسو ما أمنتش بقيت نتبع فيه بعينيا حتى قعد و قالي جيبيلي الما قتلو ماشي رحت للعاصمة قالي ما رحتش عندك اعتراض؟ رحت جبتلو الما و قعدت نخزر فيه قالي اطلعي وجديلي حوايجي باش نروح للجامع، طلعت لشومبرتو فرحانة كي رجع و نهدر مع روحي زعما يحبني؟. حتى دخل عليا قالي ليليااااان... درت ليه قتلو انعم قالي علاش كنتي تبكي الصباح؟ تفرفشت ياربي وش رايحة نقولو دوك لوكان سقساني الصباح فهديك الدقيقة من لهفتي عليه بالاك كنت رايحة نستعرفلو بلي نحبو مي دوك صعيبة منبعد قتلو كنت مريضة و دوك ريحت تبسم خزرت فيه و خرجت مورالي فالسما يا يما على هد الراجل كي يتبسملي يحييني و نزيد نحبو كثر.
حبطت للكوزينة نقي الخضرة حتى شفتو لحقني قالي ليليان راني رايح نصلي و خليت تلفوني لفوق حطيه فلاشارج و روحي ترقدي عينيك راهم منفخين و خلي الشغل ما رايحاش تخلى الدنيا كي ما تحطيش يدك معاهم راهم النسا على ريسانهم في هد الدار، نوال و أم سعد خزروا في بعضاهم ما عجبهمش كلامو.
طلعت لشومبرتو حطيت التلفون يتشارجا و بديت نقلب فيه رحت ديراكت نحوس على أم مصطفى هادي وش تكون حتى صبتو هادر معاها فالواتساب، كانت باعثتلو تصاورها و لابسة الميني و مع كل صورة كاتبتلو توحشتك ما ردلهاش صبتها باعثا بزاف لي ميساج فتحهم بصح ماشي مريبونديلها و في آخر ميساج كاتبتلو حس بيا رايحة نموت على ما نشوفك لوكان ما جيش نجي لعندك أنا رجعلها قالها ارواحي و تشوفي منبعد هادر معاها ابال مدة دقيقة و 30 ثانية و اليوم باعثتلو ميساج قاتلو راني نستنى فيك قالها مانيش جاي قاتلو حرام عليك خليتني حتى وجدت روحي ياك واعدتني ما واجبهاش زادت بعثتلو أبو حرب تعيش ريبونديلي نص ساعة منبعد باش رجعلها كتبلها ما نقدرش نجي ليوم على يمات ان شاء الله نجي وحد السويعة برك نحبسو هد الزواج و كل واحد يروح في طريقو موراها بعثتلو عرام ميساجات ما رجعلهاش و آخر واحد قاتلو تعيش معليه ما جيش بصح ما تخلينيش تعرف ظروفي و علبالك بلي نحبك و ما نقدرش بلا بيك 
من هديك ما زادتش حكى معاها.
انا ارتحت كي عرفت بلي ما يحوسش عليها و قعدت نقلب فالتلفون بديت نشوف في تصاورو شحال عاجباتو روحو ههههه بستهم و غلقت التلفون و خليتو يتشارجا، حاولت نرقد بصح ما قدرتش وليت حبطت لتحت صبت هيام و بنتها سارة جاو و قاعدين مع الحاجة في شومبرتها سلمت عليهم منبعد نطقت هيام قاتلي ليليان علاش كنتي تبكي ليوم يما تحيرت عليك قلتلها كنت شويا مريضة و ريحت قاتلي الحمد لله.
حكمت التلكومند و بديت نقلب كسلت روحي طلعت الجبة بانت رجلي شويا  شافتني الحاجة قالتلي شحال عندك يا بنتي ما نحيتيش علاش حتى تخلي روحك هكدا حشمت قالتلي هيام دوك جيب سارة الرجيلة و ادخلو للشومبرة لوخرى تنحيلك.
لبست روبة سبور قصيرة ديلكوتي و بدات تنحيلي  كملتلي رجليا منبعد راحت تزيد جيب باش تنحيلي في يديا قابلت المرايا و قعدت نزير في الروبة على لاطاي و نشوف في روحي من و من و نقول زعما لوكان نسمان شويا نعجبو؟ هديك أم مصطفى في التصاور تبان معمرة وقيل يحب السمان اوووف وش راح ياتيريه فيا   سيقاني غير عظام بصح بيوضا علاش وش خصهم انا هكداك نحاجي و نفك وحدي حى تفتحت الباب عمبالي سارة ولات قلت وش رايك سارة لوكان نسمان شويا ماشي نولي خير؟ مع لي درت و نصبو صراع يخزر فيا ملفوق لتحت بوحد الشوفة تع واحد ما يحشمش ههههه صغت  لالاااااااااااا. ....البااااااب و هو زاد تفرفش ما عرف يخرج و يغلق الباب و لا يدخل قاعد يفتح و يغلق و انا نحوس على الجبة ديالي وين حطيتها لبستها بالخف و هو كي شاف سارة جاية خرج، دخلت صابتني لابسة الجبة بالمقلوب ناضت تضحك عليا حكيتلها راحت قالت ليماها داروني تحريشة فهداك النهار هههههه
مور المغرب حطينا العشا و قعدنا ناكلو و انا غير نخزر فيه بالتخبية كي نتفكر الموقف لي طحت فيه معاه تحكمني الفشلة، كان التلفيزيو شاعل حتى دارو أخبار مسلسلات تركية و كانوا يهدروا على  الفنانات دياولهم دارت ليا هيام قاتلي شوفي شوفي لاطاي ما يسمانو ما والو حنا غير نتزوجو و نجيبو لولاني نطرطقو، انا بنيتي قلتلها انا مادابيا نسمان عجبك كي راني معظمة هكدا؟ و هو قال حلاوة الطفلة في ضعفها و نعومتها ماشي كيما لي يكون عندها رجلين ثور أسترالي تقول رايحة تنطح بيه، هو قال هكدا و انا اللقمة حصلتلي عرفتو يواجب فيا على سؤالي كي دخل و صابني نقول وش رايك لوكان نسمان ماشي نولي خير، منبعد خزر فيا قالي انت بالدات ما تاكليش بزاف باش ما تسمانيش زاد كمل على جدي و هوما غير يضحكو، نضت رحت للكوزينة جات مورايا نوال و تضحك قالتلي اواااه الراجل راح فيها ما خليتي فيه والو هبل.
وجدت السنيوة تع لاتاي و ديتهالهم صراع ما كانش معاهم سقسيت يماه ادا خرج قالتلي لالا راهو في الصالو، رفدت كاسو و نخمم يا ربي بوش من وجه نقابلو دوك، دخلت صبتو يشوف فالأخبار، انا من الحشمة و التفرفيش جيت نمدلو الكاس دفقتو علي روحي صغت ناض يجري قالي وش بيك كلما جيبلي لاتاي لازم دفقيه قتلو علاش أنا حبيت نحرق روحي؟ هو زلق وش ندير، قعد يخزر فيا منبعد قالي وري نشوف يدك قتلو ما بيها والو زاد حبط لتحت و طلعلي الجبة شويا و قالي اصبري نشوف بالاك قاسك في رجلك اووووو وشبيه هدا  بديت نحبط فالجبة و نقولو ما بيني والو، كي حط يدو على رجلي لحمي تشوك حسيت ما كانتش نيتو مليحة منبعد قالي قعدو هد الرجلين في قلب هد المحروم و خليتي نفسو تتحرق، كي قال هكدا خفتو  طبعتو و خرجت نجري. 
أنا كنت فاهمة الزواج بلي الراجل يدي مرتو لشومبرتهم و يرقدها في حضنو و كي يوليو رومنسيين يبوسها هدا وش نعرف، ماما كانت معيشتني في عالم وحدي كل حاجة عيب و ممنوعة ماكاش لي حكا معايا في هد المواضيع حتى صحبتي الوحيدة سارة مغلوقة كثر مني و زيد حتى التلفون ما كانش عندي و ممنوع نستعملو أصلا.
المهم شويا هكدا جا وليد عمهم يسهر كي العادة هوما جمايعهم ما يخلاصوش، جا ليا قالي وجدي لاتاي عينيا ما قدرتش نرفعهم فيه من الحشمة درتلو براسي إيه.
وجدت السنيوة و سربيتلهم ورحت دقدقت فالباب تع الصالو خرجلي هو شدها عليا و عاود دخل لاتي يضحك معاهم و مندمج مع الڨصرة. 
دخلت لشومبرة الحاجة و نحيت حوايجي  كنت رايحة نرقد لبست روبة قصيرة أنا سڨمت روحي و هي عيطتلي الحاجة من الهول قاتلي ليليان خرجي الباندويل و عمريه برا ماشي فالشومبرة، هي كان عندها هدوك الفورنوات تع بكري لي يتعمرو بالمازوت.
عجزت نعاود نلبس الجبة و الخمار وليت لبست الحجاب تع الصلاة ديالها فوق الروبة جاتني ساهلة خير، رفدتو خرجتو لبرا و و درت التويو باش يتعمر و غفلت عليه تعمر فوق الحد و تالمو لابريسيو لهبت النار و تقلبت القرعة تع المازوت عليا بديت نصوغ الناااااار و نحاول نسلك روحي خرجو الرجال يجريو
وصراع جا يجري ليا نحالي التويو من يدي و طبعني للجنان و يطفي و لوخرين يطفيو فالفورنو، و أنا نبكي رجلي تحرقت رد بالو بلي راني لابسة روبة قصيرة ملتحت نحا تريكوه و سترني بيه و دار ليهم قالهم خلاص ادخلو راهي طفات هوما دخلو و هو عيط لمحمد و حرب قالهم يجيبولي عباية و خمار و مفاتح الطونوبيل خرجت الحاجة و نوال يجريو ناض يعيط قلتلكم جيبو  عبااااااااااية جيبو عبااااية
الحاجة قاعدة تعيط و تقول سترك يا ربي قريب طرطڨنا لوكان كلاطا البرميل تروح الطفلة وش نقولو لماليها قالها هي حابسة انت ما صبتي شكون تبعثي.
جاب محمد العباية لبسهالي و شد المفاتح على وليدو حرب، شافني ما قدرتش نمشي عطا المفاتح لمحمد قالو أفتح الباب تع الطونوبيل و الباب تع الڨاراج و هو رفدني و حطني ملور و يماه طلعت معاه ملقدام.
وصلنا للديسبونسار رفدني و دخلني كانت الحالة فارغة صاب انسان كبير هو لي خدام لاڨارد حكالو و أنا رايحة نهبل من السطر، قعدني على كرسي قابلني هداك الراجل نقالي الحرق وليت نعض في يدي من السطر، حكمني صراع من يدي و حط يدو على ظهري و جبدني ليه و يقولي خلاص راهو قريب يكمل ما بقاش اصبري شويا، جا يديرلي تشكة ما حبش قالو اعطيهالي دوك انا نديرهالها فالدار.
كملنا عطالي الدوا طلعنا فالطونوبيل و رجعنا للدار لاقانا الحاج يسقسي منبعد قال لصراع ربي يعينك على هد البلية دايما عقلها ماشي معاها و أم سعد قالتلو ديما هكدا ما تنتبهش المهم واحد يرفد و لوخر يحط و أنا نبكي خصني غير همهم قالهم صراع ما تقولوش هكدا على ليون هي صح تنسى بصح راهي تتعلم بلعقل و داني لداخل سلم على راسي و قالي الحمد لله على سلامتك نطقت أم سعد قالتلو بصح الغلطة عندها حدود دار ليها قالها وش حكايتكم معاها دوك؟ قولو الحمد لله هكدا و لا كثر تقدرت و ربي دفع البلاء لوكان طرطق البرميل واحد فينا ما يسلك خلاص غلطت و عرفت غلطتها، انحرقت و خرجت سلامات،  كان ليها درس تتعلم منو، منبعد دار ليا قالي نوضي لشومبرتك ترقدي نوضي و قال لنائل غدوا الصباح جيب ذبيحة نخرجو وعدة لوجه الله الحمد لله خطات على الكبيرة.
صراع و نائل اكثر مصرف الدار عليهم و كامل المسؤولية طايحة على ريسانهم، سعد لاباس بيه ماديا بصح مشحاح.
دخلت لشومبرة الحاجة و تكسلت و هي واقفة عند راسي قاتلو واقيل الحمى شوف راهي حمرة قرب هو ليا مس جبهتي قالها لالا بالاك من الخلعة و السطر و قالي دوري نديرلك تشكا قتلو لالا حبيت نرقد قاتلو يماه خليها حشمت غدوا صباح جي هيام ديرهالها قالها يا يما يلزمها ديرها دوك و قالي دوري دوري برك خليني نديرهالك ليوم كشفنا المستور درت ليه قتلو كامل منكم ليوم نهار كامل و نتوما عڨابي شي عيباد سلخوني بالرجيلة و لوخرين حرقوني بالكلام قصدي عليه كي تبالاني فالصالو و لي خليتوها كملها المازوت وش خليتو فيا اقتلوني و تهناو و هو يضحك قتلو أضحك دوك أضحك كامل على جالك ماشي قلت هد الرجلين قعدو في قلبي هاني تحرقت تعنكر فيا و قالي ليليااان... يماه  ضحكت و قالتلي أنت صح بوفضيح و هو قالي ما تعرفي تخلي حتى حاجة فالستر؟!
دورت وجهي و غمضت عينيا قاتلو يماه خليها غدوا جي هيام وتضربهالها قالها بصح اعطيلها دواها قبل ما ترقد نروح ندوش ريحة النار مازالت فيا و خرج و هي عطاتني الدوا شربت و رقدت حتى نسمع فيه جا قالها رقدت؟ قاتلو ايه بالسيف السطر قتلها، قرب ليا مسح على شعري و دناه مور ودني باسني في جبهتي و خدي و غطاني و يقول دراعتيها و رجليها كانوا شوف يالي ما تشوف لوكان ما انحرقتش نوريلها على وش كانت لابسة قدام ولاد عمي.
قاتلو يماه مادامك تغير عليها و راهي في قلبك علاش ما تديهاش يا وليدي قالها يما مازال الحال على هد الكلام، طيابك كلما تخليه على نار هادية كلما يطيب بعقلو خلي الامور تمشي وحدها راهي في يد ربي سبحانو و خرج.
غدوا منداك كي نضت شفت حلا جات و قالبة خليقتها لخطر هي كانت حابة تقعد سمانة عند خوالها و باباها يومين برك و جابها.
جات ليا أم سعد كي عادتها قالتلي ما تبقايش تدللي نوضي عاوني مرت لوسك قلتلها ما نقدرش رجلي توجعني قاتلي قلتلك نوضي دوك قالتلها الحاجة خافي مولاك الطفلة راهي محروقة قالتلها ما طلعيهاش فوق ريسانا ما راناش خدامين عندك و عند عروستك قالتلها كي ولات حكاية عروستي و عروسك يمال يلزم يندار حد لهد الوضع، دخل الحاج قال علاش راكم تعيطو قالتلو أم سعد نوال تخدم ليل ونهار و كامل واقفين معاها و هادي كل يوم دير سبة باش ما تخدم والو  قالها تخدم بالسيف عليها هدا فوق ما قريب طرطقتنا لبارح قال للحاجة و انت يا نورية إدا ماراكيش قادرتلها ما دخليش روحك ادا انت راكي شابعة راحة نوال و أم سعد التعب كامل راهو عليهم، قالتلو كي ولينا هكدا كي يجي صراع نقولو و أهدر معاه قالها انت وليتي تع مشاكل يا نورية ما يهمكش تخدم و لا ما تخدمش و دار ليا قالي نوضي انت تشوفي، الحاجة تقلقت و انا ما صبت ما ندير قتلو راني نايضة حتى دخلت هيام من الباب خير خير وش راهو صاري صوتكم راهو يتسمع ملبرا قالتلها أم سعد مادام جيتي انت كملت قالتلها لي يسمعك يقول راني جاية لدارك قالها باباها اهدري مع يماك و هادي يسڨموا رواحتيهم و لا ندبر راسي معاهم ماشي هي قاعدة و هوما يخدمو عليها، قالتلو وش بيك بابا ليوم حتى راك تدخل في امورات النسا إدا أنت وقفت مع مرتك مام صراع ما رايحش يخليها تخرج على خير قالها كوني محضر خير ماشي تزيدي تشعليها قالتلو بابا نعرف الخير و نعرف تان حق الله على وشمن أساس ليليان تخدم في هد الدار؟ ماخذها صراع زوجتو شرعيا ؟ يجوزلك تاخد طفلة و انت ماشي عاطيها حق الله و تحوسها تخدم قالتلها ام سعد تخدم حق ماراهي تاكل في هد الدار قالتلها ماراهيش تاكل من جيب حتى واحد راهي عايشة في خير راجلها و انت بداتك راكي عايشة في خيرو قالتلها راكي تعايري فيا؟! نضت انا قلتلهم خلاص تعيشو ياك راني نايضة قالتلي هيام اقعدي ليليان مادام الهدرة ليوم راهي عليك عندك راجلك كي يجي هو يعرف وش يدير، زادت جات نوال كملتها قالت ياك الشغل ما يقتلش، هي ما عندها والو وش راح يصرا لوكان جي تعاوني انا تان عندي ولاد و مسؤولية. قالتلها هيام عيب عليك ياك يوميا واقفة معاك و ليوم كي راهي محروقة ولات مادارت والو دوك انا نجي نخدم في بلاصتها و طبڨوا علينا هد السوق.
الحاجة ناضت راحت لشومبرتها تصلي و أنا و هيام رحنا للكوزينة نطيبو و نحكيو
كي كملنا دخلنا للشومبرة شافت حلا قاعدة مع تلفونها قالتلها و أنت علاش ما تروحيش تعاونيهم و لا في يديك الحنة؟ ديما مخزونة هنا قالتلها و انا علاش نوض خاصين نسا في هد الدار حتى تحوسي عليا نخدم و لا لالا قالتلها إيه تربية إخلاص وش نستنى منك بصح يجي باباك و هو يعرف كيفاش يرجعك للطريق، قالتلها عمتي ما تدخليش ما بيني و بين بابا ماراني نديرلك والو قالتلها يعميلك العينين بلعي فمك حسك ما نسمعوش فهمتيييي .. سكتت
قعدنا نحكيو و نحيو فالزعاف للحاجة منبعد هيام راحت تشوف الغدا و أنا رقدت حتى دخل صراع سلم على راس يماه و قالها وش بيك ماراكيش تباني مليحة قالتلو شويا لاطونسيو طالعة قالها نديك للطبيب؟ دخلت هيام قالتلو تقلقت شويا قالها من واش قالتلو حكايات جايحة نسقيلك تتغدى؟ قالها كيما تحبي و جا قعد قدامي فتحت عينيا قالي كيفاش راكي قتلو مليحة قالي دارتلك هيام التشكة؟ قالتلو هي واحد ما قالي عليها قالها ديرهالها ختي تعيشي و دار ليا قالي وجهك راهو صفر راكي تاكلي في دواك تع لانيمي؟ قالتلو الحاجة و الله والو قالي علاش يا ليليان كيفاش حبيتي ترتاحي يمال قتلو ننساه ما والفتش ناكل الدوا، قالها هيام شربيلها دواها نطلع نريح شويا.
هو طلع و هي دارتلي التشكة و راحت توجدلو الغدا و انا حكمت تلفون الحاجة قاعدة نلعب بيه.
كملت هيام و جات ليا قالتلي وش رايك جي معايا نديرو كايك؟ قلتلها إيه حنا نوجدو فيها وصراع دخل علينا للكوزينة قالنا وش راكم ديرو قتلو رانا نديرو فالكايك و حبيت نوتيلا قالي اطلعي لشومبرتي تصيبي البورتفاي نحي و شوفي شكون تبعثي يروح يشريلك بصح وجديلي كاس لاتاي.
كملت وش كان في يدي و درتلو لاتاي و ديتهولو حكمو عليا و بدا يضحك قالي الحمد لله سلامات هد المرة ما تحرقتي ما تحرقت، ضحكت و رجعت للكوزينة.
فالليل جوايه ال 8 هكداك علي وليد هيام قال ليماه ماما راني خارج مع صاحبي دوك نولي قالتلو ريح وين راك رايح فهد الليل و زيد دوك شويا نروحو للدار، ما ردلهاش و دار رايو.
قعدنا نحكيو حتى نسمعو في نوال وسعد يداوسو و كامل راحو يكاليمو ما بيناتهم، شويا هكدا و داها لدارهم.
قعدنا كي العادة مع سهرات ولاد عمومهم و لاتاي حتى لحقت ال12 تقلقت هيام على وليدها ما بانش عيطتلو في التلفون بصح ما يريبونديش بعثت بنتها قالتلها عيطي لخالك نائل، جا هو و صراع قالولها وش كاين؟ قالتلهم علي طول بزاف و ما راهوش يرفد على تلفونو إدا معليه واحد فيكم يوصلنا للدار قالها صراع ارقدوا هنا علاش دارك رايحة طير؟ قالتلو لالا الدار راهي وحدها قالها وجدوا رواحتيكم انا نوصلكم.
نطق نائل قالها علي وش حكايتو راني نعيطلو ما يرفدش قالتلو و الله غير عياني ولا ما يسمعش الكلام و يدير غير وش كاين في راسو، قالها ما تقلقيش روحك اختي راني خارج نشوف وين راهو.
وجدوا رواحتيهم و جاو خارجين ما وصلوش للباب حتى نسمعوا في هيام تصوغ، خرجت أنا ويماه نجريو نشوفو وش كاين شفناها داخلة تبكي و تندب و تقول يا يما وليدي راح، خرج الحاج يجري وش كاين وش كاين؟ قالتلو جا واحد لصراع قالو علي دار اكسيدو بالموطو هو و صاحبو و صراع راح يجري.
قعدنا دايرين بيها يماها تدعي و أم سعد تحلل فيها و أنا و بناتها و حلا نبكيو،
عيطت الحاجة باش تسقسي واحد ما ريبوندالها زدنا تقلقنا، شويا هكدا دخل صراع لاقاتو تقولو يا خويا تعيش قولي وليدي ما بيه والو قالها وحدي ربي ختي و الله ما كاين والو تقلب بيهم الموطو بصح صاحبو لي انضر بزاف لخطر هو لي كان يسوق، قاتلو كي راهو مليح علاش ما جبتوش معاك يمال قالها و الله ما بيه والو داه الحاج و نائل للسبيطار انزلح شويا من ظهرو هدا ما كان و طلع يجري لشومبرتو و هي تقولو وليدي كاش ما صرالو و راكم مخبيين عليا و تدعي ياااارب رجعلي وليدي سالم غانم بجاه الحبيب المصطفى.
عاود حبط صراع يجري و خرج، و حنا قعدنا هكداك حتى طلع النهار علينا وحدة فينا ما رقدت حتى دخل صراع راحت هيام تجري ليه و تبكي قاتلو وين راهو وليدي أهدر الصح قالها استهدي بالرحمن يا اختي نعرفك انسانة مومنة و الله غير وليدك راهو لاباس عليها و قبل الظهر إن شاء الله نخرجوه قالتلو تعيش اديني نشوفو قالها وين نديك يا اختي و الله غير راهم كامل مجمعين لتم قتلك قبل الظهر بربي نخرجوه و نجيبوهولك تشوفيه ولات سكتت و تبكي.
خرج صراع و عيطلي ليليااااان... رحت نجري لعندو قالي اسمعيني مليح روحي وجدي لاتاي و سكريه، حطيه فالتيرمو و خرجي كيسان جدد فكارطونتهم و حطيهملي في صاشي، و راني خبتلكم الخبز و البيض و الفرماج نحي منهم ندي لينا و الباقي افطرو بيه هكدا؟ درتلو براسي إيه قالي هيا يمال بابا خفي روحك بيدما نتوضى نصلي الصبح نصيب كلشي واجد.
بديت نوجد شويا و رجع قالي ليليان البيض غليه ما تقليهش درتلو براسي إيه.
كملت و هو صلي و جا قالي يعطيك الصحة داهم للطونوبيل و خرج منبعد عاود رجع لعندي قالي وش راح نقولك ليليان خملي شومبرة الحاجة احتمال كبير نخرجو علي قتلو ان شاء الله.
هو خرج و انا حطيتلهم يفطرو و عيطتلهم قلتلهم خليولي الشومبرة باش نخملها دوك يجيبو علي نطقت هيام قولي والله غير رايحين يجيبوه؟ قلتلها و الله غير صراع قبل ما يروح قالي خملي الشومبرة بيدما ما نروح نجيبو.
نوضت بناتها و حلا و الحاجة و أم سعد راحو فطرو و بداو يديرو في الشغل و انا رحت للشومبرة وجدتها كي كملت رحت للكوزينة رجلي وجعتني بصح وش رايحة ندير كنت غير وحدي و حلا قعدت لفوق ما حبطتش.
دخل صراع رافد علي مكسر من رجلو و وجهو مديفورمي و ظهرو بالبونداج حطو فالبونك و هيام تحضن فيه و تبكي و بناتها كيف كيف و صراع يقولها احمدي ربي على سلامتو لوكان تشوفي صاحبو لدوك مازالو فالسبيطار.
شويا هكدا دخل نائل قالنا النسا خليونا الشومبرة عمومي حبو يدخلو يشوفوه.
انا خرجت و عمومو دخلو، موراهم جات إخلاص مع باباها و يماها و ختها لكبيرة.
قعدت واقفة على البوطاجي حتى للعصر ماكاش واحد قال راهي محروقة و عندهم مريض راهم عيانين قاعدين غير يزيدو فاميلتهم كبيرة و هوما بلاش كل يوم الجمايع.
غسلت الكيسان و قعدت فالقاعة دخل عليا صراع قالي عييتي؟ قتلو وش رايحة ندير قالي و حلا وين راهي علاش ما جيش تعاونك قتلو ما علاباليش ما حبطت ما شفتها، قالي دوك انا نعيطلها روحي ادي فراشك و غطاك اطلعي لشومبرتي ارقدي.
حط يدو على البقراج تع لاتاي قالي هدا سخون؟ قتلو نسخلك قالي تعملي مزية و الله غير راني عيان و راسي قتلني و ما نقعدو غير بكاس لاتاي، سخنتلو و سربيتلو قالي يعطيك الصحة هيا اطلعي تريحي.
كانوا الرجال فالصالو دخلت لشومبرة الحاجة فتحت الخزانة باش ندي حوايجي ندوش نطقت إخلاص قالتلي وش بيكي انت ما تسلميش قلتلها مرحبا بيك خالتي و جيت خارجة قالتلي حتى الواجب و ما تعرفيهش بصح هادي هدي حالة لي يجيب وحدة ماشي معروف أصلها، ما واجبتهاش كنت عيانة و مارانيش قاعدة قيسها، قالتلها الحاجة لالا عيات مسكينة ملبارح و هي واقفة وحدها على الدار و رجلها محروقة.
دوشت و طلعت لشومبرة صراع صبت حلا تهدر فالتلفون خزر فيا و دارتلي بيها علاش جيتي؟ سكت عليها حبطت التلفون و قالتلها اسمعي راني نهدر معاك علاش جيتي مورايا قلتلها توحشتك و قلت نجي نشوفك، و قعدت نفرش قالت فالتلفون منبعد نعاودلك و كوبات، دارت ليا قاتلي وش عندك في شومبرة بابا ما تحشميش اخرجي تشوفي، قتلها باباك راجلي و جيت نرقد في شومبرتو و لا نسيتي وش قالك؟ قالتلي أنت صح ما تحشميش راكي تلصقي في روحك بالسيف؟ سكت عليها و دخلت في فراشي و تكسلت قالتلي شكون راهو لتحت قلتلها الفرقة الذهبية تع خوالك كامل راهي لتحت قالتلي شكون كامل قلتلها إخلاص و تغريد و يماهم قالتلي خالتي تغريد جات؟ و بدات تسڨم في روحها و حبطت تجري.
تقلبت فالفراش حتى كرهت و ما قدرتش نرقد حتى لل5 حبطت صبت حلا تحلل في باباها باش يخليها تروح مع دار جدها و هو ما حبش، قالها جدها نوضي تروحي معايا وش بيه باباك حب يمنعك علينا؟!  صراع سمعو بصح ما رجعلوش كان لاتي يهدر فالتلفون لي فهمتو بلي عيط لواحد باش يدي يامات من الخدمة، منبعد زادو جاو رجال راح دخلهم للصالو و أنا فشلت الشغل ما حبش يخلاص حتى ال10 باش راحو بصح إخلاص قعدت كي العادة دارت السبة حقا حقا باش تعاون أم سعد فضو.
رحت للصالو باش نخملو كانوا غير مالين الدار صبت هيام تقول لصراع نروح لداري و هو يقولها لالا روحي مع نائل جيبي حوايجكم و ارجعي.
دارت ليا هيام قالتلي و الله ما علبالي كيفاش نردلك خيرك ليون اسمحيلنا تعبناك و أنت مريضة قلتلها لالا تعبك راحة راكي في عوض ماما و ختي، بدا صراع يضحك و جا نايض قالي يا روح باباك اطلعي ترتاحي الشغل ما يخلاصش و هديك منبعد نتفاهم معايا، كان على بنتو حلا و زادت حرجاتو قدام جدها و راحت بلا رضايتو.
جيت طالعة جبدني لعندو قدامهم و سلم على راسي قالي عييتي اه  و أنا حشمت و قتلو راني طالعة نرقد نطقت جداتو قالتلو لالا لوكان زدت كسلتها ما بيناتنا خير ما تحشمش تبوسها قدامنا قالها هادي بنتي و مرتي نكسلها تكسلني هاديك شغلي، خليتهم و طلعت حشمت عرقت في حوايجي كي دار و قال هكداك و زيد قدامهم بصح كي كانت إخلاص معاهم جاتني على السطاش خليها تتطرطق.
بدلت حوايجي و دخلت فالفراش و رقدت حتى سمعت الحس صبتو صراع رايح يجبد الفوطة من الخزانة كمل و دخل في فراشو حتى سمعت تلفونو يفيبري رفد قال و دوك كيفاش آخرتها معاك ... افهمي ما توالمني ما نوالمك و لدوك راني مازالني شايد روحي ما تقلقينيش .. عرفت بلي راهو يهدر مع مرا حتى تفاجات كي قالها إخلاص ما عندكش كرامة أنت؟ وش دخلت انت ادا دخلت على مرتي و لا مازال و ادا نعتبرها بنتي و لا مرتي احشمي شويا وش دخلك هادي حياتي و انا حر فيها و كوبا عليها و هو ينسف و يستغفر. هو عاود رجع رقد و أنا بقيت مصدومة.
بايتة نتقلب فالفراش و نخمم زاد تلفهالي هدا مرة يقول مرتي مرة يقول بنتي و من كثرة ما يقول بنتي نحشم حتى نعيطلو باسمو.
قعدت نطلع و نحبط حتى غفيت كي فطنت على الباب كي تغلق صبتو ما كاشو في فراشو و مخلي الفيوزة شاعلة كي سمعت الما في الصالدوبا رحت صبتو يتوضى كمل دار ليا قالي نضتي؟ ما تقعديش دوري هنا بهد الروبة قصيرة، نائل مازالو فاطن يهدر فالتلفون لوكان يخرج على غفلة يشوفك هكدا، قتلو لالا حبيت برك ندخل التوالات قالي يمال ادخلي علاش راكي واقفة و تخزري فيا.
دخلت و كي رجعت للشومبرة صبتو يصلي حكمت فراشي و نتبع فيه بعينيا كيفاش كان يصلي و وش كان يقول زدت عشقتو و هو ما راهوش حاس بيا.
سلم و رفد السجادة و رجع لفراشو طفى الفيوزة و أنا قعدت نخمم ياربي الراجل رايح يطير مابين يديا وحدة لاصقة فيه و لوخرى تعرض في روحها عليه لوكان ما نقفزش على روحي نخسرو. 
نضت كي الحابسة وقفت عند راسو و هو مغمض عينيه و مغطيهم بيديه و ضو خفيف جاي من الڨاراج حس بيا نحى يدو و خزر فيا قالي كاش ما بيك؟ قتلو لالا قالي يمال علاش راكي واقفة عند راسي قتلو والو و جيت دايرا قالي ادا كاش ما تحتاجي قوليلو و الله غير وليتي أعز من حلا هو قال هكدا و أنا بلاما نخمم رفدت الغطا و رقدت قدامو ما فهم والو ناض يضحك، منبعد تقلب و عطاني بظهرو و رقد حيرني علاش كي نكون قدامو فالفراش يتجنبني و كي نكونو قدامهم يتقرب ليا، حسيتو يتحاشاني في فراشو بالسيف عليه، في هداك الوقت ما كنتش فاهمة منبعد باش فهمت علاش كان يدير هكدا ...