مراهقة والاربعيني بلهجة جزائرية

الجزء السابع 🫀

#المراهقة و الأربعيني:

#الجزء السابع:

شويا هكدا جات وحد الطفلة قالتلي ارواحي تتعشاي قلتلها صحا ما عطانيش خاطري خلاتني و راحت قالتلهم حتى نسمع فيه يعيط قالها عيطيلها جي تاكل بالسيف عليها واحد ماراهو خدام عند مافيهاش باش يديولها الماكلة لعندها، ما نزيدش نهدر الوقت لي تتحط الطابلة تع الماكلة كل واحد يحكم بلاصتو فهميها مليح هد الشي.
انا غير سمعتو وقفت عاودت رجعت الطفلة باش تقولي درتاها براسي تع سمعت.
رحت صبتهم كامل فالطابلة كي الرجال كي النسا كي الدراري، وقفت نخزر ما عرفتش وين نقعد و صراع مقعد طفل في حجرو و يوكل فيه ما خزرش كامل فيا حتى قالتلي الحاجة ارواحي اقعدي هنا قدامي هنا رفع راسو و خزر فيا قالي ماشي قلتلك خمارك ما تنحيهش من فوق راسك بهدلني قدامهم كامل قلتلو والله غير نسيتو و جيت نوض حبستني هيام قالتلي ريحي دوك انا نروح نجيبهولك و قالتلو الطفلة ماشي موالفة بيه بلعقل عليها. راحت جابتو و عطاتهولي لبستو و أنا نرجف، نغزتني الحاجة يماه قالتلي كولي يا بنتي ما تنفعك غير نفسك، ربي عطانا زوج ودنين وحدة اسمعي منها و الثانية ارمي منها ماتخليش في قلبك تطفر فيك العمر تع البنادم يومين كان هنا وراح قضية وقت برك و توالفي، هزيت راسي.
صراحة كانو حاطين من كل خير و جامي فحياتي شفت طوابل تع ماكلة هكداك، حنا عائلة صغيرة و قيسنا قيس رواحتينا.
تشهيت الماكلة بصح حشمت نمد يدي و حتى المغرفة حشمت ندومونديها كانو حاطين المغارف في سلة صغيرة و بعيدة عليا قعدت نقب من الشي لي قدامي حتى انتبهتلي الحاجة قاتلو سعد اعطيني مغرفة على يدك و حطتها قدامي وحطتلي الخبز قالتلي هيام علاش ما راكيش تاكلي قلتلها ما عطانيش خاطري قاتلي ما تحشميش كولي كولي، نطقت مرت باباها أم سعد قالتلها هيام زيدي ارفديها فوق الريشة خير لالة راهي حايرة منين تبدا مسكينة راكي لاتية تخمي على اخت قتال خوك تقول لي دفناه حاجة ماشي قوجا تراس توخد في شبابو، هيام سكتت عليها بصح صراع بدا يدير الحس بالمغرفة ديالو فهماتو ولات سكتت و أنا نقول في قلبي ياربي كيفاش رايحة نعيش معاهم هادو.
شفت وحدة ناضت ماعرفتش ادا نقدر نوض و لا لالا مع الاول خفت منبعد درت كوراج و رحت موراها راحت تغسل يديها وقفت موراها نستنى تكمل باش نغسل دارت ليا و تبسمت قالتلي وسمك قلتلها ليليان قالتلي مرحبا بيك أنا نوال مرت سعد خو صراع قلتلها الله يبارك راحت و أنا قعدت نغسل كي شفت راجل منهم حب يجوز باش يغسل خرجت بلخف و رحت للمخزن، جات ليا أم سعد قالتلي وشنو يا لالة واقيل انت ترهجي و هوما يغسلولك ماعنك أيا يا الله نوضي تغسلي الماعن دوك، هزيت راسي و دخلت للكوزينة صبت نوال قالتلي أنا نرغون و أنت شلي دقيقة دوك نولي، هي راحت و دخلت اخلاص رافدة عرام تع ماعن و كي وصلت قدامي رماتهم فلرض و ناضت تصوغ و تقول يا عمي ربي يعينك على هد البلية وش بيكي ما كفاكش كسرتي وليد عمي و خربتيلو حياتو حتى الماعن و ما شفقتيش؟!! تشوكيت هادي وشبيها، قلتلها ماشي انت لي كسرتيهم؟! قالتلي الله يسترنا يا لطيف و الطف أنت باينة ماشي جاية معولة على الخير، حنا هكداك و هوما دخلو علينا يجريو وش كاين وش صرا، قالتلهم عطيتها الماعن فيدها شدتهم فوق قلبها و طلقتهم فالقاعة و تقول ماشي أنا، قالتلي أم سعد يا وحد .... علبالك هد الماعن ملوقتاش و هوما عندي؟! راكي جاية دڨدڨيلي الدار و لا وشنو و شدتني من شعري مسحت بيا الكوزينة و تعيط و تضرب فيا فظهري، بديت نبكي و انا حاطة يدي فوق راسي حتى جات هيام و سلكتني منها، بلاما نحس حطيت رجليا على الزجاج ولاو يسيلو بالدم، قعدتني فالقاعة باش تشوفلي الجرح كنت حاطة راسي حتى شفت بليغة جات قدامي، رفعت راسي و أنا نبكي شفت الحاج يعيط و صراع دخل صابني نبكي و نحك في رجلي لي كانت بالدم و نمسح فدموعي شاف الدنيا كامل بالزجاج خزر فيا و عيط و شنوووو هدا؟ حكمني من كتافي و وقفني أنا خفت يضربني حطيت يدي فوق راسي و صغت قتلو يا عمو والله ما درت حاجة و الله ما أنا لي كسرت الماعن، عيط لاختو قالها هيام ارواحي ادي الطفلة و قرب من مرت باباه قالها ماشي قلتلك ما تزيديش تقربي لجيهة مرتي؟! قالتلو هي كسرت مواعني و بدات تعاير فيا يا كدا يا كدا .... قاطعها قالها أنا وش قلت؟ ما تزيديش تدناي ليها، كانت سنيوة فوق البوطاجي حاطين فيها الماعن لي جابوهم من الطابلة تع العشا رفدها و قالها مواعنك ياك؟ و خبطها هي بما فيها على الحيط دڨدڨهم، و هيام حضنتني كي شافتني خايفة و يماه الحاجة جات تشدو طبعها و زاد قال لمرت باباه مازالكي تحوسي على مواعنك؟ دوك تشوفي يمال و بدا يشد و يرمي و يكسر و يحلف و يقولها و الله و تزيدي تدناي ليها غير أنا لي نخرجك من هد الدار و لا ما نتسماش.
داتني هيام للصالدوبا ودموعي تجري و شعري طاير فالسما والدم يشرشر من رجليا، عمرت بيدون و قالتلي حطي رجليك فيه و طمتلي شعري منبعد فتحتلي العين و قاتلي اغسلي، بديت نغسل و دموعي تجري مع الما حتى دخل علينا صراع قال لأختو وش بيها، قاتلو و الله ذنب هد الطفلة في رقبة كل واحد كان سبة في هد الزواج شوف حالتها علاش هد المنكر، قالها اغسليلها نشوف رجليها، جات الحاجة انخلعت كي شافتني قالت يا يما على رجلها مسكينة وش صرا فيها و قالتلي ما فيها والو بنتي ادا ما تقدريش ترفدي المواعن وحدك كنتي تعيطي لوحدة تعاونك، قلتلها و الله يا خالتي ما رفدتهم الطفلة هي لي كانت رافدتهم و كي لحقت عندي رماتهم في القاعة و حصلتها فيا، قالي صراع شكون فيهم؟ قلتلو ما نعرفهاش وحدة جاية طويلة و جايبا روحها، نطقت هيام هادي اخلاص و انا نقول منين طاحت عليها العقالة و مازال مادارت حتى مشكل، قالي صراع يعني اخلاص لي كسرتهم؟ قتلو ما نعرفهاش عيطلها كي جات قالي هادي هي؟ هزيت راسي تع إيه، قالها ما كفاتنيش مشاكل اختك ما ماتت حتى ركبتلي لاطونسيو جاية دوك انت تكملي على قلبي و لا وش؟ علاش درتي هد الشي للطفلة؟ قالتلو و الله يا أبو حرب غاضوني كي تكسرو ما فقتش لروحي كيفاش عيطت هكداك و الله ما قصدت و دارت ليا تتمسكن قالتلي اسمحلي ما قصدتش حنونة سينو أنا وش ما بيني و بينك أنت برك فهمتيني بالغلاط.
رفع صراع يدو للسما و قال يااااااارب اعطيني القوة.
قالتلي هيام نوضي بنتي نةضي حتى الحليف رجع لعبة قالتلها اخلاص يا هيام راكي تكدبي فيا؟ قالتها الحاجة لالا بنتي حاشا ماشي قصدها عليك ما تزعفيش
سكتت عليهم هيام و عاونتني وقفت منبعد دارتلي الدوا و بونداتلي رجلي و عيطت لحلا قالتلها فرشيلها فالقاعة قالتلها عمتي ماشي اوبليجي علينا باش نخدموها، هي قتلت عمي و حنا نرحبو بيها هداك ما خص قالتلها وش بيك قلتلك فراشي فرشي قالتلها اسمحيلي بصح انا ما نخدمش عيباد كيما هادي و خرجت.
زادت دخلت الحاجة قالتلها شوفي هيام شدي لسانك يا بنتي لي فينا يكفينا، قالتلها آاااه وي صار هكدا دوك رجع لساني طويل كي هدرت الحق، بصح أنا لي غالطة تروح لداري خيرلي و لبست حجابها و راحت و يماها راحت موراها و قعد طفل صغير يكون في عمرو وحد 6 ولا 7 سنين، قالي تحبي نفرشلك؟ قتلو لالا دوك نروح للمخزن عمو ما يقبلش نقعد هنا قالي ما تخميش دوك أنا نهدر مع بابا كامل يخافو منو قتلو شكون فيهم باباك قالي صراع قتلو وسمك؟ قالي حرب قتلو حرب تقدر تعاوني باش نروح للمخزن، قالي ايه عادي أصلا انا ندير الحديد و عندي القوة تبسمت معاه، عاوني كي لحقنا للمخزن تكسلت، قالي علاش راكي تبكي راهو يوجعك الدم؟ قتلو إيه، حضن راسي مسكين و انا رجعت نشهق بالبكا كان خاصني واحد يحن عليا وهو يقولي ما تخافيش انا نحامي عليك تبسمت معاه مدلي صبعو الصغير و قالي نوليو صحاب مديتله صبعي و قتلو إيه، قالي اصبري نروح نجيب تلفون بابا و نلعبو بيه أنا و ياك قتلو لالا حرب ما جيبوش دوك يبدا يعيط قالي ما تخافيش بابا ما يعيطش عليا قتلو معليش ماكالاه راني نعسانة و حايبة نرقد قالي خلاص ارقدي و انا نعسك ما تخافيش و قعد يمسحلي على شعري حتى غفيت.
حسيت بهفة عمبالي فأر قفزت نضت مخلوعة صبت صراع واقف قال لوليدو حرب وليدي راك راقد؟ نوض لفراشك، كنت خايفة منو فينالمو ما هدر والو رفد وليدو و تنهد و راح و أنا رجعت كملت رقادي ما فقتش حتى حسيت بقرصة في ظهري نضت مخلوعة صبت أم سعد مورايا قالتلي اسمعيني مليح هد الدار كامل في يدي أنا هي الآمر الناهي هنا و انت راكي تحت رحمتي لوكان نحب نكرهلك معيشتك واحد ما يقدر يسلك مني و إدا راكي دايرا في بالك بلي هداك صراع لي حاسب روحو رايح يحميك مني راكي غالطة في حساباتك. قلتلها بصح خالتي والله ما درت حاجة، قاتلي بلعي يا أخت الارهابي اششت هد التمسكين جوزيه على وحدوخر ماشي عليا جيت نهدر شفت صراع واقف عند الباب و مربع يديه و يسمع هي حست دارت و وقفت قالها عاودي قولي وش كنتي تهدري أم سعد عمبالك كي راني نخرج نخدم ما علباليش وش راكي ديري؟ ماشي كي راني ساكت معنتها ما علاباليش وش راهو صاير بصح و الله و توصلي لعايلتي و لا يما غير طلاقك من بابا في هد العمر رايح يكون على يدي، سكتت نسفت و راحت، منبعد قالي نوضي ما تبقايش هنا الدنيا باردة تمرضي و تحصلي في راسي. نضت و قلتلو وين نروح؟ قالي ادخلي لشومبرة يما و ارقدي عندها بديت نمشي منبعد حبست و هو طفى الضو تع المخزن و دار ليا قالي امشي علاش راكي واقفة قتلو نسيت وين جاية الشومبرة تع الحاجة قالي تبعيني، كي دخلنا كانت راقدة غير تفتحت الباب قالت شكون؟ شعل الضو و قالها يما خليها ترقد هنا المخزن بارد منبعد قال لبنتو حلا قالتلو انعم بابا قالها نونضي ارفدي خوك و اطلعوا ارقدو لفوق قالتلو علاش؟ قالها اطلقي هداك التلفون لي نهار كامل و انت لاصقة فيه و اطلعوا يا الله ما نعاودش الهدرة، جات ترفد فراشها قالها خليه هي ترقد عليه قالتلو بصح هدا فراشي، تعنكر فيها سكتت و راحت، و انت واقفة و ساندة على الحايط من السطر تع رجليا، منبعد قالها يما عينك عليها أم سعد دارتها في راسها و ما نحيش حايب نوصل ندير حاجة و نندم عليها، منبعد دار ليا قالي و انت علاش راكي واقفة تشوفي فيا ارقدي، سكت و دخلت في الفراش و تكسلت.
دار ليماه قالها راني رايح ندي حرب يرقد عندي قالتلو وعلاش يا وليدي كل دقيقة رافد الطفل لجيهة هدا وين رقد، قالها تصبحي بخير قالتلو و أنت من أهل الخير خرج و هي قالتلي كيفاش راكي دوك يا بنتي؟ هزيت راسي قالتلي ارقدي و ما تعمريش راسك و ما تزعفيش من ابو حرب قلبو مليح برك يدير هكداك ياك شفتيه عشية كاملة و هو يقول ترقد فالمخزن و أنا ما حبيتش نهدر معاه لخطر علبالي لوكان قتلو جيبها ترقد عندي هداك وين يزيد يخشن راسو خليتو لرايو علبالي عندو ضمير و رايح يجيبك لعندي وليدي و نعرفو ما يرقدش و هو علبالو بلي راهو ظالم كاش واحد.
هزيت راسي و رقدت كان كلشي يوجع فيا من الضرب تع يحي و زيد تع أم سعد و رجلي خلي على الجراح لي كانت في قلبي.
يتبع.....