مراهقة والاربعيني بلهجة جزائرية

35

#المراهقة و الأربعيني:

#الجزء35:

مور ما خرج صراع من الشومبرة و حبط يجري لحقتو لتحت صبت الحاج و نائل معاه و هو يهدر معاهم و يوصي فالحاج وش يهدر وش ما يهدرش، داو علي وليد هيام معاهم و راحو لدار الطفل لضربو.
قعدت مع هيام أنا و الحاجة نواسيو فيها و هي تبكي و نور كانت توكل في ولادها و أم سعد تبيكي بالهدرة و ترمي فالكلام خليتها و طلعت للشومبرة خملتها دوشت بدلت و ماكييت قلت علبالي دوك يجي صراع يجي مقلق بالاك كي يصيبني موجدتلو روحي يتهدن.
سمعتهم كي رجعوا بصح كي كانوا عمومهم و ولادهم معاهم ما قدرتش نقعد لتحت سنيتهم حتى خرجو حبطت خملت الصالو، سمعت صراع كي قال لهيام باتي الليلة هنا ما تروحيش لدارك ما فيهمش لامان و نستناو منهم كلشي.
دخلت للكوزينة شويا هكدا دخل صراع باش يشرب الما سقسيتو قتلو وش درتو فيها؟ قالي وش درنا قعدنا معاهم و طلبنا مهلة تع سمانة بيدما نتفاهمو ما بيناتنا و نعاودو نديرو جماعة و لوكان يدنى واحد فيهم لواحد فينا في هاد المدة توصل للسلاح ما بيناتنا.
شرب الما و قالي راني عيان ميت و راسي راح يطرطق، رديت بالي لحوايجو كانو القفالي مفتوحين رفعت حاجبي و قتلو واش يا سي خونا خرجت منا لاباس بيك و دوك جايني بحوايجك مفتوحين نحيتهم لتم ولا وشنو؟ قالي و علاش ما حكيتلكش؟! ياك شفت وحد المرا لتم وش نقولك كور و ديكور و أنا كنت عيان ميت قلتلها بسسسس معليش نديرونجيك شويا جي لعندي و الباقي راكي تعرفيه بلا ما نقولو الدزاير فيها الباطيمات و السماء زرقاء و العصافير تزقزق و أنا كلاطيت بالضحك ههههههه قتلو ااااه يا بونسيوات... حنا هكداك حتى سمعنا الحاج يعيطلو صرااااااع قالو انعم بابا راني جااااي و دار ليا قالي منهار جيت لهاد الدنيا و هوما متالبيني راني عياااااااان... ضحكت عليه بصح غاضني صح فهداك النهار كامل جابوها موراه ما صابش كامل فرصة باش يرتاح.
طلعت للشومبرة سنيتو بصح طول فاتت نص ساعة و ماجاش، خرجت و جيت حابطة سمعتو مازالو يهدر هو و سعد وليت رجعت سمعت الصوت تحت التاقة ديالي فتحتها كانت نور و نائل يداوسو كي سمعت اسمي قعدت نتصنت قالتلو شوف ليليان دير وش دير راجلها واقف معاها و يكوفري عليها لالا و يزيد يوقف فوسط الدار و يبوسها و أنت ماشي سامع بيا كامل ما تقول هادي مرتي ما تحس بيا علاش؟ و هو يعيط عليها كيفاش تكومباريه مع خوه.
انا اون بلان تقرعيج حتى عيط صراع مورايا قالي وش راكي ديري؟ قفزت قتلو اششششت فضحتني قالي اااا ويييي و تزيدي تقوليلي اششت!! دناي تشوف عليمن راكي طلي، قرب من التاقة سمعهم يداوسو دار ليا مشوكي قالي ليلياااان راكي تتصنتي عليهم؟! ما تحشميش نتيا؟ قتلو لالا مقصدتش نتصنت بصح كي سمعت اسمي في كلامهم نتبهت قالي هادي ماشي سبة عيب عليك و آخرتها معاك على هاد الطبيعة كيفاش؟ قتلو بصح صراع سمعتها تقولو..... قالي اشششت و فوقها جيبيلي الهدرة عيب ديريها في روحك لوكان جي تشكيلي من واحد فيهم و هو يجي يتصنت علينا عند باب الشومبرة تقبليها؟ قتلو لالا قالي يمال ترباي و نحي عليا هد الطبيعة و دار شعل التلفزيون و قعد ساكت و مدور وجهو عليا قربت ليه قتلو زعفت؟ قالي منواش؟ قتلو كي تصنت عليهم قالي لالا راني نخمم في حكاية علي تنهد و فتحلي يدو حطيت راسي عليها قتلو اععععع صراع وشنو هدا و غلقت نيفي، قعد يشم فروحو قالي وشنو؟ قتلو دار قلبي من الريحة ديالك راح نتقيا قالي وشبيك راني نورمال قتلو بدلت الريحة ديالك قالي لالا نفسها لي موالف نديرها و تحبيها قتلو يمال علاش ولات هكدا عيفتني قالي و انت عيفتيني فروحي نوض ندوش خيرلي، راح دوش و جا رقد.
غدوا منداك نضت قبلو نوضتو و حبطت للكوزينة وجدتلو الفطور، كنت واقفة حتى حسيت الدنيا دارت بيا، شديت فالبوطاجي و غمضت عينيا حتى راحتلي الدوخة، حسيت بصراع حضني ملور و قالي وشبيك عمري؟ قتلو ما نعرف دخت قالي بالاك عييتي ارجعي ترقدي تريحي قتلو نقعد نفطر معاك، شرب لاتاي بلخف و قالي راني مزروب يلزمني نخرج باسني في جبهتي، غمضت عينيا و حضنتو قتلو ترجعلي سالم غانم قالي ان شاء الله و رفعلي وجهي باسني فخدي و قالي تهلاي فروحك و ريحي ما تعبيش روحك و لي يهدر معاك عيطيلي انا نفرجك فيه هكدا؟ درتلو براسي إيه عنقتو و قعدت نشم ريحتو فرقبتو ما كنتش قادرة نطلقو  بصح الوقت يلزم يلحق على الخدمة قالي السلام عليكم و راح و أنا قعدت نتبع فيه بعينيا و ندعيلو فقلبي.
فرزت ماعن الفطور و طلعت للشومبرة قعدت مع التلفون حتى غفيت فطنت على  لابال ديالو جوايه ال10 ونص يسقسي عليا.
قعد 3 أيام ميسيو بصح كان يعيطلي دايمن يسقسي عليا و فالليل نقعدو نحكيو فالتلفون حتى ننعسو.
فالدار ما كاش لي هدر معايا و لا زاد معايا فالكلام حتى أم سعد كانت تيفيتيني، مرات ترمي الكلام على الشغل بصح ما نبرونشيلهاش.
النهار الرابع على ال8 كنت راقدة الصباح حتى حسيت بيه كي حضني وحط راسو على راسي نضت نجري درت ليه حضنتو قتلو رجعت حبيبي؟ قالي لالا مازالني لتم ضحكت هههه قتلو توحشتك.
كان باين عليه التعب قالي ليليان أنا نرقد شويا راني مدوخ نبهي نور تشد ولادها و تسكتهم و قوليلهم ما يديروش الحس، بستو و قتلو معليه ارتاح و حبطت، صبت الحاجة و أم سعد و نور يفطرو صبحت عليهم و درت لنور قلتلها نور اختي صراع راهو راقد جا عيان قالك شدي الدراري ما تخليهمش يديرو الحس نطقت الحاجة قالتلي علاش صراع جا؟! قلتلها إيه راهو راقد، قالتلي عقداش جا ما شفتو ما جاز عليا قالتلها أم سعد و أنت وش يدير بيك دوك؟ طلع لي تفيدو و كي نقولكم الراجل تبدل ما تامنونيش حتى يماه و نساها، قلت للحاجة عندو ساعة ملي جا بالاك جاز عليك و صابك راقدة و ما حبش ينوضك و الله كي جا عيان، سكتت ما قالت والو، و درت لنور قلتلها تعيشي ردي بالك على الدراري يطلعو لفوق راهو راقد قالتي وش حبيتيني نديرلهم نربطهم؟ دراري و يلعبو فالدار و زيد راني مشغولة قلتلها انا علمتك و انت دبري راسك ياك تعرفيه قالها الحاج شدي ولادك بنتي ما خصناش الزڨا فالدار.
حبط نائل قالتلو حبيت نروح لدارنا لوكان نقعد هنا يعدمولي الدراري، استغربنا تصرفها لخطر موالفة عاقلة، قالها وجدي روحك نوصلك و مع العصر نجيبك.
فطرت خملت الدار و وقفت مع البوطاجي شعلت فالتلفون غنية فيروز  (يا طير يا طاير ع اطراف الدني) و قعدت نغسل فالماعن و نخمم في صراع كنت متوحشاتو قلت نكمل و نطلع نتوسد حضنو و نشم ريحتو وش نلت من الشغل و لا خلي راهو عيان مسكين،أنا هكداك عقلي يدي و يجيب حتى دخل صراع قالي اييي هييي ليوم صبحنا على فيروز،درت ليه و ضحكت ههههه قتلو عمرك طويل نضت؟ قالي لالا مازالني راقد لفوق ضحكت هههه قالي بصح ما قلتيليش علاش عمري طويلة؟ قتلو كنت نخمم فيك قلت متوحشاتو نطلع ليه بصح راك تشوف صبحت مربوطة مع الشغل نور راحت لدارهم، باس جبهتي قتلو حقا الحاجة تقلقت كي ما سلمتش عليها الصباح و أم سعد قاعدة تبيكي فيها قالتلها نساك و التهى بمرتو و هي غاضها الحال قالي و الله العظيم غير جزت عليها هي لولانية و صبتها راقدة ما حبيتش نوضها جبدت الباب و طلعت لفوق و دوك غير حبطت سلمت عليها و بست راسها و قعدت معاها شويا باش جيت ليك، قتلو مليح قالي وش ما راكيش معولة تفطريني  واقيل؟ قتلو من عيوني، قالي غير لخير وش حكاية فيروز مع الصباح؟ قتلو ماما كانت تحب تسمعلها و كل صباح تشعلها، و انا كي نسمعها نحس بلامان تقول ماما راهي معايا .. صراع صح سقسيت عليها و الله غير النار راهي شاعلة في قلبي عليها لوقتاش نبقى هكدا ما نعرف عليها والو؟ قالي وصيت عليها بزاف ناس غير كاش ما يبان خبر عليها يعيطولي بصح انت دوك اقعديلي فهاد الجو عجبتيني و أنت تغني، ضحكت و بديت نغني معاها و هو مقابلني عاجبو الحال و يضحك، دخلت أم سعد رافدة نيفها جبدت الطنيجرة و تقول لالا ليوم تغدينا.. درتها فالثقيل نغني و نغسل، دخل الحاج قال الناس تصبح مشعلة قرآن و لا دعاء و نتوما صبحتولنا على الشر مع هد الغنا و دار لصراع قالو وانت ما تحكمش فيها دوك طالقها على هواها، ما ريبوندالوش كمل ياكل و يتبسم ماشي سامع بحتى واحد قالو الحاج راني نشوف راك راضي و الله لا ربحت علينا، خبط الباب و خرج و أنا ما عجبنيش كلامو رفدت يدي تع روح ترنك قالي صراع لالا لوكان نضتي عطيتيه بكف كي كان واقف خير.
جات الغنية تع (راجعين يا هوى) قتلو صراع وش تقصد بزهرة المدائن قالي فلسطين المحتلة قتلو علاش فلسطين محتلة؟ قالي هدا وين علبالك؟! قتلو لالا بصح عندهم فوق القرن و هوما عايشين كيف كيف نوغمالمو خلاص قالي جامي وشبيك فلسطين من حقنا و اليهود داخلينها بالسيف و الشي لي داروه فيهم من هداك الوقت لدوك ما يقبلو لا ربي لا عبدو قتلو لوكان هربوا و خلاص قالي يهربوا من بلادهم و يخليو أرضهم؟!! طفيت التلفون قتلو و وين يسكنو دارنا علاش كي دخلوها الإرهاب لي هرب قالو عليه شريف و لي قعد قالو عليه إرهابي؟ قالي لتم كاين بزاف لي استقبلوا الارهاب و ساندوهم قتلو و وش ذنب لي ما تعاونوش معاهم؟ الناس تقتلت و انظلمت و تشردت و لي ما يقبلش يخدم معاهم يعذبوه، علاش لي يفضل الموت على باش يتشرد برا تقولو عليه إرهابي ياك فالقرآن يقول ربي سبحانو و لا تزر وازرة وزر أخرى .. قالي هادي هي راح الصالح فالطالح و المسلم فالمجرم، السياسة واعرة و الشعب لي راهو يخلص قتلو و الحل كيفاش؟ باعوها و ضيعونا و فرقونا على مالينا و بكيت ناض جبدني لحضنو و زيرني قالي خلاص وشبيك ليوم قلبك راهو رهيف هكدا قتلو توحشت ماما عندي 8 شهور ما شفتها ما سمعت صوتها قالي و الله ما كاش واحد نعرفو و ما وصيتوش عليها حتى خالك و عيطتلو قتلو كاش ما يبان عليها عيطلي ادعيلها تكون بخير ما تفاوليش عليها ماشي مليح،  بقيت حاطة راسي و نبكي قالي خلاص عمري حبسي البكا.. نوضي نديك لعند هيام تفاجي على روحك، حنا هكداك و هي دخلت علينا أم سعد قالت يخي فيلم يخي عندك ساعة و أنت غير الماعن و الكيسان و خرجت، خزر فيا صراع و ضحك قالي يلا جابها ربي ازدمي عليها بردي قلبك فيها و أنا نشدلك الباب، مسحت دموعي و ضحكت قتلو وش يسلكنا ههههه قالي ما تخافيش نهربو ياك انت شاطرة فالهربة ضحكت هههههه، قالي ربي يدوم ضحكتك و الله ما نحب نشوف دموعك، عاودت رجعت أم سعد قالتي و دوك كيفاش ما نتغداوش ليوم؟ اجبدي اللحم و شمخي الروز خفي يلا قالها ليوم مرتي راهي روبو عيات ديرو غداكم، يغزل فيها مشاني قدامو و قالي كملي باش نديك عند هيام قاتلو مخلوعة وشنو؟ هيام؟ و الغدا أبو حرب؟! قالها دوك نعيط للحاج يجيبلكم ماكلة واجدة ملبرا.. حوت جاج لي حبيتو قالتلو علاش خصونا النسا فالدار باش نشريو ملبرا؟ دارها فالثقيل و قالي يلا حبيبتي بدلي حوايجك بلخف نوصلك و نرجع نصلي و نرقد راني عيان و خلاها ترمرم فالكوزينة.
دخل للحاجة قالها يما راني رايح لهيام ندي ليليان جي معانا؟ قالتلو لالا وليدي مانيش قادرة قالها يمال قوليلي وش راكي متشهية نجيبلك الغدا فطريقي.
خليتهم يحكيو طلعت لبست كي جيت حابطة شفتو جاز لشومبرة حلا قعد معاها يحكي معاها باس راسها و قالها ما تبقايش هكدا غالقة على روحك بنتي قوليلي وش حبيتي و ما تقعديش هكدا نديك لدار جدك؟ قالتلو ياريت قالها يمال نوضي بدلي بلخف باش نوصلك في طريقي، جا خارج صابني نشوف فيهم تبسمتلو قتلو ولات تغيضني قالي تتحسن إن شاء الله.
حبطنا جينا خارجين قالو الحاج ما تخرجوش نسيت الحكاية تع علي مازال ما فرات و الارهاب غدارين ما عندهمش كلمة قالو بابا الموت وحدة كي تكتب حتى و تكون في فراشك.
جينا طالعين فالطونوبيل نطقت حلا قالتلي أنا لي نطلع مع بابا ملقدام ولي للور تشوفي، خزرت فيه تبسم و دارلي براسو تع اطلعي لور مع حرب، كي وصلهم و حبطو قالي ارواحي اطلعي معايا ملقدام.
ديمارا و قالي إيه كيفاش راكي دوك؟ قتلو صراع راني حاسة بلي نور رجعت تغير مني و تكومباري نائل بيك ولات بزاف تتقلق مني، قالي ما تزعفيش منها يا حليلهم في زوج، نائل سيفو عليه مرت خوه صعيبة عليه باش يحبها و يعاملها كزوجة و هي تان مظلومة تحتاج راجل ليها ماشي غير أب لولادها، مع اللول كانوا رايحين يزوجوها ليا و ما قبلتش جاتني ثقيلة باش ندي مرت خويا و ندنى ليها و باش نهجرها و نظلمها تان حرام عليا، و فضلت نتزوج بيك شهور و نطلقك و نتهنى من سيرة الزواج لي كانوا قاتليني بيها قتلو يمال طلقني قالي أنا كي شفتك طلقت روحي بالثلاث ضحكت ههههه.
وصلنا لدار هيام قالي سلميلي عليها و كي نجي لعشية نديك ندخل نشوفها نروح نرقد راني عيان دوك.
انا حبطت و هو راح، رحبت بيا هيام صبتها مع الميناج تع العيد حبطت كامل الكوزينة تغسل فيها، قعدت نعاون فيها و نحكيو منبعد جبدتها على المسيد و الدوزان تع الدخلة تفكرت قرايتي قلت نهدر مع صراع مدامو يحبني و ما يردلي حتى طلب بالاك يخليني نكمل قرايتي.
لحقت ال 13 كملنا و رجعنا كل حاجة لبلاصتها، سمعنا الدقديق فالباب فتح علي صابو صراع جايب القضيان من كلشي و قالو دخلو و عيط لسارة قالها اديني للصالدوبا نغسل راسي راني نغلي، شافتو هيام خبرتيني قالتلي تبهديلة فاتت الوحدة و مازال ما طيبت والو للغدا و ما نلحقش باش نطيب، سمعها رفع صوتو قالها جبت الحوت مشوي علاش حتى طيبي و القضيان جبتهولك لدارك باش ما تحتاجي والو ما تخرجيش حتى جوز حكاية علي على خير قالتلو ربي يحفظك يا خويا و يرزقك من أوسع أبوابو و الله بلا بيك ما نعرف كيفاش كانت رايحة تكون حالتنا، نشف و باس راسها قتلو ماشي قلت راك عيان علاش جيت؟ قالي ما جانيش النعاس قلت نقضي لأم علي قالتلو هيام ما جابكش القضيان برك في هاد الڨوايل قول قلبك خليتو هنا ضحك هههههن قالها فقتيلي.. و الله ما قدرت نرقد بلا بيها توحشتها عندي 4 أيام ما شفتهاش، قالتلو روحو للشومبرة ريحوا نكمل نسقي الغدا و نعيطلكم قالها بصح يرحم والديك شدي عليا هديك البونديا تع جنات ضحكت هههههه قالتلو ما تخافش دوك نشدها عندي.
دخلنا للشومبرة ضربتو قتلو وشبيك وش خداك و الله غير حشمتني، قالي و هادي فيها حشمة؟ أنا عطشان شايط جد جدي و انت تحكيلي على الحشمة ارواحي هنايا تشوفي حكمني يبوس بلهفة تقول عندو عام ما شافني قتلو تعيش بلا آثار جانبية و الله غير عيب قدام هيام و ولادها، بعد عليا توسد يدي و رقد في حضني بلخف، عيطت هيام على الغدا نوضتو ما حبش خليتو و رحت ناكل.
كي لحق العصر رجعنا للدار صبت نور جات غير شافتني قالتلي واش غرتي غير شفتيني رحت لدارنا نص نهار خرجتي قلتلها لالا ماشي هكدا صراع حب يخرجني نبدل الجو حسيتها ما عجبهاش الحال، طلعت للشومبرة صراع بدل و خرج مع صحابو و انا كملت شغلي و رجعت لشومبرتي و قعدت نخمم كيفاش نجبد معاه السوجي تع القرايا، دخل فالليل تبسمتلو قتلو أهلا حبيبي قرب ليا حكمني من حناكي و باسني من خدي قالي أهلا عمري، بدا ينحي في حوايجو و يهدر قالي كيفاش راكي دوك قتلو الحمد لله مليحة قالي وش درتي ليوم وش ما درتيش قتلو عادي كيما كل يوم قالي علبالي راهو ضايق خاطرك اعطيني شويا وقت برك نكمل وحد الشغالات و وعد مني نطلعو للعاصمة نقعدو يمات تنحي على خاطرك قتلو ربي يخليك ليا حبيبي.
هو دخل يدوش و أنا نخمم كيفاش نجبد معاه السوجي، كمل راح شعل الفيوزات طفى الضو و جا ساماني فالفراش قالي توحشتك و أنا غايسة قرب بدا يبوس في رقبتي و مندمج و أنا غايسة و نخمم حتى نتبهتلو بلي حبس و قعد يخزر فيا قالي ليليان راني نبوس في فريجيدار و لا وشنو؟ غايسة هكدا و أنت ما بين يديا ياسيدي غير غمضي عينيك و حسيني بلي راكي معايا قتلو لالا ماشي هكداك بصح راني نخمم في حاجة قالي نهار كامل و هو مخك حابس و كي جيتي لعندي بدا يخدم يخي زهر عندي يخي و بعد عليا، ناض شعل التلفزيون قتلو وشبيك؟ قالي ما بيني والو، شعل ڨارو قعد يتكيف و يتفرج و ساكت قتلو زعفت؟ قالي علاش نزعف هدا زهري كاش واحد يزعف على زهرو؟ قلت في قلبي يا حي دوك زعف لوكان نفتح معاه السوجي و هو هكدا سور ما يقبلش، خزر فيا بنص عين قالي اهدري برك راني نسمع، تبسمت فاقلي بلي حاجة راهي دور في راسي، قربت ليه نحيتلو الڨارو من يدو طفيتو، حط يدو على ظهري و قالي قوليلي وش حبيتي خير؟ لصقت فيه قتلو حبيبي نطلب منك حاجة و تقبل؟ قالي وشنو؟ قتلو واعدني قبل بلي ما ترفضش قالي ما نقدرش نواعدك بلاما نعرف احكي راني نسمع منبعد نشوف قتلو ليوم كي كنت عند هيام جابو سيرة المسيد و القراية تفكرت كي كنت نقرا و ضغطو عليا باش نحبس و نتزوج و أنا متعلقة بقرايتي بزاف و كنت متمنية نوصل الجامعة و كي صرات حكاية عابد جيت هنا و راحلي العام قالي و المطلوب؟ قتلو حبيبي تعيش خليني نرجع للمسيد نكمل و الله ما نخليك تحتاج والو و لي تحبها نديرهالك و....... قاطعني قالي لالا انساي هاد الحكاية قتلو بصح علاش فهمني قالي وش حبيتيني نفهمك قتلك لالا يعني لالا مام حلا ياك ماهيش تقرا قتلو بصح ماشي كيف كيف حلا هي لي حبت تحبس و قالولي ماكانتش تقرا مليح بصح انا نحب قرايتي و كنت شاطرة و متمنية نكمل قالي خلاص حبيبتي انساي الحكاية ماكاش لي داها من كلشي فهاد الدنيا و ماشي كامل وش نتمناوه نوصلولو قتلو بصح.... قالي قتلك خلاص نحيها من راسك قتلو بصح رانا نتناقشو و أنا من حقي نكمل..... قالي وشمن حق اشطاري فدارك منبعد حوسيلي على القراية، انت ما راكي مسلكتها لا معايا لا مع العائلة لا حتى مع روحك اقعدي و سكتي، قتلو ماشي موالف تقولي كي ما تفهميش حاجة سقسيني و دوك لي نهدرها ما تسمعهاش و تسكتني، قالي دقيقة دقيقة خليني نسمع و لعبها يسمع الأخبار و مبرونشي حتى لتم و هو غير باش يسكتني، درت عليه و قعدت نبكي قال اوووووو دوك ديرلي القرايا سبة و تغضب كي العادة.. خلاص ليليان بركاينا، قتلو انت ظالم.. أنا وش ذنبي باش جبتوني من عند ماليا كي الأسيرة و درتوني خدامة، علاش أنا ماشي طفلة و عندي احلام و امنيات؟ قالي فواش راني مقصر معاك؟ كاش ما طلبتي مني و رجعتك؟ بصح القراية لالا و زيد كي راكي قالبتهالي مناحة ما راكيش تشوفي في حالة البلاد مع الارهاب، قادرين يوصلو لجيهتنا في أي وقت قتلو يتسمى ادا ما لحقوش لهنا تخليني نقرا وش دخلهم قولي انت رافض الفكرة من أساسها و راك تصيب فالسبايب، قالي كي تلحق الدخلة تع المسيد و يعملها ربي تاويل انت من دوك بديهالي بالدواس قتلو يعني لوكان تلحق الدخلة و ما يلحقوش الارهاب لهنا تقبل؟ قالي الله كريم منا لهداك الوقت يفرج ربي حبسي علينا هد المناحة برك قتلو كداب أنت غير باش تسكتني قالي شكون لي كداب؟! انت صح ما تعرفيش تهدري قادري روحك خير ما نكسرلك راسك قليلة تربية و ناض خرج و خبط الباب موراه و أنا قعدت نبكي في فراشي.
لبست غوب دو شومبغ فوق حوايجي و خرجت نشوف صراع وين راح، جيت نحبط سمعت صوت ولاد عمو فالصالو الضحك و الڨصرة
قلت في قلبي يااااا صار هكداااا حبط من عندي باش ما يناقشنيش و راح يڨصر و يضحك، علبالي دوك يستناني حتى نتهدن و نسكت منبعد يطلع لعندي يتغزل و يبلعطني بزوج كلمات بصح و الله ما صرات لوكان ما نخرجلوش عمرو مانيش أنا.
دخلت للشومبرة لبست جبة و مسحت الماكياج و طميت شعري طوماطيشة، و نحيت الفيوزات من التريسيتي، جبدت غطا وحدوخر باش ما نتغطاش معاه، شويا و دخل صاب الدنيا مقلوبة حتى الحوايج لي كنت لابستهم و رميتهم فالقاعة، شاف فيا قالي هدا كامل على جال القراية، حتى أنا ما درتيلي حتى حاجة أنت صح تحبي غير روحك.. يهمك توصلي غير لوش راكي حايبا ظهرتي تع صلاحك..
دخل في فراشو قتلو بعقلك.. تكسل غطا عينيه بيدو و رقد ما جاش منبا حاولني شحال حاسب روحو.
غدوا منداك فطنت صبتو يلبس قالي واش بردو جنونك و لا مازال؟ دورت وجهي عليه قالي خلاص ليليان بركاينا،ما وجبتوش، قالي احبطي وجديلي الفطور غطيت راسي و سكت عليه، قال معليش و حبط حتى سمعت صوت طونوبيلتو خرج بلا فطور.
حبطت كي العادة للشغل و كي لحق وقت الضحى جا خبر وليد عمتهم انقتل راحو يتجاراو الحاج و الحاجة و أم سعد.
قعدت غير أنا و نور كنت نخمل في شومبرة الحاجة و نخمم حتى دخلت نور قعدت فوق البونك و قالت ياربي وشنو هاد المعيشة و الله غير كرهتهم مانيش قادرة نزيد نقعد معاهم قلتلها لوكان تشوفي سامعك تقول طليتي على قلبي قالتلي نائل يحوس عليا غير باش نخدم، نلبس و نماكيي و نسڨم روحي نستناه منبعد كي يدخل و يشوفني يعاود يحبط لتحت و يقعد مع تلفونو قلتلها اووووو منك بالصح مقلقة كي ما يجيش ليك فالليل؟!! انا راني مشتاقة نرقد و نرتاح لي عندي ما يشبعش و يزيد يدير جو رومانسي ملفوق الشموع و حالتو حالة مهوووس و لوكان ندور عليه وجهي ليلة يزعف و يغيضو الحال، قالتلي هادي لي قالك ربي يعطي السواك لمعوجة الحناك احمدي ربي على واش عطاك، قلتلها حامداتو ليل و نهار بصح علواش؟ على صراع؟ تخمامو غير فالفراش و عندو عقلية هماج حابسني هنا فالدار، قالتلي أنت صح حابسة ما شفتيهش كيفاش مكوفري عليك واحد ما يقدر يهدر معاك و لا يتعبك فالشغل و دوك شرالك تراب 500 ميترا اوكاري و راهو يبنيلك دار فيه، ما عندوش سمانة ملي خرجك تعشيتو برا و غير لبارح جا عيان ملخدمة و هكداك و داك عند هيام تفاجي على خاطرك وش تحوسي كثر من هاد الشي، قلتلها حبيت حريتي تخنقت عندو كي كنت في دارنا ماشي هكدا كنت دايمن نروح نقرا و نشوف الناس و فالعطلة تديني ماما لدار خالي بصح هنا نسيت روحي بلي انسان بالسيف باش نخرجو قاعدة غير وش يتغدا صراع وش يحب صراع و الرقاد و الدوش كرهت، قالتلي ياودي احمدي ربي الدنيا ماشي غير خرجة، الراجل يحبك و رافدك شكون عندك من غيرو، مام انا ما تقوليش عندي ماليا من نهار مات راجلي ماكاش واحد من خاوتي جبد الف فرنك و عطاهالي كانو يبعثولي المصروف منا، و كي قالو باش يخطبوني لنائل خويا بلخف قبل قالي ايه تزوجي خير شكون بيك انت و ولادك، وش جابرني نصبر على نائل غير عقلية دارنا، نتمنى نص تع صراع هدا لي ماراهوش عاجبك و تقولي عليه يحوس غير على الفراش و الدوش.
هي تهدر و أنا نشوف فيها هادي وشبيها أنا تخمامي وين و هي وين، كملت شغلي و طلعت.
مع العصر جا صراع وجدتلو حوايجو بصح ما نهدر معاه ما يهدر معايا قعد مع نائل لتحت منبعد راحو للجنازة.
تعاونت انا و نور كي لحق المغرب طلعت للشومبرة قاعدة نخمم و غايسة دخل صراع ما نتبهتلوش حتى سمعتو خبط السبحة لي كانت فيدو فوق لاكوافوز قتلو وش بيك قفزتني قالي وش زدتي درتي؟ قتلو وشبيك؟ عيط عليا قالي أنا وش فهمتك من قبلللللل وش هدرت معااااااك ماشي معولة تسڨمي روووووحك قتلو فهمني وش كاين؟
وقفت و بعدت عليه كي شفتو مقلق، قرب ليا و حكمني من ودني قالي وش حكيتي لنور؟ قتلو ما حكيتلها والو مانيش شافية لخطر نحكيو بزاف قالي أنا على كبري يحكمني خويا يقولي احكم في مرتك ما تزيدش تغير مرتي بالشي لي ديرهولها؟!! قتلو بصح أنا و الله ما غيرتها قالي شحال من مرة وصيتك خصوصياتنا تبقى فالشومبرة ما تخرجش منا، وصيتك و لا لالااااااا انطقي.. قتلو أنا ما هدرتش هي لي شكات من راجلها قالت بلي بارد و أنا.... قالي و أنتيا رجعتيني حيوان قدامها و ما نشبعش من الفراش.....يا المربية هكداااااا؟؟ أنا محترمك و مقدرك و ما نخلي حتى واحد يدنى ليك نقول نديرلها هيبة و قيمة فهاد الدار باش يديرولها ألف حساب بعدما جات مذلولة لهنا تروحي انت تذليني و تهينيني قدام ماليا و تخرجي اسراري معاك ليهم، وش نديرلك دوك ما فاد معاك لا الكلام لا الضرب وش يفيد معاك انتيا وش ندييييييرلك..
كي كان قريب مني دار قلبي من الريحة ديالو لي كنت نموت عليها طبعتو قتلو وخرررر دار قلبي منك عفتك وخررر ، عيط عليا قالي شكون هدا لي يوخرررر جبد عليا بكف و طبعني للبونك قالي دوك تشوفي هدا لي دار قلبك منو و عفتيه كيفاش داير، بديت نضرب و نطبع فيه و نعيط وخررررر... حط يدو على فمي جاني القيا حسيت عمري رايحة تخرج تخنقت.
جميع حاجة نكرهها دارهالي لوكان ضربني كان ارحم، كي جا نايض قالي شوفي فيا مليح ماشي أنا لي تعيفيه و يدور قلبك منو، و كلما جي تزيدي معايا فالكلام تفكري وش درتلك دوك ليوم خليتها غير لفوق لفوق المرة الجاية ندير ما كثر فهمتي؟ طبعني دا الفوطة و راح يدوش.
بقيت نبكي جيت نسڨم روحي ما قدرتش، دار قلبي حبيت نتقيا و ما قدرتش، مديت راسي من فوق البونك فوادي رديتو حاجة ما قعدت في كرشي، جبدت كاس ما من فوق طابل دونوي شربت و غطيت راسي بالمخدة و نبكي حسيت روحي كرهتو و كرهت الزواج و كلشي وكل حاجة جي من عندو.
كمل الدوش و دخل لبس ما خزرش فيا منبا و كي جا خارج قالي و الله و نسمع بيك رحتي لنور و عاودتي فتحتي معاها السوجي و لا عاتبتيها ما نرحمك خبط الباب و خرج.
عاودت تقييت من الريحة لي دارها نضت بالسيف فتحت التاقة دقدق حرب فالباب و دخل قالي راهي تزڨيلك جدة باش جي تتعشاي قتلو قولها ماراهيش قادرة تاكل قالي وشبيك كنتي تبكي علاش وجهك راهو كحل قتلو لالا حبيبي كي مسحت الكحل و غسلت وجهي فسدلي الماكياج، قالي بصح أنت شابة علاش حتى ديري مكياج قربت منو حضنتو و بستو قتلو انت لي شباب، قالي هاااه عينيك راهم حمورا كنتي تبكي، كي قالي هكدا ما قدرش نشد روحي جراو دموعي و أنا شايدة يديه و قعدت على ركايبي فالقاعة قالي وشبيك، قتلو والو توحشت ماما برك قالي ما تتقلقيش قولي لبابا يديك تشوفيها، مسحت دموعي و قتلو وقتاش جيت قالي هدا وين جابني بابا ما نحبش نقعد في دار جدي نحب نبقى مع بابا، بستو من خدو نتبه ليدي قالي يدك علاش راهي زرقة قتلو طحت و هو من العض و القريص تع الموسيو 😤 قالي نقول لجدة تديك للطبيب قتلو لالا ما تقول لحتى واحد ما توجعنيش روح حبيبي تتعشى.
هو حبط و أنا بدلت الفراش و جيت نقي الشومبرة حتى شفت تلفوني يشعل بالضو لخطر كان سيلونسيو صبت الحاجة تعيطلي رفدتلها قالتلي حرب قالي ليليان راهي تبكي و انا ما قدرتش نطلع ليك وشبيك قلتلها والو كي شفت الاخبار تفكرت ماما، قالتلي احبطي بنتي تتعشاي ما تبقايش تبكي وحدك فالشومبرة إن شاء الله ربي يسمعك عليها الخير قلتلها ما راهوش عاطيني خاطري للماكلة، نسيق الشومبرة و كي نجوع نحبط ناكل قالتلي ليليان قوليلي الصح صراع كاش ما دارلك؟ قلتلها لالا ماشي هو برك مورالي عيان قلت نسيق و نرقد، قالتي معليه ريحي بنتي،كوبيت و بقيت نمسح في دموعي و نمسح، كملت دوشت دخلت للشومبرة فرشت فالقاعة تكسلت و حكمت تلفوني، دخل هو قالي حكاية جديدة هادي نوضي لفراشك تشوف أيا غاولي بلخف قتلو مانيش حايبا قالي لاه لاتحبي ازعفي صوطي ديري وش تحبي بصح حكاية تعزلي فراشك وحدك ما تزيديش تعاوديها، نضت نرفد فراشي و هو فتح الخزانة باش يجبد حوايجو قالي شوفي لهنا ما نحتاجش كثر من كوفيرطا فوق البونك،حطيتها و هو حط صاشي فوق الطابل دونوي، جا يدير الريحة قتلو ما ديرش هنا دير برا، حطو و جا حكم حناكي قالي ماشي مشكل بصح تهدني، بعدتو عليا و درت عليه باش نرقد، جبد الكوفيرطا غطاني باس راسي حط الصاشي قدامي و قالي جبتلك عفايس تحبيهم نوضي تاكلي بركاي ما تكبري فيها، ما واجبتوش مسح على راسي و عاود حبط لتحت، قعدت نقلب في تلفوني جعت جبدت هديك الصاشي فتحتها صبتو ما كاش حاجة تع سقايك نحبها و ما جابهاليش، بديت ناكل و مبرونشية مع التلفون دخل بديت نخبي وش كليت باش ما يشوفيش قالي ماكالاه تحشمي علاش راكي تخبي ياك جبتهم ليك، دورت وجهي باش نرقد و غطيت راسي بالمخدة نسمع فيه يضحك، طم وش زربعت داه لابوبال و رجع شعل التلفزيون و قعد يشوف الأخبار، خليتلو الكوفيرطا ما حبيتش نتغطا معاه و رقدت على الطرف تع البونك بعدت عليه حاكمة تلفوني ما درتش ليه كامل بصح بردت حس بيا غطاني عاودت رميتهولو قالي تمرضي سكت عليه حطيت تلفوني و حاولت نرقد كنت على الشح طبعني نطيح، هو طفى التلفيزيون و رقد بصح بالو كان عندي قاعد غير يتقلب و يتنهد، عاود رفع راسو قالي ياودي ادناي لهنا رايحة طيحي كوني هانية ما نقيسكش دناي برك، تنحنحت على الشط تع البونك جبدني من يدي لحضنو حطلي راسي على يدو و غلق عليا عيطت قتلو وخر عليا ما نيش حاملاتك وخر لهيه، حط راسو على راسي و همسلي في ودني قالي شحال من مرة قتلك كلمة وخر هادي ما تزيديش تعاوديها قتلو يمال وش حبيتني نقول قالي تهدري باحترام و تقولي ادنى شويا و ماشي من فوق نيفك قتلو علاش وين راهو الفرق؟ تبسم و باسني في نيفي نفرتو قتلو بعد عليا بصح هو قعد شايدني و يقولي و دوك انت ما تشبعيش من الغضيب ديالك هدا خلاص ما تصمطيش روحك قتلو إيه عندك الحق لوكان أنا لي آذيتك ما تهدرش هكدا قالي كي يعرف خويا لي ما بيناتنا و يوقف يحاسبني على مرتي ما آذيتينيش؟!! دخلت في حوايجي قدامو بسبتك لوكان صبت لرض تنشق و تبلعني، لوكان ما وصيتكش من قبل و الله ما نهدر معاك كلمة، و لوكان تولي للصح أنا لي نورمالمو نزعف ماشي أنت بصح قلت خلاص عاقبتك و عرفتي غلطتك نغلق السوجي و نقلب الصفحة ما نديوش حياتنا غير زعاف، قتلو صفحتك اقلبها وحدك أنا مانيش حايبا بعد عليا قالي و الحل كيفاش نقعدو هكدا؟ قتلو الحل تبعدني و تخليني لخطر كرهت منك و ما وليتش نحملك، قالي علاش راكي تحسيني بلي ما عنديش بلاصة في قلبك و معيشتك معايا تع حاجة و فرض لا أكثر و لا أقل؟ قتلو شوف انت وش درت فيا، شوف سيكاتريس لي خليتهم فالكور ديالي لي يحب ما يآذيش، سقسي روحك إدا تحبني صح و لا دايرني غير باش تفرغ الرغبة ديالك، نهدر و نبكي حكم يدي و باس الآثار لي خلاهملي قالي خلاص ما تبكيش بالاك وجعتك كثر من اللازم بصح ماشي كره و ديري في بالك حاجة غلطتك تتعاقبي عليها ما نسكتلكش عليها مهما كانت الطريقة، و من المفروض فعوض ما تقولي لي يحبني ما يآذينيش قولي علاش آذاني و ريحي مع روحك حاسبيها، انت لالا تقعدي تحسبي غير وش غلطت معاك.
ما واجبتوش دورت وجهي و قاعدة نبكي مسح على راسي غطاني و قالي ارتاحي .. وبقى راقد موراي و مخلي يدو على خصري حتى غفينا في زوج...