مراهقة والاربعيني بلهجة جزائرية

66

#المراهقة و الأربعيني:

#الجزء66:

غدوا منداك كي جا صراع من الخدمة دخل قبالة باش يرقد كان عيان، مع لي حط راسو نسمعو فواحد يطبطب و يعيط قال وين راكم الحقوا دار سعد زدمو عليهم رايحين يقتلو وليدو محمد.. قفزنا كامل من بلايصنا و خرجنا نجريو مخلوعين نشوفو وش كاين.. لي فهمناه هو أنو محمد وليد سعد ضرب واحد مانعرف ادا قتلو ولا سلك و هو واحد ما علابالو وين راح، شويا هكدا و الدنيا تخلطت برا نسمعو غير فالعياط تع الرجال و الطونوبيلات و الرصاص و كل وحدة تحاول تشد راجلها باش ما يروحش بصح معامن نهدرو.. صراع و نائل و الحاج خرجو يجريو و حنا نطلو و خايفين و الحاجة تدعي و أن سعد تبكي و إخلاص تهدن فيها.. شويا و عاود دخل صراع طلع يجري للشومبرة لحقتو قتلو صراع وش راح يصرا؟ قالي خليني طروكيل.. قتلو ياك دار سعد لهيه و حنا وش دخلنا فالوسط باش زادمين علينا؟! قالي خفي اعطيني حوايجي.. وين راهو الشماخ الأحمر ديالي؟ قعدت نحوس ما صبتوش و هو دخلتلو آبال فالتلفون رفد و بدا يسب و يعيط و كوبا قالي الشماخ الأحمر ديالي وين راااااهوووو؟ قتلو ما صبتوش معليه الشماخ البني.. رمى القميص على وجهي و فتح الخزانة يحوس منبعد عيط اخلااااااص.. جات تجري قالها وين راهو الشماخ؟ قالتلو أنا نحيتو من الحبل حددتو و خبيتو في خزانتي دوك نجيبهولك.. راحت تجري جابتهولو لفو بلخف فوق راسو و أنا تقلقت قلتلها شكون سمحلك توشي حوايج راجلي؟ ردي بالك تزيدي تعاوديها.. قالتلي و انا تان راجلي ولا مسجلتو باسمك ملكية خاصة؟!  قلتلها إيه ملكي وحدي و انت مااااا.... جاز ما بيناتنا طبعنا و خرج يجري قالتلي الله يعطيك غمة تديك و خرجت.. قلتلها الغمة تغمك يا وحد الشيطانة..
حبطت لتحت صبت الدنيا مقلبة.. الحاج يعيط خاف على ولادو لخطر أهل القتيل ضربوا سعد و محمد ماكاشو و نائل و صراع خرجو بطونوبيلاتهم..
مع العصر جاو لعندنا دار سعد و عمومهم و ولادهم كامل ملثمين وجوههم بالشماخ و رافدين السلاح، الحومة غلقوها بطونوبيلاتهم..
مور المغرب دخل صراع و وليد عمو سليمان و سعد للصالون.. حبيت نسمع وش كانوا يهدروا بصح تربطت مع النسا فالكوزينة..
منبعد جاو بزاف رجال لابسين العقال و صراع دخل وصانا على العشا و لاتاي و هدرتو كان كامل مع هيام.. تقاسمنا الخدمة وحدة تنقي فالخضرة وحدة طيب  وحدة واقفة مع البوطاجي... و أنا كنت واقفة على لاتاي.. شويا و فتحت نور التاقة قالت ياربي و يوصلو لحل و ما تتطفرش في رجالنا.. قلتلها وش صرا بالضبط؟ قالتلي راهم يقولو محمد و صاحبو زدموا على مرا متزوجة و لا ما نعرف المهم حاجة تع شرف و هو ضرب واحد فيهم و هرب و رجالنا لي يخلصوها ان شاء الله ما تلحقش للقتيلة و الدم.. قلتلها علاش حتى يروحو فيها رجالنا؟ علاش ما كاش دولة و قانون؟! يروحو يشكيو و يحوسو على لي ضرب و حنا و رجالنا وش دخلنا حتى نتهددوا؟ و زيد هادو لي راهم لابسين العقال المانع للذكاء لوكان ينحيوهم على ريسانهم نوليو بألف خير.. ناضو البنات كامل يضحكو و قالولي صح عندك الحق.. قلتلهم والله.. وشنو هاد التخلف الناس وصلت للمريخ و هوما مازالهم في حكايات الثأر و الحسيفة و الضرب و القتيلة..
قعدنا واقفين فالكوزينة حتى فاتت الطناش تع الليل رجلينا طابوا.. دخلوا النسا رقدو و أنا طلعت لشومبرتي عين راقدة و عين فاطنة ما تهنيتش قبل ما نشوف صراع.. جوايه ال2 طلع هو دخل يبدل حوايجو و أنا غلقت الباب و رجعت لفراشي كملت رقادي..
غدوا منداك صراع قلب الدنيا بالعياط و يسمع في علي وليد هيام قال لي يرفدوه رجليه شويا يبدا يتمعشقلي و حنا الرجال نخلصوا.. فهمت من كلامو بلي محمد متخبي فالريف عند عمومهم و الخطر مازالو علينا و احتمال كبير يطلبو راس محمد في بلاصة وليدهم إدا مات..
حنا النسا قاعدين فالكوزينة واقفين على الضياف ولاتيين بالقيل و القال، كي لحق الليل نسمع فيه عيطلي ليلياااان.. خليت كامل وش كان في يدي و رحت نجري لعندو كان فالصالون هو و الحاج و نائل و سعد و ولاد عمومهم.. صراع كانت النار شاعلة في عينيه من الزعاف قالي ارواحي تشوفي لهنا.. خزرت مخلوعة صبتهم كامل يشوفو فيا قتلو وشنو؟ قالي قبل ما نهدر تحلفيلي بلي تقولي الصح و ما تكدبيش.. قتلو بلاما تحلفني نقولك الصح و ما نكدبش.. قالي لبارح كي كنتي فالكوزينة وش هدرتي؟ قتلو ما شفيتش كنا نخدمو و هدرنا بزاف، وش هدرت؟ عيط عليا و قال على العقال و الرجال لي جاو لبارح.. لتم فهمت قتلو علاش وش وصلولك؟ ناض الحاج بالزعاف قالي قالولي مرت وليدك هانت عقالنا و قالت بلي مانع للذكاء  و حنا متخلفين، هاد الكلام صح قلتيه؟ شفت فيهم لوكان صابوا ياكلوني لحم و يرميوني عظم.. تلفتلي الهدرة ما عرفتش وش نواجبو قتلو عمي ما قصدت والو هدرتها بالضحك.. قالي نائل يتسمى صح هدرتيها؟ مازال ما كمل كلامو و يجبد الحاج عليا بكف حتى صونات ودني، عيط عليا و قالي و تضحكي علينا يالي ما عندكش الأصل؟! حنا و عقالنا و عشايرنا نشرفوك.. ماشي متربية..
توقعت من صراع يدافع عليا، شفت فيه و الدمعة حاصلة في عينيا صبتو يخزر فيا بالزعاف و ينسف.. حطيت يدي على خدي حشمانة تبهدلت قدامهم كامل و هو شرلي براسو باش نطلع للشومبرة..
جيت طالعة صبت إخلاص واقفة فالدروج و تضحك جزت عليها و طلعت نبكي..
مع نص الليل سكت الحس لتحت و صراع طلع كي دخل صابني مغطية وجهي بالمخدة و نبكي بالشهقة.. قالي و تزيدي تبكي؟! تقعدت و قتلو أنت بالدات ما تزيدش تهدر معايا و انسى بلي عندك مرا وسمها ليليان، فعوض ما توقف معايا قعدت تستشفى فيا كي باباك بهدلني قدامهم كامل.. قالي أنت لي وصلتي روحك، شحال من مرة وصيتك توزني كلامك قبل ما تخرجيه، لوكان قلتيها غير ما بيني و بينك بالاك أنا نضحك معاك بصح كلامك وصل حتى لعمومي و في وسط المضافة رجعتيني قد الكمشة قدامهم قالولي هادي لي راك بايع دمك و لحمك على جالها وصلت تهين عقالنا و عمي قالي إدا تعز عشيرتك طلقها و أنا مصدقك و ندافع عليك قلتلهم مرتي بنت أصل و ما تهدرش الشينة و مع لخر سودتي وجهي قدامهم.. الدنيا مقلوبة و ما نعرف وين رايحة تخرج حكاية محمد لا بالخير ولا بالغير و انت تهدري حاجة كيما هادي و في وسط داري؟!! يا الحابسة عرقت في وسط حوايجي من التبهديلة تمنيت لرض تنشق و تبلعني الله لاتربحك.. راني متأكد بلي كي هدرتيها كامل ضحكولك بصح كل وحدة فيهم تستنى فيك غير وقتاش تغلطي و أنت مديتيلهم الفرصة..
جبد المخدة غطى راسو و رقد و أنا قعدت نبكي و نشهق قتلو هدا كامل من تحت راس مرتك لي حاطهالي هنا فالدار على قلبي الله ياخدكم و نتهنى، وش دارهالي حتى ننهان قدامهم كامل و أنت تستشفى فيا.. قالي ارقدي خلاص راسي وجعني.. قتلو وش رحلك فيا.. جبد الغطا على راسو و رقد و أنا نبكي و نشهق حتى وليت نسعل.. رمى الغطا و قالي مازالكي تبكي حتى لدوك؟ ناض عطاني كاس ما و قالي اشربي و ارتاحي خلاص.. قتلو ما نشربش وخر عليا يلا.. قالي كيما تحبي.. تكسل و غطا وجهو بيدو و أنا مكملة فالبكا حتى عيط عليا قالي خلاااااااص.. تقعد و دار ليا قالي انقبري تشوفي يلا انقبريييييي... تكسلت بلخف و سكت جبدني لعندو بالزعاف حطلي راسي على يدو و قالي قسما بالله العلي العظيم و نزيد نسمعك تبكي غير نوض نجيفك.. يلاااااا ارقدييي..
غمضت عينيا بلخف و سكتت بصح قعدت نتنخفت تحت لفراش زيرني لصدرو و قعد يرتل فالقرآن على راسي حتى رقدت..
غدوا منداك نضنا روطار جوايه ال11 تع الصباح حطيتلو يفطر قالي ريحي تاكلي معايا قتلو مانيش حايبا.. حكمني من يدي و قالي ريحي و انساي وش صرا.. نطقت أم سعد قالتلو فوق ما حبطت راس باباك وسط الرجال خايف على لالة مولاتي ما تاكلش؟! لوكان غير حطيتلها اللقمة في فمها باش تتهنى عليها كثر بصح هادي حالة لي يبيع دمو و لحمو و يحوس على لحم البراوي.. هي قالت هكدا و يخبط السنيوة قلبها و ناض جا يتلاح فيها وقفت إخلاص ما بيناتهم تحامي عليها، حكمها من شعرها و بدا يعيط قالها علبالي بلي الكلام خرج من عند وحدة فيكم نتوما لي هنتوه كي وصلتو الهدرة.. جا نائل و سعد يجريو سلكو إخلاص من يدو و أنا واقفة فالدروج و نحك في يديا من الخوف و دموعي يسيلو بالسكات.. ناض الحاج يعيط عليه قالو أنت تحوس على بنت عمك غير وقتاش تغلط باش تضربها، علاش ما حكمتش هاد المسمومة لي طيحت بريسانا ما بين الرجال؟ قالو ما دخل روحك لا فيا لا في نساويني نضرب لي نحب و نسلخ لي نحب هداك شغلي، و زيد علبالي بلي هديك الحابسة ترمي من فمها بلاما توزن كلامها سينو ما نجوزهالهاش بصح لي وصل الكلام يعرف مليح بلي هدرة كيما هادي تمسني أنا قبل اي و واحد و علبالو بلي تهيني و طيح بقيمتي ما بين رجال العشيرة و كان الهدف ديالو باش نتقلب على ليليان و نضربها، بصح معامن طاحو انا صراع ماشي لي طيحني مرا، كي هدرها عمي صالح علبالي بلي يا إخلاص يا أم سعد لي وصلوهالو بصح لوكان ما نجنيهم من الدار مانيش وليد بابا..
طلع لفوق للشومبرة و أنا لحقتو.. قعد فوق البونك و هو يكف في حوايجو.. قالي شحال من مرة نقولك ليليان اوزني كلامك، ليليان الكلمة لي تغلطي بيها تقيسني قبل ما تقيسك، ليليان أخطيني من الكلام الزايد و الشكاوي و هادي دارتلي و لوخرا عملتلي.. أنت والو تدخل من تخرج من ما حبيتيش تفهمي لاتية غير بتلفونك و شومبرتك، الله لا تربح النهار لي شفتك فيك و تبليك بيك..
قعدت ساكتة ما هدرت والو و هو رقد شويا و خرج مقلق لي يصيبها في طريقو يخبطها..
مع المغرب سمعت الحاج صاغ حبطت نجري صبتهم كامل دايرين بيه عرفت بلي عيطولو فالتلفون قالولو بلي يماه زلوف لي هي جدات صراع توفات..
لبسوا كامل و راحوا لدار عمهم عزام قعدت غير أنا و نور فالدار قلتلها مزيا الجنازة ماشي عندنا.. قالتلي جدها واحد دوك نلبسو و نروحو نهنبرو الخدمة فيها فيها.. قلتلها أنا ما نخدملهم ما نعيي روحي على جالهم.. قالتلي لي يسمعك يقول راكي تخدمي هنا ياك نهار كامل و أنت خازنة روحك في شومبرتك.. قلتلها وعلاش نخدم يمال إخلاص علاش جابها؟ ياك هي قالتلو خليني عندك يالوكان خدامة في دارك المهم يتكتب اسمي قدام اسمك.. خليها هي تخدم و كي يطلقها ارواحو اهدروا معايا على الشغل.. نور ما عجبهاش كلامي، رفعت حاجبها و عوجت فمها و دورت وجهها عليا..
شويا هكدا حتى سمعنا الحس و بدات الناس تلحق للصالون.. أنا قلبي طاح قلتلهم وش كاين؟ قالولي الحاج و صراع قرروا باش يديروا الجنازة هنا.. قلتلهم وعلاش ما يديروهاش في دار عزام؟ قالولي ما خلصوش التريسيتي كوباوهالهم قالهم صراع ديروها في داري.. قلتلها لوكان داروها فالجامع.. قالولي و دوك أنت راكي تحاوزي فالناس ولا كيفاش؟!
و كي العادة الشغل و التهنبير و البكا و النديب في داري و صراع كل همو باش يشيع ما بين العشيرة و يهدرو عليه بالملاحة و لي زادت قتلتني جي وحدة ملهيه فمها فايح تشكر في إخلاص و تقول شوفو لي يتزوج مرا من عندنا كيفاش تحمرلو وجهو مع ضيافو ماشي كيما البراوية طاس الما ما ترفدوش..
و إخلاص كي شافتهم كيفاش كانوا يشكرو فيها زادت فيها ولات تخدم بالدوبل و تبين في شطارتها..
فالليل كي دخل صراع تحاكمت معاه و داوسنا على الخرجات لي يخرجلي بيهم كل مرة.. خرج و خلاني حتى الرقاد رقد فالخيمة تع العزاء مع الرجال حتى خلاصت الثلثيام تع الجنازة و قعدنا ما نتهادروش.. 
غدوا منداك راح صراع يخدم و أنا ما نضتش حتى الطناش تع النهار.. كي حبطت صبت الحاجة قاعدة فالهول و نور رفدت ولادها وراحت لدارهم و إخلاص فالكوزينة حاكمة الكوكوطة طيب فالغدا و الماعن لي ماشي مغسولين فوق البوطاجي.. رفدت البقراج باش نطيب لاتاي نطقت قالتلي علاش شقيتي روحك و حبطتي لوكان عيطتيلي طلعتلك فطورك لفوق.. قلتلها ماكالاه حنونة راني حبطت نفطر.. قالتلي شوفي فيا مليح و الله و نحب فيك غير نقلب الحاجة و صراع عليك و نجنيك من هاد الدار في ليلة مافيهاش ضو.. قلتلها لي تقدري عليه ديريه و نشوفو شكون لي تجني لوخرا من هاد الدار.. حكمتني من حوايجي في كتفي قالتلي و الله ثلاث لحد الآن راني ساكتة و متحملة بصح لوكان طيحي في يدي و الله ما نرحمك، مازال ما تعرفيني مليح.. نحيتلها يدها و رحت شعلت الفورنو و أنا نضحك و ندندن.. تقلقت نحاتلي البقراج من يدي و رماتو فوق البوطاجي قالتلي روحي سيقي الڨاراج و خملي الدار ماشي كلشي في راسي مانيش خدامة عندك.. قلتلها ما نخدم والو و لي في يدك ديريها.. و جيت نرفد البقراج طبعتني.. عيطت عليها قلتلها إيييي ما طبعيش.. جات الحاجة قالتلنا و آخرتها معاكم كيفاش ما تستحوش دوك؟ قلتلها عمتي هي ما خلاتنيش نفطر.. قالتلي و دوك كيفاش ما تحبطي ما تعاوني ما تقولي نروح نشوف كاش ما يحتاجو علاش الدار هادي أوتال؟ فالجنازة كامل قالو علاش راهي عاقدة حوايجبها و قالبة وجهها على الناس تقول ماراهي حاملة حتى واحد.. قلتلها لخطر صح ماراني حاملة حتى واحد فيكم.. قالتلي شوفي ليليان أنا راني ساكتة لدوك قلت بالاك تفهمي روحك و تحشمي ما تخلينيش نستعمل معاك أسلوب وحدوخر و نوريلك الشي لي عمرك ما شفتيه.. قلتلها لي عندي راني قلتهولك و زيد ظهري يوجع فيا ما نقدرش نخدم.. قالتلي بروتية ملي خداك وليدي و ظهرك يوجع فيك ما فيكش الخير هدا مازال ما ضنيتي و راكي تمشي بهاد العقلية يمال لوكان تجبيبي الدراري كيفاش؟ قالتلها إخلاص عمتي هادي ما ينفعش معاها الكلام خصها شويا تزيار.. قلتلها انت بالدات ما دخليش روحك.. جات تتلاح فيا تحاكمت معاها.. قالتلي الحاجة و دوك أنت ما تحشمي من حتى واحد؟! و الله من غير يجي صراع هو يدبر راسو معاك..
بعدت عليهم و قلتلها تحبي تقوليلو قوليلو و كي يجي أنا لي نحكيلو بلي ماراكيش تعدلي ما بيناتنا كي نخدم و لا ما نخدمش  تهدرو عليا ماوليتيش حقانية تحامي غير عليها هي.. قالتلي إخلاص يمال تحامي عليك أنت يا المعفونة؟ قلتلها لالا ما تحاميش عليا خليها تحامي عليك برك لخطر مسكينة تشوف روحها فيك.. و جيت طالعة لشومبرتي جبدتني من الشال لعندها حتى دار على رقبتي نحات يدها و ضربتني لظهري، درت ليها حكمتها من شعرها و تحاكمنا و الحاجة تسلك ما بيناتنا ماطلقتهاش حتى سمعت الحاج دخل و عيط علينا قفزنا.. ناض يعيط قالنا وين راكم حاسبين رواحتيكم؟ و أنت ليليان ما تحشميش على روحك؟
قالتلو الحاجة حتى الحيا و راح من وجهها من الدلال الزايد تع وليدك.. قالنا اخرجوا من قدامي و حسابكم كي يجي لفحل تع وليدي يدبر راسو معاكم..
طلعت لشومبرتي عيطت لصراع فالتلفون ما رفدليش بعثتلو ميساج كتبتلو فيه (صراع كي جي اطلع لشومبرتي قبالة عندي حاجة ضرورية معاك) ما واجبنيش..
كي سمعت صوت طونوبيلتو حبطت نجري قلت نسبق أنا نهدر معاه لخطر كنا مداوسين.. قتلو على سلامتك حبيبي.. قالي الله يسلمك.. قتلو نحطلك تتغدا؟ قالي لالا تغديت مع صحابي ديريلي برك كاس لاتاي.. دخل الحاج للكوزينة قالو لالا قبل لاتاي عندي هدرة معاك.. و دار ليا قالي عيطي لضرتك و ارواحي..
خزر فينا صراع ماشي فاهم والو قالنا وش كاين غير لخير؟ قالو دوك تعرف.. حبطت إخلاص و الحاجة قعدت و أنا بقيت واقفة شرلي صراع باش نقعد و بدا الحاج يحكيلو منبعد قالو تقبلها باش نساوينك يتحاكمو هكداك و ما يديروش قدر ليماك؟ صواتهم كانت واصلة لسابع حتى لوكان ما دخلتش أنا على غفلة.. قالو وش كاين وش صرا؟ قالو سقسي نساوينك.. جيت نهدر سبقتني إخلاص قالتلو ماتعاوني ما تحبط و تستنى غير فالواجد و الشغل كامل طايح على راسي.. ما فادت معاها الهدرة لا بالملاحة ولا بالقباحة حسبتها كي ختي الصغيرة بصح باش طيح معايا القدر لالا ترضاها أنت؟ دار صراع للحاجة قالها وش صرا يما غير قوليلي.. قالتلو نساوينك راهم قدامك و افهم منهم.. دار ليا قالي وش غلطتي مع إخلاص شحال من مرة نبهتك و قتلك ما نحتاجش المشاكل.. حكيتلو كي حبطت وش صرا ما بيني و بينها و قتلو ضربتني.. أنا مازال ما كملت الهدرة و إخلاص قاطعتني قالتلو إدا أنت تقبل تتجاوز على الحاجة انا ما نقبلش.. تعنكر فيا و قالي وش تجاوزتي على يما؟! قتلو و الله ما تجاوزت معاها هي لي بدات أنا ما هدرت والو.. قالتلو غلطت معايا و سكتلها بصح مع عمتي ما نقدرش نسكت..  قالها وش قالت؟ قاطعتها الحاجة قالتلها خلينا من هاد الحكاية.. عيط هو على إخلاص قالها انطقيييييي.. قالتلو عايرتها قالها تشبهي لإخلاص و تشوفي روحك فيها علابيها تحامي عليها.. جيت ننطق ندافع على روحي حكمني من دراعي و زيرني قالي مانيش رايح نضرب بصح دقيقةما تزيديهاش عندي و طبعني على الدروج..عيط لخالي فالتلفون في هديك الفترة ماكانش في دارو كان قريب لينا عندو مطعم قاعد يرمم فيه، قالو أبو حنا إدا راك قريب ارواح ادي بنت ختك ما تبقاش على ذمتي.. بديت نبكي قتلو والله ما قصدي تقلقت من إخلاص كي ضربتني.. عيط عليا قالي اطلعي لشومبرتك ما توريليش فيڨورتك حتى يجي خالك..
ساعة منبعد جا خالي قعد يحاول معاه قالو أنا ليليان دير وش دير معايا نسمحلها بصح يما خط أحمر و ماشي هادي أول ولا ثاني مرة تغلط معاها، ما نحتاجهاش في داري اديها لعندك و ربيها..
كي سمعتو هدر هكدا و خالي يحلل فيه تقلقت قتلو نوض خالو أنا أصلا مانيش حايبا نعيش معاهم بناقص من هاد الحياة.. قالي الحاجة أنت وجهك صحيح.. و صراع زير على يدو و شايد روحو بالسيف بدا ينسف و خرج برا..
طميت حوايجي فالفاليزا و حبطت صبت إخلاص تضحك و تستشفى و صراع يتعنكر فيا لوكان صاب ياكلني..
رحت مع خالي طريق كاملة و هو ينصح فيا منبعد قالي مصيرو يرجعلك هو صح مقلق احمليه شويا بصح أنت تان غلطتي وش داك تغلطي مع عجوزتك المرأ عاقلة و ناس ملاح، دوك ريحي يمات منبعد ربي يعملها تاويل..
وصلنا للدار صبت بناتو ميلان و ريتا جاو لاقاوني بالأحضان كي شفتهم نسيت كامل صراع و أهلو قعدنا ليل كامل سهرانين غير الضحك و الڨصرة.. كي جيت نرقد جبدت تلفوني من الصاك صبت صراع عيطلي 14 مرة و بعثلي ميساج ماخلاليش فيه كي ما رفدتش عليه.. شعلت النت و بعثتلو فالميسنجر كتبتلو (وشبيك مقلب الدنيا؟! ) غير فتح الميساج عيطلي بلخف فالتلفون رفدتلو ما خلاليش قتلو وشبيك علاش راك تغلط معايا؟ قالي شحال من مرة عيطت علاش ما رفدتيش؟ قتلو بنات خالي جاو من الخارج و لتهيت نڨصر معاهم.. قالي انت لهيه تضحكي و أنا محروق هنا ياك؟ قتلو وعلاش؟ وزيد علاش راك تعيطلي ياك أنت لي حاوزتني من دارك و قتلي ما تزيديش تريحي في داري و ما تقعديش على ذمتي.. قالي ما نكسرتش عينك مازال وجهك صحيح.. قتلو ما فهمتش وش تحتاج عندي؟ كي نجي لعندك تغلط و تحاوزني و كي نخرج من عندك تغلط و تحب نرجعلك.. هبلتني ما عرفتش وش نديرلك.. قالي اسمعي خمارك ما يتنحاش من فوق راسك و ماكاش خرجة من الدار سينو رجليك نقطعهملك.. نكمل شغالاتي و نديرلك حل.. قتلو كيفاش ما نخرجش؟ عندك محبوسة و هنا محبوسة؟! وش تحتاج عندي هبلتني.. قالي ما تشاطنيتيش و الله غير تخلصيها غالية و كوبا في وجهي.. قعدت نشوف فالتلفون و قلت هدا وش بيه هبل؟ بلوكيتو من الميسنجر و درت النيميرو ديالو فالروجوتي و رقدت..
غدوا منداك خرجنا نحوسو.. تسلفت على بنت خالي تريكو قصير و سالوبات.. قعدنا ندورو شفت البارفا ديالو Boss شريت وحدة قلت نديرهالو كادو و رحت أنا و ريتا للمناج لعبنا.. عيطتلي مرت خالي قالتلي راجلك قلب الدنيا عيط لخالك فالتلفون قالو علاش ما راهيش ترفدلي التلفون؟ فتحت صاكي بلخف جبدت تلفوني و نحيتو من الروجوتي شويا و عيطلي غير رفدتلو بدا يطيح و أنا غير ساكتة منبعد جبد النفس و استغفر قالي وين راكي؟ قتلو وين حبيتني نكون؟ قالي ليليان ما تلعبيهاش النية فالهبال قتلك وين خرجتي؟ قتلو رحت للمناج.. قالي تصوريلي وش راكي لابسة و تبعثيهولي فالميسنجر كي ترجعي و وجدي روحك غدوا ان شاء الله نجي ليك و الله يا ليليان ما نرحمك ماشي على آخر عمري جي وحدة كيما أنت فيها شبر تبلوكيني و ترميني فالروجوتي.. و كوبا في وجهي..
خزرت في حوايجي قلت في قلبي لوكان نصورلو روحي هكدا يذبحني..
رجعنا للدار و روحي خارجة و بنات خالي يضحكو عليا كيفاش خايفة منو لهاد الدرجة..
فالليل غير بديت نفرش عيطلي رفدتلو كان زعفان و غير ينسف قالي وين راكي؟ قتلو وين حبيتني نكون راني نفرش باش نرقد.. قالي أنا وش وصيتك علاش تحبي تكسري كلامي؟
دخلت ريتا قالتلي معامن راكي تهدري ما تقوليليش هادا ..... قاطعتها تعنكرت فيها و بعدت التلفون و هي رفعت صوتها باش يسمعها قالتلي هدا العربي المتخلف خليك منو و شوفي حياتك منيتك خايفة منو.. كوبيت بالخف و درت ليها بهدلتها.. قالتلي يا بنتي فيقي لعمرك علاش راكي رابطة روحك براجل كيما هدا مستبد وشنو هاد التفكير الرجعي وش خداك تعميتي؟! قلتلها ما دخليش روحك.. قالتلي يمال تستاهلي الشي لي راهو يديرهولك خلاص غسل دماغك حتى وليتي كيما هو هادي لي قالك وافق شن طبقة..
قعدت تقنع فيا بلي ما يناسبنيش و كبير عليا و وش شفت منو حتى قلبت عقلي.. مرة نخمم في كلامها و نقول نطلق و مرة نتفكر كيفاش كان زعفان و الكلام لي قالتو و سمعو و نخمم وش رايح يدير فيا.. منبعد وليت راسلت صديقتي و حكيتلها قالتلي ارجعي معاه و ما تسمعي لكلام حتى واحد اكسبي راجلك.. وين تروحي ما عندك لا أهل لا سند لا أخ أما دار خالك مافيهمش لامان ولا نسيتي وش دارت فيك مرت خالك كي قعدتي عندهم؟ ما يغركش استقبالهم دوك يجوزو يامات و تولي ثقيلة عليهم و ما تربحي حتى جيهة و زيد صراع راجل مليح يحتاج معاملة مليحة و تنحل أموراتكم بلعقل..
غدوا منداك جوايه ال11 تع الصباح جات نوضتني مرت خالي قالتلي راهو جا راجلك.. قفزت من فراشي من الخوف نضت نجري للصالدوبا غسلت و رحت ليه سلمت عليه رجعلي بصح كان يتعنكر و زعفان قالي خفي بدلي حوايجك باش نروحو..
رحت بدلت بلخف و وجدت حوايجي و رحت معاه طريق كاملة و هو ساكت كلمة ما هدرهاش غير ينسف برك.. كي وصلنا كانوا ولاد عمو لتم شرلي باش ندخل للدار .. هو قعد مع الرجال و أنا دخلت جزت على الكوزينة صبت إخلاص واقفة مع البوطاجي بديت نقربع فالطالون فالقاعة باش نغزلها.. سلمت عليهم و طلبت السماح من الحاجة سلمت على راسها و طلعت لشومبرتي دوشت جبدت شعري ما كييت سڨمت روحي و خملت شومبرتي و جبدت قرعة الريحة لي شريتهالو باش نمدهالو.. دخل حط تلفونو و قالي إيه يا لالة راني نسمع فيك.. قتلو وشنو؟ قعد مقابلني و قالي وين خرجتي؟ قتلو و الله ماكنت حايبا بصح مرت خالي قالتلي ما نخليوكش وحدك فالدار.. قالي وماكاش حاجة وسمها تلفون و تقولي عندي راجل مسؤول عليا نعيطلو نعلمو؟ سكتت.. قالي وين رحتي؟ سكت قالي شوفي ليليان و الله و ما تواجبنيش على كل سؤال بالصح غير راكي مطلقة بالثلاث، و دبري راسك.. كي سمعتو قال هكداك ماعلاباليش وش صرالي حبيت نكالمي الحالة و نبدل السوجي جبت الريحة لي شريتهالو و قتلو ما تقلبهالناش دراما شوف وش جبتلك و عطيتهالو شدها عليا و خبطها فالحيط تشقفت على سبعلاف مورصو بزجاجها بريحتها..