مراهقة والاربعيني بلهجة جزائرية

34

#المراهقة و الأربعيني:

#الجزء34:

في الوقت لي كملنا الصلاة و حكم يدي داني للبونك رد بالو بلي كانت ترجف تبسم و قالي لهاد الدرجة نخوف أنا؟ قتلو لالا ماشي هكداك بصح... قالي ما تخافيش حياتي هدني روحك و طمني ماكان حتى حاجة تخوف، تكسل فوق البونك و عطاني يدو تكسلت معاه، مسح شعري باس راسي و حط يدو عليه و قرا شويا قرآن، كي كمل قالي علبالك ربي سبحانو وش قال فالقرآن على الراجل و المرا و هوما فهاد الوضع؟ قتلو وش قال؟ قالي قال ((هن لباس لكم وانتم لباس لهن)) شوفي كيفاش وصف العلاقة بالملبس، انت تكوني فراش يبعدني على الحرام و أنا نولي غطا يسترك و يصونك ويحميك دايمن، هو يهدر و انا غايسة فيه و مبرونشية معاه و بلعقل بلعقل حتى استسلمتلو و تفاعلت معاه و ولينا واحد ما فقتش لروحي حتى حسيت بيه كي جبد يدو من تحت راسي لبس و خرج.
لحقت ال13 جيت نوض سمعت الدقديق فالباب جبدت الغطاء بلخف و لفيت روحي دخلت هيام قالتلي صباحية مباركة عليكم ربي يفرحنا بيكم و يدوم المحبة ما بيناتكم و نشوفو ولادكم يلعبوا فهاد الدار و بدات تزغرت قلتلها خلاص حبسي الزغاريت فضحتيني لي يسمع يقول هدا وين تزوجنا..
جبدتلي حاجة باش نستر روحي و ندخل للدوش و جبدتلي وش نلبس لصباح العروسة و راحت.
دخل صراع من الدوش غير بالفوطة قرب ليا قالي صحا النومة الزينة و حكم وجهي مابين يديه باس خدي تبسمت من الحشمة قتلو حبيت ندوش ضحك ههههه قالي أوكي يلا روحي.
دوشت و رجعت للشومبرة نسمع في الحاجة و هيام يزغرتو لتحت ديك التبهديلة، لبست سڨمت روحي و حبطت دخلت للكوزينة صبت نور واقفة باركتلي حتى أم سعد و باركتلي شيوشمن حمار مات، و الحاجة تحضن و تبوس و تدعي، دخلت هيام قالتلي أنت وش جابك هنا وش جايا ديري؟ قلتلها راني نحس روحي اكستراتيراس ياك عندنا تقول عام ملي تزوجنا، قالتلي و دوك ما تشديش لسانك الطويل هداك شويا؟ اطلعي تشوفي لشومبرتك و ما تحبطيش راكم عرسان جدد خلي الراجل راهو فرحان يا أم لسان، اوووف مزيا أموا الواحد يتهنى شويا من الشغل.
طلعت لشومبرة صراع احم احم قصدي شومبرتنا ههههههه صبتو متكسل فالبونك ساميتو و طلعولنا الماكلة أشكال و ألوان وشمن خير وشمن خمير، قعدنا فالشومبرة ما خرجناش كامل حتى فالليل و ما حبطش صراع، جابلنا نائل البقلاوة و الحاج ليسيڨار و بتركولنا صح كانت صح أجزاء تع زواج و عرسان بصح قعدت في قلبي تمنيت عرس و كوستيم و غوب بلونش.
صراع زوج سمانات ما راحش للخدمة ضرب الدنيا بكوتبيي ما يحبط ما يخرج مقابلني و قاعد تقول طفل و جابولو جوي  دايما دايني في حضنو حتى و هو يشوف فالأخبار و لا فتلفونو و ما يرقد حتى يجبدني ليه، كان يحبط غير باش يصلي و لا يتفاقد اهلو و يعاود يطلع، ولاو كامل يقولو داتلو عقلو و نساتو حتى في خدمتو.
صراحة وليت نحس بلي تحبست معاه مام الماكلة و كانت هيام لي طلعنا و كي نقولو ما تروحش تخدم يقولو نخلي هاد الجنة و نروح نخدم؟ لاحق على الشقا غير ما تخافيش خليني مرتاح معاك، صح نفسيتو كانت مرتاحة بزاف غير يضحك و كالم.
الحاجة المليحة لي روماركيتها مور زواجنا الفعلي ما وليتش ليليان هديك الطفلة لي سمحوا فيها ماليها و جات هنا بذل، ولا عندي احترام و حسيت بلي وجودي فالدار رجع عندو قيمة واحد ما يحاسبني و لا يغلط معايا فالكلام، عام و انا عايشة في دار صراع بصح عمري ما حسيتها داري و في هادوك الزوج سمانات هو حسسني بلي موراه هاد الدار داري و أنا الآمر الناهي فيه ماشي العكس قالي اتصرفي فيه على هاد الأساس.
عجبتني القيمة لي عطاهالي في حياتو بصح بديت نتقلق من الوضع و هو مقابلني و ما يخرجش حسيت بلي الزواج فراش برك، بديت نمل و نكره و كي نجي حابطة يقولي اقعدي هنا ما عندك ما ديري لتحت، وليت ندور وجهي عليه نرقد و نقولو راني عيانة، و هو يتقلق يكون من واش عيانة علاش راكي غير قاعدة و ساكتة رجعتي لعادتك تحوسي على السبايب غير باش تهربي مني؟
منعت روحي عليه و كي نضت الصباح شفتو لبس باش يروح يخدم بصح كان مقلق، كي راح حبطت لعند الحاجة صبتها شايدة وليد نور كان بالحمى و هي راحت تغسل لوليدها الثاني و نائل قاعد فالهول بالسيف عينيه رايحين يتغمضو من النعاس، قالتلي نور تعيشي ليليان عينك على أحمد ندي محمد للسبيطار ما تقدرلوش الحاجة وحدها قلتلها كوني هانية.
هوما خرجوا و أنا درت بيه شويا سكتو و عاودت حطيتو عند الحاجة قالتلي ليليان بنتي ما تظليش غالقة بابك لفوق و قاعدة احبطي شوفي الدار ماشي غير مرت لوسك لي تخدم خافي ربي فيها ولادها عياوها قلتلها يا يما وش ندير صراع ما حب يخرج من الشومبرة ما خلاني نحبط، قالتلي خلاص كي يجي نهدر معاه بصح دوك نوضي ديرلنا الفطور.
رحت درت الفطور و نوضتهم منبعد رحت لشغل الدار كي العادة، على ال10 جا نائل ونور و محمد قالولهم عندو التهاب في الامعاء و الحمى، طلعت للشومبرة صبت صراع عيطلي 6 مرات عاودتلو رفدتلي قتلو ألو حبيبي قالي أهلا ليونة وش راكي؟ قتلو الحمد لله مليحة صبتك معيطلي 6 مرات ياك غير لخير قالي لالا برك شفت لبارح قلتي عيانة عيطت نطمن عليك قتلو ااااا راني مليحة الحمد لله قالي توحشتك نضت نضحك حكينا شويا و كوبيت.
مور زواجنا الفعلي وليت نحس روحي صح مرتو و عندي مكانة عندو و يهمو أمري و رجع يهتم بيا بالزيادة  برك لوكان ينقص عليا الفراش شويا كرهتو ما علاباليش علاش. 
رجع من الخدمة دخل عند يماه قعد معاها شويا، حبطت نوجدلو ياكل و كي طالعة باش نوجدلو حوايجو سمعتها تقولو ياوليدي ماشي نهار كامل و أنت غالق الشومبرة على الطفلة خليها تقابل نور فالشغل راهم في زوج عرايس، قالها زوج سمانات حسدتونا فيهم ديروها شغل راهي  عند ماليها في هد الفترة، ياك كل عروسة تروح تريح يامات في دارهم و هي ما عندها وين تروح، خليونا في حالنا شويا و الله ما عقلية هادي، قالتلو ياوليدي هي راهي من قبل كانت حابسة روحها فالشومبرة قريب شهر كي زعفت منك و دوك انت راك شايدها و نور تظل تجري وحدها قالها و الله يا يما غير درتولنا لابريسيو راني نبني في داري غير نكملها نديها و نروح قالتلو هادي جديدة صراع على وشمن دار راك تهدر علاش هادي ماشي دارك؟ قالها راني حايب ناخذ راحتي المشاكل تع أم سعد هدرت و نور شكات و هاد الحكايات كرهت منهم، كي نكون فالدار مرتي ما تحبطش واجبها معايا برك و كي نخرج ما تسالوهاش دير و لا ما ديرش و ما نزيدش نعاود الكلام، خرجت من الشومبرة درت روحي رايحة نطلع الدروج، دخلنا كيف كيف للشومبرة حكمني من يدي جبدني ليه و قالي وين وين اصبري قتلو وشنو قالي توحشتك يا طفلة ضحكت قتلو أنا تان برك نكمل الغدا قالي أنت غدايا قتلو صراااع دقيقة قتلك نكمل الغدا وشبيك؟ قالي أنت لي وشبيك ماشي تقوليلي نحبك و روحي معلقة فيك و لا كلام لسان برك؟ قتلو علاش راك تهدر هكدا؟ قالي ليليان زوج سمانات نشوف غير فيك و ماشي مصدق بلي راكي ما بين يديا بصح نحسك متحملتني بالسيف و باردة ما عندك حتى مشاعر علاش؟ صغيرة و ما تعرفيش فهمناها بصح المحبة ماشي بالتعلام قتلو صراع ماعلاباليش وليت نتقلق قالي تتقلقي مني، قتلو من قبل كنت خير دوك وليت تحبني بزاف و تهتم بيا بصح ما نعرف قالي وش ما تعرفيش؟ خزرت في وجهو منبعد قتلو نروح نوجدلك الغدا و حبطت.
جاو دار سعد وجدت الغدا و هو حبط سلم على خوه حطيتلهم كلاوه كيف كيف.
رحت قعدت مع نوال و نور فالكوزينة قعدنا نڨصرو بداو يحكيو على رجالهم و علاقتهم بيهم بالضحك، نوال قالت خطرة فال4 أيام باش نشوفو و نور قالتلها أنا نائل راهو مليح إدا بان في سمانة، و أنا قعدت نخمم قلت في قلبي علاش خاوتو ماشي كيما هو، علاش لاصق فيا و كي نقول لالا يرجعني أنا الغالطة و يقولي ما تحبينيش و ما تتوحشينيش و ما نعرف وشنو.
لحق المغرب و هو قاعد مع دارهم يحكي و يضحك، ناضو يصليو و أنا كنت واقفة وحدي فالكوزينة جا حضني من اللور  قالي حياتي عييتي ليوم واقيل؟ قتلو لالا عادي ما عييتش قالي راني خارج لبرا كاش ما راكي متشهية نجيبلك معايا؟ قتلو براحتك جيبلي معاك نيسلي برك قالي هدا ماكان؟ حبيبي نجيبلو الشركة كامل يتفشش و يزيد الزاوش ديالي نضت نضحك قتلو ههههه حياااتي.. دخلت نوال هو بعد بلخف قالي راني خارج ما نطولش ما تتقلقيش قتلو بالسلامة عمري، هو خرج و نوال عاودت دخلت قالتلي أبو حرب رجع شباب معاك قلتلها علاش؟ قالتلي ناسي عمرو و يحضن و يبوس قلتلها علاش الزواج عندو عمر محدد؟ قالتلي لالا بصح الواحد يثقل ميزانو قلتلها يثقل ميزانو على مرتو؟ و زيد ياك كنا وحدنا ماشي قدام ماليه و كي شافك داخلة بعد بلخف و خرج قالتلي اييي هييي و رجعتي المحامي ديالو ياااه.. دخلت نور سقسات حكاتلها نوال قالتلها رانا ملاح كي شفناها ليوم عندو سمانة ما خرجش مقابلها و قاعد تقلقت و هوما قاعدين يضحكو حتى دخلت هيام سلمت علينا و قالتلي ليوم القمر بان قلتلهم كامل كنتو تستناو فيا نخرج من الشومبرة كنتو تعسو فيا و لا واش؟ قالتلي لالا حبيبة ربي يدوم الراحة و المحبة قالتلها نوال زوج سمانات ليل نهار يا هيام؟! وش كانوا يديروا هدا كامل ما تشفايش انا و سعد صباح عرسنا هو قابل ماليه و أنا تربطت فالكوزينة قالتلها هيام خمسة في عينيك وش حبيتي عندهم الراجل عندو مدة و سنين و هو صايم منبعد حطو قدامو هاد الحلوة كامل حبيتيه يخليها و يجي يقابلنا؟ و يضحكو..
كملنا الشغل هوما قعدو يڨصرو و أنا نعست طلعت للشومبرة رقدت ما فقتش حتى حسيت بصراع تكسل و باس راسي قالي حبيبي راقد؟ قتلو ايييييه و أنا مغمضة عينيا قالي جبتلك سقايط و ليسيڨار لي تحبيهم قتلو خليهم الصباح ناكلهم بصح تعيش طفي الضو قالي ما تنوضيش؟ ما واجبتوش، راح بدل و جا تكسل قتلو ادنى راني نعسانة طفيت حسيتو تقلق بصح ما بينش بصح قالي يا سيدي غير دوري وجهك لعندي و ارقدي على يدي علاش عاطيتني بالظهر و راميتني موراك ما رجعتلوش جبدني لعندو و حطلي راسي على يدو بصح الصباح ناض ماشي في ڨوسطوه حتى الفطور و خرج بلاما يفطر.
حبطت للشغل معاهم كي العادة و كي لحقت ال9 عيطلي قالي وجدي روحك نجي نديك باش نكملو اجراءات المحكمة، جا صابني وجدت روحي كان ماشي في حالو قالي امسحي الغوجالافغ قتلو على جال التصاور قالي وش هدرت وليت مسحتو، خرجنا تصورنا و رحنا للسبيطار درنا ليزاناليز خرج دمو o+  و أنا ab+ 
كملنا كلشي كي طلعنا فالطونوبيل قالي وش بيك؟ قتلو ما بيني والو قالي يمال علاش راكي عاقدة حواجبك و قالبة خليقتك قتلو علاش قتلي نحي غوجالافغ؟ قالي اووووو بدينا بهاد الحكايات.. ماشي حاجة جديدة ملول علبالك بلي ما نحبش قتلو صراع مليت كل حاجة كيما تحب أنت قالي يمال وش حبيتي يا لالة؟! قتلو بصح أنا نحب الماكياج قالي و شكون راهو شايدك باش ديريه، عندك دار و ماكيي ولا فالحة غير باش ترقدي قدامي بحوايج الدار، معايا ما خممتيش تماكيي و تسڨمي روحك تقول لي راقد قدامك خوك ماشي راجلك قتلو ااااا رجعنا للحكاية لي معمرة راسك اسمع الزواج ماشي غير هكدا ديڨوتيت قالي منواش ديقوتيتي .. يمال وشنو الزواج؟ احمدي ربي نقول بزاف عليها طلباتي وما نخليكش تحبطي باش ما يعييوكش، كاين لي راجلها يأمر و ناس دارها يأمرو و أنت زوج سمانات بديني تشكي، قتلو صحا و الحل كيفاش نكملو حياتنا كامل هكدا؟ قالي يا حبيبتي وشبيها حياتنا وشنو الحاجة لي قلقاتك فالزواج احكيلي، قتلو ما علاباليش بصح ما رانيش مرتاحة قالي و الحل في رايك وشنو؟ قتلو ما علاباليش، حكم يدي باسها قالي كي مازالكي جديدة برك علابيها جاتك الحالة غريبة مع اللول دوك توالفي بلعقل و تولي تبانلك عادي ما تخميش بزاف هكدا؟ درتلو براسي إيه قالي قوليلي دوك وش راكي متشهية نتغداو نروحو لريسطورو و دومندي وش حبيتي قتلو كيما تحب.
رحنا تغدينا و رجعنا للدار انا دخلت لشومبرة الحاجة و هو طلع لشومبرتنا، سقساتني الحاجة وش درنا فيها حكيتلها، شويا هكدا بدل حوايجو و عاود حبط دخل علينا قالها يما راني خارج كاش ما تحتاجو؟ قالتلو لالا يا وليدي تهلا فروحك قالها يتهلا فينا ربي شاف فيا غمزلي تبسم و راح.
طلعت للشومبرة بدلت حوايجي و عاودت حبطت عاونتهم كي كملنا كل واحد راح لشومبرتو و أنا طلعت تكسلت و حكمت التلفون حتى دخل صراع طلعت راسي قتلو أهلا حبيبي، دخل دوش و جا شعل التلفيزيون جبدني و قعدني قدامو قالي ليون حبيت نحكي معاك فوحد الحاجة و ما تزعفيش؟ حطيت التلفون بجيه و قتلو لالا ما نزعفش أهدر قالي نسقسيك قبل علاش كي جي خارجة لكاش بلاصة ادوشي و تماكيي و يهمك تكوني شابة بصح فالدار هاد الشي آخر همك قتلو لالا بصح الواحد كي يخرج ما لازمش يخرج مبهدل قدام الناس قالي يعني يهمك الناس يشوفوك ماشي مبهدلة و أنا ما نهمكش كيفاش نشوفك؟ قتلو لالا ماشي هكدا مام أنت كلما تخرج دوش و تبدل و تسڨم روحك و دير الريحة علاش جاتك غريبة فيا كيما أنا كيما أنت قالي كيفاش كيما أنا؟ أنا دوشت و لبست حوايج تع الخرجة و كي دخلت دوشت و لبست حوايج تع الرقاد كل بلاصة عندها حوايجها بصح أنت ..... قعدت غايسة ما عرفتش وش نقول قالي شوفي حبيبتي علبالي بلي صغيرة و ما ترديش بالك لهاد العفايس بصح حياتك كي كنت عازبة و كي راكي متزوجة ماشي كيف كيف، أنا راجلك و عندي حق عليك، ندخل نصيبك بحوايج الدار وجهك بلا ماكياج لا اهتمام لاوالو من الكوزينة و الشغل لهنا راكي تشوفي فيها عادي؟ قتلو بصح دوشت نص نهار قالي و انا وش دخلني فمقبيل عمري راني نحكيلك على دوك ماشي قلتي تحبي الماكياج يمال علاش ما تماكييش؟ و حوايج الرقاد راهي الخزانة معمرة بيهم علاش ما تبدليش قتلو ما نحبهمش نحشم نلبسهم قالي و الحشمة علاش حبيبتي ياك أنا راجلك فراشك و غطاك تحشمي مني؟ شوفي عمري أنا نقدر نسكت و ما نهدرش معاك و نبقى صابر حتى نكره  منبعد نولي نحوس على هاد الأمور برا و نشوف لغيرك و كي نتعاتب نقول مرتي مقصرة معايا و حقي بصح ما نحبش هكدا الراجل يعلم مرتو ما فيها والو و أنا نحبك و ما نحبش نشوفك غالطة و نقعد ساكت و علبالي بلي انت تسمعي الكلام و تتعلمي بلخف و لا راني غالط؟ هزيت راسي بصح حشمت و هو حس بيا قالي ماشي باش نحرجك عمري ديريني روحك و جاية تهدر معاك ما تحشميش مني ما كاش فرق ما بيناتنا و ما تخميش بلي راني نقص منك بهاد الكلام جامي برك باش تهتمي بالشي لي ما بيناتنا كثر و نقعدو قراب من بعضانا فهمتي عمري؟ قتلو إيه باسني من خدي و قالي و دوك كيفاش؟ قتلو نروح ندوش و نسڨم روحي ضحك ههههه قال يلا حياتي راني نستنى فيك، نضت رحت دوشت و رجعت للشومبرة صبتو خرج الصاشي لي جابها فيها شموع صغار ستفهم فوق الكوافوز  و زوج فيوزات وحدة كبيرة وحدة صغيرة شعلهم، دار ليا و هو يسڨم فيهم تبسم و قالي بصحتك عمري تبسمتلو قتلو الله يسلمك، وقفت مع الكوافوز مشطت شعري و ما كييت، درت باش نبدل صبتو عاطيني بالظهر مقابل التلفزيون و يحوس على كاش فيلم باش نشوفوه غير كملت دار ليا بلخف تقول كان يعس فيا ذبت في بلاصتي من الحشمة موالفة نلبس قدامو دومي مونش و شويا مع الركبة بصح هكدا بالنويزات و ما شابه جامي من غير ليلة الدخلة كي فورصاتني هيام باش نلبس ديزابيي و كان طويل و زيد ما نحيتش لي ملفوق و كي نحيت حتى طفى الضو.
جا يقرب ليا درت نجري للخزانة باش نجبد حاجة طويلة نلبسها حوطني بيديه و قالي وين رايحة وش رايحة ديري قتلو اااااا.... جبدت النفس و تنهدت قالي إدا حشمانة و لا بردانة تغطاي فالفراش ما تقلقيش روحك، جيت رايحة للفراش رجليا تخالفوا المشية قدامو و انا لابسة هكدا جاتني صعيبة كثر ملي كنت واقفة مقابلاتو، قعدت نشوف فيه كي الطڨلولة هو ضحك قرب راسي منو و جبدني ليه، كي رقد نضت طفيت الشموع و التلفيزيون خليت الفيوزات نقصتلهم برك و رجعت الفراش صبتو فتح عينيه حطيت راسي على يدو قالي علاش تخافي مني؟ قتلو ماشي بيدي كي نتفكر وش صرا ما بيناتنا أول مرة نخاف، قالي جازت على الحكاية شهرين و رانا داخلين فالسمانة الثالثة و مازال ما نسيتي؟ قعدت زوج سمانات مقابلك هنا فالشومبرة و بطلت كلشي على جالك قلت باش نولفك و نسيك بصح راني نشوف فيك كلما راكي تزيدي تخافي مني نحسك رجعتي تتقلقي مني و مرات نحس لوكان جات بيدك حتى الزواج و تحبسيه علاش؟ علبالي بلي الشي لي صرا ما بيناتنا غلطة مالڨري انت لي وصلتيني ليها بصح لوقتاش باش تنساي هداك النهار؟ قتلو أنا فيا حاجة نسامح و نقلب الباجة بصح ما ننساش، لدوك مازالني متفكرة عياطك نهار دخلت أول مرة لدارك و انت تقول عليا قح.... حصلتوها في راسي، لدوك مازالني نتفكر ضربك نهار سرقتني فالذهب، كي غسلت كوارطك، كي لبست هديك الروبة فالوليمة، كي تهمتني حلا، كي جرحتني فهداك النهار،... ما نسيت والو بصح سمحتلك لخطر نحبك، تنهد جبد ڨارو شعلو و قالي تشكي في حبي ليك؟ حطيت راسي على رجلو غمضت عينيا قتلو لالا، دخل صباعتيه ما بين خصلات شعري يحكلي بلعقل و قعد يتكيف و ساكت كي لحق للڨارو الثالث نحيتهولو و رميتو قتلو على وجهي خلاص حبس و الله غير نحبك و مارانيش نلوم فيك بالاك أنا تان سبب فالشي لي صرا ماشي غير انت بصح تعيش ما تآذيش روحك.
نحالي راسي من فوق رجلو تكسل و جبدني لصدرو قالي بالاك ربي مازال ما غفرلي على وش درت فيك على هديك ما نسيتيش قتلو لالا ما تقولش هكدا أنت ماشي آذيتني برك تان رفدتني و حبيتني و حميتني بزافو دافعت عليا... تبسم و باس جبهتي قالي بصح هد الشي واجبي ما درتش فيك مزية، قتلو خلاص انسى هاد الأمور و ارقد غدوا تصبح خدام، دارلي براسو إيه و غمض عينيه بصح ما ارتاحش حسيت روحي عذبتو كي قتلو ما نسيتش و فكرتو بكامل وش غلط معايا.
غدوا منداك نضت على ال9 و نص دوشت  و حبطت.
مع الظهر جا تغدا و طلع باش يرقد جا ليه حرب قالو بابا عمي سليمان راهو عند الباب يحتاجك، قال دخلو للصالو راني جاي.
بقيت قاعدة مع هيام و نور و الحاج و أم سعد نشربو فلاتاي، نص ساعة منبعد رجع صراع دخل للهول تكسل وحط راسو على رجلي قال اخخخخ شحال راني عيان قالتلو الحاجة وش بيك؟ قالها راسي يوجع ميت بالنعاس قالتلو نعسان؟!! علاش حنا رانا نشوفوك ياك ظل في شومبرتك غالق الباب و راقد، تبسم و هو مغمض عينيه خزر فيا بنص عين و قالها مانيش نرقد يما نبات ساهر مع التلفون، نور و هيام تبسمو و هي تهدر على نيتها قالتلو يا وليدي اخطيك منو يضرك في عينيك قالها ما نقدرش يما والفتو لوكان نخليه نموت، هو مغمض عينيه يهدر و يتبسم و هيام و نور يضحكو و أم سعد فهماتو ما عجبهاش الحال و الحاجة مسكينة ماشي جايبا خبر قالتلو و الله يا هاد التلفونات لي رايحين يهبلوكم ما نعرف وش رايحين تنالو منهم قالها راكي تشوفي يا يما و الله ما نلنا والو و ناض وقف قالي راني طالع نرقد تطلعي؟ قتلو التلفون راهو مشغول حاليا و روشتلو بيدي باي باي ناض يضحك هو و هيام و نور، نطقت هيام قالتلي نوضي أهم حاجة التلفون ههههههه ، جا يطلع حبسو حرب رافد الآيباد ديالو قالو بابا وريلي كيفاش نلعب هادي قعد معاه فالدروج و قالو حتى أنت تعلقت بيه و قعد يوريلو و يلعب معاه.
قعد نشوف فيه كي يكون يدور فالدار ما نقدرش نحي عينيا منو، نعشق طولو الملامح و ليمانيار ديالو ضحكتو صوتو كلامو كلشي فيه.
أنا غايسة فيه حتى سمعنا صوت العياط برا الحاج و برزان وليد عمهم يقولو هدا علي حب يجيبلنا مصيبة، ناض صراع يجري يشوف وش كاين و هيام لحقاتو، هو وقف في الباب تع الكولوار قال للحاج بابا دخلو و خلينا نفهمو منو سمعتو بينا الجيران.
دخل برزان هدا يكون عم علي و خو إخلاص، سلم على صراع ودخلو للصالو، برزان كان مقلق قالو شوف أبو حرب أنت لي ربيتو بصح لوكان ما تحكمش فيه نفرغ رصاصة في راسو و نتهنى منو، قالو صراع فهمني وش دار علي قالو تضارب مع وليد أبو فراس حتى خلا دمو يشرشر و عمومهم كامل طلعو مع الارهاب حب يجيبلنا مصيبة، كي سمعاتو هيام رفدت التلفون عيطت لوليدها شحال من مرة بصح ما رفدلهاش، شويا هكدا دخل قالب خليقتو ضرباتو قاتلو انت معول تقتلني علاش نعيطلك ما ترفدش، ما قالها والو نحالها يدها و دخل لعندهم للصالو عيط عليه برزان و جا يضربو و صراع قالو اصبر نفهمو و الحاج بهدلو ما خلالوش عيط صراع قالهم خلاااااص وشبيكم عندي ساعة و أنا نقولكم خليونا نفهمو و عيط على علي قالو اقعد انت هنا تشوف فهمني وش صرا، قالو كنت قاعد مع صحابي و هو معانا كنا نحكيو على الوضع فالبلاد و هو مساند الإرهاب ما هدرت والو برك قلت الدين برئ من هاد الناس الهمجيين قالي و انت وش تعرف فالدين روح حوس على أصلك قبل إدا جداتك و خالك و يماك ولاد متعة..... قالو لوكان طرطقتلو راسو وليد كدا و كدا، قالو برزان راك تعطيلو فالحق فعوض ما تزيرو قالي يمال حبيتو يسب عرضو و يسكتلو قالو هادو إرهاب حبيتهم يزدمولنا للديور؟! إدا كاش ما صرا من تحت راسو أنت المسؤول ما تقولش ما قالناش، قالو يسب عرضو و حبيتو يسكتلو؟!! و إدا على هدوك الأوباش الموت وحدة و واحد ما مات قبل و لا مور أجلو.
قعد صراع وبرزان يديو و يجيبو فالكلام و علي خرج يغسل حكماتو يماه داوست معاه وياه أنت ماراكش ناوي تسر عليا و على خياتك خاف الله فينا حبيت يريبو الدار علينا و الحاجة بهدلاتو، و لداخل فالصالو قوا حس الرجال تكروشاو شويا و دخل صراع صاب هيام تضرب في وليدها عيط عليه عليييييي قالو انعم خالو و وقف قدامو قالو وش دخلك أنت فهاد الحكايات خصنا مشاكل ما صبت ما تخالط ما تزيديش تدخل معاهم في نقاشات كيما هادو و جيبلنا مصيبة استر على يماك و خياتك، أنا ما حبيتش نطيح بيك قدام عمك باش ما يطلعوش فوق راسك بصح مرة أخرى نسمع بيك هدرت فهاد المواضيع ما تلوم غير نفسك فهمتتتت؟ الله يسهل على كل واحد ما دخلش روحك فهاد الأمور تفاهمنا؟ قالو إن شاء الله خالو، غير دار صراع باش يخرج حكمت هيام علي تضرب فيه عيط عليها قالها بعدي عليااااا مانيش دراريييي خرج و خلاها تندب و تبكي و تقول يااااربي اعطيني الصبر ما صبت كيفاش ندير مع هاد الطفل و أنا و نور و الحاجة نهدنو فيها، جاز صراع للافابو باش يتوضى شافها تبكي قالها وشبيك؟!  مسحت دموعها و قالتلو ما بيا والو خويا قالها يمال علاش راكي تبكي؟ قالتلو و الله يا خويا غير عياني علي ما عرفت كيفاش ندير معاه قالها كيفاش تضربيه راكي تشوفي فيه دراري؟ قالتلو أنا يماه و على جال صلاحو قالها في دارك ماشي قدام نسا خوالو، الطفل رجع قدك فالطول الله يبارك و انت تبهدلي فيه و تضربي قدام النسا و حبيتيه يسكت، و زيد ياك رانا واقفين معاك عليه و البكا علاش؟ نوضي استغفري اتوضاي و صلي في عوض هد البكا و النديب.
دخل للصالو باش يصلي رحت لعندو قتلو صراع علاش تهدر معاها هكداك؟ قالي لمصلحتها راني نفكر فيها بلي ماراهيش وحدها و رانا في كتافها و نعلمها كيفاش تتعامل مع وليدها، المهموم عمرك لا تعطيلو الحق و تواسيه تزيدي عليه، اجبديلو اي غلطة و عيطي عليه باش يفطن مع روحو.
جيت خارجة قالي ليليان غدوا الصباح خارج ميسيو إن شاء الله وجديلي كابتي عينيا، قتلو اوووووو ماشي وقتها كامل وقتاش جي؟ قالي و الله ما علبالي يومين  سمانة ربي العالم.
طلعت وجدتلو وش قالي و حبطت للكوزينة نوجد فالعشا، دخل هو قعد فالكرسي و حط راسو على الطابلة اااااخ راسي راهو قد الطنبور، خزرت فيه بنص عين قتلو كامل من الشموع ديالك و ضحكت قالي أنا ما نرتاح حتى تخرجيها من عينيا .. نطالب بالتعويض ضحكت قتلو شوف اسيدي ههههه روح للدولة تعوضك على الشهرين لي مازال ما خلصتهم منبعد ارواح طالبني أنا قالي ما رحمتني الدولة ما رحمتيني أنت وين نروح؟ قتلو يا عمري غضتني ههههه، ناض حوطني بيديه و قالي يمال درنا لافار ما دام غضتك ضحكت قتلو روووووح راني نخدم دوك ههههه قالي حرام عليك غدوا إن شاء الله خارج ميسيو قتلو حبيبي ماشي دوك برك نكمل الشغل، همس في ودني قالي ما تخافيش ربي انت و تزيدي تقوليلي حبيبي حكمني من حناكي غير كان رايح يبوسني جات داخلة نور قالت ياخاااااه عليكم و هو في عوض ما يجبد روحو لعبها يعيط عليا حاكمني من حناكي و يقولي قلتلك اقليلي بدنجاااااال بدنجاااااال ما تسمعيش طرشة و زعما ضربني بكف تع ماشي بلعاني صغت اااااا ولا وجهو حمر من الحشمة حط يديه على عينيه شابع ضحك و انا حاكمة خدي غير خرجت كلاطيت بالضحك ههههههه قالي الله لا تربحك بعد هد العمر يحكموني فهاد الوضع من مقبيل و انا نقولك اطلعي لفوق، فتح الباب و خرج ديراكت من الحشمة، عاودت رجعت نور قالتلي ديك التبهدييييلة ما كفاكمش لفوق جيتو لهنا تكملو احشمو قلتلها و أنا علاش خاطيني ما رحت ما جيت قاعدة نخدم هنا هو لي فارغ شغل و جا يتحرش بيا ضحكت ههههههه قالتلي شوف ديك المسكينة خاطيها بصح و الله سيريو ردي بالك يحكمكم الحاج و لا نائل قلتلها حتى هو مسكين هرب من الحشمة ههههههه، قعدنا نخدمو و نحكيو حتى نسمعو الخبيط فالباب تع برا عيطت نور يا ستار وشنو هدا؟ طلينا من التاقة شفنا عموم صراع، صالح و عزام و ولادهم دخلوا مسلحين
رحنا نجريو للهول دخل محمد وليد سعد للحاج قالو جدودي وعمامنا جاو راهم يقولو رايحين يزدمو علينا على جال علي و هيام ناضت تبكي و تندب و الحاجة تدعي يا ربي الطف يا ستار استر، ولاد نور دارو حالة بالبكا طلعتهم لفوق، و انا رحت نجري للكوزينة طفيت النار و وقفت مع الحاجة و هيام نتصنتو على الرجال فالصالو، نسمعو فيهم يتعايطو و يقولو رايحين يتقتلو رجالنا من تحت راس واحد ما عرفتش يماه تربيه و نتوما ما حكمتوش فيه قالهم الحاج إدا نتوما عمومو ما قدرتلوش حبيتونا حنا نقدرو عليه، برزان قالهم كلما نجي نحكي معاه هيام ترجعها حكاية و تزعف هاي آخر تربيتها ليه وين وصلتنت و صالح يقولهم صراع لي ما قدرش يحكم فيه و هو يرجعلو المهم تخلطت لداخل و تزايدو بالكلام.
هيام مسحت دموعها و جات تدخل لعندهم ما خلاتهاش الحاجة قالتلها ماراكيش تسمعي فيهم خليني ندخل نفرغ قلبي ياك راهم غير الكرش و ما جابت ماكاش براوي، دخلت قالتلهم السلام عليكم من بعد إذن بابا و عمومي وخاوتي، جايين دوك تلوموني و تقولولي ما عرفتيش تربيه وين كنتو من نهار مات باباه الله يرحمو لحد الساعة ما كاش واحد فيكم حوس علينا و دوك تفكرتوني و تفكرتو وليدي، ياك عموم الدراري؟ كاش واحد فيكم دقدقلي فالباب وقالي وش تحتاجي وش ما تحتاجيش؟ علبالكم شحال في عمارهم و ما كاش واحد فيكم سقسى عليهم و كي يغلطو جيو تضربو و حبيتوني ما نزعفش؟ أنا ربيت راجل و فرحانة بيه لوكان جا مخنث لوكان راهو سكتلهم و هو يطعنو في عرضو، قالها صراع لالا ختي على حساب الشوفة الجماعة راهم خايفين و جايين يرميو اللوم على علي كي شغل ما سبوش عرضي و عرض يما و ختي قالو عمو صالح هادو ارهاب ياصراع قالو ايه منبعد حبيتنا هو يعفسو علينا و حنا نحطو ريسانا و لا كيفاش؟ قالو سليمان نقولكم حاجة و نتوما علاش حتى دخلو علي خلوها على صراع نروحو لعمومهم و نقولولهم وليدكم هدر على أبو حرب و يماه و ختو و تولي الجماعة ليه.
قعدو يتناقشو كاين لي قبل و كاين لي قال لالا.
رجعت للهول شفت علي قاعد و يماه تهدر معاه و تلوم فيه و هو حاط راسو و الحيرة فوجهو، دخل صراع قالي ليليااان روحي وجديلي حوايجي خفي، طلعت نجري و علي قالو خالو نروح معاكم قالو وجد روحك نديك.
دخل للشومبرة يلبس و يهدر مع روحو و مفرفش 3 مرات يرفد قرعة الريحة و يعاود يحطها قتلو علواش راك تحوس نجيبلك قالي تلفوني وين راهووووو قتلو هاوليك، رفدو و حبط يجري رفدت يديا و ندعي يااااااارب احميه من كل شر و رجعهولي سالم غانم.