مراهقة والاربعيني بلهجة جزائرية

59

#المراهقة و الأربعيني:

#الجزء59:

خرج صراع مقلق من الدار و الحاج راح لدار سعد.. أنا عاودت حبطت و قعدت مع الحاجة و نور و أم سعد.. نطقت الحاجة و هي زعفانة مني قالتلي و آخرتها معاك ليليان كيفاش.. قلتلها و أنا علاش ولا كامل يتبلاوني و ترجعو الظليمة عليا؟ قالتلي هدا كامل و مازالكي عايشة دور المظلومة و تزيدي تشكي ملفوق؟! عييتي راجلك حبيتي تجلطيه و تقتليه .. دواسكم مع الفجر و صوتك واصل لطرف الدنيا.. احشمي على روحك شويا و قولي الراجل راهو عيان.. وشنو أنت دوك ما راكي مرضياتو في فراشو ما راكي واقفة على ماكلتو.. راقدة حتى الثلاثة تع لعشية و مخلياتو كي الزوفري و هو جاي عيان من الخدمة، و فوقها تزيدي تلاقيه بالمشاكل.. غلقتي الباب على روحك و هو قريب قلعو عليك عمبالو ميتة و لا كاش ما صرالك طيحتي منو النص حرام عليك خافي ربي فيه شويا.. و لي تقتل كثر هو يضارب على جالك و يحامي عليك و يا ويل لي جاب اسمك على لسانو بالدونية بصح انت ما تشديلوش الخير... قلتلها هو لي راهو مقصر و شوفي... وريتلها صبعي و قلتلها شوفي وش دارلي لبارح.. اوقفي مرة وحدة مع الحق ماشي تحامي غير مع وليدك.. قالتلي ما تبلاكش لوكان ما تجاوزتيش حدودك معاه و عفستي على كرشو ما يدناش ليك..كل مرة يولي يشوفك كحلة من غلطاتك معاك و نحكمو وحدو بلاما تعرفي و نهدر معاه نرجعو للطريق و نحنن قلبو عليك بس أنت ما تستاهليش.. يليقلك واحد يقعدك بكف و ينوضك بكوتبيي.. الراجل دخل عيان لوكان جا فيك الخير تلاقيه بكلمة حلوة تقوليلي على سلامتك.. الله يعاونك.. شوفي هو صابك راقدة كومندا الغدا و قاعد يلف و يوكل فيك.. يتمنى رضاك بصح أنت و الله ما تستاهلي ذرة منو.. قلتلها واش واقيل راكي مستكثراتو فيا؟! علواش؟! مازالني صغيرة و ألف واحد يتمناني.. أنا قلت هكدا و هي هبلت قالتلي ما تحشميش تهدري هكدا؟ تع وجهك وليدي الله لا توصلك بصح كي ولات هكدا و الله العلي العظيم لوكان ما نزوجوش و نكسرلك هداك نيفك لي راكي رافداتو عليه و نجيبلو لي تعمرلو حجرو بالدراري و نخليك تندمي عليه ماراني بنت المرا و اشفاي على كلامي مليح.. وش ربح منك؟ قاعدة كي شجرة الزينة.. شابة بصح ما داها منك لا باللسان الحلو لا بالذرية.. راضي بيك و مطول بالو عليك و تزيدي تتكبري عليه هادي حلوة بالصح.. علواش راكي شايفة روحك عليه....
كي هدرت على الدراري قاستني بصح خليتها في قلبي و بلعتها.. نضت بهدوء و قلتلها براحتك لي قدرتي عليها ديريه.. و خرجت غلقت الباب مورايا سمعت نور قالتلها لالا الحاجة ما عندكش الحق تعايريها بالضناية هادي حاجة ربي سبحانو هو الرزاق ماشي بيدها علاش مسكينة...
طلعت قبالة لفوف و النار شاعلة في قلبي ما قدرتش نبكي بقات تحرق في حلقي.. قعدت ندور فالصالة رحت للصالدوبا تقييت كامل وش كان في كرشي من القلق.. دخلت لشومبرتي قعدت رايحة جاية فيها قابلني الفاز تع الورد رفدتها و خبطتها فالقاعة تشقفت ألف مورصو.. رفدت فراشي قلبتو..  جبدت ماكياجي، دراهمي، ذهبي،.. رميت كلشي فالقاعة و نقول بحرقة هدا لي راكم حاسديني عليه.. اديهم ياربي و اعطيني طفل و بديت نبكي... وليت نرفد فالدوزان و نكسر.. جبدت المقص و بديت نجبد في حوايجي من الخزانة و نقطع.. معليه قابلو نعد في خيمة و ناكل لقمة فالنهار بصح يا ربي ارحمنيييي.. اعطيني طفل نفرح بيه و نحبس هدرة الناس و معايراتهم.. رميت المقص و الحوايج و قعدت في وسط الخزانة.. حطيت وجهي ما بين يديا و انهرت بالبكا..
دقدقت نور عليا الباب و دخلت انخلعت كي شافت الشومبرة هكداك كانت جابتلي بونصمو و بومادة على جال صبعي.. قالتلي يا يما وشنو هدا قتلو لفعى هنا؟! و ذهبك علاش كسرتيه هكدا؟! وين راكي ليليان؟ شافتني داخل الخزانة قالتلي منيتك ديري على كلامها يا الجايحة؟ نوضي نوضي نداولك صبعك و خليني نخملك الشومبرة قبل ما يطلع راجلك.. قلتلها علاش جا صراع؟ قالتلي إيه جا و جابلك الدوا و سقساني عليك.. قلتلها روحي دوك انا نخملها و نقيها.. قالتلي نوضي برك اغسلي وجهك و طمي شعرك راكي تقول خرجتي من القبر.. كانت تهدر و تلم فالحوايج و تقول يا المخبوطة علاش قطعتيهم لوكان عطيتيهملي نتقلش فيهم حتى أنا حوايجي قدامو حتى وليت ما نقدرش نقابل بيهم.. شافت فيا قالتلي واقيل حلاتلك القعدة داخل الخزانة ادناي شويا خليتني نقعد معاك على حساب الشوفة القعدة فيها مليحة بزاف باش راهي عاجباتك.. تبسمت و قلتلها تعيشي نور خليني طرونكيل راهو وحد السطر في راسي لوكان نحطو في راس أم سعد تموت في دقيقتها.. قالتلي و الله غير تعملي فيا مزية لوكان غير تموت و نتهنى منها و الله غير نخدم قلب و رب في جنازتها و نشطح بروالي في الثلثيام ديالها  هههههه و بدات تغني و طرطق في صباعتيها..
دخل صراع شافها تفرفش كي صابها فالشومبرة عاود خرج بلخف و هي حشمت ناضت تجري حبطت جبتها من حوايجها تع لداخل و قالتلو ادخل خويا ادخل.. قالها معليش ختي خودي راحتك اسمحيلي ماكانش علبالي راكي هنا.. عطاتني البومادا و البونداج و قالتلي الله يسود وجهك شافني و أنا نغني و نشطح يا البهلولة.. فتحت الباب و هو دخل قالها ماكانش علبالي راكي هنايا دخلت ديراكت.. قالتلو ادخل خويا ما كاين والو برك هاد المهبولة راهي مشنفة و قاعدة فالخزانة ما حبتش تنوض.. هي حبطت و هو قعد يخزر فالشومبرة مشوكي و قالي وش صرا هنا ضرب اعصار في شومبرتي و أنا ما علاباليش؟ كي شفتو كلاطيت بالبكا قالي الله يعميلي عينيا و يكسرلي يدي هدا كامل كي ضربتك؟! اعطيني يدي اخرجي ملتم تشوفي.. مديتلو يدي باش نوض تخبط راسي فالخزانة زدت فالبكا و قتلو صراع راني حايبا طفل.. قالي معليش زيدي دللي عليا دوك نشريلك واحد من السوق.. يا بنتي نوضي علاش انت دراري باش قاعدة تبكي هكدا...
نضت قعدني قدامو فالبونك و قعد يمسحلي في دموعي و على شعري منبعد قالي احكيلي وشبيك حتى راكي تذبالي هكدا ياك كي جينا من تركيا كنتي كي الوردة وش صرالك؟ قتلو يماك.. قالي مازال ما تهنيت من كلام بابا دوك ولات يما.. وشبيها يما؟ حكيتلو وش قالتلي ( وعلاش ما كملتيش مزيتك و حكيتيلو وش قلتيلها تان باش تكون الأمور واضحة كثر 😑)
تنهد و جبدني لحظنو قالي خلاص ما تبكيش.. شحال من مرة قتلك ما نحوسش على الدراري.. قتلو بصح انا راني حايبا.. قالي لوكان عطالك ربي طفل معوق و لا مريض وش ديري؟ قتلو معليش.. قالي إن الله يرزق من يشاء بغير حساب.. انسى حكاية الذرية راني راسي لراسك فيها بركة الحمد لله.. اعطيني يدك باش نداويلك صبعك.. بدا يدهنلي فيه قتلو قطعت الحوايج و كسرت كلشي.. قالي حاجة ما تغلى عليك أنا نعاود نشريلك كلشي.. بوندالي صبعي و قالي و هكدا راكي تحسيه مليح؟ قتلو إيه.. قالي بصح نقولك حاجة.. قتلو وشنو؟ قالي بصح نور كيفاش تشطح هههه... ضربتو لصدرو قتلو  عينيك يزغدو اااا... قالي و الله والو دايرها كيما هيام برك تفاجأت ههههه...
قتلو وش صرا ما بينك أنت و باباك؟ قالي بابا ملبكري مكرهلي معيشتي.. كي كنت صغير كان يضربني باش يرضي مرتو و دوك كي كبر راهو يعاير فيا كي نحامي عليك و نسى روحو... قتلو هدي لي قالك البعير نسى عرورتو و شاف في عرورة خوه.. قالي الله لا تربحك على هاد المثل.. شدي لسانك و احترمي مهما كان لي راكي تهدري عليه بابا و راجل كبير عيب تزيدي فالكلام عليه...قتلو واحد ما قالو يدخل روحو ما بيناتنا و راني نشوف فيه هاد ليامات تشك نيفو في حياتنا.. أنا ما شكيت منك و انت ما شكيت مني و يقعدوا يحاسبو فينا.. حتى و كانوا والديك ما عندهم حتى علاقة بينا.. قالي وش حبيتيني ندير؟ ياك عيطت على آخر صوتي و قلت ما دخلوش رواحتيكم فينا بصح والو.. هربت منهم لصقو في تلايبي.. ادا عندك حل وحدوخر اعطيهولي.. ما حبش يحس بيا و يرفد عليا وجه الهم تع مرتو و يروح يقعد فالدار لي عطيتهالو.. هدا زهري قاعد مقابلني و يعس فيا كيفاش نوكل في مرتي.. قعدلي غير نقباح و نحاوزو بصح تان ما رايحش نسلك من الهدرة تع حاوز باباه باش يرضي مرتو.. كرهولي حياتي لا إله إلا الله محمد رسول الله.. قتلو علاش غير باباك؟ حتى يماك ولات ضدي (رانا وصلنا للمسقي البنات.. هادي لي قالك عطالها صبعو تذوقو كلاتلو يدو كاملة 🙃 )
قالي ما دخليش روحك في يما أنا نهدر معاها.. نوضي اغسلي وجهك و بدلي حوايجك نخرجك شويا تبدلي الجو ما تبقايش هنا تنوحي..
هو خرج و حبط لتحت و أنا نضت نجيب البالي باش نصلح سمعت يهدر مع يماه قالها راني حايب نفهم وش استفدتي كي عايرتيها بالضناية.. وشبيك يما وش صرالك؟ قالتلو انت عقلك خلاص داتو هاد الطايشة.. قالها انت تقول طايشة بصح أنا مجبور باش نرفدها و نحملها ما عندها حتى واحد من غيري، قوليلي وين تروح؟ قالتلو وش ترفد فيها يا وليدي هادي خلاص تفرعنت و واحد ما يقدر يحكم فيها حتى انت بلخف تسامحها.. قالها انا ما سامحتهاش برك كي آذيتها راضيتها.. هي الشي لي دارتو من حقها بصح ماكانش لازم تهدر لخطر إخلاص الكلب أطهر منها تعض و ما تنعضش و كي تعض تسمم.. قالتلو و مرتك زادت كملت عليها صوتها واصل لطرف الدنيا مع الفجر قفزتنا عمبالنا كاش ما صرا.. حتى خوك عيب يسمع حسها هكداك..  قالها يما هدا زهري و هدا مكتوبي ياك أنا منهاري حاطني ربي في امتحان و يختبرني.. رفدت مسؤوليتك انت و اختي و أنا صغير.. منبعد جا الدور على بابا و خاوتي و تعلقو في رقبتي.. و دوك زادت هاد الطفلة الطايشة و ما عندها حتى واحد نعاتبو عليها.. و كيما تحملت مسؤوليتكم من قبل و رفدتكم مجبور دوك باش نزيد نتحمل مسؤوليتها و نرفدها.. وش حبيتيني نديرلها؟ نحاوزها؟ قالتلو ما تحصلهاش فالمسؤولية أنت تحبها و ماشي موراها كي لعمى.. قالها وعلاش ما نحبهاش؟ أصلا وش فيها حاجة ما تنحبش؟ قالتلو من غدوا نجيبلك ما خير منها.. قالها و أنا بحورية البحر ما نبدلهاش.. كيما انا عندي عيولي و راهي متحملتني أنا تان يلزمني نتحملها بعيوبها.. و زيد ما شفتش كي هدوءها و صبرها.. كي تخطفت و طحت شكون رفدني من غيرها؟ شحال من ليلة كي ما نشربش دوايا نولي كي المهبول و نوض نكسر الدنيا فوق راسها هكداك و ما هدرت ما شكات و فوقها جي تبوس راسي و تقولي ما تهتمش المهم عندي تبرا و ترجعلي بخير.. هدا كامل و حبيتيني ما نتحملهاش؟ اما على الصوت ماكاش واحد ينقاش و ما يعيطش و هي ما عندهاش من غير صوتها باش دافع بيه على روحها.. واحد ما راهو مخليها في حالها اخطيوها.. أنا و ياها راجل و مرتو كيما أي كوبل يداوسو و نتوما وش دخلكم فينا؟ والله غير مليت حسو على رواحتيكم شويا و خليونا طرونكيل و الله ما معيشة هادي.. قالتلو أنا ما نرتاحش حتى تتزوج بالاك نشوف ولادك من غيرها.. قالها يما و أنت وش علاقتك بينا؟ ترتاحي ما ترتاحيش وش راحلنا أنا راضي بحياتي.. قالتلو يعطيك الصحة يا صراع وليدي دوك رجعت ما عندي حتى راي عليك.. قالها يما ما تدخليش ما بيني و بينها خلاص قتلتيني وش صرالك عمرك ما حقدتي على عروسة.. وجدان و ما كنتيش تكرهيها جاتك غير على هادي؟ ما فهمت إدا هدا نصيبي و لا نصيب هاد الطفلة لي ما عندها حتى زهر معاكم..
خلاها و خرج شافني قاعدة فالدروج نتصنت عليهم ما قال والو طلع لفوق بلخف منبعد دخل نائل و الحاج يتعنكر فيا خليتو و طلعت لفوق دخلت للشومبرة صبت صراع يتكيف قربت ليه بستو من خدو و قعدت على رجلو و حطيت راسي على كتفي و جهي فرقبتو.. تنهد.. قتلو وش كان رايح يصرا لوكان ماكان حتى واحد في حياتنا لا باباك لا يماك لا أم سعد لا إخلاص.. كيما كنا في تركيا.. قالي لوكان عشنا اسعد كوبل.. قتلو وعلاش ما نعيشوش؟ قالي ما نقدرش.. قتلو علاش؟ قالي و نخلي أهلي؟! كيما نحبك نحب يما و ما نقدرش نخليها.. حتى بابا مام آذاني بصح يقعد بابا وش في يدي نحاوزو؟! وين نروح من ربي؟ قتلو و آخرتها كيفاش؟ قالي ربي يعملها تاويل.. خليك معايا نرتاح.. حوط خصري بيديه و قعد يشوف فيا منبعد باسني و جبدني لعندو.. كنا بزاف متوحشين بعضانا من قبل الجنازة و هو ما صدق جوزها معايا تقول عرسان في ليلة دخلتهم حتى أهلو و نساهم قعد مقابلني ما خرجناش من الشومبرة حتى ال2 تع الليل لخطر جعنا.. حبطنا كاش ما نصيبو فالكوزينة.. كانوا كامل راقدين كلينا و طلعنا دوشنا كيف كيف ما رقدناش حتى قريب طلع النهار..
في هداك النهار كان الجمعة صبح راقد حتى للظهر ناض صلى و رجع رقد قدامي ما نضناش حتى ال4 تع لعشية.. كي شافنا الحاج حبطنا قال للحاجة قلنالو أهدر معاها على الرقاد حتى نص نهار زاد هو رقد معاها ما فهمنا هي لي راهي تعلم فيه و لا هو لي راهو يعلم فيها.. ما واجبوش صراع و قعد مع نائل و أنا رحت نوجد لغدا لينا حنا الزوج.. شويا و جا قعد معايا فالكوزينة بقى يضحك و يڨصر معايا و حنا ناكلو..
راح موراها لدار سعد و رجع قالي وجدي روحك نخرجو نحوسو.. خرجنا مع بعضانا و هو مشعلي الغنية تع ( سمراء من قوم عيسى ) و بدا صراع يغني معاه كي قال ( قولي يا حلو منين الله جابك خزن جرح قلبي من عذابك ) و يأكد على المقطع لي يقول فيه ( هم هذا نصيبي و انجبر بيا لا انا اتوب ولا الله يهدي ) .. قتلك ماشي انت ما تسمعش الغنا؟ قالي هدا ناظم الغزالي كلامو موزون و نقي ماشي كيما الغنا تع هاد الوقت ما عندو حتى معنى.. قتلو يعني ناظم ماشي حرام.. قالي اوووو..  هانا طفينا دوك وليتي تحوسي على الحلال و الحرام.. قتلو راني نقلد فيك برك.. شاف فيا تبسم و قرصني من خدي و باس يدو قالي عاودلي هاديك تع كي يقول قولي يا حلو.. قتلو واش عجباتك؟ قالي ايه هههههه.. تعشينا برا و دينا معانا شويا فاكية و ديسار و رحنا لدار   هيام سهرنا معاهم غير الضحك و الڨصرة.. كي لحقت ال11 تع الليل رجعنا للدار صبنا نائل قاعد فالجنان و يتكيف و مشعل الغنا فالتلفون و يسمع.. ڨارا صراع الطونوبيل و عيطلو قالو غير لخير أبو فهد علاش راك هكدا مهموم؟ قالو لالا ما بيني والو خرجت من الهراج تع الدراري برك.. عطالو صاشي تع ديسار و قالو هاك و ادخل اسهر معاهم ما تقعدش وحدك هنا.. شدو عليه بصح على حساب الشوفة ماكانش يتهادر هو و نور...
أنا طلعت للشومبرة و صراع راح لعند يماه.. بدلت حوايجي و وجدت روحي لسهرة معاه كيما يحب الخاطر.. نضنا الصباح هو كان مرتاح حتى لتم.. خرج على ال7 راح شرا الزبدة و رجع قعدنا فطرنا من غير نور بلخف جبدت ولادها و دخلت لشومبرتها كان تبان مقنوطة.. قالي صراع اديلها تاكل هي و ولادها..
جا سعد هو و ولادو لي ماتت يماهم قعدو يهدرو فالصالون و أنا رحت لعند نور ديتلها تفطر.. صبتها قاعدة فوق البونك حاطة راسها ما بين يديها و ولادها يتباكاو.. كي شافتني دخلت قالتي جوزي علاش تشقي في روحك و الله ماني قادرة ناكل.. قلتلها ماشي كيما تحبي كولي يلا و أنا ندي الدراري.. رفدت عابد و جيت رايحة منبعد قلتلها نور وشبيك ماراكيش مليحة.. قالتلي رايحة نموت و هو ما راهوش حاس بيا كامل.. الدراري و الدار و العايلة كامل فوق راسي.. نقولو نروح لدارنا يقولي ماشي دوك.. قرعة ريحة كي النسا اشتقتها.. جامي يقولي كي الرجال وش تحتاجي.. ما يشوفش في وجهي منبا.. ما نقدر نطلق ما نقدر نبقى معاه.. يظل مع التلفون ولاتي غير بعمرو يستيكي و يبيش و ما نعرف وين يروح.. و لوكان نحكم تلفونو يهبل.. قلتلها علاش ما يعطيلكش ماراهوش يخدم؟ قالتلي ملي طاحت المنطقة في يد الارهاب و خدمتو بدات تنقص و لي راهو يصورها يصرفها مابينو و بين الدراري أما أنا محسوبة مع الميتين جامي يتفكرني يتفكر اسمي غير باش نخدم.. قلتلها ما تعمريش راسك شدي في ربي و ريحي تاكلي انت و ولادك وقيل ولا نهار ليك و نهار ليا هههههه..
بقيت قاعدة معاها باش ما نقابل سعد ما نشوف خليقتو.. و هي مقنوطة كملت كلات و قعدنا نڨصرو و نضحكو منبعد خرجت كملت شغل الدار و طلعت للشومبرة صبت صراع مع اللابتوب ديالو.. قربت ليه و قتلو صراع.. قالي وي عينيا.. قتلو نحتاج 150 ألف.. قالي الدراهم راهم فالخزانة عمري و مفتاح الخزنة تصيبيه فالبورطفاي ادي وش حبيتي.. قتلو ماشي ليا لنور مسكينة راهي مداوسة مع نائل ما يعطيها والو حتى لول لبارح كي شافتني قطعت حوايجي قالتلي لوكان عطيتيهملي و ما قطعتيهمش.. رفع راسو قالي وشنوووو؟!! وصلت بينا الدنيا لهاد الدرجة؟ مرت خويا في داري محتاجة و حنا لا خبر.. بالاك راهو بلا خدمة و ساكت.. قتلو ما نعرف و هو ما قالك والو على خدمتو؟ قالي تعرفي نائل يهدر ولا يشكي؟ أنا علبالي بلي نقصت الخدمة.. ماشفتيهش بلي خلا سعد و جا قعد هنا لخطر علبالو بلي سعد يتكل بزاف و هو دراهمو ما تشوفهمش.. حتى باش يكري ما  قدرش..
فتح الخزنة ديالو جبد 300 ألف و قالي هاكي روحي اعطيهالها قوليلها حطيها مصروف في يدك ليك و للدراري و كي تحتاجي قالك أبو حرب تجي تقولي راني خوها ما تحشمش مني..
ديتهم و حبطت لنور كان الباب مفتوح و هي تطوي فالحوايج قلتلها جبتلك حاجة.. قالتلي وشنو؟ قلتلها هادي 300 ألف عطاهالي صراع ليك و قالك لي تحتاجيها قوليلي..كي شافتهم حضنتني و قالتلي الله يفتح عليكم و يحفظكم يارب بجاه الحبيب المصطفى يعطيكم الصحة في زوج.. قلتلها مادرت والو الناس لبعضانا و رانا خيات و إدا حبيتي تروحي لداركم نهدر معاه و نوصلوك أنا و ياه.. فرحت بزاااف تبسمت معاها و خرجت رحت لصراع حكيتلو على فرحتها حضني و قعد قدامي قالي علبالك شحال كبرتي في عيني.. قتلو علاش؟ قالي لخطر تفقدتي أهلي و طلبتي مني ليهم.. قتلو أنا ما نكره حتى واحد بصح عمايل اهلك فيا ما تنبلعش على هديك ما نحبش باباك و أم سعد و سعد و دوك مام يماك وليت ما نحبهاش ( جابتها مليحة منبعد عماتها 😑 بعدا تقولو في وجهو ما نحبش باباك و يماك 😮‍💨)
ضحك قالي ههههه نحسك دراري و ذاتك نقية و هادي أكثر حاجة حبيتها فيك.. ما عندكش زوج وجوه لي تكرهيه تستعرفي و ما تجامليش ولا تبلعطي ( يا عمريييي فرحان بيها 🙄 هادي حنا فالدزاير نقولو عليها ألعبها بهلول تشبع كسور يااااا موسيو صراع 😒)
قتلو راك تشوف و هكداك و ما عنديش الزهر.. أنا هكدا لخطر ما تربيتش في بيئة معمرة بالحيلة و زيد واحد ماكان يضربني.. يحي تبدل كي انضم للارهاب كان كي يزعفني غدوا منداك يجيبلي كادو و يصالحني و يبوسني بصح أهلك يلزملهم وحدة منافقة لخطر هوما هكدا ( اسمع القصف على اصوله يا البرورو 🙃)
قالي ما توليش كيما هوما و لي يوصلك أنا لي نرد عليه في بلاصتك بصح حافظي على اخلاقك و ما تتأثرين بيهم.. قتلو و أنت؟ قالي وشبيني أنا؟ قتلو شكون لي يردلك كي تآذيني؟
قالي قلبي لي يردني.. في كل مرة تغلطي و تتجاوزي حدودك معايا.. كي نكون مقلق نقول ما نزيدش نخزر في وجهك و غير ندور و نصيبك تبكي ننسى وش قلت و تتحرق روحي كي نآذيك.. و الله ما كنت هكدا.. وجدان كانت لوكان ترفد عينيها فيا و لا ترفع صوتها تخلاص عليها مال.. مرة عيطت لأهلها باش يجيو يديوها و حاوزتها بصح معاك صح تبدلت كي نكون معاك نولي صراع وحدوخر.. ما تعمريش راسك بالهم لخطر قلبي مستحيل يتخلى عليك أنا طفل و أنت يماه.. تبسمت و حظنتو ...
شويا هكدا قالي اجبديلي القميص ديالي نلبس ليوم يتفاصلو فالحسيفة تع دار عمي.. قتلو علاش مازالو كاينين هاد الحكايات تع الثأر و الحسيفة ياك كانو بكري برك.. قالي لالا مازالهم لليوم شكون قالك غير بكري؟!  ديك النهار برك فالقعدة تع الشيخ ريكان داو الدية تع القتيل.. صح نقصت لخطر الناس فقرت و ما عندهاش باش تمد الدراهم بصح ولاو يمدو المرا في بلاصة الدراهم و يتناسبو باش تولي مابيناتهم صلة رحم و قرابة و ينساو الثأر و ما يكونش دم ما بين عشيرة القتيل و عشيرة المقتول.. قتلو بصح المرا علاش مسكينة يضحيو بيها.. وش ذنبها باش تعيش مذلولة و تروح ضحية ثأر.. قالي ماشي شرط تعيش مذلولة.. على حساب الناس لي تروح ليهم إدا كان في قلوبهم الرحمة ولا لالا بصح عموما هاد التقليد ماشي محبب لخطر فيه ظلم.. (البنات هادا وش صرا في لليليان مع لول.. كي عابد وسخ سمعتها اهلها طلبو باش يتزوج بيها و يسترها و كي قتل يحي عابد دخلت حكاية السترة مع حكاية الثأر و داوها لصراع و عشيرتو كانو يقولو داوها دية في بلاصة عابد على هديك مستحيل صراع يقتل يحي لخطر تناسبو.. هدي تقاليد العشائر فالعراق.. باش برك نوضحلكم الصورة)
لبس صراع قميصو و قعد يسڨم في روحو و أنا نشوف فيه و نقول في قلبي دوك يشوفوه النسا و يعجبهم بصح لوكان يلبس العقال على راسو ما يوليش شباب .. قتلو صراع علاش ما تلبسش عقال خير.. قالي كيفاش نلبسو و بابا حاضر فالجماعة عيب.. قتلو باباك ما يحل ما يربط ما يدير فيها والو البس العقال انت وشبيك.. قالي ليليان شدي لسانك و ترباي فالهدرة راكي تهدري على بابا فهمتي؟ سكتت.. غير خرج قلت يااارب افقس عين كل وحدة تشوف فيه..
[ البنات هنا صراع لي راهو يحكي....]
قال صراع:
رحت أنا و الحاج و عمومي لمضافة الشيخ ريگان تفاصلنا مع العشيرة الثانية على الدية و كي خرجو قعدنا نتناقشو مابيناتنا منبعد بدينا نهدرو في مشاكل أهلنا.. فجأة قدام كامل الجماعة وقف الحاج و قال أبو بندر نتشرف باش نطلب يد بنتك لوليدي أبو حرب على سنة الله ورسوله.. و عمي صالح قالو شكون كيفي أبو صراع الطفلة بنتكم.. أنا قعدت مشوكي و الرجال بداو يباركولي و أنا غايس في وجه الحاج فشلت.. درت ليهم تبسمت و نضت تعذرت منهم و خرجت.. الدم حسيتو طلع لراسي.. أنا طفل صغير باش يحطني فهاد الموقف؟!! طلعت في طونوبيلتي و عيطتلو ما رفدش عليا..
[ دوك ليليان لي تكمل تحكي وش صرا...]
قالت ليليان دخل صراع وجهو ما يتفسرش.. قلت ياربي و استر خرج مرتاح رجع هكدا وش صرا.. وقفت قدامو طبعني بالزعاف و دخل للهول خبط الباب على نائل و نائل خرج مخلوع قالو وش كاين؟! قالو دوك تعيط لباباك ال****** يجي ليوم نقلب الدنيا على راسو..
حبينا نعرفو وش صرا ما فهمناش.. أول مره صراع يطيح بالعيب على الحاج و كان مقلق كثر ملي موالف ما قدرناش نهدنوه.. كانت فالكوزينة طابلة جديدة تع الزجاج ضربها قلبها طرطقها و بدا يرفد فالكراسا و يرمي دڨدڨ الدنيا...
كامل بعدنا عليه واحد ما قدر يقرب ليه لي سبها و طيحها في هداك النهار ما يعلم بيها غير ربي تالمو كان يعيط و عروق رقبتو خارجين ما فهمتش وش كاين يقول فهمت من كلامو غير كي قال باباك ال..... حب يلصق القح..... في رااااسييي....
دخل الحاج و عمهم عزام للدار ناض يعيط قالو في منامك و ما نتزوج بنت خوك ال..... و الحاج قالو أنا هادي ما نحتاجهاش و ما نحتاجش ولادنا يجيو منها و لوكان ما تديش بنت عمك ماراني باباك ما راك وليدي و الله يا صراع غير نتبرا منك ليوم الدين.. و صراع يطير و ينزل حتى خفت باش نغير على قد ماكان زعفان و مقلق كان كل همنا يتهدن..
قعدو واحد يرفد فالكلام و لوخر يحط  و مع لخر خرج الحاج من الدار و هو يسب فيا و صراع رفد المفاتح تع الطونوبيل و خرج ما عرفناه وين راح...
ام سعد لبست حجابها وخرجت مور الحاج و هي تقول للحاجة حنا رانا خرجنا و خلي هاد الدار لهادي لي ما عندهاش الأصل تفصل و تخيط بمساطش وليدك..
هي خرجت و نور خبرتني في وذني قالتلي كلشي من تحت راسها أنا سمعتها تقول للحاج اخطب إخلاص قدام عمومو و تشوف كيفاش يقبل بيها.. هي لي تضني معاه لي يرفد اسمكم ماشي هادي لي ما عرفنا أصلها لا مسيحي و لا مسلم حتى خوها و ارهابي..
دخلت الحاجة علينا للكوزينة قالتلي وش تزيدي فوق هاد الشي تقول عندك ثار مع وليدي حبيتي تقتليه كلشي بسبابك.. لبست حجابها و خرجت..
وشبيهم هادو فوق ما يخطبولو يزيدو يلومو فيا..
بقيت غير أنا و نور فالدار و الشي لي كان مطمني أنو صراع ماكانش قابل بهاد الزواج و رافضها كثر مني علابيها كان راسي بارد و ما خممتش..
فالليل جا صراع زعفان قتلو و دوك كيفاش؟ عيط عليا قالي أسكتي عليا راهي واصلتلي لفوق راسي أخطيني..
الشي لي عرفتو أنو الحاجة داوست معاه في دار هيام و قالتلو أنا حلفت بلي نزوجك و ما نرضى عليك حتى تتزوج منبعد كبرت ما بيناتهم و هي راحت لدار الحاج..
صراع رقد حتى للصباح ما هدر والو و غير ناض راح يخدم كلمة ما نطقهاش..
كي لحق الظهر نائل دا نور لدارهم و قعدت وحدي فالدار.. سڨمت روحي و ما كييت قلت نبدل نفسيتو.. جا من الخدمة عيان لاقيتو تبسم معايا تبسيمة ثقيلة.. باسني في خدي و دخل تكسل فوق الكنابي قالي وين راهي نور و الدراري؟ قتلو داها نائل لدارهم.. قالي و خلاك وحدك فالدار؟ قتلو معليش غلقت و قعدت نستنى فيك..نحطلك تتغدا؟ قالي لالا مانيش قادر  ناكل نطلع نرقد..
طلع لفوق ما ردش البال منبا بلي كنت موجدتلو روحي ما عندو خاطر لحتى حاجة.. مع العصر صونا تلفونو عيطلو نائل  قالو بلي الحاج دا الحاجة و راحو لدار عمهم صالح بدا يسب و كوبا في وجهو.. منبعد رفد التلفون عيط لعمو قالو عمي حبس أنت الحكاية من عندك أنا إخلاص دايرها كي ختي مانحتاجهاش عندي عائلة و ما نحبش المشاكل.. و عمو قالو كيفاش ترفض بنتي راك بايع دمك و لحمك على جال مرتك.. قالو و مرتي وش دخلها فالوسط أنا لي مارانيش قابل بهاد الزواج..
عمو راح شكاه للحاج و لعمومو لوخرين و هوما يومين و هوما رايحين جايين باش يقنعوه.. قالهم افهموني أنا إخلاص ما نتزوجش بيها علاش بالسيف؟! و هوما قالولو بصح بنت عمك و طلبتها فالديوان قدام الشيخ ريكان و الجماعة عيب طيح بنا قدام الرجال.. و دخلو في حل و اربط و قوى الحس ما بيناتهم حتى خرجو من الدار زعفانين..
هو مع لول قال نقصان هم و برد راسي من الحس بصح حالتو ما تقولش هكدا.. كي كنا قاعدين وحدنا فالدار و ما كاش حتى واحد معانا حسيتو معذب و عايش الوحدة تقول راهو فالمنفى.. هنا أنا خفت رحت ليه قتلو صراع وشنو الحل دوك؟ قالي خليها حتى تصفى وحدها.. قتلو و إدا ما صفاتش؟ قالي ليليان أنا إخلاص مانحبهاش و لوكان تقعد آخر مرا فالدنيا ما نشوفش في وجهها.. أنا نجيب قح....  لداري علاش هبلت؟!
كي قال هكدا طمنت بصح وليت نتمنى يرجعو أهلو كي شفت حالتو النفسية تدهورت.. علبالي ما بيه حتى واحد بيه يماه ما قدرش يعيش بلا بيها تقول ماهو راجل و الشيب بداه في شعرو.. متعلق بيها لدرجة كبيرة تقول مازالو طفل صغير و محتاجها و كان كل ليلة يعيطلها فالتلفون..
جازت زوج سمانات و حنا على نفس الحالة غير نائل معانا برك.. ما رجعت لا الحاجة لا الحاج و عمومو ما يهدروش معاه.. حتى وحد النهار مع الظهر دخل الحاج و الحاجة و عمهم صالح و مرتو و إخلاص سلمو عليا و إخلاص جات حضنتني و سلمت عليا تقول حبيبتها.. تشوكيت.. شويا و شفت صراع دخل موراهم يتبسم في وجهي بصح ماكانش على طبيعتو ، سلم عليا قتلو وشنو صالحتهم؟ قالي إيه.. قتلو كيفاش؟ قالي رحت تفاهمت معاهم و قعدنا و انحلت.. قتلو إيه أحسن.. دار لنور قالها راهو الحوت فالطونوبيل حبطوه.. رحت انا و نور حبطناه و حطينا الغدا و قعدنا فالطابلة ناكلو بصح صراع كلا شويا برك حسيتو مازالو مقلق و الوضع يبان ماشي طبيعي ما رتحتش..