مراهقة والاربعيني بلهجة جزائرية

28

#المراهقة و الأربعيني:

#الجزء28:

صراع كان داير في بالو بلي نخاف و لا نحشم و لا مازالني صغيرة و راني نتفشش عليه ما كانش فاهم بلي ما نعرف والو على هديك كان مرات يساعفني و مرات يتقلق.
في هداك النهار مور ما كسر الكاس و تقلق خرج برا و ما جاش حتى لليل صابني مفرشة في شومبرة الحاجة قعد يخزر منبعد حطلي الصاشي تع السقايط و طلع لشومبرتو.
غدوا منداك نضت على ال7 باش نوجدلو الفطور، حبط بلاتونو ميليتار ديالو صابني فالكوزينة شاف فيا جبد كرسي و قعد صباح الخير ما قالهاش، حطيتلو فوق الطابلة و فتحت باب الكوزينة لي يطل على الجنان وخرجت عيطلي قالي ايييبييي... رجعت قالي وين خارجة قتلو للجنان نشم هوا نقي قالي اقعدي تفطري قتلو ما ماناكلش قالي و الله لا مليح و فوقها انت لي راكي زعفانة! دورت وجهي عليه قالي راني نهدر معاك قتلو علاش سقسيتني باش نواجب؟ قالي زيدي زيدي عيطي سمعيهم قتلو حنا تان عيباد كيما انت و كي تسب و تعاير نزعفو، انت ما تقبل حتى واحد يسب باباك و هو حي يرزق و انا نهار كامل و أنت تجبد في بابا و هو ميت و تحبني نتقبل و عادي علاش؟ لخطر أنا مرا و انت راجل هكدا؟ ناض حط التلفون فوق الطابلة و قالي هدا تلفونك راني خارج و ادعي ربي باش تطرطق عليا كاش بومبا تتهناي مني و من الهمجية ديالي و جا خارج قتلو ربي يسهل عليك دار وجهو عليا و قال قلة أدب قتلو خلينااك التربية و الحشمة ليك و رفدت التلفون و دخلت للدار.
كي كملنا الشغل طلعت لعند نور عاونتها فالدراري خزرت فالشومبرة و قلتلها نور راكي انت و نائل عادي؟ قاتلي كيفاش محسوب؟ قلتلها يعني مرا و راجلها؟ قالتلي لالا غير فالورق انا نرقد فوق البونك و الدراري في بناكهم و هو يرقد فوق الكنابي قلتلها نائل ناس ملاح بزااف  قالتلي علاش أبو حرب وش خصو؟ قلتلها مقلق و ما قدرتش نفهمو قالتلي إدا على القلق كامل مقلقين قلتلها اواااه ماشي كيما صراع قالتلي صح هو فوقهم بصح قلبو و الله ما تصيبيه يابنتي الراجل باين بلي يحبك بصح انت تان اقفزي على روحك شويا قلتلها وش حبيتيني نديرلو قالتلي كيفاش وش ديري، شومبرتك لفوق و انت مخلياتو و راقدتلي لتحت؟ قلتلها وش من شومبرة لي راكي تهدري عليها، كي يحبني تولي شومبرتي و كي يزعف مني يقولي اخرجي برا، خليني نقعد لتحت احسن و كي يحتاجني راهو يعيطلي مانيش رايحة نطير قالتلي و لوقتاش تبقاو هكدا؟ يا بنتي روحي طلعي حوايجك لفوق و شوفي إدا يقدر يحاوزك انت لي راكي مطيحة بروحك، قلتلها علاش حتى نرمي روحي عليه مانيش حايبا قالتي كيما تحبو هدي حياتكم ربي يوفقكم و يصلح ما بيناتكم.
رحت غسلتلو حوايجو و طلعت نشرتهم فالسطح كي جيت حابطة شفت صراع جاي و رايح لشومبرتو شافني عيطلي ليليااان قتلو انعم قالي ارواحي هنا، رحت كي لحقت عندو فتح باب الشومبرة و دارلي براسو ادخلي، دخلت نحى حوايجو و قالي اقعدي هنا ندوش و نجي قتلو راني مشغولة قالي سمعتيني وش هدرت قتلو و أنا قتلك راني مشغولة قالي ما عندك حتى شغل من غيري فهمتي؟ قتلو راني حايبا نحبط قالي راكي تخشني في راسك و لا واش؟ قتلو وش تحتاج؟ قالي علبالك وش نحتاج قتلو ماشي بالسيف راني حابطة نوجدلك تاكل قالي كليت و جبدني من يدي و قعدني على البونك قالي قتلك اقعدي هنا قتلو ماشي كيما تحب، وقت ما تنفحلك تسب ماليا و كي تتكالما يلزمني ننسى كلشي كي شغل ما صرا والو قالي و المطلوب؟ قتلو تطلب السماح.. على جال كي جبتلك ما سخون في عوض البارد قلبت الدنيا و دوك كي تكالميت حبيتنا نفتحو صفحة و عادي؟ لالا... قالي آاااا حبيتيني نطلب السماح قتلو إيه و تواعدني ماتزيدش تعاود قالي هيييهييي... ماشي انت لي تعلميني و تقوليلي نطلب السماح من وحدة باردة قتلو يمال خليني نحبط قالي قتلك تقعدي قتلو ما نقعدش و جيت رايحة حكمني من شعري قالي انت راكي تحوسي على الشر قتلو انت ما تحبني ما والو ظل تكذب عليا غير باش جوز صلاحك بعد عليا قالي دوك وليت كداب طبعتو حكمني هو ما حب يبعد و يخليني و انا ما حبيت نتهدن و نقعد و بقيت نطبع فيه و نضرب قتلو بعد خير ما نعيط و نلمهم عليك حاول يسكتني و حط وجهو على وجهي كي ما صبتش كيفاش عضيتو من ودنو حتى سال الدم و يجبد عليا بكف، طبعتو برجلي و نضت نجري للباب قالي صار تضربي ليوم نعاودلك التربية جا يجبدني فتحت الباب و جيت نصوغ حط يدو على  فمي جبدني و غلق الباب و بعد عليا قاعد يمسح الدم لي على رقبتو و ينهج عينيه حمورا قتلو اخطيني مانيش حاملاتك وليت نعيفك ما تحسش، مشى جاي لجيهتي حطيت يدي على راسي و غمضت عينيا عمبالي رح يضربني، جبدني من يدي طيحني فالقاعة و قالي اخرجي براا.. لوكان ما توليش تتمناي نخزر في وجهك و نجيبك مرا هنا ندللها قدام عينيك و تذلك و ديرك خديمة عندها ما نتسماش صراع و موراها عيفيني على روحك، نوضي اخرجي براااااا...
نضت نجري خرجت و دخلت للصالدوبا نبكي منبعد حبطت لشومبرة الحاجة جبدت حوايج باش نبدل قالتلي وش بيه صراع؟ قلتلها وليدك من نهارو مصروع قالتلي احشمي قادري روحك ماكفاهش الخطر لي راهو عايش فيه يوميا مع حالة البلاد و القتيلة تزيديها عليه أنت فعوض ما تساعفيه قلتلها ما تخافيش ما عندو ما يصرالو قالتلي اسمعي شدي لسانك و ما طيحيش القدر معايا سينو نتصرف معاك بطريقة ما تعجبكش، رفدت حوايجي خبطت باب الخزانة و خرجت رحت للصالدوبا و بكيت حتى شبعت، دوشت و بدلت حوايجي و خرجت.
سعد كان جا يدي قشهم لي قعد لخطر كانوا رحلوا نهار من قبل.
دخلت للكوزينة و شفت غوسات فالتلفون قلت نديرها، موالفة كل ما يكون عندي وقت نسيي حاجة جديدة و الحاجة لي تشريلي الدوزان ما تبخلش عليا بوالو تقولي تتعلمي بلعقل و تولي مرا تع دار.
نور كي رجعت فرحت الحاجة لخطر خفيفة و منظمة تمتم تكمل شغالاتها و تطلع لولادها ماشي كيما انا ندير حاجة مور حاجة ما نعرفش ندير هادي في هادي و كلشي على ضربة.
شويا هكدا جات لعندي نور للكوزينة و جابت ولادها  تلعب معاهم و أنا نخدم و نڨصر معاها حتى دخلت علينا أم سعد خزرت في وجهي قالتلي أنت هدا فواش فالحة ما عندكش الأصل، درت لنور درتلي براسها خليك منها، كي خرجت قلتلها وش تقصد هادي علاش راهي تغلط معايا قالتلي أبو حرب ما تهنالوش حتى يخليلك ليطراس و هي ما عجبهاش الحال قلتلها ياك عندها راجلها علاش راهي حاطة راسها براسي و حاسدتني عليه قالتلي الراجل عندو السكر و هي ما حملتش حبت تصغر روحها بالسيف مام أنا كي كنت مع عابد شيبتني كي تشوفني دخلت ندوش ديرلي مشكل و عابد يسكت و يوقف معاها قلتلها بصح هو علاش ما يدافعش عليك ياك مرتو قالتلي الله يرحمو الظلم لي رفدتو معاه ما يعلم بيه غير ربي سبحانو و خلي على النسا لي يضل من وحدة لوحدة قلتلها ماشي رجعولنا الملاك الطاهر قالتلي الدورو كان بالحساب و كلشي على يد يماه بصح أبو حرب كان غير يخلص يقسم ما بيني و بين هيام و حلا و يقولي اصبري ختي هدا راجلك مازالو طايش بصح يجي النهار وين يتسڨم و دوك كي عاودت وليت لنائل من النهار لولاني عطالي المفتاح تع الخزنة ديالو و قالي لي تحتاجيها انت و الدراري ارفدي من هدو حلالك.
حنا نهدرو و هي رجعت أم سعد ما تهناتش قاعدة تعاير يا لي فيك يالي في باباك و خوك يا كدا يا كدا ما حملتش درت ليها قلتلها وش كاين خالتي ياك كنت مع راجلي ماشي مع وحدوخر علاش راهي شاعلة فيك النار، انا قلت هكداك و هي جات تتلاح فيا وقفت نور مابيناتنا و هي كملت تسب و تعاير قلتلها قادري روحك خيرلك عيب عليك تهدري هكدا، زادت قوات الحس و تقولي دوك وليت انا لي ما نحشمش و أنت جاية تعلميني العيب ادا ما ربيتكش ليوم مانيش أنا، جات الحاجة تعيط علينا دخل موراها الحاج و هي ناضت تبكي و تقولهم على آخر عمري جي هادي لي ما عندهاش الأصل تهيني، و الحاج بدا يعيط عليا و قالي دوك يحبط راجلك يديرلك حد انت وليتي ما تحشميش و الحاجة تحاول تكالمي الحالة داتهم للهول و أم سعد نسمع فيها تقولهم يا انا يا هي في هد الدار.
قعدت فالكوزينة نكمل وش بديت قالتلي نور ياك قتلك ما تعانديهاش راهي تحوسلك غير على السبة علاش ما تسمعيش دوك ديرلك مشكل.
شويا هكدا و حبط صراع سمعهم عيطلي ليليااااان.. رحت ليه قالي ارواحي كان يهدر معايا بلعقل بصح علبالي كان يغلي لداخل، خزر في ام سعد و قالي وش بيك معاها قتلو ما قلتلها والو هي دخلت عليا ديراكت قالتلي فالحة غير في قلة الحيا و بدات تزيد فالهدرة، وش دخلها فيا إدا نطلع لعندك و لا نحبط لتحت و بابا علاش تسبو في كل دورة و تظل تصيبلي غير فالسبة قالي الحاج ماراهيش عدوتك باش تتسبب عليك قادري روحك قالي صراع سلمي على راسها قتلو ماشي مشكل نسلم على راسها و نطلب السماح بصح أهدر معاها قبل على السبان تع دايمن و تزيد تجبدلي بابا، كيفاش ياك حكيتلكم وش صرا كامل علاش ما تحاسبوهاش وش ذنبي باش ملي جيت و انا نسمع منها غير لكلام الطايح، قالي قتلك سلمي على راسها و ما نسمع حتى كلمة زيادة، سلمت على راسها و راس الحاج و وقفت مقابلاتو قتلو كاش ما تحتاج عمو؟ عيناني قتلو عمو لخطر علبالي يتقلق و تحسو هد الكلمة بلي هو كبير عليا بزااف، زير على يدو و قالي درڨي وجهك عليا، رحت للكوزينة و بديت نبكي.
حطينا العشا و دخلت للشومبرة جات ليا نور قعدت قدامي حطت يدها على رجلي مسحتلي دموعي و قالتلي علاش راكي حارمة روحك من الماكلة، نوضي على وجهي ما تخليهاش تأثر فيك و تستشفى يا الجايحة اقتليها بالبارد اضحكي احرقيلها قلبها.
نضت معاها بصح ما قدرتش ناكل سربيت كاس لاتاي و درت خبز و فرماج و رحت قعدت معاهم حكمت التلكومند و قعدت نزابي، حرب حب يشوف ميكي خليتلو و قاعدة ناكل دار ليا صراع قالي البورطفاي و التلفون راهم فالصالدوبا نوضي جيبيهملي رحت جبتهملو، زاد قالي الباتري راهي فابل روحي حطيه يتشارجا، صبت تلفون الحاج فلاشارج نحيتو و حطيت تع صراع قالي وين راهو ما شفتكش طلعتي قتلو درتو في بلاصة تع الحاج بيدما نكمل عشايا قالي نوضي طلعيه حطيه فالشارجور ديالي قتلو دقيقة نكمل عشايا قالي تاكلي الرهج نوضي، تخنقت بهدلتي قدامهم و هوما يشوفو، طلعت حطيتو في شارجورو صبتو 95% عرفتو يدير فيها بلعاني كي نكون واقفة ما يهدرش غير يشوفني قعدت ينوضني ، حبطت قعدت قالي نوضي سربيلي لاتاي قاتلو الحاجة خلي الطفلة تاكل نطقت نور قالتلو أنا نسربيلك و دارت ليا قالتلي اقعدي ختيتو قالها صراع ريحي نور و خزر فيا قالي وش هدرت؟ نضت سربيتو و عطيتلو الكاس و جيت رايحة لشومبرة الحاجة قالي وييييين؟ قتلو رايحة نرقد قالي ريحي كملي ماكلتك قتلو مانيش حايبا قالي يا تقعدي و تكملي عشاك يا نعرف وش ندير معاك قالتلو الحاجة وقفتلها اللقمة كاش ما قعد عشا قالها يما ما دخليش روحك، قعدت ناكل اللقمة وقفتلي من القنطة ما قدرتش نجوزها و حاكمة الدموع غير بالسيف.
كانوا يڨصرو ما برونشيتش وش كانو يهدرو حتى انتبهت لصراع كي قال هكدا يحبو.. زوج نسا فالدار و أنت الملك .. يتسابقو عليك و عليمن ترضى، دار ليه الحاج و ضحك قالو واش أبو حرب راك حايب تتزوج واقيل ههههه ياك ربي حلل 4..
نضت نجري للشومبرة رميت روحي فالفراش و قعدت نبكي، جات الحاجة نوضتني و قابلتني قالتلي ليليااان وش راهو صاري ما بيناتكم حتى يهدد صراع بالزواج قلتلها ما صرا والو قالتلي لالا كاينة حاجة وليدي و نعرفو كي يدير حاجة في راسو ينفذها و انت لي تخسري قلتلها كي شغل دوك راني رابحة، قالتلي الراجل يحبك ويقدرك ويخاف عليك و ألف وحدة تتمنى كيما هو و كيما معيشتك معاه قلتلها حبيت نروح لدارنا ما نقعدش عندو قالتلي وين تروحي يا بنتي ماراكيش تشوفي الحال كيفاش راهو شكون رايح يقدر يوصلهم، نحي هد الشي من راسك دوك و اطلعي لشومبرتك، نوضي روحي لراجلك يلا ما تخلينيش نستعمل معاك القوة، قلتلها ما نوضش ولا راكي تحاوزي فيا؟ قالتلي مانيش نحاوز فيك قتلك نوضي ترقدي في شومبرة راجلك و لوكان ندخل فالليل و نصيبك بحوايج الدار و راقدة و الله ما نتفاهم معاك يا ليليان، يلا بنتي نوضي اوقفي على روحك اغسلي وجدي روحك ادخلي في فراشك و استنايه ما تطلبيش منو السماح بصح ما تخرجيش من شومبرتك و تعطيلو فرصة يعمرها بغيرك، قلتلها الله يسترك الحاجة خليني في حالي مانيش في قوسطويا قالتلي راني نقولك اطلعي لفوق و ابكي حتى تشبعي راسي وجعني قلتلها وش حبيتيني نقولك يارب نموت و نتهنى منكم.
طلعت لفوق نبكي دخلت للشومبرة صبتو مع تلفونو قالي وش تسحقي؟ ما واجبتوش، قالي ما رانيش نهدر معاك؟ خرجت الفراش من البلاكار و جيت نفرش حكم يدي قالي حبسي حبسي شكون لي سمحلك جي هنا يلا اخرجي برا، قتلو نحي يدك قالي شوفي ما تخلينيش نكسر راسك دوك قتلك اخرجي قتلو ويييين نرووووووح نقتل رووووحي أنت تحاوز يماك تحاوز قالي ما تعيطيش قتلو خليني بعدني... نحرق روحي و نروح نرتاح عند بابا و رحت نجري جرا مورايا حكمني بيديه في زوج قالي وش رايحة ديري يا المهبولة قتلو اخطينييييي طبعني للبونك و خرج و غلق الباب بالمفتاح سڨمت الفراش و قعدت نبكي و نشهق حتى غفيت، حسيت بيه حط حاجة عند راسي و غطاني، شميت ريحة الماكلة صبتو جابلي اللحم فالخبز بصح ما كليتيش كملت رقادي.
كي فطنت الصباح صبتو يلبس رايح للخدمة قعدت متكسلة في الفراش كي سمعت طونوبيلتو خرجت حبطت لتحت.
كانت نور قاعدة بقات تهدر معايا و تهدن و تصبر فيا، كي جا وقت الظهر وجدتلو غداه و طلعتلو دور وجهو عليا ما كلا ما هدر.
تكسلت في فراشي و حكمت تلفوني و هو فوق بونكو مع تلفونو، شويا هكدا ناض لبس و خرج.
سمعت وليد نور يبكي رحت لعندها قالتلي ما حبش يشد صدري و غير يبكي، و ما كان فالدار لا الحاج لا نائل لا صراع، و أم سعد راحت لبنتها و الحاجة مريضة من رجليها ما تقدرش ترفدو و تديه حتى للطبيب ولات قالتلها الحاجة ادي حلا معاك و روحي يشوفو الطبيب و لوخر خليه عندي.
راحت لحلا ما حبتش تنوض تبات سهرانة مع التلفون و مع لي زادت زعفت من باباها على حكاية الخطبة صابتها سبة و اعتكفت في شومبرتها كي العادة.
جات ليا قالتلي ليليان نوضي تروحي معايا قلتلها انا نورمال بصح خفت من صراع ما يحبش يخليني نخرج قالتلي ما تخافيش ما يقول والو ما دامك معايا و زيد مضطرين ماشي رايحين نحوسو مانقدرش نخرج وحدي تعرفي الدنيا غير رجال بصح كي نكونو في زوج ما يدناوش، دارت ليا الحاجة قالتلي عيطي لراجلك و شاوريه ما تخرجيش بلا علمو، عيطتلو المرة الأولى ما رفدليش المرة الثانية كوبا عليا وليت لبست و قلت للحاجة كي يجي قوليلو.
كنت طميت مصروفي لي موالف يعطيهولي و مخبياتو عند الحاجة ديت هدوك الدراهم و خرجت مع نور، شدينا رونديفو و دخلنا للسوق جاي مسامي الكابيني تع الطبيب، شريت ليا باطة ماكياج صغيرة و حوايج تع الصيف و ليزاكسيسوار و هدوك الخناتش و ديت للحاجة طرف قماش و لحلا شال، رجعنا للطبيب صبنا مزال دالتنا ما لحقت و تلفوني خليتو فالدار و نور تلفونها طفى، حتى للمغرب باش جزنا كي خرجنا قالتلي ما نلحقش باش نشريلو الدوا كي ندخلو للدار نعطي لوردونونس لنائل هو يجيبلو.
حكمنا طاكسي بصح كي دخلنا للحومة و ورينالو الدار ظهر يعرف صراع و ما حبش يشد علينا الخلاص بصح نور حطتلو الدراهم و حبطنا، جينا نحبطو الدوزان شفنا نائل رافد وليد نور الثاني و يستنى و صراع خرج قالنا ادخلوا للدار دوك حنا نحبطو الدوزان و راح سلم على الطاكسيور.
غير دخلنا قالتنا الحاجة هدا وين جيو؟ الطفل دار حالة بالبكى ما حبش يسكت، جا صراع صابو يبكي حاول يسكتو بصح والو زاد رفدوا جدو كيف كيف حتى جا نائل و خرجو برا، قالتلها نور و الله غير الغاشي ما جزناش بكري حتى باش نشري الدوا ما لحقتش دخل نائل قالها رايحتلي للسوق و ما خممتيش بلي وليدك ما يصبرش و تلفونك طافي ملفوق ووووو... هو يبهدل فيها و هي ساكتة و وجهها أحمر بصح ما ردتلو حتى كلمة، نحات خمارها وقعدت ترضع في وليدها و محبطة راسها و نائل مقلق قعداتو الحاجة قالتلو ما تعرفش حالة الطبيب كيفاش و الطفل مريض، شرب الماء و قالها كيفاش طفيو تلفوناتكم نطقت أنا قتلو هي ديالها ديشارجا و أنا خليت ديالي فالدار ما رفدتوش معايا، كان صراع واقف دار ليا و قالي انت حسابك مازال معايا ما نسيتكش كيفاش تخرجي بلا شوري راكي تشوفي فيا ڨنطرة هنا؟ قتلو شوف في  تلفونك عيطتلك زوج مرات و ما تواجبش وش حبيتني ندير قالي و كي ما نردش معنتها تخرجي بلا علمي؟ وااااش واحد ما معمرلك العين انت و لا كيفاش؟ قتلو ما خرجتش نحوس الطفل مريض و قعدت تحلل في بنتك معتكفة في شومبرتها كي العادة و يماك مريضة ما قدرتش تخرج وحدها و نعيطولكم واحد ما رجع وش حبيتنا نديرو؟ قالي و خليتو طونوبيلات الدنيا كامل و طلعتو مع هداك؟ سور قعد يسقسي و يخزر و انت بلا حشمة تنفخي في روحك و قلتيلو انا مرت أبو حرب ااااااه قتلو ما قتلوش و اسمحلنا ما علبالناش بلي صاحبك داير هكدا و لوكان علبالنا بلي صاحبك ما نطلعوش أصلا، انا قلت هكداك و هو تر فيا و تزيدي تجاوبي و توقفي في وجهيييييي ليوم نربييييك، شدو نائل و الحاج عيط علينا، طبعو نائل للصالو و غلق الباب نسمعو غير فالعياط.
تعنكرت فيا الحاجة قاتلي اخخخخ منك ما تعرفيش تشدي لسانك هاي قدامك ملي دخلت و هو يبهدل فيها حرف ماخرج من فمها و انت راجل بشلاغمو واقفتلو راس راس و تقابحي فيه قدامنا.
راحت نور للكوزينة رحت معاها قالتلي اسمحيلي عيط عليك في جرتي قلتلها انت غير سبة هو دايمن هكدا والفت.
حطينا العشا، الحاج و نائل جاو يڨصرو و يضحكو نورمال بصح صراع ما خرجش من الصالو، رحت للكوزينة نوجد لاتاي جات مورايا نور قالتلي ليليان على وجهي ادخلي لعند راجلك راضيه و عيطيلو يجي يتعشا قلتلها نور خليني منو دوك يتهدن وحدو قالتلي تعيشي على وجهي هكدا نحس روحي انا السبة قلتلها لالا ماشي على جالك هو هد ليامات بلاش راهو مقلق ما علباليش وش بيه، قالتلي المرأ هي لي تنحي الزعاف لراجلها و أبو حرب حنين روحي برك اهدري معاه تعيشي على وجهي ، وليت رحت للصالو صبتو يهدر فالتلفون كي شافني كوبا قتلو علاش ما جيش تتعشى؟ قالي مانيش قادر، قربت ليه قتلو حبيبي ما تكبرهاش، رفع يدو قالي ما تقربيش ليا قتلو و الله ما قصدت نكسر كلامك بصح.... قالي اخرجي عليا، قتلو صراع تعيش ما ديرليش هكدا قالي قلت اخرجي عليااااااا، خرجت و خليتو كملنا العشا و قعدنا في شومبرة الحاجة خرجنا وش شرينا و بدينا نوريولها للحاجة، فتح الباب خزر فيا قالي ثواني نصيبلك لفوق و جا طالع منبعد عاود دار ليا قالي و وش شريتي طلعيه معاك.
عاودت طميت الدوزان فالصاشي و جيت طالعة قاتلي الحاجة يهدر وش يهدر ما تواجبيهش أسكتي، طلعت ما صبتوش فالشومبرة حطيت الدوران فوق البونك و قعدت نستنى فيه بصح ميتة بالخوف نعرفو كي ما يتعشاش و ما يهدر ما حتى واحد معنتها راهي واصلة معاه للعظم.
شويا و دخل قالي إيه ست الحسن وريلي وشنو هد الحوايج المهمة لي خرجتي على جالهم و كسرتي كلمتي.. قتلو ماشي هكداك وليد نور كان مريض و .... ما سنانيش نكمل و حكم الصاشي فرغها فوق البونك و زربع الدوزان، رفد الباطة تع الماكياج خزر فيها قلبها و رماها فالقاعة، زاد رفد ليزاكسيسوار كسرهم و رماهم موراه، فتح القجر جبد مقص قطع كامل الحوايج مورصوات و دار ليا قالي إيه زيدي وش جبتي تان؟ وقفت قتلو كملت؟ قالي زيدي جيبي وش شريتي نشوف معاك الحوايج المهمة قتلو دوك برد قلبك كي كسرت و قطعت كلشي؟ و جيت خارجة حكمني من يدي قالي وليتي قبيحة كي شغل ما عندكش لي يحابسك، قتلو ما قبيحة ما والو بصح انت وليت ما تنحملش قرب ليا و قالي شفتي كيفاش وليتي قليلة أدب؟ مرت لوسك عينها ما رفعتهاش فيه بصح الغلطة ماشي فيك الغلطة فيا انا لي ما عرفتش نربيك و طبعني، بعدتو و قتلو كل واحد يعرف روحو، قرب ليا قالي كيفاش كيفاش؟!! عاودي وش قلتي و يجبد عليا بكف و زادني الثاني حتى حسيت ودني تصوني و بدا يرمي عليا فالدوزان و يعيط و يسب ما خلا حتى كلمة ما قالهاش، و مع لخر رمى عليا قرعة الريحة جات فيدي حتى حسيت صبعي نصل و عيط اخرجي براااااا...
حبطت نبكي صبت الحاجة متكسلة راقدة و حلا تهدر مع خالتها فالتلفون و الضو طافي، شعلت الضو و فتحت الخزانة جبدت الحجاب لبستو، خزرت فيا حلا كوبات التلفون و قالتلي وش كاين ليليان راهي ال12 ماواجبتهاش، تقعدت الحاجة قالتلي وين راكي رايحة فهاد الليالي، جبدت الفاليزا و لبست الخمار و خرجت جات الحاجة و حلا مورايا يحاولو فيا قلتلها و دموعي جرايا و الله ما نزيد دقيقة هنا و طلعت لشومبرة نائل طبطبت  فتحت نور الباب و ضربت خدها قاتلي وين راكي رايحة؟ قلتلها نور عيطيلي لنائل بلخف قالتلي يا ختي تولي عليا يقولو انا السبة، خرج نائل قالي وين رايحة يا ختي قتلو وصلني لدار هيام و الصباح نعيط لخويا يجي يديني، نعيش مع الإرهاب مع البشر هداك شغلي غير هنا لي ما نزيدش نقعد قالي يا ختي راهي ال 12 يطلع النهار و يعملها ربي تاويل قتلو تديني و لا دوك نحرق روحي، خرج الحاج و أم سعد قالي يا بنتي وين تروحي فهد الليل ريحي هوما يحاولو معايا و انا وقفت رايي و نبكي، حبط صراع قال وش كاين هنا قالو الحاج دوك انت ما تخافش ربي حتى تهج منك مرتك في هد الليالي قالي صراع ادخلي بلا حتى كلمة يلا خفي قتلو ماشي كيما تحب انت ما قعدتلكش هنا غير للضرب  و العياط و السبان، اديوني دوك لعند هيام و الصباح نروح لدارنا قالي عوذي من الشيطان و ادخلي ما طلعيليش الڨاز انا بلاش مانيش حاملك قتلو واحد ما فورصاك، نروح لدارنا قالي الحاج خلاص بنتي الصباح انا بيدي نديك بصح الليلة اصبري الارهاب راهم في كل بلاص ناض صراع يعيط قالو راك تحلل فيهااااا؟! ما عنديش مرا تتشرط انا و بدا يسب عيط عليه الحاج قالو يانامااااار خلاااااص و الله ما معيشة هادي كرهتولنا حياتنا قتلو أهدر مع وليدك يعرف غير يضرب و يعيط ليل و نهار، ماشي كيما نائل تفهم الموضوع وسكت بصح هو عندبالو الرجلة غير فالضرب، انا قلت هكدا و هو ناض يعيط و الله غير ليوم نذبحها.. ارواحي ليوم نعلملك الرجلة على اصولها يا بنت الحرام و كامل راحو يجريو يشدو فيه، جبدني من راسي ما بيناتهم و كركرني للطونوبيل و الحاج و الحاجة يحاولو فيه و يقولولو يا وليدي بجاه ربي ما تآذيهاش، طبعهم و فتح باب الڨراج و طلع و ديمارا و انا الدموع في عينيا جمدت من الخوف و نخزر فالطريق وين دايني و هو يقول لوكان ما نعاودلكش التربية انعليني و شايد في روحو بصح عروق رقبتو نشوف فيهم رايحين يكلاطيو.
وصلني لباب دار هيام حبطني و قاعد يطبطب برجلو كسر عليهم الدنيا، فتحلو علي طبعو و دخل بيا للدار و هو يقول جوزي جوزي مدام، خرجت هيام تشوكات مازال ما هدرت حتى قالها شوفي هد الكلبة تبات الليلة هنا كي يطلع النهار يجيو ماليها يديوها و الرجعة لعندي تنساها و خرج، دارت ليا هيام قالتلي فهميني وش كاين؟ خنقوني الدموع قاعدة غير نبكي و نمسح فيهم قالها علي خلاص يما خليها الطفلة ماشي قادرة دخليها للشومبرة تريح منبعد كي تقدر تحكيلك.
دخلتني فرشتلي شربت الما و رقدت و كي نضنا الصباح حكيتلها كلشي قالتلي هبلتي؟ صراع تقوليلو ماكش راجل؟! علاش رجعتي هكدا قبيحة و وجهك صحيح تستاهلي، حبيتي داركم روحي و ما تخزريش موراك كي رجع صراع ماشي راجل، نسيتي نهار وقف في وجه عمومو كامل و يحامي عليك، نسيتي حبو و خوفو عليك، ما شفتيش لهفتو في عينيه ياك تقيسك شوكة يولي يجري ، تعاير بيك و قالو عليه تمشي فيه طفلة صغيرة كيما تحب و ما تخلاش عليك، و آخرتها قلبتي الدنيا كي ضربك، ياك نهار ظلمك و ضربك أنا وقفت في وجهو و قتلو راك غالط و جا طلب منك السماح بصح الشي لي درتيه هد المرة انت لي ظلمتي روحك، إدا غاضتك كي ضربك هو، خوك باعك بالرخس و بعثك عظامك مكسرين و هدا لي ماراهوش عاجبك دارك امانة في رقبتو و تحمل مسؤوليتك و خدا عهد على روحو باش يكون سندك في هد الدنيا و قال أنا باباها أنا يماها أنا خوها بصح كي دخلنا في كلام الرجلة روحي و شوفي شكون يوالمك ربي يهنيك واحد ما مات مور واحد كيما صبر على حبك يصبر على فراقك.
كلام هيام كان كف فطني و ورالي غلطاتي، انا نعرف وش يحب وش ما يحبش وش يريحو و وش يقلقو و هكداك و طولت لساني معاه و درت كامل وش يزعفو حتى تعديت حدودي.
غدوا منداك راح علي لدار جدو قالو صراع اديلها كامل حوايجها راهو جاي خالها يديها، كي جابهم بكيت ما عرفتش وش راني حايبا بالضبط هو و لا دارنا كي انضغطت في هديك الدقيقة كنت نخمم باش نخرج و خلاص بصح كي تهدنت حسيت بلي فراقو صعيب، أنا نحبو و غلطت معاه ما نقدرش ننسى كلشي و نروح، هو أول راجل فتحلي يديه و حسسني ببزاف حوايج جامي عشتهم في حياتي.
قعدت يومين عند هيام خالي ما جا و صراع ما حوس يفهم واحد فيهم ما عيط و النار شعلت في قلبي.
قعدت مع هيام نبكي قلتلها ما عرفتش كيفاش نتصرف ولات تهدن فيا، قالتلي أنت طايشة و راسك خشين و مازال عقلك صغير و أبو حرب دوك يتفهم كي يتهدن أعطيه برك شويا وقت و انا نهدر معاه.
سارة و علي ما خطاونيش و كانوا يحاولو يفاجيو عليا مالڨري كان عندهم امتحانات.
علي حب يفتحلي فايسبوك، علبالي صراع ما يحبش ندخل لمواقع التواصل الإجتماعي بصح كي شفتو ماكاش قلت نفتح واحد باسم مستعار و فهمني فيه.
درت رقم صراع فالروشارش باش نحوس عليه خرجلي صراع ال***** دخلت لابروفيل ديالو داير بلي يخدم عند وزارة الدفاع و صورة رتبة عسكري و قدامها سلاح قعد نقلب ماهو مبوبليي والو غير كي يبدا الفوطو دوبرفيل برك.
بعثتلو انفيتاسيو  و ميساج ماواجب ما اكسيبتا.
تفكرت النيميرو تع يمات سارة صاحبتي دخلتو فالروشارش خرجلي اسم خوها بعثتلو ميساج وحد نص ساعة منبعد رجعلي قتلو أنا ليليان سارة وين راهي؟ قالي عندها خمس أشهر ملي تزوجت قتلو اعطيني النيميرو ديالها قالي راجلها ما يحبش بصح دوك نبعثلك الفايسبوك ديالها، كان باسم راجلها بعثتلها أنا ليليان جرجيس واجبيني تعيشي راني متوحشاتك موووت، قعدت نستنى تواجبني حتى نعست و رقدت، صونا التلفون قفزت عمبالي صراع شفت اسم راجل سارة جاوبت بلخف قلتلها الو سارة انا ليليان و تخنقنا بالبكا هي تبكي و انا نبكي، سقسينا على بعضانا حكيتلها على روحي و عرفت منها بلي مور ما تزوجت هي حبست القراية ما قدرتش نكمل بلا بيا  و لولاني لي خطبها قبلت بيه و دوك راهي حامل و قالتلي بلي الوضع السياسي راهو صعيب عندهم و فهمت بلي مستحيل نقدر نرجع فالوقت الحالي ماكش طريق لتم كلشي مغلوق.
غدوا منداك جات الحاجة مع العصر، دخلت الخزرة ما خزرتهاش فيا كانت زعفانة مني غير سلمت عليها بدات تبهدل فيا قالتلي ما تحشميش على كبرو تقارنيه بخوه و تنقصي من رجولتو.
انا عمبالي جات ترجعني بصح قاتلي انا جيت نشوف بنتي ربي يسهل ما بيناتكم،  زدت تقنطت و عرفتش وش ندير، دخلت للشومبرة و عيطتلو قلت نطلب السماح منو، 20 أبال و مارفدش مع لخر كوبا عليا، ندمت قلت وش داني قعدت كي المعلقة لا عندو لا عند ماليا.
ما طولتش الحاجة و راحت حتى انا ما قعدتش معاها بزاف ما خلاتليش بهدلتني، دخلت عليا هيام قلتلها عيطيلو اهدري معاه عندو 3 أيام يكون تهدن قالتلي مازال شويا علبالي دوك راهو يطلع و يحبط و يتفكر في كلامك جرحتيه بزاااف  قلتلها و لوكان يخطب و يتزوج قالتلي ما عندي ما نديرلك هو عيا و انت ما حبيتيش تحسي بيه ما نقدرش نلومو.
جازت سمانة و هو ما بان ماسقسى ما عيط حتى واحد من ماليا، حتى خالي باش يحكم طيارة و يدير ليسكال و يعاود يحكم بزاف عليه ما يقدرش يتحمل المصاريف.
سمعت بلي صراع رايح للعاصمة شعلت النار فيا قلت سور رجع لمرتو هديك لي وسمها أم مصطفى، قعدت نلوم في روحي و نعيطلو ما يرفدش و مع لخر حطني فالروجوتي غاضتني عمري علاش حتى وصلت روحي لهد المرحلة.
قعدت 3 أيام قاطعة الماكلة حتى مرضت، عيطتلو هيام سمعتو كي قالها أم علي اغلقي السوجي تع ليليان صفحتها طويتها  و لوكان نسمع بيك رجعتيها لداري نتبرا منك، خليها تروح ربي يسهلها لتم تصيب غيري هوما عاقلين و ما يضربوش ماشي كيما انا ماشي راجل قالتلو حاشا ياخويا هي صغيرة و ما تعرفش وش تخرج من فمها جوزهالها قالها غير هي لي ما نرجعهاش، زدت كرهت روحي و رميتها غير للبكا و قلة الماكلة، كي لحقت الوحدة تع الليل رفدت تلفون عيان و رحت عيطتلو بلخف رفد قال غير لخير هيام كاش ما كاين قتلو انا ليليان تنهد و سكت قتلو ما تكوبيش بجاه ربي علبالي غلطت ديرني في بلاصة بنتك حلا و الله غير. عييت، انا نهدر بالسيف و نبكي و هو قالي بكل برود و المطلوب؟ قتلو ما عرفتكش حقودي هكدا ياك تحبني علاش هكدا و الله ما قصدي اسمحلي قالي ابقاي على خير قتلو تعيش ما تكوبيش اسمعني، تنهد
قتلو نسقسيك سؤال برك وين راك و شكون لي راهو معاك؟ قالي راني فالعاصمة و لي قدامي ما عندو ما دخلك و ملخر انساي باش نرجعك و ندمت على النهار لي شفتك فيه و خليني في حالي راني مشغول و كوبا.
زدت مرضت كثر ولات هيام عيطت ليماها قالتلها الطفلة راهي قاطعة الماكلة و زاد عليها الحال أنا وش حبيتوني ندير ترجعوها ميتة لماليها؟
جات الحاجة مع العصر قعدت قدامي و قالتلي مليح هكدا دوك؟ شفتي لسانك وين وصلك وش ربحتي دوك؟ صحتك طيحتيها و هو يخبط في صدرو و يقول نتزوج، نوضي بدلي حوايجك، نضت لبست شويا هكدا وسمعنا لاصونات فالباب قالتلي نوضي خرجتني صبت صراع واقف سلم على هيام و دور وجهو مني و قال ليماه اطلعي قالتلو نديوها للطبيب راهي مريضة، قالها ما عندها وين تروح معايا و عطا لهيام الدراهم و قالها اديها للطبيب حتى يجيو ماليها يديوها و دا يماه و راح قد ما حاولو معاه والو، رجعت للدار نبكي.
يومين منبعد جا علي لهيام قالها بلي إخلاص مع والديها راهم لتم و انا زدت هبلت قلت دوك يوافق عليها زكارة فيا، عيطتلو صونا صبتو نحاني من الروجوتي، رفدلي و قالي خير يا طير و نسمع في صوت الضحك قتلو راك فرحان ياك قالي وش تحتاجي ما عنديش الوقت قتلو عندك الوقت غير لإخلاص ياك، علاش راك ديرلي هكدا لوين راك حايب توصل، قالي بنت عمي ما عندو ما دخلك فيها و عندي لوين راني حايب نوصل واحد ما راهو حايبك حتى ماليك كرهو من كثرة ما راني نعيطلهم و نقولهم ارواحو اديوها، قتلو وشنو؟ ماليا سمحو فيا يمال مام انت بالاك جي ترجعني ما نحتاجكش بصح إدا سمعت كاش ما صرالي اعرف بلي بسبتك و ذنبي في رقبتك كيما خرجت في خوك و مات في نفس النهار تخرج فيك حتى انت و كوبيت، غدوا منداك جيت ننتحر بصح خفت، قعدت في فراشي حتى للظهر  كلشي يوجع فيا و فشلانة، حتى دخل علينا صراع بلا تونومليتار ديالو جا من الخدمة ديراكت لعندنا، خزرت فيه كنت متوحشاتو بزاف كنت محتاجة نترمى في حضنو و نبكي ... سلم و قعد و دار لعندي قالي نوضي البسي خالك جاي يديك راهو قريب يوصل نضت بالسيف كي شافني هكداك قالها ما راحتش للطبيب؟ دوك يحسبوها عليا و يقولو قتلها.
سبقتو للطونوبيل و هو بقاهم و جا طلع، نوض الطونوبيل و دار ليا قالي وشبيك؟ كي قالي هكدا الدموع لي كانو محجرين في عينيا طاحو قالي راني حايب نفهم
برك علاش راكي تبكي؟ سكت، قالي تعيطلي فالتلفون و تعاودي علاش هد الشي كامل؟ ياك ما تحتاجينيش ماشي انت لي ركبتي راسك و قلتي نروح لدارنا؟ خلاص راهم جايين ليوم و تروحي معاهم  و البكا علاش؟ ياك أنا ماشي راجل و ما نتحملش و المعيشة معايا مرة..انا ماشي مهند لي تظلي تبعيلي فيه انا راجل عربي و همجي و نضرب و ما نسمع لحتى واحد هدي طبيعتي و ما رايحش نتبدل ما عاجبتكش طريق السلامة واحد ما راهو شايدك الرجلة خليتها لخوك روحي لماليك و تهناي مني.
هو يهدر و انا نبكي و ساكتة، ڨارا الطونوبيل و عطاني الما قالي هاكي اشربي و اغسلي درتلو براسي لالا قالي يمال وش تحوسي؟ سكت، قالي حايبا تقعدي و ما تروحيش مع خالك؟ سكت و دموعي لي كانت تجاوب، سكت و عاود نوض الطونوبيل و ديمارا.
وصلنا للدار دخلت لشومبرة الحاجة كنت نرجف و قلبي يخبط حتى حسيتو رايح يخرج مابين ضلوعي، قالتلي الحاجة وش دارلك علاش راكي هكدا؟ قلتلها مادارلي والو قالتلي يمال علاش راكي تبكي؟ قلتلها ما بيني والو.
هي خرجت و أنا قعدت نستنى في خالي لحق المغرب و ماكان والو عييت رقدت و فالليل فطنت راسي يوجع قلتلها الحاجة مازال ما جا خالي؟ قالتلي خالك؟!! قلتلها صراع قالي راهو جاي و لدوك ما بانوش في زوج، قالتلي يا بنتي وشبيك صراع تعشى معانا و طلع لشومبرتو يرقد و قالنا ما تنوضوهاش.
كانت ال11 تع الليل عيطتلو كوبالي، رحت للكوزينة شويا هكدا دخل عليا قالي خير علاش راكي تعيطي؟ قتلو من العصر و انا نستنى و مازال ما بان خالي وين راهو؟ قالي غدوا باش يجي الطريق راهي مغلوقة روحي ترقدي، حسيتو يهدر و شايد الضحك، قعدت على الكرسي قالي تعشيتي؟ قتلو ما عطانيش خاطري قالي يمال اطلعي نعيطلو نشوف عقداش يجي كرهت و انا كل يوم نستنى فيه، كي قال هكدا داقتلي، طلعت معاه لشومبرتو حكم تلفونو و قال واش ليون إن شاء الله تكوني استعقلتي و عرفتي غلطتك في هد ليامات؟ درت ليه قتلو خالي يجي و لا لالا؟ عيطلو قالي خالك كره مني كل يوم نعيطلو و نقولو يجي يديك و اليوم عيط عليا قالي اديها أنت و ربيها انا ما نحتاجهاش، يهدر و شايد الضحك قتلو عيطلو كيفاش ما يحتاجنيش قالي إدا هو ما يحتاجكش انا و الله غير نحتاجك و تبسم قتلو راك تتمسخر بيا قالي من نيتك راكي مأمنة بلي نسمح فيك هكدا؟ وقتاش تفهمي بلي انت ديالي وحدي؟ قتلو يتسمى من الصباح و انت تتمسخر بيا و تلعب بأعصابي و طبعتو، جبدني ليه و حكمني من رقبتي و باسني، طبعتو و نضت نبكي و هو يضحك و جبدني لحضنو قالي و الله ما عيطتلو ما عيطلي و ما علابالوش كامل بالحكاية حبيت برك نعلملك درس، حتى لسانك الطويل هدا و توحشتو قتلو بعد عليا تتمسخر بيا و قاعدة نبكي، حكم وجهي بيديه في زوج و حط فمو على شفايفي و ضيعني فالعالم ديالو، عاودت حييت مابين يديه....