مراهقة والاربعيني بلهجة جزائرية

37

#المراهقة و الأربعيني:

#الجزء37:

سمعت نور تعيطلي رحت ليها للكوزينة ترت فيا قالتلي كيفاش خليتي لاتاي و طلعتي لفوق، قلتلها و الله يا عقلي ما راهو في راسي بالي راهو عند صراع، قالتلي انتبهي لشغلك منبعد لاحقة باش تطلعي ليه و تسقسيه علاش غير نتيا لي راكي مضرورة في هاد الحكاية؟! قلتلها نور من الصباح و أنا معاكم يد بيد وش نزيد ندير فوق هاد الشي؟ قالتي امشي امشي برك نكملو باش نطلع لشومبرتي نريح راسي وجعني، قلتلها روحي تريحي شكون راهو شايدك انا بالي في حاجة و انت بالك في حاجة اخرى و خرجت، قلقتني وشبيها هادي حاطة نڨارها من نڨاري.
رحت نسمع وين وصلو صبتهم في نفس السيرة و صراع يبينلهم بلي ما كان والو بصح الحيرة كانت باينة في عينيه.
رجعت للكوزينة صبت نائل يداوس مع نور كي شافني سكت و خرج و هي خبطت خزرت فيا بالتشناف خلات كلشي و طلعت لشومبرتها.
كملت العشا أنا و مرت سعد الثانية، جاو صحاب سعد وجدنالهم لاتاي، و نور داخلة خارجة مشنفة و ما تمس والو و نوال تعمرلها في راسها زكارة كي شافت ضرتها وقفت معايا عاونتني، و إخلاص زادت شعلتها مليح و راحت.
الضياف كانو في الصالو و العايلة فالهول يتناقشو مع صراع و هو كل شويا يجي ليا يقولي عييتي اطلعي للشومبرة تكسلي على ظهرك، و الحاج كيف كيف عيط عليا قالي يا بنتي حافظي على روحك و على لي في كرشك بصح وش راح ندير حتى هيام كانت قاعدة معاهم خايفة على وليدها.
كملت شغلي و جيت خارجة من الكوزينة لاقاني محمد وليد سعد قالي زوج لاتاي، صراع رفع راسو قالي اطلعي حامل و من الصبح مازالكي تجبدي، نطقت نور قالتلو أبو حرب الطفل ماراهوش معلق بخيط باش يطيح من الشغل و التعب، كيفاش تطلع و تخلي كلشي حاصل في راسي؟ صراع خزر فيها مشوكي كيفاش تهدر معاه هكداك ما فقناش كامل نائل منين خرج و حكمها من راسها و يعيط حنا فالهم و نتيا حاطتلي راسك براسها شحال من مرة قتلك حسك ما نسمعوش، ناض صراع يجري جبدو عليها و هو مازالو يعيط عليها قالها عمري في حياتي إدا حطيت عيني فعين خويا و وقفت في وجهو جي انت دوك تحاسبيه؟! عيط عليه صراع قالو اصبر خلينا نفهمو منها و هو كلا روحو حب يخرج من حوايجو صراع يجبد فيه و هو يجبد فيها من مابيناتنا، حكمو صراع من كتافو و يطبع فيه و نور تعيط ما نقعدش هنا كرهت من هاد المعيشة راكم حاسبيني متزوجة؟!! قالها نائل راكي تهددي؟ ما رانيش كامل سامع بيك من غدوا نجيب لالاك و تربي ولاد خويا، هي قاعدة طبع فينا باش تخرج و الحاجة و أم سعد حاكمينها و نائل النار شاعلة فيه جامي شفتو هكداك، كان يقول نطلقهااااا ما نحبهااااش ارحمونييييي و هي تقولو إيه ما دام ما تحبنيش طلقنيييي، دار صراع للحاجة عيط عليها قالها يما راكي مخليتها هنايا تستاي فيهم يتقاتلو داخليهااااا..
بالدراع باش دخلناها لشومبرة الحاجة وصراع قاعد يطبع في نائل رفد تلفونو و مفاتح طونوبيلتو و جا خارج عيطلو قالو نائل اصبر خلينا نفهمو وش كاين؟ قالو أبو حرب الله يسترك خليني في حالي ربطتوني بيها ما نحبهااااااش ما نحبهاااااش افهموااااا خبط الباب و خرج.. التوام دارو حالة بالبكا و واحد ما التهى بيهم يماهم مع الحاجة تعيط و تبكي و أنا ما قدرتلهمش في زوج بسلامتهم جا علي وليد هيام رفد أحمد و انا محمد حتى جا ليا صراع عيط عليا وش صرا ما بيناتكم حتى صوطات فيك؟ قتلو و الله ما بيناتنا والو ما فهمتش وش راهو صاريلها، قال الحاج نائل يحوس يطلقها و يتزوج بلوخرا راهو يدير غير فالسبايب قالو صراع و الله ما صبنا معامن نهدرو و شكون نعقلو و شاف فيا قالي روحي جيبيلي نشرب طلعولي لاطونسيو خصني هم، رحت جبتلو الما و الطفل في يدي ما حبش يسكت، عيط لمحمد قالو اديه لبرا اشريلو يسكت راسي راح يطرطق، دخل سعد قال وش كاين؟ قالو اقعد نشوفو هادو وش حكايتهم و قالي ارواحي ليليان، وقفت مقابلاتو و هيام جات، قالي علاش نور راهي تحاسب فيك على الشغل راكي طالقاتو عليها وحدها؟ قتلو صراع الشغل مقسم ما بيناتنا بصح هي ما فهمتش وش بيها، قالتلو هيام إدا على الشغل ساهلة بصح هادو راهي واصلة ما بيناتهم للطلاق واحد فيهم ما حامل لوخر، قلتلها أنا قلت لصراع بلي راهي تقارن ما بيناتنا من نهار تزوجنا فعليا ماراهيش حاملتني، قالها صراع أم علي ازڨيلها و لا نقولك خرجيهم كامل من شومبرة يما لداخل خير، وقف و قالي ارواحي معايا كي جا داخل قالي عاودتي فتحتي معاها السوجي تع ديك النهار و لومتي عليها؟ قتلو و الله ما هدرت كلمة بصح إخلاص و نوال من الصباح و هوما يعمرو فيها عليا و هي ما راهيش حاملتني لدرجة ما باركتليش منبا على الحمل، إدا نائل ما راهوش حايبها و أنا وش ذنبي؟ تنهد و قالي معليه ساهل ادخلي تشوفي.
دخلنا صبناها تبكي و وجهها حمر، قالها احكيلي ختي وشنو البروبلام ديالك بالضبط، تكلاطات بالبكا قالتلو و الله غير كرهت رايحة نطرطق، قالها المشكل ديالك مع ليليان ما تعاونكش ولا مع راجلك؟ سكتت و حطت راسها قالها ما تسكتيش اهدري ادا كان على الشغل نقسمو كل واحد و دارو و الله يسهل على كل واحد و إدا مع نائل تتبدل الهدرة، قالتلو ما راكمش تشوفو تصرفاتو خرجاتو الهدرة فالتلفون حاسبو اهدر معاه، قالها نور باش نكونو واضحين ياك حنا من لول تفاهمنا باش يكون هاد الزواج على جال الدراري، كيما نتيا راكي حايباتو راجل ليك و ما عندكش ذنب هو تان ما عندوش ذنب باش يدي مرت خوه و يربي ولادو جيتيه ثقيلة كي كنتي متزوجة مع خوه ماشي ساهلة هادي أولا و الحاجة الثانية ياك قبل ما يموت عابد الله يرحمو مصارحنا بلي يحب وحدة و حايب يخطبها وش ذنبو باش ما يديش لي حبها قلبو؟ قالتلو و أنا وش ذنبي؟ قالها فهميني انت تحوسي على راجل و لا واحد يوقفلك على ولادك و يرفدك؟ سكتت قالها شوفي ختي ادا تحوسي على راجل ليك حرام علينا ما نعطيولكش حقك تبقى حياتك و انت حرة فيها يطلقك و شوفي لي يناسبك اما ادا حبيتي برك واحد يقوملك بولادك اقعدي راكي ما بيناتنا معززة مكرمة، الحياة هادي يلزملها تنازل يا تخيري روحك و تتنازلي على ولادك يا العكس و انت و راحتك، قعدت ساكتة و دموعها تسيل ، ناض سلم على راسها قالها و الله غير معزتك كيما هيام و حلا ما يعطينيش خاطري نكسر قلبك، احملي و الله غير مام هو راهو سامح في حياتو على جالك سينو صافي لونتو ملي تزوج وراح، ياك نهار حب يخطب فرضت عليه يدير لكل وحدة فيكم دار باش غير تكوني مرتاحة و ما تقعديش مع ضرة، صبري نوضي الفحلة اغسلي وجهك خليه يروح وين يحب آخرتها يرجع ليك ياك يقولك الغربال يدور يدور و يولي لماليه.
قعدت الحاجة و هيام يحللو فيها كي تهدنت شويا قالها وجدي روحك نديك غدوا الصباح ان شاء الله لداركم تريحي شويا حتى لمور العيد اخرجي حوسي بدلي الجو ديري وش تحبي ما تقعديش غالقة على روحك و جبد البورطفاي ديالو عطاهلها دراهم قالها هادو ليك اشري لروحك و مصروف الدراري يلحقك ما تخميلوش التهاي بروحك برك.
بدات الحاجة و هيام يبلاڨيو عليها حتى رجعوها تضحك، قعدت نخزر فيها غاضتني حتى جا خارج و شرلي نلحقو، قالي وجديلي ندوش راني دايخ بستو من خدو و قتلو تأمر، قالي ااااه هادي رشوة و لا وشنو واقيل أنت تان تحوسي نعطيلك الدراهم ضحكت قتلو و الله والو هكدا برك محبة و ادا على الدراهم انا نعطيلك خليوني برك نرقد راني ميتة قالي يا عمريييي اطلعي ارقدي دوك نوجد وحدي قتلو لالا حياتي خدمتهم كامل و كي لحقت ليك نحبس؟
وجدتلو الدوش و دخلت للشومبرة صبت حرب لتم يتفرج غفيت شويا كي فطنت صبت صراع طفى كلشي و داير لحرب مرقدو في حضنو، قربت ليه حس بيا تكسل على ظهرو و حضنا في زوج كل واحد في جيهة و كمل رقد.
الصباح جوايه ال9 غيراش هكداك فقت على صوت الباب كي خرج حرب، خرجت تلاقيت مع نور دايا وليدها للصالدوبا و ما هدرتش حشمانة قلتلها صباح الخير قالتلي صباح النور و دخلت.
حبطت للحاجة سلمت عليها قالتلي اهلا بأم مسلم قتلتها علاش وليدك يسمي كيما يحب، انا لي نسمي ولادي إدا كان طفل نسميه زكرياء و إدا طفلة مريم، قالتلي ادا طفل هو يسميه و إدا طفلة سميها انت و دوك بنتي وجديلنا الفطور حرب مازال ما كلا والو.
رحت وجدتلهم الفطور نور ما حبطتش قعدت في شومبرتها و نائل شفتو راقد في شومبرة سعد القديمة، و مع الظهر عيط صراع للحاجة قالها قولي لنور توجد روحها راني جاي نديها لدارهم.
جا وصلها هي و ولادها و عاود رجع حطيتلو يتغدا فالهول هو و الحاج قالي روحي عيطي لنائل نحتاجو، رحت ليه كي جا قالو ريح نائل راني نسمع فيك قالو حبيت نطلق قالو الحاج يا وليدي و ولاد خوك شكون بيهم قالو نائل ارحموني عييت تنازلت بصح ما قدرتش كثر من هاد الشي يا ناس لي كان راجلها راهو وليد يما و بابا افهموني، قالو صراع بصح لوكان ما راهمش معاك راهم هملوا، قالو صراع ملخر حبيت نتزوج قالو واحد ما قالك لالا بصح خاف ربي في نور و ولادها لوكان طلقها ولاد خوك يضيعو، قالو صراع كرهتلي حياتي نهار كامل في فمها وش قالت ليليان وش دارت ليليان وعلاش هي هكدا و أنا هكدا بزاااف.. أنا ماراني انت و هي ماراهي ليليان، انا ملول ماشي حايبها قبلت برك كي غاضتني و ما حبيتش نظلمها و خنت الطفلة لي نحبها، قالو شوف نائل باش طلق نور انساها كنت تحسبلها ملول كيما حسبتلها أنا و ما قبلتش، و مادام قبلت و اونڨاجيت تحمل مسؤوليتك، قالو أنا كان تخمامي في ولاد عابد الله يرحمو و زيد تعرف مالين نور كيفاش دايرين، قالو خلاص يمال احمل و ادا حبيت تتزوج من حقك بصح بشرط تعدل ما بيناتهم و بركاونا من المشاكل و الله ما راني قادر ما نغيضكمش ارحموني شويا ماصبت ليمن ندور.
قالو الحاج يا وليدي و الله غير نور بنت فاميليا و قلبها ما فيهش الدونية و زيد رافداتك انت و ولاد خوك و ماليك هي تان بشر كيما هي كيما أي مرا.
قعدو يعقلوا فيه و هو ساكت منبعد كل واحد دخل لشومبرتو و صراع طلع رقد، رحت لحرب قتلو تروح تشريلي، قالي نتوما كل ما نروح نشريلكم تقولولي لالا ماشي هادي، قتلو نعطيلك التلفون صورلنا وش كاين باش المرة الجاية نشوفو ديراكت وش كاين فالفيديو و تروح تشري، قالي إيه بصح ندي الآيباد خلي تلفونك عندك، هو راح و حلا حبطت قالتلي حبيت ندير حلوة و لا ديسار و تلفتلي، دخل حرب ورالنا وش كاين قاعدين نشوفو فالحلوى حتى شفنا مول المحل خرج فالفيديو، قالتلو حلا انا حبيت هاد الحلوة على الراجل و أنا خزرت فيها نضحك قلتلها و الله غير خير من لي ديريها قالتلي وش جاب لجاب هاد الحلوة صنع رباني شوفيه عينيه ملبعيد يضويو من صابني راني مقابلاتو، قالنا حرب نتوما ما تحشموش تخزرو فالرجال قتلو اسكت حبيت باباك يسمعك و يحبط يسلخنا، قالت حلا بصح هدا ملوقتاش و هو فاتح هنا فالحومة، حرب تقلق منا وصيناه وش يشريلنا جابلنا و جا، حنا قاعدين ناكلو حتى حبط صراع فتح علينا الباب قالنا واش راكم هنا.. قالو حرب بابا مزيا لي جيت هاد الزوج قاعدين يخزرو فالرجال و انا و حلا خزرنا في بعضانا، قالو صراع فيمن خزروا و قعد قدامو، قالو صورتلهم السوبيرات قاعدين يوريولي مولاها و يقولولي جيبلنا من هاد الحلوة، قالو شكون فيهم لي قالت هكدا؟ حلا قالتلو ليليان و أنا قتلو حلا و كلاطينا بالضحك قالنا الله لا تربحكم في زوج و دار لحرب قالو شفت وليدي علاش ما نخليهمش يخرجو النسا ما فيهمش لامان قتلو زعما نتوما الرجال خصكم، قالي و زايدة تحلي في فمك.. نوضي ديريلي لاتاي، رحت نديرلو خليتو يضحك و يڨصر مع ولادو.
كملت و جبتلو قالي ليليان الصباح جوايه ال9 نصيبك واجدة باش نروحو نعقدو فالمحكمة، درتلو براسي إيه و حلا ناضت ما عجبهاش الحال، قالي وجدي الكوارط بالاك كاش ما تنساي، قالتلو الحاجة وقتاش تروح للعاصمة؟ ما تقعدش هنا و الله غير راني خايفة كاش ما يغدروك، قالها ان شاء الله يما اصبري قبل نعقد مع ليليان نطمن عليها لوكان كاش ما يصرالي تروح ما بين الرجلين، قالتلو بعيد الشر عليك يا وليدي تعيش و يعيشو في خيرك ان شاء الله بصح الحذر مطلوب قالها ان شاء الله و خرج.
الحاج دا أم سعد و راحو يتعاشو في دار سعد، درت انا و حلا بيتزا و عيطنا لهيام جي هي و ولادها يتعشاو معانا.
علي هبلنا انا و حلا و سارة تقول نخدمو عندو قتلو تريح طرونكيل و لا نصورك و انت تشخر و نبعثك لهادوك الناس كلاطا بالضحك و ضربني لراسي قالتلو يماه بعقلك يا وليدي المرأ راهي اونسانت قالها علاش راهي رافداتو في راسها أصلا لوكان تفتحيه تصيبيه فارغ علاش هادي عندها مخ؟ قتلو حاشاك عقلي يوزن بلاد يا وحد الطاويلو قالي شوفي روحك قبل يا وحد السمينة قتلو سمينة بصح شابة، دار ليماه قالها لالا و حاسبة روحها انجلينا جولي ياااا..
قعدنا نڨصرو و نضحكو و فالليل راحت هيام و انا طلعت لشومبرتي تربعت فوق البونك شعلت التلفيزيون و قعدت نتفرج مسلسل حريم السلطان، دخل صراع قرب ليا باس خدي و قالي وش راكي عمري؟ قتلو أهلا حبيبي، حط الصاشي تع السقايط قدامي بدل حوايجو و جا تكسل حكم التلكومند نحيتهالو بلخف قتلو لالاااا ما تبدلش قالي نشوف الأخبار قتلو دقيقة راحو قريب يخلاص، سكت و قعد يتفرج معايا، كانت لقطة تع هويام دارت ديڨا و فعوض مايعاقبها السلطان باسها و ضرتها تشوف فيها قتلو شحال يحبها، قالي يمال ارواحي خليني نحبك و نبوسك كيما هي، قتلو أنت هدا ما شفت، ماشفتش العشق لي ما بيناتهم عندو ألف وحدة فالحرملك و هو في قلبو غير هويام، قالي الراجل يقدر يعاشر بزاف نسا بصح ما تدخل قلبو غير وحدة، قتلو و الله يا حبيبي راني نشوف قلب الراجل اوتال يكفي كامل النسا، ناض يضحك هههههه  قالي هاذي رغبة وتمثيل بالحب لا أكثر و لا أقل بصح كي يحب صح رايح يعتزلهن كامل حتى رغبتو تكون غير مع لي يحبها، قتلو و كيفاش المرأ تعرف بلي الراجل يحبها قالي كي يبدا يتنازل تدريجيا على حوايج هو ما كانش يقبلها من قبل و يغمض عينو على غلطاتها، يسامح يتادرك الامور و يتفهم..  باختصار يحب يتبدل باش يتقرب من لي يحبها، قتلو بصح شكون لي يحبها و هوما بزاف وش رايح يقدر يميز؟ قالي ماشي هو لي يميز هي لي تتميز، الراجل يحب المختلفة، لي يحس فيها حاجة ما صابهاش في النسا لي جازو عليه من قبل
وهاد الشيء لي خلا السلطان يعشق هويام بالذات لخطر مختلفة و اختلافها في ذكاءها تعرف كيفاش تجبو و تخليه هايم بيها، ضحكت و مت بالسعادة 😁 قتلو يتسمى حبيبي دوك انت كيما السلطان تحبني لخطر مخالفة و ذكية كيما هويام، قالي إيه مختلفة بصح كاين إختلاف صغييييييير، هو حبها كي ذكية و تعرف تجبدو و انا حبيتك كي حابسة و نية و دايتها معايا غير ديڨات، غست في وجهو حسيت القطرة تع ماروكو في راسي 😓 حبط راسو يضحك قتلو راك تعاير و لا تغازل ما فهمتش.. عندك ساعة و أنت تهدر هدرة حلوة و شابة و كي وصلت ليا عميتها كي البعير { ههههه البنات راح السبع و زهراتو في داك الشي ههههه رجع بعير 🤣}
حكمني من شعري قالي شكون البعير؟! قتلو لالااااا و الله ما أنت زلقت من لساني، ضربني لراسي قالي هاو البروف بلي حابسة عمبالك غير هكداك برك راني نهدر عن تجربة و ضحك و أنا لعبتها نضحك غير باش ينسى وش قلت ههههه قتلو حبيبي صروووعي السلطان ديالي واحد ما يلحقو قالي بلعطي بلعطي دوك، قربت ليه قتلو و الله غير نحبك، تبسم و أنا رميت روحو في حضنو و نسيت المسلسل.
غدوا منداك راح يخدم و رجع داني على ال9 للمحكمة، كي دخلنا قالي راسك ما ترفعيهش كامل صحابي، حكمني من يدي و يمشي معايا و عينيا فلرض، دخلنا للقاضي سلم عليه وحد الراجل جا مع صراع و هدر معاه لخطر أنا فهداك الوقت كنت قاصر و ما جا حتى واحد من ماليا معايا، جزنا معريفة، قالي انت ليليان جرجيس؟ قتلو ايه كتب و سينيا، و سقسى صراع على أهلي قالو باباها متوفي و يماها مفقودة بسبة الإرهاب، عطالو العقد و قالو مبروك قالو الله يبارك فيك و شرلي براسو باش نخرجو، شدني من يدي و خرجنا قتلو هدا ماكان؟ قالي وش حبيت يمال؟ قتلو ما قالش أعلنكما زوجا وزوجة و بسنا بعضانا ضحك ههههه قالي هادي فالمسلسلات دياولك، كي طلعنا فالطونوبيل جبد راسي لعندو باسني في جبهتي و قالي مبروك قتلو هدا وين تفكرت؟ قالي لالا بصح ما قدرتش نبوسك فالمحكمة و صحابي لتم، تنهد و قالي الله يقدرني باش نفرحك وما نخليك تحتاجي حتى بشر قتلو ربي يخليك ليا، قالي هدا ماشي عقد زواج برك أنا راجلك و أهلك و يماك و باباك و إدا كاش ما صراتلي حاجة حاربي بهاد العقد و ادي حقك، قتلو علاش راك تهدر هكدا؟ قالي الاعمار في يد ربي سبحانو ماشي كي راني مهدد بصح الموت في باب كل بنادم ما علابالوش وقتاش يسلم أمانتو، هكدا نقدر نموت و بالي مهني عليك بعدما ضمنت حقوقك قدام ربي سبحانو، قتلو ما تخوفنيش تعيش و الله غير نموت موراك، قالي ما دامني نتنفس ما نزيدش نسمع كلمة الخوف على لسانك، طمني و ما تعمريش راسي و اقعدي ديما فرحانة، جبدت يدو بستو قتلو نحبك، قرب مني باس خدي قالي و أنا نعشق كل شبر فيك.
ديمارا و شعل الغنية تع (ربع حبي ) قتلو وليت تسمع الغنا؟ قالي لالا ما نسمعش بصح ما علاباليش علاش ديك النهار كي كنت خدام خرجت نتغدا و انت في بالي سمعتها برا تليشارجيتها فالتلفون كل ما نتوحشك نشعلها، قعد يغني معاها حبيتها بصوتو كثر.
قتلو صراااع خلينا نحتفلو بزواجنا، قالي ايه عمري كيما تحبي الدراهم راهم لفوق ارفدي وش حبيتي و ديري لي ترتاحيلو قتلو و أنت؟ قالي و الله غير عندي خدمة سينو نحتفل معاك بصح راكي عارفة راني نجري باش نريڨلي الأمور و نرحلو للعاصمة بصح غير نرجع نحتفل معاك.
قعدت ساكتة و نخمم دار ليا قالي فواش راكي غايسة؟ قتلو والو قالي ما تزعفيش و الله غير عندي شغل سينو لوكان قعدت نتحتفل معاك، قتلو عادي ما فيها والو، حكم يدي زيرها و تبسم، داني لريسطورو تغدينا و رجعنا للدار، وصلني للباب و قالي ما تتقلقيش عليا إدا طولت و ما جيتش بكري و إدا صحلي الوقت نعيطلك قتلو معليش و بقيتو على خير.
دخلت للدار لاقاتني أم سعد قالتلي وين كنتي غير غدوا ان شاء الله العيد الكبير، قلتلها و أنا وش دخلني قالتلي ما نديروش الميناج؟ قلتلها ياك راني دايمن نقي الدار ودخلت جزت على الحاجة صبتها تقرا فالقرآن وليت طلعت لشومبرتي بدلت و تكسلت رقدت ما فطنتش حتى مور المغرب، كي حبطت صبت أم سعد قالبة خليقتها و هيام كانت جات قلتلها وشبيها هادي تخزر فيا فوق نيفها، ضحكت قالتلي لوكان تحكمك توريلك زهرك في صراع برك، قلتلها علاش تان؟ قالتلي كي قالتلك على الميناج و طلعتي و خليتيها داوست مع الحاج قالتلو شوف كيفاش راحت و ما عبرتنيش قالها بعدي عليها ما ديريلناش مشكل مع صراع و زادت كروشات معاه كي ما حبطتيش ديري العشا، قلتلها ياربي و كاش ما تهدر معايا و تشوف قالتلي خلاص امشي نديرو العشا خلينا منها راجلك راهو عيان.
كملنا العشا و حطينا لاتاي قالتلي هيام صح عقدتو ليوم؟ نطقت الحاجة قالتلي إيه صح و الله غير نسيت باش نسقسيك قلتلها اموا واحد فيكم تفكر، ايه عقدنا قالتلي يا بنتي ما جاتش غير في هادي، قالتلي هيام كلشي مبروك الله لا يفرقكم و يبعد عليكم عيون الحسادين، تبسمت معاها قلتلها يبارك فيك، قالتلي الحاجة ان شاء الله زواجة الدهر و يرزقكم ربي بالذرية الصالحة و يحميكم من العين يا بنتي قلتلها تعيشي الحاجة.
أم سعد تخزر فيا و تنسف و الحاج و نائل و وليد عمهم فالصالون يشوفو الماتش، طلعت صبت صراع عيطلي 3 مرات من المغرب عاودتلو ما رفدليش وليت دخلت دوشت و قعدت مع التلفون حتى رقدت ما فقتش حتى سمعتو ينوض فيا، جابلي باتيسري و شموع و ڨاطو و روبة تع الحمل حضنتو و قتلو يعطيك الصحة حبيبي قالي تستاهلي ما كثر بصح هدا وش قدرت ندير إن شاء الله تكوني فرحتي قتلو حبيبي لي جي من عندك كامل حلوة المهم كي تفكرتنيو حطيت راسي على صدرو باس راسي و قالي قيسي الروبة باش ادا ما جاتكش نبدلها قتلو إيه دوك نقيسها و جيت خارجة قالي وين؟ قتلو رايحة نقيس قالي تحشمي مني؟! قتلو صرااااااع 🥺 قالي روحي روحي نشوف لوين رايحتلي بهاد الحشمة..
رحت لبسة و رجعت قالي جاك top عمري  تلبسيه بالصحة و الهنا، بصح وجديلي ناكل راني جيعان ميت و الله من الصباح و أنا واقف على رجل، قتلو دقيقة نبدل و نوجدلك.
جبتلو قعد ياكل لقيت نشكي من ظهري قتلو اووف و الله ظهري راهو يوجعني اخخخ قتلني قالي شوفي عمري حبيتي ترقدي ارقدي و حكاية ظهري وجعني و مانيش قادرة ماكالاه حافظهم ارقدي ما راني محتاج والو من غير سلامتك و راحتك
خزرت فيه صبتو محبط راسو ياكل و متبسم، دار ليا قالي شفتي زهري كيفاش داير، لا عرسي معاك كي الناس و لا العقد، عام و أنا نجري موراك و كل مرة تخرجيلي بموال قتلو قلت ظهري ما هدرت والو، ناض يضحك قالي ههههه و الله غير حافظك ريكتو فرصو ما تلعبيهاش مسكينة، ضحكت و تكسلت نشوف الاخبار معاه قتلو صراع مازال ما بان والو على ماما راني خايفة كاش ما صرالها قالي ما تخافيش عمري برك قاطعين عليهم التواصل غير كاش ما نسمع خبر نقولك سكتت.
غدوا منداك الصباح قالتلي الحاجة عاوني أم سعد بنتي مرا كبيرة اصبري عليها.
تعاونت أنا و حلا فالميناج و هي واقفة عند ريسانا همبرت علينا حتى شبعت و كل شويا تقول مرت نائل سلكتلها و أنا نضحك كي شفتها مقنوطة منها.
سمعنا صوت طونوبيلة صراع فاتت قلنا جا الفرج جينا نحبطو حلفت فينا و خرجت، غير شفتو دخل عيطتلو صراااااااااااع سلكني خلاص ما قدرتش، فتح عينيه و عيط وش راكي ديري لتم احبطيييي قتلو أم سعد ما حبتش عيط عليها قالتلو حلا بابا تكسرنا عيط عليها همبرت علينا حتى شبعت، قال يا عمري على بنتي مد يدو ليها و جبدها ليه يبوس في راسها و يقول بنتي ما تحملش ماتقدرش لهاد الشغل كامل، صابتها فرصة و هربت.
حطيت يدي في جنابي قتلو و أنا وشنو ڨاراڨوز واقيل مارانيش نبان؟! قالي شكون عندي من غيرك مازالكي متعلقة فالدروج احبطي رايحة طيحي و مدلي يدو حطت قتلو بوسني من راسي و خدي كيما حلا، ضحك قالي شوفو الغيرة وش دير، يا بنتي البوسة ديالك دير فيا حالة و انا راني صابر و حامل غير بالسيف قتلو بوس برك يلا، دخلت أم سعد بعد و قالي اطلعي راكي اونسانت قالتلو وين تطلع أبو حرب و هاد الشغل شكون يديرو؟
قالها ياودي راهي حامل قالتلو حنا تان رفدنا الحمل و وقفنا على ديورنا شوف هاد السيراميك كيما هدا لي ماشي مغسول؟ خزر شاف الفرق مع هو مهوووس بالنقا قالها صح ماشي كيف كيف الدنيا راهي موسخة دوك نبدل و أنا لي نطلع نغسلو، دخل لشومبرة الحاجة جبتلو حوايج بدل و طلع غسلو و كمل خدم كلشي في بلاصتي و يعاير، قال للحاج بدل لي بريز لي ماراهمش يمشيو
زاد عيط لنائل قالو شمر على دراعتيك و ارواح تخدم في بلاصة مرتك تشوف، شوف انا مرتي اونسانت و نضت خدمت في بلاصتي مالڨري علبالي بلي النسا ما فيهمش الخير، يهدر و يضحك و حنا نضحكو معاه، أنا و حلا خدمنا غير حوايج خفاف ما كاش كيفاش نهربو مع أم سعد، هو يخدم و أنا نتبع فيه بعينيا جيت موراه نمسح و قتلو لوكان جاو الرجال شبان كامل هكدا النسا كامل راهي ماتت، دار ليا بالخف قالي راكي تتبلاي فيا؟ الواحد راهو شايد روحو غير بالسيف، قتلو اخدم اخدم، قالي و تزيدي تتأمري ملفوق هدا حق ما نوضت الحشد هدا كامل يخدم غير باش ما تعيايش، ضحكت ههههه حبط من فوق الدروج و دار ليا قالي بوسة وحدة برك نشد بيها اليد حتى يفرج ربي و الله غير راني متوحش، جيت نقرب نبوسو جازت أم سعد قالتنا نتوما الزوج ما تقعدوش كيف كيف تديوها غير بوس و ما تخدمو ما تندبو، قالها و أنت خلاك ربي هنا غير باش تقطعي لرزاق كل خمس دقيقة واقفة عند ريسانا يهدر و يضحك قالها راني كملت لفوق قالتلو عاوني نرجعو الخزانة.
صراع كان يوقف على خدمتو على يكملها و زيد خفيف بسلامتو و يدير روحو يبعثني ندير كاش حاجة منبعد يلصقها في وحدوخر ماكاش واحد ما خدموش فالدار، على وليد هيام، محمد وليد سعد، نائل، حلا، الحاج، أم سعد المهم دار وحد لومبيونس فالدار حتى الطونوبيلات و غسلوهم.
رجعو ليلوستخ، الزرابا، الفراش،... كل حاجة لبلاصتها يخدم هو و نائل و يقولونا هدا هو الشغل لي تضلو قاتلينا بيه و تداوسو عليه؟ نسا آخر الزمان سكتونا برك و نخدمو في بلاصتكم المهم حرشو بينا حتى شبعو
قتلو اخدم في بلاصتي و انا نخرج نخدم في بلاصتك في يومين نجيبلك طونوبيل، عقد حواجبو و عيط عليا قالي بواش جيبي الطونوبيل يا الماااااارڨة؟! تخبيت مور الحاجة قتلو و الله ما قصدي وش فهمت نسرق و نجيب قالي ما تعرفيش تهدري سكتينا و دار يضحك قالي حصلت في هاد المخلوقة هههههه وليت نضحك قلت للحاج وليدك هدا ما يتحملش قالتلي الحاجة صاااااار هكدا شوف صراع من غدوا الصباح نروح نخطبلك لي تحملك قالها إيه يا يما لوكان ديريها تدخلي للجنة راهو قاتلني الجفاف كل ما تغرني الدنيا نفرشت السجادة نصلي زوج ركعات و نقول لإبليس الله ينعلو و يخزيه اشششششت المرا راهي اونسانت، قالتلو يا عمري على وليدي راهو يعاني غدوا نخطبلك و ما تبكيش قلتلها روحي زوجيه كاش واحد راهو حاكمك نشوفو شكون تقدر تقدر تحمل وليدك كيما راني حاملاتو
دار ليا قالي و تتنازلي عليا نورمال؟ قتلو إيه ما نحتاجكش كامل بصوفك بحليبك...
كان محبط راسو يرفد مع نائل كي قتلو هكداك عقد حواجبو قالي بصوفي بحليبي يتسمى أنا حيوان هكدا؟!! شدوني عليها راهو ياكل فيها جلدك تحوس على طريحة  و جا يجري ليا رحت نجري تخبيت مور الحاجة قتلها لا لا لا يا يما احكمي وليدك عليا تعيشي، جا يجبدني من موراها و نائل شابع ضحك قالو خليها ليليان خلاتها كي تولي غير تيري برك ههههه قالي صراع شكون الحيوان يا حيوانة؟! قتلو و الله ما أنت حبيبي زلق لساني عمري، طبعتني الحاجة قالتلو هاك اديها نقصلها من هداك اللسان شويا و أنا غلقت فمي بيدي و طلعت يدي لوخرا تع أستسلم و الحاج شابع ضحك، حكمني صراع قالهم واحد ما يغمض عينيه و الحاج يقولو اديها لفوق ماشي قدامنا ههههه، سڨملي خماري و هو يضحك و باس راسي، قالتو الحاجة ماشي من مقبيل و انت تحلف و ندير و نعمل و نقتل و مع لخر بوسة، قالها يما هادي ماشي أي مرا هادي أم مسلم نضربها؟ تتكسر يدي لوكان نضرب يمات وليدي، بيكاتو أم سعد قالت الله يرحم لي عطاتلك ولد و عطيتلها كفن، بعد عليا و دار روحو ياكل من التمر لي كانت تعجن فيه الحاجة للمعمول و ما ردش عليها، تعنكر فيها نائل و هدر معاها بلعقل قالها يما ماشي وقتك كامل ياك رانا نضحكو علاش تحوسي على الحكايات لي يفسدو الڨوسطو.
قعدت ندير فالمعمول مع الحاجة و صراع خرج مع نائل للجنان يفرزوه، كي كملنا كلشي بعث الحاج جابلنا ملبرا كباب مشوي و بيبسي و قعدنا نتعشاو، قال صراع بابا وجدتو الأضحيات؟ قالو إيه شريت 3 كباش مور صلاة العيد إن شاء الله نذبحوهم ، بصح نوزعوهم و لا نعرضو عليهم قالو نوزعوهم للفقراء خير يتفرحو بيهم كثر، و زيد كرهت العرضات تعبها كثر منها.
كملنا وجدنا حوال العيد كامل، طلعت دوشت ظهري قتلني جيت نرقد ما قدرتش من السطر، دخل صراع قالي ليلة العيد ليوم عيدي معايا قتلو صراااع بعد عليا ألف متر بعد ما تخلينيش نلايم الدنيا عليك لا عيد لا سعيد غير وخر عليا راني ميتة، قالي يتسمى أنا دايمن مفضوح معاك لوكان غير على حاجة تسوى قتلو قتلك وخررررر، قالي هدا حق ما جندتهم كامل على جالك أمة لا إله إلا الله كامل خدمت في بلاصتك عاونتي برك يما فالمعمول حرام عليك مرارتي رايحة تطرطق قتلو قتلك روووووووح قالي لا في ليلة عرسي عيدت و لا كي عقدنا و لا في ليلة العيد يمال وقتاش نعيد شوفي فيا و اهدري معايا، تقعدت و قتلو ديجا شكون قالك عيد انا وش دخلني فيكم ياك أنا مسيحية وخررر خليني نرقد قالي حبسي حبسي راكي بديتي تخلطي العقلية تع الطوائف هادي ما نحبهاش أنا..
قتلو اسمع اسمع و جبدت يدو قتلو وليد تحرك قالي قولي و الله قتلو لالا نكدب و جبدت الغطا عليا لفيتو على راسي و نضحك تحت الفراش حتى غفيت و هو رقد.
فطنتلو كي كان يهترف و هو راقد و يقول ليليااااان الما قتلو اووو صراع راني نعسانة قالي عطشت، نضت عطيتلو كاس ما قتلو وشبيك حبيبي، حكم عليا الكاس شرب و قالي انا كي نحلم يلزم يخرج منامي قتلو صراع وشبيك عمري شوف فيا قولي وش نمت قالي حبيبتي كنت أنا و ياك فالمنام قتلو إيه منبعد؟ قالي منبعد .... و جبدني لحضنو و غلق عليا قالي و الله ما راني طالقك نوريلك الفياقة كيفاش دايرا.. عيطت صرااااع لا لاااااااا .. هههههههه
غدوا منداك نضت على ال7 كان راح يصلي صلاة العيد، رحت دوشت و سڨمت روحي و حبطت عيدت على الحاجة و حرب و حلا و أم سعد.
كانوا الرجال كامل فالجامع حتى عيط الحاج قال وجدو رواحتيكم دوك يجي نائل يدكم تغافروا دار عمهم عزام.
وصلنا و قالنا ادخلوا ديراكت للدار الصالو راهو غير رجال، دخلنا غافرناهم، كي لحقت صلاة الظهر دخل صراع و وليد عمو سليمان غافروا على عماتهم، انتبهلي غمزلي قالي ارواحي غافري عليا و لا ماشي العيد ديالكم و يضحك نضت غافرتو، جات حلا تجري ليه باش تغافرو و هو عيط بنتي العزيييييزة حضنها و باسها
و جبد البورطفاي عطالها دراهم و زاد عطالي ليا و لحرب قل منها تقلقت قلت علاش هو حس بيا همسلي في ودني قالي هي عروسة و تحتاج و انت غدوا ان شاء الله راني دايك معايا للعاصمة و اشري وش حبيتي قتلو لالا حبيبي ما نحتاجش دراهم أصلا ما عندي وين نصرفهم ياك راني غير فالداروطبطب على كتفي و راح يتوضى يصلي.
رحت قعدت مع الحاجة قالت مرت عمهم صراع تبدل بزاف و لوخرا قالتلها راني نشوف فيه فرحان و مرتاح ما علابالوش كامل و حنا عمبالنا مهدد و يحوسو يقتلوه قالتلها الحاجة العشق واش يدير و لا نسيتو باباه نهار عشق نسى أهلو و ناسو و حتى ولادو وشنو وليدي تبدل للأحسن ارتاحت نفسيتو و فرح عايلتو، ضحكت خت إخلاص قالت صح الحب أعمى راهي مليحة كي شاف فيه و هي قد حبة الفول و تضحك في وجهي، ما عرفتش وش نواجبها دورت وجهي عليها، منبعد زادت قالت الله يرحمك يازوجدان شبعتي شقى و مع لخر جي وحدة براوية  تتهنى بلي تمنيتي ..
حكمت التلفون بعث ميساج فالفايبر لصراع قتلو (نسا عمومك نكرههم) رجعلي (هههههه ما تعمريش راسك بيهم نكمل و نجي ليك)
كي كملنا الغدا بعثلي ميساج (وجدي روحك نروحو راني عيان دخت)
دخل صابني واجدة قال للحاجة يلا يما هداك هو نروحو قالتلو عمتو اصبروا تشربوا لاتاي قالها يكثر خيركم هداك هو نغفى وحد السويعة باش نروح نغافر صحابي، قالتلو الحاجة ادي ليليان برك حنا منبعد نجيو مع الحاج.
رحت للدار غير أنا و باه كانت الدار فارغة و الكالم، قال ديك الرحمة ماكان حتى واحد، قربت ليه و حوطت خصرو بيديا و شفت فيه قتلو وش رايح يصير لوكان كل يوم هكدا غير أنا و ياك فالدار قالي شكون كيفي، حضنتو قالي ان شاء الله نكملو دارنا و نرحلو و نتهناو من كامل المشاكل، تبسمت حكم وجهي ما بين يديه و باسني.
رحنا لشومبرة سعد القديمة و غفينا حتى للمغرب عيط للحاجة قالها طاح الليل مازال ما جيتو؟ قالتلو دار عمك صالح
عرضونا للعشا، كوبا و حطلي راسي على صدرو قتلو ما تروحش تغافر صحابك؟ قالي راني عيان خليني راقد، غمضت عينيا قالي علبالك كي نكون معاك نتفكر الآية لي قال فيها ربي سبحانو (وخلقنا لكم من انفسكم ازواجا لتسكنوا اليها) .. نحس روحي ترتاح معاك و جيني وحد السكينة لدرجة وين ننسى الدنيا .. قبل عام ما كنت نعرفك ما شفتك و دوك رجعتي انت كلشي في حياتي .. سبحان الله كيفاش يخلق المحبة و يحطها في قلوب الناس .. صح (وجعلنا بينهم مودة ورحمة ) من نهار لي كمل زواجي معاك رجع قلبي ما يطاوعنيش باش نآذيك بشعرة .. هكدا ربي حط محبتك في قلبي وخلاك زوجة ليا رغم كل الفوارق لي ما بيناتنا .. شفتي كي الانسان يتعب و يجوزو عليه أوقات صعاب و امتحانات منبعد  ينجح و يعطيولو كادو  نحس بلي الله جازاني بيك بعدما جازو عليا هموم الدنيا.. هو أعلم بيا بلي ما نحبش المرا لي تتحايل و تلعبها مارڨة و نشك حتى في ظفاري
جابك حتى لعندي ما تعرفي روحك من خيالك ..نعشقك و نعشق كلشي يجي منك خير ولا شر، بتسمت بستو و رجعت حطيت راسي فحظنو و غفيت ...
شحال نحس بلامان كي نكون معاه، نغفى و ما نحس بوالو حتى يالوكان نبدل البلاصة بمجرد مايكون قدامي ننعس..
يا خوفي يجي نهار نرقد نفطن ما نصيبوش، بزاف كان يجيني هاد التخمام كي نتفكر التهديدات لي عليه مرات نتخيل و نقعد نبكي منبعد نستغفر و ندعي لربي يحفظو و يحميه...