مراهقة والاربعيني بلهجة جزائرية

46

#المراهقة و الأربعيني:

#الجزء46:

نضنا الصباح قالي صراع وجدي قشك باش نروحو للعاصمة، كانو كامل مقلقين مني عمبالهم كنت نتورني و ندير فالافلام باش واحد ما يحاسبني بصح هو ما برونشا لحتى واحد حكمني من يدي و طلعني فالطونوبيل و رحنا للعاصمة للدار ديالو لي قعدنا فيها كيما هربنا من الارهاب.
وصلنا حبطني و دقدق فالباب فتحتلنا إسمهان، أنا كنت موراه ما شافتنيش، قالتلو أهلا أبو حرب وشنو هاد المفاجأة تفضل مرحبا بيك، قالها يرحب بيك الخير أم سيف مرتي راهي معايا و حكمني من يدي دخلنا هي تبسمت في وجهي قالتلي مرحبا بيك غلقت الباب و جوزتنا للصالون، قالها صراع وش راكم؟ قالتلو الحمد لله بخير و نتوما؟ دخلت أم صفاء قالتلو أهلا بيكم أبو حرب كيفاش راك دوك ريحت شويا؟ و جازت سلمت عليا، قالها وين راهو أبو صفاء؟ قالتلو هدا وين خرج دوك نعيطولو  فالتلفون تفضلو الدار داركم، و عيطت لإسمهان قالتلها جيبيلهم الماء، قالها لالا يعطيك الصحة كلينا و شربنا فالطريق عيطولي برك لأبو صفاء، قالتلو إيه دوك نعيطلو بصح وش بيها مرتك ماشي في حوالها غير الخير، قالها شويا مريضة..
قعدنا حنا الزوج فالصالون و هوما خرجو، جا وليد اسمهان يكون عمرو وحد 8 سنين هكداك، مدلو صراع يدو قالو أهلا الراجل الزين و سلم عليه، زادت جات طفلة صغيرة سلمت علينا و قعدت.. شويا هكدا و جابت اسمهان سنيوة فيها لاتاي و المعمول قالتلو دوق الملح أبو حرب هدا معمول درتو لبارح، هز راسو رفد لا تاي برك و سقساها قالها عيطتو لأبو صفاء؟ قالتلو إيه هدا وين عيطتلو عجوزتي، ناض هو قال يمال أنا نروح شغل خفيف تع نص ساعة و نرجع، قالتلو ريح دوك يجي، قالها لالا عندي شغل نفريه، دخلت أم صفاء قالها خالتي الله يسترك عينك على ليليان ماراهيش تهدر، قالتلو يا محنتي وش بيها؟ قالها تربط لسانها و جينا لهنا باش يشوفها الطبيب، فرغيلها شومبرة باش تتكسل تريح شويا و نرجع، نضت من بلاصتي حكمتو من يدو و درتلو براسي لالا، قالي علاش راكي خايفة عمري ياك أم صفاء راهي هنا في عوض يماك و أم سيف في عوض ختك، ارتاحي نفري برك شغل خفيف مع واحد صاحبي و نرجع ما نطولش، قعدت شايدة يدو و نديرلو براسي لالا، دار لأم صفاء قالها كيما وصيتك خالتي تهلاي، قالتلي ارواحي معايا بنتي علاش حنا براوية، و دخلتني للشومبرة، هو راح و اسمهان غلقت الباب موراه، أنا قعدت فالشومبرة و هوما سمعتهم يهدرو فالكوزينة على الغدا..
جبدت تلفوني و بديت نعيط لصراع كلما يرفدلي نكوبي و نعاود نعيطلو قعدت ندير هكداك حتى سمعت صوت أبو صفاء، بعثتلو ميساج قتلو راهو جا أبو صفاء ارواح دوك.. ما رجعليش بديت نعيط نعيط نعيط حتى رفدلي قالي و الله غير راني جاي وشبيك علاش راكي داخلة عليا بالتلفونات قريب درت اكسيدو [البنات هدا هو التبهليل لوكان جا بنادم تعيي يا بن عمي هدا كامل فشوش 😒]
شويا و سمعت صوتو كان يهدر مع أبو صفاء و يسلم عليه، خرجت من الشومبرة رحت ليه، لقى أبو صفاء السلام عليا ما واجبتوش دار لصراع قالو علاش ما تردش؟ قالو راهي مريضة تربط لسانها ياك بنت خويا سعد الصغيرة توفات الله يرحمها و هي خافت و تعقد لسانها، قالو لا حول و لا قوة إلا بالله عظم الله اجركم البراكة في ريسانكم، قالو الله يسلمك..
قعدنا فالصالون حطولنا الغدا كنا كامل فالطابلة قاعدين ياكلو و يڨصرو انتبهت بلي ما سقساوهش على كي خطفوه الارهاب كي شغل شايفيتو من قبل و علبالهم وش صرالو.. مع لي دورت وجهي نشوف في اسمهان ما نحاتش عينيها عليه  غايسة فيه، درت ليه صبتو حاط راسو ياكل و يسمع لأبو صفاء ما شافهاش، نغزتو دار ليا قالي انعم.. علاش ماراكيش تاكلي؟ شريتلو تع وين راهو تلفونك؟ دار هو لوليد اسمهان قالو سيف وليدي جيبلي تلفوني راهو فلاشارج و عطاهولي، كتبتلو علاش جبتنا لهنا علاش ما ديتنيش لابارتومو ديالك؟ قالي راني كاريها، كتبتلو أنت جيت من قبل لهنا؟ قالي إيه علاش؟ كتبتلو قصدي مور ما رجعت بعد الإختطاف، قالي إيه عندي وحد الشهر ملي جيت، قتلو و أنا علاش ما علاباليش؟ تبسم قالي في هداك النهار ما طولتش رحت الصباح و رجعت مع العصر.. كولي كولي الناس قاعدة عيب.. كتبتلو ما رانيش الاز هنا تخنقت امشي نروحو، قالي إيه دوك نكملو الغدا و نديك للطبيب بصح كملي ماكلتك..
بداو يحكيو و يسقسيو كيفاش صراتلي حتى تعڨنت و انا نخزر في اسمهان، مرا فالثلاثينات و من العاصمة و شابة تشبه الممثلة هند طالب.. و صراع لاتي يڨصر و أنا نار الغيرة شاعلة فيا حبيت نوض ليها ناكلها..
قعدت نشوف فيه زاد زيان ملي حبس من الجيش ربى لحية و شعر متهلي في روحو و شيان على وش كان ملامحو تبدلت، علبالي بلي ما كانش كامل فايق بلي كانت تخزر فيه لخطر نعرفو من عينيه بصح ما قدرتش نحمل كيفاش كانت تبع فيه بعينيها بديت نبكي، شافني قالي وشبيك؟ خليتو و نضت دخلت للشومبرة خليتهم مصدومين، راح غسل يديه و جا مورايا قالي وشبيك وش صرالك؟ تعنكرت فيه و بديت ننسف و نطبع فيه، قالي كالمي روحك بعقلك قوليلي وش حبيتي؟ بديت نضرب في راسي نشرلو تع رايحة نهبل حايبا نهدر تخنقت، عطاني التلفون قالي كالمي روحك هاكي اكتبيلي باش نفهم،  كتبتلو (هاديك اسمهان قح....... ما نحبهاااااااااااااااااااش)
قالي عيب ما تقوليش هكدا، و زيد وشنو هادي تع اااااااا معاودة الحرف زعما راكي تعيطي؟ هههههه.. قتلو ما تضحكش رايحة نحرقك حايبا نخرج مناااااا... ضحك قالي حتى و انتي عقونة و مقلقة تهبلي حبيت ناكلك و الله هههه، حوطني بيديه و جبدني لحضنو و أنا نحاول نبعدو عليا باسني من رقبتي و عضني على الخفيف من ودني شوكت لحمي و تقلقت كثر بديت نضرب فيه و نبكي، قالي خلاص نوضي وجدي روحك نخرجو.. رحت غسلت وجهي و جيت نبدل قالي تحبي نعاونك؟ درتلو براسي لالا.. داني لطبيب وسمو دكتور فالح، دخلنا سقساه على حالتي حكالو صراع كلشي، بدا الطبيب يسقسيني و أنا نكتبلو، شافلي ودنيا و حاول ينطقني منبعد دار لصراع قالو المرا ديالك ما بيها والو و زيد راهي متفكرة كلشي و سمعها ممتاز بالاك تكون نفسيتها عيانة و تعرضت لصدمة تسبتلها في خلل فالنطق هي قادرة على الكلام عادي وفرلها برك الراحة و ترجع تهدر إن شاء الله..
خرجنا من عند الطبيب داني حوس بيا حاكم يدي و يمشي بيا فالأسواق الشعبية و كلما يقولي إدا نشريلك هديك الحاجة نديرلو براسي لالا منبعد قالي يمال أيا نديك تتعشاي، دخلنا لوحد الريسطورو تعشينا منبعد قالي حاولي انطقي الحروف أ...ب... بلعقل بلعقل حتى يتسرح لسانم،  ما قدرتش قالي خلاص ارتاحي ما تعييش روحك..
خرجنا من الريسطو و قعد يدور بيا بالطونوبيل فالزنيقات تع العاصمة فالليل تكالميت و رقدت، لحقنا للدار شويا روطار فطنت، دقدق فالباب فتحتلو اسمهان، قالها الحاج و الحاجة واقيل راقدين، قالتلو إيه راني غير أنا و وليدي لي نايضين جوزو.. داني دخلنا للشومبرة نحيت الحجاب و دخلت للتوالات لي مقابلة الهول، صبت الحاج هداك وين خرج و دخل للهول تكسل و بقى يتفرج فالتلفزيون، رجعت للشومبرة صبت صراع يبدل في حوايجو، حكيت راسي شريتلو تع حبيت ندوش، قالي روحي دوشي شكون راهو حاكمك، جبدت التلفون باش نكتبلو سمعنا الدقديق فالباب قال صراع شكون؟ قالتلو اسمهان أنا... قالها تفضلي، قالتلو جيت برك نسقسيكم إدا كاش ما تحتاجو قبل ما نرقد، قالها ياريت تديها للدوش  حشمت، قالتلي ارواحي معايا علاش تحشمي؟ داتني دخلت دوشت و جيت راجعة للشومبرة صبت الباب مفتوحة صراع قاعد محيط راسو و عينيه فلرض و اسمهان واقفة تحكيلو على وليدها سيف، دخلت دارت ليا، قالها ساهل غدوا ان شاء الله أنا ندبر راسي، هي خرجت و غلقت الباب موراها، حطيت يديا في جنابي، عقد حواجبو قالي غير لخير وشبيك؟ شريتلو تع وش كاين؟ ضحك و جا لعندي قالي علبالك حتى بسكاتك و تهبلي صار العڨونات حلوين هكدا و حضني، جبدت روحي من عندو رفدت التلفون و كتبتلو ما كالاه تبدل السوجي و أهدر ما تخرجليش قلبي، قالي وشمن سوجي؟ شريتلو على الباب تع راني نهدر على اسمهان، ضحك قالي هادي كامل غيرة؟! ههههههه ما كان والو هدرت معايا على حكاية مصاريف، كتبتلو يمال علاش غلقتو السوجي كي دخلت و ما هدرتوش قدامي؟ قالي لخطر كانت كملت حكايتها و أنا قلتلها ندبر راسي باش نليكيديها و تكوني الاز، ماشي قلتي ما تحبيهاش؟
جبدت النفس و دورت وجهي عليه، ما كنتش شاكة فيه لخطر خزرتو ليها تع واحد يحترم جامي شفتو رفع عينو فيها كلما يهدر معاها يحط راسو بصح هي ساقطة وين ما تشوفو تجي..
كنت لابسة بيجامة و بردت لخطر الشومبرة مافيهاش شوفاج، جبدت بيجامتو من الفاليزا و لبستها فوق بيجامتي جاتني كبيرة كنت نعوم فيها، قعد يخزر فيا قالي علاش لبستيها؟ بردتي؟ ما واجبتوش دخلت فالفراش و تغطيت، قالي سبحان الله كان لسانك طويل و كنتي بنص عقل دوك راح لسانك راح العقل معاه كملت عليا، درت ليه قرب ليا و حضني قالي لوكان تزيدي زوج سمانات من عندي بلا لسان و الله غير تهبليني، عطيتو بظهري و جيت نرقد قالي يا بنتي اعطيني بجامتي خافي ربي علبالي البرد، خليتو و رقدت ولا حضني و حط راسو على راسي و رقد..
نضت الصباح جوايه العشرة ما صبتوش نحيت سروال البيجامة ديالو قعدت غير بديالي بصح خليت تريكوه فوق تريكويا يلحقلي حتى لركبتي و خرجت صبتهم فطرو و كملو الشغل و رايحين يديرو الغدا .. قالتلي أم صفاء صباح الخير بنتي تبسمت معاها شريتلها تع وين راهو راجلي؟ ما فهمتنيش، دورت وجهي و تنهدت، قالتلي قصدك على أبو حرب؟ درتلها براسي إيه، قالتلي خرج مع أبو صفاء عندهم شغل شويا و يرجعو.. و حطتلي نفطر
اسمهان قاعدة غير تشوف فيا منبعد نطقت قالتلي علاش راكي لابسة تريكو تع بيجامة، خزرت فيها مستغربة قلت في قلبي وشنو صحانية الوجه هادي و هي وش دخلها، نضت رجعت للشومبرة و رفدت التلفون نعيط لصراع هو غير يرفد نكوبيلو و نعاود نعيطلو قعدت ندير هكداك حتى بعثلي ميساج قالي رايح نجي دوك بركاي ما تعيطي راني مع الناس..
نص ساعة منبعد دخل غير شفتو بديت نبكي قالي علاش راكي تبكي علاش انت دراري؟ ياك قتلك راني جاي علاش راكي ديري هكدا؟ كتبتلو ما نحبش العاصمة رجعني للدار، قالي إيه دوك نتغداو و نروحو، بديت نخبط برجلي فالقاعة و نديرلو براسي لالا و بديت نطم في حوايجو فالفاليزا نرفد و نرمي لداخل و لبست حجابي و شريتلو تع نروحو دوك، قالي حتى في هاد الحالة و ما نسيتيش خشانة الراس ديالك؟! قتلك نتغداو و نروحو عيب وشبيك راهم موجدين الغدا على جالنا نخليوه على وجوههم؟!!
رميت الفاليزا و قعدت فوق البونك نبكي، قالي ما نبطاوش قعدت نص ساعة يأذن الظهر نتغداو و نروحو، دورت وجهي عليه و نبكي، حضني قالي خلاص خلاص نوضي و حبسي عليا البكا نشوفو وين رايحة توصل بيا معاك..
خرجنا من الشومبرة شافنا أبو صفاء قالنا وين رايحين و الله ما تخرجو حتى تتغداو  راهو واجد كلشي، قالو صراع يعطيكم الصحة بصح و الله ما نقدر اسمحولنا زاد عليها الحال شوف حالتها ما علباليش وش  بيها.. شافو فيا عينيا حمورا من البكا ولاو سكتو و هو رجعني للدار طريق كاملة و هو ساكت، كي وصلنا و جينا داخلين قابلتني البلاصة لي طاحت فيها أروى وليت نبكي قالي ما تقلقيش روحك هدا مكتوبها المهم دوك ترتاحي حتى تتحسن حالتك و ترجعي تهدري..
كانوا فالدار ضياف جاو يعزيو هو دخل من الباب تع الصالون و أنا من الكوزينة، صبت نور و ضحى واقفين نطقت نور قالتلي وش راكي؟ هزيت راسي و دخلت صبت الحاجة قاعدة مع أم سعد و نوال و 3 نسا يكولولهم، نطقت الحاجة قالتلي وش راكي؟ قعدت قدامها، قالتلي عطاولك الدوا؟ درتلها براسي إيه، قالتلي أم سعد هدا ذنب الطفلة خرج فيك، نحط يدي فالنار غير أنت لي طبعتيها من حقدك عليا باش تحرقيلي قلبي على بنت وليدي، قالتلها الحاجة وشنو هاد الهدرة؟ ماشي لهاد الدرجة الطفلة الله يرحمها لحق نهارها، قالتلي لالا هاد المصفارة وجه شر منهار دخلت علينا ما شفنا الربح، من عابد الله يرحمو لي قتلو خوها الارهابي لوليدك لي كانت حايباتو يموت و تتحكم في رزقنا و دوك هاد الطفلة لي راحت.. هي تهدر و نوال تتحسب و تدعي عليا و أنا نبكي خرجت و خليت الحاجة تهدن و تقنع فيها بصح والو.
صراع ما شفتوش حتى لليل دخل عيان ميت رقد ديراكت بلا ما قال والو..
غدوا منداك واحد ما قادر يشوف في وجهي النص قالو راهي تورنيو النص قالو ذنب الطفلة خرج فيها.
قلت لصراع باش نروحو لدارنا الجديدة علاش رانا قاعدين هنا؟ قالي اصبري جوز سمانة على وفاة الطفلة منبعد نروحو نسيقو الدار و نجيبو الاثاث نسطاليوه و نرحلو..
جات هيام تحكي معايا و عرفت منها بلي نهار الجنازة تع الطفلة الله يرحمها ضارب مع الحاج و سعد برا و عمومو لاموه، قالولو مرت هي سباب موت الطفلة انت مرتك خليتها ما حاسبتهاش و رحت ليماها و هي قلبها محروق على بنتها، و هو قالهم الغلطة تع يماها هي ما عستهاش و لاتية تڨصر، قالولو علاش راك دافع على مرتك وعلاش ما رجعتهاش ليماها كي كمل غسلتلها و خلاتها وحدها، قالهم علاش هي خرجتها للزنقة؟ غسلتلها حطتها فلرض و الطفلة نهار كامل و هي دور فالدار و تلعب ولا برك دايرين مرتي بورت مونتو تعلقو فيها غلطاتكم، الغلطة تع يماها ما عستهاش و تع باباها كي خلا الروڨار مفتوح و علبالو بلي كاين دراري صغار فالدار، و مع لخر قالو عمو صالح يخي وقت وصلنالو رجعو رجالنا يخيطو الدراري الصغار بمساطشهم  و صراع غاضاتو و تحاكم معاه هداك يقولو دفنت بنتي (على وجدان) و لوخر يسب فيها، سلكو ما بيناتهم منبعد زاد حكمو الحاج و عمو عزام قالولو وش راهو صاريلك كيفاش حتى بدلاتك مرتك لهاد الدرجة، ضربت مرت باباك على جالها، حاوزت أهلك على جالها، و دوك كانت سبب في موت طفلة صغيرة و تبربر فيها و فوقها معول تخرج بدارك و تخلي باباك... زاد ضارب معاهم و طلع لعندي..
كي رجعنا من العاصمة قعد معاهم و استقبل الضياف معاهم بصح الحاج قاعد يقول على شيبتي خلاوني ولادي وحدي، سعد رايح يخرج الكراي و يرجع لدارو و صراع شرا دار و رايح يعزل عليا..
صراع كان يسكت ما يردلهمش بصح كانت  تغيضو كي يسمعهم يقولو مراهقة راهي تمشي فيه كيما تحب.. قالهم وش درت حتى راكم تقولو يمشي بشورها، انا شريت راحة بالي حبيت نخرج بداري وحدي عييت لوقتاش نقعد متحمل فلان وعلان، و بابا ما رانيش مخليه فالزنقة ياك خليتلو دار و زيد نائل و مرتو راهم معاهم..
هو كانو يخرجولو قلبو بهاد الديباجة و انا لي يجوز عليا يقول الله لا تربحها لعبت بعقلو، بنت عمو كرهلها معيشتها و باه دارها و خلاها مع ماليه بالسيف، و هادي يبنيلها قصر باش واحد ما يدنى ليها حتى حسيت بلي سرقت وليدهم منهم..
جازت سمانة و أنا قليل وين نحبط لتحت و هو قليل وين يدخل للدار.. مع لعشية حبطت كانت الحاجة قاعدة و صراع فالڨاراج و نائل فالجنان و النسا قاعدين فالهول، شافتني أم سعد قالت هاي جات دور كي الهامة وجه الشر فكرتنا بموت الطفلة الله يرحمها و موجدة روحها تحوس على الدار، و نوال دخلت معاها فالخط و الحاجة تسكت فيهم كثروا حتى ما قدرتش صغت على طول صوتي خلاااااااااص.. الله يديكم و نتهنى منككككككم.. عيييت.. و رفدت السنيوة تع لاتاي قلبتها نرفد فالكيسان و نرمي رحت للكوزينة نكسر فالماعن و الزجاج نبكي و نصوغ نقولهم  وش درتلككككككم أنااااا... عييييت...
نور و ضحى يجبدو فيا و الحاجة ناضت و الحاج يعيط عليا و نائل يسكت و يجبد في يماه و أنا نصوغ على طول صوتي ما سكتش حتى دخل صراع ملبرا اششششت صوووووتك... سكتت و درت ليه.. فقت مع روحي بلي رجعت نهدر قتلو صراع نطقت...و الحاج قالي لوكان غير ما هدرتيش تهنينا من صوتك و مشاكل مدة سمانة، صراع تبسم و جا يمشي في وسط الزجاج و التكسار لي درتو، حكم يدي و قالي الحمد لله على سلامتك، عنقتو و نضحك هدرت صراع هدرت هههههه.. الحاجة قالتلي بصحتك رب ضارة نافعة.. كسرت الدار و نطقت، قالها صراع ماشي خسارة المهم نطقت و الله غير توحشت صوتها، قالتلو يمال عندك ما تحمل..
الحاج ما عجبوش الحال و أم سعد رجعت  ما تضويش كي شافت مواعنها و دوزانها كامل مدڨدقين و ناضت تعيط و تقول الله يشل يديها يخسرهم راجلها ولا نقتلها.. و صراع قالي ما دام نطقتي نوضي البسي نديك للدار نسيقوها.. ما برونشيتلهمش كامل طميت وش كسرت رميتو فلابوبال مسحت الكوزينة و خرجت معاه انا و حلا و هيام غسلنا كامل الدار ملفوق لتحت و فالليل رجعنا عيانين قتلو على هاد التعب رايح يعاود يتربط لساني، قالي غير ما تخافيش دوك كي تسرح وش رايح يحكمو ههههه..
جينا كامل الأثاث و الدوزان و سطاليناه أنا و ياه و هيام و علي و نائل، 4 أيام و كملنا كلشي..
خرجنا من دار الحاج سلم عليه صراع قالو يكون في علمك مانيش راضي، باس راس. و قالو ترضى إن شاء الله بلعقل و توالف..
دخلنا لدارنا الجديدة بلا مشاكل و وجيع الراس، قعدت الحاجة في شومبرتها، و انا و حلا طلعنا لفوق، دخلت لشومبرتي نستف في حوايجنا، دخل رحت نجري عنقتو قتلو ما تيماجينيش شحال راني فرحانة.. باس راسي قالي وعدتك باش نهنيك منهم و نديرك ملكة و نخليهم يتمناو عيشتك، حوطت رقبتو بيديا و ضعت معاه..
غدوا منداك نوضني قالي احبطي لتحت راني رايح، قتلو وين؟ قالي لدار الحاج عيطلي كاين جماعة من فاميلتنا جاو ليه، راني داي يما و نروحو مور الغدا نرج اوكي؟ قتلو معليش روح..
دخلت دوشت و رجعت للشومبرة صبتو وجد روحو قالي راني رايح كاش ما تحتاجي؟ قتلو إيه قالي وشنو؟ قتلو بوسة،
قالي إدا الحوايج لي تحتاجيهم كامل هكدا راني هايل، عنقتو و حطيت راسي على صدرو قتلو نموت عليك، باس نيفي ضحكت قالي و أنا كثر، بستو من شفايفو، قالي أواه هكدا راكي تقوليلي ريح ما تروحش، قتلو راك تحوس الحاج يخرجني من البلاد كامل و يعيط سرقت وليدييييي... ضحك حكم حناكي و باس خدي قالي تهلاي في روحك قتلو ترجعلي بالسلامة، قالي إن شاء الله أيا ابقاي على خير..
هو راح و أنا حبطت نفرز فالدار، زوج سوايع منبعد حبطت حلا قالتلي صباح الخير قلتلها مساء النور ضحكت قالتلي راكي وحدك؟ وين راهو بابا؟ قلتلها راح لدار الحاج عندهم ضياف، قالتلي وش كاين ماكلة راني جيعانة، قلتلها ما كاين والو قلت تحبطي و نطيب ما قدرتش ناكل وحدي و دخلنا للكوزينة نشوفو وش نديرو، قلتلها حلا نسقسيك كيفاش حتى وليتي تحبيني ياك كنتي تكرهيني، قالتلي ملي ماتت يماك غضتيني منبعد كي عشنا فالأردن عام و نص كيف كيف و تعرفت عليك عن قرب صبتك ماشي كيما كنت دايرة في راسي و زيد كبرنا نقعدو نداوسو؟! ضحكت قلتلها صح..
حوسنا على الزيت باش نطيبو قلبنا الدنيا ما صبناهش، عيطت لصراع فالتلفون باش نسقسيه إدا شرا و لا لالا ما رفدش عليا، عيطت للحاجة خلات تلفونها فالدار، قلتلها لخلا و دوك منين نجيبو الزيت؟ قالتلي عندك دراهم؟ قلتلها إيه، قالتلي البسي حجابك و روحي اشري من عند الحانوت لي مقابل الدار، قلتلها لالا حبيتيه يذبحني،  قالتلي روحي بلخف وين رايح يعرف بابا، قلتلها لالا إلا صراع ما نلعبش معاه هنا يعدمني، قالتلي أنا نعسلك عند الباب و أنت روحي، قلتلها و علاش ما تروحيش انت؟ قالتلي شوفي كيفاش راني هدا وين نضت من الرقاد حبيتيني نخرج هكدا؟
طلينا من الباب صح الحانوت قريب بيناتنا 3 ديور برك، لبس حجابي و رجل لقدام و رجل لور الحومة كانت فارغة رحت بلخف شريت بيدون زيت مع لي درت شفت طونوبيلة صراع قدام الدار و هو حبط يفتح الباب باش يدخل الطونوبيل، قلبي حبس غطيت وجهي و درت باش ما يشوفنيش ، هو دخل الطونوبيل و غلق الباب، يا ربي كيفاش ندير دوك حتى التلفون و ما رفدتوش معايا باش نعيط لحلا تفتحلي الباب بلاما يفيق
قربت من الباب ماكان حتى صوت فتحتو بلعقل ما صبت حتى واحد فالڨاراج نحيت الحجاب و خبيتو مور البو تع ليبلونت، طليت براسي قابلني ديراكت كان خارج من التوالات عاقد حواجبو و يشوف فيا قالي وين كنتي؟ بلعت الريق دمي نشف من الخوف.. قالي داخلة ملبرا كي السراق و تخبي فالحجاب وش خرجكككككك، قتلو و الله رحت برك جبت الزيت، قالي تتمسخري بيااااا.. الزييييت؟ راني جايب كارطونة.. قتلو دقيقة اصبر نفهمك و الله غير رحت نجيب الزيت سقسي حلا، حكمني من ودني قالي جبت انا الزيت و لا لالا؟ قتلو و الله ما شفتو والعباس ابو فاضل ما شفتو ..عقد حواجبو قالي شكون العباس أبو فاضل!! شكون علمك تعحلفي هكدا؟ قتلو و الله ما أنا فالفايسبوك يحلفو هكدا، رفع حواجبو و شد الضحك، حضنتو و قتلو بجاه العباس أبو فاضل ما ديرلي والو و الله مانزيد نعاودها، ضحك و جبد راسو عليا قالي وش نديرلك دوك غير قوليلي، قتلو عندك الحق لي ديرها فيا في حقك بصح جوزهالي هاد المرة والله ما نعاودها، ضحك ههههه باسني من خدي و قالي يلا ادخلي.. ما آمانتش بلي سلكت دخلت نجري و رافدة بيدو الزيت و نقول يماااا سلكت من صراع في جرة العباس ابو فاضل و هي تضحك.. قابلتني حلا ضربتها بكوتبي قلتلها خبيتي راسك يا وحد اللفعى و حصلتيني لوكان ماشي العباس راني دوك نتغسل و رايحين يدفنوني .. و هي تضحك.. قالي صراع رجعتي تضربي كوتبيات يااااه هههه.. و الحاجة قالتلي تعرفي شكون العباس و لا تهدري برك، قلتلها ما نعرف شفتهم يحلفو بيه فالفايسبوك، ضحك صراع قالي هو وليد الإمام علي وليد عم النبي عليه الصلاة و السلام، قلت للحاجة دارلي معجزة تقعد فالارشيف صراع يضحك و أنا خرجت بلا علمو؟ قالي و كي علبالك ما نحبش علاش تخرجي ياك جبت الزيت، قالتلو حلا و الله يا بابا غير حوسنا و ما صبناش و عيطنالك فالتلفون ما ترفدش قلتلها روحي اشري بلخف، قالتنا الحاجة هيام حطاتو تحت البونك ديالي ما شفتوهش؟ قلتلها وعلاش حتى تحطيه عندك فالشومبرة لوكان حطيتوه فالكوزينة، قالتلي لخطر علبالي بيكم تفسدو لوكان ما نوقفش عليكم، قلتلها كي تخبي الزيت باش ما نفسدوهش يمال جايبو نحطوه شباح فالكوزينة؟ ربي لطف بيا سينو لوكان راني ميتة دوك بسبتك، و درت لصراع قتلو خرج وعدة عليا، قالي فوق ديڨاتك و فوق ما خرجتي بلا علمي حبيتيني نجيب ذبيحة على زين فعايلك ياك، قتلو علاش قتلك اذبح أم سعد؟ ناض يضحك هو و حلا، و الحاجة قالتلي ليليان  الله يهديك ما توالفيش تهدري في ظهر الناس
قالها صراع يما لا غيبة على الفاسقين هههههههههه، قالتلو استغفر الله وليدي وش صرالك ملي خديت هاد المصفارة وليت خفيف، نعرفك تخاف ربي و رزين و ميزانك ثقيل، قالها هديك بكري دوك رجعت صراع بو الديڨات راجل أم الديڨات هههه و لينا نضحكو قالتلو الحاجة يمال ربحت علينا هكدا ههههه
قعدت أنا و حلا فطرنا و صراع قعد معانا، كملنا هو طلع لفوق و أنا قعدت في شومبرة الحاجة و نتفرج التلفزيون معاها، دخلت حلا قالتلي خليتي الشغل عليا و بابا داخل خارج على لاتاي علاش خدامة عندك، قلتلها مليحة ليك توالمك الخدمة، رفعت حاجبها ما عجبهاش الحال، قلتلها سبحان الله عزة الدوري تقول فاميلتك تتشبهيلو فولة و تقسمت على زوج، قالتي تع وجهك بالاك يتشبهلك ليك، قلتلك خلاص ما تزعفيش عندك وجه خالتك إخلاص، ضحكت الحاجة قالتلي ليليان بركاي ما تهدري في ظهور الناس، قالتلي حلا تع وجهك خالتي إخلاص تزيدي جيبي سيرتها على لسانك نقطعو و دوك نطلع لبابا يوريلك، قالتلها الحاجة راهي تتمسخر معاك ما تزعفيش راهي في عوض ختك..
راحت طلعت لصراع حكاتلو و هو حبط دخل مربع يديه و تكا على الباب قالي و كيفاش دوك معاك ما تبركليناش من المشاكل كل شويا دايرا حكاية؟ قالتلو الحاجة تتمسخر معاها غير ما تدخلش في لعبهم دوك يوليو لبعضاهم، قالها ااااه يا الحاجة واقيل راهي حاليتلك معاها، قالتلو و كي ما نتونسش بهاد المهبولة وين حبيتني نروح.. جا قعد قدامي قالي انا بنتي تشبه لإخلاص؟ قتلو علاش وشبيها ماشي مرا؟ قالي تشبه لعبد الجبار شنشل، علاش ما تريحيش طرونكيل.. خزر في رجليا و همسلي غطيهم راهو بدا قلبي يذوب، قتلو يمال ما تشوفش باش ما تذوبش، كنت نهدر و عينيا فالتلفزيون نغزتي درت ليه صبتو مازالو يشوف خزرت في عينيه عض شاربو و شرلي بحواجبو تع اطلعي لفوق، شفت الحاجة كانت متكسلة و عاطيتنا بالظهر مديت يدي على رجلو تلمستها وقربت وجهي لشفايفو قبل ما يبوسني بعدت عليه و قلت للحاجة حقا يما هيام ما جاتش ليوم؟ بدا يحك في رقبتو و يشوف فالسقف و يتمتم، قالتلي لوكان تنساي هيام و تطلعي لراجلك فعوض ماراكي شاعلة قلبو و تلعبي بيه ماشي خير، قالها صراع الله يرحم والديك يما و شاف فيا قالي شفتي يما كيفاش تفهم يلا اسمعي لكلامها و اطلعي، قلتلها للحاجة قوليلي برك عندك عينين في قفاك؟ منين راكي تشوفي؟ قالتلي غير ما تخافيش مام نكون مغمضة و نشوفكم، قرصني هو من جنبي و قالي خلاص صبري عليك اطلعي ما تقلقينيش، و ناض ضحكت و قعدت في بلاصتي ناكل فالزريعة، قالتلي الحاجة نوضي اطلعي لراجلك، قلتلها اصبري نكمل وشبيك مقلقة هكدا كثر من وليدك، قالتلي نوضي راجلك يقولك نوضي و انت قاعدة تاكلي هنا
قلتلها اوووووه... حتى القعدة الواحد ما يرتاحش فيها و نضت خرجت مع لي حطيت رجلي فالدروج جبدني و دخلني للشومبرة غلق الباب و فيكساني معاه بلا ما يهدر صبتو كي المهبول عليا و أنا ندلل عليه نبعد عليه من و من ما خليتوش يبوسني، حكمت راسو و قتلو خلااااااص.. علاش ما عندناش شومبرتنا حتى دخلني هنا، قالي الدار دار و حلالي وين ما يعجبني نريح، قتلو ما دام هكدا مليح و مديت راسي بوستو زاد هبل قعدنا هكداك حتى سمعنا صوت الحاج فالصالون يقول لحلا ازڨي لباباك، طميت شعري و هو سڨم روحو و خرج قعد مع والديه و أنا دخلت عليهم الحاج غير شافني لابسة هكداك  دور وجهو تقلق و صراع تعنكر فيا بوحد الخزرة لوكان صبت تنشق الارض و تبلعني، هربت طلعت بدلت حوايجي و عاودت حبطت، جيت نديرلهم العشا ما حبش يريح يتعشى و قالو خسارة عليك يا وليدي خليت باباك باش تقابل هاد المصفارة لي ما تحشمش، قد ما حاولو باش يريح يتعشى ما حبش، غير خرج جا صراع ليا للكوزينة بهدلني قالي كيفاش تخرجي قدام بابا هكداك و تمشي قدامو بالميني و البروتال ما تحشمي ما تحتارمي؟ قتلو و الله غير نسيت ما نزيدش نعاودها، قعدت يتعنكر فيا قتلو خلاص ما تزعفش وشبيك نسيت روحي وش كنت لابسة.. جبد النفس و قالي شوفي ليليان في هاد الدار البسي وش تحبي ادا حبيتي حتى امشي عريانة راكي حرة بصح كي يجي واحد من أهلي احتارمي روحك و البسي كيما كنتي تلبسي عندهم مفهوم؟ قتلو مفهوم، راح و ما حبش يتعشى طلعت للشومبرة سمعت الما فالدوش سنيتو حتى دخل و حضنتو من ظهرو و نبوس في دراعتيه قتلو خلاص تعيش ما تزعفش و الله ما درتها بلعاني، جبدني ليه باس خدي قالي خلاص بصح ما تزيديش تعاوديها، قتلو احبط تتعشى، قالي راني شبعان نخرج نريح شويا مع صحابي و إدا بطيت ارقدي ما تسناينيش هكدا؟ قتلو معليه بست خدو و حبطت..