مراهقة والاربعيني بلهجة جزائرية

51

#المراهقة و الأربعيني:

#الجزء51:

كان خرج جيت نماكيي ما صبتش الباطة ديالي تع الماكياج سيري تع 12 لون ما كاش..حوست فالشومبرة والو.. وين راهم يروحو دوزاني؟!!
ما كييت بلي كان و حبطت لتحت صبت هيام قاعدة مقلقة و علي واقف و يعيط قالها أنا حايب نتزوج علاش ما راكيش قابلة؟ قالتلو انت الجامعة مازال ما لحقتلها كمل قرايتك منبعد تزوج.. قالها أنا للجامعة ما ندخلش وش دارو لي كملو قرايتهم.. نكملك الترمينال نحوس على خدمة و نتزوج.. قالتلو افهم يا وليدي هدا المستقبل ديالك راك شايف الوضع تع لبلاد غير يزيد يدهور و ما تعرف منا للقدام وش رايح يكون شكون لي ضامن.. قالتلو الحاجة منين خرجتلنا بحكاية الزواج يا وليدي مازالك صغير.. قالها أنا قلتلكم نكمل الترمينال تخطبولي و لا حبيتوني نروح للطريق العوجة و ترتاحووووو؟ قالتلو هيام يا وليدي ركز في قرايتك عندك باك منبعد ساهل نشوفلك مرا.. قالها مانيش حايب تشوفيلي أنا لي نحوس عليها علبالك شكون.. قالتلو ااااه وصلنا للمسقي بنت سعد غير انسى باش يعطيهالك علبالك بلي سعد و محمد يكرهوك.. قالها و أنا وش راحلي فيهم علاش رايح نتزوج بيهم ما عندو ما دخلهم؟ قالتلو كيفاش ما عندو ما دخلهم أهلها.. قالها و الله و نعرف نقلب الدنيا غير هي لي نديها.. قالتلو يا وليدي ارحمني خلينا من هاد الحكاية و التهى بقرايتك.. قالها أنا لي عندي قلتو دوك قعدت عليكم.. و خرج
بدات هيام تعيط قالت للحاجة يا يما قوليلي كيفاش ندير مع هاد الولد؟ قالتلها يا بنتي الجيل هادا واعر روحي معاه بلعقل هو راهو حايب يفرض روحو راهو في عمر صعيب.. دارت ليا هيام قالتلي ليليان أنت قريبة لعلي ما علابالكش ادا مازال يتواصل مع حنين؟ قلتلها ما علاباليش.. و نضت رحت للكوزينة انا كان علبالي بلي راهم يتواصلو بصح ما نقدرش نقول.. دخل صراع قالي ربي يعاونك قتلو أهلا عمري.. رفع حواجبو قالي ليوم راكي ماكيي.. قتلو علاش غير من ليوم؟ قالي بصح ليوم زدتي فيها شويا إدا كاش ما عندك قوليلي راني هنا.. ضحكت قالي ديريلي نتعشا راني جيعان.. قتلو صراع و الله بزاف عليك في كل دورة جوع دير ريجيم.. قالي خلاصولك المشاكل دورتيها تالبي فيا على الماكلة حبيتيني نشيان و أنا نوزن غير 89 كيلو.. قتلو قعدلك شويا و تولي طن.. قالي أنا نوزن طن يا وحد الحابسة؟ الطن ألف كيلو ماشي 100 كيلو.. ما تسلكي راسك لا فاللغة لا فالرياضيات لا فالعلوم ما تفهميني أنا.. فواش تفهمي أنت يرحم والديك؟ قتلو هادي هي أنا.. قالي وجديلي وجديلي تشوفي..
كملت العشا ديتلو صبتو قاعد مع هيام و هي تشكيلو من وليدها علي.. قالها خليها عليا ختي أنا نهدر معاه مازالو طايش ماشي تع زواج..
حطيتلو قتلو صراع السيري تع الماكياج ديالي ما شفتهاش؟ قالي وش حكايتك أنت كل يوم تروحلك حاجة؟ قتلو والله ما فهمت ما صبتهاش.. قالي و أنا وين علابالي شوفي وين بحرتيهم..
دخل نائل قالو أبو حرب راهم جاو الجماعة على الطونوبيل.. خلا الماكلة و راح للصالو كي كمل معاهم عاود دخل هو و نائل سربيتلهم لاتاي و سقسيتو على وش من طونوبيل راهم يهدرو، قالي رايح نبيع طونوبيلتي و نشري وحدوخرا جديدة..
فالسهرة جاو ولاد عمو و رجعنا لحكاية لاتاي و الدخان و الڨصرة ما طلعش للشومبرة حتى ال12 تع الليل..
غدوا منداك خرج الصباح على جال حكاية الطونوبيل.. كملت شغلي و سنيتو للغدا ما جاش طول وليت حطيت مخدة في شومبرة الحاجة و غفيت..
ما فقتش حتى جا صراع نوضني قالي اطلعي لفوق قتلو نحطلك الغدا قالي لالا متغدي اطلعي عندي هدرة معاك، قتلو وشنو؟ خلاني و طلع لحقتو بلخف دخل للشومبرة قعد قتلو وش كاين وش صرا؟ قالي مرة أخرى كي تحبطي لتحت اغلقي شومبرتك ما تخليهاش مفتوحة، قتلو علاش؟ قالي هكدا اسمعي الكلام ما دام قلتلك اغلقها معنتها شفت حاجة ما عجبتنيش.. قعدت نانسيتي عليه باش نعرف وش كاين حتى قالي جيت داخل للشومبرة صبت نور لداخل تقلب في دوزانك كي شافتني تشوكات و تفرفشت سقسيتها وش راهي دير قالتلي عمبالي ليليان راهي هنا و انت راقدة لتحت.. قتلو يمال هي لي دات دوزاني.. قالي حتى و تكون هي هاد العفايس ماشي لي ديري مشكل على جالهم.. اغلقي شومبرتك و ما تقولي لحتى واحد عيب.  قتلو وعلاش يمال هي علاش ما حشمتش كي دخلت لشومبرتي.. تحرقني قدام الحاجة على الشغل و ما هدرتش.. تهدر على لبستي و ما هدرتش و دوك جي تقلب في شومبرتي؟! قالي سمعتيني وش قلت و الله و نسمع كلمة خرجت من فمك ما تلومي غير روحك.. شدي لسانك و أنا ندبر راسي..
خزرت فيه و قلت في قلبي كيفاش يتصرف و أنا نسكت بوشمن حق؟
قعدت الحكاية في راسي حبطت فالليل جيت رايحة نهدر معاها بصح خفت من المهبول ديالي يبهدلني سكتت بصح ما بلعتهاش هادي حلوة بالصح في داري و نغلق شومبرتي يخرج خوه و نتهناو..
غدوا منداك الصباح.. خرج الحاج و أم سعد ما علاباليش وين راحو و نور كانت قاعدة معانا هي و ولادها نفطرو.. سقسيت الحاجة قلتلها يما السوغتي دوبا ديالي ما صبتوش فالصالدوبا ما شفتيهش؟ نور تفرفشت و قالتلي ياخاه علياااا أنا ديتو دوشت فالليل و حبطتو.. قلتلها و الشومبوا و الماكياج؟ قالتلي راكي تسرقي فيا؟! قلتلها لالا راني نسقسي فيك.. قالتلي لوكان ديتهم نقولك ديتهم مع السوغتي دوبا بصح باش تسقسيني عيب عليك.. قالتلنا الحاجة وشبيكم يا بناتي ربي يهديكم.. قلتلها يما بصح ما قلت والو سقسيتها هي ما علباليش وش بيها و درت ليها قلتلها أنا ما سرقتكش بصح عيب عليك تدخلي لشومبرتي و تقلبي في دوزاني لوكان قلتيلي نعطيلك.. انا قلت هكدا و المرأ شعلت قالتلي أنا ندخل لشومبرتك؟ يتسمى سرقتك؟ حاشاك إدا أنا نسرق منك أنا شبعانة في دار بابا بصح كل واحد يشوف الناس على حساب تربيتو.. قلتلها مادامك واثقة من كلامك يمال نروح لشومبرتك و نحوسها و انت حاضرة و نشوفو.. قالتلنا نتوما ما تحشموش.. خلااااااص.. قالتلها نور لالا ما خلاصش تتهمني بالسريقة و تزيد تحوس شومبرتي و الله ما نسكت دوك نقلبها و دقيقة ما نزيدهاش هنا يجي الموسيو ديالها و نشوفو إدا راهو راضي بالكلام لي راهي تقول فيه.. قلتلها انا ما قلت والو انت لي دخلتي لشومبرتي ماشي عيب عليك..
قعدت الحاجة تعيط علينا و هي خرجت و قعدت فالڨاراج تبكي حكمت ولادها زرقتهم.. خفت حسيت الحكاية كبرت و صراع لوكان يرجع و يسمع رقبتي ينصلها.. رحت للڨاراج صبت الدراري يتبكاو و يتصاوغو رفدت الصغير و جبدت التوام لعندي قلتلها نور ماشي قصدي سقسيتك برك.. ما هدرتش معايا ناضت مقلقة و حرقت التلفون على نائل..
وجدت بيبرو لعابد و ديتو لشومبرة الحاجة باش نرضعو.. قلتلها يما وش ندير دوك و الله غير شافها صراع لبارح تحوس في شومبرتي كي كنت راقدة هنا عندك.. قالتلي حتى و دخلت عيب تخرجيهالها طاي طاي.. لوكان عسيتيها كي تحكميلها داخلة اهدري معاها ماشي تحطي صراع في وجه المدفع و تكبريها.. لوكان جيتي و حكيتيلي وحدي و انا ندبر راسي ماشي هكدا قدامها.. قلتلها و دوك كيفاش؟
قالتلي روحي عيطيلها قوليلها الحاجة تحتاجك، رحت ليها صبتها تدعي عليا و تتحسب.. دخلت للكوزينة ندمت وش داني نهدر لوكان يجي صراع و الله ما يرحمني لخطر وصاني..
جبدت الطنيجرة و قعدت نوجد فالغدا و ألف حساب في راسي، سمعت الباب تع الڨاراج تفتح يبست في بلاصتي عمبالي صراع منبعد ظهر بلي نائل لاقاتو نور عند الباب تبكي و تشكي و هو يعيط و يقولها خليني نڨاري الطونوبيل.. قالتلو هادي آخرتها انا تتاهمني وحدة قد فخدي بالسريقة؟! بصح هاد الشي كامل بسبتك قتلك نكريو و نخرجو ما نعيشوش معاهم و هوما تقول يصدقو علينا.. قعد يهدن فيها حكمها ودخل للكوزينة قالي ليليان وش كاين ختي؟ قتلو نائل أنا ما قلتلها والو سقسيتها برك هي فهمتها حاجة اخرى.. قلتلها نور اسمحيلي إدا فهمتيها هكدا انا ماقصدتش نتهمك بالسريقة.. بدات تعيط قالتلي كدابة ما دوريش الهدرة يا المسمومة.. جبدها نائل و هي تعيط ما حبتش تدخل طبعها للشومبرة و بداو يتعايطو هو و ياها و الدراري برا يتصاوغو و يتباكاو، سمعتها قالتلو انت راك حاسب روحك راجل عليا شوف غيرك كيفاش يدير هيبة لمرتو و لي يجيب اسمها على لسانو ما يسكتش و هي ما تسواش بصلة و انت قاعد عندي تعيط عليا و ما جيبليش حقييييي..  و هو هبل قالها انا ماشي رااااجل؟!؛حكمها عطالها طريحة الموت..جيت ندخل باش نسلكها حتى سمعت صراع كي فتح الڨاراج يبست في بلاصتي.. طليت من التاقة شفتو جاي عيان و هو يقول وشنو هاد الزڨا؟ و راح قبالة لشومبرة نائل طبطب عليهم بالزور و قال ناااااااااااائل افتح الباب، فتحلو قالو وش راهو صاري هنا؟ قالو و الله غير ليوم نعاودلها التربية على قلة القدر، خرجت هي تبكي و حالتها حالة قالت لصراع ما نقعدش هنا إدا تحبني اديني لدارنا فوق ما يتهموني بالسريقة نزيد ننضرب.. قالها فهميني وش كاين؟ و دار ليا قالي ليليان جيبيلها الما.. رحت جبت الما عطيتهولو و هي و نائل يتعايطو و الدراري يتباكاو.. عيط عليهم قالهم دوك تسكتو ولا ندخل فيكم في زوج، قال لنور خلاص حبسي البكا و احكيلي وش صرا و دار ليا عيط عليا قالي احكمي الدراري انت.. رفدت عابد و حكمت التوام و هي تحكيلو دار ليا تعنكر فيا لوكان صبت الأرض تنشق و تبلعني من الخوف.. شاف فيا نائل قالي ملوقتاش نور تسرقك ليليان ماشي عيب عليك هاد الكلام؟ شحال و هي عايشة معانا جامي دنات لحاجة خاطيتها.. قالو صراع أنا نتصرف معاها امسحها فيا خويا و قالي اطلبي منها السماح و تراضاو يلا، قتلو بصح انا سقسيتها برك ما قصدتش نتهمها و الحاجة راهي شاهدة سقسيها، قالتلو نور ما نحتاجها لا تراضيني لا تبوسني انا غير هنا لي ما نزيدش نقعد، قالو نائل خويا مرتك من لول ماشي قابلتنا و علبالي بلي غضبت على جالنا انا ندي مرتي و نكري ما نقعدش هنا، قالو ملوقتاش انا نمشي بهدرة النسا نااااااائل قادر روحك ولا و الله غير نكسرلكم ريسانكم في ثلاثة، لي ما عجبهاش الحال تخبط راسها فالحيط ماراكش قاعد في دار باباها .. قتلو راني نقولكم سقسيتها برك ولا هات برك تحكمو الكلمة من فمي.. و درت لنائل قتلو ادا حبيت تكري ما ديرش السبة بيا.. عيط عليا صراع قالي ليلياااااااان كلبببببة بلعي فمك تزيدي تنطقي كلمة تشوفي، قتلو علاش ما ننطقش هدا فوق ما دخلت لشومبرتي بلا استأذان.. جا ليا حكمني من رقبتي قالي اطلعي لفوق دوك نجي نتفاهم معاك و طبعني للدروج.. دار لنائل قالو اسمعني مليح تحب تروح روح بصح ديرها مليح في راسك تخرج منا انسى بلي عندك خوك وسمو صراع.. طلع مقلق و أنا بقيت نبكي سمعت نائل قال لنور كيفاش تدخلي لشومبرتهم بلا استأذان و هي تحلفلو بلي ماكاش منها..
دخلت لشومبرتي صبت صراع يفور قالي ارواحي لهنا تشوفي.. حكمني من دراعي زيرني قالي ماشي قتلك ما تجبدي هاد السيرة قدام حتى واحد؟ وش هدررررررت.. تكسري كلمتي و تسوديلي وجهي قدام خوياااااا.. جبدت يدي قتلو هاد الشي يخصني ياك ما بيناتنا حنا النسا و انت و نائل وش دخلكم؟ ادا هي سراقة وش نديرلها؟ فتح عينيه مليح و قالي وشنو صحانية الوجه هادي منين جايبتها قليلة الحياااا.. قتلو و الله من عاشر قوما اربعين يوم صار مثلهم .. و يجبد عليا بكف و هو يقول و الله غير نعاودلك التربية يا لي ما تحشميش و طاح عليا بالضرب ما قدرتش نسلك روحي منو و مع لخر طبعتو و نضت نبكي قتلو خيرك عليهم كامل و عليا تضرب و تتعدى و خرجت نبكي..
فالليل سمعتو يهدر مع الحاجة قالتلو ليليان ما هدرت والو لنور سقساتها برك و هي بلخف قالتلها راكي تتهمي فيا بالسريقة منبعد ليليان زادت عماتها.. قالها حابسة ما تعرفش تتصرف وصيتها قلتلها ما تهدري والو خلي أنا ندبر راسي و هي طبع بصدرها و تزيد ما تسمعش الكلام و دير رايها.. انا كنت معول نهدر مع نائل و نحشمو بأسلوبي نخليه يخرج وحدو من الدار بصح دوك ولات في راسي لوكان نهدر يقولو حاوز خوه على جال مرتو.. غير قوليلي هاد المغندفة كيفاش نتصرف معاها..
طلعت للشومبرة شويا و دخل بدل شعل ڨارو و قعد حاكم تلفونو.. رفدت فراشي و جيت خارجة قالي وين راكي رايحة؟ قتلو  فالنهار تضرب و فالليل جي تراضيني على جال صلاحك.. قالي ارواحي نهدر معاك.. قتلو ما تهدر معايا ما نهدر معاك و بالاك جي لعندي ماراني مرتك ماراك راجلي عندك بنتك خليها تخدم عليك ما كفانيش رضيت بالهم و الهم ما رضى بيا... قالي يا المهبولة ارواحي نهدر معاك و يضحك ههههه.. خليتو و خرجت..
حبطت لتحت صبت نور خرجت من شومبرة الحاجة.. دخلت أنا عيطت عليا قالتي امشي انت تان الحقيها.. رايحين ترجعوهالي شومبرة الغضبانات هنايا.. و الله و تزيد وحدة فيكم تخلي راجلها و جي ترقد عندي هنا نتفاهم معاها.. و حلا شابعة ضحك علينا هههههههه..
خرجت سمعت نور و نائل يداوسو قالها وشبيك هبلتي؟ مخليتلي الدراري و رايحة.. قالتلو وليدك و ولاد خوك تمحن بيهم مانيش سامعة بيكم كامل.. خبط الباب و خرج..
نائل كان يحب وحدة بصح ملي هاجرنا في ضربة الارهاب هي راحت لأوربا و كي قعدنا فالأردن هي تزوجت و ما بقى قدامو غير يرضى بنور سورتو كي كانت حامل منو فهاداك الوقت.. بصح لدوك ماشي مهتم بيها آخر همو وش تحتاج لاتي غير بعمرو كل يوم يبدل تلفون جديد آخر موديل، الطونوبيل التحواس دراهمو كامل راهو فالتقلاش ما علابالوش كامل بيها وش تحتاج ولا وش تتشهى بصح الدراري يجيبلهم يعني صابرين على بعضاهم غير على جال الدراري..
رحت للشومبرة لوخرا قعدت نبكي ما فقتش كيفاش غفيت حتى حسيت كي فتح صراع الباب و دخل عندي قالي يا المهبولة وقتاش ديري لعقل؟ جبدت الغطا و غطيت راسي، قالي مارانيش نهدر معاك؟ بركاينا من الهبال و نوضي لشومبرتك ما تقعديش هنا راقدة فالقاعة.. درت للجيهة الاخرى.. قالي يمال ديريلي بلاصة معاك على حساب الشوفة راهو عاجبك الرقاد هنا.. تقعدت و قتلو ما ترقد معايا ما نرقد معاك اخرج و خليني ما كفاكش طلعتهم على راسي و....... قاطعني قالي اششششت ارقدي ان شاء الله نوم اهل الكهف..ترقدي ما تنوضي هاو تسرح لسانك ارقديييي.. خرج و أنا رقدت [ البنات تفكرت وحد السكاتش كانو يديروه بكري تع حرودي و صاحبو يقولو لا تأكلو من كرانتيتاتنا و لا نأكلو من كرانتيتاتكم.. لا تدخلو مارشينا و لا ندخل مرشيكم 🤭 هكدا دارت ليليان لصراع ليوم 🤣]
غدوا منداك ما نضت درتلو الفطور ما هدرت معاه لا هو لا غيرو.. حتى للظهر جات هيام قالتلي وش كاين الحالة ما راهيش تعجب؟ حكيتلها.. قالتلي الله لا تربحك ما فيكش الخير أنت.. قلتلها وشنو زيديني انت علاش وش هدرت..
دخل صراع عاقد حواجبو و رافد صاشي كبيرة قالي ليليان هاكي طلعي هادي لفوق.. زعما كان لاعبها يهدر بالزعاف و شايد الضحك.. جيت نديرو فالثقيل بصح خفت منو هو كلشي يجوزهولي و يكبر عقلو بصح كي نتجاهلو قدام كاش واحد يولي ما يضويش و يخرجها فيا طول و عرض..
شديتها عليه و طلعت صبتو جابلي سيري تع ماكياج كيما لي تبحرتلي و قرعة ريحة و مكسرات مشكلة.. ايييه ضربني و عمبالو يصالحني بهاد العفايس.. عاودت رفدت الصاشي كيما راهي حبطتها صبتو يشرب فلاتاي.. أنا فالدروج جات جايزا نور عيطتلها قلتلها هادي مني ليك اسمحيلي غلطت في حقك.. شدتها هي و باستني قالتلي ما صرا والو راكي كي ختي..
شفت في صراع صبتو مقلق حب يقتلني خبط الكاس فالسنيوة و ناض.. قالتلي هيام جبتيها لروحك يا الحابسة.. قلتلها ما يهمنيش توصل وين توصل.. جايبلي ماكياج و حبيبات كونكاسي عمبالو يصالحني بيهم.. دارتلي براسها تع انت ما فيكش فايدة..
فالليل كنت فالكوزينة دخل هو شغل ماشي كامل شايفني.. دور وجهو و طلع للشومبرة.. كملت شغلي و طلعت لشومبرتي قلت نخملها دخلت صبتو مبدل و قاعد كاااالم حاكم تلفونو ما خزرش منبا فيا.. خملت الشومبرة و هو ما دار حتى ردة فعل تقول ما راني نبان.. دوشت و رجعت و بدلت حوايجي قدامو ما رفع عينو ما خزر ما تأثر.. مشطت شعري و درت الريحة حط التلفون فوق الطابل دونوي تغطى و دار للجيهة لوخرا و رقد..
قعدت غايسة قلت لوكان نرقد هنا يقول جات تراضيني.. خل نرقد و نسكت بلاما نهدر.. قعدت فالبونك كان الغطا كامل دايو متلوي فيه.. جبدتو بدا ينسف و يستغفر.. قلت هادا وشبيه؟ علاش ما اهتمش.. حطيت راسي على المخدة و تغطيت معاه.. رمى الغطا و ناض خرج.. بقيت مستغربة في تصرفاتو وشبيه هاد المعقد منيتو حقد عليا..
قعدت فالشومبرة حتى للزوج و هو ما دخلش.. لبست غوب دو شومبغ فوق حوايجي و رحت نشوف وين راهو صبتو قاعد فوق الكنابي فالصالة لي لفوق داير رجل فوق رجل عاقد حواجبو يتفرج فالسبور و يتكيف فالرينقيلة.. قتلو ما ترقدش؟ ما واجبني ما شاف فيا.. رجعت لفراشي و رقدت حتى للربعة و ما دخلش كامل..
الصباح نضت على صوت الخزانة دخل يبدل قتلو صباح الخير ردهالي بلاما يشوف فيا.. نضت نجري لبست و حبطت وجدتلو الفطور بلخف، حبط و خرج ما عبرنيش كامل..
أنا نتحمل منو كلشي غير باش يقتلني بالبارد لالا يطيبني على نار هادية حتى يرجعني نلوم في روحي و نكرهها..
دخل مع الظهر صابنا قاعدين قال السلام عليكم رديناهالو.. قال لبنتو حلا وجديلي بنتي نتغدى راني جيعان.. ناضت حلا قالتلو إيه بابا.. قعدو كامل يخزرو فيا بهدلني و هو يبعث غيري.. تخنقت من تصرفاتو.. هي راحت جابتلو و هو ما خزر فيا ما دار لجيهتي تقول ما كنت قاعدة معاهم..
كمل كلا و جبدت تلفونو قعد يقلب فيه.. نضت رفدت السنيوة من قدامو ما دار حتى ردة فعل..
رحت غسلت الماعن فالكوزينة و هوما كل واحد دخل لشومبرتو.. سمعت صراع يعيط لحلا حبطت ليه قالتلو انعم بابا
قالها بنتي حبطيلي حوايجي ملفوق نرقد في شومبرة يما مانيش قادر نطلع لفوق.. قلت لحلا خلي أنا نجيبلو.. قالي لالا انت ما عندك حتى علاقة بيا هي تروح جيبلي و قالها روحي بنتي.. رحت للكوزينة بكيت مخ راسي رايحة نكلاطي من أسلوبو البارد..
سمعت الحاجة كي خرجت من شومبرتها و قعدت فالهول.. دخلت لعندو صبتو راقد فوق بونكها نوضتو قتلو صراااع.. قالي امممم و هو مغمض عينيه.. قتلو نوض خرجني نحوس ضاق خاطري.. ما واجبنيش.. قتلو منواش راك مقلق؟ ناض و خرج و خلاني نغلي حبيت نقطع شعري..يدير وش يحب بصح ما يتجاهلنيش كي شغل ماكاشني نحس بالإهانة..
رحت لشومبرتي هو بدل و خرج ما عبرنيش هنا كلاطيت بكيت حتى شبعت ما حبطت ما خرجت.. فالليل دخل شاف عينيا حمورا من لبكا قالي بكل برودة مساء الخير.. مسحت عينيا و قتلو مساء النور.. جا يفتح الخزانة نضت قتلو نروح نوجدلك الدوش قالي لالا شكراا ماكالاه.. أوووو هادا وشبيه يهدر معايا بالرسميات تقول ماراني مرتو.. ياربي وش ندير.. رحت لفراشي و قعدت نبكي و هو دوش و رجع بديت نسمع فيه بلي راني نبكي ما اهتمش.. تكسل فوق البونك حط رجل على رجل و يقلب في تلفونو.. رميت الغطا بالزور و نضت بالقلق ما دار حتى ردة فعل.. قتلو أنا ليوم ما تعشيتش.. قالي و شكون راهو حاكمك روحي تتعشاي.. قتلو بسبابك، قالي و انا وش دخلني، قتلو متجاهلني و تعامل فيا ببرود وما تهتمليش، قالي ماشي أنا هم و رضيتي بيا و انا ما رضيتش بيك؟ قتلو ماشي ضربتني؟ قالي أنا ظهرت بلي قليل حيا و ماشي متربي و أنت عاشرتيني و رجعتي كيما أنا، قتلو لخطر أنت تعيط عليا قدامهم، قالي و أنا نعيط و نضرب و نسب و نعاير بلا سبة و أنت مظلومة و أنا ظلمتك.. ياااك؟ قتلو و تنكر؟ قالي لالا علاش ننكر أنا ظالمك و إن شاء الله ربي يخلصني و ياخذ حقك من عندي.. نوضي طفي الضو تشوفي خليني نرقد ما عنديش الوقت للتبلبيل.. حط تلفونو و دار رقد.. نضت طفيت الضو و قعدت نبكي حتى للصباح و هو ولا على بالو..
الصباح كي فطنت ما صبتوش قدامي، حبطت صبتو قاعد مع الحاج قالو بلي شرا طونوبيل جديدة.. رحت ليه قلتلو نديرلك الفطور.. ما واجبنيش و الحاج قعد يشوف غير رحت سمعتو سقساه قالو وش صرا ما بيناتكم يا وليدي؟ قالو ما كاين والو حكاية ما بيني و بينها..
رحت للكوزينة شفت نائل رافد وليدو عابد و يضحك معاه هو و نور.. كامل تصالحو غير المعقد ديالي رايح يخرجلي قلبي ياربي كيفاش ندير معاه هدا رايحة نقطع حوايجي..
مع الظهر جاب طونوبيل بيضة عالية و عيط لأهلو يشوفوها الحاج و الحاجة و حلا.. منبعد قال لبنتو حلا بنتي اطلعي البسي باش نديك تحوسي شويا نستفتح بوجهك الشباب هدا.. و هي ما صدقت باستو و راحت تجري باش تبدل حوايجها.. قعدت نخزر بحقد و الدخان قريب ما يخرج من ودنيا و نيفي قلبي تحرق.. و هو يضحك معاهم تقول ما راني واقفة معاهم ما سقسانيش منبا على رايي..
حبطت حلا مبدلة و تضحك و الحاجة واقفة قدامي قالها أيا يما اطلعي ملقدام نديكم تحوسو.. دارت ليا قالتلي روحي بدلي حوايجك و جيبيلي حجابي باش نروحو.. قالها لالا يما هي تقعد توجدلي الغدا باش كي نرجع نصيبو واجد ارواحي انت برك نخرجكم شويا و نرجعو ما نطولوش.. طلعت لفوق نبكي أنا سمعتو ديمارا و داهم و أنا النار شعلت في قلبي.. 
زوج سوايع منبعد رجعوا، سنيتو حتى دخل للشومبرة راح قبالة للخزانة و ما شافش فيا بديت نعيط عليه قتلو اسمع أنت شوف لهناااااا.. أنا اسلوبك هدا ما يخرجش عليا المعيشة معاك ديرونجمو و ما تنطاقش و انت واحد ظالم و ما تعرفش وش مابينك و بين ربي.. هو يقلب في حوايجو و يخبي فالتبسيمة قالي إيه منبعد؟ قتلو راك تستهزا بيا؟ دار ليا قالي المطلوب ليون وش حبيتي؟ قتلو نرجعو كيما من قبل، قالي و انا ما عندي والو معاك، قتلو بصح ماراك لا تعبرني لا تبعثني و لا حتى تهتملي، قالي ماشي انت لي طلبتي هاد الشي ولا راني غالط؟ ماشي قلتيلي ما راني مرتك ما راك راجلي و ما تبعثنيش عندك بنتك ولا راني نجيب من راسي؟ قتلو بصح انا ما نحملش هاد الأسلوب و بديت نبكي.. قرب ليا و حط يديه في جنابو قالي و الله غير حيرتيني معاك كيما جيتك حرت ما فاد معاك لا الكلام و لا الضرب و لا التجاهل وش راكي حايبا؟ قتلو حبيت حقي الشرعي.. فتح عينيه و فمو مشوكي.. فقت لروحي وش هدرت انا كان قصدي يعاملني كزوجة... رفع راسو و ضحك بالصوت ههههه و قالي أنا الشي لي نعرفو هو لي عندو حق عند لوخر يروح ليه يديه بيدو لالا؟ ههههههه
انا من التبهديلة لي حطيت روحي فيها غميت راسي بالمخدة و جبدت الغطا و تغطيت.. دخل معايا و جبدني لحضنو قالي يا سيدي نعطيلك حقك و فوقو بوسة و حبة مسك و ما تزعفيش.. بصح شوفي تجاهلتك يومين برك ما تحملتيش و انت لي طلبتي مني حقك، حسي بنعمة المحبة لي مابيناتنا و بطلي التمهبيل ديالك و اعرفي كيفاش تتصرفي.. تغيضيني و نسامح و نكبر عقلي معاك بصح راكي رايحة توصليني باش نولي نعاملك كيما عاملت لي قبلك و ماتو بالقنطة.. حسي بالنعمة لي راني عاطيهالك و ارضاي بالواقع ديالك تفاهمنا؟ سكت .. قالي و دوك حبيتي حقك ياك؟ درت للجيهة لوخرا حشمت و هو يضحك...
خليتو راقد و حبطت للهول شويا و حبط كي قابلني فالدروج غمزلي و قالي واش أم الحقوق إن شاء الله عطينالك حقك.. دورت وجهي أووووف علبالي دوك يشدهالي..
كانت نور تسربي فلاتاي و حلا واقفة قالها بنتي اعطيني على يدك كاس لاتاي، قتلو وعلاش ماشي أنا؟ قالي أنت خدمتك حقوق ريحي..فتحت عينيا فيه جا قدامي و همسلي قالي ياريت كامل الحقوق جايا هكدا.. قتلو صراع انسى الحكاية.. قالي كلما تزعفي طالبي بحقوقك ما تتنازليش عليها.. قتلو أووووف.. ناض يضحك..
جا الحاج قعد و يقول اااااخ قالو صراع غير لخير بابا وشبيك، قالو ظهري قتلني روح انت ولا نائل واحد فيكم يجيبلي اللصقة تع الظهر، قالو بابا بلعقل عليك راك تموت و ما تفيدكش أم سعد..قالي علاش وش درت؟ قالو شفتك دوشت الصباح، قالو راك تعس فيا؟ و الله ما درت والو، قالو ما تحلفش الحاج.. بدينا نضحكو و هو يحرش بيه، قالو و أنت وش دخلك ولا حلال غير عليك من الدوش ما تخرجش.. قالو الله أكبر كامل قاعدين تعسو في صراع.. كلاطينا بالضحك و الحاج تقلق خرج قال نروح نجيب وحدي ما نحتاجكمش..
تكسل صراع في حجر الحاجة و قالها يما إدا واحد قالك حبيت حقي الشرعي وش تقوليلو؟ نغزتو لراسو صرااااع.. قالي وشبيك؟ قالتلو الحاجة حقها يا وليدي ما فيها والو.. قلتلها يمااااا.. قالها يما 3 أيام مشنفة على جال حق شرعي؟ شفتي عروستك شحال منحرفة..
خرج الحاج لابس قميص أبيض  و يديه في جيبو و يقول للحاجة كيفاش جاتني مليحة؟ قالو صراع بابا من الألوان كامل خيرت لبيض علاش مطهرينك؟ نضنا نضحكو و هو تقلق قعد و قالو وشبيك ليوم جاك عليا؟ ناض صراع من حجر الحاجة و ناض باس راس الحاج قالو اسمحلي بابا ما علاباليش بلي عندك مشاعر، قالو يعطيك الصحة يا وليدي دوك ظهرت بلا احساس ياك.. قالو ياسيدي ما تزعفش و هاي بوسة وحدوخرا على راسك و دوك نروح نجيبلك اللصقة لظهرك و ثلث حبات زروقا تع قصة قصة  من عندي.. قالو أخطيني برك ليوم راك تحرش بيا.. ضحك و دار ليا قالي روحي جيبيلي المفاتح تع الطونوبيل.. رحت جبتلو المفاتح صبتو فالڨاراج يفيريفيي فالطونوبيل دار ليا قالي جبتيهم؟ قتلو إيه و ما نمدش.. رفع حواجبو قالي وعلاش يا لالة؟ قتلو تدي الحاجة هي و حلا تحوس بيهم و أنا تخليني نبكي ياك؟ تبسم و قالي أنت قلتيلي ما راك راجلي ما راني مرتك، قتلو معليش معليش.. قرب ليا و هو متبسم رجعت للور تكيت على الطونوبيل قتلو غير ما تسييش ما نمدلكش المفاتح حتى تخرجني نحوس.. عض شاربو و قالي و إدا حوست بيك وش تعطيني؟ قتلو آاااا تحوس على المقابل و هوما علاش ما ديتش منهم مقابل؟ قالي انت ماشي كيما هوما يلزمني نستفاد.. وقف معايا راس براس و قعد يشوف فيا ميل راسو قتلو وخر هاك و عطيتلو المفتاح في صدرو و جيت رايحة خفت كاش واحد يخرج على غفلة، عاود رجعني و قالي وين هااااربة ارواحي لهنا تشوفي.. قتلو وشبيك هبلت لوكان كاش واحد يجي.. قالي اووو شحال عندي ملي هبلت.. كاش واحد يشوف حبة فريزة حلوة و ما يكولش.. قتلو صراع وخر.. قالي زعفتي كي ما خرجتكش ياك؟ قتلو وخر.. قالي إدا مرتي ما حوستش بيها يمال بيمن نحوس؟ خليتلك حصة الأسد.. قتلو كيفاش محسوب؟ قالي نديك بيها و نروحو للأردن نقعدو لتم سمانة غير أنا و ياك نتهناو من كلشي و نريحو.. نحوس بيك نقلشك و منها نفري شغالاتي.. وش قلتي فيها؟ فرحت قتلو منك بالصح.. باسني من فمي بعدتو بلخف قتلو صراااع.. و رحت نجري خليتو يضحك كي لحقت عند باب الكوزينة درت ليه صبتو يتبسم فتح باب الڨاراج غمزلي و قالي ادخلي و اغلقي الباب..
راح جاب اللصقة للحاج و رجع قال للحاجة يما فهاد اليومين راني رايح للأردن كاش ما تحتاجي نجيبلك من لتم أنت و بابا؟ قالو الحاج وقتاش تروح؟  قالو في هاد اليومين ان شاء الله نروح و ندي ليليان معايا منها نفري شغالاتي و منها نحوسو شويا.. أم سعد كانت قاعدة شافت في نور و عوجت فمها و نور حطت راسها.. همستلو قتلو نحبك أنت روحي.. حط راسو و سكت..
كملت شغلي و طلعت للشومبرة وجدتلو روحي و قعدت نستنى فيه حتى جا.. ليل كامل و هو يتغزل و يدلل طيرني لفوق السما..
يومين موراها و رحنا للأردن.. النهار لولاني وصلت عيانة خلاني فالبرطما رقدت و هو راح فرا شغالاتو.. رجع فالليل تعشينا و قعدنا شويا كيف كيف و رقد و أنا بقيت ليل كامل سهرانة حتى للفجر باش رقدت.. هو ناض الصباح بكري و انا ما قدرتش نوض حتى للظهر.. خرجني داني لبلايص عمري ما شفتها مالڨري عشت فالأردن مدة عام و شي.. شريت كامل وش حبيت لبسة ماكياج برفا ما خلا حتى حاجة في خاطري..
ثالث يوم داني للماناج كاين العاب طلع معايا فيهم و كاين العاب قالي أنا ما نقدرش اطلعي وحدك.. موراها داني لحديقة حيوانات.. صراحة عمري ما رحت لهاد البلايص و كي كنت صغيرة كان بابا الله يرحمو يديني نلعب في ألعاب بسيطة فالساحة، صح ما كانش مقصر معايا بصح كان قيسو قيس روحو و مرات حتى يبعث خالي لماما الدراهم باش يقدر يكمل الشهر بصح عند صراع شفت دلال في حياتي ما شفتو..
انتبهت بلي صراع ما كانش حايبني نرفد الحمل منو و كي نسقسيه يقولي هكدا رانا ملاح وش نديرو بالدراري.. مع الوقت بديت نتقلق و كل مرة نجبدلو السوجي ما يردش وصلت كرهت قربو و هو رجع يتقلق و يقولي هاد الشي لمصلحتك..حتى وحد النهار قتلو بصح أنا حايبا الدراري علاش تحرمني منهم؟ ناض يعيط قالي افهمي ماشي مليح ليك.. قتلو ما راحلك فيا انا حايبا نرفد، قالي انساي هاد الحكاية عام عامين ماناش مقلقين، قتلو راك مخبي عليا حاجة القرار ما يخصكش وحدك.. قالي كيفاش ما يخصنيش؟ ماشي أنا لي رايح نتأذى بصح لمصلحتك ماكاش حمل دوك افهمي ليليان الطبيبة قالت لوكان ترفدي مرة أخرى تخسري الرحم ديالك و ما تقدريش ترفدي موراها، قتلو علاش؟ قالي طرحتي بزاف و آخر اجهاض البيبي ضر الرحم ديالك بزاف..قتلو يتسمى ما نقدرش نجيب الدراري؟ قالي لالا ماشي هكدا بصح تحتاجي وقت تريحي الرحم مانيش حايب نخليها في قلبك بصح هاد الشي لمصلحتك و الله.. تقنطت كي قالي هكدا و صماطلي كلشي و هو مع الأول كان يواسيني منبعد رجع يخرج ما يرجعش حتى لليل..
4 أيام و أنا حابسة روحي فالبارطما مقنوطة من حكاية الحمل و هو رجع يجي ياكل و يرقد حتى الهدرة ما بيناتنا و رجعت قليلة..
وحد الليلة سنيتو حتى للطناش تع الليل تقلقت رقدت و خليتو، كي دخل قعد يحاول معايا منا و منا قتلو راني عيانة حبيت نرقد.. قالي عيانة؟! من واش؟ علاش حرثتي الأرض؟ وشبيك ليليان رجعتي لعوايدك؟ وش عندك ياك ظلي قاعدة.. قتلو سقسي روحك حوست بيا يومين و خليتني ربعيام و كي نجي نهدر معاك تقولي راني عيان و كي نقولك انا راني عيانة ما تعذرنيش؟ قالي أنا كي نعيا راني نروح نخدم بصح أنت وشبيك ياك جبتك باش نرتاحو رجعتيهالنا نكد، قتلو كي تنفحلي انا ما راهوش عاجبني الحال كرهت و أنت تقلق الواحد قلبي خرج.. قالي كي ولات بالنفحة يمال براحتك، تغطى و رقد عطيتلو بالظهر.. حاولت نعاود نرجع نرقد طار عليا النعاس شفت فيه قلت بصح أنا وش خداني علاش زعفتو ياك ماني عيانة ما بيني والو بصح مورالي فالزيرو و أنا كي يحبطلي المورال نداوس معاه..
جبدت تلفونو ينفتح بالبصمة حكمت يدو قفز فتحت التلفون بالبصمة بدا ينسف و دور راسو غطاه بالمخدة و رقد [لوكان جا جزائري و دارتلو هاد الجاست و هو راقد قبل ما تفتح التلفون بالبصمة ديالو يفتحلها راسها 😤 ديرونجمو هاد البنادم]
قعدت نقلب في تلفونو صبت طفلة وسمها زهرة التوليب باعثتلو انفيتاسيو، دخلت الكونت ديالها قرعجت قبلت الطلب منبعد عاودت لغيتها و بلوكيتها بلخف..
زدت قلبت ما صبت والو حطيت التلفون و جبدت يد صراع رقدت عليها.. الصباح فطنت صبتو قاعد يكونكتي.. قتلو وش راك دير؟ قالي ارقدي راكي عيانة كلشي و ما تعييش روحك.. قتلو راني نسقسي فيك.. حط التلفون و دار ليا قالي كلمة صباح الخير ماكاش و جاية تحققي معايا؟  جيت نجبد التلفون نشوف رفدو و تعنكر فيا قالي ردي بالك تزيدي تتجاهليني كي نكون نهدر معاك.. سقمي تصرفاتك فهمتي؟ قتلو معامن راك تكونكتي و تضحك؟ قالي مع مرتي الثانية رتحتي؟ قتلو ما تبروفوكينيش.. قالي يمال اعرفي كيفاش تتصرفي و اطلبي الحاجة بأدب و قولي صباح الخير منبعد سقسي كي ما نواجبكش لتم لوميني.. قتلو وشنو دوك جاي تربيني ولا برك باش تبدل السوجي؟ راني نسقسي فيك معامن راك تكونيكتي؟ قالي و أنا واجبتك و ناض دخل للصالدوبا.. رفدت تلفونو ما قدرتش نفتحو بلا بصمة رحت دقدقت الباب عليه
قالي وش كاين؟ قتلو اخرج نهدر معاك، قالي رووووحي.. قتلو ما نروحش حتى نهدر معاك، فتح الباب قالي وش حبيتي؟ قتلو دير شيما لتلفونك مع البصمة.. خبط الباب في وجهي.. عاودت دقدقت قعد ساكت.. عيطتلو هديك زهرة لي اكسيتيتها عندو لبارح و التلفون في يدي منبعد بعثتلو ميساج قالتلو وين رحت؟ بديت نخبط فالباب عليه بيديا في زوج.. فتحلي قالي دوك انت بنادم ما راكيش تشوفي فيا  ندوش؟! قتلو افتحلي التلفون قالي ما نفتحوش قتلو نكسرو قالي سيي زهرك و تشوفي كيفاش نعلمك صحانية الوجه على أصولها و خبط الباب في وجعي، خلاني نغلي.. سنيتو حتى خرج عاقد حواجبو درت يديا في جنابي قتلو افتحو صراع يلا، قالي فهميني أنت وشبيك نهار مليحة و عشرة مكرهتلي حياتي.. نجي ليك ماشي حاملتني و تتهربي مني ندي منك الكلمة الحلوة فوق القلب علاش راكي تعذبي فيا هكدا؟ قتلو دوك وليت انا لي ماشي مليحة برك كي قتلك نعسانة؟ قالي ماشي غير لبارح شحال من مرة نجي ندنى ليك نحس روحي ثقيل عليك، حقي معاك شغل واجب تجري غير وقتاش تكملي تقول ماراني راجلك كلشي من فوق نيفك، قتلو ماشي بيدي علاش بالسيف؟ مليت.. قالي هادا ما تعرفي أنت غير مليت مليت مليت.. حطيتك فالدار قلتي مليت، رضيت معاك قلتي مليت خليتك براحتك قلتي مليت .. كامل لي داو صغارات راهم لاباس بيهم و فرحانين غير أنا زهري مسود.. قتلو انت مخليني و جي فالليل تقول ماني مرا محسسني بلي بنت ليل عندك، قالي أيا قادري روحك و اعرفي وش تخرجي من فمك خير ما نفسدلك خليقتك.. ما خرجتكش اليومين لولانيين و حوست بيك الدنيا وش تحوسي كثر، قتلو إيه يومين خرجتني و 4 أيام حابسني هنا و ليوم الخامس، قالي ماشي أنت لي قلبتي خليقتك بصح انا لي غالط لوكان جيت وحدي فريت شغالاتي و ريحت راسي ماشي جبتك كي الجحش و قلت نديها تبدل جو خير ماراهي مقابلة الحيوط بصح توصي للجاية.. قتلو راك تمن عليا كي خرجتني؟ المهم دوك خلينا من هاد الهدرة شكون هادي لي راهي تعيطلك؟ قالي وين علابالي نضت صبتها عندي قلتلز انا بلوكيتها قالي يتسمى أنت لي اكسبتيتيها، قتلو بالغلاط منبعد روتيريتها، قالي وين علابالي دخلت للميسنجر صبتها كاتبتلي نقدر نهدر معاك راني مبلوكية، ديبلوكيتها و قلتلها تفضلي قعدت تهدر.. قتلو افتحلي التلفون، قالي علاش؟ قتلو كاينة حاجة ما بيناتكم؟ قالي حتى و لوكان كاينة حاجة علاش رايح نخاف منك؟ قربت ليه قتلو افتحلي يلا.. حط صبعو فتحو ديت التلفون و دخلت للميسنجر  بديت نقرا قالتلو معليش نهدر معاك قالها تفضلي قالتلو انت من البلاصة الفلانية؟ قالها إيه علاش؟ قالتلو ما علاباليش بصح كي شفت صورتك حسيتك واحد فحل و غيور و مقلق، قالها هادو كامل بانولك فالصورة؟ قالتلو ماشي يقولو الكتاب مبين من عنوانه.. قالها آاااا.. معرفتش شكون انت؟ قالتلو ورد، قالها هدا اسمك؟ قالتلو علاش ماشي شباب؟ قالها لالا بالعكس بصح شكون أنت و وين تعرفيني؟ قالتلو شفت صورك مع وليد عمك فالصفحة و فيدك الرنڨيلة متت عليك، قالها هههه و علاش متي عليا؟ قالتلو قالولك من قبل بلي شباب؟ قالها شكرا، قالتلو متزوج؟ قالها إيه، قالتلو وين راهي مرتك؟ قالها قدامي علاش تسقسي؟ قالتلو لالا برك حبيت نهنيها عليك، قالها علواش تهنيها في واحد صامط و ما يتحملش؟ قالتلو يا ويلي حتى كلامك و يهبل.. قعدت تتغزل بيه و هو يضحك و ينسيستي عليها باش يعرف شكون.. بلوكيتها و قتلو هاد القح... ما تزيدش تهدر معاها، قالي علاش فمك فايح هكدا؟ قتلو جاي تحاسب فيا و نسيت روحك، قالي ما راحلك فيا أنا راجل و نخدم في مكافحة الارهاب كي نحكم واحد فيهم مجبور نسب و نطيح باش نهينو يتقلق و يقر.. قتلو تبرر لروحك.. قالي لالا ماشي نبرر و حبيتيني نحكمو نقولو يا ارهابي ابن الحقيرا اعترف و الا شددت اختك من شعرها هكدا ياك؟ هادي طريقة تعذيب نفسية نتبعوها مع المجرمين لخطر الراجل كلشي و طيحو بيماه و لا ختو و ما يقدرش يرقد على هديك والفت التطياح بصح أنت طفلة عيب يوالف لسانك هاد الكلام.. قتلو درتلي محاضرة طويلة عريضة غير باش تغلق على الحكاية.. هادي ما تزيدش تهدر معاها فهمت؟ قالي ليمن هادي فهمت؟! راكي تأمري فيا؟! واقيل عمبالك تمشيني كيما تحبي انا نمشي بڨوسطويا و تفوتي حدودك نحرقك فهمتي؟ نحالي التلفون و جا خارج قتلو صراع و الله و تهدر معاها غير نقلب الدنيا، قالي يمال قلبيها تشوفي.. خبط الباب و خرج خلاني نغلي حوست على الكونت ديالها من تلفوني ما خرجليش.. قعدت على اعصابي حتى رجع مع الظهر غير دخل قتلو اعطيني التلفون قالي راني في كازيرنة؟ قتلو افتح التلفون.. قالي ليليان تشكي فيا؟ قتلو ادا ما عندك والو علاش ما تفتحوش؟ قالي لخطر هدرت معاها، قتلو و تهدرها في وجهي؟ قالي يمال في ظهرك؟ قتلو افتح قالي ما نفتحوش باش نوريلك كيفاش تأمريني قتلو ما تهبلنيش علاش هدرت معاها؟ قالي حبيت نوصل لحاجة قتلو لي هي؟ قالي منبعد نحكيلك دوك راني عيان، قتلو عيان من النسا خبطت التلفون على البونك و قتلو أساسا ما يرفد الزبل غير حاويات الزبالة و درت، حكمني من ودني و قالي شكون حاوية الزبالة؟ قتلو ماشي قصدي عليك والله.. طبعني للقاعة و ناض يعيط حيوااااانه تزيدي تغلطي معايا بكلمة لسانك نقطعو حقيرااااااا.. غير نعطيك الوجه شويا ترجعي لطبايعك بصح دوك تشوفي كيفاش نرجعك للطريق.. حطيت وجهي فالمخدة و بديت نبكي خبط الباب و خرج.. جوايه ال10 تع الليل دخلت ندوش سمعتو فتح الباب تع الدار لبست و خرجت صبتو قالب خليقتو.. رحت ليه قتلو صراع ما قصدتش نزيد معاك فالكلام، قالي بصح زدتي فالكلام، بديت نبكي قتلو من حرقة قلبي نغير كي تهدر معاها نمووووت و انت تضحك معاها، قالي منيك على آخر عمري نتبع بنات الفايسبوك قتلك راني مخليها باش نوصل لوحد الحاجة، قتلو وشنوهي؟ قالي شاك فيها تعرفك، قتلو تعرفني أنا؟! قالي إيه وسوستني تهدر عليك بزاف.. تحب مرتك.. دوك راك قدام مرتك.. لوكان جيت في بلاصتها نديرلك كدا و كدا و نعوضك.. و كي نسقسيها شكون أنت تقولي شفتك فالصورة بصح متأكد بلي تعرفك.. و لي يعجبك تعرف كامل وش ناقصني فيك.. مسحت دموعي و حطيت يديا في جنابي قتلو وش راك تقصد؟ قالي تعرفك بلي باردة و ما تعطينيش حقي غير كي تنفحلك و تعرف بلي تزيدي معايا فالهدرة و تعرف بلي تكرهي أهلي.. تعرف بزاف حوايج و انا قاعد نساير فيها باش نعرفها شكون و لواش حايبا توصل باش نبعدها عليك، قتلو كيفاش محسوب هي قالتلك بلي نعرفها؟ قالي لالا بصح قالتلي لوكان عندي راجل كيما أنت كل ليلة نكونلو عروسة و ما نقعدوش غير على وردة.. لوكان عندي راجل مقلق كيما انت نسكت و نمتص الزعاف ديالك أصلا انا نموت على الراجل العصبي.. و نكره المرا لي تزيد  فالكلام مع راجلها و لي تنكر خيرو كي يتقلق.. و نموت على الراجل لي يحب أهلو و يرعاهم نحسو فحل.. و المرا لي تكره اهل راجلها ما تسواش و ما فيهاش الخير و المفروض ما يخليهاش تزيد دقيقة في دارو لخطر حتى ولادو رايحة تعلمهم هاد العقلية.. قتلو راني خايفة تكون اسمهان.. قالي و اسمهان وين علابالها بهاد التفاصيل كامل و بالشي لي ما بيني و بينك؟ قتلو زعما إخلاص؟ قالها لالا مستحيل اسرارنا ماشي حاكيها لحتى واحد، قالي خمي مليح ما عندكش صاحبة منا ولا منا؟ قعدت غايسة قالي روحي جيبي تلفونك منبعد شافو قدامو جبدو فتحو نحيتهولو خفت ادا يحي يكون بعثلي و الله غير يعدمني، قالي وشبيك خفتي؟ قتلو أنا نشوف قالي لالا أنا لي نشوف جيبي و نحاهولي.. رحت قدامو نشوف ادا بعث يحي و قلبي قريب يحبس من الخوف.. فتح الميسنجر صاب جماعة تع بنات قعد يقلب فيهم.. اوووف مزيا ماكاش يحي.. منبعد نطق قالي وشنو هادا؟ قتلو أنا ادمن في ڨروب تع نسا، قالي ادمن؟! ماشي حذرتك من هاد العفايس؟ قتلو ياك غير بنات.. فتح محادثة للادمن معانا هي لي طلعتني ادمن معاها و قعد يقرا كامل وش قرينا و فاتح عينيه مشوكي قالي الله لا تربحك ما خليتي حتى حاجة ما حكيتيهاش على حياتنا!! قتلو هادي صاحبتي.. قالي راني شاك هي لي بعثتلي قتلو لالا هي متزوجة، قالي و زعفانة من راجلها ياك؟ قتلو داوست معاه و شكاتلي بصح ماشي هي هادي صاحبتي، قالي انا يما ما عنديش ثقة فيها و انت تثيقي في وحدو من الفايسبوك.. قعد يدقق فواش هدرنا كامل و ينسف منبعد شاف كلمة قالي نحط يدي فالنار غير هي.. دخل الكونت ديالها و حوس على الكونت تع راجلها بعثلو ما رجعلوش، دار ليا بهدلني غسلني غسيل الدوارة.. قالي انت ماشي تع تلفون مازالكي دراري في مخك تبليت بيك..
شويا و رجعلو الراجل السلام قعد يجبد فيه بالكلام منبعد قالو عندي هدرة معاك تخص عرض و شرف و حدد معاه موعد باش يتلاقاو وين يسكنو.. دار كابتور على المحادثة و بعثو للطفلة لي على اساس اسمها ورد التوليب قالها شوفي هادا مرتو قح... و غدوا راني رايح ليها نفضحها.. غير شافت الصور عيطت بلخف تحلل و تبكي.. انا تشوكيت ما آمانتش بلي هي.. شحال كنت نحكيلها عليه بصح ما درتش في بالي بلي رايحة تعشق راجلي و أنا كنت نشكيلها همي..
قالها بشرط تغلقي الڨروب، راحت بلخف نحاتني من الإدارة و غلقت القروب و قعدت تحلل فيه ولا ينصح فيها قالها خافي ربي راكي متزوجة و بولادك.. وحدة جي تشكيلك فعوض ما تنصحيها تروحي تحرڨيها قدام راجلها و تحاولي تبدليه عليها؟ كمل هدر معاها و دار ليا قالي حابسة الله لاتربحك.. لوكان جيت خفيف و جي وحدة تتبلاني كيما دارت هكدا و تقولي نديرلك و نعملك ماشي نروح معاها فالخط نقول جيبي معمر و ما عندو ما خصني علاش نقعد نحلل في وحدة كيما انت.. تروحي تشكي بيا للبراوي؟! شحال من مرة قتلك اسرارك مع روحك و ما تحكيهلش.. وقتاش تسڨمي روحك؟ كيفاش ندير معاك دوك؟ من ليوم مكاش تلفون..
انخلعت كيفاش يديلي التلفون لوكان يبعث يحي و الله غير يقتلني، قعدت ليل كامل نحلل فيه يرجعهولي ما حبش و قالي ديري حسابك غدوا ان شاء الله نرجعو للدار.. بايتة حية ما قدرتش نرقد حتى الكود و بدلهولو قد ما سييت نفتحو ما قدرتش..