مراهقة والاربعيني بلهجة جزائرية

44

#المراهقة و الأربعيني:

#الجزء44:

حطيت السنيوة في شومبرة الحاجة باش يفطر صراع قالي فطرتي؟ قتلو لالا مانيش قادرة كول أنت، قالي وعلاش وشبيك؟ قتلو جنبي يوجع، قالي ارواحي نشوف قتلو ماكالاه حبيبي ماشي حاجة، قالتلي الحاجة ارواحي نمسدهالك يا بنتي، قعدت قدامها هي تمسدلي و هو عينيه عليا قالي وجعتك؟ قتلو عادي هو أصلا ملبكري يوجعني، مدلي يدو رحت لعندو قعدني قدامو حطني في حضنو مسح على شعري و باسني قالي افطري تشوفي وجهك راهو صفر قتلك غير الهم علاش عليك؟ قتلو على جالك، قالي نفرجك فيهم غير ما تخافيش بصح أفطري دوك قتلو نروح نجيب كاس لاتاي و نرجع، قالي اشربي معايا من كاسي و عطاهولي، تبسمت و بستو في خدو، قالت الحاجة و حنا كيفاش؟ نقعدو نشوفو؟ ضحنا قالتنا ربي يحفظكم لبعضاكم..
دخلت هيام و بناتها قالو صباح الخير، رفع راسو قالها أهلا أم علي جيتي في وقتك ختي ريحي تفطري معانا، سلمت على راسو قالتلو ثلاث حبات بيض و تزيد تعرض عليهم كول بصحتك خويا، بصح ليوم راك تبالي مليح قالها الحمد لله.. دخل علي قالو واش خالو صافا؟ جيت نشوف المعرض، قالو ارواح تشوف لهنا يا بو الديڨات لبارح رميت التشكة شعلت النار و هربت..قالو لالا ياخالي هدا اللقب تع المصفارة ديالك، ضحكت هيام ههههه قالتلو شد لسانك و ريح، قالو صراع ريح مقابلي تشوف، قالو علي إدا باش نحكيلك غير ماكالاه لخطر مخي راهو حابس و ما يفطنش غير بسنيوة فيها ثلاث حبات بيض و زوج خبيزات، قالو تاكل الرهج قالو لي جي من عندك حلوة خالو.. و دار ليا قالي نوضي يا مو الديڨات وجدلي نفطر، قتلو ما رانيش الخدامة ديالك.. دار صراع لسارة قالها نوضي بنتي وجدي لخوك يفطر باش نحكمو على شبعة و نطرطڨلو رقبتو قالو ااااه يا خالي حسستني شغل رايح تقطرلي الما قبل ما تقتلني، نضنا نضحكو حتى دخلت حنين و حلا، صراع شاف في حنين منبعد في علي صابو يشلل في عينيه قالها ارواحي عمو تقعدي منا و حطها قدام بونك الحاجة بيناتهم الكوافوز باش ما يشوفها، بدا علي يحك في رقبتو و يخزر فالبلافو و يغني {يا ظالمني ما ترتاح راح تعلمك الأيام ربك فوق راسك شوف صاحي وعينو أبدا ماتنام..} حنا ضحكنا و صراع كوف روحو و كمل ياكل..
حبينا نهدرو في حكاية سعد بصح ما صبناش كيفاش كي عادت بنتو قاعدة، قالتلها هيام حنين شوفيلي سارة وش دارت فيها طولت خوها راهو جيعان باش ياكل و يروح، هي غير راحت سقسات هيام صراع قالتلو وش حكاولك بالضبط قالها قالولي كدا و كدا و كدا، قالتلو صار هكدا؟ هادي لي قالك ضربني و بكى و سبقني و اشتكى..
هوما حكاولو كلشي كيما صرا بصح زوقو الكلام باش نبان أنا لي غالطة، ولات هيام حكاتلو كلشي و هو عندو كلامها بصمة ما يشكش فيه يعني خلاص هنا عرف الحق من الباطل والحاجة زادت ايدت الكلام و أكداتو، و في نص الكلام نطقت حلا حكاتلو كيفاش ضربها محمد لتم خلاص ما قعد عقل في راسو، ضرب لرض و ناض قالها يضربك و في داري؟!!!!...
خرج من الشومبرة صاب الحاج قاعد قالو وين راهو محمد؟ قالو خرج بصح علاش؟ قالو عيطلو دوك، قالو وش صرا؟ قالو بابا اعطيلي تلفونك، قالو استهدي بالرحمن يا وليدي و قولي وش حكاتلك هادي؟ (هو عمبالو حكيتلو على كي تحرش بيا) قالو شكون هادي؟ عليمن راك؟ قالتلو هيام بابا صراع يحوس يهدر مع محمد على كي ضرب حلا (باش تنقذ الموقف) ..
رفد صراع التلفون عيط لمحمد بهدلو و قالو دوك جي، و هيام شرت للحاج قالتلو ليليان ما حكاتلو والو اسكت ما تهبلوش، سكت الحاج و قعد وصراع رايح جاي يمشي يدور و يسب و يعاير قالهم صار هكدا كنتو تستناو فيا غير وقتاش نموت و تورثو.. هدا حق الخير و حق ما خبيتو ريسانكم في داري كي الجراد نتوما ما يقرش فيكم الملح بصح معليش و الله غير نجنيكم..
قالو الحاج ياوليدي تهدن خليني نفهمك، قالو بابا أنت بالدات ما راني حايب نسمع حتى كلمة من عندك عيطتلك و أنا في وسط الموت قتلك الحاج بنتي و مرتي أمانة في رقبتك ما تظلمهمش و مع لخر دير فيهم هكدا؟!! وحدة تطعنو في شرفها و لوخرا تمسحو بيها لرض عمبالكم غفات عينيييييي ... و هداك سعد وين راهو سعدددددد .. سعدددد .. جا يطلع حكماتو هيام قالتلو يا خويا صحتك تخدن و كلشي يتحل قالها وخررري علياااااا.. رجعتلو حنين ملفوق قالتلو عمو صراع بابا خرج ماكاشو، قالها وين راح؟ هو يهدر مع حنين حتى سمع أم سعد فالكوزينة قالت الله لاتربحها هديك لي ما عندهاش الأصل هيجاتو و طلقاتو علينا.. رجع قالها وشنوووووو.. سكتت، قالها شكون لي ما عندهاش الأصل و شكون لي هايجاتو و طلقاتو؟؟ يسما مرتي قح... و أنا حيوان يااااااك... و يجبد عليها بكف حتى طاحت فالقاعة منبعد حكمها من رقبتها و يخنق فيها و هي تصوغ قالتلو تضربي على كبري و شيبتي.. حنا نبعدو فيه عليا و هو يعيط اطلقوني على هادي خشبة جهنم لي ما حبتش تحشششششم.. ليوم نشرب من دمهااااا.. و الحاج يجبد فيه و يقولو وخر عليها الله لا تربحك تضربها و هي في عوض يماك، قالو دوك تخرج هادي شيبة النار مناااااا ما نحتاجهاش في دااااري.. تخرجوها و لا نقتلهااااا.. و. يسب و يعاير فيها.. داها الحاج و خرج و هو قعد يعيط و ينهت..
نوال كانت واقفة فالدروج بصح ما دخلتش روحها لا هي لا ضرتها لا أي واحد من دار سعد..
علي كان قاعد في شومبرة الحاجة داير رجل فوق رجل و حاكم تلفونو و يقول يستاهلو غزالهم خالو جناهم  منبعد خلاهم و خرج..
قعدت غير أنا و حلا نشدو في صراع و هو كي شاف نوال قالها دوك تعيطي لراجلك و تقوليلو ما نحتاج حتى واحد فيكم هنا يلاااااا.. و محمد كي نحكمو رقبتو نطرطقها كي رجع يتمرجل على بنتي..
هوما بداو يطمو في قشهم و انا ولا طلعنا لولاد نائل دارو حالة بالبكا كي ما كاشها يماهم حتى عيطلي ملتحت ليليااااان .. حبطت نجري ليه قالي جيبيلي دوايا بلخف راسي راح يطرطق و هيام جات ليه تفتحلو فالقفالي تخنق و ضاقت فيه النفس مالعياط.. منبعد عيطت لنائل قالتلو غاول ارواح للدار أبو حرب راهو في حالة قالها علبالي عيطلي الحاج راني فالطريق جاي..
نوال حبطت مع ولادها و تتعنكر فينا جا خوها داها
شربتلو داواه بالسيف و غسلتو راسو بما بارد باش يبرد عليه و حلا نشفتلو راسو و باستو قالتلو بعيد الشر عليك بابا الله يخليك ما تآذيش روحك، هز راسو و تكسل فوق البونك و حط يدو على رلسو..
حبطت ضحى مرت سعد الثانية قالتلي ليليان عينك على ولاد نائل راهم يبكيو و أنا رايحة جا ليا بابا..
نطق صراع قالي ليليان حبطي الدراري و جيبيهم لعندي، رحت جبتهم التوام سكتو بصح خوهم الصغير عابد كيما درتلو ما حبش يسكت رافداتو و ندور بيه حتى دخل نائل يجري قتلو جابك ربي وليدك دار حالة بالبكا قالي وين راهو أبو حرب دخل عندو قاعد يتفاقد فيه قالو صراع ما بيني والو برك ارفد وليدك سكتو، دار ليا و رفد عابد قالو ارواح بابا لعندي و البكا علاش داه و قالي ارواحي ليليان، رحت موراه قالي وش صرا ما فهمنيش الحاج قاعد غير يعيط، قتلو يماك غلطت بالكلام مع صراع و هو كان مريض و راسو يوجعو سمعها ضربها و حاوز دار سعد، قالي و سعد وين راهو؟ قتلو ما علاباليش قالو خرج الصباح، قالي يا ربي وشنو هاد المشاكل لي ما حبتش تخلاص و الراجل مريض، يوميا الدواس و الله غير كرهت..
كان يدودح في وليدو و يهدر منبعد قالي ادي عابد حطيه في شومبرة الحاجة راهو رقد دوك نشوف وش نقدر ندير..
دخلت صبت صراع كيما خليتو و الحاجة تقولو صراع وليدي كيفاش راك تحس روحك دوك؟ و هو ساكت
قالها نائل رايحين يقتلو الراجل يا يما لوكان تغلقو هاد السوجيات ماشي خير خلاص لي فات مات
قالتلو يا وليدي أنا ما حكيتلو غير بعدما جا الشيخ ريكان جا يتحقق..
تكالمات الحالة هوما راحو و الطفل و صراع رقدو و حلا دات التوام لفوق باش يخليوه يرتاح و نائل خرج للحاجو و أنا و هيام دخلنا للكوزينة، قلتلها صح صراع مرض بصح هدا وين برد قلبي و شفى غليلي منهم .. ضحكت قالتلي بصح مرض  الله لا تربحهم وين ما راحو.. أنا نطيب الغدا و أنت روحي لراجلك اقعدي معاك كاش ما يحتاج..
رحت ليه كي حس بيا رفع يدو من وجهو شاف و عاود حطها عمبالي كان راقد، قتلو كاش ما تحتاج حبيبي، قالي خليني وحدي ليليان مخي راهو عيان.. سمعت الدقديق رفع راسو قالي شكون؟ جات نور و والديها، جبد النفس ناض استقبلهم و دخلهم للهول قالهم مرحبا بيكم ريحوا هنا نتوما أهل ماشي ضياف و قال لهيام أم علي الغدا، قالو باباها لالا يكثر خيركم جينا نشوفوك الحمد لله على سلامتك، قالو و الله ما صرات و قالنا جيبولهم الما..
ناضت نور سلمت على راسو قالتلو اسمحلي أبو حرب زلق لساني هبلوني الدراري ما جبتش الخبر وش قلت، خيرك سابق عليا و لي نديرها ما توفيلكش حقك، قالها ما صرا والو ختي مرحبا بيك، قالو باباها و الله ما خلينالها قلنالها لسانك يتقطع كيفاش تتجاوزي حدودك مع أبو حرب، قالو أنا كنت مريض و صرا لي صرا راهي في عوض حتي و بنتي، قالو إيه قالتنا راهو مريض الله لا تربحهم نعرفوك راجل و سبع و تقاوم لي ينسجن عند هدوك القوم يا يروح للقبر يا لسبيطار المهابل، و فتحو سيرة تع واحد يكوللهم خاطفينو الارهاب..
قالتلي هيام وش نديرو الغدا كاين غير لوبيا، قلتلها عيطي لعلي يجيب الحوت مشوي ملبرا و نزيدو عليه الروز، دخلت نور سلمت علينا و قالتنا وين راهم لوخرين؟ قالتلها هيام جناهم أبو حرب موراك هههه قالتلها قولي و الله، قالتلها و الله و عطا لان سعد طريحة ما تنساهاش على طول ما راهي حية، قالتلها يا خاااه علاش وش دارت؟ قالتلها خليك من هاد الحكايات و ارواحي اوقفي معانا على الغدا رايح يأذن الظهر عيب..
كملنا وجدنا الغدا و حطينا الطابلة كان صراع قاعد و يحكي مع أبو نور و انا فرحانة بيه كي خدالي حقي منهم تبسمت جات عينو في عيني فهمني حط راسو باش يخبي التبسيمة قدام بابات نور..
دخل الحاج و نائل قعدو معانا يتغداو و أنا قعدت قدام صراع همستلو قتلو يا فرحتي بيك بردتلي قلبي، قالك راجلك ولا بطلنا نجيبك حقك مربع، قتلو ربي يخليك ليا.. كمل يسمعلهم و التبسيمة في فمو شفت الحاج يتعنكر فيا ما عبرتوش كامل.
كملنا ديباراصينا الطابلة و غسلنا الماعن، راحو والدين نور و الحاج بدا يلوم في صراع قالي أنت الكبير تهين هكداك ان سعد و هي في عوض يماك و تزيد تحاوز خوك و عايلتو لالا ماشي هكدا، قالو الحاج محي راهو عيان سكتنا يرحم والديك و دار لنائل قالو مع لعشية جيبلي تلفون و لابوس باش نعرض عمومي غدوا ان شاء الله ندير صدقة على حرب الله يرحمو، قالو الحاج الله يرحمو، خلي أنا نعرضهم، قالو اعرضهم هوما بعوايلهم، و جا طالع للشومبرة عيطلي ليلياااان.. دخلت موراه صبتو رايح يبدل حوايجو شفت الكور ديالو كامل مشوه من التعذيب تشوكيت نتبهي عاود لبس بلخف، قتلو هاد الجروح كامل فيك؟! شكون لي دارلك هكدا؟ مشى قعد فوق البونك و ما هدر والو، قتلو ما يوجعوكش؟ قالي ما تعمريش راسك انساي، قتلو صراع يلزملك طبيب، قالي داوني للسبيطار مور ما خرجت من الحبس ماشي حاجة ما تخافيش، قتلو بصح ظهرك راهو منفخ، قالي عندي كونترول عليه فالعاصمة ما تخافيش قتلك ما يوجعنيش، حبطو دموعي و أنا غايسة فيه ما عرفتش إدا صحما يوجعوهش و لا برك ما حبش يخوفني عليه، جبدني لحضنو و زيرني قالي قتلك ما تخميش.. صحا احكيلي وش رايك في الطريحة لي عطيتها لعجوزة النار؟ شفت فيه تبسم قالي ارقدي باس راسي و زيرني لعندو بعدت عليه قتلو كي تحضني يوجعك؟ قالي بالعكس هداك وين نرتاح، حطني على يدو جيت نهدر قالي اشششت و قعد يمسحلي على راسي حتى غفيت مام هو رقد، ما فطنتش حتى للمغرب حبطت لتحت صبتو مع يماه و هي تلوم فيه كي ضرب أم سعد قالتلو لالا وليدي ماشي هكدا مرا كبيرة وش رايحين يقولو عليك و زيد هي عقليتها هكدا ما تقدرش دوك تبدلها، قالها واحد ما رايح يهدر، خليني نربيها شيبة النار ما حبتش تحشم هي ديجا قالت عليا مهبول يمال خليني نستفاد من هبالي و نبرد قلبي وليس على المريض حرج، ضحكت هيام قالتلو ههههههه حشاك من الهبال، قالها جوزت حياتي عاقل و وليد فاميليا وش نلت قتلتني بهمها يمال خلي نضربها و انا مهبول قبل ما نبرا و يلوموني، لوكان ماشي شويا راني غرست موس في قلبها و تهنيت منها بالاك نرتاح و في جنازتها نطيح زوج دمعات و نسب الارهاب لي داو عقلي و ما جبتش خبر وش درتلها مسكينة، كلاطينا بالضحك هههههه شاف فيا قالي اضحكي اضحكي برد قلبك دوك، قتلو على وش درت فيها نورمالمو نشطحلك ماشي غير نضحكلك، قالي تشطحيلي ياك؟ أنت واقيل فسدت طبيعتك في غيابي و خصك شكون يحكم فيك، قتلو يمال غير وجد روحك، دار ليا فتح عينيه و حل فمو و الحاجة و هيام ارواح انت و شدهم من الضحك، حط راسو و تبسم..
دقدقق نائل فالباب و دخل قالو أبو حرب راني جبتلك التلفون و لابوس، وش رايك تروح معايا نقضيو للوليمة تع غدوا إن شاء الله و نشريو الذبيحة تبدل الجو شويا خير ماراك قاعد هنا فالدار في وسط المشاكل، قالو و الله غير مخي راهو عيان مانيش قاعد قيس المشاكل بصح وش راح ندير وين دور تصيبهم خاربينها، قالو نوض معايا نوض.. هوما راحو و حنا قعدنا نحكيو..
غدوا منداك مع الفجر ذبح زوج كباش صدقة على حرب الله يرحمو، كي لحقت ال8 تع الصباح بداو الناس يجيو لولانية لي شرفتنا هي زلوف جدات صراع، حبط صراع صابها قاعدة قالها أهلا زلوووف وش راكي، قالتلو أهلا أبو حرب و الله غير نحبك، باس راسها قالها مازالكي تحوسي على الحب و البوسان ريحي طرونكيل لي قدك شبعو موت و أنت عزراييل ناسيك عندنا، قالتلو علاش راني قاعدة فوق راسك ولا راني ناكل من جيبك باش حايبني نموت، قالها اوااااه يا زلوف طولتي بزااااف، قالتلو إن شاء جميع واحد يدعي عليا بالموت تقتلو القنطة و ما يعرفوش مرضو... كلاطينا بالضحك..
منبعد قالتلو حقا راني صبتلك مرا، ضحك قالها ما زالكي تبعي فيا حتى قريب قيبست، قالتلو يا الجايح لي ما يديش زوج نسا ماشي راجل، زيد تزوج و كسر عين هاد الفرخة، نطقت أنا قلتلها أااااا هاد الكلمة عيب ماشي مليحة، وقف نائل قال نستقبلو أول ديڨا ناضو يضحكو، قالي وش قصدم علاش ماشي مليحة؟ قتلو عيب ما تنقالش و جيت رايحة لحقني قالي اصبري وشنو لي عيب؟ قتلو كلمة فرخ عندنا عيب،  تبسم و غمزلي قالي علاش وش معنتها؟  قتلو انت علبالك غير روح، قالي و الله ماني طالقك حتى تقوليلي، قتلو فرخ يقولولها عندنا على راجل يحب راجل، قالي إيه منبعد؟ قتلو كيفاش إيه جداتك قالتلي فرخة، قالي الفرخ عندنا هو الطفل الصغير غير نتوما تخمامكم منحرف، قتلو اااااه حنا منحرفين؟ خلينالكم الادب ليكم يا بو الآداب، ضحك قالي روحي جيبيلي دوايا راسي راه يسطر عليا..
رحت جبتلو شرب دواه و حنا كاملنا التحرحيرة تع الغدا و قعدنا كامل فالهول نشربو فلاتاي، كامل كانو جاو من غير سعد و يماه، صراع شر لنور و حلا يخرجو الدراري الصغار للڨاراج باش يهدر بلا حس منبعد قال ياريت نسانا يقعدو باش نهدرو  و كامل يكونو شاهدين، قالو عمو تفضل، دار لهيام قالها أم علي نوضي جيبيلي المصحف، قالو عمو الكبير عزام غير لخير أبو حرب وش كاين؟
قالو والله يا عمي أنا عندي هدرة معاكم و حايب نشهدكم و نحط كتاب الله ما بيناتنا باش يطيح لي يطعن في أعراض الناس، قالو عمو عزام لالا إن شاء الله ما بيناتنا حتى حاجة خلي القرآن بجيه، قالو لالا أنا ماشي في نيتي نضر حتى واحد بكلام الله، حايب نحط القرآن نشهد لي عندي و أكيد راك سامع بلي تاهمين مرتي مع وليد ختي و داير كتاب الله على جالهم، قالي حط المصحف ماراهوش لعبة و رانا أهل و زيد حتى مرتك مسيحية ههههه، قالو علاش انا ملوقتاش ندير بهدرة النسا، المشكل راهو مع وليد ختي و نتوما تاهمين  عرضي معاه، علي يحلف و يهدر الحق و لي عندو كلام وحدوخر و علبالو بروحو بلي صادق يحط يدو و يحلف ما عنديش مشكل، و دار لعلي قالو ولا وش رايك خالو، قالو علي أنا ما عندي حتى مشكل و مانيش خايف و هاني نحط يدي على المصحف و نقولها قدامكم كامل بلي ما نكذب في حتى كلمة نقولها، قال عزام لصراع حاشا أبو حرب واحد ما هدر على عرضك بالدونية و هاني قدام عمومك و يشهدو، قالو حتى أنا راني نشهد فيكم برك باش نهار وحدوخر لوكان نسمع كلمة زيادة تمس عرضي سلاحي لي يهدر حتى و لو يكون بابا، و دار لعلي قالو احكي وش صرا، بدا علي يهدر جا يقاطعو جدو قالو خليه يهدر منبعد كي تكون غير انت و ياه تحب تبهدلو دبر راسك، ولا سكت و هو يهدر و صراع يسقسي فيه و يستفسر كي لحقو لحكاية الشيخ ريكان، قالو عمو عزام لوكان جات لعندي و ما راحش ليه طيحت بينا، قالو إدا كان واحد تقدرو تلوموه هو بابا لخطر وصيتو و هو خان الوصية، و الحاج قالو و الله ما كنت حايب نظلمها بصح هي وقحة و ما تقادر حتى واحد، قالو عمو يا أبو حرب ما تخليش طفلة تعمرلك راسك و تفسد ما بينك و بين ماليك، قالو صراع خسارة عليك عمي هدا و كلام ربي قدامك تهدر هكدا؟! انا لدوك ما سقسيتها وش دارولها، بصح مرتي صغيرة و طايشة تهدر برك ما تعرفش تحط الكلام في بلاصتو و تتصرف بلاما تحسب، و أنا إدا كنت متعاطف معاها ماشي على جال حتى حاجة برك كي جات يتيمة و ما عندها حتى واحد، ياك ربي سبحانو يقول و أما اليتيم فلا تقهر، هوما غير غبت طاحو عليها هكدا قال ربي و النبي؟! يا سيدي خليك منها هي ما نهدروش عليها، انا ما عنديش قدر عندهم باش يطعنو في عرضي مور ظهري؟ واحد ما حصلتلو و جاتو كبيرة؟ قالولو لالا حاشا عندك الحق و إن شاء الله واحد ما يغلط في حقك، بصح كيفاش تحاوز خوك و تضرب مرت باباك و هي قد يماك هادي منك انت العاقل؟ قالهم على وش من عقل راكم تهدرو علاش هاديك تخلي الواحد في عقلو ملي نشفى لعمري و هي متسلطة على راسي و مكرهتلي حياتي، تنوض و تقعد و هي تعيط على مرتي تقول عليها قح... و ما عندهاش الأصل و الكلمة هادي تمسني قبل ما تمسها، يمال أنا راني حاط في داري القح.. و انا لا خبر؟ شحال من مرة نحذرها تعاود هاد الكلمة منبعد نجي من كامل اشكال العذاب تقابلني بيها و نزيد نصيب المشاكل في كل كوانة..
ملخر عمي.. سعد و يماه لساني ما يطيحش على لسانهم طاب قلبي منهم، الأخ لي يطعن في عرض خوه ما نستناش منو الخير و متبري منو ليوم الدين و ما نحتاجهمش كامل في داري، و هاد المرة ماشي نحاوزهم، رايح نبيع الدار  و بنتي قريب تروح لراجلها، ندي يما و مرتي نخرج بداري وحدي و نبرد راسي من المشاكل، قالولو و تخلي باباك؟ قالهم بابا على عيني وراسي رقبتي ترخسلو يقعد وين يحب بصح مرتو ما نستقبلهاش..
قعدوا يهدرو معاه و يهدنو و يساعفو فيه و هو والو شايد في رايو ولاو قالو للحاج خلي وليدك دوك راهو مريض و عيان نعاودو نرجعو ليه ان شاء الله و نزيدو نهدرو معاه، قالهم صراع مرحبا بيكم في اي وقت و عرضهم للعشا ما حبوش شربو برك لاتاي و راحو..
صراع قال نطلع لشومبرتي راسي رايح يطرطڨ و أنا قعدت مع البنات نخملو و نفرزو فالحالة..
إخلاص كانت قاعدة مع خياتها و يهدرو في حكاية حلا، كنت نكنس سمعت عجوزة حلا قالتلهم شفتوه كيفاش كان يدافع عليها و سكت عمومو باش برك ما يهدروش عليها؟ قالتلها إخلاث لخطر هداك زهر القح... ماشي كيما زهري أنا، قالتلها حلا بصح خالتو صح خرجو فيها في غياب بابا، قالتلها دوك أنت ما تبقايش دافعي عليها هادي لي دات بلاصة ماماك، ماشي كان يضربها و يحاوزها و دوك راكي واقفة معاها؟ قالتلها بصح يحبها وش حبيتيني ندير؟ قالتلها خلاص حتى أنت و دارتلك غسيل مخ؟ قالتلها لالا و الله غير عشت معاها عام و نص فالأردن ماشفت منها غير لخير، قالتلها يا الجايحة لعبت بعقلك و دارتك في جيبها..
كملت شغلي و رحت قعدت مع الحاجة و هيام كانو يحكيو على وش هدر صراع،منبعد طلعت للشومبرة باش نشوفو   ما صبتوش فوق البونك مع لي درت شفتو  مغاشي و طايح فالقاعة صغت و رحت نجري ليه صراااااع .. أهدر معايا صرااااع واجبنيييييي.. و نضرب على خدودو و هو ماشي جايب كامل خبر
بديت نعيط اجريو ليااااااا.. و نحاول نفطنو، جات تجري هيام و خالات حلا..  صاغت هيام حطاتو في حجرها و قالتلي خفي جيبي الما قد ما راشيناه في وجهو بصح ما فاقش.. دخل الحاج و علي قالونا بعدو عليه رفدو علي على ظهرو و حبطو حطو فالطونوبيل تع الحاج راحت هيام معاهم داوه للسبيطار و أنا قعدت نبكي، سمعت الحاجة تعيطلي رحت ليها قالتلي وش صرالو يا طلع لاباس بيه، قلتلها و الله ما علبالي قوليلي وش ندير رايح يضيع من يدي، قالت يا يما على وليدي ما ترتاحو حتى تحبسولو قلبو قلتلكم خليونا من الحكايات لي فاتو الراجل راهو مرييييض خلييييوه بصح نتوما لالا كل وحدة تشكيلو في جيهة، قالتلها إخلاص الحاجة حافظي على صحتك إن شاء الله ما يصرالو والو هادي ما ترتاح حتى تقتلكم واحد مور خوه، كلات راس خوه و راس وليدو و ما نعرف عليمن الدالة...
قعدت نبكي و حلا تبكي  و واقفة فالڨاراج حتى دخل نائل قال وين راهو صراع؟ قلنالو داه الحاج للسبيطار..
خالات حلا قعدو يواسيو فالحاجة منبعد راحو بصح إخلاص ما راحتش قعدت تهدن في حلا و الحاجة ..
عيطت لهيام و الحاج و علي فالتلفون واحد فيهم ما يرفد، قعدت ننسيستي حتى رفدلي علي سقسيتو على صراع، قالي لاطونسيو طلعتلو و راهم معاه ما يكون غير لخير ما تخافيش برك اقعدي مع الحاجة ما تخليهاش وحدها،
قتلو يماك وين راهي علاش ما رفدتش عليا، قالي خلات تلفونها فالطونوبيل ما تقلقوش شويا هكدا يكملولو و نرجعو للدار..
حبطت طمنت الحاجة و قعدت معاها و نور و إخلاص دارو العشا، عشينا الحاجة على جال دواها و عاودت عيطت لعلي فالتلفون رفد عليا قتلو علاش بطيتو هكدا؟ قالي رحنا درنالو ليزاناليز على برا لخطر فالسبيطار طول، قتلو وش بيه؟ قالي باش يعرفو سبب السطر لي في راسو.. قعدت ندعيلو جات حلا سقساتني حكيتلها، قالتلي هداك كامل على جالي لوكان غير ما حكيتلوش على محمد كي ضربني..
لحقت ال9 جابو صراع يمشي غير بالسيف حبطت أنا و حلا نجريو حضناه و نبوسو فيه تبسملنا، الحاج عيط علينا قالنا وخرو عليييه خليوه يرتاااح، بعدنا عليه قعدوه قلتلها لهيام وش بيه؟
قالتلي عندو الشقيقة يحتاج الراحة و ما يلزمش يتقلق و دواه و ماكلتو فالوقت، قلتلها كوني هانية راهو في عينيا
تبسملي و جا نايض قالتلو هيام وين خويا  اقعد ترتاح، قالها عاونيني ندخل لعند يما، داتو غير شافتو الحاجة فتحتلو يديها و عينيها بالدموع، قعد فوق البونك و تكسل على رجلها و هي تبوس فيه و تدعي لربي باش يحفظو و يحميه، قالتلو اقعد هنا عندي يا وليدي ما تطلعش أنا نعلمهم كيفاش يتهلاو فيك و نشوفو شكون تقدر توصل ليك و تهدر، جبد يدها باسها و قالها ما تقلقيش روحك يما راني بخير، قالتلو و الله يا وليدي غير راحت صحتي و مضى عظايا عليك و خنقتها الدموع، قالها يما هكدا راكي تقوليلي نوض و روح خلاص حبسي البكا و الله ما بيني والو، قربت قعدت قدامو حكمت يدو قتلو إن شاء الله ديما تكون بخير برك من خوفنا عليك، مسح على خدي و طبطب عليا و قالي نوضيني نطلع لشومبرتي نرتاح.. دخل نائل قالي ليليان هدا دواه اعطيهولو في وقتو مام فالليل نوضي و شربيهولو، قالتلي هيام ديري غابال في تلفونك ريقليه على وقت الدوا و سميه (دواء صراع) هكدا باش ما تنسايهش قتلهم إيه إن شاء الله..
نوضتو أنا و نائل مشيناه قالنا نقدر نمشي السطر في راسي ماشي في رجليا ناض يضحك نائل قالو علبالي خويا حديد الله يبارك..
دخل للشومبرة بدلتلو حوايجو و حاولت ما نركزش في جروحو باش ما نحرجوش، كسلتو فوق البونك سڨمتلو المخدة و عطيتلو التلكومند..
دارتلو حلا شوربة جابتهالي عشيتو و شربتلو دواه، حطيتو في حضني و قعدت نرقد فيه حتى نطق قالي ليليان احكيلي كي رحتي للشيخ ريكان شكون شافك؟ عقدت حواجبي قتلو شكون يعني؟ قالي يعني كيفاش مشيتي معامن تلاقيتي وش قالولك أنا ما نسيتس برك قلت حتى يصحلي الوقت و نقعد معاك، قتلو ما تعمرش راسك نحكيلك بصح ماشي دوك، نحى راسو من عندي قالي كي نكون نهدر معاك تحكي ماشي انت لي تقوليلي دوك و ماشي دوك، قتلو وشبيك صراع؟ قالي ما تقوليليش وشبيك مانيش مهبول سقسيتك واجبيني، تقعدت و قتلو صبت راجل عند الباب تع المضافة قتلو نحتاج الشيخ ريكان قالي وش تحتاجي عندو و شكون نتيا؟ حس بيا نبكي قالي امشي معايا، قالي صراع و مشيتي؟ قتلو إيه قالي منقبة و لا هكدا وجهك يبان، قتلو منقبة، قالي ما ضيفوكش؟ قتلو دخلوني لدارهم و ضيفوني ناس ملاح براف و مكرمين، قالي يعني شافو وجهك، قتلو لالا، قالي يمال كيفاش كليتي و أنت منقبة؟ شافو وجهك؟ شكون كان عندهم؟  قتلو صراع أنت لواش راك حايب توصل بالضبط، قالي ليوم عمي هدرلي كلام كي كان طالع لطونوبيليتو خلاني نغلي، أنا يقولي مرتك كسرت وجوهنا قدام الشيخ وجهها بلا نقاب مع هي شابة و صغيرة رجال الشيخ قاعدين غير يشوفو فيها و أنا عمك ما بلعتهاش فوق ما طيحت بينا قدامو زادت توري في روحها .. قالي هوما قالولي منقبة علاش حتى عمي يهدر عليك هكدا؟! قتلو و الله ما نحيتو من غير قدام النسا كي كليت، قالي علبالك نورمالمو ندفنك على وش درتي أنا كيفاش رايح نواجه الناس دوك؟ مرتي تدخل للمضافة و الديوان ما خممتيش فيا و كيفاش رايح يكون الموقف ديالي؟! قتلو صراع قتلك كنت منقبة و أنا رحت للشيخ من ظلم أهلك، أصلا ما كنتش رايحة لعندو أنا هربت من ظلمهم كنت رايحة نرمي روحي قدام كاش طونوبيل نقتل روحي و نتهنى، قالي ما عرفت شكون نصدق و حبط رجليه من البونك قعد يحك في راسو و يخمم
قتلو خلاص انسى علاش راك تمرض في روحك حكاية و فاتت، قالي وش ننسى انا يخزرو في مرتي و تقوليلي انساااااااا... قتلو صراع و الله غير كنت منقبة واحد ما خزر فيا خلاص ارحم نفسك و الله غير عييييت.. قالي عييتي من شكون؟ جيت نهدر قاطعني قالي عييتي منييييي.. يمال امشي اخرجي عليااا، قتلو ماشي منك من هاد الحكاية، قالي قتلك اخرجييييي.. ما نحتاج لا تهتمي بيا لا تشوفيني ارتاحييييي...قتلو لالا ماشي هكدا قالي اخرجيييي، خليتو و خرجت نبكي حبطت لشومبرة الحاجة و فرشت قالتلي الحاجة و صراع؟! قلتلها هو ماحبش نقعد معاه تكسلت و درت، قالتلي يا بنتي الراجل راهو مريض كيفاش تخليه وحدو؟ زيدي شويا و اطلعي ليه مورالو راهو عيان و ماعلابالوش وش راهو يدير ماشي ساهل الشي لي جوزو اتحملي و اصبري معاه، قلتلها دوك كي يتهدن نطلع إدا حب نقعد معاه و إدا صبتو مقلق نعاود نحبط، تالمو كنت عيانة ما فقتش لروحي كيفاش رقدت و نسيت باش نعطيلو دواه تع ال3 حتى التلفون و خليتو لفوق، لحقت ال5 حتى قفزت على عياطو يقول راااااسي راح يطرطق.. طلعت نجري كان حابط فالدروج خبطت فيه غير شافني و يجبد عليا بكف حتى خبطت فالباب و تجرحت في جبهتي حكمو نائل و هو يعيط رااااقدة ما يهمكش لوكان نموووووت.. ادفنيني و تهناي منييييي... راسييييي راح نموووووت راسيييي.. جات تجري ليا نور قالتلي وين راهو دواه؟ و أنا نسيت قاعدة نخزر و نتفكر عاودت طلعت نور تجري جابتو و جات و نائل عطاهولو بالسيف، قعدت فالدروج و نشوف فيهم كانو فالهول ما علباليش وش صرالي حتى الدموع و ما كاش، كي زادت شافني هكدا هبل قالي لوكان نموت ما يهمهاش غير قلتلها اخرجي راحت و ما زادتش حوست عليا،هو يهدر و انا غايسة ما عرفتش وش ندير و كيفاش نتصرف معاه..
طلعو نائل لفوق جا جايز عليا فالدروج نضت باش نروح معاه قالي بعدي عليا مانيش حايب نقابلك، خليتو و رحت القنطة حكمتني، شويا و جا ليا نائل قالي ما تخليهش وحدو ليليان علبالي عياك بصح يلزمك توسعي خاطرك يا نهتمو بيه يا نخسروه، إدا قعد هكدا يتعمى و يهبل، يلزمنا نداويوه و نصبرو عليه اصبري شويا أنا خوك، درتلو براسي إيه و دخلت للشومبرة صبتو متكسل و حاط يديه على عينيه، غير حس بيا نحى يدو و قالي علاش جيتي؟ قعدت، قالي نوضي من قدامي مانيش حايب نشوفك، ضميت رجليا لصدري و حطيت راسي ما بيناتهم، قالي علبالي بتخمامك زعما ديري قدامي هكدا و توريلي فالدم لي في جبهتك باش تغيضيني، تحبي تقهريني تع زعما شوووف وش درتلي و راني حاملاتك و ساكتة يااااك.. رحتي خليتيني و رقدتي ما قلتي راجلي ما خممتي فيا خليتيني نعيط للسما.. روحي كملي رقادك نووووضي، و انا ساكتة، حتى سكاتك تحبي تعذبيني بيه باش تبينيلي بلي انا مهبول و راكي حاملتني و ما ترديش عليا، قالولي بلي فيك ما يكفيك و أنا كي الجايح نحبك بصح علبالي كيفاش نتصرف معاك... علاش ما ترديش علياااااا راكي مثقلتنييي..واجبينييييي... رفعت راسي قتلو تهدن صراع الله يخليك، قالي ما تقوليليش تهدنننن علاش أنا مهبووووول، وبدا يرمي عليا فالدوزان و يقولي اخرجي علياااااااا.. جاية مقابلتني تحوسي تقتلينييي.. رجعت راسي ما بين رجليا حكمني من يدي خرجني من الشومبرة و غلق الباب، رحت للصالدوبا و نرمي على وجهي فالما ما قدرتش نكمل عييت..
حبطت كان بدا يطلع النهار، طونوبيلة الحاج ما كانتش لخطر دا إخلاص و راح لدار خوه صالح بات لتم كي راهي أم سعد لتم..
قعدت فالجنان و تمنيت حضن ماما خلاص ما قدرتش نمشي فالجنان و نخمم و نبكي غاضتني عمري غاضتني حالتي، كي تكالميت عاودت طلعت للشومبرة صبتو متكسل على طرف البونك و مدور وجهو، قعدت و قربت منو حطيت راسي على راسو و حضنت صدرو بيدي، تنهد حكم يدي و قالي آذيتك.. قتلو ما تعمرش راسك ارتاح، قالي ليليان راني تتعذب ما قدرت نرتاح و انا نآذيك ما قدرت نتحكم في روحي كي يبداني السطر، بستو راسو و قتلو المهم تكون بخير، تكسل على ظهرو فتحلي يديه و جبدني لحضنو باس راسي و مد يدو يمسحلي على الجرح لي في جبهتي
قالي نديك لدار خالك ريحي لتم حتى تتحسن حالتي، قتلو خليني معاك مانيش حايبة نخليك، قالي ما نقدرش نشوفك متأذية، قتلو إدا حبيتني نكون مرتاحة ابرا و ارجعلي الله يخليك، سكت رفع راسو شاف في وجهي و قرب باسني، بقينا نتبادلو المشاعر و نسينا كيفاش كنا قبل ساعة، دخلنا في جو خاص بينا شرحنا فيه لبعضانا شحال كل واحد يحب لوخر و راهو متوحشو و مستعد يتحمل أكثر و أكثر على جالو...
غفينا حتى للظهر نضت وجدتلو الفطور و عطيتلو دواه، قالي وجديلي الدوش، جبدتلو حوايجو و الفوطة ديالو و دخلت باش نحطهملو فالدوش دخل مورايا و غلق الباب، ضحكت قتلو افتح نائل راهو هنا عيب، قالي إيه وش نديرلو تحبي نكتب مرتي راهي معايا واحد ما يقرب، قتلو يا ودي خليني نخرج، قالي ماشي لبارح آذيتك؟ يمال خليني نغسلك جروحك بيدي، قتلو صرااااع لالا وخررر مهبووول ههههه
دوشنا كيف كيف سبق لبس و خرج و عطاني حوايج لبست سقمنا رواحتينا و حبطنا، صبت حلا موجدتلو الماكلة كلا زوج لقمات و خرج مع نائل، حلا خزرت في وجهي حسيتها تقلقت، و نور حبطت تضحك قالتلي فالليل تباتو مهرجينا و كي يطلع النهار تصبحو معرسين هههههه قتلتها وشنو؟ قالتلي مبروك عليك ختيتو راجلك طبعلك بصمة جبدت الخمار عليا غطاتني و راحت تضحك، رحت نجري للصالدوبا شفت رقبتي فالمرايا اووووو رجعت لحكايات صراع لي يحرجني بيها.
قعدنا سمانة حالتنا بين و بين مرة عرسان و مرة يصدعني بعياطو بسبة وجيع راسو بصح معليه المهم راهو بخير، بصح مورالو عيان برك يبين القوة ما يحبش يبين ضعفو..
حط خدامين على الدار لي كان يبنيها باش نخرجو فيها وحدنا، و رجع طونوبيلتو و بدا بلعقل يرجع لخدمتو في التجارة بصح في الجيش مازال..
الحاج فالنهار يظل عندنا و فالليل يروح لأم سعد و سعد و عوايلو عند دار صالح..