مراهقة والاربعيني بلهجة جزائرية

41

#المراهقة و الأربعيني:

#الجزء41:

كي هدرت مع صراع فالتلفون و شفتو فلاكام و سهرت معاه ارتحت شويا، و قعد كلامو و حكاياتو في راسي يدورو.
4 أيام موراها مازادش بان عاود حبطلي المورال، و عقلي يدي ويجيب حتى الحياة كانت كئيبة كل واحد فينا حاكم شومبرتو ما نتجمعوش غير على الطابلة باش ناكلو.
حتى وحد النهار جات ليا هيام قالتلي امشي نخرجو شويا نبدلو الجو و نشمو هوا نقي ملينا، قلتلها وين نروحو تخافي نتيهو و ما نعرفوش نرجعلو للدار، قالتلي جابنا من قبل أبو حرب لهنا زوج مرات، قلتلها علاش أنا ما علاباليش بهاد الأمور و نتوما كامل علبالكم؟ قالتلي عندك شهرين ملي وليتي مرتو تع الصح وقتاش حبيتيه يحكيلك؟
نضت بدلت و رحت مع هيام و بناتها، نمشي و نشوف كانت أول مرة نسافر خارج البلاد كلشي جديد عليا.
دخلنا لسوق شعبي شريت ليا و لصراع و هيام لبناتها، كي كنا ندورو ما حسيناش بالوقت كيفاش جاز حتى قالتلي هيام هداك هو ندخلو للدار راهو طاح الليل.
غدوا منداك فطنت الصباح على ال7 على صوت هيام و الحاجة و أم سعد يڨصرو، و الحاج تعرف على واحد نتيجو فالعمر رجع يقعد معاه يجوز الوقت.
دخلت للكوزينة صبت هيام تقلي فالبيض دار قلبي قلتلها صباح الخير قالتلي أهلا ليون ارواحي تفطري معانا.
حكمت كرشي و قعدت قدام الحاجة كان الحال بارد و الشتا خيط من سما، غير حطت عيان السنيوة ضربت ريحة البيض في نيفي نضت نجري للصالدوبا تقييت فوادي، لحقتني دقدقت عليا قالتلي افتحي الباب وش صرالك؟ غسلت و خرجت ليها نشف في وجهي قلتلي ما نعرف تغيلف قلبي ما علباليش علاش، قالتلي الحاجة إن شاء الله يكون لي في بالي صح و يكون وليد صراع في كرشك، عقدت حواجبي و درت لهيام قلتلها زعما صح! نقدر نرفد عادي؟! قالتلي علاش وشنو المانع باش ما ترفديش؟ قلتلها ما نعرف بصح ما عنديش بزاف ملي طرحت، قالتلي إيه منبعد؟ مدام كرشك صفات يقدر يصرا حمل، دوك شويا نحبط نجيبلك تاست و نتأكدو، فرحت و حكمت كرشي و انا نتبسم حسيت تخلق فيا أمل جديد، شفتو غير 3 أيام و خلقلي روح من روحو داخلي.
بعدت عليا الحاجة البيض و كليت فرماج و شربت لاتاي، كملت و قلتلها يلا أم علي روحي جيبيلي، ضحكت لبست و قالتلي روحي البسي حجابك نحبطو كيف كيف..
رحنا جبنا تاست و عاودنا طلعنا للدار دخلت ديراكت للصالدوبا درتو خرجولي زوج خطوط واحد باين و لوخر شويا ما فهمتش وش معنتها رحت الهيام، قالتلي بالاك هدا وين بدا شهرك مازالو صغير لعشية مع العصر نروحو ديري ايكوغرافي و نشوفو، الحاجة فرحت كثر مني قاعدة طبل و تغني و جنات تشطحلها ههههه
جوايه 12 الظهر سمعت تلفون الحاجة يصوني غير شفت بلي صراع لي كان يعيط طرت بالفرحة يا يمااااا زوج فرحات في نفس النهار الحمل و صراع، غير رفدت قالي الو يما وشراكم؟ قتلو أنا يماك و انت كامل دنيتي، قالي أنت روحي و عمري و الهوا لي نتنفس.. وش راكي؟ قتلو متوحشاتك بزاف بزاف بزاف.. و بكيت من الفرحة، قالي لوكان تشوفي الشوق لي راهو فيا قوليلي كيفاش راكي مرتاحة؟ قتلو خصيتني انت وقتاش جي حبيت نشوفك، قالي إن شاء الله إدا حب ربي نتشاوفو و يخلاص هاد الشوق.. وين راهي يما؟ قتلو هنايا تحتاتجها؟ قالي إيه و الله متوحشها بزاااف، رحت نجري ليها عطيتلها هدرت معاه كملت جوزتلو هيام و قعدت تبكي رحت ليها قلتلها و الله راني حاسة بيك، مسحت دموعها قالتلي يرجع إن شاء الله سالم غانم ربي يحفظو و يحميه من كل شر ياااارب، عطاتني هيام التلفون قالتلي هاكي ليون يحتاجك، رحت دخلت للشمبرة قتلو ااا عمري.. قالي راكي مرتاحة؟ واحد ما قلقك؟ قتلو و الله واحد ما قلقني، قالي علبالك شحال ارتحت كي سمعتك فرحانة حسيتك احسن شويا، قتلو إيه.. جيت نقولو حامل خفت نعلقو باطل وليت قتلو الحمد لله كي تكون انت بخير انا نولي مليحة، تنهدت و قتلو انت شمسي و انا وردة بلا بيك نذبل، قالي انت الوردة ديالي تهلاي في روحك ما تقلقيش عليا راني لاباس، اخرجي انت و هيام حوسي ما تقعديش مهمومة، قتلو واعدني ترجع لحضني بخير، قالي إن شاء الله إدا حب ربي نرجع و نعيشك أحلى حياة و نخليك ملكة برك اصبري معايا شويا على هاد الوضع، قعدنا نحكيو مع بعضانا منبعد كوبيت حسيت مورالي تحسن شويا.
غدوا منداك رحت للطبيبة قلبتني قالتلي راكي حامل رجعت للحاجة طايرة خبرتها فرحت بزاف حتى الحاج جا باس راسي و قالي ردي بالك على روحك و ما تتعبيش خلي حملك يثبت.
عيطت لصراع باش نفرحو ما حكمتوش قد ما عاودت والو ما عندو لا ريزو لا نت، تقطعت أخبارو مدة زوج سمانات.
وحد النهار حسيت بسطر خفيف كيما تع الدورة الشهرية قلت لهيام قالتلي ارتاحي، العصر سال عليا الدم رحت نجري للحاجة و هيام داتني للطبيبة قالتلي البيبي طاح، قلتلها بصح ما عنديش سطر قاوي و ما سالش عليا دم بزااف، قالتلي لخطر هدا وين بدا الحمل البيبي مازال صغير بزاااف، تحتاجي الدوا برك ما كالاه نديرلك كورتاج، و قالتلي عندك فالرحم فيروس داء القطط على هديك يطيحولك لي بيبي و ما يثبتوش (البنات لي جربت الحمل من قبل باش نوضحلكم عندها توكسوبلازموز نيڨاتيف toxoplasmose négatif)
حسيت نفسيتي دمرت حتى صراع حملت و طرحت و ما علابالوش خبرو ما بانش،
رجعت للدار منهارة كسرت كلشي قطعت حوايجي و نصوغ علااااااش ماشي مكتوبلي نفررررررح، دخلت في ديبريسيو واحد ما قدر يكالميني، بديت نندب في حناكي و نرمي فالدوا حتى تغاشيت، كي فطنت صبت روحي على يد الحاجة دموعي ولات تجري مع صوت الآذان، كان صوت هداك المؤذن يخليك تخشع بالسيف، وليت نتنخفت من البكا حسيت روحي قعدت بلا حتى حاجة لا أهل لا أخ لا أقارب لا زوج حتى صحتي و وليدي خسرتهم.
كانت حالتي صعيبة بعدما توفات ماما بصح أهون من دوك لخطر لتم صراع كان معايا و ما خلانيش ولا لحظة حتى عاودت وقفت على رجليا بصح دوك انهرت.
آخر فترة كامل كانو يقولولي سمنتي و تعمرتي بصح دوك وصلت لمرحلة وليت جلد على عظم شينت بزااف لخطر كنت نقطع الماكلة بليامات.
عيطلهم صراع شحال من مرة يسقسي و كي يقولهم جوزوهالي يقولولو راهي دوش حتى وحد المرة قالتلو الحاجة خرجتها هيام دور شويا بدا يشك قالها يما مرتي وين راهي إدا كاش ما صرالها قولولي ما تخبيوش عليا هكداك و ما قالتلوش لخطر أنا قلتلهم ما نهدرش معاه باش ما يحسش بالدرجة لي وصلت ليها من الإنهيار ما حبيتش نقلقو عليا و هو في نص الموت.
هيام ما خلاتنيش وحدي وقفت معايا لآخر حد رجعتلي أم و أخت و صديقة، كانت دير كامل وش تقدر غير باش تخرجني من العزلة لي فرضتها على روحي.
علمتني التطريز وليت نخدم معاها كي شافتني بديت نتعلم ولات تديني عند وحدة جارتنا أردنية وسمها أم اسماعيل تكون فالخمسينات هكداك تخدم فالتطريز و تبيع، اقترحت على هيام تبيعلها بصح هيام ما قبلتش قالتلها أنا نخدم باش نجوز الوقت برك.
كنت نروح عندها كل يوم منبعد حبست كي جا نائل و نور كرشها لفمها و التوام قلتلها خليهم عندي و ارتاحي، طلعت نور و نائل لابارتومو لي فيها الحاج و أم سعد و حلا حبطت عندنا.
عمرت وقتي بالاهتمام بالتوام يظلو عندي فالنهار و فالليل نطلعهم ليماهم يرقدو عندها.
زوج سمانات منبعد صراع عيط عند الحاجة سقسى عليهم كامل منبعد قالها يما ليليان جوزيلي ليليان ما ديرولي حتى سبة اخلقيها و جيبيها  نشوف وش حكايتها، أنا ما كنتش حاسة روحي مستعدة باش نهدر معاه و هو يقاتل و الموت دايرة بيه من كل جيهة و نزيدو بهمي، كي شفتو قعد مصر باش نهدر معاه ديت التلفون و دخلت للشومبرة قتلو ألو قالي أهلا عمري وشراكي؟ قتلو مليحة قالي وشبيك؟ قتلو والو قالي وش صرا معاك احكيلي و لا نقولك افتحي لاكام حبيت نشوفك و الله غير متوحشك، هكدا قلبك حجر ما حبيتيش تسمعيني صوتك علاش؟ افتحي الكاميرا نشوف، هو يهدر و أنا قابلت المرايا سڨمت شعري و فتحتها تبسم منبعد بلخف راحت هديك التبسيمة من وجهو قالي وش صرالك علاش شينتي هكدا؟!! قتلو ما بيني والو من وحشك برك مانيش حاملة روحي بلا بيك، قالي ليليان مانيش مرتاح زوج مرات توقفيلي فالمنام كي نفطن نحس ماراكيش مليحة، قعدنا غايسين في وجوه بعضانا و هو الدمعة فعينيه تشوكا كي شافني كيفاش وليت، قالي نمتك خطرة و عيطلكم خفت ادا كاش ما بيك، شفت روحي جبدت مفتاح من جيبي و حطيتو فيدك غلقتها و قتلك ليليان خبيه، و أنت فتحتي يدك صبتيه تبحرلك و ما عرفتيش وين راهو، كي قالي على منامو تخنقت بصح شديت روحي و تبسمت قتلو لالا ما بيا والو، قالي ما تخبيش عليا نعرفك، ليوم تان جيتيني فالمنام و كنت قتلك من قبل قليل وين نام، شفت روحي واقف معاك حاكم خاتم فيدي فيه حجيرة تع ألماس كلما نلبسهولك طيح هديك الحجيرة، زوج مرات شدت روحها غير نلبسلك الخاتم تعاود طيح كي فطنت قلبي تزير احكيلي وش صرا معاك، طرطقت بالبكا و غلقت الكاميرا، قالي ما تبكيش احكيلي وش بيك؟ واجبيني، قتلو ما بيني والو برك رد بالك على روحك و ارجعلي سالم غانم، قالي يتسمى ما بيك والو هكدا ياك؟ خنقتني الدموع قتلو لالا ما بيني والو، قالي أوكي صح بقاني على خير و كوبا، دخلت في فراشي بكيت مخ راسي.
جوايه ال3 تع الليل كنت راقدة سمعت تلفوني يصوني صبتو صراع تخلعت ياربي وش صرا.. رفدت قتلو ااا حبيبي، قالي اسمحيلي نوضتك من الرقاد بصح و الله ما غمضت عيني، قتلو خير حبيبي وشبيك؟ قالي علاش ما قلتيليش بلي طرحتي؟ قتلو شكون لي قالك؟ قالي ما يهمش، توجعتي و أنا ما كاشني، زڨيتلي صراع و أنا ما قتلكش راني هنا، تخنقت كوبيت الميكرو بكيت و هو يقول الو وينك؟ تنفست و عاودت فتحت الميكرو قتلو ا حبيبي راني معاك، قالي احكيلي عمري ما تخنقيش روحك بهمك شاركيني وش راهو في قلبك ما تبعدينيش عليك، قتلو راني مليحة دوك صدقني، قالي راكي تواسي فيا ليليان؟ قتلو صراع راني محتاجاتك وقتاش ترجعلي كرهت، تنهد و قالي و الله توحشت كل شبر فيك ماني متمني من الدنيا غير نحطك على قلبي و نرتاح، قتلو وقتاش يخلاص هاد الوضع، قالي علاش في يدي؟ قتلو خلاص بطل، قالي حرام عليا وين نروح من ربي سبحانو إدا هربت و أنا لي معايا و خلينا أهلنا و ناسنا ينذبحو.. قعدنا نحكيو حتى اذن الفجر كوبا و راح يصلي.
فطنت الصباح رحت للكوزينة صبت هيام واقفة قلتلها صباح الخير، قالتلي صباح النور كيفاش راكي و لوكان تشوفي صراع شحال تقهر كي سمع بيك طرحتي، قلتلها انت لي خبرتيه؟ قالتلي إيه، علاش عيطلك؟ قلتلها إيه عيطلي على ال3 قالي ما قدرتش نرقد و قعد يواسيني، قالتلي مسكين فوق لي راهو فيه يواسي.. ما تصعبيهاش ليليان تفاءلي خيرا و اذكري ربي أن شاء الله يرجع سالم غانم، قلتلها مانيش متشائمة بصح ما قعدتلي حتى رغبة فالحياة عييت أم علي، قالتلي لالا ماشي هكدا حرام و لا تيأسوا من روح الله.
حنا نهدرو حتى سمعنا الدقديق فالباب راحت فتحت صابت أم اسماعيل استقبلتها الحاجة و أم سعد و هيام، جازت لداخل و قالتلهم ياك ما نوضتكمش قالتلها الحاجة لالا مرحبا بيك في أي وقت، حنا نضنا بكري الطفل برك سهر و رقد فالصالو جوزي جوزي مرحبا بيك، هيام نوضت علي راح كمل رقاد فالشومبرة.
قعدت المرا أنا رحت وجدت لاتاي و سربيتلهم و حطيت الڨاطو لي كانت خادماتو هيام و مخبياتو، كي حطيت السنيوة و سلمت عليها قالتلي أهلا بالشابة تبسمتلها، قعدت تڨصر و تضحك منبعد قالت أنا جيتكم في طلب و إن شاء الله ما تردونيش، قالتلها الحاجة قولي إن شاء الله خير، قالتلها لالا خير أنا جيت باش نخطب بنتكم لوليدي براء عجبتني مام هو عجباتو كي جا لينا مرة، درت متفاجئة نشوف شكون تقصد عمبالي بنت هيام قاعدة مورايا كي ما صبت حتى واحد قلت يعني جايه عليا؟!!!
جا تهدر هيام.. قالت ندللها و نديرها كي بنتي و سقسيو علينا باش تعرفونا كثر، قالتلي هيام خالتي ادا راكي تقصدي ليون ماهيش بنتي راهي مرت خويا الكبير، تشوكات حط يدها على فمها قالتلها يعني متزوجة؟!! و انا نخطط و نتأمل و في الاخير ظهرتي متزوجة و ضحكت ههههههه، ضحكت هيام قالتلها و الله غير مرت خويا، قالتلها ما عندهاش ختها؟ قالتلها لالا غير هي طفلة في دارهم، قالتلها، شكون في خاوتك لي خاديها هداك الرقيق؟ قالتلها لالا هداك نائل متزوج و قاعد لفوق مع مرتو و والديه، هادي مرت صراع، قالتلها أبو حرب؟ بصح كيفاش راهي قد بنتو، قالتلها الحاجة مكتوب الله.
هي راحت و حنا نضنا نخملو فالصالو و هيام شابعة ضحك و تقول وين راك يا صراع تجي تشوف مرتك جاوها الخطابة ههههههه، و تقول للحاجة يما لوكان يسمع يحكم ديراكت طيارة للمرا و يبدا يعيط عليها وليدك تعجبو مرتييييي يا أرض انشقي و ابلعيني ههههه، قلتلها يمال نعيطلو نقولو وليد الجيران راهو معجب بيا و جا خطبني جي لو نتزوج ههههه قالتلي انت تحوسي يجي و يديرلك كورتاج لجهنم مع المعجب ديالك ههههه.
جاز شهر من آخر مرة عيط صراع و مازادش بان خبرو و كي نسيي نعيطلو ما نحكموش، و الحاج يقولنا عيطلي بصح راهو مشغول بزاف كي يصيب شويا وقت يعيط.
ديتها غير للبكا و اعتزلت العالم بصح علي وليد هيام ما خلانيش كان دايمن يعيطلي نقعد معاه نشوفو فيلم و لا نلعبو بلاي أنا و ياه و حلا.
حلا كانت حالتها أسوء مور ما مات خوها انكسرت و عاشت صدمة قليل وين تهدر و لا تقعد معانا دايمن حاكمة تلفونها و خلاص، و زاد جاها خبر بلي خو خطيبها قتلوه الإرهاب زادت روشوتات.
كنت أنا وياها مفرشين كيف كيف و كل واحدة في تلفونها و ساكتين حتى علي طبع علينا الباب قالنا هل يجوز لنا الدخول إلى غرفة الأرامل و المطلقات و العانسات، درت ليه قتلو ادخل شكون راهو شايدك؟ جا قعد فوق البونك و يشوف فينا منبعد قالنا هادو وجوه.. راكم قانعين بحالتكم هادي؟ قالتلو حلا و المطلوب؟ قالها و الله سيريو.. راني رايح للسينما اخرجو بدلو الجو معايا خير ما راكم تنوحو عند ريسان بعضاكم كي الغربان، مادام قعدت غير أنا هنا مباصي بيكم و الرسول صلى الله عليه و سلم يقول رفقا بالقوارير حبيت نولي جونتي وش رايكم فيا؟ قتلو فيك و لا فالخرجة؟ قالي في زوج، قتلو إدا فيك ما تسمعش خير و إدا فالخرجة ما نعرف و درت لحلا قلتلها وش رايك نروحو؟ قالتلي و الله ما علابالي وقيلا محتاجين صح نبدلو جو، قالنا علي عندكم نص ساعة تروحو صحا و صلاح ماتروحوش نلبس و نروح، نضنا شاورنا هيام قالتلنا نروحو كامل و نخليو الحاجة معاهم لفوق.
نضنا لبسنا و خرجنا رحنا للسينيما كامل حبينا فيلم رومانسي تع انجلينا جولي، شاف فينا قالنا هادي لي قالك وش خصك يا الفرطاس قالهم خصني تحفاف الراس، رجالكم في ثلاثة ما كاش تحوسو على فيلم رومنسي؟! ضحكت هيام ههههههههه قالتلو و الله غير صح عندك الحق، قالنا امشو تشوفو مورايا على حساب الشوفة راكم عايشين في جفاف دوك أنا نشمخكم تع الصح، راح شرالنا تيكيات عطاولنا نواظر 3D فيلم رعب غير الأرواح و الجنون الله يسترنا حنا نصوغو و هو شابع ضحك علينا، كملت لي كانت قدامي ناضت جا واحد يقعد قدامها جا علي قالو هادي أختي انا نقعد قدامها.
كي خرجنا طحت على علي بالضرب و حلا و هيام يضحكو حتى شفت هداك لي نوضو علي يشوف فيا يغمزلي و يشرلي بيدو على وذنو تع اعطيني النيميرو ديالك، دورت وجهي عليه قعد يتبع فينا ملبعيد و حنا نمشيو فالمول، دخل علي لوحد الماڨازا و حنا دخلنا لوحدوخرا دخل مورانا و بدا يرميلي فالكلام درت روحي ما سمعتوش، قرب ليا و حطلي فيدي النيميرو ديالي هنا خلاص ما قدرتش نيڨليجيه كثر من هكدا، رفدت صاكي و نضرب فيه لراسو و نعيط يا وليد الحرام  تتحرش بيااااا؟! أنا  مرت أبو حرب تعرفو ولا لالااااااااااااااا
هو يطلب فالسماح و رايح و أنا طايحة عليه بالضرب حتى جات هيام تجري جبدتني عليه بديت نبكي و علي جا طاير مرغو فلرض و طاح عليه بالضرب ما سلكوه منو ليزاجو غير بالسيف داونا لمكتب الأمن الطفل ظهر يقرا فالجامعة ميدسين و كي عرفونا براوية ماشي أردنيين ولاو يعتذرو و طلبوا السماح.
خرجنا من لتم و انا نمشي مقلقة و نقول الكلب يتحرش بياا... دار علي ليا ولا يضحك مالڤري كان مقلق، قتلو و تزيد تضحك ياك عاجبك الحال واقيل.. قالي واش منى زكي.. و بيتحرش براااااا .. و انا كلاطيت بالضحك تفكرت كان عند يومين شفت انا و ياه فيلم مصري وسمو خالتي فرنسا و جازت لقطة تع منى زكي تتبلى فالناس تقتلهم منبعد تعيط بيتحرش فيااااااااا..
طريق كاملة و علي و هيام يضحكو يقلدو عليا كيفاش كنت نضرب فالسيد  و علي يفتح يديه و يعيط بيتحرش بيااااااا ههههههه
جاز شهر و شهرين و ستة اشهر و صراع عيط ما بان خبرو و قلوبنا نار عليه نبكيو ليل و نهار و كي نسقسيو الحاج كل مرة يجيبلنا سبة و يقول راهو يعيطلي و يقولي طمنهم و حنا عرفنا بلي صراع بيه حاجة باينة تعيط ولينا غير ندعيولو، حتى وحد النهار دخل الحاج و نائل عينيهم فيهم الدمعة، قعدو و نطق الحاج قالي وين راهي عجوزتك؟ قتلو راهي راقدة.. كاش ما بيه صراع قولي الصح عمي الله يخليك، قالي روحي نوضيها، رحت نجري نوضتها و خليت هيام قعدت تسقسي فيه، قلتلها الحاجة نوضي نوضي الحاج يحتاجك ناضت مخلوعة قالتي وش كاين وش صرا وليدي جا، قلتلها لالا الحاج حب يهدر معاك نوضي..
رحنا قعدنا مع الحاج و نائل و الخوف قتلنا نستناو غير وقتاش واحد فيهم يهدر حتى نطق الحاج قالنا عندي 6 أشهر و انا مخبي عليكم وحد الامر بصح لحق الوقت باش تعرفو، قالتلو الحاجة أهدر وليدي كاش ما بيه قلبي ما بقاش يزيد يصبر كثر من هكدا، خزر فيها و في عينيه الدمعة قالها صراع مفقود من 6 أشهر نورية، ناضت تندب في حناكها و تضرب في راسها قالتلو دحام ما تخبيش عليا وليدي وش صرالو؟ قالها ليوم سقسينا قالولنا الوحدة لي كان فيها صراع طاحو في يدين الإرهاب و قتلوهم كامل واحد ما سلك، هو قال هكدا و حنا نضنا نتصاوغو كلينا رواحتينا و حلا تصوغ و تقولو لالا جدو لاااااا قولي بابا ما بيه والو جدووووو  بابا مااااااا مااااااتش ..
و انا قعدت فلرض راسي مابين رجليا يديا  فوق راسي و نصوغ... لالا مااااااا ماتش لالاااااااا صراااااااااع و الحاجة وقفت صاغت ياااااااربي غير هدا لالاااااااا ما تديهش علياااااااا و تغاشات طاحت ديراكت فالقاعة رفدوها للسبيطار
نور و سارة بنت هيام مقابلينا يبكيو و يهدنو فينا.. أنا نعيط و نقول علااااااش صرااااع قتلك بطل و ما تيتمنيييييش حرام علييييك وين نروحوووو... رميت روحك في وسط النار و ما خممتش فينااااا...
حلا تقطع في شعرها و تعيط وعلاااااش.. باااابااااا.. عطاك قلبك رحت و خليتني وحديييييي...
جاو الجيران كامل لي فالباطيمة تلايمو علينا يهدنو فينا و حنا حاطين ريسانا و نبكيو دموعنا ما نشفوش.
طاح الليل و الحاج و الحاجة ما بانوش، نور تعيطلهم فالتلفون واحد فيهم ما رفد.
الحاجة كانت دايمن كانت لاطونسيو ديالها طالعة من خوفها و بكاها على وليدها و فالليل عرفنا بلي ضربتها لاطونسيو و جاتها افيسي، كانت ثاني صدمة لينا دخلت كومة مدة شهر، و هيام روشوتات ضربة وحدة تبكي على يماها من جيهة و على خوها من جيهة اخرى.
جزنا بمأساة و حزن واحد فينا ما قدر يستوعب الشي لي صرا، كل واحد حاكم شومبرتو ساكت و غايس و لا يبكي، هيام مابين الدار و السبيطار، أم سعد تبكي حتى تتغاشى من خوفها على سعد و يرفدوها للسبيطار سورتو كي زدنا سمعنا بلي وليد عمهم جا هارب بعايلتو ذبحوه هو و مرتو و ولادو
وحد النهار عيطلهم سعد قالهم تفاهمت مع واحد باش يهربني انا و عائلتي و الحاج و أم سعد و نائل يحاولو فيه باش ما يخرجش لخطر في هديك الفترة كانوا الإرهاب سيطروا على المنطقة و لي يحكموه هارب يعتبروه مرتد عن الاسلام و يذبحوه، صراع كان خرجنا ملتم في الوقت بدل الضائع غير عرف بلي راهم قريب يوصلو و سعد في هديك خشن راسو و كي فاتت طفرت حب يهرب بعايلتو، قد ما حاولو معاه ما حبش يسمع قالهم ما نقدرش نزيد نبقى هنا رايح يقتلنا الجوع و الحصار و الذل، الخدمة حابسة و وش كان عندو دراهم حولهم للأردن و تقطع ما كان كيفاش يصرف دراهمو ما كان لي يقدر يجيبلو.
سمانة منبعد عاود عيطلهم قالهم ما كاش كيفاش نهربو الراجل لي تفاهمت معاه قالي تحب نطلعك أنت و عائلتك فالكاميو بصح ما نضملكش بلي ما يحكموناش و خاف يريسكي.
الحاجة فطنت من الغيبوبة بصح قاعدة غير فالكرسي ما تهدرش و الحاج و هيام يجريو بيها من طبيب لطبيب و ما كاش حتى تحسن حتى نصحوهم يسفروها للبنان، طلعوها و راحو في زوج معاها، ولات أم سعد و نور و نائل يقعدو معانا فالنهار لخطر كان غير علي معانا حنا البنات خافو علينا.
يامات منبعد زيدت نور جابت طفل نائل كان حايب يسميه فهد و أم سعد حبت تسميه عابد على المرحوم ما حبش يبقي في خاطر يماه وهي مريضة، دارو فالكوارط فهد بلاما يقولهم و فالدار يعيطولو عابد.
في 2016 تحررت المنطقة ديالنا فالبلاد لخطر العشائر فيهم الرجلة و النخوة و الغيرة على أرضهم يعتابروها عرضهم وقفوا مع الجيش ضد الإرهاب و ساندوهم حتى آخر لحظة مالڨري كاين منهم لي طلع للجبل و انضم للارهاب بصح معضمهم كانوا ضد.
كي سمعنا الخبر طرنا بالفرحة رغم الألام، حمدنا ربي و نضنا نصوطيو و نعنقو في بعضانا حتى أم سعد تفاجئت بيها جات  حضنتني الدموع في عينيها و تزغرت، فهديك اللحظة نسينا كامل الحقد و المشاكل و الخلافات لي ما بيناتنا و كانت فرحتنا وحدو و هي تحرير منطقتنا.
كنت متلهفة باش نرجع لدار صراع و لشومبرتي و لذكرياتي معاه، متلهفة باش نحكم حوايجو لي خلاهملي آخر مرة قبل ما نهربو للعاصمة نشم ريحتو فيهم و نحضنهم، صراع كان لي الأهل، ما انكسرتش على ماما قد ما انكسرت عليه، راحت صحتي ضحكتي.. حتى الدعاء و ما وليتش ندعي قطعت لياس باش يرجع
وجدنا باڨاجنا خرجنا من الأردن و رجعنا لبلادنا غير دخلنا الحدود جرات دموعي منبعد فطنت لعمري قلت أنا علاش راني فرحانة؟ شكون عندي هنا؟ شكون رايح يستقبلني؟ لا أهل لا زوج لا أحباب... أقسى شعور ممكن تعيشو أنك تحس روحك راجع غريب لبلادك بعد ماخرجت منها و خليت أغلى الناس.
حكمني نور من يدي قالتلي ما شبعتيش من الدموع؟ إدا كان ميت ادعيلو بالرحمة و إدا كان حي ادعيلو يرجع بالسلامة، قلتلها نور أنا ليمن راني راجعة؟ قالتلي لدار راجلك.. أنت مرتو شرعا و قانونا واحد ما يقدر يدنى ليك و هو شحال من مرة كان يوصي قدامنا كامل و يقول إدا مت كامل وش عندي لبنتي و مرتي، قلتلها  نور علاش الدراهم يداويولي جراحي أنا نحتاج راجلي هو أهلي.. قالتلي الله يصبرك حبيبة هدا مكتوب الله وش رايحة ديري خلي إيمانك قوي و فوضي أمرك لربي سبحانو ماينساش عيبادو و حنا رانا معاك و أنا ختك كوني هانية.
حبطنا في مطار العاصمة و رحنا لدار أبو صفاء رحبو بينا وصلنا عيانين كل واحد فينا عندو هم في قلبو، جزت على الصالو شفت بلاصتو لي كان قاعد فيها كيما تبسم معايا و قالي علاش راكي واقفة ارواحي اقعدي قدامي.. رحت قعدت في بلاصتو رميت الفاليزا و نضت نصوغ توحشتك علاااااااااش.. ماشي كنت تقولي ليماك إدا مت حطو ليونة على قلبي و دفنوها معايا و ما تبعدوهاش عليا... وين رااااااك؟ وين راهو قبرك نتوسدك و نموووووت و نرتااااح.. صراااااع..
ساماتني حلا تصوغ و تقول اخخخخخ يا بابا والله غير كسرتني... عليمن نبكي على خويااااا ولا عليييييك... خليتوني وحديييييي...علااااش..
وحد الساعة و كل واحد فينا حاكم كوانة و يبكي، جا جايز أبو صفاء باس راسي و قال يا بناتي اذكرو الله ادعولو بالاك راهو مفقود و ما ماتش، حتى لوكان صح يكون ميت ما يجوزش تبكيو عليه هكدا..
عيط لأم صفاء و نور داونا أنا و حلا كل وحدة لشومبرتها.. دخلت صبت فيها دراري صغار يلعبو خزرت فالبونك تفكرت ذكرياتي معاه فوق هاد البونك تمنيت لوكان يفرغولي الدار كامل و يخليوني نصوغ و نبكي براحتي..
يومين منبعد رجع الحاج و هيام من لبنان جابو الحاجة خير ملي كانت ولات تقدر تهدر بصح ما طولش بزاف فالكلام و تحرك يدها بصح ما تمشيش، منعوها من البكا و قالونا وحدة ما تزيد تبكي قدامها و لا تضعف.
قعدنا فترة فالعاصمة و الحاج بعث نائل لسعد باش يرممو الدار ويصبغوها لخطر تقاست شويا فالحرب.
يومين منبعد عيط نائل و جابلنا الخبر الصحيح كيفاش صرات لصراع، قال بلي كي سيطروا الارهاب على الوحدات لي فيها الجيش لي صابوه شيعي ذبحوه و لي صابوه سني سجنوه باش السني يديروه رهينة و يساومو بيه عشيرتو، كانو يقولو لكل عشيرة نعطيولكم وليدكم مقابل تعاونونا و تفتحولنا منفد نجوزو منو كي حاصرهم الجيش لي حرر المنطقة، و شيخ عشيرة صراع رفض هاد الشي و هوما كانو قالو إدا رفضتو نذبحو ولادكم لي راهم عندنا..
هنا زدنا فقدنا الأمل بلي صراع مازالو حي و نضنا نتبكاوو و نندبو...
سمانة منبعد رجعنا لدارنا، دخلناها بعدما جاز عام و نص ملي خرجنا منو، أول مرة شفت الحاج في هديك الحالة عيط على طول صوتو و قعد يبكي فالڨاراج و يقول أخخخخ يا صراع وليدي يا البكري ديالي ولاو كامل يبكيو و انا نستنى غير وقتاش نلحق لحوايجو، فتحلي نائل الباب و عطاني مفتاح شومبرتي دخل الدار رجعت خراب مقلوب ماكاش الفراش، طلعت قبل للشومبرة فتحت باب الخزانة لي فيها حوايجو ضربتني ريحتو لنيفي دخلت في وسط حوايجو نصوغ و نحضن و نشم حتى تغاشيت فطنت على هيام تنوض فيا و تبكي قابلتني و بدات تصوغ فرغت قلبها لخطر ما تقدرش قدام الحاجة.
نضنا نقينا الدار و رجعنا كل حاجة لبلاصتها، في كل كوانة كنت نبكي وين ما ندور عندي ذكريات معاه،في فترة التهجير و كيما توفات ماما كنت نوزن 60 كيلو و دوك 42 كيلو رجعت جلد على عظم تقول هاربة للغسال قعدلي غير نندفن.
جاو دار عمومهم و سعد و عايلتو، عمومهم اقترحو يديرو عزاء لولادهم ال6 لي ماتو و صراع السابع، و لمرت وليد عمهم و 3 دراري صغار لي ذبحوهم لخطر في وقت الارهاب كانو مانعين العزاء لخطر في نظرهم جميع واحد ذبحوه و لا قتلوه هو مرتد عن الإسلام و حرام يبكيو عليه.
اقترحو يديرو الجنازة في دار الحاج و كامل جاو لعندنا.
جا علي وليد هيام قالي ليليان جيبيلي الفيستا راهي في شومبرة الحاجة ما نقدرش ندخل في وسط النسا، رحت جبتهالو هو يلبس و يهدر معايا محبط راسو قالي وين راهي يما؟ مازال ما رجعتلوش حتى دخل عمهم صالح يعيط شكون هادي؟ درنا ليه قالو ااا جدو هادي ليليان مرت خالو صراع، عيط عليا قدام الناس قالي ادخلي للدااااار راجلك ماكاش المفروض خيالك ما ينشافش ماشي قاعدتلي هنا مع les jeunes تضحكي
قعدت غايسة ردو علي قالو جدو ما ضحكتش سقسيتها برك على يما، قالو و انت وش عندك معاها و تزيد دافع عليهااااا ما نتهناوش دوك من غلطاتك جات الدالة دوك على مرت خالك..
فضحني خرجو كامل يشوفو منبعد عيط للحاج قالو و هاد المرا وش مصيرها هنايا؟ طفلة صغيرة حمرة و خضرة و شبابنا طايشين تتورط بيهم و لا يتورطو بيها و نتبهدلو و راجلها غايب، راكم راضيبن بهاد الشي؟ قالي الحاج ادخلي للدار ما تزيديش تخرجي، قالو صالح أبو صراع الطفلة صغيرة و الدار غير شباب إدا قعدت هنا كيفاش خليها تروح لماليها، كنت رايحة ندخل كي قال هكدا درت ليه قتلو اسمحلي عمو بصح الكلام هدا ما عندو حتى معنى، علي خويا و عشنا في دار وحدة مدة عام و نص حرام عليكم جيو دوك تتهمونب و تطعنو فيا، و إدا على الدار واحد ما عندو الحق باش يحاوزني، ما راني قاعدة عند حتى واحد الدار دار راجلي و قاعدة فيه و لي تقلق مني ربي يسهل عليه ماشي مجبور على معيشتي، قالو اسمعععع أبو صراع هادي لي قالك جات العصر و تحوس على القصر، و زيد شكون لي طعن فيها كي راهي تقول تهمتوني و طعنتو فيا غير و ادا علابالها بروحها.. شوف أبو صراع اشفى على كلامي مليح هادي ما تعيا محبطتلك راسك و تقول حقي ما حقي و تلعب على ولادك..
ناضو يتعايطو الحاج يعيط عليا يقولي ادخلي للدار و علي يدافع و يقول حرام عليكم درتو من الحبة قبة سقسيتها برك وين راهي يما علاش راكم تبهدلو فيها و لا كي شفتو ما عندهاش أهل، كي بهدلو جدو خرج و أنا دخلت للهول نبكي، جات هيام روطار قالتلي وش صرا؟ قلتلها هداك عمهم برك جبت الفيستا..... قاطعتني اخلاص قالتلي يعميلك العينين هداك لي راكي تهدري عليه بابا و تاج راسي قادري روحك خير ما نفسدلك خليقتك قليلة أصل، قلتلها أصلي يشرفك و يشرف عشيرتك ماجيبيش سيرة أهلي على لسانك فهمتيييي.. هوما غير قلت هكدا ناضو ليا انت تشرفي عشيرتنا؟!! ما رديتش .. بقات هيام دافع عليا و دخلتني لشومبرة الحاجة حتى دخلت أم سعد قالتلي ما ديريش هادو دموع التماسيح سبة باش تقعدي نوضي كملي شغلك يلا.. خزرت فيها بنص عين و سكت عليها، قالتلي ماشي راني نهدر معاك؟ و جات ترفدني من كتفي قلتلها ما نيش لاتية بيك أخطيني..طبعتها و طلعت لشومبرتي نبكي، شويا و جات إخلاص دقدقتلي فالباب قاتلي شوفي فيا مليح انا لي تمنيتو و انت جيتي مع لخر ديتيه و الله ثم و الله ما نخليك ترتاحي على كي حرمتيني منو، قلتلها اخرجي منا تشوفي ما رانيش ناقصاتك، حكمتني من حوايجي و تعيط قالتلي اسمعيني ملييييح..قادري روحك خير ما ندفنك هنا ناري راهي شاعلة من تحت راسك، طبعتها و عيطت عليها وخريييي با البايرة وخريييي.. أنا قلت هكدا و تجبد عليا بكف بديت نصوغ دخلت هيام ضاربت معاها قالتلها انت صح ما تستحيش وشنووووو و طبعتها قالتلها و الله و تزيدي تقربي منها غير نخلي سيرتك على كل لسان، قالتلها طلعلك الشان نسيتي و لا نفكرك شكون لي كنتي خدامة لرجليه، قالتلها تع وجهك أنا كنت خدامتك و لا كنتي موسخة و انا نلايم موراك؟ و طبعتها خرجتها من الشومبرة و قعدو يتضاربو برا و أنا طميت شعري و حكمت كوانة و نبكي، عاودت دخلت هيام قالتلي ليليان نوضي احبطي اوقفي معانا على الشغل ما تغلقيش على روحك في شومبرتك و جيبيلي الهدرة و الله راني متحملة غير بالسيف..
مسحت دموعي و حبطت للكوزينة نغسل، كامل كانو لاتيين مع الشغل ما كاش لي سقسى عليا و على وش يوجع فيا، ما كاش هداك لي كنت ادا بكيت يقولي اطلبي وش تحبي برك ما تبكيش ما نحملش نشوف دموعك.
جات ليا أم سعد قالتلي خلي الكيسان و اخرجي للجنان اغسلي القدور، قلتلها بس كاين الرجال برا قالتي طاحت عليك الحشمة روحي اغسليهم ماشي قاعدة هنا غايسة ساعة و انت مع هدوك الكيسان و مخلية نصهم سبك.
خرجت أنا و حنين بنت سعد للجنان و قاعدين نغسلو فالقدور و محمد شايدنا التويو و يڨصر مع ختو حتى انتبهتلو يشوف في صدري كان خارج كي كنت مطابسة و الخمار رامياتو غير على رقبتي، غطيت روحي بلخف، قعد مركز في عينيا هاد الخزرات كنت نشوفهم غير في عينين صراع كي يتمناني..
هو صح جايب روحو و طويل كيما عمومو و باباه بصح صغير عليا فالعمر ملوقتاش كبر و رجع يخزر هكدا بجرأة.
قعدت نشلل قرب مني و أنا قاعدة قالي جيبي تعنكرت فيه قاعد يشلل في بلاصتي و يتبسم و يقيسني نفرت منو، قابلني علي كان يتبع في حنين بعينيه شافني متعنكرة شرلي بحواجبو تع وشبيك؟ خليت كلشي و دخلت و محمد يعيطلي ليليان وين رايحة كملي وش بقى، قالو علي يما عيطتلها و وقف في بلاصتي يشلل، قالو ما دخلش روحك، قالو و انت وش يهمك أنا حبيت نغسلهم، محمد تعنكر في حنين و شرلها باش تدخل، جا نائل قال كملو بلخف يحتاجو القدور و قعد يشلل منبعد عيط قال وحدة فيكم جي ترغونهم راهم غير سبك، درت لنور قلتلها اعطيني عابد و روحي اوقفي مع نائل تعيشي، عطاتني وليدها و ناضت بلخف.
وكلت الطفل و غسلتلو ديتو و رحت للحاجة صبتها متكسلة حست بيا بلي مانيش في حوالي قالتلي وشبيك بنتي؟ قلتلها لوقتاش نقعدو هكدا؟ قالتلي كيفاش محسوب؟ قلتلها علاش ما نخرجوش بدارنا وحدنا غير أنا و ياك و نبعدو على هادو كامل، قالتلي شكون راكي تقصدي؟ قلتلها الحاج أم سعد إخلاص باباها كامل... مانبش حايبا نقعد تحت حكمهم، قالتلي كاش ما صرا؟ قلتلها شفتي عمهم وش دار فيا فضحني قدامهم كامل بلاما درت والو، خسارة ننطعن و ننداس في دار صراع و هو غايب و يجي فلان و علان يعيط عليا و واحد ما يردهم و لا يوقف في عينهم، قالتلي اصبري بنتي برك نبرا و نقسم هاد الدار و نعيش أنا و ياك فيه، و حلا مصيرها لراجلها، قلتلها يعني كاين أمل نتهناو منهم، قالتلي ما تقطعيش الأمل بربي سبحانو بنتي، صراع ماشي أقوى من ربي و يحميك، كيما سخرلك ربي صراع يسخرلك غيرو، لي ما عندو أب عندو رب ما ينسى عبد .. ما تقطعيش لياس المومن مصاب و هادي هي الدنيا  لي يصبر و يتعب و يجتهد و يقاوم ينال.. درتلها براسي إيه كلامها خفف عليا و ريحني نضت بست راسها و قلتلها ربي يحفظك أنت يما، قالتلي الله يوفقك و يبعد شر ابن ادم عليك يابنتي.
ناض يبكي الطفل نضت نمشي بيه حتى نسمع في إخلاص و يماها و ختها يهدرو فالكولوار، قالتلهم يماهم شفتوها كيفاش كانت تعيط و تقول هادي دار راجلي جات مع لخر رجعت دار راجلها و هديك المسكينة لي باع دارها و ذهبها باش يكبر خدمتو دفنها تحت التراب، منبعد جي هاديك الق...  بحضن و حضنين تدي كلشي، قالتلها إخلاص تشد في هداك الخيط في منامها لوكان ما نجنيهاش من هنا ما نتسماش..
يومين منبعد العزاء، دوشت لفوق و حبطت باش نرقد عند الحاجة لخطر وليت ما نرقدش في شومبرتي، سمعت سعد و الحاج و دار عمهم صالح قاعدين يڨصرو فالصالو، سمعت صالح يقول للحاج  أبو صراع راك راضي باش هاد المرا تقعد في دارك؟ قالو الحاج يمال وين تروح؟ ماكاش مرة عيطلي فيها صراع و ما وصانيش عليها، كانت دايمن يقولي بابا عينكم عليها راهي يتيمة، قالو أنا ما قلتلكش حاوزها بصح راهو عندك شباب فالدار نائل و محمد و علي يروحو و يجيو و طايشين لوكان واحد فيهم تعجبو و كاش ما يغلط وش نديرو فهداك الوقت؟ تحصل في ريسانا منبعد الفضيحة، قالو دبرو عليا وش ندير؟ قالو انت لي تشور علينا أبو صراع البراكة فيك بصح خليني نبهك لحاجة الطفلة هادي عينها على رزق وليدك ياك سمعتها بوذنك كي رجعتلي الكلام و قالتلي هادي دار راجلي كي شغل قالتلي أنت تسكت ما عندك حتى كلمة في داري، و أنت سكتت على جال المشاكل، قالو لالا حاشا راسها نقطعو لو كان ترفع عينها فيك تحكم حدها، قالو راني نهدر لمصلحتكم أنا ما رايح يدخل حتى دورو لجيبي بصح أمنو رزق وليدكم ماشي يروح للبراوية، قالو بصح صراع وصاني قبل لا يموت قالي يا بابا وش عندي لبنتي و مرتي عاودهالي شحال من مرة لخطر كان علبالو بلي دايرا بيه الموت من كل جيهة، قالو سعد صراع كتب وصيتو و لا غير هدرة باللسان؟ قالو لالا غير بالكلام، قالو يمال هاد الكلام انساه عندو الحق وش راهو يهدر عمي ديجا راهو نبهي، كيفاش كامل وش تعب على رزقو منبعد يجي خالها دريد لي ماجاش حتى فالجنازة و لا خوها يحي يقعدلك على ركبة و نص و يقول ختي و يديو رزقو للإرهاب
يلزمنا نخليوها تتنازل، قالو الحاج صراع مفقود يا وليدي ماشي ميت باش يتوزع ورثو و يتقسم لا فالقانون ولا فالشرع، قالو يمال ديرنا وكالة هي و يماه و بنتو و حنا نوقفو على رزقو حتى يرجع ماشي نخليوه في يد لي يسوى و لي ما يسواش و إن شاء الله يظهر عايش و يرجعلنا بالسلامة، و إدا ما بانش على 4 سنين لتم نتصرفو، قالهم صالح حلا عندنا راجلها يومين و يرفدها و هو ماشي براوي يماه بنتنا و باباه من عمومنا، قالو سعد لالا عمي حتى حلا و لا حبيت سلام الاعرج يلعب برزقنا؟ قالو دير وكالة لراجلها و تعيش في خير باباها، قالو سعد انا حتى هدا ابن سلام مانيش راضي بيه ملول مافهمتش كيفاش قنعو المرحوم باش قبل يزوج بنتو ليه بصح كامل من تحت راس هيام.
كنت واقفة نتصنت عليهم حتى درت صبت حلا مورايا قالتلي وش كاين؟ قلتلها  و الله يا حلا غير ظلم أنا ما قدرتش حتى نخمم بلي راهو ميت و هوما بكل صحانية وجه راهم قاعدين و يقولو المرحوم و يقسمو فالورث، قالتلي على بابا؟ قلتلها إيه، قالتلي بعدي نشوف هدا لي يهدر هاد الكلام و حنا بابا ما نعرفو عليه حتى خبر، دخلت و قالت وش كاين؟ قالها الحاج ما كاين والو بنتي روحي ترقدي، قالها محمد كلام تع الكبار و الكبار كي يهدرو الشوادا يسكتو و ما يناقشوش، قالتلو يمال اسكت أنت و ما تناقشش، قالها الحاج لالا بنتي عيب هاد الكلام.... مازال ما دورت وجهها و يحكمها محمد من شعرها و يعيط شكون الشادييييي؟ و ضربها لخصرها، ناض يجري جدها و سعد و الحاج باش يسلكوها منو و هو حاكمها من شعرها و يسحب فيها و هي تصوغ و هو يقولها انا تهدري معايا هكداااااا؟ ليوم ندفنك...
طبعو جدها قالو بعد ما زال ما جابتو يماه لي يرفد يدو على حلا مدامني حي، وقف محمد في وجهو و قالو عمبالك مانفهمش انت ما راهي هاماتك لا حلا لا باباها تحوس على كيفاش دخل الدراهم لجيبي منها و طم كلشي، دخلت هيام تعيط رفدت حلا و تقول الله أكبر عليك يتيمة تضربها الله لا تربحك إن شاء الله، عيط الحاج و سعد على محمد و حاوزوه و حلا تعيط و تقول أنا يضربني جربوع كيما هادا و الله غير نقلب الدنيا على راسو، قالتلها هيام خلاص أسكتي بنتي الله يكسر يديه.
عمهم صالح خرج زعفان كيفاش محمد يتجاوز حدودو معاه، شافني قدامو تعنكر فيا و راح، لحقو الحاج يجري موراه، ناضت حلا تعيط و هي تمسح في دموعها قالت قاعديييين يقسمو في ورث بابا بصحانية وجه، عيط عليها الحاج و سعد جا يتلاح فيها، قالتلها هيام وشمن ورث هدا لي راهم يهدرو عليه؟ قالها سعد ما دخليش روحك هيام و خلي هاد الأمور لينا، قالتلو ليكم؟ شكون نتوما؟ ما تحشموش حنا لدوك ما عندنا حتى خبر عليه و نتوما حايرين في دراهمو؟! قالها سعد أنت ما عندك حتى كلمة ما بيناتنا فهمتي ما دخليش روحك فهاد السوجي، قالتلو حلالك الجو في غياب صراع، قالها بلعيييييي كلببببة تزيدي كلمة لسانك نقطعو، قالتلو عطاتك الدنيا دات الغالي و خلاتك تتجاوز حدودك معايا يا سعد... قالها و نكرازي راسك تحت صباطي فهمتيييييي، دخل علي يجري حكمو من حوايجو قالو أنت تكرازي راااااس يما هنا ندفنكككك... و تقابض معاه هيام ناضت تجبد في وليدها و تعيط عليييييي... جا محمد مور علي و ضربو، دخلت نجبد في سعد على علي و هيام تجبد في وليدها و حلا تضارب مع محمد حكماتو عضاتو من ذراعو و هو حكمها من شعرها و يسحب فيها صغت اطلقهاااااا....و نسلك فيها، دخلت أم سعد تعيط و نور حبطت تجري المهم تخلطت حتى دخل نائل ملبرا يجري و يعيط حاوز علي و محمد برا و حكم سعد و عيط علينا نروحو لداخل.
دينا حلا و دخلنا لشومبرة الحاجة حالتنا حالة، هيام ربعت فالقاعة و تعيط وش رايحة نقول عليك صرااااااع دوك ارتحتتتتت كي خليتنا هكدا موراك منين نجيبوك دوووووك، و حلا تصوغ و تضرب فالقاعة جدة دوك تخلقيلي صراااااع نحتاج دوك يجي باااابااااا...
الحاجة قاعدة في البونك و حاطة راسها و دموعها تجري ما هدرت والو و زيد مريضة، نور قعدت معانا و تبكي و أم سعد تعاير برا ما يحشموش يتقابضو مع الرجال..
شويا و دخل نائل قالها هيام ختي عيب هكداك تتجاوزي حدودك مع سعد و زيد راكي طولتي ارفدي ولادك و روحي لدارك أنا نحبط مرتي تخدم الحاجة، قالتلو هادي منك يا نائل زعما أنت المليح فيهم آخرتها تحاوزني يعطيك الصحة يا وليد بابا و عيطت على بناتها يوجدو قشهم، قالها مارانيش نحاوز فيك راني نحاول نحل المشكل هدا، هزت راسها و قالتلو يرحم لي كان يعيطلي أم علي و أنا صغيرة عليه ودموعها تجري على خدها، رحت ليها قلتلها أم علي تعيشي ما تروحيش ما علابالكش بيهم هادي دار صراع ماشي دارهم، قالتلي بعدي من طريقي ليليان دات بناتها و خرجت.
نائل طلع لفوق و أنا قعدت نبكي فالهول، عاود رجع محمد يعيط وين رااااهي دوك تعطيني تلفونها و لا نقتلهاااا و بدا يضرب فالباب تع شومبرة الحاجة حب يدخل دراع لحلا، دار ليا قالي اسمعي انت اطلعي جيبيلي تلفونها، دورت وجهي عليه، قالي وشنو واقيل ما عجبتكش، نضت جيت طالعة حكمني من دراعي قالي شوفي هنا، درت جبدت عليه بكف قتلو بالاك تزيد توشينيييي... حكمني من رقبتي و يخنق فيا و أنا نخبش فيه، أم سعد قالتلو ربيها هادي لي ما عندهاش الأصل، حبط نائل يجري سلكني من يدو دارني موراه و عطاه بدبزة و عيط عليه قالو لوكان تزيد ترفد يدك على مرت خالك راسك نكسرو اخرج منا برااااا ..
قعدت نسعل و نبكي جات ليا نور قالتلي الله يكسر يديه نوضي ختي نوضي قالتلها
ام سعد لالا مليحة ليها خليه يربيها، قالها نائل يمااااا ما دخليش روحك خلااااا هاد الدار ملي نشفالها دايما الدواس و الزڨا ما شبعتوووووش خصنا هم؟! خرجت حلا قالتلو عمو قاعدين يقسمو فورث بابا ترضاها؟ قالها انت حسك ما نسمعوش وجهك صحييييح... ما تحشميش صوتك وصل حتى لبرا، طلعت لشومبرتها تبكي و تقول حسبي الله و نعم الوكيل، عيط عليها قالها و تزيدي تتحسبي راكي حايبا نطلع لييييك، دخل الحاج قالو وين كنت انت خليت الدنيا مقلوبة، عمك راح زعفان من محمد، شاف فيا نائل صابني مازالي قاعدة في بلاصتي و نبكي و نور تحلل فيا، قالي خلاص ليليان ما راني حايب نسمع حتى حس هنايا لي فوق كتافنا ثقيل و نتوما تضاربو..
رحت لشومبرة الحاجة و قعدت قدام بونكها نبكي و هي ساكتة، فرشت قدامها و قعدت نبكي ما رقدتش حتى للفجر...