ආග්‍ර

42.

"කේත් වාහනේ ගන්නවද?"
"ඔව්.අක්කා එක්ක පිටිපස්සෙන් එන්න.මං ගන්නම්"
මං කීවේ යතුර මගෙ අතට අරන්.සුදු අක්කගෙ අතේ බෝලයක් වගේ පොඩි කොල්ලා නිදාගෙන ඉන්නවා.ඊයෙ තිබ්බ රතු පාට බැහැලා.ආග්‍රයා වගෙ.කහ පාටයි.සිනිඳු කෙස්.හීනි ඇස්.හීනි තොල්.තනිකරම ආග්‍රයා වගේ.වාසනාවට සුදු අක්කගෙ කොන්ඩෙ පාටවත් කොල්ලට නෑ.දුඹුරුවට හුරු ඇස් තනිකරම ආග්‍රගෙ වගේ.ගෙදර ගාවින් බැහැලා ආග්‍රයා පොඩි එකා වඩාගෙන ඇතුළට ආවා.ඌව ඇඳෙන් තියපු ගමන් ආග්‍රයා කරේ මාව නාන්න යවපු එක.
"කේත්.නාගෙන එන්න.බබාව අල්ලන්න දෙන්නෙ නෑ නැත්තම්"
ආග්‍රයා මාගෙ පිටට එකක් ගහලා ඌත් ටවල් එක අරන් නාන කාමරේට රිංගුවා.
සුදු අක්කා පොඩි එකා ළඟ ඉන්නවා.අක්කට තනියම නාගන්න බැරි වෙයි.ඒ හින්දා මට පට ගාලා නාගෙන ආවේ ආග්‍රයා අක්කට නාන්න උදව් කරන හින්දා.උන් දෙන්නා නානකන් මං පොඩි එකා ගාවට එබුනා.ළඟට ගන්න බයයි.ලොකු හාමුවත් ආවොත් විසුමක් වෙන්නෙ නෑ.හැබැයි ඌ මුලින්ම ගත්තෙ මගෙ අත් දෙකට.චූටි කොල්ලා ඇස් දෙක බෝල කරන් එහෙ මෙහෙ බලනවා.මට ආවේ අමුතු හැඟීමක්.
මං උගෙ චූටි ඇඟිල්ලකින් අල්ලගත්තා.බෝල ඇස් කරකව කරකව හතර අතේ බලද්දි පොඩි කරන්න හිතෙනවා.තනිකරම හුරතල්.අර පොඩි වුන් අල්ලගන්නවා වගේ ඌ මගෙ ඇඟිල්ලෙ එල්ලිලා ඉන්නවා.ඕනෙ රෙද්දක් කියලා මං පොඩි එකාව දෝතට ගත්තා.ඌ හෙන පොඩි.ආස හිතෙනවා.ඊයෙ වගේ කැත නෑ.මං ඌව හරහට අරගෙන මූණට හාද්දක් දුන්නා.
"සුදු මහත්තයා.බඩගිනිද.අම්මා කුක්කු එනකන් ඉන්න හොඳේ."
ඌ මං දිහා බලනවා.රැවුල පොඩ්ඩගෙ සිනිදු මුනෙ නොවැදෙන්න මං උගෙ නහය උඩින් හාද්දක් තිබ්බා.
"අප්පච්චි බබා එනකන් හුඟාක් කල් බලන් හිටියා මැණික.ලොකු වෙලා අප්පච්චි ගාවම ඉන්න ඕනි තේරුනාද."
මං කීවේ උගෙ නළලට හාදුවක් තියලා.පොඩි එකා ළඟ කිරි සුවඳ වෑහෙනවා.මං ඌව අරන් ඇඳෙන් තියද්දි අක්කයි ආග්‍රයයි කාමරේට ආවා.මං එළියට ආවේ උන් දෙන්නට කතා කරන්න දීලා.මෙච්චර කාලෙකට වලව්වෙ නොතිබ්බ අමුතු හැඟීමක් මට දැනෙනවා.ඒක හරිම උණුහුම් හැඟීමක්.මුළු පපුවම අමුතු සැහැල්ලු දෙයකින් එතෙනවා වගේ.මං එළියෙ බංකුවේ වාඩි වෙලා ඉද්දි ආග්‍රයා මං ළඟට ආවා.