الحلقة 1
حبست الطوموبيل قدام الكاراج تاع الفيلا وباينة بلي مولاها كان مزروب...كلاكسونا شحال من مرة لوين حل العساس الباب تاع الفيلا لكان انسان كبير... جبد روحو مطريق باش تدخل الطوموبيل وهو حاير في حفيد المعلم تاعو كي شاف الحالة لي روح بيها، يبان مقلق ووجهو مظلم تحسب جايب الموت فوق كتافو...دخل نضال بالطوموبيل المرسيديس كحلة فومي عافس للخر وڨاراها فلقاراج وهبط منها وخبط الباب....باش نتعرفو على البطل الشباب تاعنا 😍 نضال هو الحفيد الذكر الوحيد في عايلة "يحياوي" وهي عايلة كبيرة ومعروفة فالشرق وعندهم الدراهم بزااف، وهو لي رجع مسؤول على شركة العايلة بحكم تربى على يد جدو "يعقوب"، وخدا طبايعو ورجع انسان سيريو بزاف، لدرجة نادرا مايضحك ولا تشوفو قاعد بلا شغل، ديما يخدم ويخمم وهاز مسؤوليات كبار فوق ظهرو ملقري عمرو وحد وعشرين سنة برك، وهاذا لي خلا جدو يعزو ويخليه ديما في جنبو...وملقري صغير بصح عندو زين قتااال 😍 تقدرو تقولو مكانش وحدة مشافتوش معشقتش فيه،بصح هو مكانش حاط راسو فلحوايج تافهين هادو، حياتو كاملة غير خدمة ملي عرف صلاحو، زيد عندو وحد الكور والكاريزما وش نهدر وش نخلي 🥵🥵 عندو زين الرجل الشرقي، بشرتو سمرا، وعينيه لي لونهم لون لعسل كي تضرب فيهم الشمس ويادلالي سبحان الخالق فيهم كحل رباني تحسابي مكحلهم وشفارو غاثيين وطوال، وحواجبو كحل، ديما ضارب تحفيفة شابة لشعرو لكحل، بلا مننسا الحطة واللبسة لي تزيد فيه النص...لاعلينا نرجعو لحكايتنا، نضال تربى يتيم ملي كان في عمرو خمسة سنين، من نهار باباه "مالك" وأمو "وسيلة" توفاو في آكسيدون، الشي لي خلا جدو يربيه ويتكفل بيه، رباه وخلاه يوالف غير على الخدمة..ينوض ويرقد بيها...وتخمامو غير في شؤون العايلة، وطبايعو رجعت خشينة وجافة، رجع نظال صورة مصغرة على جدو، وهاذا الشي خلا بزاف ناس يحترموه ويقدرو شخصيتو ويحسبولو الف حساب..دخل نضال للفيلا هايج وفي قلبو هاز ضيق كبير، بصح رجليه ثقالو وهو ماشي جيهة الشمبرة تاع جدو، مهوش عارف كيفاش يوصلو هذا الخبر الصعيب...طبطب فلباب ودخل، عينيه رجعو تقريبا كحل وهو يشوف مع جدو لي كان فوق السجادة حاكم السبحة ويسبح بيها وعينيه مغمضين، دخل يمشي بشوية ووقف يستنا فيه باش يفيقلو، وعقلو في دوااامة معارفش كيفاش يهرب من تخمامو وكيفاش يوجد لهدرة لي راح يهدرهالو. حس بجبل هازو فوق ظهرو، وبيد حامية تزير على قلبو ومش عارف كيفاش يدير اول مرة في حياتو يتلخبط كيما هكا، اول مرة ميعرفش ساسو من راسو، ولا كيفاش راح يقدر يبعد لغمامة لكحلة لي ظهرت فوق روسهم كامل...
تابع الحلقة الاولى:
هز لوخر راسو بعد دقايق حسها نضال سوايع فاتت عليه وهو واقف وسط الشمبرة.. خير يا نضالل ؟ وش جابك للدار على بكرة ؟..قرب نضال منو وهبط على ركبتو وين سلملو على راسو: صباح الخير جدي وش حوالك؟...خزر يعقوب فيه وهو حاير وتمتم هز صوتو وهو مقلق..وش خصك يانضال؟ خليت الخدمة في الوقت هادا وجيت باش تسلم عليا وتسقسيني على حالتي؟..بلع نضال ريقو وحس بالشوك في حلقو، وتاه في تخمامو وين زاد يعقوب تقلق كثر...هات وش عندك يانضال !!!..تنهد نضال تنهيدة من قلبو، وقرر بلي احسن حاجة هي المواجهة والباقي على ربي، هز عينيه وخزر في جدو وقالو:جدي نت راك انسان كبير ومومن، وترحب ديما بالحاجة تاع ربي سبحانو... تمتم قاطعو يعقوب..راك تمعني على عمك نور الدين ؟ راه مريض ؟...ولا...وسكت ومقدرش يكمل هدرتو..تعجب نضال منو ومن الفراسة لي عندو، وسبحان الله لي يقلك الوالدين يحسو بولادهم، هاداك لقلب لي يحس بحبابو ويخاف عليهم، ديما كاين رابط بيناتهم وحتى وين يكونو متباعدين، بصح ديما قلوبهم مترابطة وتحس ببعضاها...نتما وين زاد نضال ضاق صدرو وحس بسخانة تاع الدموع في عينيه...هبط راسو وهمس بشوية وهو مش قادر يواجه جدو في موقف صعيب كيما هادا: دايم الله ياجدي!!!..وقف "يعقوب" والدنيا دور بيه، حس بقلبو حبس دقيقة منبعد رجع يخبط بالقوة لدرجة حس بجسمو كامل تزعزع، حتى مال وقريب طاح وين زرب نضال حكمو وعاونو باش وصل لاقرب كرسي...همس وفي صوتو كسرة جامي سمعها نضال في حياتو كاملة...وشنو؟ كيفاش؟؟...ضغط نضال على عينيه باش ميخليش دموعو يطيحو وحاول يتحكم في اعصابو...وثاني محبش يدخل فالتفاصيل بزاف مع جدو وزرب جاوبو..لازم ترتاح ياجدي خليني نعيط للطبيب يجيك...بصح "يعقوب" تمتم قاطعو ومخلاهش يكمل وعيط عليه بعصبية...جاوبني يانضال...كيفاش مات؟ آكسيدون؟؟؟...عاود نضال تنهد بالقوة...لالا كنا كيف كيف في اللوزين وحس بوجاع في كتفو الايسر...كي نصحتو يروح لسبيطار رفض وطلب مني نوصلو للدار...وفطريق....سكت مقدرش يكمل هدرتو....خزر في جدو وين كان قاعد فوق الكرسي وحاكم عصاه...كتافو هازين هموم الدنيا بصح جامي مالو...وتعجب كيفاش راجل يتحمل خبر موت ولدو لثاني مرة ويبقا راسو شامخ وقلبو صامد بالطريقة هادي...قعد معجب وحاير فيه لوين سمع جدو يتمتم..."إنما الصبر عند الصدمة الأولى"...رد عليه نضال...صدق رسول الله عليه الصلاة والسلام...سكت شوية منبعد ناجاه...جدي!!!....رجع يعقوب يحكي معاه بالرزانة...نضال يابني..ليوم نتكل عليك...لازم تفض كلش قبل المغرب...عمك عبد السلام مينجمش يتكفل بكلش وحدو...متخممش ياجدي تهنا وخليها عليا...بصح راك سور متحتاجش للطبيب ؟؟...لالا مش لازم...متنساش تعيط لعمتك رقية...خلاص درك نعيطلها. وخرج مزروب باش يلحق يوجد للجنازة ويكمل كامل الاوراق لي مطلوبين...وكمل خبر جميع افراد العايلة تاعو....
