الحلقة 105:
وطاحت على ركايبها للرض تبكي وتشهق بحرقة تحسب بركان ثار في صدرها، هبط حمزة عندها باش يضمها لصدرو وريح راسو فوق راسها بغصة تاع بكا (وجدان ربي يعيشك...خلينا نبداو ملول وجديد...وننساو كلش فات...) هزتلو راسها مدهوشة في دموع لي سالو من عينيه، وقالتلو من بين شهقاتها (لالا...لازم نوضحو كلشي...منقدروش نبداو ملول وجديد وكاينة ديما حاجة تجبد فينا لورا) حطلها وجهها بين يديه ومسحلها دموعها (أني عارف!!) شهقت مصدومة (عارف؟!...كلشي؟!) هز راسو بمرارة (كلشي كل حاجة كنتي باغية تخبريني بيها، بصح غروري مخلانيش نسمعلها، خوفك في ليلة الدخلة، وخزرتك الضايعة وحنا مع بعض، فهمت درك، فهمت كلش، وهدي مهيش الغلطة تاعك) دزتو بعيد عليها ورجعت تعيط بعذاب (كيفاش ماهيش غلطة تاعي ؟! أنا لي غلطت لولة، أنا لي بعدتك عليا وخليت لفرصة لمرا خلاف تجود عليك بواش منجمتش أنا نمدهولك) وقف هو وسي باش يواجهها (معليهش، في زوج غلطنا، بصح نقدرو نصلحو الأمور، حنا لي نتحكمو في حياتنا ماشي واحد خلاف) هزت راسها بعجز (مهيش بالساهل،مهيش بالساهل) رجع حط وجهها بين يديه والدموع يسيلو من عينيه (أنا غلطت وغلطت بزاف، نستاهل السب ونستاهل كلشي تقوليهولي، بصح فراقك منجملوش ياوجدان، ن%% أمـ&% غير نتبع طريق العوجة وواحد مراح يمنعني غير نتي، والله ماني سامح فيك لآخر نفس من عمري، أسمحيلي يا وجدان خلينا نبداو ملول وجديد وصدقيني راح نعوضك على كلش) كي شافها عصرت عينيها ووجهها تقبض، كمل يحكي ( صح راح نلقاو مشاكل بزاف، بصح يستاهل، زواجنا يستاهل، أنا باغيك غير نتي، وتطلعي لر&% وتنزلي مراح تكوني مع حتى واحد من غيري، مالا الحل الوحيد خلينا نصلحو حياتنا ونبنيو زواجنا على ساس صحيح المرة هادي) سقساتو بحيرة...(كيفاش؟!!) (درت ليروشارش بزاف وقدرت نعرف واش لازم نديرو لحالة كيما تاعك) قاطعتو وين تبسمت مابين دموعها (كنت فالشركة؟!) (وين تبانلك كنت؟!؟؟..خبرتك..مكانش مرا من غيرك) كي شاف شواربها رجفو كي الطفلة الصغيرة متأثرة بهدرتو، ضمها لصدرو حتى نجمت تسمع صوت دقات قلبو، وهمسلها بعشقو الكبير ليها (مستحيل راح نسمح فيك ياوجدان، باش نصلحو حياتنا حاجة ساهلة، بصح باش نلتزمو هي لي صعيبة) بعدها شوية وقالها متردد (حبي عارفة بلي الخطوة اللولة لي نديروها هي لازم نروحو عند طبيب نفسي) (إييه عارفة، ماما تستنا فيا نردلها لهدرة باش تحكملي رونديفو عند طبيبة تعرفها) تنهد براحة كبيرة بعد ماهونت عليه نص الطريق، وقعد يشكر في قلبو خالتو جنات لي كانت تعاون فيه، تبسم بفرحة (ريحتيني بزاف!!) رمات روحها على صدرو وكملت تبكي، رجع يعلق (نتي بغيتيني بزاف لدرجة سمحتيلي نجرحك باش متكونيش نتي لبادية، كيفاش باغيتني نستغنا عليك؟!) هزلها راسها وخزر مع عينيها بحب كبير ومال على شواربها باسهم بوسة خفيفة بعد ما حس بثقل وهم كبير ينزاح من قلبو، وهي لي كانت حاسة روحها طير وتحرر من قفصو، بعد ماعرفت بلي ملازمش تهرب مليوم فصاعدا، هي برك تحتاج للدعم والحماية ولامان والحب...بزااف حب...وهو لي مراحش يبخلهم عليها!!..
