أهلين حلوين
كيفكم
اتمنى تكونو بخير
تفاعل بليز
بسم الله فلنبدأ:
الحلقة 90:
رمات ندى روحها في حضن أمها مع شافتها داخلة عندها للشمبرة وطرطقت بالبكا، ونضال غير يخزر فيها بقهر يعض على شواربو وشاد روحو على شعرة باش ميطرطقش، وهو واقف جنب باباها!! سقساتها جنات مقلقة (وشبيك يا ندى؟! نضال طمنا على حالتك هاذا وين، علاش راكي تبكي؟!) (ماما باغية نروح معاكم) هز نضال صوتو وعيط عليها (ندى!!!!هذا وش تفاهمنا عليه؟!) هزت ندى عينيها الحمر ليه وقعدت تخزر فيه، هازة بحر تاع لوم في قلبها، حكمت جنات وجه ندى ورجعتو ليها (وش صرا بيناتكم؟؟) تلفتت لنضال وعقدت حواجبها بغل (محذرتكش من قبل بلي إذا هملتها نجي نديها يانضال) شارتلو براسها لندى لي قاعدة تبكي في حضنها (هاذي هيا لي تقلي نتهلا في الأمانة لي خليتيوهالي...ها؟!) نهرها عبد السلام بلين (جنات خلينا نفهمو الموضوع قبل، ياندى حبسي البكا أبنتي وفهمينا وش صرا) هزت ندى يديها ومسحت دموعها كي الطفلة الصغيرة، الجاسث تاعها خلا قلب نضال يرجف بين ضلوعو (ياربي باغي نهبل!!!) همس مع روحو بقهر، كي قعدت ندى ساكتة بلا متجاوب باباها، نفس الشي لي دارو كي سقساه عبد السلام نفس السؤال، ووقف عاقد ذرعيه على صدرو ويخزر فيها بالغش، الشيء لي خلا دموعها يسيلو ملول وجديد، تحرك من بلاصتو يمسح في وجهو بيديه ويتمتم (ياربي وش ندير؟!!) برقو عينين جنات بشفقة على حالتو، بصح تمتم دستها وقالت (تبانلي الحمل أثر على أعصابها، خليها تروح معانا ترتاح يومين وكي تهدن ترجع) (لالا خالتي ندى بلاصتها في دارها، بصح نطلب منك بعد إذنك أعمي باش تقعد معاها حتى ترتاح و..) قاطعتو ندى بعصبية (الدار ماهيش داري، را.) مخلاهاش تكمل جملتها وهز صوتو عليها (لالا دارك...ياك كان شرطك تكون عندك دارك وحدك...؟!!) (إييه!! بصح مطلبتش تسكن فيها مرتك الصحابية معايا هي ثاني) نهرها عبد السلام (ندى!!!) تلفتت ليه بعد ماقريب نسات بلي كانو واقفين معاهم، وتمتمت بالشوية (بابا خرجني منا) تحرك نضال بزربة وشدها من ذراعها بعنف، حتى تخطفت جنات لي كانت باغية تدخل لوكان ممنعهاش راجلها، وهز نضال صوتو مرة خلاف (كنت عند كلمتي معاك ونفذتلك شرطك، ونقسملك بالله الشي لي صرا وراها مكانش مقصود، بصح هذي دارك ملكك يا ندى) حلت ندى فمها معاه (داري..ملكي..وش تقصد؟!) نطق باباها (يقصد بلي الدار هادي على إسمك يا بنتي، نضال حطها على إسمك ثاني نهار كي زارنا باش يسمع شروطك) (ثاني نهار؟! قصدك قبل منتزوجو؟!) نضال (إييه الدار مسجلة بإسمك، وإذا راكي مكذبتني لوراق أم عند عمي، إلا باغية ترتاحي شوية أنا لي نخرج منا مش نتي، قتلك أنساي تخرجي مالدار) نفضت ندى راسها مشوكيا (مانيش فاهمة ؟!مانيش فاهمة..؟!)، بصح صدمتها متجيبش النص من صدمة ليلى لي كانت واقفة عند الدروج، بعد مانزلت تتجسس على وش خلا طوموبيل تاع عبد السلام تقاري قدام الفيلا، متمنية تسمع بلي الطبيب خبرهم بموت الطفل، بصح مع سمعت خبر بلي الدار ملك ندى حتى حست بالبرق طاح على راسها (ياربي، ماهيش راح تفض المفاجآت خلاص؟!) والشي لي زاد كمل على الباقي وين كانت تسمعو يقولها بلي مستحيل يخليها تخرج حتى وإذا خرج هو وخلاها ترتاح فيها، ومنجمتش تتحمل كثر حتى هبطت تجري وزدمت عليهم للمرة الثانية تعيط بعصبية (نضال وش هدا لي سمعتو؟!) تلفت نضال عندها، وهربت ندى تخبي في روحها وراه شادة كرشها بيدها واليد لخرا حاطتها على كتف نضال، الشيء لي خلاه يحس بالراحة، بعد مخيرتو هو باش تطلب منو لامان، ومخيرتش والديها لي كانو حاضرين معاهم، عيط على ليلى بغل (ليلى..!!رجعتي درك تقرعجي على البيبان!؟!) بلعت إهانتو وعاودت سقساتو (صحيح وش سمعتو؟!الدار هادي ملكها هي؟!) تنهد بحرقة و تلفت لندى وين حط وجهها بين يديه وقعد يهمسلها (ندى..ربي يعيشك..أوعديني باش متخليش دارك، أوعديني قبل بلي راح نحكيو، بصح درك راني باغي نحكي مع ليلى ونوضحلها شوية أمور) (راح تخليني وتروح عندها هي؟!) (ياربي...بجاه ربي والنبي..أوعديني متخليش دارك..!!!) قعدت تخزر في وجهو من ورا غمامة تاع الدموع، حتى تحرك لسانها بلا متفيق (نوعدك!!) سلملها على راسها، وتلفت عند عمو باش يستأذن منو، منبعد تلفت عند ليلى لي شارلها براسو باش تبعو (أمشي وراي للبيرو عندي هدرة معاك..!!)..
