الحلقة 26 :
عدات في راسو لقطة للصاروخ الصغير لي خبط فيه كي كان خارج للقاراج وين زرب حكمها قبل مطيح وين تفكر بلي المسلسل هادا جاز عليه من قبل...بشعرها الطويل لي يفرفر وراها كي الراية...وعيونها لكبيرة الضاوية كي عينين القطة...منين هزت عينيها ليه بخزرة ماضية فكرتو بخزرة جدو منين يتقلق...رمش بعينيه...منبعد حس بيها تزلق من مابين يديه...ودارت خبطتو بموجة من شعرها على وجهو خلاه يسكر بريحة الخوخ لي فيه...وشافها تجري من ورا ختها وهي تعيط عليها بالصوت....
(ندى..!!!)....
شاف فيه جدو وضيق عينيه...(راك تسقسي ولا تجاوب ياولدي؟)...
فاق نضال من تخمامو وطلع حواجبو وهو يخزر مع جدو...(كيفاش؟)..
يعقوب (راك قلت إسمها ومقدرتش نميز الا كنت تسقسي فيا ولا راك باغيها هي ياولدي)...
تمتم عاودت الصورة تاعها لمعت مابين عينيه...حتى وين هز راسو وحطها في فم المدفع وقالها ديراكث...(ايه ياجدي ندى لي باغيها تكون مرتي...!!)..
فاق نضال من تخمامو كي حس برماد تع القارو طاح على يدو...نفضو ليه ليه وضحك على روحو...زعما يكون شعل الحرب في دارو بعد مخيرها هي باش تكون مرتو الثانية...خاصة هي بطبعها المتهور ولسانها الطويل...ضحك شوية....يادرا كيفاش رجعت هاديك الجنية درك ؟...مازالت على طبعها ولا تبدلت؟؟....نتما وين جاه سؤال في راسو...علاه هي بالذات؟ سقسا نفسو وملقاش جواب....علاش مش اختها الكبيرة؟...حمد ربي كي قبل جدو قرارو بلا ميسقسيه علا السبب..لانو هو نفسو معارفش علاش...نبهو صوت ليلى لي دخلت للبيرو تاعو بعد ماكان غايس ومافاقش حتى وقتاش رجعت...
نضال(مساء الخير حبيبتي..علاش طولتي؟)..وتبسم وهو يقرب ليها...خزرت فيه مقهورة...
(قلقت عليا ولا راك مقلق على جوابها وش راح يكون..؟)..قرب منها وحكم وجهها بين يديه ومسح بصباعو على خدودها بلحنانة...وعطاها وحدة متبسيمات تاعو لي تقتلها...(هذي غيرة ياليلى؟)
ليلى (علاه لازم نغير؟)...لعبت معاه لعبتو ومحبتش تعترفلو وتفتحلو قلبها كيما والفها هو يدير...قرب بشوية وحط شواربو على شواربها وضغط عليهم بالشوية حتى وين تنهدت...
نضال(مش لازم الغيرة..!راكي عارفة معزتك وقدرك عندي...) بعدت شوية عليه وتقوسو حواجبها بقنطة لي حكمتها في قلبها...وهدرت في سرها....ايييه يانضال!!!!ياريتك تنطق سيرة الحب قدامي وتهنيلي قلبي لي مشتاق يسمعها منك عوااام هادو كامل....ولا كي عاد مكانوش أصلا في قلبك من جيهتي؟؟...جاوبتو بكسرة في صوتها...(ايه علابالي..!!)
نضال (أهيه...علاش قعدتو لدرك؟)...جاوبتو بعصبية كي تفكرت وش صرا...(ايييه كيفاش منتوخروش ولالة مولاتي قعدت تتكسل في شمبرتها ومحبتش تخرجنا)...شاف فيها مدهوش وقعد هكذاك حتى وين فاقت مع روحها وضحكت فوق القلب...(نضحك برك، بصح اك عمبالك، عروسة وتدلل ومن حقها)...هدرتها بخشونة وكملت (بصح الا تسنا في جواب نهائي اسمحلي منجمش نعاونك)
ضلمو عينيه لثانية منبعد رجع لبرودة اعصابو وضغط على سنانو وهو يسقسي فيها (رفضت؟) ..خزرت فيه وتمعنت في عينيه وين كانت راح تهبل بش تعرف في وش يخمم، وسقساتو بالشوية (علاش...كنت راح تتغشش اذا رفضت...؟؟)
(ليلى!!!!)
بعيطة وحدة سكتها وخلاها ترجف في بلاصتها، خلاص بدا يتقلق ماللعبة لي راهي تلعب فيها معاه، تمتم جاوبتو (قالت باغية تحكي معاك قبل متقرر)، خزر فيها نضال محير، وبقا يطلع ويهبط حتى وين خاف تطلب منو يطلق ليلى، نتما وين كملت ليلى تستهزا (تبانلي عروستنا الصغيرة عندها شوية شروط!!)..
