الحلقة 97:
دخل حمزة لشمبرة ندى، وين كانت وجدان قاعدة فوق الفوثاي، مزيرة رجليها لصدرها ودموعها يسيلو كي الشلال، ويدها شادة بيها ثيليفونو، شوفتها في الحالة هادي خلات الزلزلة تضربو في قلبو، حاسس بقهرها وكسرة خاطرها بسبابو هو، وماهوش عارف كيفاش يقدر يصلح واش فسدو بلحظات تاع طيش، سب روحو وغبائو لي مخلاوهش يفاصي ليفوطو من ثيليفونو، لي تكون شافتهم حبيبتو وربي لي عالم وش راهي تخمم فيه درك، همس بضعف (وجدان!!) هزت عينيها ليه فيهم بركة تاع دموع، وهزت يدها قدامو (ثيليفونك...مقصدتش...مقصدتش نشوف...نحوس على ليفوطو) قرب منها بزربة ومد يدو يمسحلها في دموعها، بصح قبل ما يمسها نفضت روحها بعيد عليه وهزت صوتها (بعدني متمسنيش) عيط بعذاب وحرقة (وجدان، إسمعيني، راكي فاهمة لحكاية بالغالط) تبسمت بين دموعها بقهر كبير (فهمت؟! ماني فاهمة والو...أني باغية غير نطفي عقلي حتى ننسا الشي لي شفتو في ثليفونك) (وجدان.!!أعطيني فرصة نبررلك ربي يعيشك) (فرصة ؟!!) سكت شوية وطرطرقت تعيط بالصوت لي عندها (خبرني وين وصلت معاها في علاقتك؟!) كان ناوي يحرك لسانو باش يجاوب، بصح مستحيل تنجم تسمعها منو، تموت قبل مينطق بيها قدامها، شارتلو باش يسكت ونفضت راسها كي المهبولة (لالا...متجاوبنيش) ناض يعيط عليها (وجدان!!..الموضوع ماهوش كيما راكي متخيلتو...علابالي غلطت بصح والله...) ناضت من بلاصتها( ماشو كيما متخيلتو؟!...قصدك خيانتك ليا...وجرحك لقلبي سوء تفاهم وموضوع ساهل ياك؟!) سكت يخزر فيها بخزرة مقتولة، حتى سقساتو (حبيتها؟!) جاوب بزربة (لالا...عمبالك بلي منبغيك غير نتي) تبسمت باستهزا (إييه باينة عليك!! ومطلوب مني نسامحك ونغفرلك بعد ماخبرتني بالشيء هادا؟!) قرب منها باش يواجهها بصح منع روحو باش ميمسهاش كي شاف خزرتها الماضية (راكي تستهزاي بالحب لي بيناتنا؟!) (الحب لي تحكي عليه ممنعكش باش متخدعنيش) على غفلة شدها من ذرعيها وعيط عليها بعنف (ما خدعتكش يالر%$%...نقسملك بلي...) نفضت روحها من ذرعيه وعيطت هي ثاني حتى بانو عروق رقبتها (حتى خزرتك لوحدة غيري تتسما خيانة) عيط بخنقة في صدرو وعصبية لمرة هادي(حبسي ياوجدان حبسي متلعبيها ضحية، متامنيش روحك بزاف بلي راكي مظلومة، كنتي عارفة بالشي هادا ملول) قعدت وجدان باهتة فيه كي بدا يكشف فالاوراق كاملة، الشي لي خلاها تعيط عليه بعصبية هي ثاني (بصح تشوكيت، تشوكيت مالنيفو لي هبطت ليه) (نيفو!!!!وجداان !!حبسي يا ر&%& أنا..) (أنت وش؟!!... كنت تروحلها يوميا..كنت تشوفها وتحكي معاها...تتبادلو ليميساج...إييه شفتهم، فلول مكنتش متعمدة نفتش ثيليفونك، بصح مقدرتش نقاوم نفسي بعد ماشفت هادوك ليفوطو، أنت كنت عايش حياتك معاها طول وعرض) شدها من ذراعها ونفضها (إييه، معليهش نعترف بالشيء هادا، بصح مانيش عارف علاش تلومي فيا غير أنا برك، ياك كنتي متبعة علاقتي بيها ومتحركت منك حتى شعرة) (أنا!!! تلومني أنا على خيانتك؟!) (قتلك أنا مخنتكش) (تبانلي راك تستنا مني نتجاهل خدايمك، باش تمد لعذر لروحك وتكمل خيانتك...ياك؟!) (كي عاد راكي تخممي بلي خيانتي مسألة وقت برك، علاش قاعدة مع راجل خاين كيما أنا؟!) خزرت فيه بخزرة مذبوحة وهمستلو بضعف (خاطر أنا بهلولة وقلبي طايح فيك) عيط عليها بقسوة (علاش لازم عليا نقبل بلاريبونص هادي؟! ونتي لي هادا وين كنتي تستهزاي بحبي ليك؟!؟ ووش درتي باش تحافظي على هذا الحب...أنطقي؟!) هزها بين ذرعيه بعنف حتى هبطت دموعها (علاش قلبك قاسي هكذا؟! من واش راك مخدوم؟!، راك تهاجم فيا درك؟!..وأنا لي كنت حاسة بالذنب ونسايس فيك كي البيضة باش منجرحكش ومنهينكش) وهزت صوتها شوية (درك راك تلومني، إيييه معليهش، حتى أنا نلومك...نلومك على ضياع حبي وضياع حلمي) كمل ينفض فيها (تلوميني؟!!! أفطني يا الز%$% أفطني...الشيء لي رانا فيه درك هو خيالاتك لي عايشة فيهم لي تخليك تنفري مني، خاطر بسبابهم بانتلك الجنس حاجة توسخ رومانسيتك العذرا) طرطرقت تبكي وتشهق من كثر القهر لي ضاغط على صدرها ونفضت راسها تعيط بالصوت (لوكان غير جيت تعرف بلي راك غالط...غالط...أنا منخممش هكذا، العلاقة لي راك تحكي عليها هي صلة روحية قبل متكون جسدية، حاجة دارهانا ربي سبحانو باش نتقربو بيها من بعضانا كثر، بصح في كل مرة نكونو فيها مع بعض، كنت نحس روحي قاعدة غير نبعد، عمبالك علاش؟!، خاطر مكنتش نحس بيك، كنت نعجز نمدلك مشاعر المرا لي تعشق في راجلها، نعجز نحبك بالطريقة لي راك باغيها نت) سقساها وهو باهت فيها (وش تقصدي؟!، وش معناها الهدرة الغامضة هادي؟ !كوني صريحة وبركاي متلفي ودوري في هدرتك) عيطت عليه تقولشي كانت تطيش في همومها وأحزانها دفعة وحدة في وجهو (أنا منحس بوالو وأنا معاك...بين ذرعيك...كاينة حاجة ناقصة...دايما كاينة حاجة ناقصة...) حطت يدها على شواربها مشوكيا بعد ما فاقت مع روحها بلي باصاث ليليميث، الشي لي منجمش يتحملو حمزة وتمايل للورا تقولشي ضربوه بالرصاص لصدرو، مشوكي من واش سمع وفهم، خزر فيها بعينين شاعل فيهم الغش، الغش على كرامتو...على رجولتو المجروحة...عليها هي...وعلى كلش خبرتو بيه درك...
