الحلقة 104:
حكمو بيد وحدة وبلع ريقو بعد ما تأملها باللوك تاعها لي خلا ريقو ينشف ولعرق يسيل على طول ظهرو، هو صح كان مدهوش كي لقاها في الدار، خاطر مكانش متوقع يلقاها هنا تستنا فيه، كان باغي غير يكسل روحو يرتاح ويرتب أفكارو، منبعد يروح عندها باش يقررو مصير زواجهم ولا شحال لازم كل واحد فيهم يتنازل باش يقدرو يمنعو حياتهم، ويديرو حل للشي لي كانت وجدان تتهرب منو لشهور، بصح مكانش لازم عليها تصعبهالو هكذا اليهودية، زير على سنيه ومسح على وجهو (ياز%$% واقيلا باغية تقتلني وتحبسلي قلبي؟!!) بلع ريقو وباش يسيطر على نفسو رجع لاسلوب الاستهزا (أصلا تريكو هاداك خامج لازم يتغسل!!) عيطت عليه بخشونة (أحرقو منسحقش نزيد نشوفو قدامي) طيش تريكو من يدو وتحرك في الشمبرة، تلفت ليها يسقسي ويدو تشير ليها ملفوق لتحت وحاول جهدو باش ميبينش شحال كان متأثر بيها (وش درتي لروحك؟!) عقدت وجدان يديها على صدرها وقعدت على حافة السرير حاطة رجل على رجل ونويزات تحصرت على فخدها حتى لفوق خلاص بطريقة خلات عينيه يظلامو (بدلت اللوك تاعي، ياك هذا هو اللوك لي يبغوه الرجال؟!) عيط عليها حمزة منارفي (وجدان هدرتك مزالها ترن في وذني) قررت تواجهو هي ثاني، طارت تجري بهياج للتريكو وهزتو قدام وجهو تبينلو فلبقعة تاع الروج ( عارفة وين كنت ليلة هادي...مالا مطيحش عليا فيكتيم!!) حل عينيه معاها مشوكي، معناها كانت عارفة بلي راح عند حنان، وبالرغم مالشيء هادا رجعت لدارها، رجعتلو، زعما كاين بصيص أمل للعلاقة هادي؟!! سقساها بحيرة (علابالك بصح راكي هنا) همست بكسرة (إييه راني هنا!!) همسلها هو ثاني بندم وهم كبير (قادرة تغفري يا وجدان؟!) طاحو يديها على جنبها وين خلات التريكو يطيح فلرض ورجعو دموعها يسيلو (مانيش عارفة!!) (وين رايحين بيها وجدان؟!) نفضت راسها(مانيش عارفة) (بصح راكي هنا) هزت راسها بعجز (راني هنا!!) تحرك باش يقرب ليها، وحاول يشد يديها بصح تمتم طرطقت فيه تعيط بغل كبير (متمسنيش، بعد الشي لي درتو معندكش حق تزيد تقرب مني، راك تماديت بزاف) ضربتو على صدرو ضربة قوية، وعينيها حمارو بسباب دموعها وغشها، بصح محطش بالو مع حالتها وصيدها على غفلة ولصقها فيه مزير على يديها حتى شلهملها وهمس بعذاب (عارفة بلي مدرتهاش) رجعت الدموع تسيل كي الشلال، وتخنقت بسباب شهقاتها كي طرطقت بالبكا في وجهو (عمبالي...) هز يدو وشدلها راسها ملورة وحط خشمو على خدها يهمس بخشونة من كثر هياجو عليها (بصح معارفاش وش ديري فيا كي تكوني قريبة مني!) هزت عيطة حتى قريب طرطقو عروقها (بعدني!!) وتلاحت تضرب في صدرو ودز فيه بهستيرية مكانتش منجمة تسيطر عليها، تتخيل فيه مع حنان يبوس ويعنق فيها (بعدني بعدني منسحقكش!!! كرهتك...)
