الحلقة 53:
فاتت يامات كي الجنة على ندى ونضال، بعد ما حكمو دار صغيرة مقابلة لبحر قدقد، وكان لوقت في سبتمبر وين مكانش لغاشي بزاف وليبلاج تقريبا فارغين، وملقري الدار كانت صغيرة ومتتقارنش مع دارهم، بصح اِعتبرتها ندى كي العش الخاص بيهم وشحال كانت تشوف فيها مملكة تاعها وين تحكم فيها وتدير وش تحب، نضال كي شاف الفرحة في عينيها حس بالرضا ومام هو ثاني كان عايش يامات شابين بزاف معاها، وين كانت ديما تضحكلو ضحكة لي تفتنو بيها وتدلل فيه كي الطفل الصغير، ملقري كان يخليها في الصباح ويروح يفري شغالاتو لي جا باش يكملهم، وكي يرجع للدار يلقا كلش مفروز ولغدا طايب من يديها كي العسل ضاربتلو الحطة الشابة والتبسيمة لحلوة، يتغداو مع بعضهم ويخرجو من وراها يحوسو حتى طيح عليهم الظلمة، منبعد يطير بيها للعش تاعهم ويكملو تجوالهم لمرة هادي في عوالم فوق السحاب..
فاتو ليام ليه ليه، ومنين قعدو غير يومين ويروحو، رجع نضال للدار متوخر شوية وين كانت ندى تستنا فيه بالحطة الباهية والروايح والشعر المطلوق، ضربتلو تبسيمة تقطر بالحلاوة (توخرت حبيبي اليوم) جاوبها وبان عليه التعب (إيه ليوم كملنا لورق كامل ومبقا غير حوايج قلال نديرهم) قرب منها وباسها على راسها يسقسي فيها (ومرتي الزينة وش دارت ليوم...؟) تبسمتلو وهي معلقة يديها على رقبتو (وجدتلك لغدا كيما يحب خاطرك) تبسملها وقالها بحنانة (كنت باغي نخرجك نتغداو البرا اليوم) حطت ندى راسها على صدرو وقالت بنبرة راضية (عمبالك بلي لقيت راحتي وأنا نفرز ونطيب، هيا بدل قشك راني وجدت الطابلة درك نسربي..!) كمل غسل وبدل قشو وقعدو يتغداو فلكوزينة في زوج، وهي تشوف فيه بعينيها الذايبين فيه بكل عشقها وغرامها ليه، سقساتو بالشوية (تعبان اليوم بزاف؟!) سقساتو مع كمل ماكلتو وجا نايض (علاه؟!) لحقتو هي للشمبرة وعاودت تسقسي فيه بدلال (منخرجوش لبرا ليوم؟!) شدها وقربها منو وين قعد يلمس في خدها بيدو (إيه بيانسور نخرجو بعد منرتاحو شوية...!!) بصح تمتم ضحكت ورجعت تأكد عليه بقوة (لالا عمبالي وش تقصد كي تقولي نرتاحو، درك نخرجو..!!!) ضحك بالصوت (ياربي شكون لي يتخيل دمية كيما نتي يخرج منها الشيء هادا كامل؟!) ندى بدلع (أنا دمية؟!) وحطت يدها على جنبها تخزر فيه بخزرات خلاو عينيه يظلمو، شدها وطبعها فيه وهمس بصوت خطير على قلبها (إيه دمية تاعي، لي راني باغي نلعب بيها درك بعد)...
