الحلقة 82 :
وقفت ندى فلكوزينة بسيف توجد في فنجان قهوة لنضال لي معاد يشربها غير على يدها، ملي بداها الوحم ريحتها معادتش تحملها خلاص، نفضت راسها شوية تقفل في نفسها باش متشمش ريحتها، ومنبعد حطت يدها وغطات بيه فمها، في الدقيقة لي دخل عليها نضال وهو باغي يهز عليها الفنجان تاع القهوة من خوفو لا تحكمها الدوخة وتصرا كارثة لاقدر الله، وقف وراها ولصق فيها يسقسي فيها بصوتو المبحوح قدام وذنها بطريقة خلاتها ترجف (وشبيك ياندى ؟! تباني تعبانة) تلفتت ليه ودفنت وجهها في صدرو باش تشم ريحتو لي ولات تعشق فيها كثر مع الوحم تاعها، زير على راسها (وش كاين ؟! وش قلقك؟!) جاوبتو متضايقة (والو غير ريحة القهوة لي مقلقتني) (صح؟!، علاش مخبرتينيش؟!) (خلاص شوية وتوجد متخممش) مال وهزها بين ذرعيه وداها لشمبرتها باش ترتاح، مهوش فايق بليلى لي كانت تخزر فيهم من فوق الدروج، بخزرات لي كلهم ألم، حزن، مرارة، وكسرة متداواش، ملامح وجهها كانو يبينو شعورها بالخسارة والحرمان والوحش لراجلها اللي كان بعدو عليها يزيد يوم بعد يوم، كانت حاسة بيديها مغلغلين معارفاش كيفاش تردو ليها، ولا تكسب شوية مالإهتمام لي كان مغرق بيه مرتو الجديدة، لهاديك الجنية الصغيرة لي سكنتلو لعروق ومشاتلو فالدم، وخلات قلبها يتشوى، إييه!! ماهي حاسة غير بنار في قلبها و كسرة كبيرة قاسمتلها ظهرها، وش ذنبها هي؟! ياك كانت نعم الزوجة في السنين لي فاتت ومكانش حاجة مدارتهاش ومجربتهاش غير باش ترضيه وترضي بيها جدو؟! وش ذنبها إذا قلبها تعلق بيه وبغاتو يقعد ديما جنبها ميفارقهاش؟! ياك تستاهل ؟! علاش حرقولها قلبها وكبدتها في راجلها وبنها لي رباتو على يدها ؟! طاحت دمعتها وسالت على طول وجهها، وزيرت على يدها بغل كبير، مستحيل راح تكون ضحية لعايلة اليحياوي، هادي العايلة لدمرتلها صغرها وهدمتلها حياتها، مرة كي تزوجت من راجل ميضنيش، ومرة كي تزوجت بطفل حولتو هي لراجل، لي كبر سنين هادي كاملة وجا نهار لي حطملها قلبها فيه، كي خلاها وراح يجري ورا وحدة صغيرة وشابة عليها، وبين زوج رجالا ضاع زينها وشبابها وصبحت حياتها قاحلة كي الصحرا بلا دراري، بلا حتى طفل واحد يعيطلها ماما كيما تمنات، أمنيتها الوحيدة لي ماتت في رحم المكتوب قبل ماتولد، بصح كيما حرقولها قلبها، راح تحرقلهم قلوبهم كامل، بلا متستثني حتى واحد...ولا واحد!!!!...
كيفكم اعرف الفصل قصير
لو أجد تفاعل رح اكمل
احبكم كثير
باااااي
