الحلقة 61:
تدعي في ربي كل ليلة باش يزورها، غير باش تسقسيه وش الحاجة لي غلطت فيها باش خلاتو يعاقبها بلقسوة هادي، ويعاقب نفسو ثاني وين رجعت تلمح المرارة في وجهو، نفس الملامح لي شافتها في الشخص لي جا وطلب يدها لمرة لولة، مش نضال لي عاشت معاه أحلى أيام حياتها في جيجل، هبطت دموعها كي الويدان كي شافاتو قاعد فالبيرو تاعو ويخزر فيها من بعيد، مماهيش عارفة وش راهو يخمم، ووين باغي يوصل..؟! علاش يراقب فيها وفي نفس الوقت يبعد فيها عليه؟! أسكو نضال البارد والجافي راح يرجع في بلاصة نضال الحنين والشغوف لي عرفتو في أيامهم الأولى تع الزواج؟! مسحت دموعها ودعات ربي باش تلقا لاريبونس ولا حل يطمن قلبها، وباش تلهي روحها هزت ثيليفون وعيطت لختها تقسر معاها بعد ماشافت الحالة لي راهي فيها هي ثاني، الحالة لي متبشرش بالخير خلاص...!!!
غلق نضال الريدو تاع الطاقة بالعنف بعد ماشاف ندى تمسح في دموعها، قعد واقف يخزر فلفراغ متمني يمد يدو ويمسحلها دموعها بيديه، عارف بلي راهي مقنوطة وقلقانة منو بصح مهوش عارف يتواصل معاها، ليسونتيمو تاعو مزالو غامضين ومش مفهومين، حاسس بالخنقة وبلي مجبور يغوص في بحر هايج مهوش عارف كيفاش يعوم فيه، لأنو طول حياتو المرة كان عايش بمنطق تاع كل حاجة عندها ثمن، جدو لي كان يفضلو على ولاد ولادو وحتى على عمو عبد السلام بسباب أنو ديما كان ينفذ طلباتو ومحترم رايو، وين قرا وتعب وخدم باش كون روحو وطور في راس المال العايلة حتى يرضا عليه جدو، بصح محسش بأنو ردلو الخير لي دارو فيه كامل غير بعد ما تزوج ليلى، حتى ليلى كان علابالو بلي موافقتها على الزواج مجات غير من ورا شوقها وحلمها بالضناية، وين كانت تغرقو بحنانتها غير عجال السبة هادي، وكي مكتبش المكتوب رجعت تحن عليه وتحبو باش تحافظ عليه، الراجل لي قعدلها في حياتها كيما قاتلو ليلة عرسو مع ندى، هذي هيا حياتو لي والف عليها، يمد الثمن ويدي المقابل، يا إما بطبطيبة على كتفو، ولا بعلاقة في الفراش، بصح مع ندى، وش مدلها حتى خلاها تصارحو؟! ووش يقدر يمدلها بالمقابل باش يعوض عليها وعلى قلبها لي راهي تقول بلي طايح فيه؟! يمدلها قلبو في المقابل...؟!. معلابالوش إذا كان يقدر؟!...وكيفاش يقدر وليلى مزالت في رقبتو ويتحاسب عليها قدام ربي، هادي زعما ماهيش خيانة؟! مهوش نفاق أنك تخلي قلبك يميل لجيهة وحدة؟! زعما مهوش راح يتحاسب عليها قدام ربي سبحانو بأنو معدلش بين نساه ؟! وظلم إنسان معندو حتى ذنب من غير أنو حب يكون جزء من حياتك؟! إنسان صبر وعاش معاك 15 سنة؟! لي عاش فيها صغرو معاها وخلاتو الراجل لي رجع عليه اليوم، مالا كيفاش يقدر يحب ندى بلا ميحبها هي؟!..وش هذا المنطق؟! لقا روحو يخمم أسكو الشيء لي يحس بيه من جيهة ندى هي مشاعر حب!!!، ممكن يكون غير إحساس بالسيطرة، بعد ما تأكد بلي هو الرجل الوحيد في حياتها، مينكرش بلي إعترافها حرك فيه إحساس شباب، بصح بيانسور مهوش حب، رجع مرة خلاف يخمم فيها، من نهار صارحتو بحبها وهو يتعمد يبعد عليها ويتجاهلها حتى يرجع لتوازنو وشخصيتو لقديمة، لنضال قبل جنيتو، لالا لازم عليه يذكر مليح بلي هي ندى بنت عمو لي تزوجها باش يجيبو لولاد لعايلة اليحياوي، لازم عليه ينسا هبالو معاها ويسيطر على نفسو لي انجر بسبابها ورا حياة جديدة، بصح لازم يفيق مالأوهام هادي ويرجع لعقلو، خاصة كي صبح يتيه بزاف في خدمتو حتى تولهولو كامل، وعقلو صبح طاير عند جنيتو وهبالها وأنوثتها، رجع مهووس بيها بطريقة خطيرة وهذا الشيء لي خلاه يقرر باش يحبسو بأي طريقة، حتى لوكان يدريها يرجع لحياتو الروتينية، ميهمش، سامطة ولالا بصح هي المعيشة لي والف عليها، ولازم على ندى تعيشها على طريقتو وشروطو....
