الحلقة 96:
وصل نضال محرق لدارو، ودخل هو اللول يعيط على ندى بلهفة، خرجت هي من شمبرتهم تجري لابسة خمارها ووجها صفر (نضال الحمد لله كي وصلت، مانيش عارفة وش بيها، أي تبكي ملي جات، خممت نعيط لماما، بصح ستنيتك تجي نت لول) مسحلها على خدها بالحنانة (متقلقيش، أو جبت معاي حمزة، مليح منعيطوش لخالتي حتى نفهمو وش راهو صاري) تلفت يعيط على حمزة لي دخل وراه بزربة، حتى كي شافتو ندى ناضت تعيط بعصبية (وش درتلها؟! عمبالـ.) قاطعها نضال (ندى أهدني، مناش عارفين وش المشكلة) كملت تعيط ويدها تشير بيها ليه (باينة هو المشكلة، خاطر من قبيل وهي شادة ثيليفونو وتبكي) همس حمزة بحرقة (وين راهي يا ندى؟!وين راهي وجدان؟!) سكتت ومبغاتش ترد عليه تخزر فيه بخزرات ماضيين، حتى سقساها نضال بلعقل (أي في شمبرتنا...!؟!) هزتلو راسها مشنفة، شارلو نضال براسو على الطريق وهز حمزة روحو تمتم وراح، وكي بغات ندى تلحقو حبسها نضال (خليه ياندى!) (بصح...) قاطعها (أي مرتو) قربت منو وحطت راسها على صدرو (خايفة ياذيها، وجدان سونسيبل بزاف...و..) شهقت مدهوشة بعد شافت الدم في مفاصل يديه (نضاال!!!وش صرا ليدك؟!!!) شاف مع يدو وضاق عليه صدرو كي تفكر وش صرا (متخميش، مصرا والو!) شدتلو يدو بلحنانة وقعدت تتأمل فيها (نضال دابزت؟! مع من دابزت؟!) (ندى ربي يعيشك خلينا مالسوجي هادا، أني قدامك لباس بيا) سقساتو مترددة (السوجي هادا عندو علاقة بليلى؟!) تبسم باستهزا (بانتلك كنت ندابز مع ليلى؟!) (لالا..مقصدتش..قصدي، ضربت كاش حيط ولا واش؟!) جاوبها بغموض(إيه تنجمي تقولي، متخميش) خزرت فيه مقلقة، وين كانت حاساتو مخبي عليها حاجة، وبيانسور ماهيش راح تحبس غير كي تعرفها، بصح مش درك، راح تؤجل الموضوع شوية، حتى تطمن على ختها، ندى (هيا معايا للكوزينة باش نحطلك شوية آقلاص على يدك) كي وصلو للكوزينة سقساتو بفضول (أهيه!؟ وش صرا مع ليلى؟!) خزر فيها وتبسم، وقعد يتأمل فلغيرة لي ظهرت على وجهها، وحس بحاجة تحركت فيه لداخل (والو!! مبغاتش تتلاقاني، قالي جدي بلي بغاتني نخليلها شوية وقت تخمم مع روحها) ضغطت على كتفو تصبر فيه (متتقلقش، جدي راهو متفهم موقف تاعك، بابا خبرني وراح تهدن إن شاء الله) وقبل مايجاوبها علا صوت وجدان على حمزة، وين كانو قادرين يسمعو هدرتها، حتى صفار وجه ندى وراحلو لون وجا لون، منبعد حمار ضربة وحدة، وقعدو في زوز مسمرين يخزرو في بعضاهم، قبل مايشدها نضال من يدها ويغلق الباب تاع الكوزينة عليهم (خلينا نمدولهم شوية خصوصية، وين راح هاداك لاقلاص لي خبرتيني عليه؟!) تحركت معاه في السكات وهي مزالت مشوكية من واش سمعتو، الشيء لي خلاه يهمسلها (تبانلي عيطي ليماك خير.!!!) جمعت شوية آقلاص في قماش نظيف وحطتو على الجرح في يدو، وهزتلو راسها تمتم بضيق (إيه عندك حق...لازم ماما تجي!!.)...
تفاعل
بايييي
