الحلقة 83:
سمع عياط فالصالون ومنين قرب بزربة لقا قاسم يتناقش مع يماه (ديما كنت تسبقي نضال، حتى على بنك) ضرب على صدرو بقهر (عليا أنا كيما داروها كامل، وشوفي وين وصل هو درك وأنا وين) عيطت عليه رقية (خلاص ياقاسم، حبس يا بني، عارف بلي جدك ملي كان نضال صغير وهو يوجد فيه باش يخلفو) (وزواجو لول لي رضا عليه جدي وكان لازم نكون أنا في بلاصتو بحكم أنا لي كبير عليه، علاش؟!) سكتت رقية تلهث بعصبية وطرطقت فيه ممنجماش تشد روحها (نت لي نسيت واقيلا، ولا باغي نفكرك في هادوك ليام الكحل لي جا فيهم نور الدين ربي يرحمو وخبرني بلي بني...بني لكبير لي كنت مطلعة راسي بيه، كان يسرق من دراهم الشركة، ولوكان مجاش هو وعمك لي جراو عليك لوكان راهي القضية وصلت للابوليس، تحسب جدك ماهوش عارف بالشيء هادا؟!) وكملت تعيط بحرقة (تحسب مكانش علابالو، لالا ياروح أمك..!؟!كون مجيتش أنا لي داريتو وبكيت عند رجليه كون راهم هزوك مسلسل ولاحوك فالسيلونة، زعما كان راح يقدر بابا يثيق فيك بعد الشيء لي درتو ويأمنك على هجالة عمك؟!...هااا؟!؟...جاوبني...؟!) سكت شوية مزير على سنيه وعيط عليها ( مالا علاش وقفتي معاه في زواجو ببنت خالي؟! كنتي عارفة بلي باغيها هادي عوااام، علاش مرحتيش هدرتي مع خالي باش يخليهالي..؟!) (نت مهبوول؟!!...ياك راك متزوج وحوالك لباس عليهم مع مرتك، هاديك المسكينة كيفاش راح تقبل تتزوج عليها بعد مهزتك وقامت بيك ووقفت جنبك في محنتك، مستحيل كانو راح يوافقولك، أنسى كلش درك، أنسى ندى ونضال وجدك، وأحمد ربي على وش وصلتلو اليوم) رجع صوتو يقطر بالغل (ننساها ؟!...إييه معنديش حل خلاف، بصح مستحيل راح نسكت) دخل حمزة وقاطع هدرتو ندى تعشق في نضال، وهو عندو الحق عليها مالا غير متخممش في مرت ولد خالك هادي مش عفسة تاع رجال) تبسم نضال باستهزا (اييييه شكون لي يهدر؟؟..ونت وين كنت اخويا؟!) جبد قرعة تاع الريحة ورشو بيها، حتى هز حمزة صوتو عليه (وش راك دير؟!) ضحك عليه قاسم (راني نخبي فريحة البارفان لي فيك باش ميصرالك حتى مشكل مع مرتك) نفض حمزة يد خوه بعيد عليه وكمل يعيط (واحد ميدخل روحو فيا!!!) شدت رقية في راسها وقعدت تمتم (ياربي وش درت في حياتي حتى يخرجولي ولادي هكذا...؟!!) هزت عينيها لحمزة بغل وعيطت عليه (واحد ميدخل فيك؟!..نسيت بلي وجدان بنت خويا؟!..تحساب فيا معلاباليش وش قاعد دير؟! والله ولوكان مش هي لي دارتني باش مندخلش بيناتكم لوكان عرفت كيفاش نتصرف معاك، بصح غيير أنسا باش نسكت كثر من هك، وتوله مع روحك ومع مرتك، خاطر إذا دخلت روحي هاهو وجهي إلا شفت وجدان مرة خلاف) تلفت حمزة بعيد وسب مابين سنيه، وقبل ميطرطق في وجها خلاهم وراح لشمبرتو، وين قعدت أمو تبع فيه بعينيها وقلبها ضايق عليها من وش راهو جاي...
