الحلقة 41 :
فاتت الأيام وندى طايرة فوق السحاب مع نضال لي كان يتفنن في معاملتو معاها، مغرقها بحنانتو ورقتو معاها، ورجعو تجانسو كعبد واحد في قمة التناغم، مكانتش ندى تتصور بلي في أيام قليلة راح تلقا روحها قريبة جسديا وروحيا مالانسان لي كان ديما كالحلم البعيد بالنسبة ليها، وتحستو تغلغل في عروقها، وسكن كل خلية منها، وهي ثاني كانت حاسة بلي قدرت توصل لنقطة في روحو وتسنيي على بلاصتها نتما، فرحت بزاف كي لقاتو بلي إنسان حنين ومتفهم وشغوف بزاف بطريقة متوقعتهاش، هو لي كان يبانلها آلة بلا مشاعر، بصح كان كل مرة يسافر بيها لعوالم خلاف ويخليها تتحرق كي الشمعة بين يديه، بصح راح تكذب اذا قالت بلي فرحتها كانت كاملة، وين كانت تفوت الليالي لي يزور فيهم ضرتها على الجمر، ومكانتش تعرف بلي فيها الرغبة هاديك تاع القتل غير كي شافت ليلى هابطة مالدروج بعد مقضات ليلتها مع نضال، وهي تتبسم وتزعبل كي القطة لي كلات حتى شبعت وزيادة، شحال كانت باغية تمسح هاديك التبسيمة من على وجهها، وباش مطاوعش شيطانها الواعر ديسيدات تحكم شمبرها أفضل من أنها تحكمها تقطعها بسنيها وترميها للكلاب، لحقها نضال لشمبرتها ولقاها واقفة فالطاقة وشاردة، قعد يشوف معاها ساكت وهو عارف بلي حستو معاها فالشمبرة بصح متجاهلتو
نضال (صباح الخير) قعدت ندى ساكتة ومقدرتش تجاوبو ودموعها يجريو ويدان، قرب منها بالشوية حتى لصق فيها ملورة وحط يديه على كتافها ودورها ليه، واندهش كي شاف دموعها يسيلو، ضمها بلعقل لصدرو وزيرها مليح ليه ويدو تمسح على شعرها بحنانة، حتى بدات تهدن بالشوية، وقعدو هكذاك زمان، واقفين وحدهم فلفراغ ووحد السكينة دايرة بيهم تقول غير هوما فوق الارض، لوين بعد شوية وباسها على جبينها ومسحلها دموعها، منبعد خرج.!!! تسمرت ندى في بلاصتها مشوكية وقعدت هكذاك زمان، وكي منجمتش تشد دموعها كثر رمات روحها فوق فراشها وطرطقت بالبكاء تقول جامي بكات، بعد اليوم هاداك، تعلمت ندى تتحكم في أعصابها وتعبيرات وجها، حتى متفضحش غيرتها القتالة على نضال وخاصة قدام ليلى، بصح هادا الشيء مقدرش يمنعها باش تحكم لسانها وعصبيتها عليه، وميسكتها ويطفي غشها غير بالبوس والحنانا لي تخليها تمتم تسلمو الراية ليه وتخضع لرجولتو وهي ذايبة بين يديه، نضال رجع يهتم بليلى اهتمام زايد بعد كل ليلة يبات فيها مع ندى، وهادا الشيء خلاها تهبل، حتى رجعت تفكر بلي يدير فالشيء هادا غير من احساسو بالذنب للجوع تاعو ليها وعاطفتو معاها، منجمتش ندى تخلي روحها للظنون هادو لي ياكلو فيها، وين راح يخليو حياتها مع نضال تتعرقل وسط المشاكل والنكد، وقررت باش متحطش بالها ليهم وتتوله بالعرس تاع أختها وجدان لي كانت الحاجة الوحيدة لي طلعتلها مورالها شوية، خلاها نضال تخرج مع أختها باش تكمل تقضي وتوجد دوزان العرس، ومنجمتش تفهم علاش ديما كان يأكدلها بلي لازم يكونو في زوج وحدهم بلا ميحضر حمزة معاهم وإلا حسابها راح يكون عسير معاه، ومبغاش يقلها على السبب حتى بعد مابقات تاكلو في راسو عليه، جات ليلة حنة لحباب وين وصل نضال ندى وليلى للدار، وكانت لالة مولاتها قاعدة في الكرسي اللول، وندى قاعدة لورا تعض في شواربها من الغيض، وهي غير تفوتلها فيهم، خاصة كي جات تزاحم فيها باش تحضر لحنة اختها ومبغاتش تقعد فالدار، وزاد كملت عليها كي خرجت تجري مالدار باش تسبق وتركب مالقدام، وماجاو يوصلو لدار باباها كانت ندى على شعرة وتتلاح عليها تخنقها ملورة بصاكها، نزلت ليلى مطوبيل بعد مبقات نضال بالسلامة، كي بغات ندى تنزل هي ثاني لقات بابها مبلع...سقساتو (نضال حلي الباب علاه كوندانيتيه ؟!؟) تلفت ليها وحكمها من ذراعها وقالها بالشوية (خلي الباب أندى، باغي نوصيك على حاجة؟!) تمتم تقلقت وسقساتو (خير أنضال وش هي؟!) خزر في عينيها (توعديني متشطحيش) تحلو عينيها بقنطة (بصح)....(مكانش بصح هذا حقي وهدرتلك عليه من قبل، ماني باغيك تشطحي قدام حد) هزت راسها بالقنطة وعطاتو وعد، وكي شافها هكاك تبسم ورجع طلعلها راسها باش يخزر فيها وفي عينيها الباهيين (أني نخاف عليك يامرتي الزينة) تبسمت شوية وقاتلو (خلاص منيش راح نشطح) شاف لشواربها وضغط عليهم بصبعو وين كان باغي يذوق ويستبن لعسل لي فيهم، بصح رجع وصاها بحنانة (متتقلقيش...وارجعي اضحكيلي الضحكة الباهية هاديك تاعك، وكي نرجعو للدار راح نخبرك بالسوربريز لي وجدتهالك !!!) ضحكت ندى كيما حب خاطرو (راك ترشي فيا ؟!)...(مظنيتش لازم عليا نرشيك) وتبسملها كي الثعلوب وين فهمت وش يقصد، ضربتو على ذراعو وهي حشمانة، ضحك ورجع فتحلها الباب وكمل قالها (خلاص انزلي يالجنية وسلميلي على الجماعة لي للداخل) نزلت ندى مالطوموبيل وليلى تبع فيهم بعينيها من قبيل، وين قدرت تسمع شوية من واش كانو يقولو والغل في قلبها كان باين في عينيها، خاصة بعد ماشافتو حاط صبعو على شاربها وياكل فيها بعينيه، ورجعت تهدر مع روحها (هادا هبل صح ؟!...وين راه نضال الرزين لي متفوت عليه حتى حاجة، كيفاش قدر يدير معاها هكذا قدام الناس، متكون غير ساحرتو بنت جنات!!!)...
