الحلقة 73:
(نضال أرواح عندي يا بني!!) قدم ليه نضال وعينيه فيهم غمامة بيضا، شحال كان مرتاح ومطمن بعد ماشاف عينين جدو يتفتحو ويحس بالروح مزالت فيه، قعد قدامو فوق الكرسي (الحمد لله على سلامتك ياجدي، تقلقنا عليك بزاف) طبطب جدو على كتفو بحنانة يهدر ويلهث(متتقلقش عليا ياولدي، نت معدتش وحدك درك، عندك مرتك وإن شاء الله راح يصبحو عندك ولادك، أنا طلبتك باغي نقلك حاجة يا نضال) (خير اجدي...!!!) بلع يعقوب غصتو وقالو بصوت واهن (باغيك تسامحني يابني، ظلمتك معايا بزاف وحملتك فوق طاقتك و) شدلو نضال يدو وزيرها مليح و قاطع كلامو أول مرة (نت مجبرتني على والو ياجدي، أا كنت موافق على كلشي..) (تشوف فيا مجبرتكش يابني؟!) (جدي راني مسامحك دنيا وآخرة أنا لي سامحني إذا قصرت معاك في حاجة، متمني ترجع بيناتنا كيما كنت هادا وش يهمني، وتأكد لوكان ترجع بيا ليام لورا كنت راح ندير نفس الحاجة) تنهد يعقوب بحرقة وتمتم (بارك الله فيك يابني، متمني جنات تكون متسامحة كيفك هادا وش نطلب فيه من ربي صبحة وعشية، راهي برا؟!) (اييه!!) (خليها تدخل عندي)، خرج نضال وهدر مع عبد السلام، لي دخل هو ومرتو جنات لعندو بخطوات ثقيلة ومترددة، شاف فيها من ورا غمامة تاع دموع وناجاها بصوت مهزوز (قربي يا بنت خويا!!)، جنات كانت تبلع في غصتها والدموع على راس شفارها وهي تقعد فوق الكرسي قدامو، شدلها يعقوب يدها (عشت حياتي كاملة وأنا هاز ذنبك فوق رقبتي كي الجبل يا جنات، ندامة معندها مديرلي حتى وإذا كليت التراب، وبلعت السم، بصح...) ولأول مرة طرطق بلبكا يعصر في عينيه بقهر وندم كبير (راني خايف نقابل ربي غدوة يابنتي، سامحيني وإرحميني ملعذاب يابنت خويا، ربي لي عالم شحال راني نتحرق بالنار لي كويتك بيها، كون دريت زمان يرجع بيا لورا كون قطعت لساني قبل متخرج كلمتي من فمي) قعد يعقوب يبكي ويشهق بكا يهز الجبال، رجل كبير في عمرو على فراش المرض يطلب فسماح من ذنب قديم مغلغل روحو كي القيد، طاحو دموع جنات ورا بعضاهم وهزت يدو باستها بوسة طويلة منبعد شافت في عينيه وقالتلو بقلب صافي(راك مسامح دنيا وآخرة يا عمي، هادا غير مكتوب ربي سبحانو اللهم لا إعتراض!!!) مال جيهتها وشدلها راسها وباسها، والدموع يجريو ويدان حتى عبد السلام ومنجمش يشدهم، ومخرجو من عندو غير كي تصافات القلوب وحنت على بعضاها، ورجعت ضحكة يعقوب على وجهو وتنهد تنهيدة مرتاحة...
