تعلن الخطوط الامارتيه عن قيام رحلتها المتوجهه الي لندن رجاء من جميع الركاب التوجه الي البوابه رقم 5..وانا لسه قاعده في مكاني وسارحه ورغم الضجه الحواليني ما كنت حاسه بشي كنت في عالم تاني ..
قبل شهور كنت في نفس الصاله معاي اسرتي بنتونس وبنضحك وماما بتقول لينا اهدوا شويه انتو اصلو ما بتعقلوا الناس كلهم بتفرجوا في عمايلكم بابا بضحك ويقول ليها ياخ خليهم عاملين جو لطيف يشاغلوا دا ويضحكوا مع دا انا اولادي ما مزعجين انا اولادي اولاد فرح وبنشروا الفرح وين ما يمشوا وماما زاتها تقعد تضحك طبعا ماما اسمها فرح شفتو بابا حناك كيف ..وانا في عز سرحاني اسمع اسمي فجاءه الرجاء من مريم محمد النصري التوجه الي البوابه رقم 5 فورا الطائرة علي وشك الاقلاع ..قمت سريع سريع ومشيت علي البوابه وفعلا لقيت اني اخر واحده وبعد النقه بتاعت الموظفين في تاخيري خموني ليك سريع سريع المهم بعد 5 دقائق كنت في الطياره وبعدها اقلعت الطياره.
ماعارفه انا حاسه بشنو حزن خوف وحده انا متالمه شديد قلبي واجعني مافي شي ممكن يطفي النار الجواي المهم استغفرت ربنا ومسحت دموعي وبقيت بعاين حواليني انا راكبه بزنس كلاس لقيت اي زول مشغول بحاجهو الحمدلله مافي زول في الكرسي جنبي ، في راجل في المقعد القصادي باين عليهو رجل اعمال شايل ليهو فايل بقرا فيهو ووراي في راجل وزوجتو وقصادهم في راجل كبير مركز مع كتاب اي زول في عالمو المهم بعد عدة ساعات وصلت الطياره الامارات واعلنت المضيفه انو الناس المتوجهين الي لندن عليهم البقاء في الطائره نسبه لظروف الجو السئيه اليومين الفاتت حصل اذحام في حركه سير الطائرات ماحننتظر ساعتين الطياره حتقلع في خلال 45 دقيقه كل الناس المعاي في البزنس كلاس نزلو وبعد حوالي نص ساعه جاء شاب قعد في الكرسي القصادي واقلعنا وبالرغم من ساعات الرحله الطويله مافينا زول اتكلم مع التاني.. أساسا انا حالتي كانت صعبه وما كان عندي نفس اتكلم مع زول نبهت المضيفه اني ماعايزه اكل وماتزعجني وطلبت بطانيه شلت البطانيه اتغطيت كلي حتي وشي تميت باقي بكاءي ونمت من غير ما اشعر
ماصحيت الا لما جات المضيفه صحتني عشان اربط الحزام لاننا خلاص وصلنا والطياره في حاله هبوط وصلنا لندن، البلد الماغريبه علي ابدا الاتولدت فيها لكن ل اول مره اجيها براي ، كنت حاسه بوحده عجيبه واول ما طلعت بره الصاله رجعت لزكرياتي تاني ودموعي جرت وحسيت الدنيا لافه بي وتاني ما حسيت بشي..
لما صحيت لقيت نفسي راقده في سرير في المستشفي وفي الكرسي قاعد الشاب الكان معاي في الطياره صحيت مخلوعه طبعا قال لي حمدلله علي السلامه لما وقعتي قدامي ما قدرت اسيبك وامشي جبتك اقرب مستشفي للمطار في الاثناء دي جاء الدكتور والدكتور بقي بتكلم معاي الشاب عامل فيها ظريف نظام انتي ممكن تكوني مافاهمه الانجليزي دا ، طوالي اختصرتو باني رديت للدكتور انو الهبوط الحصل لي دا نتيجه ارهاق واني ما ماكله ومامحتاج الموضوع لتحاليل واني بعد اخدت الدرب بقيت كويسه وبعدما ارتاح وااكل ح ابقي احسن ، الشاب اكتفي بابتسامه وبعدما مشي الدكتور شكرتو علي موقفو وسالتو من شنطتي اساسا جايا بشنطه واحده بس قال لي الشنطه في عربيتي خليني امشي اخلص إجراءات المستشفي واوصلك محل ما ماشه فتحت شنطه اليد قام صر لي قال لي الموضوع ما مستاهل قايلني دايره اديهو قروش المستشفي قلت ليهو كدي استهدي بالله هاك دي بطاقتي بتاعت التأمين انا مواطنه انجليزيه ضحك وشال البطاقه خلص الإجراءات مشينا علي العربية اصريت انو يديني شنطتي واني ح امشي بتاكسي رفض وقال لي الوقت بليل وماممكن اخليك تركبي تاكسي براك في الوقت دا لو ماعايزه تركبي معاي خلاص انا ح اركب معاك التاكسي اوصلك واجي راجع للعربية تاني ، حسيت بيهو ولد شهم قلت مافي داعي اكبر المواضيع وافقت انو يوصلني فتح لي باب العربيه الوراء قال لي كدا ممكن تكوني مطمئنة اكتر واعتبري نفسك كانك في تاكسي قفلت الباب الوراء وفتحت الباب القدام وركبت قلت ليهو انت جبتني المستشفي وانا مغمي علي ح اخاف منك وانا واعية ابتسم وسكت اتحركنا سالني ماشه ياتو منطقه طلعت تلفوني مليتو عنوان الفندق حسيت بيهو استغرب لكن ما سالني وتاني مافتح خشمو معاي بالرغم من انو المشوار طويل.. وصلنا الفندق نزل لي شنطتي وشكرتو تاني انا دخلت الفندق وهو مشي
وانا لسه في الاستقبال بتاع الفندق لقيت زول وراي بقول لي انسه مريم اتلفت لقيتو الشاب زاتو قال لي معليش بطاقتك بتاعت التامين باللخمه ما اديتك ليها شلت البطاقه وقلت ليهو بالجد شكرا يا... طبعا ماعارفه اسمو طوالي رد لي قال لي حسام ومافي داعي للشكر اي زول في مكاني حيعمل الانا عملتو ودعتو بابتسامه هو مشي وانا طلعت غرفتي كنت بالجد تعبانه ومرهقه ومافيني حيل وماعايزه افكر في شي فتحت شنطتي عشان اطلع الشاحن لقيت لي كرواسون بتاع جبنه اكلت وعندي حبوب منومه ببلعها عند اللزوم بلعت لي حبه وبعد دقايق كنت في سابع نومه
يتبع.....
