مج سي دوستي كارونجي..(نحن اصدقاء)
مريم تتحدث الهندية.. من يوم راني قالت لينا بسفر الهند ،قام علي شغف تعلم اللغات ، وبقيت شايله لي نوت واسال راني ونميش من الكلمات واسجل ، قطعتو ليك مع باقي الشله هههه، واصحابي راني ونميش بس الايامات دي.. واليوم كلو شايله نوتي وحايمه.. اكتر زول مغيوظ من الموضوع دا مهند لكن ولا شغاله بيهو
انا : نمستي نمستي.. كي هال هي
مهند : استغفر الله ، بتنبذي فينا صح؟
نميش : ههههه قالت ليكم السلام عليكم وكيف الحال
انا : ما تشتغل بيهو يا نميش دا ولد كوتا (كلب )
مهند : شنو شنو ؟؟؟؟
نميش : لالالا يامهند دي ما بقدر اترجمها ليك ههههه
راني : والله مبسوطه منك يامريم
مهند :ان شاءالله يضوا ليك راني ونميش ديل
انا : اجي بعد سماحتهم دي كان ما ضوا لي حتضوي لي انت يعني ..!. مهند فناني بالقلم ومشي ، كل يوم بقينا في الدرامات دي ، وانا جادعها ليهم اشواريا راي
كالعاده مضغوطين في القرايه والدراسه كل يوم ماشه لاصعب، وكمان عندنا اسيمنت مفروض نسلمو في خلال اسبوع بقينا من المحاضرات جري علي المكتبه نقعد لحدي بليل ونمشي الداخليه ناس نوم ، غايتو روحنا طلعت لحدي ما سلمناهو وياداب ارتحنا حبه.
(في الخير احلي ♡♡♡)
بالمساء ضرب لي مهند قال لي انا قاعد تحت في الداخليه انزلي سريع عندي ليك برنامج بكره، حتحبيهو حب ،وبشبهك جنس شبه ، انا في دقيقه نزلت ، اصلي زهجانه وبكره الاحد اجازه
مهند : اقسم بالله يابت النصري مشتاقين ماممكن معاك ياخ
انا : انا ما مشتاقه ليك ياخ.. انا مشتاقه ليك شديد جدا جدا ،وضحكنا
مهند : بكره عايزك تمشي معاي برنامج خيري من الظهر للمساء
انا : يا سلام من عيوني بس احكي لي البرنامج عباره عن شنو
مهند: طيب يا ستي اولا البرنامج ظريف، انا اول مره اشارك فيهو السنه الفاتت،لكن هو ليهو سنين ،انا ح احكي ليك بالتفصيل عشان تفهمي هو عباره عن شنو والمطلوب منك شنو
البرنامج ابتدأ قبل سنين، بفكره من مجموعه اطباء شباب لدعم المرضي وكان مسمينو ( اطباء بلا حدود ) وبمرور الايام كبر وانضم ليهم شباب من مختلف المجالات وبقت جمعيه عديل سموها (في الخير احلي)
انا : حلو شديد بس بجيبو الدعم من وين؟
مهند : اولا البرنامج ببدا بمعرض ، المعرض دا اي زول بشارك فيهو بحاجه للبيع،وقروشها بتمشي لصالح الجمعيه. المعرض عباره عن قاعه كبيره مسؤلين عنو لجنه انتي بتمشي تسلميهم الحاجه المشاركه بيها وما بتحددي السعر اي زول بشتري الحاجه البتعجبو بالقروش البقدر عليها وعموما الناس بتدفع كويس لانهم عارفين انها لدعم المرضي، و بوروك بس حاجتك جابت كم؟، كتشجيع ليك عشان تشارك تاني ، في نهايه المعرض بلموا كل قروش الحاجات الاتباعت ، والحاجات الما اتباعت بخلوها للمعرض الجاي
